O‘zbekiston Respublikasi Soliq kodeksi, O‘zbekiston Respublikasi “Davlat soliq xizmati to‘g‘risida”gi Qonunining 7-moddasi, O‘zbekiston Respublikasi Prezidentining 2008-yil 29-dekabrdagi “O‘zbekiston Respublikasining 2009-yilgi asosiy makroiqtisodiy ko‘rsatkichlari prognozi va Davlat budjeti parametrlari to‘g‘risida”gi PQ-1024-son qaroriga (O‘zbekiston Respublikasi qonun hujjatlari to‘plami, 2008-y., 52-son, 515-modda) muvofiq qaror qilamiz:

1. Ilova qilinayotgan Sementga va klinkerga qo‘shimcha foyda solig‘ini hisoblab chiqarish va budjetga to‘lash tartibi to‘g‘risidagi nizom tasdiqlansin.

2. O‘zbekiston Respublikasi Moliya vazirligi va Davlat soliq qo‘mitasining 2008-yil 8-fevraldagi 13 va 2008-10-son bilan tasdiqlangan “Sementga qo‘shimcha foyda solig‘ini hisoblab chiqarish va budjetga to‘lash tartibi to‘g‘risidagi Nizomni tasdiqlash haqida”gi qarori (Adliya vazirligida 2008-yil 21-fevralda 1772-son bilan davlat ro‘yxatidan o‘tkazilgan — O‘zbekiston Respublikasi qonun hujjatlari to‘plami, 2008-y., 8-9-son, 48-modda) o‘z kuchini yo‘qotgan deb topilsin.

3. Mazkur qaror O‘zbekiston Respublikasi Adliya vazirligida davlat ro‘yxatiga olingan kundan boshlab o‘n kun o‘tgach kuchga kiradi.

Ushbu Nizom O‘zbekiston Respublikasining Soliq kodeksiga, “Davlat soliq xizmati to‘g‘risida”gi O‘zbekiston Respublikasi Qonunining 7-moddasiga, “O‘zbekiston Respublikasining 2008-yilgi asosiy makroiqtisodiy ko‘rsatkichlari va Davlat budjeti parametrlari to‘g‘risida” O‘zbekiston Respublikasi Prezidentining 2008-yil 29-dekabrdagi PQ-1024-son qaroriga (O‘zbekiston Respublikasi qonun hujjatlari to‘plami, 2008-y., 52-son, 515-modda) muvofiq sementga va klinkerga qo‘shimcha foyda solig‘ini hisoblab chiqarish va budjetga to‘lash tartibini belgilaydi.

1. Ushbu Nizom oq sementga, shuningdek muqobil yoqilg‘i — ko‘mirda ishlab chiqarilgan sement va klinkerga tatbiq etilmaydi.

2. Ushbu Nizomda quyidagi tushunchalar qo‘llaniladi:

sementni (klinkerni) realizatsiya qilishdan olingan sof tushum — qo‘shilgan qiymat solig‘i chegirib tashlangan holda sementni (klinkerni) realizatsiya qilishdagi tushum;

hisob-kitob bahosi — O‘zbekiston Respublikasi Prezidentining O‘zbekiston Respublikasining navbatdagi yilgi asosiy makroiqtisodiy ko‘rsatkichlari va Davlat budjeti parametrlari to‘g‘risidagi qarori bilan har yili tasdiqlanadigan sementning (klinkerning) baholar darajasi;

qo‘shimcha foyda — sementni (klinkerni) qoplarga qadoqlash xarajatlari (qoplar qiymati qo‘shilgan holda) chegirib tashlangan holdagi sementni (klinkerni) realizatsiya qilishdan olingan sof tushum bilan barcha realizatsiya qilingan sement (klinker) hajmining hisob-kitob bahosi o‘rtasidagi ijobiy farq;

qo‘shimcha foyda solig‘i to‘langandan keyin soliq to‘lovchi ixtiyorida qoladigan mablag‘ — soliq solinadigan baza bilan qo‘shimcha foyda solig‘i o‘rtasidagi farq;

sof qo‘shimcha foyda — qo‘shimcha foyda qismiga to‘g‘ri keladigan, davlat maqsadli jamg‘armalariga majburiy ajratmalarni chegirib tashlangan, hisobot davridagi qo‘shimcha foyda summasidir.

3. Yuridik shaxslardan olinadigan foyda solig‘ini hisoblab chiqarishda sof qo‘shimcha foyda summasi soliq solinadigan bazaga qo‘shilmaydi.

4. Qonun hujjatlariga muvofiq soliq solish obyekti paydo bo‘ladigan, mulkchilik shakllaridan qat’i nazar, sement (klinker) ishlab chiqarishni amalga oshiradigan yuridik shaxslar qo‘shimcha foyda solig‘ini to‘lovchilar bo‘ladi.

5. Soliq to‘lovchining hisobot davridagi qo‘shimcha foyda solig‘i, qo‘shimcha foyda solig‘ini solish obyekti hisoblanadi.

6. Hisobot davrida realizatsiya qilingan sementning (klinkerning) barcha hajmi bo‘yicha aniqlanadigan sof qo‘shimcha foyda soliq solinadigan bazadir.

7. Qo‘shimcha foyda solig‘i O‘zbekiston Respublikasi Prezidentining qarori bilan belgilangan stavka bo‘yicha to‘lanadi.

8. Soliq davri — bir oy.

9. Hisobot davri oy hisoblanadi.

10. Qo‘shimcha foyda solig‘i summasi soliq solinadigan bazaning miqdoridan va belgilangan stavkalardan kelib chiqqan holda hisoblab chiqariladi.

11. Qo‘shimcha foyda solig‘i respublika budjetiga milliy valyuta — so‘mda o‘tkaziladi.

12. Qo‘shimcha foyda solig‘ining hisob-kitobi davlat soliq xizmati organlariga har bir mahsulotning turi bo‘yicha hisobot davridan keyingi oyning 25-sanasigacha, ushbu Nizomning 1 va 2-ilovalari shaklida taqdim etiladi.

13. Soliq to‘lovchilar qo‘shimcha foyda solig‘ini hisobot davrida mahsulotni realizatsiya qilishning haqiqiy hajmlaridan kelib chiqqan holda hisob-kitobni taqdim etish muddatidan kechiktirmay to‘laydilar.

14. O‘zbekiston Respublikasi buxgalteriya hisobi milliy standarti (21-son BHMS) “Xo‘jalik yurituvchi subyektlarning moliya-xo‘jalik faoliyati buxgalteriya hisobi hisobotlar rejasi va uni qo‘llash bo‘yicha yo‘riqnoma”ga muvofiq (2002-yil 23-oktabr, ro‘yxat raqami 1181 — Me’yoriy hujjatlar axborotnomasi, 2002-yil, 20-son; 2003-yil, 21-22-son) qo‘shimcha foyda solig‘ini hisoblash bilan bog‘liq operatsiyalar buxgalteriya hisobida quyidagicha aks ettiriladi:

a) qo‘shimcha foyda solig‘ini hisoblashda:

soliqlar va yig‘imlarni to‘lash uchun foydaning ishlatilishini hisobga oluvchi (9800) hisobvaraqning qo‘shimcha ochiladigan 9811 “Qo‘shimcha foyda solig‘i bo‘yicha xarajatlar” hisobvarag‘ining debeti;

6410 “Budjetga to‘lovlar bo‘yicha qarz (turlari bo‘yicha)” hisobvaraqning krediti”;

b) soliq summasini budjetga o‘tkazishda:

6410 “Budjetga to‘lovlar bo‘yicha qarz (turlari bo‘yicha)” hisobvaraqning debeti;

pul mablag‘larini hisobga oluvchi hisobvaraqning krediti.

15. Qo‘shimcha foyda solig‘ini buxgalteriya hisobida aks ettirish uchun qo‘shimcha foyda solig‘i bo‘yicha hisob-kitob asos bo‘ladi.

16. Moliyaviy natijalar to‘g‘risida hisobot (2-son shakl)da 9811 “Qo‘shimcha foyda solig‘i bo‘yicha xarajatlar” hisobvarag‘ida hisobga olingan, qo‘shimcha foyda solig‘i summasi qo‘shimcha ochiladigan “Qo‘shimcha foyda solig‘i” 251-satrida ko‘rsatiladi.

17. Soliq to‘lovchilar qo‘shimcha foyda solig‘ining to‘g‘ri hisoblab chiqarilishi va to‘lanishi uchun O‘zbekiston Respublikasining qonun hujjatlariga muvofiq javobgar bo‘ladilar.

18. Qo‘shimcha foyda solig‘ining to‘g‘ri hisoblab chiqarilishi va to‘lanishi ustidan nazorat O‘zbekiston Respublikasining qonun hujjatlariga muvofiq O‘zbekiston Respublikasining davlat soliq xizmati organlari tomonidan amalga oshiriladi.