41-сон 12.02.2009. Aholi punktlarini kompleks qurishda shaharsozlik normalari va qoidalari qatʼiy bajarilishini nazorat qilishni kuchaytirishga doir qoʻshimcha chora-tadbirlar toʻgʻrisida

Hujjat kuchini yo‘qotgan 18.04.2024

O‘zbekiston Respublikasi Vazirlar Mahkamasining

qarori

AHOLI PUNKTLARINI KOMPLEKS QURIShDA ShAHARSOZLIK NORMALARI VA QOIDALARI QAT’IY BAJARILIShINI NAZORAT QILIShNI KUChAYTIRIShGA DOIR QO‘ShIMChA ChORA-TADBIRLAR TO‘G‘RISIDA

LexUZ sharhi

Mazkur qaror O‘zbekiston Respublikasi Vazirlar Mahkamasining 2024 yil 17 apreldagi 214-sonli “O‘zbekiston Respublikasi Qurilish va uy-joy kommunal xo‘jaligi vazirligi hamda uning tizimidagi tashkilotlar to‘g‘risidagi nizomlarni tasdiqlash haqida”gi qaroriga asosan o‘z kuchini yo‘qotgan.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, O‘zbekiston Respublikasi “Davarxitektqurilish” qo‘mitasi tomonidan nazoratning susaytirib yuborilganligi natijasida, shuningdek shaharlar (tumanlar) hokimlarining loqaydligi oqibatida aholi punktlarini rekonstruksiya qilish va obodonlashtirishda, me’moriy va tarixiy-madaniy yodgorliklarni tiklashda, avtomobil yo‘llari qurishda, ishlab chiqarish va ijtimoiy infratuzilma obyektlarini joylashtirishda shaharsozlik faoliyati sohasida belgilangan normalar va qoidalarning qo‘pol ravishda buzilishi hollari davom etmoqda.

Hududiy arxitektura va qurilish bo‘linmalari rahbarlarida zarur qat’iyat yo‘qligi oqibatida aholi punktlarini qurish shaharsozlik va arxitektura normalari, kommunikatsiya, transport va sanitariya talablari, istiqbolli qurish rejalari bilan mutlaqo bog‘lanmasdan amalga oshirilmoqda.

Yuqorida ko‘rsatib o‘tilgan kamchiliklar, mahalliy davlat hokimiyati organlari tegishli mansabdor shaxslarining harakatsizligi, passivligi, shuningdek O‘zbekiston Respublikasi “Davarxitektqurilish” qo‘mitasi va uning hududiy bo‘linmalari rahbarlarining aholi punktlarini kompleks qurish muammolarini hal qilishdan o‘zlarini chetga olishlari shaharlar va tumanlarning tashqi qiyofasi buzilishiga, aholining asosli noroziligiga olib kelmoqda, shuningdek respublika mehmonlarida salbiy taassurot tug‘dirmoqda.

Respublika aholi punktlarini zamonaviy shaharsozlik talablari va milliy an’analarga muvofiq kompleks rivojlantirishni ta’minlash, me’moriy-tarixiy merosni saqlab qolish, qabul qilinayotgan loyiha yechimlari sifatini oshirish, shuningdek shaharsozlikka oid qonun hujjatlariga rioya etilishi ustidan nazoratni kuchaytirish maqsadida Vazirlar Mahkamasi qaror qiladi:

1. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, O‘zbekiston Respublikasi “Davarxitektqurilish” qo‘mitasi va uning hududiy bo‘linmalarining tegishli hududda shaharsozlik faoliyatini muvofiqlashtirish va nazorat qilish, aholi punktlarini kompleks qurishda bosh rejalarga, shaharsozlik normalari va qoidalariga rioya etilishini ta’minlash bo‘yicha ishlari qoniqarsiz deb hisoblansin.

2. Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari, O‘zbekiston Respublikasi “Davarxitektqurilish” qo‘mitasi va uning hududiy arxitektura va qurilish bo‘linmalari, davlat arxitektura-nazorati rahbarlari aholi punktlarini kompleks qurish bosh rejalariga rioya etilishi uchun shaxsan javobgar ekanliklari to‘g‘risida qat’iy ogohlantirilsin.

3. O‘zbekiston Respublikasi Vazirlar Mahkamasi huzurida 1-ilovaga muvofiq tarkibda Aholi punktlari kompleks qurilishini nazorat qilish komissiyasi (keyingi o‘rinlarda Komissiya deb ataladi) va respublika mintaqalari bo‘yicha zaruriyatga qarab vaqtinchalik faoliyat yuritadigan ishchi guruhlari tashkil etilsin.

(3-band O‘zbekiston Respublikasi Vazirlar Mahkamasining 2019-yil 14-iyundagi 498-sonli qarori tahririda — Qonun hujjatlari ma’lumotlari milliy bazasi, 20.06.2019-y., 09/19/498/3310-son)

4. Quyidagilar Komissiyaning asosiy vazifalari etib belgilansin:

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, hududiy qurilish, yer resurslari va davlat kadastri bo‘linmalari, boshqa aloqador organlar tomonidan shaharsozlikka oid qonunchilikka, shaharsozlik normalari va qoidalariga rioya etilishi ustidan ta’sirchan nazoratni ta’minlash;

(4-bandning ikkinchi xatboshisi O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)

Qoraqalpog‘iston Respublikasi Vazirlar Kengashi, viloyatlar, shaharlar va tumanlar hokimliklari, hududiy qurilish bo‘limlari tomonidan aholi punktlarining tasdiqlangan bosh rejalarining asosiy qoidalari amalga oshirilishini nazorat qilish;

(4-bandning uchinchi xatboshisi O‘zbekiston Respublikasi Vazirlar Mahkamasining 2019-yil 14-iyundagi 498-sonli qarori tahririda — Qonun hujjatlari ma’lumotlari milliy bazasi, 20.06.2019-y., 09/19/498/3310-son)

aholi punktlarini zamonaviy talablar va milliy an’analarga muvofiq shaharsozlik jihatidan kompleks rivojlantirishni, ularning me’moriy-badiiy qiyofasini va boy me’moriy-tarixiy merosni saqlab qolishni ta’minlash masalalarini ko‘rib chiqish va ular bo‘yicha takliflar kiritish;

shaharsozlik faoliyati subyektlari tomonidan shaharsozlik normalari va qoidalari, atrof muhitni muhofaza qilish, ekologiya xavfsizligi talablariga, shuningdek sanitariya normalari va qoidalariga rioya etilishi ahvolini har tomonlama o‘rganish;

noqonuniy qurilishlarning, shaharsozlik faoliyatini amalga oshirish uchun berilgan yer uchastkalaridan noo‘rin foydalanilishining oldini olish va ularga yo‘l qo‘ymaslik yuzasidan aniq chora-tadbirlarni ishlab chiqish va ro‘yobga chiqarish;

shaharsozlik faoliyati samaradorligini oshirish, aholi punktlari bosh rejalarining asosiy qoidalarini o‘z vaqtida va sifatli amalga oshirish, shaharsozlikka oid qonunchilik yuzasidan takliflar tayyorlash;

(4-bandning yettinchi xatboshisi O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)

aholi punktlarini kompleks qurishda shaharsozlikka oid qonunchilikning qo‘pol buzilishiga yo‘l qo‘yilganligi uchun tegishli mansabdor shaxslarni javobgarlikka tortish to‘g‘risida takliflar kiritish.

(4-bandning sakkizinchi xatboshisi O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)

5. Belgilab qo‘yilsinki, Komissiyaning o‘z vakolatlari doirasida qabul qilgan qarorlari Qoraqalpog‘iston Respublikasi Vazirlar Kengashi, viloyatlar, shaharlar va tumanlar hokimliklari, shuningdek davlat va xo‘jalik boshqaruvi organlari tomonidan bajarilishi majburiydir.

6. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari o‘n kun muddatda Aholi punktlari kompleks qurilishini nazorat qilish hududiy komissiyalari tashkil etsinlar.

7. Quyidagilar:

O‘zbekiston Respublikasi Vazirlar Mahkamasi huzuridagi Aholi punktlari kompleks qurilishini nazorat qilish komissiyasi to‘g‘risidagi Nizom 2-ilovaga muvofiq;

Aholi punktlari kompleks qurilishini nazorat qilish hududiy komissiyasi to‘g‘risidagi Nizom 3-ilovaga muvofiq tasdiqlansin.

8. Komissiya (N.Xanov):

aholi punktlarini qurishda shaharsozlik normalari va qoidalariga rioya etilishining ishchi guruhlar tomonidan muntazam ravishda o‘rganilishini ta’minlasin;

tasdiqlangan jadvalga muvofiq ishchi guruhlar tomonidan o‘rganish natijalari ko‘rib chiqilishini, shuningdek mahalliy davlat hokimiyati organlari tegishli rahbarlarining hisobotlari eshitib borilishini ta’minlasin.

9. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari N.M.Xanov zimmasiga yuklansin.

O‘zbekiston Respublikasining Bosh vaziri Sh. MIRZIYOYEV

Toshkent sh.,

2009-yil 12-fevral,

41-son

Vazirlar Mahkamasining 2009-yil 12-fevraldagi 41-son qaroriga
1-ILOVA

O‘zbekiston Respublikasi Vazirlar Mahkamasi huzuridagi Aholi punktlari kompleks qurilishini nazorat qilish komissiyasi

TARKIBI

Ramatov A.J.	―	O‘zbekiston Respublikasi Bosh vazirining birinchi o‘rinbosari, Komissiya raisi
Lavozimiga kura	―	Qurilish vaziri, Komissiya raisining o‘rinbosari
Ergashev R.	―	Ichki ishlar vazirining o‘rinbosari, Komissiya raisining o‘rinbosari
Zakirov B.I.	―	Qurilish vazirining birinchi o‘rinbosari
Tulyaganov K.N.	―	Qurilish vazirining o‘rinbosari
Abdullayev A.X.	―	“Yergeodezkadastr” davlat qo‘mitasining raisi
Gulyamov R.A.	―	Iqtisodiyot va sanoat vazirining birinchi o‘rinbosari
Kuchkarov B.T.	―	Ekologiya va atrof muhitni muhofaza qilish davlat qo‘mitasining raisi
Saliyev M.X.	―	Uy-joy kommunal xizmat ko‘rsatish vaziri
Mirzabayev D.S.	―	Sog‘liqni saqlash vazirining o‘rinbosari, O‘zbekiston Respublikasining Bosh davlat sanitariya vrachi
Abduvaliyev A.A.	―	Transport vazirligi huzuridagi Avtomobil yo‘llari qo‘mitasi raisi
Javlonov Sh.S.	―	Fuqarolarni o‘zini o‘zi boshqarish organlari faoliyatini muvofiqlashtirish bo‘yicha respublika kengashi raisi
Adilxodjayev B.E.	―	“ToshkentboshplanLITI” DUK direktori
Madjidov G.G.	―	“O‘zshaharsozlikLITI” DUK direktori
Axmedov I.S.	―	“Qishloqqurilishloyiha” institutining direktori
Lavozimiga ko‘ra	―	Vazirlar Mahkamasining Hududlarni kompleks rivojlantirish, kommunikatsiyalar, qurilish va uy-joy kommunal xo‘jaligi masalalari kotibiyati bosh mutaxassisi
Hikmatullayev R.	―	Qurilish vazirligining hududlarni arxitektura va shaharsozlik jihatidan rivojlantirish boshqarmasi boshlig‘i, Komissiyaning mas’ul kotibi

Izoh: Komissiya a’zolari boshqa ishga o‘tgan taqdirda, Komissiya tarkibiga ularning lavozimiga yangidan tayinlangan shaxslar yoki tegishli funksiyalar yuklangan shaxslar kiritiladi.

O‘zbekiston Respublikasi Vazirlar Mahkamasi huzuridagi Qoraqalpog‘iston Respublikasi, viloyatlar va Toshkent shahridagi aholi punktlarida zaruriyatga qarab vaqtinchalik kompleks qurilishni o‘rganish bo‘yicha ishchi guruhi

TARKIBI

	1.	Qurilish vazirligi — bosh boshqarma boshlig‘i
	2.	Ichki ishlar vazirligi — boshqarma boshlig‘i
	3.	Iqtisodiyot va sanoat vazirligi — boshqarma boshlig‘i
	4.	“Yergeodezkadastr” davlat qo‘mitasi — boshqarma boshlig‘i
	5.	Ekologiya va atrof muhitni muhofaza qilish davlat qo‘mitasi — boshqarma boshlig‘i
	6.	Uy-joy kommunal xizmat ko‘rsatish vazirligi — boshqarma boshlig‘i
	7.	Sanitariya-epidemiologik osoyishtalik va jamoat salomatligi xizmatining hududiy boshqarmasi — boshqarma boshlig‘i
	8.	Transport vazirligi huzuridagi Avtomobil yo‘llari qo‘mitasi — boshqarma boshlig‘i
	9.	Fuqarolarni o‘zini o‘zi boshqarish organlari faoliyatini muvofiqlashtirish bo‘yicha respublika kengashi — rais o‘rinbosari
	10.	“ToshkentboshplanLITI” DUK — direktor o‘rinbosari
	11.	“O‘zshaharsozlikLITI” DUK — direktor o‘rinbosari
	12.	“Qishloqqurilishloyiha” instituti — direktor o‘rinbosari

Izoh. Zaruratga qarab, komissiya raisi tomonidan shu tarkibda bir yoki undan ortiq ishchi guruhlari tuzilishi mumkin. Guruh rahbari etib Respublika komissiyasi a’zolaridan biri biriktiriladi.

(1-ilovaning 7-bandi O‘zbekiston Respublikasi Vazirlar Mahkamasining 2021-yil 19-noyabrdagi 694-sonli qarori tahririda — Qonunchilik ma’lumotlari milliy bazasi, 20.11.2021-y., 09/21/694/1075-son)

Vazirlar Mahkamasining 2009-yil 12-fevraldagi 41-son qaroriga
2-ILOVA

O‘zbekiston Respublikasi Vazirlar Mahkamasi huzuridagi Aholi punktlari kompleks qurilishini nazorat qilish komissiyasi to‘g‘risida

NIZOM

I. Umumiy qoidalar

1. O‘zbekiston Respublikasi Vazirlar Mahkamasi huzuridagi Aholi punktlari kompleks qurilishini nazorat qilish komissiyasi (keyingi o‘rinlarda Komissiya deb ataladi) respublika aholi punktlarini kompleks qurishda shaharsozlik normalari va qoidalariga rioya etilishi ustidan nazoratni kuchaytirish maqsadida tashkil etilgan.

2. Komissiya o‘z faoliyatida O‘zbekiston Respublikasi Konstitutsiyasiga, O‘zbekiston Respublikasi qonunlariga, O‘zbekiston Respublikasi Oliy Majlisi palatalari qarorlari va boshqa hujjatlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, boshqa qonunchilik hujjatlariga, shuningdek ushbu Nizomga amal qiladi.

(2-band O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)

3. Komissiya tarkibi O‘zbekiston Respublikasi Vazirlar Mahkamasi tomonidan tasdiqlanadi.

4. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzurida Aholi punktlari kompleks qurilishini nazorat qilish hududiy komissiyalari (keyingi o‘rinlarda hududiy komissiyalar deb ataladi) faoliyat ko‘rsatadi, ularning tarkibi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan tasdiqlanadi.

II. Komissiyaning asosiy vazifalari va huquqlari

5. Quyidagilar Komissiyaning asosiy vazifalari hisoblanadi:

(5-bandning ikkinchi xatboshisi O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)

(5-bandning uchinchi xatboshisi O‘zbekiston Respublikasi Vazirlar Mahkamasining 2019-yil 14-iyundagi 498-sonli qarori tahririda — Qonun hujjatlari ma’lumotlari milliy bazasi, 20.06.2019-y., 09/19/498/3310-son)

(5-bandning yettinchi xatboshisi O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)

(5-bandning sakkizinchi xatboshisi O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)

6. Komissiya quyidagi huquqlarga ega:

o‘z qarorlarining Qoraqalpog‘iston Respublikasi Vazirlar Kengashi, viloyatlar, shaharlar va tumanlar hokimliklari, shuningdek davlat va xo‘jalik boshqaruvi organlari tomonidan bajarilishini nazorat qilish;

davlat va xo‘jalik boshqaruvi organlari, mahalliy davlat hokimiyati organlaridan Komissiyaga yuklangan vazifalarni bajarish uchun zarur bo‘lgan ma’lumotlar va hujjatlarni so‘rash;

mahalliy davlat hokimiyati organlari, davlat va xo‘jalik boshqaruvi organlari hududiy bo‘linmalari tegishli rahbarlarining hisobotlarini eshitish;

davlat va xo‘jalik boshqaruvi organlariga, mahalliy davlat hokimiyati organlariga Komissiya qarorlarining bajarilishini ta’minlamagan tegishli mansabdor shaxslarga intizomiy va boshqa jazo choralari qo‘llash to‘g‘risida taqdimnomalar kiritish;

vakolatli davlat organlariga tegishli hududda shaharsozlikka oid qonunchilik talablari buzilgan holda amalga oshirilayotgan shaharsozlik faoliyatini cheklash, to‘xtatib turish yoki belgilangan tartibda taqiqlash to‘g‘risida taqdimnomalar kiritish.

(6-bandning oltinchi xatboshisi O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)

III. Komissiya faoliyatini tashkil etish

7. Komissiyaga rais boshchilik qiladi, uning vakolatlariga quyidagilar kiradi:

Komissiya majlislarini chaqirish va uning kun tartibini belgilash;

Komissiya tomonidan qabul qilingan qarorlarning bajarilishi ustidan nazoratni tashkil etish;

Komissiyaga yuklangan vazifalarni bajarish yuzasidan Komissiya a’zolari ishlarini muvofiqlashtirish;

Komissiya tomonidan tashkil etilgan ishchi guruhlar faoliyati ustidan nazoratni amalga oshirish;

Komissiyaning samarali ishlashini ta’minlash yuzasidan boshqa xatti-harakatlarni bajarish.

8. Komissiya o‘z ishlarini Komissiya raisi tomonidan tasdiqlanadigan yillik reja va ishchi guruhlar tomonidan o‘tkazilgan o‘rganishlar natijalarini ko‘rib chiqish jadvali asosida tashkil qiladi.

9. Komissiya majlislari tasdiqlangan ish rejasi va jadvalga muvofiq har oyda kamida bir marta o‘tkaziladi. Komissiya raisi tomonidan navbatdan tashqari majlislar chaqirilishi mumkin.

10. Komissiya majlisini uning raisi boshqaradi. Komissiya raisi bo‘lmagan taqdirda majlisni uning o‘rinbosari boshqaradi. Komissiya majlisi unda Komissiya a’zolarining kamida uchdan ikki qismi qatnashgan taqdirda vakolatli hisoblanadi.

11. Komissiya raisi bilan kelishgan holda uning obyektiv sabablarga ko‘ra majlisda qatnashmayotgan a’zolari o‘rniga ularning vakolatli vakillari ovoz berish huquqisiz qatnashishlari mumkin.

12. Komissiya majlisiga tegishli ishchi guruhlar a’zolari, hududiy komissiyalarning rahbarlari, hokimliklarning rahbarlari va boshqa mansabdor shaxslari, shuningdek, ko‘rib chiqilayotgan masalalar xarakteriga ko‘ra, davlat va xo‘jalik boshqaruvi organlari rahbarlari taklif etiladi.

13. Komissiya majlislarida ishchi guruhlar tomonidan o‘tkazilgan o‘rganishlarning natijalari ko‘rib chiqiladi, shuningdek hududiy komissiyalarning, mahalliy davlat hokimiyati organlari, davlat va xo‘jalik boshqaruvi organlari hududiy bo‘linmalari tegishli rahbarlarining hisobotlari eshitiladi.

14. Komissiya har chorakda Vazirlar Mahkamasiga bajarilgan ishlar to‘g‘risida axborot taqdim etadi.

IV. Komissiyaning ishchi guruhlari faoliyatini tashkil etish tartibi

15. Komissiya yuklangan vazifalarni amalga oshirish uchun ishchi guruhlar tashkil qiladi, ularga ishlash uchun tegishli mutaxassislarni jalb etadi.

16. Ishchi guruhlar faoliyati Komissiyaning uning raisi tomonidan tasdiqlanadigan ish rejasiga va joylarda aholi punktlarini kompleks qurish masalalarini o‘rganish jadvaliga muvofiq tashkil etiladi.

17. Ishchi guruh joylarga borgan holda aholi punktlarini kompleks qurishning ahvolini o‘rganadi va tahlil qiladi. Bunda o‘rganish va tahlil qilish Komissiya raisi tasdiqlaydigan o‘rganish rejasiga va savollariga muvofiq amalga oshiriladi.

18. Ishchi guruhlar o‘z faoliyatini hududiy komissiyalar bilan yaqin hamkorlikda amalga oshiradi. Joylardagi ishchi guruhlar faoliyatini tashkiliy jihatdan ta’minlash hududiy komissiyalar raislari zimmasiga yuklanadi.

19. Ishchi guruh joylarga borgungacha, tayyorlangan o‘rganish rejasi va savollari tegishli hududiy komissiyaga yuboriladi, hududiy komissiya ular asosida zarur materiallar tayyorlanishini ta’minlaydi.

20. Ishchi guruh joylarga kelgach hududiy komissiya tomonidan tayyorlangan materiallarni, hududiy komissiya faoliyatini, Komissiya qarorlarining bajarilishini o‘rganadi va tahlil qiladi.

Aholi punktlarini kompleks qurishning ahvolini o‘rganish ishchi guruh tomonidan, tegishli aholi punktlariga, ishlayotgan, qurilayotgan va rekonstruksiya qilinayotgan obyektlarga, kelgusida qurish mo‘ljallanayotgan hududlarga bevosita borgan holda amalga oshiriladi.

Ishchi guruh o‘z vazifalarini amalga oshirishda quyidagi huquqlarga ega:

aholi punktlarini kompleks qurishning ahvolini o‘rganish uchun mahalliy davlat hokimiyati organlarining, davlat va xo‘jalik boshqaruvi tegishli organlarining mutaxassislarini jalb qilish;

mahalliy davlat hokimiyati organlaridan, davlat va xo‘jalik boshqaruvi organlari bo‘linmalaridan zarur ma’lumotlar va hujjatlarni so‘rash;

mahalliy davlat hokimiyati organlari, davlat va xo‘jalik boshqaruvi organlari hududiy bo‘linmalari tegishli rahbarlarining hisobotlarini eshitish;

tegishli hududiy komissiyalarga, mahalliy davlat hokimiyati organlariga, davlat va xo‘jalik boshqaruvi organlari bo‘linmalariga aholi punktlarini kompleks qurish sohasidagi mavjud kamchiliklarni bartaraf etish, shaharsozlikka doir qonunchilikka, shaharsozlik normalari va qoidalariga qat’iy va izchil rioya qilinishini ta’minlash bo‘yicha zarur chora-tadbirlar ko‘rish to‘g‘risida takliflar kiritish;

(20-bandning yettinchi xatboshisi O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)

mahalliy davlat hokimiyati organlariga, davlat va xo‘jalik boshqaruvi organlari bo‘linmalariga Komissiya qarorlari bajarilishini ta’minlamagan tegishli mansabdor shaxslarga nisbatan intizomiy va boshqa jazo choralari qo‘llash to‘g‘risida taqdimnomalar kiritish.

21. Ishchi guruh o‘rganish natijalari bo‘yicha hududiy komissiya bilan birgalikda, komissiya majlislarida ko‘rib chiqish uchun xulosa va tegishli materiallar tayyorlaydi. Xulosa ishchi guruh va hududiy komissiya rahbari tomonidan imzolanadi hamda boshqa materiallar bilan birga Komissiyaga kiritiladi.

Ishchi guruhlar va hududiy komissiyalarning rahbarlari va a’zolari tayyorlangan materiallarning sifati va xolisonaligi uchun shaxsan javob beradilar.

22. Ishchi guruhlarning ish reglamenti, shaharsozlik faoliyati sohasidagi ishlarning ahvolini o‘rganish va Komissiya majlisida ko‘rib chiqishga kiritish uchun tegishli takliflar tayyorlash tartibi Komissiya tomonidan belgilanadi.

V. Komissiyaning ishchi organi va kotibi

23. O‘zbekiston Respublikasi Qurilish vazirligi Komissiyaning ishchi organi hisoblanadi.

(23-band O‘zbekiston Respublikasi Vazirlar Mahkamasining 2019-yil 14-iyundagi 498-sonli qarori tahririda — Qonun hujjatlari ma’lumotlari milliy bazasi, 20.06.2019-y., 09/19/498/3310-son)

24. Komissiyaning ishchi organi:

navbatdagi davr uchun Komissiyaning ish rejasi loyihasini tayyorlaydi;

Komissiyaning navbatdagi majlisiga barcha zarur materiallarning o‘z vaqtida tayyorlanishini ta’minlaydi va vazirliklar, idoralar, yuridik shaxslar birlashmalari, mahalliy davlat hokimiyati organlari, tijorat banklari, korxonalar hamda Komissiya a’zolaridan zarur materiallar va ekspert xulosalarni olish huquqiga ega bo‘ladi;

kun tartibidagi masalalar bo‘yicha tahliliy materiallar tayyorlashni va Komissiya majlislarini o‘tkazishni tashkil qiladi;

Komissiyaga ko‘rib chiqish uchun axborot va tahliliy materiallarni taqdim etadi;

Komissiyaga ko‘rib chiqish uchun uning qarorlariga muvofiq boshqa materiallarni taqdim etadi.

25. Komissiya kotibi:

Komissiyaning navbatdagi majlisiga barcha zarur materiallarning o‘z vaqtida tayyorlanishini ta’minlaydi;

Komissiya majlisiga materiallarni tayyorlash bo‘yicha ishchi guruhlar va ishchi organ ishlarini tashkil qiladi;

kun tartibidagi masalalar bo‘yicha Komissiya majlislarini o‘tkazishni tashkil qiladi;

Komissiya raisi bilan majlislarni o‘tkazish muddatlari va joyini, shuningdek taklif etiladiganlar kontingentini kelishib oladi;

Komissiya a’zolari va taklif etilgan shaxslarni majlisning o‘tkazilish sanasi, vaqti, joyi to‘g‘risida xabardor qiladi;

Komissiya qarorlarining bajarilishi monitoringini olib boradi va uning natijalarini Komissiya majlisida ko‘rib chiqish uchun taqdim etadi;

Komissiya protokollarini rasmiylashtiradi va tasdiqlangan protokollarni Komissiya a’zolariga, manfaatdor vazirliklar, idoralar, mahalliy davlat hokimiyati organlariga yuboradi.

VI. Komissiya majlisiga materiallar tayyorlash tartibi

26. Ishchi guruhlar va hududiy komissiyalar tomonidan taqdim etilgan materiallarni ishchi organ ko‘rib chiqadi, u Komissiya majlisida ko‘rib chiqish uchun ularni rasmiylashtiradi, Komissiya majlisining kun tartibini tayyorlaydi va hujjatlar paketini Komissiya kotibiga taqdim etadi.

27. Komissiya majlisi kun tartibidagi har bir masala uchun hujjatlar paketida qaror qabul qilish uchun zarur materiallar (ishchi guruhlarning xulosalari, tahliliy ma’lumotnomalar, jadvallar va shu kabilar) hamda Komissiya qarorining loyihasi mavjud bo‘lishi kerak.

28. Komissiya kotibi taqdim etilgan materiallar to‘g‘risida Komissiya raisiga axborot beradi, Komissiya raisi kun tartibi va taqdim etilgan materiallar ma’qullangan taqdirda Komissiya majlisi o‘tkaziladigan vaqtni va sanani, shuningdek Komissiya majlisiga taklif etiladigan shaxslarni belgilaydi.

29. Komissiya kotibi ishchi organ bilan birgalikda majlis materiallarini protokol loyihasi bilan birga Komissiya a’zolariga, zaruriyat bo‘lganda, shuningdek majlisga taklif etilgan boshqa shaxslarga yuborishni ta’minlaydi.

VII. Komissiya tomonidan qarorlar qabul qilish va ularning bajarilishini tashkil etish

30. Komissiya qarori Komissiyaning majlisda qatnashayotgan a’zolarining oddiy ko‘pchilik ovozi bilan qabul qilinadi.Ovozlar teng bo‘lgan taqdirda Komissiya raisining ovozi hal qiluvchi hisoblanadi.

Komissiyaning har bir a’zosi qabul qilinayotgan qarorlar yuzasidan o‘z fikrini yozma ravishda bildirish huquqiga ega.

31. Komissiya raisi qarorlarni tezkor qabul qilish maqsadida Komissiyaning alohida masalalar bo‘yicha Komissiya a’zolari bilan kelishilgan qarorlarini so‘rov yo‘li bilan tasdiqlashi mumkin.

32. Komissiya qarorlari Komissiya majlisi protokoli bilan rasmiylashtiriladi. Komissiya majlisi protokoliga uning barcha a’zolari tomonidan rozilik belgisi qo‘yiladi, u kotib tomonidan imzolanadi, Komissiya raisi tomonidan tasdiqlanadi va bir hafta muddatda Komissiya a’zolariga hamda manfaatdor tashkilotlarga yuboriladi.

33. Komissiya protokolining asl nusxasi va unga tegishli materiallar O‘zbekiston Respublikasi Vazirlar Mahkamasining Kommunal soha ekologiya, atrof muhitni muhofaza qilish, transport, kapital qurilish va qurilish industriyasi masalalari axborot-tahlil departamentida saqlanadi.

(33-band O‘zbekiston Respublikasi Vazirlar Mahkamasining 2018-yil 29-maydagi 400-sonli qarori tahririda — Qonun hujjatlari ma’lumotlari milliy bazasi, 01.06.2018-y., 09/18/400/1289-son)

34. Komissiyaning o‘z vakolatlari doirasida qabul qilingan qarorlarining Qoraqalpog‘iston Respublikasi Vazirlar Kengashi, viloyatlar, shaharlar va tumanlar hokimliklari, shuningdek davlat va xo‘jalik boshqaruvi organlari tomonidan bajarilishi majburiydir.

35. Komissiya qarorlarining bajarilishini nazorat qilish Komissiyaning ishchi organi va ishchi guruhlari tomonidan amalga oshiriladi.

36. Ishchi organ va ishchi guruhlar Komissiya qarorlarini bajarilishini muntazam ravishda o‘rganishadi va ko‘rib chiqishadi, zaruriyat bo‘lganda Komissiya raisiga tegishli takliflar kiritishadi.

Qabul qilingan qarorlar bajarilmagan taqdirda Komissiya raisi O‘zbekiston Respublikasi Vazirlar Mahkamasiga aybdor mansabdor shaxslarga nisbatan javobgarlik choralarini qo‘llash to‘g‘risida takliflar kiritishga haqlidir.

37. Komissiya qarorlarining hududlarda bajarilishini tashkil etish hududiy komissiyalarga yuklanadi. Hududiy komissiyalar Komissiya qarorlari bajarilishini tashkil etish bo‘yicha zarur tadbirlarni ishlab chiqadilar va ularning o‘z vaqtida amalga oshirilishini ta’minlaydilar.

38. Ishchi organ, ishchi guruhlar va hududiy komissiyalar Komissiya qarorlarining bajarilishi natijalari to‘g‘risida har oyda Komissiyaga zarur materiallarni ilova qilgan holda tegishli tahliliy ma’lumotnoma taqdim etadilar.

39. Komissiya qabul qilingan qarorlarning bajarilishi ahvolini o‘z majlislarida muntazam ravishda ko‘rib chiqadi.

Vazirlar Mahkamasining 2009-yil 12-fevraldagi 41-son qaroriga
3-ILOVA

Aholi punktlari kompleks qurilishini nazorat qilish hududiy komissiyasi to‘g‘risida

NIZOM

I. Umumiy qoidalar

1. Aholi punktlari kompleks qurilishini nazorat qilish hududiy komissiyalari Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzurida tegishli hududda aholi punktlarini kompleks qurishda shaharsozlik normalari va qoidalariga rioya etilishi ustidan nazoratni kuchaytirish maqsadida tashkil etiladi.

2. Aholi punktlari kompleks qurilishini nazorat qilish hududiy komissiyasi (keyingi o‘rinlarda hududiy komissiya deb ataladi) o‘z faoliyatida O‘zbekiston Respublikasi Konstitutsiyasiga, O‘zbekiston Respublikasi qonunlariga, O‘zbekiston Respublikasi Oliy Majlisi palatalari qarorlari va boshqa hujjatlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, boshqa qonunchilik hujjatlariga, O‘zbekiston Respublikasi Vazirlar Mahkamasi huzuridagi Aholi punktlari kompleks qurilishini nazorat qilish komissiyasi to‘g‘risidagi Nizomga, shuningdek ushbu Nizomga amal qiladi.

(2-band O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)

3. Hududiy komissiya tegishli ravishda Qoraqalpog‘iston Respublikasi Vazirlar Kengashiga, viloyatlar va Toshkent shahar hokimlariga, shuningdek O‘zbekiston Respublikasi Vazirlar Mahkamasi huzuridagi Aholi punktlari kompleks qurilishini nazorat qilish komissiyasiga (keyingi o‘rinlarda Komissiya deb ataladi) hisob beradi.

Hududiy komissiyaning o‘z vakolatlari doirasida qabul qilgan qarorlarining tumanlar (shaharlar) hokimliklari, hududiy qurilish bo‘linmalari, shuningdek tegishli hududda joylashgan davlat va xo‘jalik boshqaruvi organlari, ularning tarkibiy bo‘linmalari tomonidan bajarilishi majburiydir.

(3-bandning ikkinchi xatboshisi O‘zbekiston Respublikasi Vazirlar Mahkamasining 2019-yil 14-iyundagi 498-sonli qarori tahririda — Qonun hujjatlari ma’lumotlari milliy bazasi, 20.06.2019-y., 09/19/498/3310-son)

II. Hududiy komissiyaning vazifalari va huquqlari

4. Quyidagilar hududiy komissiyaning asosiy vazifalari hisoblanadi:

tumanlar (shaharlar) hokimliklari, hududiy qurilish, yer resurslari va davlat kadastri bo‘linmalari, boshqa aloqador organlar tomonidan shaharsozlikka oid qonunchilikka, shaharsozlik normalari va qoidalariga rioya etilishi ustidan nazoratni amalga oshirish;

tumanlar (shaharlar) hokimliklari, hududiy qurilish bo‘linmalari tomonidan aholi punktlarining tasdiqlangan bosh rejalarining asosiy qoidalari, hududlarni rejalashtirish sxemalari, muhandislik, transport va ijtimoiy infratuzilmani rivojlantirish, obodonlashtirish sxema va loyihalari, tumanni (tumanlar guruhini) rejalashtirish loyihalari, qurish qoidalari amalga oshirilishini muvofiqlashtirish va ta’minlash;

muhandislik, transport va ijtimoiy infratuzilmalarni oqilona joylashtirish, rivojlantirish, aholi punktlari yerlaridan maqsadli foydalanish, uy-joy fondi hamda ijtimoiy va ishlab chiqarish maqsadidagi obyektlar saqlanishini ta’minlash bo‘yicha kompleks chora-tadbirlarni ishlab chiqish va amalga oshirish;

zamonaviy talablar va milliy an’analarga muvofiq aholi punktlarini shaharsozlik bo‘yicha kompleks rivojlantirishni, ularning me’moriy-badiiy qiyofasi va boy me’moriy-tarixiy meros saqlanishini ta’minlash bo‘yicha masalalarni ko‘rib chiqish va takliflar kiritish;

shaharsozlik faoliyati obyektlarining, shaharsozlik hujjatlarini amalga oshirish, ularni ekspertizadan o‘tkazish, shaharsozlik faoliyati subyektlari tomonidan shaharsozlik normalari va qoidalariga, atrof muhitni muhofaza qilish, ekologik xavfsizlik talablariga, shuningdek sanitariya norma va qoidalariga rioya etilishi monitoringini olib borish;

noqonuniy qurilishlarning, shaharsozlik faoliyatini amalga oshirish uchun berilgan yer uchastkalaridan noo‘rin foydalanishning oldini olish va unga yo‘l qo‘ymaslik chora-tadbirlarini ko‘rish;

shaharsozlik faoliyati samaradorligini oshirish, aholi punktlari bosh rejalari asosiy qoidalarining o‘z vaqtida va sifatli amalga oshirilishi, shaharsozlikka doir qonunchilikni takomillashtirish bo‘yicha takliflar tayyorlash.

5. Hududiy komissiya quyidagi huquqlarga ega:

o‘z qarorlarining shaharlar va tumanlar hokimliklari, shuningdek davlat va xo‘jalik boshqaruvi organlari tomonidan bajarilishini nazorat qilish;

davlat va xo‘jalik boshqaruvi organlaridan, mahalliy davlat hokimiyati organlaridan hududiy komissiyaga yuklangan vazifalarni bajarish uchun zarur bo‘lgan ma’lumotlar va hujjatlarni so‘rash;

mahalliy davlat hokimiyati organlari, davlat va xo‘jalik boshqaruvi organlari hududiy bo‘linmalari tegishli rahbarlarining hisobotlarini eshitish;

davlat va xo‘jalik boshqaruvi organlariga, mahalliy davlat hokimiyati organlariga Komissiya qarorlarining bajarilishini ta’minlamagan tegishli mansabdor shaxslarga nisbatan intizomiy va boshqa jazo choralarini qo‘llash shuningdek aybdor shaxslarni qonunchilikda nazarda tutilgan javobgarlikka tortish to‘g‘risida taqdimnomalar kiritish;

(5-bandning beshinchi xatboshisi O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)

vakolatli davlat organlariga tegishli hududda shaharsozlikka doir qonunchilik hujjatlari talablarini buzgan holda amalga oshirilayotgan shaharsozlik faoliyatini cheklash, to‘xtatib turish yoki belgilangan tartibda to‘xtatish to‘g‘risida takliflar kiritish.

(5-bandning oltinchi xatboshisi O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)

III. Hududiy komissiyalar faoliyatini tashkil etish

6. Hududiy komissiya ushbu Nizomga ilovaga muvofiq tarkibda tashkil etiladi.

7. Hududiy komissiyaga rais boshchilik qiladi, uning vakolatiga quyidagilar kiradi:

hududiy komissiya faoliyatini unga yuklangan vazifalarga muvofiq tashkil etish;

hududiy komissiya majlislarini chaqirish va ularning kun tartibini belgilash;

Komissiya va hududiy komissiya qarorlari bajarilishi ustidan nazoratni tashkil etish;

hududiy komissiya a’zolarining unga yuklangan vazifalarni bajarish bo‘yicha ishlarini muvofiqlashtirish;

hududiy komissiyaning samarali ishlashini ta’minlash bo‘yicha boshqa xatti-harakatlarni bajarish.

Hududiy komissiya raisi:

Komissiyaga va uning ishchi guruhlariga haqqoniy va mufassal axborotning o‘z vaqtida taqdim etilishi;

hududiy komissiyaning unga yuklangan vazifalarni bajarish bo‘yicha faoliyatining natijadorligi uchun javob beradi.

8. Hududiy komissiya a’zolari ular o‘rtasida taqsimlangan vazifalarning bajarilishi uchun javob beradilar.

9. Hududiy komissiya o‘z ishlarini O‘zbekiston Respublikasi Vazirlar Mahkamasi huzuridagi Aholi punktlari kompleks qurilishini nazorat qilish komissiyasi ish rejasiga muvofiq ishlab chiqiladigan va hududiy komissiya raisi tasdiqlaydigan yillik reja asosida tashkil qiladi.

10. Hududiy komissiya doimiy va muntazam ravishda, tegishli aholi punktlariga, ishlayotgan, qurilayotgan va rekonstruksiya qilinayotgan obyektlarga istiqbolli qurish mo‘ljallanayotgan hududlarga bevosita borgan holda shaharsozlikka oid qonunchilik, shaharsozlik normalari va qoidalarining talablari bajarilishining ahvolini o‘rganadi.

(10-band O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)

11. Hududiy komissiya majlislari tasdiqlangan ish rejasiga muvofiq har oyda kamida bir marta o‘tkaziladi. Hududiy komissiya raisi tomonidan navbatdan tashqari majlislar chaqirilishi mumkin.

12. Hududiy komissiya majlisini uning raisi boshqaradi. Hududiy komissiya raisi bo‘lmagan taqdirda majlisni uning o‘rinbosari boshqaradi. Hududiy komissiya majlisi unda o‘z a’zolarining kamida uchdan ikki qismi qatnashgan taqdirda vakolatli hisoblanadi.

Hududiy komissiya qarori a’zolarning oddiy ko‘pchilik ovozi bilan qabul qilinadi. Ovozlar teng bo‘lgan taqdirda hududiy komissiya raisining ovozi hal qiluvchi hisoblanadi.

Hududiy komissiyaning har bir a’zosi qabul qilinayotgan qarorlar yuzasidan o‘z fikrini yozma ravishda bildirishga haqlidir.

13. Hududiy komissiya raisi bilan kelishgan holda uning obyektiv sabablarga ko‘ra majlisda qatnashmayotgan a’zolari o‘rniga ularning vakolatli vakillari ovoz berish huquqisiz qatnashishlari mumkin.

14. Hududiy komissiya raisi qarorlarni tezkor qabul qilish maqsadida hududiy komissiya a’zolari bilan kelishilgan alohida masalalar bo‘yicha qarorlarni so‘rov yo‘li bilan tasdiqlashi mumkin.

15. Hududiy komissiya majlislariga hokimliklarning rahbarlari va boshqa mansabdor shaxslari, shuningdek, ko‘rib chiqilayotgan masalalar xarakteriga ko‘ra, davlat va xo‘jalik boshqaruvi organlari bo‘linmalari rahbarlari taklif etiladi.

Hududiy komissiya majlislarida hududiy guruhlar tomonidan o‘tkazilgan o‘rganishlarning natijalari ko‘rib chiqiladi, shuningdek mahalliy davlat hokimiyati organlari, davlat va xo‘jalik boshqaruvi hududiy bo‘linmalari tegishli rahbarlarining hisobotlari eshitiladi.

16. Hududiy komissiya qarorlari hududiy komissiya majlisining protokoli bilan rasmiylashtiriladi. Hududiy komissiya majlisi protokoliga uning barcha a’zolarining rozilik belgisi qo‘yiladi, protokol kotib tomonidan imzolanadi, hududiy komissiya raisi tomonidan tasdiqlanadi hamda bir hafta muddatda hududiy komissiya a’zolariga, manfaatdor tashkilotlarga va Komissiyaning ishchi organiga yuboriladi.

17. Hududiy komissiya protokolining asl nusxasi va unga tegishli materiallar hududiy komissiyaning ishchi organida saqlanadi.

18. Hududiy komissiya qarorlarining bajarilishini nazorat qilish hududiy komissiyaning ishchi organi tomonidan amalga oshiriladi.

19. Hududiy komissiya har oyda, oy tugagandan keyin 10 kun mobaynida Komissiyaga hisobot davrida bajarilgan ishlar to‘g‘risida hisobot taqdim etadi.

IV. Hududiy komissiyaning ishchi organi

20. Qoraqalpog‘iston Respublikasi Qurilish vazirligi, viloyatlar va Toshkent shahar qurilish bosh boshqarmalari tegishli ravishda hududiy komissiyaning ishchi organi hisoblanadi.

(20-band O‘zbekiston Respublikasi Vazirlar Mahkamasining 2019-yil 14-iyundagi 498-sonli qarori tahririda — Qonun hujjatlari ma’lumotlari milliy bazasi, 20.06.2019-y., 09/19/498/3310-son)

21. Hududiy komissiyaning ishchi organi:

navbatdagi davr uchun hududiy komissiyaning ish rejasi loyihasini tayyorlaydi;

hududiy komissiyaning navbatdagi majlisiga barcha zarur materiallarning o‘z vaqtida tayyorlanishini ta’minlaydi va mahalliy davlat hokimiyati tegishli organlaridan, davlat va xo‘jalik boshqaruvi hududiy organlaridan hamda hududiy komissiya a’zolaridan zarur materiallar va ekspert xulosalarni olish huquqiga ega bo‘ladi;

kun tartibidagi masalalar bo‘yicha tahliliy materiallar tayyorlashni va hududiy komissiya majlislarini o‘tkazishni tashkil qiladi;

hududiy komissiyaga ko‘rib chiqish uchun axborot va tahliliy materiallarni taqdim etadi;

hududiy komissiyaga ko‘rib chiqish uchun uning qarorlariga muvofiq boshqa materiallarni taqdim etadi;

kun tartibidagi masalalar bo‘yicha hududiy komissiyaning majlislarini o‘tkazishni tashkil qiladi;

hududiy komissiya raisi bilan majlislarni o‘tkazish muddatlari va joyini, shuningdek taklif etiladiganlar kontingentini kelishib oladi;

hududiy komissiya a’zolarini va taklif etilgan shaxslarni majlisning o‘tkazilish sanasi, vaqti, joyi to‘g‘risida xabardor qiladi;

hududiy komissiya qarorlarining bajarilishi monitoringini olib boradi va uning natijalarini hududiy komissiya majlisida ko‘rib chiqish uchun taqdim etadi;

hududiy komissiya protokollarini rasmiylashtiradi va tasdiqlangan protokollarni hududiy komissiya a’zolariga, manfaatdor tashkilotlarga yuboradi.

Aholi punktlari kompleks qurilishini nazorat qilish hududiy komissiyasi to‘g‘risidagi nizomga
ILOVA

Aholi punktlari kompleks qurilishini nazorat qilish hududiy komissiyasining

NAMUNAVIY TARKIBI

1. Qoraqalpog‘iston Respublikasi Vazirlar Kengashi Raisining, viloyatlar va Toshkent shahar hokimlarining qurilish masalalariga mutasaddi o‘rinbosari (hududiy komissiya raisi).

2. Hududiy qurilish bo‘limi rahbarlari.

(2-band O‘zbekiston Respublikasi Vazirlar Mahkamasining 2019-yil 14-iyundagi 498-sonli qarori tahririda — Qonun hujjatlari ma’lumotlari milliy bazasi, 20.06.2019-y., 09/19/498/3310-son)

3. Hududiy yer resurslari va davlat kadastri bo‘linmasining rahbari.

4. Hududiy Sanitariya-epidemiologik osoyishtalik va jamoat salomatligi xizmati hududiy boshqarmasining rahbari.

(4-band O‘zbekiston Respublikasi Vazirlar Mahkamasining 2021-yil 19-noyabrdagi 694-sonli qarori tahririda — Qonunchilik ma’lumotlari milliy bazasi, 20.11.2021-y., 09/21/694/1075-son)

5. Hududiy tabiatni muhofaza qilish bo‘linmasining rahbari.

6. Hududiy ichki ishlar bo‘linmasi rahbarining o‘rinbosari.

7. Hududiy iqtisodiyot bo‘linmasining rahbari.

8. “Mahalla” jamg‘armasining hududiy bo‘linmasi rahbari.

9. Boshqa aloqador organlar va tashkilotlarning rahbarlari va mansabdor shaxslari.

(O‘zbekiston Respublikasi qonun hujjatlari to‘plami, 2009-y., 8-son, 77-modda; 2011-y., 31-son, 327-modda; Qonun hujjatlari ma’lumotlari milliy bazasi, 01.06.2018-y., 09/18/400/1289-son, 20.06.2019-y., 09/19/498/3310-son; 27.06.2020-y., 09/20/411/1000-son; Qonunchilik ma’lumotlari milliy bazasi, 20.11.2021-y., 09/21/694/1075-son; 05.04.2022-y., 09/22/153/0266-son)