Chakana savdoda elektron tijoratni amalga oshirishda toʻlovlarni toʻlash tizimini yanada takomillashtirish, elektron tijoratning jadal rivojlantirilishini ragʻbatlantirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Vazirlar Mahkamasining 2002-yil 26-noyabrdagi 407-son qarori (Oʻzbekiston Respublikasi QT, 2002-y., 11-son, 71-modda) bilan tasdiqlangan Ulgurji va chakana savdo faoliyatini roʻyxatdan oʻtkazish va amalga oshirish tartibi toʻgʻrisidagi Nizomning 1-bandi ikkinchi xatboshidagi “shaxslarga” soʻzidan keyin “shuningdek elektron tijoratga nisbatan” soʻzlari qoʻshilsin.

2. Vazirlar Mahkamasining “Plastik kartochkalar asosida hisob-kitob qilish tizimini yanada rivojlantirish chora-tadbirlari toʻgʻrisida” 2004-yil 24-sentabrdagi 445-son qarorining (Oʻzbekiston Respublikasi QT, 2004-y., 9-son, 94-modda) 4-bandi quyidagi tahrirda bayon qilinsin:

“4. Belgilab qoʻyilsinki, plastik kartochkalardan foydalanib tovarlarni sotishda va xizmatlar koʻrsatishda xoʻjalik yurituvchi subyektlar tomonidan beriladigan terminal cheklari, shuningdek qonun hujjatlarida belgilangan tartibda elektron raqamli imzo bilan tasdiqlangan elektron tijorat chakana savdo toʻlovlari tizimlarining tranzaksiyalari (“elektron cheklar”)dan koʻchirmalar kvitansiyalar, talonlar, chiptalarga hamda tovarlar va xizmatlarga haq toʻlanganligini tasdiqlovchi ularga tenglashtirilgan boshqa hujjatlarga tenglashtiriladi”.