Farmatsevtika tarmogʻi korxonalarining ishlab chiqarish quvvatlaridan samarali va oqilona foydalanish, eksportga yoʻnaltirilgan raqobatbardosh farmatsevtika mahsulotlari ishlab chiqarishni koʻpaytirish, shuningdek respublika aholisining mahalliy dori vositalari va tibbiyot buyumlariga boʻlgan talab-ehtiyojini yanada toʻliq qondirish maqsadida:

1. Quyidagilar 2011-yilgacha boʻlgan davrda farmatsevtika tarmogʻi korxonalarini modernizatsiya qilish, texnikaviy va texnologik qayta jihozlash Dasturining eng muhim vazifalari deb hisoblansin:

respublika aholisi, davolash-profilaktika va dorixona muassasalarining mahalliy dori-darmon va tibbiyot buyumlariga boʻlgan ehtiyojini oʻrganish asosida ularni ishlab chiqarishning ustuvor yoʻnalishlarini belgilash;

ishlab chiqarish jarayoniga zamonaviy texnologiyalarni joriy etish yoʻli bilan, shu jumladan, xorijiy investitsiyalarni jalb etish, shuningdek tarmoq korxonalarining mavjud ishlab chiqarish quvvatlaridan yanada samarali foydalanish hisobiga ishlab chiqariladigan dori vositalari va tibbiyot buyumlari sarf-xarajatlarini kamaytirish va raqobatbardoshligini oshirish;

respublika korxonalarida yangi dori substansiyalari va tayyor dori vositalarining sanoat miqyosida ishlab chiqarilishini taʼminlash, eng avvalo ijtimoiy ahamiyatga molik kasalliklarni davolash uchun ularni mahalliy xomashyodan tayyorlash boʻyicha ilmiy tadqiqotlar va innovatsiya ishlanmalarini amalga oshirish.

2. “Oʻzfarmsanoat” DAK tomonidan Oʻzbekiston Respublikasi Sogʻliqni saqlash vazirligi, Iqtisodiyot vazirligi, Fanlar akademiyasi, farmatsevtika tarmogʻi korxonalari bilan birgalikda ishlab chiqilgan 2011-yilgacha boʻlgan davrda farmatsevtika tarmogʻi korxonalarini modernizatsiya qilish, texnikaviy va texnologik qayta jihozlash Dasturi maʼqullansin, unda quyidagilar nazarda tutiladi:

2007—2011-yillardagi davrda farmatsevtika sanoati korxonalarini modernizatsiya qilish, texnikaviy va texnologik qayta jihozlash Dasturining maqsadli parametrlari 1-ilovaga* muvofiq;

mahsulot ishlab chiqarishning prognoz parametrlari hamda farmatsevtika tarmogʻi korxonalarini modernizatsiya qilish, texnikaviy va texnologik qayta jihozlash boʻyicha investitsiya takliflari roʻyxati 2 va 3-ilovalarga* muvofiq.

“Oʻzfarmsanoat” DAK boshqaruvi raisi, Qoraqalpogʻiston Respublikasi Vazirlar Kengashi raisi, viloyatlar va Toshkent shahar hokimlari zimmalariga farmatsevtika tarmogʻi korxonalarini modernizatsiya qilish, texnikaviy va texnologik qayta jihozlash Dasturining maqsadli prognoz parametrlari toʻliq hajmda va belgilangan muddatlarda bajarilishini taʼminlash boʻyicha shaxsiy javobgarlik yuklansin.

3. “Oʻzfarmsanoat” DAK, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

ishlab chiqarilayotgan dori vositalarining sifatini yaxshilash, ularning aholiga, birinchi navbatda pensionyerlar, nogironlar va qariyalar uchun maqbul narxlarda ishlab chiqarilishini taʼminlashga alohida eʼtibor bergan holda, chora-tadbirlar kompleksini amalga oshirsin;

aholiga hamda davolash-profilaktika va dorixona muassasalari xodimlariga mahalliy korxonalar tomonidan ishlab chiqarilayotgan dori vositalarining turlari toʻgʻrisida muntazam va tizimli asosda axborot berib borilishini, shuningdek mahalliy dori vositalari va tibbiyot buyumlarining har yilgi savdo-yarmarkalari oʻtkazilishini taʼminlasin;

Oʻzbekiston Respublikasi Sogʻliqni saqlash vazirligi, “Dori-darmon” AK bilan birgalikda bir oy muddatda mahalliy farmatsevtika mahsulotlariga boʻlgan talabni oʻrganishga yoʻnaltirilgan marketing siyosatini doimiy asosda olib borishni nazarda tutuvchi chora-tadbirlar kompleksini tasdiqlasin;

Oʻzbekiston Respublikasi Fanlar Akademiyasi va tarmoq ilmiy-tadqiqot institutlari bilan birgalikda respublika korxonalarida yangi dori substansiyalari va tayyor dori vositalarini sanoat miqyosida ishlab chiqarishni taʼminlash uchun ularni mahalliy xomashyodan tayyorlash boʻyicha tizimli ilmiy tadqiqotlar oʻtkazsin va innovatsiya ishlanmalarini yaratsin.

4. Oʻzbekiston Respublikasi Sogʻliqni saqlash vazirligi uch oy muddatda eng koʻp tarqalgan kasalliklar turlari boʻyicha mahalliy korxonalar tomonidan ishlab chiqariladigan preparatlar va tibbiyot buyumlarini hisobga olgan holda 2008—2011-yillarda respublika davolash-profilaktika muassasalari va aholisini taʼminlash uchun zarur boʻlgan dori vositalari hajmi va turlarini aniqlash maqsadida davolash standartlarining tizimlashtirilishini yakunlasin.

5. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va R.S. Qosimov zimmalariga yuklansin.