Oʻzbekiston Respublikasi Prezidentining “Xalq taʼlimi muassasalarini moliyalashtirish mexanizmini takomillashtirish toʻgʻrisida” 2007-yil 26-fevraldagi PF-3857-sonli Farmoni, Oʻzbekiston Respublikasi Prezidentining “Davlat budjetining gʻazna ijrosi tizimini yanada rivojlantirish chora-tadbirlari toʻgʻrisida” 2007-yil 28-fevraldagi PQ-594-son qaroriga muvofiq hamda Davlat budjetining gʻazna ijrosiga oʻtilishi munosabati bilan budjet tashkilotlarining moliya-iqtisod xizmatlari xodimlari sonini maqbullashtirish maqsadida:

1. Oʻzbekiston Respublikasi Moliya vazirligining manfaatdor vazirlik va idoralar bilan kelishib olingan budjet tashkilotlarining moliya-iqtisod xizmatlari xodimlari sonini 2007-yilning 1-iyulidan boshlab belgilangan tartibda ilovaga* muvofiq qisqartirish toʻgʻrisidagi taklifi qabul qilinsin.

Mazkur qaror ilovasida koʻrsatilgan vazirlik va idoralar, shuningdek hududiy moliya organlari 2007-yilning 15-iyuligacha idoralar qoshidagi budjet tashkilotlarining moliya-iqtisod xizmatlari xodimlari sonini qisqartirish boʻyicha bajarilgan ishlar toʻgʻrisida Oʻzbekiston Respublikasi Moliya vazirligiga axborot taqdim etsin.

2. Oʻzbekiston Respublikasi Moliya vazirligi manfaatdor vazirlik va idoralar bilan birgalikda:

2007-yilning 15-avgustigacha mazkur qarorda nazarda tutilgan budjet tashkilotlarining moliya-iqtisod xizmatlari xodimlari sonini qisqartirishni hisobga olgan holda budjet tashkilotlarining xarajatlar smetasi va shtat jadvallari qaytadan roʻyxatga olinishini taʼminlasin;

budjet tashkilotlarining moliya-iqtisod xizmatlari xodimlari sonini qisqartirish munosabati bilan boʻshaydigan mablagʻlarning yuridik shaxs maqomiga ega umumtaʼlim maktablari (maktab-internatlari)ni moliya-iqtisod sohasidagi tegishli shtat lavozimlari bilan toʻldirish uchun yoʻnaltirilishini taʼminlasin;

Davlat budjetining gʻazna ijrosiga oʻtilishi munosabati bilan xodimlar sonini qisqartirish natijalarini sinchiklab tahlil qilish asosida budjet tashkilotlari — vazirlik va idoralar xodimlari sonini tartibga solish va maqbullashtirish ishlarini davom ettirsin.

Koʻrilgan chora-tadbirlar toʻgʻrisida 2007-yilning 1-sentabrigacha va 2008-yilning 1-apreligacha Oʻzbekiston Respublikasi Vazirlar Mahkamasiga maʼlumot berilsin.

3. Oʻzbekiston Respublikasi Mehnat va aholini ijtimoiy muhofaza qilish vazirligi va uning hududiy boʻlinmalari manfaatdor vazirlik hamda idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda, qonun hujjatlarida belgilangan tartibda, budjet tashkilotlari moliya-iqtisod xizmatlarining qisqartirilayotgan xodimlarini ishga joylashtirish boʻyicha chora-tadbirlar koʻrsin va koʻmaklashsin.

4. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.