Oʻzbekiston Respublikasi Prezidentining “Davlat budjetining gʻazna ijrosi tizimini yanada rivojlantirish chora-tadbirlari toʻgʻrisida” 2007-yil 28-fevraldagi PQ-594-son qaroriga muvofiq Vazirlar Mahkamasi qaror qiladi:

Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

1. Vazirlar Mahkamasining 1994-yil 9-martdagi 124-son qarori (Oʻzbekiston Respublikasi QT, 1994-y., 3-son, 15-modda) bilan tasdiqlangan Yoqilgʻi-energetika resurslaridan foydalanish qoidalarini buzganlik uchun iqtisodiy jazolarni qoʻllash toʻgʻrisidagi nizom III boʻlimining 5-bandidagi “moliya organlari” soʻzlari “Oʻzbekiston Respublikasi Moliya vazirligining gʻaznachiligi va uning hududiy boʻlinmalari” soʻzlari bilan almashtirilsin.

2. Vazirlar Mahkamasining 1997-yil 31-martdagi 165-son qarori bilan tasdiqlangan Narxlar (tariflar)ni shakllantirish va ularning qoʻllanishini nazorat qilish tartibi 26-bandining birinchi xatboshidagi “Moliya organlari” soʻzlari “Oʻzbekiston Respublikasi Moliya vazirligining gʻaznachiligi va uning hududiy boʻlinmalari” soʻzlari bilan almashtirilsin.

3. Vazirlar Mahkamasining “Gumon qilinuvchi, ayblanuvchi yoki sudlanuvchiga advokat tomonidan huquqiy yordam koʻrsatish boʻyicha xarajatlarni davlat hisobiga oʻtkazish tartibi toʻgʻrisida” 1997-yil 16-iyundagi 297-son qarorida:

a) 3-bandning birinchi xatboshiga “haq toʻlashni” soʻzlaridan keyin “Moliya vazirligi gʻaznachiligining tegishli hududiy boʻlinmasi orqali” soʻzlari qoʻshilsin;

b) 4-bandga “bir oy muddatda” soʻzlaridan keyin “Moliya vazirligi gʻaznachiligining tegishli hududiy boʻlinmasi orqali” soʻzlari qoʻshilsin.

4. Vazirlar Mahkamasining “Oʻzbekiston Respublikasi sogʻliqni saqlash muassasalarini moliyalashtirish va boshqarish tizimini yanada takomillashtirish toʻgʻrisida” 2005-yil 28-sentabrdagi 217-son qarorida (Oʻzbekiston Respublikasi QT, 2005-y., 9-10-son, 51-modda):

a) 2-ilovada:

10-banddagi “xarajatlar guruhiga boʻlmasdan bitta summa bilan” soʻzlari “belgilangan tartibda” soʻzlari bilan almashtirilsin;

13-band quyidagi tahrirda bayon qilinsin:

“13. BTSYO qishloq muassasalari xarajatlarini moliyalashtirish (ularni toʻlash) tasdiqlangan xarajatlar smetasiga muvofiq belgilangan tartibda amalga oshiriladi.

Hisobot yilining oxirida BTSYO muassasalari hisob raqamlarida qolgan mablagʻlar olib qoʻyilmaydi va ularni rivojlantirish uchun foydalaniladi”;

b) 3-ilovada:

9-banddagi “xarajatlar guruhi boʻyicha boʻlmasdan bitta summada” soʻzlari “belgilangan tartibda” soʻzlari bilan almashtirilsin;

13-band quyidagi tahrirda bayon qilinsin:

“13. BTSYO SHE muassasalari xarajatlarini moliyalashtirish (ularni toʻlash) tasdiqlangan xarajatlar smetasiga muvofiq belgilangan tartibda amalga oshiriladi”;

14-bandning birinchi xatboshi chiqarib tashlansin.