O‘zbekiston Respublikasi Prezidentining “Xalq ta’limi muassasalarini moliyalashtirish mexanizmini takomillashtirish to‘g‘risida” 2007-yil 26-fevraldagi PF-3857-sonli Farmoni hamda O‘zbekiston Respublikasi Prezidentining “Davlat budjetining g‘azna ijrosi tizimini yanada rivojlantirish chora-tadbirlari to‘g‘risida” 2007-yil 28-fevraldagi PQ-594-sonli qaroriga muvofiq, shuningdek budjet mablag‘laridan foydalanishda ta’lim muassasalarining mustaqilligini kengaytirish va mas’uliyatini oshirish bo‘yicha chora-tadbirlarni amalga oshirishni ta’minlash maqsadida:

1. O‘zbekiston Respublikasi Moliya vazirligi hamda Xalq ta’limi vazirligining barcha maktab-internatlarga belgilangan tartibda yuridik shaxs maqomini berish to‘g‘risidagi taklifi qabul qilinsin.

2. O‘zbekiston Respublikasi Moliya vazirligi hamda Xalq ta’limi vazirligi maktab-internatlarning amaldagi namunaviy shtatiga, o‘quvchilarning soniga qarab, ilovaga muvofiq, normativlar bo‘yicha buxgalter lavozimini kiritsin va 2007-yilda ularni malakali mutaxassislar bilan to‘ldirishni ta’minlasin.

3. Maktab-internatlar rahbarlari va buxgalterlari zimmasiga tegishli moliya tashkilotlarining xalq ta’limi muassasalarini moliyalash bo‘limlari bilan birgalikda quyidagi vazifalarni amalga oshirish yuklatilsin:

pedagog xodimlar tarifikatsiyasini hisobga olgan holda maktab-internatlar shtat jadvali va xarajatlar smetasini tuzish va ularni moliya organlarida ro‘yxatga olish;

belgilangan tartibda ro‘yxatga olingan xarajatlar smetasini tovarlar va xizmatlar yetkazib berish bo‘yicha shartnomalarni faqat g‘aznachilik bo‘linmalari orqali tuzishni hisobga olgan holda bajarish;

belgilangan standartlarga muvofiq maktab-internatlar buxgalterlik hisob-kitobi va hisobotini olib borish;

to‘lovlar, oylik maoshni belgilash va to‘lash, nafaqa hamda unga tenglashtirilgan boshqa to‘lovlarni o‘z vaqtida amalga oshirish, shuningdek xalq ta’limi muassasalarida moddiy boyliklarning hisob-kitobini olib borish;

amaldagi qonun hujjatlariga muvofiq tasdiqlangan shtatlar, smeta va moliya intizomiga qat’iy rioya qilishni ta’minlash.

4. Belgilab qo‘yilsinki:

yuridik shaxs maqomiga ega xalq ta’limi muassasasi, shu jumladan umumta’lim maktablari Direktorlar fondining budjet mablag‘larining boshqaruvchisi mazkur muassasa rahbari hisoblanadi;

oylik maoshi va unga teng to‘lovlarni to‘lash uchun naqd pul beruvchi moddiy-mas’ul shaxs (kassir)ning vazifasi umumta’lim maktablarining ma’muriy-xo‘jalik bo‘yicha direktor o‘rinbosari yoki xo‘jalik mudiri zimmasiga ularning lavozimi uchun belgilangan okladiga ular tomonidan ushbu funksiya amalda bajarilganda mehnatga haq to‘lashning eng kam miqdorining 35,2 foizi miqdorida qo‘shimcha oylik maoshi belgilash bilan yuklanadi;

5. O‘zbekiston Respublikasi Moliya vazirligi, O‘zbekiston Respublikasi Xalq ta’limi vazirligi, moliya organlari va xalq ta’limi hududiy bo‘linmalari:

ikki oy muddatda umumta’lim maktablari (maktab-internatlari) shtat jadvali va xarajatlar smetasini mazkur qaror qoidalariga muvofiqlashtirilishini ta’minlasin;

2007-yilning 15-iyunidan kechiktirmay yuridik shaxs maqomiga ega barcha umumta’lim maktablari (maktab-internatlari) tomonidan O‘zbekiston Respublikasi Moliya vazirligi G‘aznachiligining mutasaddi hududiy bo‘linmalarida shaxsiy hisobraqamlarning ochilishini yakunlasin.

6. Quyidagi tartib belgilansin, unga muvofiq O‘zbekiston Respublikasi Moliya vazirligi G‘aznachiligining tuman (shahar) moliya organlari va bo‘linmalari yuridik shaxs maqomiga ega umumta’lim maktablari (maktab-internatlari)ni moliyalashtirish yilida moliyalashtirishga yo‘naltirilgan davlat va budjetdan tashqari mablag‘lardan maqsadli foydalanish ustidan har chorakda nazoratni amalga oshirishlari shart.

8. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosarlari R.S. Azimov va R.S. Qosimov zimmalariga yuklansin.