O‘zbekiston Respublikasi Oliy Majlisining Qonunchilik palatasi qaror qiladi:

1. O‘zbekiston Respublikasi Oliy Majlisi Qonunchilik palatasining Muvaqqat reglamenti tasdiqlansin.

2. O‘zbekiston Respublikasi Oliy Majlisi Qonunchilik palatasining Muvaqqat reglamenti qabul qilingan paytdan e’tiboran amalga kiritilsin.

O‘zbekiston Respublikasi Oliy Majlisi Qonunchilik palatasining Muvaqqat reglamenti (bundan buyon matnda Muvaqqat reglament deb yuritiladi) O‘zbekiston Respublikasining Konstitutsiyasiga, “O‘zbekiston Respublikasi Oliy Majlisining Qonunchilik palatasi to‘g‘risida”gi O‘zbekiston Respublikasining Konstitutsiyaviy Qonuniga va “O‘zbekiston Respublikasi Oliy Majlisi Qonunchilik palatasining Reglamenti to‘g‘risida”gi O‘zbekiston Respublikasi Qonuniga muvofiq O‘zbekiston Respublikasi Oliy Majlisi Qonunchilik palatasi (bundan buyon matnda Qonunchilik palatasi deb yuritiladi) majlislarini o‘tkazish, qonunchilik tartib-taomillarini amalga oshirish tartibini belgilaydi va Qonunchilik palatasi faoliyatini tashkil etish bilan bog‘liq boshqa masalalarni tartibga soladi.

Qonunchilik palatasi O‘zbekiston Respublikasi Oliy Majlisining quyi palatasidir va u bir yuz yigirma deputatdan iborat.

Qonunchilik palatasining ishi Qonunchilik palatasi barcha deputatlarining (bundan buyon matnda deputatlar, deputat deb yuritiladi) professional, doimiy faoliyat ko‘rsatishiga asoslanadi.

Qonunchilik palatasining faoliyati masalalarni birgalikda va erkin muhokama qilishga, oshkoralikka, jamoatchilik fikrini hisobga olishga asoslanadi.

Deputatlar o‘z vakolatlari davrida ilmiy va pedagogik faoliyatdan tashqari haq to‘lanadigan boshqa turdagi faoliyat bilan shug‘ullanishlari mumkin emas.

Ayni bir shaxs bir paytning o‘zida deputat va O‘zbekiston Respublikasi Oliy Majlisi Senatining a’zosi (bundan buyon matnda senator deb yuritiladi) bo‘lishi mumkin emas.

Deputatning huquqlari va majburiyatlarini moneliksiz va samarali amalga oshirish kafolatlari “O‘zbekiston Respublikasi Oliy Majlisi Qonunchilik palatasining deputati va Senati a’zosining maqomi to‘g‘risida”gi O‘zbekiston Respublikasi Qonuni, boshqa qonunlar va ushbu Muvaqqat reglament bilan belgilanadi.

Qonunchilik palatasi o‘z matbuot organlariga ega bo‘ladi.

Qonunchilik palatasi faoliyatining tashkiliy shakli uning Qonunchilik palatasi sessiyalari davrida, qoida tariqasida, haftasiga uch marta o‘tkaziladigan majlislaridir.

Navbatdagi sessiyalar, qoida tariqasida, sentyabrning birinchi ish kunidan boshlab, kelgusi yilning iyun oyi oxirgi ish kuniga qadar o‘tkaziladi.

Qonunchilik palatasining navbatdan tashqari majlislari uning sessiyalari oralig‘ida O‘zbekiston Respublikasining Prezidenti, Qonunchilik palatasi Spikeri taklifiga yoki Qonunchilik palatasi deputatlari umumiy sonining kamida uchdan bir qismining taklifiga binoan chaqirilishi mumkin.

Qonunchilik palatasining majlislari, qoida tariqasida, seshanba, chorshanba va payshanba kunlari o‘tkaziladi.

Qonunchilik palatasining Kengashi (bundan buyon matnda Kengash deb yuritiladi) muntazam yig‘ilib turadi. Kengash va Qonunchilik palatasi deputatlar birlashmalarining (bundan buyon matnda deputatlar birlashmalari deb yuritiladi) navbatdagi majlislari, qoida tariqasida, dushanba kunlari o‘tkaziladi.

Qonunchilik palatasining qo‘mitalari (bundan buyon matnda qo‘mitalar deb yuritiladi), qoida tariqasida, juma kunlari majlis o‘tkazadi.

Noyabr, fevral va may oyining har oxirgi to‘liq haftasi deputatlarning saylov okruglarida saylovchilar bilan ishlashi uchun mo‘ljallanadi.

Qonunchilik palatasining majlislari vaqtida qo‘mitalar, Qonunchilik palatasi komissiyalari (bundan buyon matnda komissiyalar deb yuritiladi), deputatlar birlashmalarining majlislari o‘tkazilmaydi, shuningdek deputatlarning saylov okruglarida saylovchilar bilan olib boradigan ishlari to‘xtatiladi.

Qonunchilik palatasining majlisida ko‘rib chiqilishi lozim bo‘lgan masalalar majlis kun tartibi loyihasiga ularni ko‘rib chiqish navbati, har bir masalani ko‘rib chiqishga tayyorlash uchun mas’ul qo‘mitalar, ma’ruzachilar (qo‘shimcha ma’ruzachilar), shuningdek boshqa ma’lumotlar ko‘rsatilgan holda kiritiladi.

Qonunchilik palatasi majlisi kun tartibining loyihasi Kengash tomonidan tuziladi.

Qonunchilik palatasi majlisining kun tartibi loyihasiga qonun loyihalari quyidagi ketma-ketlikda kiritiladi:

uchinchi o‘qishda ko‘rib chiqiladigan qonun loyihalari;

ikkinchi o‘qishda ko‘rib chiqiladigan qonun loyihalari;

birinchi o‘qishda ko‘rib chiqiladigan qonun loyihalari.

Deputatlar Qonunchilik palatasi majlisining kun tartibi loyihasiga kiritilgan masalalar haqida oldindan xabardor qilinadilar.

Qonunchilik palatasi majlisining kun tartibi palata qarori bilan tasdiqlanadi.

Qonunchilik palatasi majlislari ochiq, oshkora o‘tkaziladi va ommaviy axborot vositalari tomonidan yoritiladi.

Zarurat bo‘lganda, Qonunchilik palatasi yopiq majlis o‘tkazish to‘g‘risida qaror qabul qilishi mumkin. Bunday qaror, agar bu haqda O‘zbekiston Respublikasi Prezidenti, O‘zbekiston Respublikasi Bosh vaziri, Qonunchilik palatasi Spikeri, Kengash, qo‘mita yoki deputatlar birlashmasi tomonidan taklif kiritilgan bo‘lsa, qabul qilinishi mumkin.

O‘zbekiston Respublikasi Prezidenti, Senat Raisi, Bosh vazir, Vazirlar Mahkamasining a’zolari, O‘zbekiston Respublikasi Konstitutsiyaviy sudi, Oliy sudi, Oliy xo‘jalik sudi raislari, Bosh prokuror Qonunchilik palatasining ochiq majlisida ham, yopiq majlisida ham ishtirok etishga haqlidir. Boshqa shaxslar Qonunchilik palatasining yopiq majlislarida Qonunchilik palatasining qaroriga binoan qatnashishlari mumkin.

Qonunchilik palatasining majlislari unda qatnashayotgan deputatlarni ro‘yxatdan o‘tkazishdan boshlanadi, bu ishni raislik qiluvchi amalga oshiradi.

Qonunchilik palatasining majlislari, agar ularning ishida palata deputatlari umumiy sonining kamida yarmi ishtirok etayotgan bo‘lsa, vakolatli hisoblanadi.

Qonunchilik palatasi majlislarida ish davlat tilida olib boriladi va zaruratga qarab, Qonunchilik palatasi yoki uning Kengashi qaroriga asosan boshqa tillarga sinxron tarjima ta’minlanadi.

Ma’ruzalar, qo‘shimcha ma’ruzalar va yakunlovchi so‘z davomiyligi Qonunchilik palatasi majlisida raislik qiluvchi tomonidan ma’ruzachilar bilan kelishuvga ko‘ra, qoida tariqasida, ma’ruza uchun — 30 daqiqagacha, qo‘shimcha ma’ruza uchun — 20 daqiqagacha va yakunlovchi so‘z uchun — 15 daqiqagacha bo‘lgan vaqt doirasida belgilanadi.

Muzokaralarda so‘zga chiquvchilarga 10 daqiqagacha vaqt beriladi. Muzokaralarda takroriy so‘zga chiqish uchun, shuningdek majlisni olib borish tartibi, ovoz berish masalalari, nomzodlar bo‘yicha so‘zga chiqish, bayonotlar, savollar, takliflar, xabarlar, ma’lumotnomalar uchun 3 daqiqagacha vaqt beriladi.

Majlisda hozir bo‘lgan deputatlar ko‘pchiligining roziligi bilan raislik qiluvchi Qonunchilik palatasi majlisining kun tartibiga kiritilgan masalani muhokama qilishning umumiy davomiyligini, savollar va javoblar uchun ajratiladigan vaqtni belgilab qo‘yishi, so‘zlash vaqtini uzaytirishi mumkin.

Qonunchilik palatasining majlislarida deputat ayni bitta masala bo‘yicha muzokaralarda ko‘pi bilan ikki marta so‘zga chiqishi mumkin.

Muzokaralarni tugatish to‘g‘risida qaror qabul qilingandan keyin ma’ruzachi va qo‘shimcha ma’ruzachi yakunlovchi so‘z olish huquqiga ega.

Agar so‘zga chiquvchi so‘zlash uchun ajratilgan vaqtdan o‘tib ketsa yoki muhokama etilayotgan masala yuzasidan fikr bildirmayotgan bo‘lsa, Qonunchilik palatasining majlisida raislik qiluvchi uni avval ogohlantirib, keyin so‘zlashdan mahrum qiladi.

Qonunchilik palatasining majlislari ish kunlarida:

ertalabki majlislar — soat 11 dan 13 gacha;

kechki majlislar — soat 15 dan 17 gacha o‘tkaziladi.

Qonunchilik palatasining qaroriga binoan palata majlislarining boshlanishi, tugashi va tanaffus uchun boshqa vaqt belgilanishi mumkin.

O‘zbekiston Respublikasining Konstitutsiyasiga muvofiq O‘zbekiston Respublikasi Qonunchilik palatasi va Senatining qo‘shma majlislari O‘zbekiston Respublikasi Prezidenti qasamyod qilganda, O‘zbekiston Respublikasi Prezidenti mamlakat ijtimoiy-iqtisodiy hayotining, ichki va tashqi siyosatining eng muhim masalalari yuzasidan nutq so‘zlaganda, chet davlatlarning rahbarlari nutq so‘zlaganda o‘tkaziladi. Palatalarning kelishuviga binoan qo‘shma majlislar boshqa masalalar yuzasidan ham o‘tkazilishi mumkin.

O‘zbekiston Respublikasi Oliy Majlisi palatalarining qo‘shma majlislari O‘zbekiston Respublikasi Prezidenti, O‘zbekiston Respublikasi Oliy Majlisi Qonunchilik palatasi Spikeri, Senati Raisining taklifiga yoki tegishincha deputatlar yoxud senatorlar umumiy sonining kamida uchdan bir qismining taklifiga binoan chaqirilishi mumkin.

O‘zbekiston Respublikasi Oliy Majlisi palatalarining qo‘shma majlisini chaqirish masalasi yuzasidan O‘zbekiston Respublikasi Oliy Majlisi Qonunchilik palatasi Spikeri va Senati Raisi o‘rtasida maslahatlashuv o‘tkazilib, bunda qo‘shma majlisni o‘tkazish sanasi belgilanadi va kun tartibi bo‘yicha takliflar muhokama qilinadi.

O‘zbekiston Respublikasi Oliy Majlisi palatalarining qo‘shma majlisi ochiq va oshkora o‘tkaziladi.

O‘zbekiston Respublikasi Oliy Majlisi palatalarining qo‘shma majlisi, agar unda tegishincha deputatlar va senatorlar umumiy sonining kamida uchdan ikki qismi hozir bo‘lsa, vakolatli hisoblanadi.

O‘zbekiston Respublikasi Oliy Majlisi palatalarining qo‘shma majlislarida, agar qo‘shma majlisda boshqacha qoida belgilanmasa, Qonunchilik palatasi Spikeri va Senat Raisi navbatma-navbat raislik qiladi.

O‘zbekiston Respublikasi Oliy Majlisi palatalarining qo‘shma majlisida eshitilgan masalalar muhokamasi natijalari yuzasidan palatalarning qo‘shma qarori qabul qilinishi mumkin. Bunda ovoz berish, qoida tariqasida, alohida-alohida o‘tkaziladi.

Qonunchilik palatasining qarorlari uning majlislarida ochiq yoki yashirin ovoz berish orqali qabul qilinadi. Ochiq ovoz berish nomma-nom bo‘lishi mumkin.

Qonunchilik palatasi majlislarida ovoz berish ovozlarni hisoblashning elektron tizimidan foydalangan holda yoki yashirin ovoz berish byulletenlaridan foydalangan holda amalga oshirilishi mumkin.

Qonunchilik palatasi majlislarida ovozlarni hisoblashning elektron tizimidan foydalanilishi ustidan nazoratni deputatlar jumlasidan bo‘lgan guruh amalga oshiradi.

Ovoz berish shakli va usuli to‘g‘risidagi qaror Qonunchilik palatasi tomonidan ochiq ovoz berish orqali qabul qilinadi, u yoki bu masala yuzasidan ovoz berish shakli va usuli O‘zbekiston Respublikasining Konstitutsiyasida hamda konstitutsiyaviy qonunlarda belgilangan hollar bundan mustasno.

Deputat o‘zining ovoz berish huquqini shaxsan amalga oshiradi.

Qonunchilik palatasi qarorlari, agar O‘zbekiston Respublikasining Konstitutsiyasida va “O‘zbekiston Respublikasi Oliy Majlisining Qonunchilik palatasi to‘g‘risida”gi O‘zbekiston Respublikasi Konstitutsiyaviy Qonunida boshqacha tartib nazarda tutilmagan bo‘lsa, deputatlar umumiy sonining ko‘pchilik ovozi bilan qabul qilinadi.

Qonun loyihasi Qonunchilik palatasiga qonunchilik tashabbusi huquqi subyektlari tomonidan kiritiladi.

Qonunchilik tashabbusi huquqiga O‘zbekiston Respublikasi Prezidenti, o‘z davlat hokimiyatining oliy vakillik organi orqali Qoraqalpog‘iston Respublikasi, O‘zbekiston Respublikasi Oliy Majlisining Qonunchilik palatasi deputatlari, O‘zbekiston Respublikasi Vazirlar Mahkamasi, O‘zbekiston Respublikasining Konstitutsiyaviy sudi, Oliy sudi, Oliy xo‘jalik sudi, Bosh prokurori egadirlar.

Qonun loyihasini Qonunchilik palatasiga kiritishda quyidagilar taqdim etilishi kerak:

1) qonun loyihasiga uning konsepsiyasi bayon qilingan holdagi tushuntirish xati;

2) o‘zgartishlar va qo‘shimchalar kiritish to‘g‘risidagi, shuningdek qonun loyihasi kiritilishi bilan bog‘liq qonunlarni o‘z kuchini yo‘qotgan deb topish to‘g‘risidagi qonun loyihasi;

3) o‘zgartirilishi, qo‘shimchalar kiritilishi, o‘z kuchini yo‘qotgan deb topilishi yoki qabul qilinishi lozim bo‘lgan qonun osti hujjatlarining ro‘yxati;

4) moddiy xarajatlarni talab qiladigan qonun loyihalari uchun moliyaviy-iqtisodiy asoslar;

5) davlat daromadlarini kamaytirish yoki davlat xarajatlarini ko‘paytirish, shuningdek O‘zbekiston Respublikasi Davlat budjeti (bundan buyon matnda Davlat budjeti deb yuritiladi) moddalari bo‘yicha o‘zgartirishlarni nazarda tutuvchi qonunlarning loyihalari yuzasidan O‘zbekiston Respublikasi Vazirlar Mahkamasining xulosasi.

Qonun loyihasi Qonunchilik palatasi tomonidan birinchi o‘qishda qabul qilinguniga qadar qonun loyihasini kiritgan qonunchilik tashabbusi huquqining subyekti loyiha matnini o‘zgartirish yoki o‘zi kiritgan qonun loyihasini chaqirib olish huquqiga ega.

Qonunchilik palatasiga kelib tushgan qonun loyihasini Qonunchilik palatasi Spikeri qonun loyihasini dastlabki tarzda ko‘rib chiqadigan qo‘mitaga (bundan buyon matnda mas’ul qo‘mita deb yuritiladi) topshiradi. Mas’ul qo‘mita qonun loyihasini ko‘rib chiqishga qabul qilish mumkinligi yoki uni qonunchilik tashabbusi huquqi subyektiga qaytarish zarurligi to‘g‘risida Kengashga belgilangan muddatda xulosa taqdim etadi.

Kengash mas’ul qo‘mitaning xulosasi asosida qonun loyihasini Qonunchilik palatasi ko‘rib chiqishi uchun qabul qilish yoki u belgilangan talablarga nomuvofiq bo‘lsa, uni qonunchilik tashabbusi huquqi subyektiga qaytarish to‘g‘risida qaror qabul qiladi. Aniqlangan kamchiliklar bartaraf etilgandan keyin qonun loyihasi Qonunchilik palatasi ko‘rib chiqishi uchun yangidan kiritilishi mumkin.

Agar tegishli masala bo‘yicha qonun loyihasi palata tomonidan birinchi o‘qishda qabul qilingan bo‘lsa, ayni shu masala bo‘yicha boshqa qonun loyihasi Qonunchilik palatasi ko‘rib chiqishi uchun qabul qilinmaydi.

Qonun loyihasi ko‘rib chiqish uchun qabul qilinganda Kengash qonun loyihasini Qonunchilik palatasi majlisida ko‘rib chiqishga tayyorlash muddatini belgilaydi.

Ko‘rib chiqish uchun qabul qilingan qonun loyihasi tegishli materiallar bilan qo‘mitalarga yuboriladi.

Qonun loyihasini dastlabki tarzda muhokama qilish va uni Qonunchilik palatasida birinchi o‘qishda ko‘rib chiqishga tayyorlash mas’ul qo‘mita tomonidan amalga oshiriladi.

Qonun loyihasini qo‘mitalarda muhokama qilish ochiq, qonun loyihasini kiritgan qonunchilik tashabbusi huquqi subyektining vakili taklif etilgan holda o‘tkaziladi.

Agar Kengash tomonidan boshqa muddat belgilangan bo‘lmasa, mas’ul qo‘mita qonun loyihasi olingan kundan e’tiboran ikki oy ichida uni:

Kengashning qonun loyihasini birinchi o‘qishda ko‘rib chiqish uchun Qonunchilik palatasiga kiritish to‘g‘risidagi qarorining loyihasini;

mas’ul qo‘mitaning mazkur qonun loyihasini qabul qilish yoki rad etish zarurligi asoslangan holdagi xulosasini ilova qilib, Kengash ko‘rib chiqishi uchun taqdim etadi.

Kengash mas’ul qo‘mita taqdim etgan qonun loyihasini birinchi o‘qishda ko‘rib chiqish uchun Qonunchilik palatasi majlisining kun tartibi loyihasiga kiritish to‘g‘risida qaror qabul qiladi.

Qonunchilik palatasi qonun loyihasini, qoida tariqasida, uch o‘qishda ko‘rib chiqadi.

Qonun loyihasini Qonunchilik palatasi majlislarida birinchi o‘qishda ko‘rib chiqish chog‘ida mazkur qonun loyihasini qabul qilish zarurati, qonun loyihasining konsepsiyasi, uning O‘zbekiston Respublikasining Konstitutsiyasi va qonunlariga muvofiqligi, shuningdek qonunni amalga oshirish bilan bog‘liq xarajatlar va moliyalash manbalari to‘g‘risidagi masala muhokama qilinadi.

Qonunchilik palatasi muhokama natijalari bo‘yicha qonun loyihasini maromiga yetkazish va keyingi o‘qishda ko‘rib chiqish uchun palataga kiritish muddatini belgilagan holda uni birinchi o‘qishda qabul qilish yoki qonun loyihasini rad etish to‘g‘risida qaror qabul qiladi.

Qonunchilik palatasi muhokamasiga qonun loyihasining muqobil variantlari kiritilgan taqdirda ular bir vaqtda ko‘rib chiqilishi kerak. Deputatlarning qaror qabul qilish uchun talab qilinadigan eng ko‘p miqdordagi ovozini to‘plagan qonun loyihasi birinchi o‘qishda qabul qilingan hisoblanadi. Qonun loyihasining qolgan variantlari Qonunchilik palatasi tomonidan rad etilgan hisoblanadi.

Mas’ul qo‘mita qonun loyihasini ikkinchi o‘qishga tayyorlash chog‘ida tushgan takliflarni umumlashtiradi. Mas’ul qo‘mita tomonidan asosli deb topilgan takliflar qonun loyihasining matniga kiritiladi.

Qonun loyihasini Qonunchilik palatasi tomonidan ikkinchi o‘qishda ko‘rib chiqish chog‘ida mas’ul qo‘mita ma’qullagan takliflar ham, ma’qullamagan takliflar ham muhokama qilinadi. Qonun loyihasi bo‘yicha ovoz berish moddama-modda o‘tkaziladi.

Qonunchilik palatasi muhokama natijalari bo‘yicha qonun loyihasini maromiga yetkazish va keyingi o‘qishda ko‘rib chiqish uchun palataga kiritish muddatini belgilagan holda uni ikkinchi o‘qishda qabul qilish yoxud qonun loyihasini rad etish to‘g‘risida qaror qabul qiladi.

Uchinchi o‘qishda qonun loyihasi muhokama qilinmasdan to‘laligicha ovozga qo‘yiladi.

Qonun loyihasi birinchi yoki ikkinchi o‘qishda qabul qilingan taqdirda, mas’ul qo‘mitaning taklifiga binoan qonunni keyingi o‘qish tartib-taomillarini istisno etgan holda qabul qilish to‘g‘risidagi masala ovozga qo‘yilishi mumkin.

Qonun Qonunchilik palatasi tomonidan palata deputatlari umumiy sonining ko‘pchilik ovozi bilan qabul qilinadi, ushbu Muvaqqat reglament 37-moddasining birinchi qismida nazarda tutilgan hollar bundan mustasno.

Qonunchilik palatasi tomonidan qabul qilingan qonun Senatga ko‘rib chiqish uchun o‘n kun ichida yuboriladi. Senatga qonun bilan birgalikda Qonun loyihasini Qonunchilik palatasiga kiritish chog‘ida taqdim etilgan materiallar ham yuboriladi.

Senat tomonidan rad etilgan qonun yuzasidan Qonunchilik palatasi va Senat yuzaga kelgan kelishmovchiliklarni bartaraf etish uchun deputatlar va senatorlar orasidan tenglik asosida kelishuv komissiyasi tuzishi mumkin.

Qonunchilik palatasida kelishuv komissiyasi tuzish to‘g‘risidagi tashabbus Qonunchilik palatasi Spikeridan, shuningdek deputatlar birlashmalaridan chiqishi mumkin.

Kelishuv komissiyasi tarkibiga nomzodlar yuzasidan Qonunchilik palatasi Spikeri va Senat Raisi tomonidan o‘zaro maslahatlashuvlar o‘tkaziladi.

Kelishuv komissiyasining Qonunchilik palatasidan ko‘rsatilgan tarkibi uning majlisida tasdiqlanadi.

Kelishuv komissiyasining har bir palatadan saylangan a’zolari o‘z tarkibidan ko‘pchilik ovoz bilan komissiyaning hamraislarini saylaydilar.

Kelishuv komissiyasi qonunning yagona matnini ishlab chiqish maqsadida Senatning har bir e’tirozini alohida-alohida ko‘rib chiqadi.

Kelishuv komissiyasining qarorlari kelishuv komissiyasi tarkibiga kirgan deputatlar va senatorlarning alohida-alohida ovoz berishi orqali qabul qilinadi. Qaror, agar komissiyaning har bir palatadan saylangan a’zolarining ko‘pchiligi uni yoqlab ovoz bergan bo‘lsa, qabul qilingan hisoblanadi.

Kelishuv komissiyasi o‘z ishining natijalari yuzasidan kelishmovchiliklarni bartaraf etish bo‘yicha takliflarni o‘z ichiga olgan xulosa qabul qiladi. Xulosaga qonunga doir o‘zgartishlar va qo‘shimchalar loyihasining matni ilova qilinadi.

Xulosa Qonunchilik palatasi va Senatdan saylangan kelishuv komissiyasining hamraislari tomonidan imzolanib, tegishincha Qonunchilik palatasi va Senatga topshiriladi.

Kelishuv komissiyasining takliflari qabul qilingan taqdirda qonun Qonunchilik palatasi tomonidan qayta ko‘rib chiqilishi kerak. Qonunni qayta ko‘rib chiqishda kelishuv komissiyasining bayonnomasida mavjud bo‘lgan takliflargina muhokama qilinadi.

Kelishuv komissiyasining loaqal bitta taklifi rad etilgan taqdirda Qonunchilik palatasi kelishuv komissiyasiga yangi takliflarni taqdim etish uchun palata tomonidan ma’qullangan tuzatishlarni inobatga olgan holda ishni davom ettirishni taklif qilishi mumkin.

Qonunchilik palatasi qonunni kelishuv komissiyasining tahririda qabul qilsa, u ma’qullash uchun Senatga yuboriladi.

Agar kelishuv komissiyasining qonun bo‘yicha ishlari yakunlariga ko‘ra kelishuvga erishilmasa, qonun Senat tomonidan rad etilgan qonun sifatida Qonunchilik palatasi tomonidan qayta ko‘rib chiqilishi kerak.

Senat tomonidan rad etilgan yoki O‘zbekiston Respublikasi Prezidenti tomonidan e’tirozlar bilan qaytarilgan qonun Qonunchilik palatasi tomonidan bir oylik muddatda qayta ko‘rib chiqilishi kerak.

Mas’ul qo‘mita Senat tomonidan rad etilgan yoki O‘zbekiston Respublikasi Prezidenti tomonidan qaytarilgan qonun yuzasidan xulosa beradi.

Mas’ul qo‘mitaning xulosasi olinganidan keyin qonunni Qonunchilik palatasi tomonidan qayta ko‘rib chiqish masalasi belgilangan tartibda Qonunchilik palatasi majlisining kun tartibiga kiritiladi.

Agar Qonunchilik palatasi Senat tomonidan rad etilgan qonunni deputatlar umumiy sonining uchdan ikki qismidan iborat ko‘pchilik ovozi bilan yana ma’qullasa, qonun O‘zbekiston Respublikasi Oliy Majlisi tomonidan qabul qilingan hisoblanadi hamda imzolanishi va e’lon qilinishi uchun O‘zbekiston Respublikasi Prezidentiga yuboriladi.

O‘zbekiston Respublikasi Prezidenti tomonidan qaytarilgan qonunni qayta ko‘rib chiqishda Qonunchilik palatasi tomonidan quyidagi qarorlardan biri qabul qilinadi:

qonunni O‘zbekiston Respublikasi Prezidentining mulohazalari va takliflarini inobatga olgan holda qabul qilish;

qonunni bundan buyon ko‘rib chiqmaslik;

qonunni avvalgi qabul qilingan tahririda ma’qullash.

Agar qonun avvalgi qabul qilingan tahririda deputatlar umumiy sonining kamida uchdan ikki qismidan iborat ko‘pchilik ovozi bilan ma’qullansa, Senatga ma’qullash uchun yuboriladi.

O‘zbekiston Respublikasi Konstitutsiyasining, konstitutsiyaviy qonunning, ularga o‘zgartishlar va qo‘shimchalar kiritish to‘g‘risidagi qonunlarning loyihalarini qabul qilish uchun deputatlar umumiy sonining uchdan ikki qismidan iborat ko‘pchilik ovozi talab qilinadi.

Qonunchilik palatasi O‘zbekiston Respublikasining Konstitutsiyasiga o‘zgartishlar va qo‘shimchalar kiritish to‘g‘risidagi qonun loyihasini tegishli taklif kiritilganidan keyin olti oy ichida uning keng muhokamasini inobatga olgan holda ko‘rib chiqishi mumkin.

Agar Qonunchilik palatasi O‘zbekiston Respublikasining Konstitutsiyasiga o‘zgartishlar va qo‘shimchalar kiritish to‘g‘risidagi qonun loyihasini qabul qilmasa, uni ko‘rib chiqish kamida bir yildan keyin qayta boshlanishi mumkin.

Navbatdagi moliya yili uchun Davlat budjeti loyihasi O‘zbekiston Respublikasi Vazirlar Mahkamasi tomonidan joriy yilning 15-oktabridan kechiktirmay Qonunchilik palatasiga kiritiladi.

Davlat budjeti loyihasi mas’ul qo‘mita tomonidan dastlabki tarzda ko‘rib chiqiladi.

Davlat budjeti loyihasiga doir materiallar deputatlarga oldindan, mazkur loyiha Qonunchilik palatasi majlisida ko‘rib chiqilgunga qadar yuboriladi.

Davlat budjeti loyihasini Qonunchilik palatasining majlisida muhokama qilish O‘zbekiston Respublikasi moliya vazirining yoki uning vazifasini bajaruvchi shaxsning ma’ruzasi bilan boshlanadi.

Davlat budjeti loyihasi bo‘yicha Qonunchilik palatasining mulohazalari va takliflari uch kunlik muddatda O‘zbekiston Respublikasi Vazirlar Mahkamasiga yuboriladi.

O‘zbekiston Respublikasi Vazirlar Mahkamasi o‘n to‘rt kun ichida Qonunchilik palatasining mulohazalari va takliflarini inobatga olgan holda Davlat budjeti loyihasini maromiga yetkazadi va Davlat budjetining maromiga yetkazilgan loyihasini Qonunchilik palatasiga yuboradi.

Davlat budjetining loyihasi Qonunchilik palatasi tomonidan joriy yilning 15-noyabridan kechiktirmay ko‘rib chiqilishi kerak.

Qonunchilik palatasi tomonidan qabul qilingan Davlat budjeti mazkur budjet qabul qilingan kundan e’tiboran besh kun ichida ko‘rib chiqish uchun Senatga yuboriladi.

Davlat budjetiga O‘zbekiston Respublikasi Vazirlar Mahkamasining taqdimiga binoan belgilangan tartibda o‘zgartishlar va qo‘shimchalar kiritilishi mumkin.

Davlat budjetiga o‘zgartishlar va qo‘shimchalar kiritish to‘g‘risidagi masala, agar bu hol budjetni tartibga solishda qiyinchiliklar keltirib chiqarishi mumkin bo‘lsa, Qonunchilik palatasining majlisida birinchi navbatda ko‘rib chiqilishi kerak.

Davlat budjetiga o‘zgartishlar va qo‘shimchalar uni qabul qilish uchun belgilangan tartibda kiritiladi.

Qonunchilik palatasi O‘zbekiston Respublikasi Vazirlar Mahkamasining belgilangan tartibda kiritilgan taklifiga binoan tumanlar, shaharlar, viloyatlarni tashkil etish, tugatish, ularning nomini va chegaralarini o‘zgartirish to‘g‘risidagi masalalarni ko‘rib chiqadi.

Tumanlar, shaharlar, viloyatlarni tashkil etish, tugatish, ularning nomini va chegaralarini o‘zgartirish to‘g‘risidagi masala rad etilgan taqdirda, u Qonunchilik palatasi ko‘rib chiqishi uchun kamida bir yildan keyin qayta kiritilishi mumkin.

O‘zbekiston Respublikasining xalqaro shartnomasini ratifikatsiya qilish, denonsatsiya qilish, tugatish yoki uning amal qilishini to‘xtatib turish to‘g‘risidagi qaror loyihasi Qonunchilik palatasiga O‘zbekiston Respublikasi Prezidenti yoki O‘zbekiston Respublikasi Vazirlar Mahkamasi tomonidan shu shartnoma rasmiy matnining tasdiqlangan nusxasi va uni ratifikatsiya qilish, denonsatsiya qilish, tugatish yoki uning amal qilishini to‘xtatib turish maqsadga muvofiqligining asoslarini o‘z ichiga olgan hujjatlar bilan birgalikda kiritiladi.

O‘zbekiston Respublikasining xalqaro shartnomasini ratifikatsiya qilish, denonsatsiya qilish, tugatish yoki uning amal qilishini to‘xtatib turish to‘g‘risidagi Qonunchilik palatasi tomonidan qabul qilingan qaror Senatga yuboriladi.

Agar O‘zbekiston Respublikasining xalqaro shartnomasini ratifikatsiya qilish, denonsatsiya qilish, tugatish yoki uning amal qilishini to‘xtatib turish to‘g‘risidagi qaror loyihasi deputatlarning zarur ovozlari sonini to‘plamagan bo‘lsa va shu majlis jarayonida mazkur qaror loyihasini Qonunchilik palatasining qayta ko‘rib chiqishi uchun kiritish zarurligi to‘g‘risida qaror qabul qilinmagan bo‘lsa, O‘zbekiston Respublikasining xalqaro shartnomasi ratifikatsiya qilish, denonsatsiya qilish, tugatish yoki uning amal qilishini to‘xtatib turish tartib-taomilidan o‘tmagan hisoblanadi.

Qonunchilik palatasi qonunlar qabul qilinishi talab etilmaydigan masalalar yuzasidan qarorlar qabul qiladi.

Qaror loyihasi Qonunchilik palatasiga kiritilayotganda unga qisqacha tushuntirish xati va boshqa zarur materiallar ilova qilinadi.

Qonunchilik palatasi Spikeri Qonunchilik palatasi qarorining loyihasini dastlabki tarzda ko‘rib chiqish uchun mas’ul qo‘mita va muddat belgilaydi.

Kengash mas’ul qo‘mita vakilining axborotini eshitib, qaror loyihasini Qonunchilik palatasi majlisining kun tartibiga kiritish to‘g‘risida qaror qabul qiladi va ma’ruzachini belgilaydi.

Qonunchilik palatasi majlisida mas’ul qo‘mita vakilining axboroti eshitiladi va muhokama natijalari yuzasidan deputatlar umumiy sonining ko‘pchilik ovozi bilan Qonunchilik palatasi qarori qabul qilinadi.

Agar ovoz berish yakunlariga ko‘ra qaror loyihasini qabul qilish to‘g‘risidagi taklif zarur miqdorda ovoz to‘plamagan bo‘lsa, taklif rad etilgan hisoblanadi.

Qonunchilik palatasining Senat bilan birgalikdagi vakolatlariga kiritilgan masala yuzasidan qabul qilingan qarori mazkur qaror qabul qilingan kundan e’tiboran besh kun ichida, agar ushbu Muvaqqat reglamentning 9-bobida boshqacha qoida belgilangan bo‘lmasa, Senatga yuboriladi.

Qonunchilik palatasi O‘zbekiston Respublikasining referendumini o‘tkazish kerakligi to‘g‘risidagi materiallarni va mas’ul qo‘mitaning xulosasini ko‘rib chiqib, quyidagi qarorlardan birini qabul qilishi mumkin:

referendum tayinlash va uni ta’minlash chora-tadbirlari to‘g‘risida;

referendumni o‘tkazish to‘g‘risidagi tashabbusni rad etish haqida;

referendum o‘tkazmasdan turib, referendum o‘tkazish to‘g‘risidagi tashabbusda taklif qilingan qonunni yoki boshqa qarorni qabul qilish haqida.

Qonunchilik palatasining O‘zbekiston Respublikasining referendumi masalasi yuzasidan qarori mazkur qaror qabul qilingan kundan e’tiboran uch kun ichida Senatga, shuningdek referendum o‘tkazish tashabbuskorlariga yuboriladi.

Agar Qonunchilik palatasi O‘zbekiston Respublikasining referendumini o‘tkazish to‘g‘risidagi tashabbusni rad etish haqida qaror qabul qilsa, ayni shu mazmun yoki ma’nodagi ta’rif bilan referendum o‘tkazish to‘g‘risidagi masala kamida bir yildan keyin Qonunchilik palatasiga ko‘rib chiqish uchun takroran kiritilishi mumkin.

O‘zbekiston Respublikasi Prezidentining O‘zbekiston Respublikasi Bosh vaziri nomzodini tasdiqlash to‘g‘risidagi taqdimnomasi Qonunchilik palatasi tomonidan taqdimnoma kiritilgan kundan e’tiboran yetti kun ichida ko‘rib chiqiladi.

Qonunchilik palatasining O‘zbekiston Respublikasining Bosh vaziri nomzodini tasdiqlash masalasi yuzasidan qarori mazkur qaror qabul qilingan kundan e’tiboran uch kun ichida O‘zbekiston Respublikasi Prezidentiga yuboriladi.

Qonunchilik palatasi taqdim etilgan O‘zbekiston Respublikasi Bosh vaziri nomzodini uch marta rad etgan taqdirda, O‘zbekiston Respublikasi Prezidenti O‘zbekiston Respublikasi Bosh vazirini tayinlaydi, Qonunchilik palatasini tarqatib yuboradi va yangi saylov tayinlaydi.

Qonunchilik palatasi O‘zbekiston Respublikasi Prezidentining vazirliklar, davlat qo‘mitalarini va davlat boshqaruvining boshqa organlarini tuzish hamda tugatish to‘g‘risidagi o‘zining tasdig‘iga kiritilgan farmonlari yuzasidan qarorlar qabul qiladi.

Qonunchilik palatasining O‘zbekiston Respublikasi Prezidentining vazirliklar, davlat qo‘mitalarini va davlat boshqaruvining boshqa organlarini tuzish hamda tugatish to‘g‘risidagi farmonlarini tasdiqlash masalasi yuzasidan qarorlari mazkur qarorlar qabul qilingan kundan e’tiboran uch kun ichida Senatga, shuningdek O‘zbekiston Respublikasi Prezidentiga yuboriladi.

Qonunchilik palatasi o‘zining ko‘rib chiqishi uchun kiritilgan O‘zbekiston Respublikasi Prezidentining urush holati e’lon qilish to‘g‘risidagi farmonini ushbu farmon kelib tushgan paytdan e’tiboran 48 soatdan kechiktirmay, O‘zbekiston Respublikasi Prezidentining umumiy yoki qisman safarbarlik e’lon qilish to‘g‘risidagi, favqulodda holat joriy etish, uning amal qilishini uzaytirish va tugatish to‘g‘risidagi farmonlarini esa ular kelib tushgan paytdan e’tiboran 72 soatdan kechiktirmay ko‘rib chiqadi.

O‘zbekiston Respublikasi Prezidentining urush holati, umumiy yoki qisman safarbarlik e’lon qilish to‘g‘risidagi, favqulodda holat joriy etish, uning amal qilishini uzaytirish va tugatish to‘g‘risidagi farmonlarini tasdiqlash haqidagi masala qo‘mitalarda dastlabki tarzda muhokama qilinmasdan Qonunchilik palatasi tomonidan ko‘rib chiqiladi.

Qonunchilik palatasining O‘zbekiston Respublikasi Prezidentining urush holati, umumiy yoki qisman safarbarlik e’lon qilish to‘g‘risidagi, favqulodda holat joriy etish, uning amal qilishini uzaytirish va tugatish to‘g‘risidagi farmonlarini tasdiqlash masalasi yuzasidan qarorlari darhol O‘zbekiston Respublikasi Prezidentiga yuboriladi.

O‘zbekiston Respublikasi Markaziy saylov komissiyasi a’zoligiga nomzodlar to‘g‘risidagi takliflar Qonunchilik palatasi ko‘rib chiqishi uchun Qoraqalpog‘iston Respublikasi Jo‘qorg‘i Kengesi, xalq deputatlari viloyatlar va Toshkent shahar Kengashlari tomonidan kiritiladi.

Qonunchilik palatasining O‘zbekiston Respublikasi Markaziy saylov komissiyasi a’zolarini saylash masalasi yuzasidan qarori mazkur qaror qabul qilingan kundan e’tiboran uch kun ichida Senatga yuboriladi.

O‘zbekiston Respublikasi Oliy Majlisining Inson huquqlari bo‘yicha vakili nomzodi Qonunchilik palatasi ko‘rib chiqishi uchun O‘zbekiston Respublikasi Prezidenti tomonidan kiritiladi.

Qonunchilik palatasining O‘zbekiston Respublikasi Oliy Majlisining Inson huquqlari bo‘yicha vakilini saylash masalasi yuzasidan qarori Senatga yuboriladi.

O‘zbekiston Respublikasi Oliy Majlisining Inson huquqlari bo‘yicha vakili nomzodi O‘zbekiston Respublikasi Oliy Majlisi palatalarining majlislarida ko‘rib chiqilganidan keyin ushbu masala yuzasidan qabul qilingan uzil-kesil qaror qonunda belgilangan tartibda O‘zbekiston Respublikasi Prezidentiga yuboriladi.

O‘zbekiston Respublikasi Bosh prokurorining Qonunchilik palatasi deputatini jinoiy javobgarlikka tortish, ushlab turish, qamoqqa olish yoki unga nisbatan sud tartibida beriladigan ma’muriy jazo choralarini qo‘llashga rozilik olish to‘g‘risidagi taqdimnomalari Qonunchilik palatasi tomonidan, Qonunchilik palatasining sessiyalari oralig‘idagi davrda esa uning Kengashi tomonidan ko‘rib chiqilib, keyinchalik Kengashning ushbu masala yuzasidan qarori Qonunchilik palatasining sessiyasida tasdiqlanadi.

Qonunchilik palatasining yoki uning Kengashining deputatni daxlsizlik huquqidan mahrum etishga rozilik berish to‘g‘risidagi qarori yashirin ovoz berish orqali qabul qilinadi.

Qonunchilik palatasining yoki uning Kengashining deputatni jinoiy javobgarlikka tortish, ushlab turish, qamoqqa olish yoki unga nisbatan sud tartibida beriladigan ma’muriy jazo choralarini qo‘llashga rozilik berish masalasi yuzasidan qarori darhol O‘zbekiston Respublikasi Bosh prokuroriga yuboriladi.

Reglament, unga o‘zgartishlar va qo‘shimchalar kiritish Qonunchilik palatasining qarori bilan qabul qilinadi.

Reglamentni o‘zgartirish va unga qo‘shimchalar kiritish to‘g‘risidagi takliflar qo‘mitalar, deputatlar birlashmalari yoki deputatlar umumiy sonining kamida beshdan bir qismi miqdoridagi deputatlar guruhi tomonidan kiritilishi mumkin, tushgan taklif Kengash tomonidan Qonunchilik palatasi majlisi kun tartibining loyihasiga qo‘shiladi va palata uni birinchi navbatda ko‘rib chiqadi.

Qonunchilik palatasi majlislarini o‘tkazish, Qonunchilik palatasining Reglamentida nazarda tutilmagan faoliyatiga doir boshqa masalalarni ko‘rib chiqish tartib-taomillari Qonunchilik palatasining majlisida deputatlar umumiy sonining ko‘pchilik ovozi bilan qabul qilinadi, bayonnoma tarzida rasmiylashtiriladi va qabul qilingan kundan e’tiboran amal qiladi.

Qonunchilik palatasi Davlat budjetining ijrosi ustidan nazoratni amalga oshiradi. O‘zbekiston Respublikasi Moliya vazirligi yilning har choragida Qonunchilik palatasiga Davlat budjeti ijrosining borishi to‘g‘risidagi axborotni va zarur materiallarni yuboradi.

Qonunchilik palatasi Davlat budjetining yilning har choragidagi ijrosining borishini ko‘rib chiqadi. Uni ko‘rib chiqish vaqtida O‘zbekiston Respublikasi Vazirlar Mahkamasining hisoboti, mas’ul qo‘mitaning xulosasi eshitiladi, muhokama o‘tkaziladi va tegishli qaror qabul qilinadi.

Qonunchilik palatasi, shuningdek deputat davlat hokimiyati va boshqaruvi organlarining mansabdor shaxslariga ularning vakolatlariga kiradigan masalalar yuzasidan asoslantirilgan tushuntirish berish yoki nuqtai nazarini bayon qilish talabi bilan parlament so‘rovi yuborishga haqli.

Parlament so‘roviga javobni davlat hokimiyati va boshqaruvi organlarining mansabdor shaxslari so‘rov olingan kundan e’tiboran o‘n kundan kechiktirmay Qonunchilik palatasining majlisida beradilar.

O‘zbekiston Respublikasi Oliy sudining raisi, Oliy xo‘jalik sudining raisi, Bosh prokurori, surishtiruv va tergov organlarining rahbarlari nomiga yo‘llangan parlament so‘rovi ularning ish yurituvidagi muayyan ishlar va materiallarga taalluqli bo‘lishi mumkin emas.

Parlament so‘rovlari bo‘yicha axborot Qonunchilik palatasi majlisida muhokama qilinishi mumkin. Qonunchilik palatasi muhokama yakunlari bo‘yicha qaror qabul qiladi.

Qonunchilik palatasi har yili, hisobotdan keyingi yilning 15-fevralidan kechiktirmay, o‘z majlisida O‘zbekiston Respublikasi Oliy Majlisining Inson huquqlari bo‘yicha vakilining faoliyati to‘g‘risidagi hisobotni eshitadi.

Qonunchilik palatasi har yili, hisobotdan keyingi yilning 15-mayidan kechiktirmay, o‘z majlisida O‘zbekiston Respublikasi Hisob palatasining hisobotini eshitadi.

Qonunchilik palatasi yoki u vakolat bergan organ har yili, hisobotdan keyingi yilning 15-fevralidan kechiktirmay, o‘z majlisida siyosiy partiyalarning o‘z faoliyatlarini moliyalashtirish manbalari to‘g‘risidagi hisobotlarini eshitadi.

Siyosiy partiyaning hisobotiga uning Qonunchilik palatasiga saylovda ishtirok etishini va ustavda nazarda tutilgan faoliyatini moliyalashtirish uchun hisobot yilida partiyaning hisob-kitob varag‘iga kelib tushgan hamda sarflangan davlat mablag‘lari to‘g‘risida O‘zbekiston Respublikasi Markaziy saylov komissiyasi, Hisob palatasi va Adliya vazirligining xulosasi ilova qilinadi.

Siyosiy partiyalarning o‘z faoliyatlarini moliyalashtirish manbalari to‘g‘risidagi hisobotlarini muhokama qilish natijalariga ko‘ra Qonunchilik palatasi qaror qabul qiladi.

Siyosiy partiyaning moliyalashtirish manbalari to‘g‘risidagi hisoboti ommaviy axborot vositalari va manfaatdor tashkilotlarning vakillari taklif etilgan holda ko‘rib chiqiladi.

Qonunchilik palatasining O‘zbekiston Respublikasi Oliy Majlisining Inson huquqlari bo‘yicha vakili va O‘zbekiston Respublikasi Hisob palatasining hisobotlari yuzasidan qabul qilgan qarorlari mazkur qarorlar qabul qilingan kundan e’tiboran o‘n kun ichida Senatga yuboriladi.

Qonunchilik palatasining majlisida hukumat a’zolarining faoliyati masalalari yuzasidan ularning axborotini eshitish deputatlar birlashmalarining tashabbusiga ko‘ra amalga oshiriladi hamda Qonunchilik palatasi majlislarining kun tartibiga muvofiq o‘tkaziladi.

Qo‘mitalar, shuningdek deputatlar davlat organlari va boshqa tashkilotlardan, mansabdor shaxslardan hujjatlar, ekspert xulosalari, statistika ma’lumotlari va boshqa ma’lumotlarni talab qilib olishlari mumkin.

Qo‘mitalar yoki deputatlar talab qilib oladigan axborotni tegishli davlat organi, boshqa tashkilot, mansabdor shaxs murojaat olingan kundan e’tiboran o‘n kundan kechiktirmay taqdim etishi kerak.

Qo‘mitalarning davlat hokimiyati va boshqaruvi organlari rahbarlarining ular tomonidan qonunlarga qanday rioya etilayotgani, qo‘mitalarning qarorlari qanday bajarilayotgani to‘g‘risidagi axborotlarini eshitishi qo‘mitalarning ish rejalariga muvofiq o‘tkaziladi.

Qonunchilik palatasi boshqa davlatlarning parlamentlari va xalqaro parlament tashkilotlari bilan parlamentlararo hamkorlik to‘g‘risida bitimlar tuzishi, rasmiy parlament delegatsiyalari bilan almashinishi, shuningdek xalqaro aloqalarni mustahkamlashga qaratilgan turli tadbirlarni o‘tkazishi mumkin.

Boshqa davlatlarning parlamentlari rahbarlariga, davlatlar va hukumatlar boshliqlariga, parlament delegatsiyalarining rahbarlariga ularning iltimosiga binoan Qonunchilik palatasi majlisida so‘zga chiqish imkoniyati berilishi mumkin.

Qonunchilik palatasi, uning organlari va Qonunchilik palatasi deputatlarining faoliyati bilan bog‘liq xarajatlar smetasi Qonunchilik palatasi Spikeri tomonidan tasdiqlanadi.