Oʻzbekiston Respublikasi Prezidentining 2006-yil 20-dekabrdagi “Osiyo oʻyinlari gʻolib va sovrindorlarini taqdirlash toʻgʻrisida”gi PF-3832-sonli Farmoniga muvofiq qaror qilamiz:

1. Osiyo oʻyinlarida qoʻlga kiritilgan yuksak natijalar uchun Oʻzbekiston Respublikasi sportchilariga pul mukofotlarini toʻlash tartibi toʻgʻrisidagi nizom tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgach kuchga kiradi.

Mazkur Nizom Oʻzbekiston Respublikasi Prezidentining 2006-yil 20-dekabrdagi “Osiyo oʻyinlari gʻolib va sovrindorlarini taqdirlash toʻgʻrisida”gi PF-3832-sonli Farmoniga muvofiq Osiyo oʻyinlarida oltin, kumush va bronza medalini olgan Oʻzbekiston Respublikasi sportchilariga pul mukofotlarini toʻlash tartibini belgilaydi.

1. Osiyo oʻyinlarida oltin, kumush va bronza medal olgan Oʻzbekiston Respublikasi sportchilari quyidagi miqdorlarda biryoʻla toʻlanadigan pul mukofoti bilan taqdirlanadilar:

oltin medal — 5000 AQSH dollari;

kumush medal — 3000 AQSH dollari;

bronza medal — 2000 AQSH dollari.

2. Osiyo oʻyinlarida oltin, kumush va bronza medal olgan Oʻzbekiston Respublikasi sportchilariga biryoʻla toʻlanadigan pul mukofotlarini berish bilan bogʻliq xarajatlar davlat budjetidan amalga oshiriladi.

3. Koʻrsatilgan xarajatlarni moliyalashtirish uchun zarur boʻlgan mablagʻlar Oʻzbekiston Respublikasi Moliya vazirligi tomonidan navbatdagi moliyaviy yil uchun Davlat budjeti xarajatlarini tasdiqlashda koʻzda tutiladi.

4. Budjet mablagʻlarini ajratish, ularni erkin muomaladagi valyutaga ayirboshlash va biryoʻla toʻlanadigan pul mukofotlarini toʻlash Oʻzbekiston Respublikasi Prezidentining farmoyishi asosida amalga oshiriladi.

5. Oʻzbekiston Respublikasi Moliya vazirligi Madaniyat va sport ishlari vazirligiga banklararo savdo sessiyasidan valyuta mablagʻlari xarid qilishi uchun milliy valyutada mablagʻ oʻtkazadi.

Madaniyat va sport ishlari vazirligi milliy valyutada ajratilgan mablagʻni erkin muomaladagi valyuta xarid qilish uchun oʻrnatilgan tartibda vakolatli bankka oʻtkazib beradi.

6. Vakolatli bank banklararo savdo sessiyasida valyuta mablagʻlarini xarid qiladi va Osiyo oʻyinlarida oltin, kumush va bronza medal olgan Oʻzbekiston Respublikasi sportchilarining depozit valyuta hisobraqamlariga muvofiq ravishda oʻtkazib beradi.

7. Osiyo oʻyinlarida oltin, kumush va bronza medalini olgan Oʻzbekiston Respublikasi sportchilarini kelgusida taqdirlash uchun vakolatli bank Madaniyat va sport ishlari vazirligiga oʻrnatilgan tartibda omonat daftarchalarini taqdim qiladi.

8. Ushbu Nizom Oʻzbekiston Respublikasi Tashqi iqtisodiy faoliyat milliy banki bilan kelishilgan.