Oʻzbekiston Respublikasi Prezidentining “Yoʻl-qurilish ishlari hajmi va sifati ustidan nazoratni kuchaytirish chora-tadbirlari hamda 2006-yilda avtomobil yoʻllari qurilishi dasturini tasdiqlash toʻgʻrisida” 2006-yil 3-martdagi PQ-299-sonli qaroriga muvofiq, shuningdek umumiy foydalaniladigan avtomobil yoʻllarini yaxshi holatda saqlash, taʼmirlash, qurish va rekonstruksiya qilish sohasida ekspluatatsiya va pudrat tashkilotlari faoliyatini takomillashtirish maqsadida:

1. “Oʻzavtoyoʻl” DAK, Oʻzbekiston Respublikasi Moliya vazirligi huzuridagi Respublika yoʻl jamgʻarmasi, Oʻzbekiston Transport va transport kommunikatsiyalari uyushmasining:

“Oʻzavtoyoʻl” DAK huzurida yoʻl xoʻjaligining amaldagi ixtisoslashtirilgan pudrat taʼmirlash-ekspluatatsiya korxonalari negizida xalqaro va davlat ahamiyatiga ega avtomobil yoʻllarini yaxshi holatda saqlash boʻyicha ixtisoslashtirilgan taʼmirlash-ekspluatatsiya korxonalarini tashkil etish;

“Oʻzavtoyoʻl” DAKning hududiy yoʻl-qurilish shoʻba korxonalarini hududiy yoʻl-ekspluatatsiya tashkilotlari sifatida qayta tashkil etish;

“Oʻzavtoyoʻl” DAK hududiy yoʻl-ekspluatatsiya tashkilotlari huzuridagi amaldagi tuman ixtisoslashtirilgan yoʻl-koʻprik pudrat taʼmirlash-ekspluatatsiya korxonalari negizida umumiy foydalaniladigan avtomobil yoʻllari koʻprik xoʻjaligini yaxshi holatda saqlash boʻyicha taʼmirlash-ekspluatatsiya korxonalarini tashkil etish toʻgʻrisidagi taklifiga rozilik berilsin.

2. Quyidagilar:

“Oʻzavtoyoʻl” DAKning tashkiliy tuzilmasi boshqaruv xodimlarining cheklangan soni 29 kishidan iborat va uning ijro etuvchi apparati tuzilmasi 1 va 2-ilovalarga* muvofiq;

hududiy yoʻl-ekspluatatsiya tashkiloti va yoʻl xoʻjaligi tuman pudrat taʼmirlash-ekspluatatsiya korxonasining namunaviy tuzilmalari 3 va 4-ilovalarga* muvofiq;

xalqaro va davlat ahamiyatiga ega avtomobil yoʻllarini yaxshi holatda saqlash boʻyicha ixtisoslashtirilgan taʼmirlash-ekspluatatsiya korxonalari, shuningdek koʻprik xoʻjaligini yaxshi holatda saqlash boʻyicha ixtisoslashtirilgan taʼmirlash-ekspluatatsiya korxonalari tarkibi va namunaviy tuzilmalari 5, 5a, 6, 6a-ilovalarga* muvofiq maʼqullansin.

“Oʻzavtoyoʻl” DAK Boshqaruvi raisiga zarur hollarda kompaniyaning ijro etuvchi apparati tuzilmasiga xodimlarning belgilangan cheklangan soni doirasida oʻzgartishlar kiritishga ruxsat berilsin.

3. Belgilansinki, “Oʻzavtoyoʻl” DAK umumiy foydalaniladigan avtomobil yoʻllarini davlat tomonidan boshqaradigan maxsus vakolatli organ hisoblanadi.

4. “Oʻzavtoyoʻl” DAK belgilangan tartibda:

bir oy muddatda kompaniya Nizomiga zarur oʻzgartish va qoʻshimchalar kiritsin;

ikki oy muddatda kompaniya ijro etuvchi apparati xodimlarini, shuningdek uning hududiy boʻlinmalari rahbar xodimlarini, yuqori malakali kadrlar bilan toʻldirishni nazarda tutgan holda attestatsiyadan oʻtkazsin.

5. Vazirlar Mahkamasining “Oʻzavtoyoʻl” davlat-aksiyadorlik kompaniyasi va Oʻzbekiston Respublikasi Moliya vazirligi huzuridagi Respublika yoʻl jamgʻarmasi faoliyatini tashkil etish masalalari toʻgʻrisida” 2003-yil 21-avgustdagi 361-sonli qarorining 1-bandi hamda qarorning 1—4-ilovalari oʻz kuchini yoʻqotgan deb hisoblansin.

6. Oʻzbekiston Respublikasi Adliya vazirligi bir oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

7. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.