Oʻzbekiston Respublikasining qonuni

“OʻZBEKISTON QAHRAMONI” UNVONINI BELGILASh VA OLIY NIShON — “OLTIN YuLDUZ” MEDALINI TAʼSIS ETISh TOʻGʻRISIDA

Oʻzbekiston Respublikasi Oliy Kengashi qaror qiladi:

1. “Oʻzbekiston Qahramoni” unvoni belgilansin va oliy nishon — “Oltin Yulduz” medali taʼsis etilsin.

2. “Oʻzbekiston Qahramoni” unvoni toʻgʻrisidagi Nizom tasdiqlansin (ilova qilinadi).

3. “Oltin Yulduz” medalining tavsifi tasdiqlansin (ilova qilinadi).

Oʻzbekiston Respublikasining Prezidenti I. KARIMOV

Toshkent sh.,

1994-yil 5-may,

1038-XII-son

1994-yil 5-mayda qabul qilingan
Oʻzbekiston Respublikasi Qonuni bilan
TASDIQLANGAN

“Oʻzbekiston Qahramoni” unvoni toʻgʻrisidagi

NIZOM

1. “Oʻzbekiston Qahramoni” unvoni oliy darajadagi mukofot boʻlib, Oʻzbekiston Respublikasining fuqarolariga davlat va xalq oldidagi qahramonona jasorat koʻrsatish bilan bogʻliq xizmatlari uchun beriladi.

“Oʻzbekiston Qahramoni” unvoni ayrim hollarda Oʻzbekiston Respublikasi fuqarosi boʻlmagan shaxslarga ham berilishi mumkin.

2. “Oʻzbekiston Qahramoni” unvoni Oʻzbekiston Respublikasi Prezidenti tomonidan beriladi. Unvon berish toʻgʻrisidagi Farmon matbuotda va boshqa ommaviy axborot vositalarida eʼlon qilinadi.

Oʻzbekiston Respublikasi Prezidentiga “Oʻzbekiston Qahramoni” unvoni berish Oʻzbekiston Respublikasi Oliy Majlisi tomonidan amalga oshiriladi.

Oldingi tahrirga qarang.

3. “Oʻzbekiston Qahramoni” unvonini berish Oʻzbekiston Respublikasi Vazirlar Mahkamasi, Oʻzbekiston Respublikasi Konstitutsiyaviy sudining Raisi, Oʻzbekiston Respublikasi Oliy sudining Raisi, Oʻzbekiston Respublikasi Bosh prokurori, Qoraqalpogʻiston Respublikasi Joʻqorgʻi Kengesining Raisi, viloyatlar va Toshkent shahar hokimlari, vazirliklar va idoralar rahbarlarining hamda jamoat birlashmalari respublika organlarining taqdimnomasiga binoan amalga oshiriladi.

(3-modda Oʻzbekiston Respublikasining 2023-yil 28-noyabrdagi OʻRQ-880-sonli Qonuni tahririda — Qonunchilik maʼlumotlari milliy bazasi, 29.11.2023-y., 03/23/880/0905-son)

4. “Oʻzbekiston Qahramoni” unvoni bilan taqdirlangan shaxsga “Oltin Yulduz” medali va unvon berilganligi toʻgʻrisidagi tegishli hujjat topshiriladi.

Oldingi tahrirga qarang.

5. “Oltin Yulduz” medalini tantanali va keng oshkoralik vaziyatida Oʻzbekiston Respublikasi Prezidenti yoki uning nomidan Oʻzbekiston Respublikasi Oliy Majlisining Qonunchilik palatasi Spikeri, Oʻzbekiston Respublikasi Oliy Majlisining Senati Raisi, Oʻzbekiston Respublikasi Bosh vaziri topshiradi.

(5-modda Oʻzbekiston Respublikasining 2004-yil 3-dekabrdagi 714-II-son Qonuni tahririda — Oʻzbekiston Respublikasi Qonun hujjatlari toʻplami, 2004-y., 51-son, 514-modda)

Oldingi tahrirga qarang.

6. “Oʻzbekiston Qahramoni” unvoni bilan taqdirlangan shaxslar oylik ish haqiga yoki pensiyaga qoʻshimcha ravishda bazaviy hisoblash miqdorida oy sayin toʻlanadigan ustama mukofot oladilar.

(6-moddaning birinchi qismi Oʻzbekiston Respublikasining 2019-yil 3-dekabrdagi OʻRQ-586-sonli Qonuni tahririda — Qonun hujjatlari maʼlumotlari milliy bazasi, 04.12.2019-y., 03/19/586/4106-son)

“Oʻzbekiston Qahramoni” unvoni bilan taqdirlangan shaxslar Oʻzbekiston Respublikasi hududida davlat passajir transportining barcha turlarida (taksidan va boshqa transport turlarining buyurtma reyslaridan tashqari) tekinga yurish huquqiga egadirlar.

LexUZ sharhi

6-moddaning ikkinchi qismining shahar yoʻlovchilar transportidan bepul foydalanishga doir qismi Oʻzbekiston Respublikasining “Shahar yoʻlovchilar transportidan bepul foydalanishni tartibga solish toʻgʻrisida”gi Qonuniga asosan oʻz kuchini yoʻqotgan.

Oldingi tahrirga qarang.

“Oʻzbekiston Qahramoni” unvoni bilan taqdirlangan shaxslar qonunchilikda belgilab qoʻyiladigan boshqa imtiyozlardan ham foydalanadilar.

(6-moddasi uchinchi qismi Oʻzbekiston Respublikasining 2021-yil 21-apreldagi OʻRQ-683-sonli Qonuni tahririda — Qonunchilik maʼlumotlari milliy bazasi, 21.04.2021-y., 03/21/683/0375-son)

7. “Oltin Yulduz” medali koʻkrakning chap tomoniga orden va medallardan yuqoriroqqa taqiladi.

8. “Oʻzbekiston Qahramoni” unvonini takroran berish mumkin emas.

9. “Oʻzbekiston Qahramoni” unvoni vafotidan keyin berilgan taqdirda “Oltin Yulduz” medali va unvon berilganligi toʻgʻrisidagi hujjat mukofotlanganning oilasiga topshiriladi.

1994-yil 5-mayda qabul qilingan
Oʻzbekiston Respublikasi Qonuni bilan
TASDIQLANGAN

“oltin yulduz” medalining tavsifi

“Oltin Yulduz” medali 585 darajali (probali) oltin qotishmasidan tayyorlanadi va old tomonida har bir qirrasining ikki yonbagʻridan oltin nurlar taralgan sakkiz qirrali yulduz shaklida boʻladi. Yulduzning qarama-qarshi joylashgan uchlarining orasi 32 millimetr. Medal markazidagi diametri 8 millimetrli sathga jo boʻlgan doira ichida Oʻzbekiston Respublikasi Davlat gerbining ramziga monand yarim oy va besh qirrali yulduz joylashgan. Yarim oy jo boʻlgan sath aylanasining diametri 6 millimetr, besh qirrali yulduz jo boʻlgan sath aylanasining diametri esa 3 millimetrdir.

Medalning orqa tomoni markazida Oʻzbekiston Respublikasi Davlat gerbi joylashgan. Gerbning pastidagi nurga medalning raqami 1 millimetr kattalikdagi botiq shrift bilan yozilgan.

Medal yonlari oʻyiq toʻgʻri toʻrtburchak shaklida ishlangan, oʻlchami 16x25 millimetrli kumush qadagʻich (kolodka)ga kumushdan ishlangan ilmoqcha va halqa yordamida ulanadi. Qadagʻichning qismlari va halqa 0,25 mikron qalinlikdagi tilla bilan qoplangan.

Qadagʻichning ichki qismi respublika Davlat bayrogʻining rangidagi yoʻl-yoʻl zardoʻzi mato (lenta) bilan qoplangan. Matoning kattaligi 11x20 millimetr.

Qadagʻichning orqa tomonida taqma toʻgʻnogʻich bor.

Medal ogʻirligi 12,5 gramm

(Oʻzbekiston Respublikasi Oliy Kengashining Axborotnomasi, 1994-y., 5-son, 113-modda; Oʻzbekiston Respublikasi Oliy Majlisning Axborotnomasi, 1996-y., 9-son, 141-modda; Oʻzbekiston Respublikasi qonun hujjatlari toʻplami, 2004-y., 51-son, 514-modda; 2017-y., 37-son, 978-modda; Qonun hujjatlari maʼlumotlari milliy bazasi, 04.12.2019-y., 03/19/586/4106-son; Qonunchilik maʼlumotlari milliy bazasi, 21.04.2021-y., 03/21/683/0375-son; 29.11.2023-y., 03/23/880/0905-son)