Ўзбекистон Республикаси божхона ва бошқа ҳуқуқни муҳофаза қилиш органларининг кинология хизмати фаолиятини такомиллаштириш мақсадида Вазирлар Маҳкамаси қарор қилади:

1. Ўзбекистон Республикаси Давлат солиқ қўмитасининг Ўзбекистон Республикаси Давлат солиқ қўмитаси Бош божхона бошқармаси таркибида Миллий кинология марказини ташкил этиш тўғрисидаги таклифига розилик берилсин.

Миллий кинология марказига умумий раҳбарлик қилиш Ўзбекистон Республикаси Давлат солиқ қўмитаси Бош божхона бошқармасига юклансин.

2. Қуйидагилар Миллий кинология марказининг асосий вазифалари этиб белгилансин:

Ўзбекистон Республикаси ҳуқуқни муҳофаза қилиш органларнинг кинология хизматларини услубий таъминлаш;

малакали кинолог-мутахассислар тайёрлаш;

божхона органлари, Ўзбекистон Республикаси Ички ишлар вазирлиги, Миллий хавфсизлик хизмати ва Мудофаа вазирлиги бўлинмалари, шунингдек Марказий Осиё мамлакатлари учун хизмат итларини наслига қараб танлаш ва ўргатиш.

3. Миллий кинология марказига 1-иловага мувофиқ 19 та, Ўзбекистон Республикаси Давлат солиқ қўмитаси Бош божхона бошқармасининг кинология хизматига 2-иловага мувофиқ 29 та штат ажратилсин.

4. Ўзбекистон Республикаси Давлат солиқ қўмитаси Бош божхона бошқармаси бир ой муддатда:

Миллий кинология маркази тўғрисида Низомни белгиланган тартибда ишлаб чиқсин ва тасдиқласин;

Миллий кинология маркази ҳамда Бош божхона бошқармаси кинология хизматини кадрлар, зарур асбоб-ускуналар, техник воситалар билан бутласин, шунингдек наслдор итлар харид қилсин (1, 2, 3-иловалар*).

5. Ўзбекистон Республикаси Молия вазирлиги Давлат солиқ қўмитаси Бош божхона бошқармасига ушбу қарорни амалга ошириш учун бюджетдан зарур маблағлар ажратсин.

7. «Ўзистиқболстат» давлат қўмитаси ва Ўзбекистон Республикаси Молия вазирлиги Ўзбекистон Республикасининг жорий йил II ярим йиллиги ҳамда 1997 йилги инвестиция дастури прогнозларида Миллий кинология маркази қурилишини тугаллаш учун молиявий таъминлаш манбаларини аниқлаган ҳолда капитал қўйилмаларнинг зарур лимитларини назарда тутсинлар.

8. «Ўзбекистон ҳаво йўллари» миллий авиакомпанияси, «Ўзбекистон темир йўллари» давлат-акционерлик компанияси ҳамда «Тошшаҳарйўловчитранс» давлат уюшмаси Давлат солиқ қўмитаси Бош божхона бошқармасига ҳисобдан чиқарилганларидан ўқув мақсадлари учун макетлар сифатида фойдаланиш учун тегишли асбоб-ускуналари билан самолётлар, вагонлар ва юк автомобилларини текинга ажратсинлар.

9. Ўзбекистон Республикаси Алоқа вазирлиги Миллий кинология марказини белгиланган тартибда телефон алоқаси билан таъминласин.

10. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Б.С. Ҳамидов зиммасига юклансин.