Ўзбекистон Республикаси билан Туркия Республикаси ўртасидаги доимий иқтисодий алоқаларни ривожлантириш ва мустаҳкамлаш, бозор иқтисодиёти шароитида ўзаро тажрибалардан фойдаланиш, мутахассисларни тайёрлаш соҳасида ҳамкорлик қилиш мақсадида Вазирлар Маҳкамаси қарор қилади:

1. Вазирлар Маҳкамаси ҳузурида Ўзбекистон Республикаси билан Туркия Республикаси ўртасидаги кадрлар тайёрлаш соҳасидаги битимларнинг бажарилишини назорат қилишни амалга ошириш юзасидан 1-иловага* мувофиқ мувофиқлаштирувчи гуруҳ тузилсин.

2. Ўзбекистон Республикаси билан Туркия Республикаси ўртасидаги битимларни бажаришнинг қуйидаги графиклари тасдиқлансин:

2-иловага* мувофиқ кадрларни тайёрлаш соҳасида;

3-иловага* мувофиқ турк тили ва адабиёти бўйича мутахассисларни тайёрлаш, қайта тайёрлаш ва уларнинг малакасини ошириш соҳасида;

4-иловага* мувофиқ умумтаълим мактаблари ва ҳунар-техника билим юртлари ўқувчилари билан алмашиниш соҳасида;

5-иловага* мувофиқ матбаа маҳсулотларини чиқариш бўйича.

3. Кўрсатиб ўтилган битимларни амалга ошириш бўйича сарф-харажатлар сметаси 6-иловага* мувофиқ тасдиқлансин.

Молия вазирлиги ушбу мақсадлар учун зарур маблағларни ажратсин.

Ўзбекистоннинг тараққиёт истиқболини белгилаш қўмитаси Туркия Республикасига борувчи талабалар ва ўқувчиларга ҳамроҳлик қилувчи шахсларга харажатлар учун валюта ажратиш масаласини белгиланган тартибда ҳал қилсин.

4. Ўзбекистон Республикаси Олий ва ўрта махсус таълим вазирлиги, Халқ таълими вазирлиги, Соғлиқни сақлаш вазирлиги, Қишлоқ хўжалиги вазирлиги, Мелиорация ва сув хўжалиги вазирлиги, Алоқа вазирлиги, Маданият ишлари вазирлиги Ўзбекистон Республикаси учун энг зарур бўлган мутахассисликлар номенклатурасига мувофиқ равишда тестларда қатнашиш учун талабаларни ўз вақтида ва сифатли танлашни таъминласинлар, тестларни ўтказиш учун зарур шарт-шароитлар яратсинлар.

5. Ўзбекистон Республикаси Давлат матбуот қўмитаси Олий ва ўрта махсус таълим вазирлигининг буюртмалари бўйича ҳукуматлараро битимларни амалга ошириш учун зарур адабиётларни биринчи навбатда нашр этилишини назарда тутсин.

6. Олий ва ўрта махсус таълим вазирлиги, Халқ таълими вазирлиги республика ва вилоятлар тил ўрганиш марказларида қисқа муддатли курслар ташкил этиш ва тестдан ўтган талабаларга турк ва инглиз тилларини самарали ўқитиш, шу мақсадлар учун Туркия Республикаси вакилларидан фойдаланиш масалаларини ҳал этсинлар.

7. Олий ва ўрта махсус таълим вазирлиги, Ташқи ишлар вазирлиги талабаларнинг ўқиши билан боғлиқ муаммоларни ҳал этиш учун Олий ва ўрта махсус таълим вазирлигининг Туркия Республикасидаги ваколатхонаси тўғрисида Туркия томони билан келишиб олсинлар ва Вазирлар Маҳкамасига таклиф киритсинлар.

8. Ташқи ишлар вазирлиги, «Ўзбекистон ҳаво йўллари» миллий авиакомпанияси ўқишга юборилаётганларнинг кетиш ҳужжатларини ўз вақтида расмийлаштиришни ва уларни юборишни таъминласинлар.

9. Ўзбекистон Республикаси Давлат телевидение ва радиоэшиттириш компанияси, Миллий ахборот агентлиги ҳукуматлараро битимларнинг қандай бажарилаётганлигини мунтазам ёритиб борсинлар.

10. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари ўртоқ М.И. Қорабоев зиммасига юклатилсин. Ўзбекистон Республикаси билан Туркия Республикаси ўртасидаги кадрларни тайёрлаш соҳасидаги битимларнинг қандай амалга оширилаётганлиги 1992 йилнинг октябрь ойида кўриб чиқилсин.