Ўзбекистон Республикаси Президентининг
Фармони
Урбанизация жараёнларини тубдан такомиллаштириш чора-тадбирлари тўғрисида
Олиб борилаётган таркибий ислоҳотлар доирасида йирик стратегик инвестиция лойиҳаларини амалга ошириш билан бир қаторда шаҳарлар аҳолиси фаровонлигининг ўсиши ва барқарор ривожланишига етакловчи омил сифатида урбанизация жараёни тегишли даражада ҳисобга олинмаган. Натижада сўнгги йилларда урбанизация даражасининг пасайиш тенденцияси кузатилмоқда, шаҳар аҳоли пунктлари сони эса атиги 1065 дан 1071 гача кўпайган.
Йирик қишлоқ аҳоли пунктларини шаҳар посёлкаларига айлантириш бўйича кўрилган чора-тадбирларга қарамасдан, бугунги урбанизация даражаси шаҳарларни комплекс ривожлантириш бўйича замонавий талабларига жавоб бермайди ва жаҳон тенденцияларидан сезиларли даражада қолиб кетмоқда. Бунда урбанизация даражаси ҳанузгача барқарор хусусиятга эга эмас.
Урбанизация жараёнларининг давлат томонидан самарали тартибга солинишини таъминлаш ҳамда ер участкаларининг айланмаси ва улардан фойдаланишда замонавий бозор механизмларини жорий этиш мақсадида:
1. Қуйидагилар мамлакатда урбанизация жараёнларини тубдан такомиллаштиришнинг асосий йўналишлари этиб белгилансин:
мутлақо янги уй-жой сиёсатини амалга ошириш асосида урбанизация жараёнларини фаоллаштириш, бунда муҳандислик, транспорт ва ижтимоий инфратузилмалар билан таъминланган, ипотекани кредитлаш ва тадбиркорлик субъектларининг молиявий ресурсларини жалб қилиш механизмларидан фойдаланган ҳолда, шу жумладан кам ва ўрта даромадли оилалар учун арзонлаштирилган турар жойларни қуришга йўналтирилган инвестицияларни қўллаб-қувватлаш бўйича махсус чора-тадбирларни назарда тутиш;
жисмоний ва юридик шахслар учун турар жой ва нотурар жой бино ва иншоотлар остидаги ер участкаларига эгалик қилиш ҳуқуқини амалга оширишни кафолатлаш, ер участкаларини фуқаролик муомаласига киритиш учун шарт-шароитлар яратиш;
миграция жараёнларини маъмурий тартибга солиш тизимини такомиллаштириш йўли билан аҳолининг қишлоқ жойларидан шаҳарларга эркин ҳаракатланиш учун шарт-шароитлар яратиш;
йирик шаҳарлар аҳолисининг фаровонлигини таъминлаш, иқтисодий ва саноат ресурсларидан фойдаланишни кенгайтириш ҳисобига ушбу шаҳарлар аҳолисини тўлиқ ва самарали бандлигини таъминлашга кўмаклашиш, шунингдек ҳудудлардаги олий таълим муассасалари ва илмий-тадқиқот институтлари асосида технопарклар ташкил қилиш ва уларнинг тизимини мустаҳкамлаш;
авваламбор саноат, хизмат ва сервис соҳаларида аҳолининг даромадларини ошириш ва барқарор иш жойларини яратиш омили сифатида агломерацияларнинг афзалликларидан фойдаланишни назарда тутган ҳолда ўрта шаҳарларни, шу жумладан туман марказларини бошқаришда илғор халқаро тажрибани кенг жорий этиш;
йирик шаҳарларга туташ бўлган ва қулай транспорт алоқасига эга йўлдош-шаҳарлар тармоғини кенгайтириш, йирик шаҳарларнинг марказий қисмида саноат ва бошқа зоналар ҳудудларини қисқартирган ҳолда ижтимоий-ишбилармонлик зоналар ҳудудларини кенгайтириш.
2. Шундай тартиб ўрнатилсинки, унга мувофиқ:
юридик ва жисмоний шахслар ўзларига доимий фойдаланиш (эгалик қилиш), ижара ёхуд мерос қилиб қолдириладиган умрбод эгалик қилиш ҳуқуқлари асосида тегишли бўлган ер участкаларини қонунчиликка мувофиқ хусусийлаштириш ҳуқуқига эга;
кўрсатилган ер участкаларини хусусийлаштириш давлат хизматлари марказлари ёки Ягона интерактив давлат хизматлари портали орқали жисмоний ва юридик шахсларнинг аризалари асосида амалга оширилади;
хусусийлаштирилган ер участкалари хусусий мулк ва фуқаролик муомаласи объектларидир, уларга бўлган хусусий мулк ҳуқуқи дахлсиздир ва Ўзбекистон Республикасининг «Хусусий мулкни ҳимоя қилиш ва мулкдорлар ҳуқуқларининг кафолатлари тўғрисида»ги Қонунига мувофиқ давлат томонидан ҳимоя қилинади;
ер участкаларини хусусийлаштириш фақатгина унга бўлган ҳуқуқ давлат рўйхатидан ўтказилган ҳолда ҳамда Вазирлар Маҳкамаси томонидан белгиланадиган миқдорларда хусусийлаштириладиган ер участкасининг сотиб олиш қиймати тўланганда амалга оширилади.
(2-банднинг биринчи — олтинчи хатбошилари Ўзбекистон Республикаси Президентининг 2023 йил 19 июндаги ПФ-99-сонли Фармонига асосан биринчи — бешинчи хатбошилар билан алмаштирилган — Қонунчилик маълумотлари миллий базаси, 20.06.2023 й., 06/23/99/0403-сон)
Ўзбекистон Республикаси Вазирлар Маҳкамаси:
икки ой муддатда Ўзбекистон Республикаси Олий Мажлисининг Қонунчилик палатасига Ўзбекистон Республикасининг «Қишлоқ хўжалигига мўлжалланмаган ер участкаларини хусусийлаштириш тўғрисида»ги Қонуни лойиҳасини киритсин;
2019 йил 1 июнга қадар хусусийлаштириладиган ер участкалари учун табақалаштирилган тўловлар миқдорлари, шунингдек уларни тўлаш тартибини белгиловчи ҳукумат қарорини қабул қилсин.
3. Ўзбекистон Республикаси Иқтисодий тараққиёт ва камбағалликни қисқартириш вазирлиги манфаатдор вазирликлар ва идоралар билан биргаликда, шунингдек маҳаллий ва хорижий экспертларни жалб қилган ҳолда 2019 йил 1 июлга қадар белгиланган тартибда, шу жумладан комплекс уй-жойлар қурилиши ҳисобидан янги шаҳарлар ва йўлдош-шаҳарлар ташкил этишни назарда тутадиган Ўзбекистон Республикасида 2030 йилгача урбанизацияни ривожлантириш Концепциясини (кейинги ўринларда — Концепция) тасдиқлаш тўғрисида Ўзбекистон Республикаси Президентининг қарори лойиҳасини киритсин.
(3-банд Ўзбекистон Республикаси Президентининг 2020 йил 26 мартдаги ПФ-5975-сонли Фармони таҳририда — Қонун ҳужжатлари маълумотлари миллий базаси, 27.03.2020 й., 06/20/5975/0377-сон)
4. Қуйидагилар:
а) Ўзбекистон Республикаси Иқтисодий тараққиёт ва камбағалликни қисқартириш вазирлигининг асосий вазифалари этиб қуйидагилар белгилансин:
(4-банд «а» кичик бандининг биринчи хатбошиси Ўзбекистон Республикаси Президентининг 2020 йил 26 мартдаги ПФ-5975-сонли Фармони таҳририда — Қонун ҳужжатлари маълумотлари миллий базаси, 27.03.2020 й., 06/20/5975/0377-сон)
урбанизацияни тартибга солиш соҳасида ягона давлат сиёсатини амалга ошириш;
саноатлаштириш сиёсатининг суръатлари, босқичлари ва натижаларини узоқ муддатли режалаштириш, шаҳар ва қишлоқлардаги узоқ муддатли демографик тенденцияларни таҳлил қилиш, жадал саноатлаштириш шароитида шаҳарларнинг демографик сиғимлари ҳамда ишчи кучига бўлган эҳтиёжларини ҳисоблаш;
«ўсиш полюслари»ни аниқлаш, бошқарув марказлари жойларини танлаш, таълим, меҳнат бозорини шакллантириш, ички ва ташқи миграция соҳаларидаги сиёсатни келишиш;
қишлоқ аҳолисини янги саноат ихтисосликларига ўқитиш ва қайта тайёрлашга қаратилган қатор институционал ва ташкилий чора-тадбирларни белгилашни назарда тутувчи, ишчи кучининг қишлоқлардан шаҳарларга ҳаракатланишини рағбатлантириш бўйича комплекс чора-тадбирлар дастурини ишлаб чиқиш;
илғор, энергия тежовчи, экологик тоза технологиялар ва материалларни жорий этиш асосида ҳамда ижтимоий, муҳандислик-коммунал ва йўл-транспорт инфратузилмаларини қамраб олган йўлдош-шаҳарлар бунёд этилишини ҳисобга олган ҳолда шаҳар агломерацияларини шакллантиришни бошқариш;
жаҳон амалиётини ҳисобга олган ҳолда шаҳар аҳолисини жойлаштириш тизимини комплекс ривожлантиришни тартибга солиш, кичик, ўрта, катта ва йирик шаҳарларнинг самарали нисбатини шакллантириш.
(4-банднинг «б» кичик банди Ўзбекистон Республикаси Президентининг 2023 йил 19 июндаги ПФ-99-сонли Фармонига асосан чиқарилган — Қонунчилик маълумотлари миллий базаси, 20.06.2023 й., 06/23/99/0403-сон)
5. Ўзбекистон Республикаси Иқтисодий тараққиёт ва камбағалликни қисқартириш вазирлиги Қурилиш вазирлиги, «ЎзшаҳарсозликЛИТИ» ДУК, «ТошкентбошпланЛИТИ» ДУК ва «Қишлоққурилишлойиҳа» МЧЖ билан биргаликда табиий-иқтисодий салоҳиятни аниқлаш мақсадида йирик шаҳарларга туташ аҳоли пунктларини инвентаризациядан ўтказишни таъминласин, амалга оширилган ишлар натижаларига кўра 2019 йил 1 ноябрга қадар тизимли урбанизация жараёни амалга оширилишини, янги саноат корхоналарининг ижтимоий ва ишлаб чиқариш инфратузилмаси объектлари билан комплекс жойлаштиришни ҳисобга олган ҳолда ўрта муддатли даврда йўлдош-шаҳарларга айлантириладиган аҳоли пунктлари рўйхатини шакллантирсин.
(5-банд Ўзбекистон Республикаси Президентининг 2020 йил 26 мартдаги ПФ-5975-сонли Фармони таҳририда — Қонун ҳужжатлари маълумотлари миллий базаси, 27.03.2020 й., 06/20/5975/0377-сон)
6. Ўзбекистон Республикаси Миллий статистика қўмитаси ва Агентлик томонидан режалаштирилган аҳолини рўйхатдан ўтказиш ишларининг натижаси ҳамда халқаро талаблар бўйича урбанизация даражасини ҳисоблаш методологиясидан келиб чиққан ҳолда, шаҳар аҳолисининг ҳисобини юритиш ва статистик ҳисоботларни такомиллаштиришни таъминласин.
(6-банд Ўзбекистон Республикаси Президентининг 2025 йил 24 февралдаги ПФ-27-сонли Фармони таҳририда — Қонунчилик маълумотлари миллий базаси, 01.03.2025 й., 06/25/27/0196-сон)
7. Ўзбекистон Республикаси Қурилиш вазирлиги Агентлик, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳамда манфаатдор идоралар билан биргаликда 2019 йил 1 июнга қадар 2020 — 2025 йилларда комплекс уй-жой қуриш давлат дастурларининг асосий прогноз параметрларини тасдиқлаш тўғрисидаги Ўзбекистон Республикаси Президентининг қарори лойиҳасини белгиланган тартибда киритсин, унда қуйидагилар назарда тутилсин:
бўш турган ер участкалари, яшаш учун яроқсиз бўлган турар жойлар ҳудудларини, шунингдек фойдаланилмаётган ёки самарасиз фойдаланилаётган бино ва иншоотларни, кейинчалик уларни инфратузилмавий ривожлантириш ва сотиш учун Жамғармага беришни назарда тутган ҳолда, хатловдан ўтказиш;
Ўзбекистон Республикаси Президенти ва Ҳукуматининг илгари қабул қилинган қарорларига мувофиқ амалга оширилаётган уй-жойлар қуриш бўйича амалдаги давлат дастурларини босқичма-босқич мақбуллаштириш, бўшайдиган маблағларни комплекс уй-жой қуриш давлат дастурлари доирасида тегишли уй-жойларни қуришга йўналтириш;
комплекс уй-жой қуриш давлат дастурларини уларга мос равишда молиялаштириш манбалари, қурилиш материаллари ресурслари ҳамда пудратчи қурилиш ташкилотлари қувватлари билан таъминлаш;
қурилаётган бино ва иншоотларнинг муайян қисмини фақат муқобил энергия манбалари билан жиҳозлаш ва таъминлаш бўйича мажбурий талабни белгилаш.
Белгилансинки, Жамғармага берилган бўш турган ер участкалари, яшаш учун яроқсиз бўлган турар жой бинолари ҳудудлари, шунингдек фойдаланилмаётган ёки самарасиз фойдаланилаётган бино ва иншоотлар хусусийлаштирилган ҳисобланади ва кейинчалик белгиланган тартибда қурувчиларга сотилиши мумкин.
8. Белгилаб қўйилсинки, Агентлик:
Ўзбекистон Республикаси Ер ресурслари, геодезия, картография ва давлат кадастри давлат қўмитаси билан биргаликда Концепцияни амалга ошириш учун қишлоқ хўжалигига мўлжалланмаган ер участкаларини тегишли ҳудудлар ва аҳоли пунктларининг бош режаларига мувофиқ аниқлайди;
манфаатдор вазирликлар ва идоралар билан биргаликда Концепция доирасида белгиланган ер участкаларида зарур муҳандислик, транспорт ва ижтимоий инфратузилмани жойлаштириш юзасидан назоратни таъминлайди.
9. Ўзбекистон Республикасида урбанизацияни тартибга солишни таъминлаш бўйича «Йўл харитаси» иловага мувофиқ тасдиқлансин.
Вазирлар Маҳкамаси ҳар чоракда Ўзбекистон Республикаси Президенти Администрациясининг Ислоҳотларни ҳуқуқий таъминлаш ва ҳуқуқни муҳофаза қилиш фаолиятини мувофиқлаштириш масалалари бўйича маслаҳатчиси бўлинмаларига мазкур «Йўл харитаси»нинг ижро ҳолати тўғрисидаги ахборотни киритиб борсин.
10. Ўзбекистон Республикаси Марказий банки тижорат банклари билан биргаликда 2019 йил 1 апрелга қадар тадбиркорлик, истеъмол, ипотека ва бошқа кредитлар юзасидан банкка мурожаат қилиш жойи бўйича рўйхатда туриш мажбурийлиги ҳақидаги талабни бекор қиладиган кредитлашнинг янги тартибини ишлаб чиқсин ва жорий этсин.
11. Ўзбекистон Республикаси Иқтисодий тараққиёт ва камбағалликни қисқартириш вазирлиги манфаатдор вазирликлар ва идоралар билан биргаликда уч ой муддатда шартнома асосида мустақил консультантлар ва экспертларни, техник кўмак маблағлари ва грантларни жалб қилган ҳолда, урбанизация соҳасида энг муҳим халқаро рейтинглар ва индикаторларнинг кўрсаткичлари, уларни шакллантириш методологиялари чуқур ўрганилишини таъминласин, шунингдек кўрсатилган рейтингларда Ўзбекистон Республикасининг ўрнини яхшилаш бўйича таклифлар киритсин.
(11-банд Ўзбекистон Республикаси Президентининг 2020 йил 26 мартдаги ПФ-5975-сонли Фармони таҳририда — Қонун ҳужжатлари маълумотлари миллий базаси, 27.03.2020 й., 06/20/5975/0377-сон)
12. Ўзбекистон Республикаси Иқтисодиёт ва саноат вазирлиги, Адлия вазирлиги икки ой муддатда Вазирлар Маҳкамасига:
Ўзбекистон Республикаси Иқтисодиёт ва саноат вазирлиги ҳузуридаги Урбанизацияни ривожлантириш жамғармаси фаолиятини, унинг маблағларини шакллантириш манбалари ва улардан фойдаланиш тартибини назарда тутган ҳолда, ташкил этиш тўғрисидаги ҳукумат қарори лойиҳасини;
қонун ҳужжатларига ушбу Фармондан келиб чиқадиган ўзгартириш ва қўшимчалар тўғрисидаги таклифларни киритсин.
13. Ўзбекистон Миллий телерадиокомпанияси, Ўзбекистон Матбуот ва ахборот агентлиги ва оммавий ахборот воситаларига мазкур Фармоннинг мазмун-моҳияти ҳамда унда белгиланган чора-тадбирларнинг амалга оширилишини кенг ёритиш тавсия этилсин.
14. Мазкур Фармоннинг ижросини назорат қилиш Ўзбекистон Республикасининг Бош вазири А.Н. Арипов, Ўзбекистон Республикаси Президенти Администрацияси раҳбари З.Ш. Низомиддинов, Ўзбекистон Республикаси Президенти маслаҳатчисининг биринчи ўринбосари Б.М. Мавлонов зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2019 йил 10 январь,
ПФ-5623-сон
Ўзбекистон Республикаси Президентининг 2019 йил 10 январдаги ПФ-5623-сон Фармонига
ИЛОВА
Ўзбекистон Республикасида урбанизацияни тартибга солишни таъминлаш бўйича
«Йўл харита»си

Т/р

Тадбир номи

Ижро муддати

Амалга ошириш шакли

Молиялаштириш манбалари

Масъул ижрочилар

I. Урбанизацияни тартибга солиш ва давлат уй-жой сиёсатини такомиллаштириш соҳасида норматив-ҳуқуқий базани такомиллаштириш

1.

Ўзбекистон Республикасининг «Қишлоқ хўжалигига мўлжалланмаган ер участкаларини хусусийлаштириш тўғрисида»ги Қонуни лойиҳасини ишлаб чиқиш.

2019 йил

1 апрелга қадар

Ўзбекистон Республикаси қонуни лойиҳаси

–

Вазирлар Маҳкамаси,

вазирликлар ва идоралар

2.

Уй-жой сиёсатининг узоқ муддатли стратегиясини назарда тутувчи Ўзбекистон Республикаси Уй-жой кодексининг янги таҳрирдаги лойиҳасини ишлаб чиқиш.

2019 йил

1 августга қадар

Ўзбекистон Республикаси қонуни лойиҳаси

–

Уй-жой коммунал хизмат кўрсатиш вазирлиги,

Иқтисодиёт ва саноат вазирлиги, Қурилиш вазирлиги,

Олий суд, Ергеодезкадастр,

3.

Қишлоқ хўжалигига мўлжалланмаган ер участкаларини хусусийлаштирилишини ҳисобга олган ҳолда Ўзбекистон Республикаси Ер кодексининг янги таҳрирдаги лойиҳасини ишлаб чиқиш.

2019 йил

1 июлга қадар

Ўзбекистон Республикаси қонуни лойиҳаси

–

Ергеодезкадастр,

Давлат рақобат қўмитаси,

Иқтисодиёт ва саноат вазирлиги

4.

Ер солиғи ставкасини ошириш ва хусусийлаштирилган ва эгалик қилинган ер участкалари учун рағбатлантирувчи мол-мулк солиғи ставкасини белгилаш.

ҳар йили

Ўзбекистон Республикаси Президенти қарори лойиҳаси

–

Молия вазирлиги,

Иқтисодий тараққиёт ва камбағалликни қисқартириш вазирлиги

Давлат солиқ қўмитаси

5.

Ўзбекистон Республикасининг Шаҳарсозлик кодексига шаҳар ва қишлоқ аҳоли пунктларини ажратиш мезонларини аниқ белгиловчи, турли тоифадаги шаҳарларни комплекс ривожлантиришни назарда тутувчи ўзгартиришлар киритиш.

2019 йил

1 майга қадар

Ўзбекистон Республикаси қонуни лойиҳаси

–

Қурилиш вазирлиги, Иқтисодиёт ва саноат вазирлиги

6.

Юридик шахсларга тегишли бинолар ва иншоотлар билан банд бўлган ер участкаларини хусусийлаштириш ва бозор қийматини аниқлаш тартиби тўғрисидаги Низом лойиҳасини ишлаб чиқиш.

2019 йил

1 июнга қадар

Вазирлар Маҳкамаси қарори лойиҳаси

–

Давлат рақобат қўмитаси,

Иқтисодиёт ва саноат вазирлиги,

Молия вазирлиги,

Ергеодезкадастр,

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари

7.

Бинолар ва иншоотлар билан банд бўлган ер участкалари, шунингдек уларга туташ, ишлаб чиқариш фаолиятини амалга ошириш учун зарур бўлган участкалар чегараларини аниқлаш тартиби тўғрисидаги Низом лойиҳасини ишлаб чиқиш.

2019 йил

1 июнга қадар

Вазирлар Маҳкамаси қарори лойиҳаси

–

Ергеодезкадастр,

Иқтисодиёт ва саноат вазирлиги,

вазирлик ва идоралар, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари

8.

Якка тартибда уй-жой қуриш ва турар жойга хизмат кўрсатиш учун ажратилган ер участкаларини хусусийлаштириш ва бозор қийматини аниқлаш тартиби тўғрисидаги Низом лойиҳасини ишлаб чиқиш.

2019 йил

1 июнга қадар

Вазирлар Маҳкамаси қарори лойиҳаси

–

Давлат рақобат қўмитаси,

Иқтисодиёт ва саноат вазирлиги,

Ергеодезкадастр,

Қурилиш вазирлиги,

Уй-жой коммунал хизмат кўрсатиш вазирлиги

9.

Ер участкаларини ижарага бериш тартиби тўғрисидаги Низом лойиҳасини ишлаб чиқиш.

2019 йил

1 июнга қадар

Вазирлар Маҳкамаси қарори лойиҳаси

–

Ергеодезкадастр,

Молия вазирлиги,

Давлат рақобат қўмитаси,

Иқтисодиёт ва саноат вазирлиги,

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари

10.

Шаҳар ва қишлоқ жойларидаги энг муҳим шаҳарларни ажратиб олган ҳолда 2020 — 2025 йилларга мўлжалланган комплекс уй-жой қуриш давлат дастурларининг асосий прогноз параметрларини ишлаб чиқиш ва тасдиқлаш.

2019 йил

1 июнга қадар

Ўзбекистон Республикаси Президенти қарори лойиҳаси

–

Қурилиш вазирлиги, Иқтисодиёт ва саноат вазирлиги,

Молия вазирлиги,

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари

11.

Ҳудудлар кесимида уй-жой ва ижтимоий объектларнинг майдони ва сонидан келиб чиқиб, комплекс қурилиш доирасида аҳоли пункти учун зарур бўлган муҳандислик, транспорт ва ижтимоий инфратузилма қувватларини аниқлаш бўйича нормативларни ишлаб чиқиш ва тасдиқлаш.

2019 йил

1 июлга қадар

Норматив-ҳуқуқий ҳужжатлар, техник жиҳатдан тартибга солиш соҳасидаги норматив ҳужжатлар лойиҳалари

–

Қурилиш вазирлиги,
Уй-жой коммунал хизмат кўрсатиш вазирлиги,

Иқтисодиёт ва саноат вазирлиги,

Давлат автомобиль йўллари қўмитаси,

Ергеодезкадастр

II. Урбанизация жараёнларини тартибга солишни ташкил этиш

12.

Йўлдош-шаҳарларни шакллантириш учун истиқболларини аниқлаш мақсадида аҳоли пунктларини хатловдан ўтказиш.

2019 йил

1 июнга қадар

Комплекс

чора-тадбирлар

–

Иқтисодиёт ва саноат вазирлиги,

Қурилиш вазирлиги,

Ергеодезкадастр,

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари

13.

Инвестиция лойиҳаларини амалга ошириш учун энг қулай мақомини узайтириши билан бирга биринчи навбатдаги катта бўлмаган саноат корхоналарини жойлаштириш учун истиқболли қишлоқ аҳоли пунктлари, шаҳар посёлкалари ва кичик шаҳарлар рўйхатини шакллантириш.

2019 йил

1 июнга қадар

Комплекс

чора-тадбирлар

–

Иқтисодиёт ва саноат вазирлиги, Қурилиш вазирлиги,

Қишлоқ хўжалиги вазирлиги,

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари

14.

Ўзбекистон Республикасида 2030 йилгача урбанизацияни ривожлантириш Концепциясини ишлаб чиқиш.

2019 йил

1 июлга қадар

Ўзбекистон Республикаси Президенти қарори лойиҳаси

Техник кўмак маблағлари
ва бошқалар

Иқтисодиёт ва саноат вазирлиги,

Қурилиш вазирлиги,

халқаро молия институтлари

15.

Режалаштирилаётган аҳолини ҳисобга олиш ишлари ва урбанизация даражасининг халқаро рейтингини инобатга олган ҳолда, шаҳарлар ва ҳудудларнинг алоҳида тоифалари кесимида шаҳар аҳолисининг ҳисобини ва статистик ҳисоботини юритишни такомиллаштириш.

ҳар йили

Идоравий норматив-ҳуқуқий ҳужжатлар лойиҳалари

–

Миллий статистика қўмитаси,

Иқтисодий тараққиёт ва камбағалликни қисқартириш вазирлиги,

халқаро молия институтлари

16.

Урбанизация жараёнида қамраб олинган алоҳида тоифалардаги шаҳарларга махсус мақом берилишини назарда тутувчи таклифларни ишлаб чиқиш, хусусан:

шаҳар бюджетида қоладиган прогноз тушумларидан ошадиган сумма бўйича солиқ турларини кўпайтириш;

ер участкаларининг кимошди савдосидан тушган ва шаҳар бюджетига ўтказиб бериладиган маблағларни шаҳар бюджетига ўтказиладиган улушини кўпайтириш;

шаҳар бюджетида мавжуд бўлган мулкдан самарали фойдаланишга йўналтиришга қўшимча молиявий рағбатларни жорий этиш.

2019 йил

1 июнга қадар

Ўзбекистон Республикаси Президенти қарори лойиҳаси

–

Иқтисодиёт ва саноат вазирлиги,
Молия вазирлиги,
Адлия вазирлиги

III. Урбанизация ва шаҳарларни комплекс ривожлантиришни тартибга солиш бўйича ташкилий чора-тадбирлар

17.

Ўзбекистон Республикаси Президенти ва Ўзбекистон Республикаси Ҳукуматининг аввал қабул қилинган қарорларига мувофиқ амалга ошириладиган, уларни молиялаштириш манбалари ва тартибини сақлаб қолган ҳолда уй-жойларни қуриш бўйича давлат дастурларини оптимизация қилиш, шунингдек комплекс уй-жой қурилиши давлат дастурлари доирасида бўшайдиган маблағларни тегишли қурилишларга йўналтириш.

2019 йил

1 августга қадар

Комплекс

чора-тадбирлар

–

Иқтисодиёт ва саноат вазирлиги,

Молия вазирлиги,

Қурилиш вазирлиги

18.

Қурилган ва қурилаётган бинолар ва иншоотларнинг тарихий ва миллий қиёфасини тиклаш мақсадида бир қатор етакчи маҳаллий ва хорижий маданият арбобларидан, меъморлар, тарихчилар, археологлар, шу жумладан чет элдаги ватандошлардан иборат меъморий кенгашни ташкил этиш.

2019 йил

1 июнга қадар

Норматив-ҳуқуқий ҳужжат лойиҳаси

–

Қурилиш вазирлиги,
Маданият вазирлиги,
Иқтисодиёт ва саноат вазирлиги,

Фанлар академияси,

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари

19.

Комплекс уй-жой қуриш давлат дастурларининг пудратчи қурилиш ташкилотларнинг қувватлари, қурилиш материаллари ресурслари ва молиялаштириш манбалари билан параллел таъминлаш.

2019 йил

1 июнга қадар

Чора-тадбирлар режаси

–

Қурилиш вазирлиги,

Иқтисодиёт ва саноат вазирлиги,

Молия вазирлиги,

«Ўзқурилишматериаллари» АЖ

20.

Ўзбекистон Республикаси ҳудудида аҳолини жойлаштиришнинг Бош схемасини, Ўзбекистон Республикаси ҳудудларини режалаштириш схемасини, ҳамда Ўзбекистон Республикаси ҳудудларини ривожлантиришнинг тармоқ схемаларини босқичма-босқич ишлаб чиқиш.

Жадвалга мувофиқ

Норматив-ҳуқуқий ҳужжатлар лойиҳалари

Асосланган ҳисоб-китоблар бўйича

Қурилиш вазирлиги,

Иқтисодий тараққиёт ва камбағалликни қисқартириш вазирлиги,

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари

21.

Шаҳарсозлик ва шаҳарни режалаштириш соҳасидаги замонавий ютуқларни ҳисобга олган ҳолда шаҳарларнинг бош режаларини ва аҳоли пунктларининг батафсил жойлашув режаларини ишлаб чиқиш бўйича танловлар, шу жумладан халқаро танловларни ўтказиш.

ҳар йили

Вазирлар Маҳкамаси қарори лойиҳаси

Асосланган ҳисоб-китоблар бўйича

Қурилиш вазирлиги,

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари

22.

Комплекс уй-жой қуриш массивларининг жойлаштирилишини ҳисобга олган ҳолда, аҳоли пунктларининг тасдиқланган бош режалари, муҳандислик-коммуникация инфратузилмаси схемаларига тузатишлар киритиш.

ҳар йили

Чора-тадбирлар режаси

Асосланган ҳисоб-китоблар бўйича

Қурилиш вазирлиги,

Иқтисодий тараққиёт ва камбағалликни қисқартириш вазирлиги,

Уй-жой коммунал хизмат кўрсатиш вазирлиги,

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари

23.

Ушбу Фармоннинг мақсадлари, мазмуни ва аҳамиятини халқаро ишбилармон доиралар вакиллари, хорижий инвесторларга тушунтириш мақсадида, шу жумладан Ўзбекистон Республикасининг хорижий давлатлардаги дипломатик ваколатхоналари орқали тақдимотлар, семинарлар, матбуот анжуманлари ва шунга ўхшаш бошқа тадбирлар ўтказиш.

ҳар йили

Амалий
чора-тадбирлар

–

Иқтисодий тараққиёт ва камбағалликни қисқартириш вазирлиги,

Матбуот ва ахборот агентлиги, МТРК,

Ташқи ишлар вазирлиги,

Инвестициялар бўйича давлат қўмитаси,

Қурилиш вазирлиги,

Давлат рақобат қўмитаси,

Ергеодезкадастр,

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари

Изоҳ: зарур ҳолларда мазкур «Йўл харита»сига мувофиқ ишлаб чиқилиши лозим бўлган норматив-ҳуқуқий ҳужжатлар лойиҳалари ўзгартирилиши, бирлаштирилиши ёки қайта номланиши мумкин.
(илова Ўзбекистон Республикаси Президентининг 2025 йил 24 февралдаги ПФ-27-сонли Фармони таҳририда — Қонунчилик маълумотлари миллий базаси, 01.03.2025 й., 06/25/27/0196-сон)

(Қонун ҳужжатлари маълумотлари миллий базаси, 11.01.2019 й., 06/19/5623/2461-сон; 27.03.2020 й., 06/20/5975/0377-сон; 20.06.2023 й., 06/23/99/0403-сон; Қонунчилик маълумотлари миллий базаси, 01.03.2025 й., 06/25/27/0196-сон)