Ўзбекистон Республикаси Президентининг «Ўзбекистон Республикасида мева-сабзавотчиликни жадал ривожлантиришга доир қўшимча чора-тадбирлар тўғрисида» 2018 йил 29 мартдаги ПФ-5388-сон Фармонига ва «Банк хизматлари оммабоплигини ошириш бўйича қўшимча чора-тадбирлар тўғрисида» 2018 йил 23 мартдаги ПҚ-3620-сон қарорига мувофиқ Вазирлар Маҳкамаси қарор қилади:

1. Вазирлар Маҳкамасининг «Ўзбекистон Республикаси Вазирлар Маҳкамаси ҳузуридаги Тадбиркорлик фаолиятини ривожлантиришни қўллаб-қувватлаш давлат жамғармаси фаолиятини ташкил этиш чора-тадбирлари тўғрисида» 2017 йил 8 сентябрдаги 704-сон қарорига (Ўзбекистон Республикаси ҚХТ, 2017 й., 37-сон, 991-модда) иловага мувофиқ ўзгартириш ва қўшимчалар киритилсин.

2. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — молия вазири Ж.А. Қўчқоров ва Ўзбекистон Республикаси Вазирлар Маҳкамаси ҳузуридаги Тадбиркорлик фаолиятини ривожлантиришни қўллаб-қувватлаш давлат жамғармаси ижрочи директори А.А. Камалов зиммасига юклансин.

1. 6-банднинг «в» кичик бандида:

биринчи хатбошидаги «қиймати 4 млрд сўмдан ошмайдиган миқдордаги» сўзлари чиқариб ташлансин;

иккинчи хатбошидаги «миллий валютада» сўзларидан кейин «қиймати 8 млрд сўмдан ошмайдиган миқдордаги» сўзлари қўшилсин;

қуйидаги мазмундаги учинчи хатбоши қўшилсин:

«миллий валютада, қиймати 8 млрд сўмдан ошмайдиган миқдордаги, қайта молиялаштириш ставкасининг 1,5 бараваридан ошмайдиган фоиз ставкасида, Ўзбекистон Республикаси Президентининг «Тадбиркорлик субъектлари ва кенг аҳоли қатламига микрокредитлар ажратиш тизимини янада соддалаштириш чора-тадбирлари тўғрисида» 2017 йил 17 мартдаги ПҚ-2844-сон қарорида ва Ўзбекистон Республикаси Президентининг «Обод қишлоқ» дастури тўғрисида» 2018 йил 29 мартдаги ПФ-5386-сон Фармонида кўрсатилган лойиҳалар учун — 8 фоизли пункт миқдорида»;

учинчи ва тўртинчи хатбошилар тегишли равишда тўртинчи ва бешинчи хатбошилар деб ҳисоблансин;

тўртинчи хатбошидаги «миллий валютада» сўзларидан кейин «қиймати 8 млрд сўмдан ошмайдиган миқдордаги» сўзлари қўшилсин;

бешинчи хатбошидаги «хорижий валютада» сўзларидан кейин «қиймати эквивалентда 8 млрд сўмдан ошмайдиган миқдордаги» сўзлари қўшилсин;

қуйидаги мазмундаги хатбоши қўшилсин:

«хорижий валютада, 2017 йил 5 сентябргача иссиқхоналар қуриш, интенсив боғлар яратиш ва совутгичлар қуриш учун халқаро молия институтлари кредит линиялари ҳисобига ажратилган валюта кредитлари бўйича — белгиланган фоиз ставкасининг 50 фоизи миқдорида».

2. 35-банд қуйидаги таҳрирда баён қилинсин:

«35. Тижорат банкларининг кредитлари бўйича фоиз харажатларини қоплаш учун Жамғарма компенсациялари:

миллий валютада ажратиладиган, қиймати 8 млрд сўмдан ошмайдиган миқдордаги, қайта молиялаштириш ставкасининг 1,5 бараваридан ошмайдиган фоиз ставкасида — 5 фоиз пункти миқдорида;

миллий валютада ажратиладиган, қиймати 8 миллиард сўмдан ошмайдиган миқдордаги, қайта молиялаштириш ставкасининг 1,5 бараваридан ошмайдиган фоиз ставкасида, Ўзбекистон Республикаси Президентининг «Тадбиркорлик субъектлари ва кенг аҳоли қатламига микрокредитлар ажратиш тизимини янада соддалаштириш чора-тадбирлари тўғрисида» 2017 йил 17 мартдаги ПҚ-2844-сон қарорига 2-иловада кўрсатилган туманларда, шунингдек, Ўзбекистон Республикаси Президентининг 2018 йил 29 мартдаги ПФ-5386-сон Фармони билан тасдиқланган «Обод қишлоқ» дастури доирасида амалга ошириладиган лойиҳалар учун — 8 фоизли пункт миқдорида;

миллий валютада, қиймати 8 млрд сўмдан ошмайдиган миқдордаги, жамғариб бориладиган пенсия тизими маблағлари ҳисобига ажратиладиган имтиёзли кредитлар бўйича, Ўзбекистон Ёшлар иттифоқининг тавсиялари асосида ёш тадбиркорлар ташаббус билан чиққан лойиҳаларни амалга оширишга — банкнинг харажатларини қоплаш учун 3 фоизли ставка миқдорида;

хорижий валютада ажратиладиган, қиймати эквивалентда 8 млрд сўмдан ошмайдиган миқдордаги, тижорат банклари томонидан белгиланган фоиз ставкасининг 40 фоизи, бироқ 3 фоиздан ортиқ бўлмаган миқдорда;

хорижий валютада — 2017 йил 5 сентябргача иссиқхоналар қуриш, интенсив боғлар яратиш ва совутгичлар қуриш учун халқаро молия институтлари кредит линиялари ҳисобига ажратилган валюта кредитлари бўйича — белгиланган фоиз ставкасининг 50 фоизи миқдорида берилади».

3. Қуйидаги мазмундаги 40¹-банд қўшилсин:

«40¹. Хўжалик юритувчи субъектларнинг халқаро молия институтлари кредит линиялари ҳисобига иссиқхоналар қуриш, интенсив боғлар яратиш ва совутгичлар қуриш учун 2017 йил 5 сентябргача ажратилган валюта кредитлари бўйича компенсация бериш юзасидан мурожаатлари тижорат банкининг филиали томонидан қабул қилинади ва бир кун муддатда кейинчалик Жамғармага юбориш учун бош тижорат банкига берилади».

4. 60-банддаги «Кредитлар бўйича компенсация бериш тўхтатилган ва бекор қилинган» сўзлари «Кредитлар бўйича компенсация бериш Жамғарма Ижро этувчи дирекциясининг қарорларига мувофиқ тўхтатилган ва муддатидан олдин бекор қилинган» сўзлари билан алмаштирилсин.