Respublikada zamonaviy, eksportga moʻljallangan maishiy sovutgichlar ishlab chiqarishini yaratish maqsadida Vazirlar Mahkamasi qaror qiladi:

1. “Sino” aksiyadorlik jamiyatining Turkiyaning “Koch” kompaniyalari guruhi bilan turli modifikatsiyalardagi 250 ming maishiy sovutgichlar ishlab chiqaruvchi “ARSIN” qoʻshma korxonasini tashkil etish va keyinchalik qoʻshma korxonada aksiyadorlar sifatida Yevropa tiklanish va taraqqiyot banki va Xalqaro moliya korporatsiyasi ishtirok etishi toʻgʻrisidagi taklifiga rozilik berilsin.

2. Maʼlumot uchun qabul qilinsinki:

umumiy qiymati 76,9 mln AQSh dollari boʻlgan loyihani mablagʻ bilan taʼminlash qoʻshma korxonaning ustav jamgʻarmasi va 1-ilovaga* muvofiq 33,76 mln AQSh dollari hajmida qoʻshma korxonaga berish rejalashtirilayotgan Yevropa tiklanish va taraqqiyot banki va Xalqaro moliya korporatsiyasi mablagʻlari hisobiga amalga oshiriladi;

“ARSIN” qoʻshma korxonasining ustav jamgʻarmasi 43,14 mln AQSh dollariga teng summani, shu jumladan, 1a-ilova*ga muvofiq ustav jamgʻarmasini shakllantirish jadvaliga koʻra Oʻzbekiston tomonining ulushi 40 foizni va xorijiy tomon ulushi 60 foizni tashkil etadi.

3. Ishlab chiqariladigan mahsulotning 50 foizini eksportga sotish sharti bilan uning butlovchilarining 75 foizini vatanimizda ishlab chiqarishni nazarda tutuvchi maishiy sovutgichlar ishlab chiqarishni tashkil etish boʻyicha investitsiya loyihasini texnik-iqtisodiy asoslashning asosiy koʻrsatkichlari 2-ilovaga* muvofiq tasdiqlansin.

4. Oʻzbekiston Respublikasi Davlat mulki qoʻmitasi “Sino” aksiyadorlik jamiyati mol-mulkini baholash va uni “ARSIN” qoʻshma korxonasi ustav jamgʻarmasiga berish tadbirlarini bir oy muddatda amalga oshirsin.

9. “Oʻzmashsanoat” uyushmasi Oʻzbekiston Respublikasi Makroiqtisodiyot va statistika vazirligi bilan birgalikda:

Oʻzbekiston Respublikasi korxonalarida sovutgichlar uchun butlovchi buyumlarni vatanimizda ishlab chiqarishning batafsil rejasini uch oy muddatda ishlab chiqsin;

butlovchi buyumlarni vatanimizda ishlab chiqarish loyihasini xorijiy investorlarni jalb etish uchun ustuvor investitsiya loyihalarining yigʻma roʻyxatiga kiritsin.

10. Oʻzbekiston Respublikasi Tashqi ishlar vazirligi, Ichki ishlar vazirligi maishiy sovutgichlar ishlab chiqarishni tashkil etish loyihasi doirasida ishlash uchun keladigan xorijiy mutaxassislar uchun vizalarni rasmiylashtirishni, vaqtinchalik roʻyxatdan oʻtkazishni, vizalar va vaqtinchalik roʻyxatdan oʻtkazish muddatlarini uzaytirishni davlat bojlari undirmasdan amalga oshirsinlar.

11. Maishiy sovutgichlar ishlab chiqarishni tashkil etish loyihasi doirasida ishlash uchun respublikaga keluvchi xorijiy mutaxassislarga yashash va respublika hududida transportning barcha turlarida yurishga Oʻzbekiston Respublikasi fuqarolari uchun nazarda tutilgan tariflar boʻyicha haq toʻlash huquqi berilsin.

12. “ARSIN” qoʻshma korxonasi kreditni uzish davrida maishiy sovutgichlar ishlab chiqarish uchun keltiriladigan import qilinuvchi butlovchi buyumlar, xomashyo va materiallar boʻyicha boj toʻlovlaridan (bojxonada rasmiylashtirish uchun yigʻimlar bundan mustasno) ozod qilinsin.

13. Oʻzbekiston Respublikasi Vazirlar Mahkamasining “Davlat mulkini xususiylashtirishda xorijiy sarmoyalarni jalb qilishni ragʻbatlantirish chora-tadbirlari toʻgʻrisida” 1998-yil 18-noyabrdagi 477-son qaroriga 2-ilovaning 4-satri oʻz kuchini yoʻqotgan deb hisoblansin.

14. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.