Davlat aktivlarini xususiylashtirishdan tushgan mablagʻlardan samarali foydalanish, Davlat budjetining daromadlar qismini koʻpaytirish, shuningdek, tuman (shahar) hokimliklarining xususiylashtirishdan manfaatdorligini taʼminlash maqsadida:

1. Oʻzbekiston Respublikasi Prezidentining va Oʻzbekiston Respublikasi Hukumatining ayrim hujjatlariga 1-ilovaga muvofiq oʻzgartirish va qoʻshimchalar kiritilsin.

2. Oʻzbekiston Respublikasi Hukumatining ayrim hujjatlari 2-ilovaga muvofiq oʻz kuchini yoʻqotgan deb hisoblansin.

3. Belgilansinki:

mazkur Farmonga 1 va 2-ilovalarda nazarda tutilgan Oʻzbekiston Respublikasi Prezidentining va Oʻzbekiston Respublikasi Hukumatining hujjatlariga asosan xususiylashtirishdan tushgan, boshqa tashkilotlarga yoʻnaltirilishi belgilangan va taqsimlanmagan mablagʻlar respublika budjetiga yoʻnaltiriladi, Davlat aktivlarini boshqarish, transformatsiya va xususiylashtirish jamgʻarmasi ixtiyorida qoladigan mablagʻlar bundan mustasno;

ushbu Farmon Oʻzbekiston Respublikasi Prezidentining 2021-yil 11-fevraldagi “Davlat aktivlarini xususiylashtirish jarayonlarini yanada jadallashtirish toʻgʻrisida”gi PF-6167-son Farmonida belgilangan xususiylashtirishdan tushgan mablagʻlarni taqsimlashga tatbiq etilmaydi.

4. Mazkur Farmonning ijrosini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov zimmasiga yuklansin.

1. Oʻzbekiston Respublikasi Prezidentining 2017-yil 17-yanvardagi “Tadbirkorlik maqsadlarida foydalanish uchun davlat mulki obyektlarini sotishni jadallashtirish va uning tartib-taomillarini yanada soddalashtirish chora-tadbirlari toʻgʻrisida”gi PF-4933-son Farmoni 1-bandida:

a) ikkinchi xatboshidan “, shu jumladan davlat koʻchmas mulk obyektlarini investitsiya majburiyatlari qabul qilingan holda “nol” xarid qiymati boʻyicha” soʻzlari chiqarib tashlansin;

b) uchinchi xatboshi quyidagi tahrirda bayon etilsin:

“Qoraqalpogʻiston Respublikasi Vazirlar Kengashi Raisining, viloyatlar va Toshkent shahri hokimlarining qarorlari asosida sotiladigan davlat mulki obyektlarini sotishdan tushadigan mablagʻlar tegishli ravishda Qoraqalpogʻiston Respublikasi budjetiga, viloyatlar va Toshkent shahrining mahalliy budjetlariga hamda obyekt joylashgan tuman (shahar) mahalliy budjetiga teng ulushlarda yoʻnaltiriladi, belgilangan tartibda Oʻzbekiston Respublikasi Davlat aktivlarini boshqarish agentligi hamda Oʻzbekiston Savdo-sanoat palatasiga yoʻnaltiriladigan mablagʻlar bundan mustasno;”.

2. Oʻzbekiston Respublikasi Prezidentining 2019-yil 14-yanvardagi “Davlat aktivlarini boshqarish, monopoliyaga qarshi kurashishni tartibga solish tizimini va kapital bozorini tubdan takomillashtirish chora-tadbirlari toʻgʻrisida”gi PF-5630-son Farmoni 6-bandida:

a) “b” kichik band quyidagi tahrirda bayon etilsin:

“b) davlat aktivlarini sotishdan tushadigan mablagʻlarning (ushbu bandning “v” kichik bandi bundan mustasno):

87 foizi — Oʻzbekiston Respublikasining respublika budjetiga;

10 foizi — Jamgʻarmaga;

3 foizi — mablagʻlarni maqsadli ravishda tadbirkorlikni rivojlantirishni qoʻllab-quvvatlash, shu jumladan tadbirkorlar uchun tashkil etiladigan oʻquv kurslarini moliyalashtirishga yoʻnaltirgan holda Oʻzbekiston Respublikasi Savdo-sanoat palatasiga (Jamgʻarmaning har yilgi daromadlari va xarajatlari parametrlarida belgilanadigan summadan oshgan qismi respublika budjetiga yoʻnaltiriladi);”;

b) quyidagi mazmundagi “v” kichik band bilan toʻldirilsin:

“v) Qoraqalpogʻiston Respublikasi Vazirlar Kengashi Raisining, viloyatlar va Toshkent shahri hokimlarining qarorlari asosida sotiladigan davlat mulki obyektlarini sotishdan tushadigan mablagʻlarning:

87 foizi — tegishli ravishda Qoraqalpogʻiston Respublikasi budjetiga, viloyatlar va Toshkent shahrining mahalliy budjetlariga hamda obyekt joylashgan tuman (shahar) mahalliy budjetiga teng ulushlarda;

10 foizi — Jamgʻarmaga;

3 foizi — mablagʻlarni maqsadli ravishda tadbirkorlikni rivojlantirishni qoʻllab-quvvatlash, shu jumladan tadbirkorlar uchun tashkil etiladigan oʻquv kurslarini moliyalashtirishga yoʻnaltirgan holda Oʻzbekiston Respublikasi Savdo-sanoat palatasiga (Jamgʻarmaning har yilgi daromadlari va xarajatlari parametrlarida belgilanadigan summadan oshgan qismi respublika budjetiga yoʻnaltiriladi).”.

3. Oʻzbekiston Respublikasi Prezidentining 2020-yil 27-avgustdagi “Boʻstonliq tumanida boshqaruvning alohida tartibini joriy etish orqali turizmni jadal rivojlantirish chora-tadbirlari toʻgʻrisida”gi PF-6053-son Farmoni 3-bandi “a” kichik bandining uchinchi xatboshisidagi “davlat mulki obyektlari” soʻzlari “davlat mulki obyektlarini sotishdan tushadigan mablagʻlarning 50 foizi” soʻzlari bilan almashtirilsin.

4. Oʻzbekiston Respublikasi Prezidentining 2020-yil 27-oktabrdagi “Davlat ishtirokidagi korxonalarni isloh qilishni jadallashtirish hamda davlat aktivlarini xususiylashtirishga oid chora-tadbirlar toʻgʻrisida”gi PF-6096-son Farmonida:

a) 12-bandning ikkinchi xatboshisi quyidagi tahrirda bayon etilsin:

“davlat aktivlarini “nol” xarid qiymatida sotish va investitsiya hamda ijtimoiy majburiyatlar asosida “1 soʻm” boshlangʻich qiymatda ommaviy savdolarga chiqarish amaliyoti bekor qilinadi;”;

b) 13-bandning birinchi xatboshisidagi “2021-yil 1-iyulga” soʻzlari “2021-yil 1-dekabrga” soʻzlari bilan almashtirilsin;

v) 20-bandning toʻrtinchi xatboshisidagi “2021-yil 1-iyunga” soʻzlari “2021-yil 1-dekabrga” soʻzlari bilan almashtirilsin.

5. Oʻzbekiston Respublikasi Prezidentining 2019-yil 27-martdagi “Oʻzbekiston Respublikasida elektr energetika tarmogʻini yanada rivojlantirish va isloh qilish strategiyasi toʻgʻrisida”gi PQ-4249-son qarorida:

a) 9-bandda:

ikkinchi xatboshi chiqarib tashlansin;

uchinchi — oltinchi xatboshilar tegishincha ikkinchi — beshinchi xatboshilar deb hisoblansin;

b) 12-banddagi “Jamgʻarmaning” soʻzi “Tiklanish va taraqqiyot jamgʻarmasi (keyingi oʻrinlarda — Jamgʻarma)ning” soʻzlari bilan almashtirilsin.

6. Oʻzbekiston Respublikasi Prezidentining 2019-yil 3-apreldagi “Kimyo sanoatini yanada isloh qilish va uning investitsiyaviy jozibadorligini oshirish chora-tadbirlari toʻgʻrisida”gi PQ-4265-son qarori 4-bandida:

ikkinchi xatboshi chiqarib tashlansin;

uchinchi — oltinchi xatboshilar tegishincha ikkinchi — beshinchi xatboshilar deb hisoblansin.

7. Oʻzbekiston Respublikasi Prezidentining 2019-yil 9-iyuldagi “Aholi va iqtisodiyotni energiya resurslari bilan barqaror taʼminlash, neft-gaz tarmogʻini moliyaviy sogʻlomlashtirish va uning boshqaruv tizimini takomillashtirish chora-tadbirlari toʻgʻrisida”gi PQ-4388-son qarori 13-bandida:

uchinchi xatboshi chiqarib tashlansin;

toʻrtinchi — toʻqqizinchi xatboshilar tegishincha uchinchi — sakkizinchi xatboshilar deb hisoblansin.

9. Oʻzbekiston Respublikasi Prezidentining 2020-yil 13-oktabrdagi “Aholini tadbirkorlikka jalb qilish tizimini takomillashtirish va tadbirkorlikni rivojlantirishga doir qoʻshimcha chora-tadbirlar toʻgʻrisida”gi PQ-4862-son qarori 15-bandining uchinchi xatboshisi chiqarib tashlansin.

10. Vazirlar Mahkamasining 2018-yil 14-avgustdagi “Mehmonxona sohasiga qoʻshimcha investitsiyalarni jalb etish chora-tadbirlari toʻgʻrisida”gi 661-son qarori 5-bandi quyidagi tahrirda bayon etilsin:

“5. Belgilab qoʻyilsinki, obyektlarni sotishda sotib olish toʻlovlarini toʻlashning maksimal muddati toʻlovlarni teng ulushlar bilan har chorakda toʻlagan holda 3 yilni tashkil qiladi.”.

11. Vazirlar Mahkamasining 2019-yil 18-yanvardagi “Qishloq xoʻjaligini mexanizatsiyalash sohasida ilmiy-tadqiqot ishlarini amalga oshirish tizimini yanada takomillashtirish chora-tadbirlari toʻgʻrisida”gi 45-son qarori 10-bandida:

uchinchi xatboshi chiqarib tashlansin;

toʻrtinchi — oltinchi xatboshilar tegishincha uchinchi — beshinchi xatboshilar deb hisoblansin.

12. Vazirlar Mahkamasining 2019-yil 15-maydagi 404-son qarori bilan tasdiqlangan Oʻzbekiston Respublikasi Davlat aktivlarini boshqarish agentligi huzuridagi budjetdan tashqari Davlat aktivlarini boshqarish, transformatsiya va xususiylashtirish jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizomda:

a) 6-bandda:

“a” kichik banddagi “73” raqami “87” raqami bilan almashtirilsin;

“b” kichik banddagi “24” raqami “10” raqami bilan almashtirilsin;

“v” kichik band quyidagi tahrirda bayon etilsin:

“v) 3 foizi — mablagʻlarni maqsadli ravishda bozor infratuzilmasini rivojlantirish va tadbirkorlarni huquqiy jihatdan qoʻllab-quvvatlash, shu jumladan, tadbirkorlar uchun tashkil etiladigan oʻquv kurslarini moliyalashtirishga yoʻnaltirgan holda Oʻzbekiston Respublikasi Savdo-sanoat palatasiga (Jamgʻarmaning har yilgi daromadlari va xarajatlari parametrlarida belgilanadigan summadan oshgan qismi respublika budjetiga yoʻnaltiriladi).”;

oltinchi xatboshi chiqarib tashlansin;

b) 7-bandda:

birinchi xatboshi quyidagi tahrirda bayon etilsin:

“7. Qoraqalpogʻiston Respublikasi Vazirlar Kengashi raisining, viloyatlar va Toshkent shahri hokimlarining qarorlari asosida sotiladigan davlat mulki obyektlarini sotishdan tushgan mablagʻlar:

87 foizi — tegishli ravishda Qoraqalpogʻiston Respublikasi budjetiga, viloyatlar va Toshkent shahrining mahalliy budjetlariga hamda obyekt joylashgan tuman (shahar) mahalliy budjetiga teng ulushlarda;

10 foizi — Jamgʻarmaga;

3 foizi — mablagʻlarni maqsadli ravishda tadbirkorlikni rivojlantirishni qoʻllab-quvvatlash, shu jumladan tadbirkorlar uchun tashkil etiladigan oʻquv kurslarini moliyalashtirishga yoʻnaltirgan holda Oʻzbekiston Respublikasi Savdo-sanoat palatasiga yoʻnaltiriladi (Jamgʻarmaning har yilgi daromadlari va xarajatlari parametrlarida belgilanadigan summadan oshgan qismi respublika budjetiga yoʻnaltiriladi).”;

ikkinchi — oltinchi xatboshilar tegishincha beshinchi — toʻqqizinchi xatboshilar deb hisoblansin.

13. Vazirlar Mahkamasining 2020-yil 8-maydagi 273-son qarori bilan tasdiqlangan Oʻzbekiston Respublikasining chet elda joylashgan davlat mulki obyektlarining hisobini yuritish va ularni boshqarish tartibi toʻgʻrisidagi nizomning 25-bandi quyidagi tahrirda bayon etilsin:

“25. Chet elda joylashgan davlat mulki obyektlarini sotishdan tushgan mablagʻlar Oʻzbekiston Respublikasi Prezidenti yoki Hukumat hujjatlarida boshqacha tartib belgilangan boʻlmasa, Agentlik tomonidan umumiy tartibda taqsimlanadi”.

14. Vazirlar Mahkamasining 2020-yil 10-iyuldagi “Oʻzbekiston Respublikasida turizm sohasini tiklash va rivojlantirish uchun qulay shart-sharoitlarni yaratish chora-tadbirlari toʻgʻrisida”gi 433-son qarorida:

v) 16-ilovaning nomlanishidagi “mablagʻlarining Oʻzbekiston Respublikasining respublika budjetiga taqsimlanadigan qismi” soʻzlari “mablagʻlarning 50 foizi” soʻzlari bilan almashtirilsin.

15. Vazirlar Mahkamasining 2020-yil 17-sentabrdagi “Boʻstonliq tumanidagi boʻsh turgan, foydalanilmayotgan hamda samarasiz foydalanilayotgan obyektlar va yer uchastkalaridan samarali foydalanish, ular negizida turizm va xizmat koʻrsatish infratuzilmasini tashkil etish chora-tadbirlari toʻgʻrisida”gi 560-son qarori 3-bandi yettinchi xatboshisi quyidagi tahrirda bayon etilsin:

“mazkur qarorga 1 va 3-ilovalarga kiritilgan davlat mulki obyektlarini sotishdan tushadigan mablagʻlarning 50 foizi, shuningdek boʻsh turgan yer maydonlariga boʻlgan huquqni sotishdan tushadigan mablagʻlar (baholash va xususiylashtirish tadbirlarini amalga oshirish xarajatlaridan tashqari) toʻliqligicha Togʻli va olis hududlarda turizm infratuzilmasini rivojlantirish jamgʻarmasiga yoʻnaltiriladi;”.

16. Vazirlar Mahkamasining 2021-yil 30-martdagi “Navoiyuran” davlat korxonasi, “Navoiy kon-metallurgiya kombinati” aksiyadorlik jamiyati va “Navoiy kon-metallurgiya kombinati jamgʻarmasi” davlat muassasasi faoliyatini tashkil etish toʻgʻrisida”gi 170-son qaroriga 1-ilovaning izohi 5-bandi quyidagi tahrirda bayon etilsin:

“5. Davlat aktivlarini boshqarish agentligiga oʻtkazilayotgan aktivlar Oʻzbekiston Respublikasi Prezidentining “Davlat ishtirokidagi korxonalarni isloh qilishni jadallashtirish hamda davlat aktivlarini xususiylashtirishga oid chora-tadbirlar toʻgʻrisida” 2020-yil 27-oktabrdagi PF-6096-son Farmonining 12-bandiga muvofiq ommaviy savdolarga chiqariladi”.

1. Vazirlar Mahkamasining 2019-yil 19-dekabrdagi “Oʻzbekiston Respublikasi Monopoliyaga qarshi kurashish qoʻmitasi huzuridagi Isteʼmolchilar huquqlarini himoya qilish agentligi faoliyatini tashkil etish chora-tadbirlari toʻgʻrisida”gi 1015-sonli qaroriga 2-ilovaning 4-bandi.

2. Vazirlar Mahkamasining 2015-yil 16-iyuldagi 540-F-son farmoyishi 2-bandining uchinchi xatboshisi va 3-bandi.