Ushbu Qonunning maqsadi davlat xaridlari sohasidagi munosabatlarni tartibga solishdan iborat.

Ushbu Qonunning amal qilishi:

Oʻzbekiston Respublikasining Investitsiya dasturida va boshqa davlat dasturlarida, Oʻzbekiston Respublikasi Prezidentining yoki Oʻzbekiston Respublikasi Vazirlar Mahkamasining qarorlarida nazarda tutilgan loyihalarni roʻyobga chiqarish chogʻida amalga oshiriladigan davlat xaridlariga;

davlat buyurtmachilarining xoʻjalik faoliyatini yuritish chogʻida amalga oshiriladigan davlat xaridlariga;

Oʻzbekiston Respublikasining budjet tizimi budjetlarining, shuningdek budjet tashkilotlarida tashkil etilgan boshqa jamgʻarmalarning mablagʻlari hisobidan moliyalashtiriladigan davlat xaridlariga;

agar donor mamlakatlarning, xalqaro tashkilotlarning, chet el hukumat va nohukumat tashkilotlarining tartib-taomillarida yoki Oʻzbekiston Respublikasiga taqdim etiladigan chet el kreditlarini va chet el grantlarini, texnik koʻmakni va boshqa tashqi begʻaraz koʻmakni taqdim etish shartlarida tovarlarni (ishlarni, xizmatlarni) xarid qilishning boshqacha tartibi belgilanmagan boʻlsa, Oʻzbekiston Respublikasi Prezidenti va Oʻzbekiston Respublikasi Vazirlar Mahkamasi tomonidan donor mamlakatlar, xalqaro tashkilotlar, chet el hukumat va nohukumat tashkilotlari bilan tuzilgan shartnomalar doirasida taqdim etiladigan chet el grantlari, texnik koʻmak va boshqa tashqi begʻaraz koʻmak mablagʻlari hamda Oʻzbekiston Respublikasiga beriladigan chet el kreditlari hisobidan moliyalashtiriladigan davlat xaridlariga. Bunda donor mamlakatlar, xalqaro tashkilotlar, chet el hukumat va nohukumat tashkilotlar tomonidan, belgilangan tartib-taomillarda yoki Oʻzbekiston Respublikasiga taqdim etiladigan chet el kreditlarini va chet el grantlarini, texnik koʻmakni va boshqa tashqi begʻaraz koʻmakni taqdim etish shartlarida belgilangan tartib-taomillardan qatʼi nazar, davlat xaridlari natijalari toʻgʻrisidagi axborot maxsus axborot portalida eʼlon qilinadi;

agar moliyaviy, gumanitar yoki xayriya yordamini taqdim etish hamda boshqa begʻaraz, qaytarilmaydigan tarzda moliyalashtirish shartlarida tovarlarni (ishlarni, xizmatlarni) xarid qilishning boshqacha tartibi belgilanmagan boʻlsa, moliyaviy, gumanitar yoki xayriya yordami hisobidan hamda boshqa begʻaraz, qaytarilmaydigan tarzda moliyalashtiriladigan davlat xaridlariga nisbatan tatbiq etiladi. Bunda moliyaviy, gumanitar yoki xayriya koʻmakni hamda boshqa begʻaraz qaytarilmaydigan moliyalashtirishni taqdim etish shartlarida belgilangan tartib-taomillardan qatʼi nazar, davlat xaridlari natijalari toʻgʻrisidagi axborot maxsus axborot portalida eʼlon qilinadi.

Davlat tomonidan qoʻriqlanishi lozim boʻlgan shaxslarning xavfsizligini taʼminlash, Oʻzbekiston Respublikasida mudofaa qobiliyatini, xavfsizlikni taʼminlash va ichki tartibni saqlash uchun davlat xaridlari, davlat sirlari bilan bogʻliq boʻlgan davlat xaridlari, shuningdek Oʻzbekiston Respublikasi Prezidenti, Oʻzbekiston Respublikasi Oliy Majlisi, xalq deputatlari viloyat, tuman va shahar Kengashlari saylovlariga, Oʻzbekiston Respublikasining referendumlariga tayyorgarlik koʻrish hamda ularni oʻtkazish uchun davlat xaridlarini amalga oshirish tartibi qonunchilikka muvofiq belgilanadi.

Ushbu Qonunning amal qilishi banklarni sanatsiya qilish va tugatish bilan bogʻliq munosabatlarga nisbatan tatbiq etilmaydi.

Davlat xaridlari toʻgʻrisidagi qonunchilik ushbu Qonun va boshqa qonunchilik hujjatlaridan iboratdir.

Agar Oʻzbekiston Respublikasining xalqaro shartnomasida Oʻzbekiston Respublikasining davlat xaridlari toʻgʻrisidagi qonunchiligida nazarda tutilganidan boshqacha qoidalar belgilangan boʻlsa, xalqaro shartnoma qoidalari qoʻllaniladi.

Ushbu Qonunda quyidagi asosiy tushunchalar qoʻllaniladi:

benefitsiar mulkdor — pirovardida mulk huquqlariga egalik qiladigan yoki tovarlar (ishlar, xizmatlar) yetkazib beruvchini amalda nazorat qiladigan jismoniy shaxs;

boshlangʻich narxni pasaytirish uchun oʻtkaziladigan auksion — davlat xaridlari elektron tizimining maxsus platformasida davlat xaridlarini amalga oshirishning raqobatli usuli boʻlib, uni tashkil etish chogʻida narx gʻolibni aniqlashning yagona mezoni boʻladi;

davlat buyurtmachisi — davlat xaridlarini amalga oshiruvchi yuridik shaxs;

davlat xaridlari — davlat buyurtmachilarining tovarlarga (ishlarga, xizmatlarga) boʻlgan ehtiyojlarini pulli asosda taʼminlash jarayoni;

davlat xaridlari toʻgʻrisidagi shartnoma — davlat buyurtmachisi va davlat xaridlarining ijrochisi oʻrtasidagi davlat xaridlari boʻyicha huquqlar va majburiyatlarni belgilash, oʻzgartirish yoki bekor qilish toʻgʻrisidagi kelishuv;

davlat xaridlarining subyektlari — davlat buyurtmachisi, xarid qilish tartib-taomillari ishtirokchisi, davlat xaridlarining ijrochisi, xarid komissiyasi, davlat xaridlari elektron tizimining operatori, ixtisoslashgan tashkilot va ekspert, ekspert tashkiloti;

dastlabki malaka tanlovi — xarid qilish hujjatlarida belgilangan texnik, iqtisodiy, tashkiliy va boshqa oʻziga xos xususiyatlarga muvofiq boʻlgan xarid qilish tartib-taomillarini oʻtkazishga qoʻyiladigan malakali xarid qilish tartib-taomillari ishtirokchilarini tanlab olishning xarid komissiyasi tomonidan oʻtkaziladigan tartib-taomili;

zaxiradagi gʻolib — xarid qilish tartib-taomillari yakunlari boʻyicha xarid komissiyasining qaroriga muvofiq gʻolibning taklifidan keyingi eng maqbul taklifni taqdim etgan deb topilgan xarid qilish tartib-taomillari ishtirokchisi;

ikki bosqichli davlat xaridlari — texnik jihatdan murakkab boʻlgan muayyan qiymatli tovarlarning (ishlarning, xizmatlarning) bir shartnoma boʻyicha ikki oʻzaro bogʻliq bosqichda oʻtkaziladigan davlat xaridlarini amalga oshirishning raqobatli usuli;

kichik qiymatli xaridning soddalashtirilgan tartib-taomili — davlat xaridlarini xarid qilish tartib-taomillarining ochiq axborot manbalaridan olingan narxlarni solishtirish yoʻli bilan yoki tovarlarning (ishlarning, xizmatlarning) kamida uchta potensial yetkazib beruvchisidan narxlarni soʻrash orqali amalga oshirishning raqobatli usuli;

tender — davlat xaridini amalga oshirishning raqobatli tartib-taomili vositasida davlat xaridlarining ijrochisini aniqlash tartib-taomilini nazarda tutuvchi tanlov boʻlib, uning natijalariga koʻra davlat xaridlari toʻgʻrisidagi shartnomani bajarishning eng yaxshi shartlarini taklif etgan xarid qilish tartib-taomillarining ishtirokchisi gʻolib deb topiladi;

xarid qilish tartib-taomili — davlat xaridlarini amalga oshirish bilan bogʻliq harakatlar majmui;

xarid qilish tartib-taomillari ishtirokchisining affillangan shaxsi — qaror qabul qilish huquqiga ega boʻlgan va (yoki) xarid qilish tartib-taomillari ishtirokchisi tomonidan qarorlar qabul qilishga taʼsir koʻrsatadigan, shu jumladan yozma kelishuv asosida taʼsir koʻrsatadigan jismoniy yoki yuridik shaxs, shuningdek xarid qilish tartib-taomillari ishtirokchisiga nisbatan shunday huquqqa ega boʻlgan jismoniy yoki yuridik shaxs;

Shartnomalarning yagona reyestri — davlat xaridlari sohasidagi vakolatli organ tomonidan maxsus axborot portalida yuritiladigan, davlat buyurtmachilari tomonidan tuzilgan davlat xaridlari toʻgʻrisidagi shartnomalarning reyestri;

elektron davlat xaridlari — axborot-kommunikatsiya texnologiyalaridan foydalangan holda davlat xaridlarini amalga oshirish shakli;

elektron doʻkon — davlat xaridlarining elektron tizimidagi maxsus maydonda savdolarni elektron shaklda amalga oshirishni nazarda tutuvchi, maxsus talablar qoʻyilmaydigan tovarlarning (ishlarning, xizmatlarning) davlat xaridlarini amalga oshirishning raqobatli usuli;

eng yaxshi takliflarni tanlash — xarid qilish tartib-taomillarining bir nechta ishtirokchisidan olingan takliflarni taqqoslash asosida davlat xaridlarini amalga oshirishning raqobatli usuli;

eʼlon — davlat xaridlarini amalga oshirish usuli, talablari va shartlari, takliflarni taqdim etish muddatlari hamda tartibi koʻrsatilgan, maxsus axborot portali orqali davlat xaridlarining elektron tizimiga davlat buyurtmachisi tomonidan joylashtiriladigan boʻlajak davlat xaridlari toʻgʻrisidagi axborot;

gʻolib — xarid qilish tartib-taomillari yakunlariga koʻra taklifi eng maqbul deb topilgan xarid qilish tartib-taomillari ishtirokchisi.

Davlat xaridlarining asosiy prinsiplari quyidagilardan iborat:

kasbiy mahorat va masʼuliyatlilik;

asoslanganlik;

moliyaviy mablagʻlardan foydalanishning oqilonaligi, tejamkorligi va samaradorligi;

ochiqlik va shaffoflik;

raqobat va xolislik;

mutanosiblik;

barqarorlik;

davlat xaridlari tizimining yagonaligi va yaxlitligi;

korrupsiyaga yoʻl qoʻymaslik.

Davlat xaridlarining asosiy prinsiplari davlat xaridlari jarayonining barcha bosqichlarida qoʻllanilishi kerak.

Davlat buyurtmachisi, davlat xaridlari elektron tizimining operatori, ixtisoslashgan tashkilot masʼul shaxslarining kasbiy mahorati tegishli boʻlinmalar xodimlariga nisbatan soha boʻyicha maʼlumoti boʻlishi, malakasini muntazam ravishda oshirishi, bosqichma-bosqich amaliy tajribaga ega boʻlib borishi va kasbiy faoliyati toʻgʻrisidagi talablarni belgilash yoʻli bilan taʼminlanadi.

Davlat buyurtmachisi xarid qilish tartib-taomillarini tashkil etish va oʻtkazish uchun masʼul boʻlgan shaxsni belgilashi shart.

Kasbiy mahoratga ega boʻlish maqsadida xarid qilish tartib-taomillarini tashkil etish va oʻtkazish uchun masʼul boʻlgan shaxsning malakasini muntazam ravishda oshirib borish davlat xaridlari sohasidagi vakolatli organ tomonidan oʻqitishni tashkil etish orqali taʼminlanadi.

Manfaatlar toʻqnashuvi mavjud boʻlgan taqdirda, xarid qilish tartib-taomilini tashkil etish va oʻtkazish uchun masʼul boʻlgan shaxs bajariladigan vazifalardan chetlashtirilishi lozim.

Davlat xaridlari davlat buyurtmachisining oʻz oldida turgan vazifalarni hal etishni taʼminlaydigan haqiqiy talablari va ehtiyojlarini samarali qanoatlantirish uchun davlat xaridlarini oʻtkazishning maqsadga muvofiqligi va zarurligi, tovarni (ishni, xizmatni) tanlashning, uning isteʼmol xususiyatlari (tavsifi), sifat koʻrsatkichlarining va qiymatining asoslanganligi hisobga olingan holda amalga oshirilishi kerak.

Davlat xaridlari:

davlat buyurtmachisining davlat xaridlarini oʻtkazish xarajatlarini va tovarlarning (ishlarning, xizmatlarning) qiymatini hisobga olish;

davlat xaridlari uchun ajratilgan mablagʻlardan samarali foydalanish, shu jumladan, tovarlarni (ishlarni, xizmatlarni) olishdan koʻrilgan naf, ularning sifati va qiymati oʻrtasidagi maqbul nisbatni (foydalanish davri xarajatlarini hisobga olgan holda) taʼminlash;

davlat xaridlarini maqbul muddatlarda oʻtkazish imkonini beradigan oqilona va tejamkor usulda amalga oshirilishi kerak.

Davlat xaridlarining ochiqligi va shaffofligi:

tegishli davlat organlariga, davlat xaridlarining subyektlariga va jamoatchilikka davlat xaridlari toʻgʻrisidagi axborotdan qonunchilikda belgilangan tartibda toʻliq, oʻz vaqtida, erkin va bepul foydalanish imkoniyatini taʼminlagan holda uni maxsus axborot portaliga joylashtirish;

xarid qilish tartib-taomillariga doir hujjatlarni va hisobotlarni tuzish hamda but saqlashni taʼminlash orqali amalga oshiriladi.

Davlat xaridlaridagi raqobat xarid qilish tartib-taomillari ishtirokchilari oʻrtasidagi, davlat xaridlari elektron tizimlarining operatorlari oʻrtasidagi va ixtisoslashgan tashkilotlar oʻrtasidagi tortishuv, xarid qilish tartib-taomillari ishtirokchilarining takliflarini koʻrib chiqishda hamda xolis va asosli mezonlar asosida eng maqbul taklif foydasiga yakuniy qaror qabul qilishda begʻarazlik va shaffoflik mexanizmlaridan foydalanish hisobidan qoʻllab-quvvatlanadi.

Davlat xaridlarining xolisligi xarid qilish tartib-taomillari ishtirokchilarining takliflarini koʻrib chiqishdagi, shuningdek eng maqbul variant foydasiga yakuniy qaror qabul qilishdagi begʻarazlikni nazarda tutadi.

Davlat xaridlarining xolisligi:

xarid qilish tartib-taomillari ishtirokchilariga teng imkoniyatlarni taʼminlashga;

davlat xaridlari subyektlari oʻrtasida raqobatni va ularga nisbatan begʻarazlikni taʼminlaydigan shart-sharoitlarni yaratishga;

davlat xaridlari jarayonida shikoyatlar, nizolar va kelishmovchiliklarni koʻrib chiqishning hamda tegishli chora-tadbirlar koʻrishning ochiq, oshkora va tortishuv mexanizmlariga asoslanadi.

Davlat xaridlarida mutanosiblik:

davlat xaridlarini amalga oshirish usulining tovarlarning (ishlarning, xizmatlarning) xavf-xatariga, qiymatiga, xususiyatiga va murakkabligiga;

talablarning xarid qilish tartib-taomillari ishtirokchilari malakasiga oid maʼlumotlarga, takliflarni baholash mezonlari va usullarining tovarlarga (ishlarga, xizmatlarga);

davlat xaridlari subyektlarining huquqlari, majburiyatlari va javobgarligi ularning oʻz vazifalariga mosligi bilan taʼminlanadi.

Davlat xaridlaridagi barqarorlik davlat buyurtmachisining ehtiyojlarni aniqlash, xaridlarni amalga oshirishga tayyorgarlik koʻrish, xarid qilish tartib-taomillarini oʻtkazish, gʻolibni aniqlash, shartnomalar tuzish, shuningdek tovarlar oʻz isteʼmol xususiyatlarini yoʻqotganidan keyin hosil boʻladigan chiqindilarning zararli taʼsiridan fuqarolarning sogʻligʻini va atrof-muhitni himoya qilish maqsadida mazkur tovarlarni yoʻq qilish (utilizatsiya qilish), shuningdek pirovard natijalarni baholash kabi jarayonlarning qisqa muddatli, oʻrta muddatli va uzoq muddatli iqtisodiy, ekologik hamda ijtimoiy oqibatlarini hisobga olgan holda davlat xaridlarini amalga oshirishga asoslanadi.

Barqarorlik prinsipini qoʻllashda davlat buyurtmachilari quyidagilarni eʼtiborga olishi kerak:

bozordagi qulay innovatsion yechimlarni, shuningdek barqarorlik talablariga toʻliqroq javob beradigan yangi, zamonaviy yondashuvlarni ragʻbatlantirishga boʻlgan ehtiyojlarni va imkoniyatlarni;

xarid qilinayotgan tovarlarning butun hayotiy davri davomidagi funksiyaviy va ekspluatatsiyaviy xususiyatlariga doir afzalliklarini hisobga olgan holda, ularni xarid qilish, ulardan foydalanish, ularga texnik xizmat koʻrsatish va ularni utilizatsiya qilish xarajatlarini;

xarid qilinayotgan tovarlarni ishlab chiqarish, yetkazib berish, ishga tushirish va ulardan foydalanish bilan bogʻliq boʻlgan energiya, suv, xomashyo, sarflash materiallari, ehtiyot qismlari sarf-xarajatlari, shuningdek ishlar yoki xizmatlar boʻyicha shartnomalarni bajarish, obyektni foydalanishdan chiqarish, obyektni tiklash yoki shartnomani bekor qilish hamda xarid qilinayotgan tovarning hayotiy davri davomida talab qilinishi mumkin boʻlgan boshqa chora-tadbirlar natijasida atrof-muhitga nisbatan taʼsirni, shu jumladan iqlim oʻzgarishini;

ijtimoiy oqibatlarni, shu jumladan amaldagi ijtimoiy rivojlanish siyosatiga muvofiq aholining ijtimoiy himoyaga muhtoj guruhlarini yoki toifalarini qoʻllab-quvvatlashni, shuningdek taʼlim sifatini, kasbiy tayyorgarlik darajasini, fuqarolarning farovonligini hamda iqtisodiyotning raqobatbardoshliligini oshirishga nisbatan taʼsirini;

buyurtmalarni shakllantirishda va tovarlarni yetkazib beruvchilarni aniqlashda ekologik talablarni belgilashni, atrof-muhit ifloslanishining oldi olinishini hamda ekologik toza mahsulotlar xarid qilinishini ragʻbatlantirishni yoki milliy iqtisodiyotning barqaror rivojlanishiga ikkilamchi xomashyodan va chiqindilardan tayyorlangan tovarlarni yetkazib beruvchilar uchun qulay shart-sharoitlar yaratish orqali koʻmaklashishni.

Davlat xaridlari maqsadlar, prinsiplar va yondashuvlarning yagonaligiga, davlat xaridlari jarayoni barcha bosqichlarining yaxlitligi va oʻzaro aloqadorligiga hamda davlat xaridlari barcha subyektlarining hamkorligiga asoslanadi.

Davlat xaridlarining yagonaligi va yaxlitligi:

davlat xaridlarini tartibga soluvchi yagona va yaxlit normativ-huquqiy baza hamda uni bir xilda qoʻllash;

davlat xaridlarining davlat xaridlari toʻgʻrisidagi barcha axborotni toʻplash, unga ishlov berish va uni tahlil qilishni hamda barcha manfaatdor shaxslarga undan foydalanishni taʼminlaydigan yagona, yaxlit va kompleks axborot tizimi mavjudligi;

davlat xaridlariga oid hujjatlarni birxillashtirish;

xalqaro standartlarga uygʻun tarzda tovarlarning (ishlarning, xizmatlarning) standartlashtirilgan yagona milliy klassifikatorini joriy etish;

davlat xaridlarini rejalashtirish va amalga oshirishni, davlat xaridlari toʻgʻrisidagi shartnomalarni tuzish va ijro etishni, monitoringni va nazoratni amalga oshirishni, nizolar hamda kelishmovchiliklar ustidan shikoyat qilish va ularni koʻrib chiqishni, davlat xaridlari subyektlarining kasbiy mahorati darajasi va masʼuliyati oshirilishining tashkil etilishini taʼminlovchi yagona infratuzilmaning mavjudligi bilan taʼminlanadi.

Xarid qilish tartib-taomillarini tashkil etish va oʻtkazishga doir talablar davlat xaridlari sohasida korrupsiyaga oid huquqbuzarliklarga yoʻl qoʻymasligi kerak. Bunda korrupsiyaning oldini olishga qaratilgan chora-tadbirlar ustuvor boʻladi.

Davlat buyurtmachilari davlat xaridlarini amalga oshirish tartib-taomillari toʻgʻrisidagi axborotning ochiqligi va shaffofligini taʼminlashi kerak.

Davlat xaridlarida korrupsiyaga yoʻl qoʻymaslik:

insofli raqobatni va qarorlar qabul qilish chogʻida xolisona mezonlardan foydalanilishini;

monitoring va nazorat oʻtkazishning, shu jumladan ichki monitoring va nazorat oʻtkazishning samarali tizimi yaratilishini;

ushbu Qonun va davlat xaridlari sohasidagi boshqa qonunchilik hujjatlari talablarining buzilishi hollari toʻgʻrisidagi maʼlumotlar axborotning ochiq manbalarida eʼlon qilib borilishini;

davlat xaridlari tartib-taomillari ushbu Qonunda belgilangan talablarga muvofiq oʻtkazilishini taʼminlash yoʻli bilan amalga oshiriladi.

Qonunchilikda davlat xaridlarini amalga oshirish sohasida korrupsiyaning oldini olishga doir boshqa chora-tadbirlar ham nazarda tutilishi mumkin.

Manfaatlar toʻqnashuvi bevosita yoki bilvosita shaxsiy manfaatdorlik shaxsning mansab yoki xizmat majburiyatlarini lozim darajada bajarishiga taʼsir koʻrsatadigan yoxud taʼsir koʻrsatishi mumkin boʻlgan hamda uning shaxsiy manfaatdorligi bilan davlat xaridlari subyektlarining huquqlari va qonuniy manfaatlari oʻrtasida qarama-qarshilik yuzaga keladigan yoxud yuzaga kelishi mumkin boʻlgan har qanday vaziyatdir, shuningdek affillanganlikning mavjud boʻlishi.

Davlat buyurtmachisining, davlat xaridlari elektron tizimi operatorining, ixtisoslashgan tashkilotning, ekspert tashkilotining mansabdor shaxslari va boshqa xodimlari, shuningdek xarid komissiyasining aʼzolari hamda ekspertlar xarid qilish tartib-taomillarini amalga oshirishda oʻz ishtirokidagi davlat xaridlariga doir bitimning natijasi boʻlgan har qanday shaxsiy foydani bevosita yoki bilvosita olish huquqiga ega emas.

Ushbu moddaning ikkinchi qismida koʻrsatilgan shaxslar:

xarid qilish tartib-taomillarni amalga oshirishda boshqa xarid qilish tartib-taomillari subyektlarining huquqlari va qonuniy manfaatlariga zarar yetkazadigan hamda ushbu huquqlar va qonuniy manfaatlarni cheklaydigan har qanday manfaatlar toʻqnashuvi koʻrinishlarining oldini olishi shart;

har qanday ehtimol tutilgan, taxmin qilinayotgan yoki mavjud manfaatlar toʻqnashuvi haqidagi axborotning oshkor qilinishini kafolatlashi kerak.

Mavjud boʻlgan yoki taxmin qilinayotgan manfaatlar toʻqnashuvi toʻgʻrisida xabar topgan, ushbu moddaning ikkinchi qismida koʻrsatilgan shaxslar bu haqda bevosita rahbarini hamda davlat xaridlari sohasidagi vakolatli organni xabardor etishi shart. Manfaatlar toʻqnashuvi mavjudligi toʻgʻrisidagi axborotlarni olgan rahbar uning oldini olish yoki uni bartaraf etish boʻyicha oʻz vaqtida choralar koʻrishi va davlat xaridlari sohasidagi vakolatli organni koʻrilgan choralar toʻgʻrisida xabardor qilishi shart. Davlat xaridlari sohasidagi vakolatli organ manfaatlar toʻqnashuvi mavjudligi toʻgʻrisidagi axborotni olgach, ushbu Qonunga muvofiq davlat nazoratini amalga oshiruvchi davlat organlariga tegishli axborotni kiritishi shart.

Davlat buyurtmachisining yoki davlat xaridlari elektron tizimi operatorining xodimi oʻzining davlat xaridlari ijrochilari yoki har qanday boshqa shaxs bilan munosabatlarida, agar bunday axborotni oshkor etmaslik davlat xavfsizligi manfaatlarini himoya qilish uchun zarur boʻlsa yoki agar bunday axborotning oshkor etilishi qonunchilikka zid boʻlsa, ularga rioya etilishini taʼminlashga monelik qilsa, davlat xaridlari subyektlarining qonuniy manfaatlariga zarar yetkazsa yoxud insofli raqobatga toʻsqinlik qilsa, agar davlat xaridlari sohasidagi vakolatli organ bunday axborotni oshkor etish toʻgʻrisida qaror qabul qilmasa, hech bir axborotni oshkor etishga haqli emas.

Davlat xaridlari sohasidagi vakolatli organ bunday axborotni oshkor etish toʻgʻrisida qaror qabul qilgan taqdirda, ushbu qarorning shartlariga rioya etiladi.

Xarid qilish tartib-taomillari ishtirokchisi xarid qilish tartib-taomilida ishtirok etib, uning xarid qilish tartib-taomilida ishtirok etishi bilan bogʻliq taklifda oʻzi koʻrsatgan barcha maʼlumotlarning eʼlon qilinishiga rozilik bildiradi.

Davlat xaridlari sohasini davlat tomonidan tartibga solishning asosiy maqsadlari:

davlatning strategik maqsadlari va vazifalariga erishish;

davlat buyurtmachilarining tovarlarga (ishlarga, xizmatlarga) boʻlgan ehtiyojlarini taʼminlash;

Oʻzbekiston Respublikasining Investitsiya dasturini va boshqa davlat dasturlarini bajarish;

davlatning ijtimoiy vazifalarni hal qilish boʻyicha funksiyalarini bajarish;

davlat xizmatlarini koʻrsatish uchun davlat xaridlari subyektlariga qulay muhitni shakllantirishdan, shuningdek davlat xaridlarini amalga oshirishda korrupsiyaga va qonunchilikning boshqacha tarzda buzilishlariga qarshi kurashishdan iborat.

Davlat xaridlarini amalga oshirishda ijtimoiy-iqtisodiy siyosat ustuvorliklari, shu jumladan yuqori texnologik va innovatsion ishlab chiqarishlarning yaratilishi, qulay ekologik vaziyatning saqlanishi hisobga olinadi.

Tovarlarning (ishlarning, xizmatlarning) davlat xaridlarida chet ellik yetkazib beruvchilar bilan bir qatorda kamida uchta mahalliy ishlab chiqaruvchilar ishtirok etsa, agar Oʻzbekiston Respublikasi xalqaro shartnomalarida boshqacha qoida nazarda tutilmagan boʻlsa, Oʻzbekiston Respublikasi Prezidentining farmonlari va qarorlariga koʻra ushbu mahalliy ishlab chiqaruvchilarga takliflarni baholashda foydalaniladigan imtiyozlar va preferensiyalar berilishi mumkin.

Oʻzbekiston Respublikasining ehtiyojlarini taʼminlash uchun zarur boʻlgan tovarlarning (ishlarning, xizmatlarning) davlat xaridi chet davlatlar bilan hamkorlikda amalga oshirilishi mumkin. Bunday davlat xaridini amalga oshirish tartibi Oʻzbekiston Respublikasining xalqaro shartnomasida belgilanadi.

Oʻzbekiston Respublikasi Vazirlar Mahkamasi:

davlat xaridlari sohasida davlat siyosati shakllanishi va amalga oshirilishini taʼminlaydi;

davlat xaridlari sohasida budjet tizimi budjetlari mablagʻlaridan oqilona foydalanish, xarid qilish tartib-taomillari turlarini takomillashtirish va ularning qoʻllanilishini kengaytirish, shuningdek tadbirkorlik subyektlarining keng ishtirokini taʼminlash yuzasidan choralar koʻradi;

davlat buyurtmachilarining davlat xaridlari sohasidagi faoliyati ustidan nazorat boʻyicha ishlarni muvofiqlashtiradi;

xarid qilish tartib-taomillari ishtirokchilarining takliflarini baholash va taqqoslash usullarini hamda mezonlarini, shuningdek ular oʻtkazilishini tashkil etish tartibini belgilaydi;

xarid qilish tartib-taomillari ishtirokchilari tomonidan eng yaxshi takliflarni tanlab olish tenderda va ikki bosqichli davlat xaridlarida ishtirok etish uchun elektron shaklda takliflar berish tartibini belgilaydi;

malakali ishtirokchilar oʻrtasida dastlabki malaka tanlovini va xarid qilish tartib-taomillarini oʻtkazish tartibini belgilaydi;

markazlashgan davlat xaridlarini amalga oshirish tartibini va markazlashgan xarid organini belgilaydi;

hadli kelishuv tuzish tartibini belgilaydi;

Davlat xaridlari sohasidagi shikoyatlarni koʻrib chiqish boʻyicha komissiya tarkibini tasdiqlaydi, shuningdek kelib tushgan shikoyatlarni u tomonidan koʻrib chiqish tartibini belgilaydi;

davlat xaridlari sohasidagi davlat dasturlarining ishlab chiqilishini, tasdiqlanishini va amalga oshirilishini taʼminlaydi.

Oʻzbekiston Respublikasi Iqtisodiyot va moliya vazirligi davlat xaridlari sohasidagi vakolatli organdir (bundan buyon matnda vakolatli organ deb yuritiladi).

Vakolatli organ:

davlat xaridlari sohasida davlat tomonidan tartibga solishni va davlat siyosatini amalga oshiradi;

davlat xaridlarini tashkil etish va oʻtkazish tizimini, shu jumladan, elektron tizimni rivojlantirish boʻyicha dasturlarni ishlab chiqish hamda roʻyobga chiqarishning samaradorligi va ochiqligini oshirish boʻyicha choralar koʻradi;

davlat xaridlari elektron tizimi operatorlarini hamda ularning davlat xaridlarini tashkil etish va amalga oshirishga taalluqli faoliyati tartibini, shuningdek maxsus axborot portali faoliyati tartibini belgilaydi;

davlat xaridlari elektron tizimining operatori faoliyatini amalga oshirish uchun yuridik shaxslarga ruxsat etish xususiyatiga ega hujjatni qonunchilikda belgilangan tartibda beradi;

davlat xaridlarining elektron tizimiga nisbatan talablarni belgilaydi;

iqtisodiy jihatdan eng foydali taklifni baholash usulini qoʻllash tartibini (baholashning narxga asoslanmagan mezonlarini) ishlab chiqadi;

davlat xaridlari boʻyicha axborotni joylashtirish, oshkor qilish va undan foydalanish tartibini hamda hajmlarini, shuningdek tovarga (ishga, xizmatga) hamda davlat xaridlarini amalga oshirish usuliga qarab eʼlon qilishga doir qoʻshimcha talablarni belgilaydi;

xarid qilish tartib-taomillarini oʻtkazish toʻgʻrisidagi eʼlonlarning, xarid qilish hujjatlarining namunaviy shakllarini tasdiqlaydi;

Insofsiz ijrochilarning yagona reyestrini shakllantirish tartibini ishlab chiqadi va tasdiqlaydi;

Shartnomalarning yagona reyestrini yuritish tartibini belgilaydi;

davlat xaridlari sohasidagi normativ-huquqiy hujjatlarning bajarilishi ustidan monitoring va nazoratni taʼminlaydi;

davlat xaridlari subyektlaridan axborotlarni soʻrab oladi, jamlaydi, ularni tahlil qiladi va hisobotlarni shakllantiradi;

davlat xaridlari sohasida xarid qilish va korrupsiyaga qarshi kurashish standartlari boʻyicha sertifikatlashtirish tizimini joriy etishga doir takliflarni ishlab chiqadi va Oʻzbekiston Respublikasi Vazirlar Mahkamasiga koʻrib chiqish uchun kiritadi.

Ushbu Qonun maqsadlari uchun davlat buyurtmachilari deganda quyidagilar tushuniladi:

1) budjet buyurtmachilari:

davlat organlari va muassasalari;

budjet tashkilotlari;

xarid qilish tartib-taomillarini amalga oshirish uchun yoʻnaltiriladigan budjet mablagʻlarini oluvchilar;

davlat maqsadli jamgʻarmalari;

budjet tashkilotlarida tashkil etilgan boshqa jamgʻarmalar;

2) korporativ buyurtmachilar:

ustav fondida (ustav kapitalida) davlat ulushi 50 foiz va undan ortiq boʻlgan yuridik shaxslar;

ustav fondida (ustav kapitalida) ushbu moddaning 2-bandi ikkinchi va uchinchi xatboshilarida koʻrsatilgan tashkilotlarning ulushi jami 50 foiz va undan ortiq boʻlgan yuridik shaxslar;

ustav fondida (ustav kapitalida) ushbu moddaning 2-bandi toʻrtinchi xatboshisida koʻrsatilgan tashkilotlarning ulushi jami 50 foiz va undan ortiq boʻlgan yuridik shaxslar.

Korporativ buyurtmachilar roʻyxati Oʻzbekiston Respublikasi Davlat aktivlarini boshqarish agentligi tomonidan yuritiladi va axborot almashinuvi orqali maxsus axborot portalida shakllantiriladi.

Davlat buyurtmachisi:

mustaqil ravishda yoki ixtisoslashgan tashkilotni jalb etgan holda tovarning (ishning, xizmatning) boshlangʻich narxini belgilash, bundan qonunchilikda belgilangan hollar mustasno;

davlat xaridlarini amalga oshirishda oʻz rasmiy veb-saytiga yoki oʻzining yuqori turuvchi organi rasmiy veb-saytiga, shuningdek ommaviy axborot vositalariga eʼlon joylashtirish;

xarid qilish tartib-taomillari ishtirokchilaridan eng yaxshi takliflarni tanlashni va tenderni oʻtkazishda davlat xaridlari toʻgʻrisidagi shartnoma (bundan buyon matnda shartnoma deb yuritiladi) tuzish va (yoki) shartnoma majburiyatlarini bajarish boʻyicha majburiyatlarning bajarilishini taʼminlaydigan zakalat yoki bank kafolatini kiritishni talab qilish;

xarid qilish tartib-taomillarining barcha ishtirokchilariga tatbiq etiladigan takliflarni taqdim etish muddatlarini uzaytirish;

qonunchilikda nazarda tutilgan hollarda xarid qilish tartib-taomillari ishtirokchilari takliflarining amal qilish muddatini muayyan davrga uzaytirish toʻgʻrisidagi taklif bilan ularga murojaat qilish huquqiga ega.

Davlat buyurtmachisi qonunchilikka va oʻzi tuzgan shartnomalarga muvofiq boshqa huquqlarga ham ega boʻlishi mumkin.

Davlat buyurtmachisi:

davlat xaridlarini rejalashtirishi;

ushbu Qonunga muvofiq xarid qilish tartib-taomili turini tanlash toʻgʻrisida qaror qabul qilishi;

qonunchilikda belgilangan tartibda davlat xaridlarini amalga oshirishi;

davlat xaridlari toʻgʻrisidagi axborotni qonunchilikda belgilangan tartibda va muddatlarda maxsus axborot portaliga joylashtirishi;

xarid qilish tartib-taomillari ishtirokchilarining tovarlar (ishlar, xizmatlar) va davlat xaridlarining tartib-taomillari bilan bogʻliq soʻrovlari boʻyicha ularga qonunchilikka muvofiq tushuntirishlar berishi;

xarid qilish tartib-taomillarining gʻolib deb topilgan ishtirokchilari bilan shartnomalar tuzishi, shuningdek ularning ijro etilishini taʼminlashi;

davlat xaridlarini amalga oshirishda affillanganlik toʻgʻrisidagi axborotni taqdim etishi;

boʻlajak davlat xaridlari toʻgʻrisidagi eʼlonlarni faqat moliyalashtirish manbalari va miqdorlari mavjudligi tasdiqlangan taqdirdagina maxsus axborot portali orqali davlat xaridlarining elektron tizimiga va ommaviy axborot vositalariga joylashtirishi shart.

Korporativ buyurtmachilar oʻzi amalga oshirgan davlat xaridlari toʻgʻrisida vakolatli organga har chorakda axborot taqdim etadi.

Davlat buyurtmachisining zimmasida qonunchilikka va oʻzi tuzgan shartnomalarga muvofiq boshqa majburiyatlar ham boʻlishi mumkin.

Davlat buyurtmachisining davlat xaridlari toʻgʻrisidagi qonunchilikda nazarda tutilgan majburiyatlari va vazifalari davlat buyurtmachisining rahbariyati, xarid komissiyalari va xarid qilish tartib-taomillarini tashkil etish va oʻtkazish uchun masʼul boʻlgan davlat buyurtmachisining tarkibiy boʻlinmalari yoki alohida xodimlari tomonidan amalga oshirilishi kerak.

Xarid komissiyasi xarid qilish tartib-taomillarini tashkil etish va oʻtkazish chogʻida davlat buyurtmachisi tomonidan shakllantiriladigan, ushbu tartib-taomillarni oʻtkazish tartibida shakllantirilishi talab etiladigan kollegial organdir.

Xarid komissiyasi ishining asosiy maqsadi xarid qilish tartib-taomillari ishtirokchilarining takliflarini buyurtmaga muvofiqlik darajasi boʻyicha xolis baholashdan va tartibga solishdan hamda davlat xaridlari raqobatlashuv usullari orqali amalga oshirilganda gʻolibni (gʻoliblarni) tanlashdan iborat.

Xarid komissiyasi davlat buyurtmachisi huzurida faoliyat koʻrsatadigan, davlat buyurtmachisining tegishli qarorlari bilan shakllantiriladigan va tarqatib yuboriladigan organdir.

Xarid komissiyasi toq sonli aʼzolardan iborat boʻladi, uning aʼzolari tarkibi va soni xarid qilish tartib-taomilining turiga bogʻliq boʻladi hamda qonunchilikka muvofiq va olinayotgan tovarning (ishning, xizmatning) xususiyatlari inobatga olingan holda oʻzgartirilishi mumkin.

Xarid komissiyasi aʼzolari xolis boʻlishi va xarid qilish tartib-taomili gʻolibini tanlashdan shaxsan manfaatdor boʻlmasligi kerak.

Xarid komissiyasining ishiga rais rahbarlik qiladi, u xarid komissiyasi majlislarini chaqiradi va olib boradi, ovozga qoʻyishni va xarid komissiyasi tomonidan qabul qilingan qarorlarni eʼlon qiladi, shuningdek xarid komissiyasi majlislarining bayonnomalarini imzolaydi. Xarid komissiyasi raisi yoʻqligida uning vazifalarini oʻrinbosari bajaradi.

Xarid komissiyasining tezkor faoliyatini uning ovoz berish huquqiga ega boʻlmagan masʼul kotibi tashkil etadi.

Xarid komissiyasining har bir aʼzosi ovoz berishda yoqlab ovoz berishi, qarshi ovoz berishi yoki unda ishtirok etishdan bosh tortishi mumkin. Xarid komissiyasining raisi ovoz berishda ishtirok etishdan bosh tortish huquqiga ega emas.

Xarid komissiyasining majlislari xarid komissiyasi aʼzolari hozirligida yuzma-yuz oʻtkaziladi. Yuzma-yuz majlislar videokonferensiyalar (telekonferensiyalar va hokazo) shaklida oʻtkazilishi mumkin.

Xarid komissiyasi eng yaxshi takliflarni tanlashni tenderni va ikki bosqichli davlat xaridlarini elektron shaklda oʻtkazish chogʻida axborot-kommunikatsiya texnologiyalari vositalaridan foydalangan holda masofadan turib ovoz berish huquqiga ega.

Xarid komissiyasi davlat xaridlarining predmetidan kelib chiqqan holda, oʻz faoliyatini amalga oshirish uchun ekspertlarni, shuningdek boshqa manfaatdor vazirliklar, idoralar va davlat buyurtmachisining yuqori turuvchi tashkiloti mutaxassislarini jalb etish mumkin.

Vakolatli organ vakilini boshqa davlat buyurtmachisining xarid komissiyasi tarkibiga kiritishga yoʻl qoʻyilmaydi.

Xarid komissiyasi toʻgʻri shakllantirilishi uchun davlat buyurtmachisi masʼuldir.

Xarid komissiyasi qarori xarid komissiyasi aʼzolari umumiy sonining koʻpchilik ovozi bilan qabul qilinadi.

Ovozlar teng boʻlib qolgan taqdirda xarid komissiyasi raisining ovozi hal qiluvchi ovoz boʻladi.

Xarid komissiyasi aʼzolarida xarid qilish tartib-taomillari ishtirokchilari bilan affillanganlik xususiyatiga ega aloqalar mavjud boʻlgan taqdirda, xarid komissiyasining bunday aʼzosi bu masala koʻrib chiqilgan majlisda oʻzini oʻzi rad etishi va mazkur masala boʻyicha ovoz berishda ishtirok etmasligi kerak, bu haqda xarid komissiyasi majlisining bayonnomasida qayd etiladi.

Agar xarid komissiyasiga mazkur komissiya aʼzosining affillanganligi mavjudligi tegishli masala yuzasidan qaror qabul qilinguniga qadar maʼlum boʻlib qolgan boʻlsa, uning oʻzi esa oʻzini oʻzi rad etmagan boʻlsa, bunday aʼzoning mazkur masala boʻyicha ovoz berishiga yoʻl qoʻyilmaydi.

Agar xarid komissiyasiga tegishli masala boʻyicha ovoz bergan mazkur komissiya aʼzosining affillanganligi mavjudligi qaror qabul qilinganidan keyin maʼlum boʻlib qolgan boʻlsa, bunday aʼzoning ovozi mazkur masala boʻyicha ovoz berish natijalaridan chiqarib tashlanadi.

Xarid komissiyasi quyidagi vazifalarni bajaradi:

xarid qilish hujjatlarini kelishadi;

takliflar qabul qilish muddatlarini belgilaydi;

takliflarni ochish tartib-taomillarini belgilaydi;

takliflarni baholash mezonlarini va usullarini belgilaydi;

zarur boʻlganda taklif kiritish tartibini, hajmini va uni taʼminlash shaklini belgilaydi;

xarid qilish tartib-taomili ishtirokchilarining takliflarini ochishni amalga oshiradi;

dastlabki malaka tanlovini oʻtkazadi, agar xarid qilish hujjatlari shartlarida bu nazarda tutilgan boʻlsa;

zarur boʻlganda dastlabki malaka tanlovi natijalarini hisobga olgan holda qaror qabul qiladi;

zarur boʻlganda baholash guruhini tashkil etish toʻgʻrisida qaror qabul qiladi;

xarid qilish tartib-taomillarini ushbu Qonunga muvofiq amalga oshiradi;

xarid qilish tartib-taomillarining raqobatlashuv turlari gʻolibini va zarur boʻlganda zaxiradagi gʻolibni belgilaydi yoki savdoni amalga oshmagan deb topadi.

Xarid komissiyasi davlat xaridlari ijrochisini aniqlash tartib-taomillarining davlat xaridlari toʻgʻrisidagi qonunchilik talablariga muvofiqligi, oʻzi qabul qilayotgan qarorlarning asosliligi va begʻarazligi uchun javobgar boʻladi.

Xarid komissiyasi davlat xaridlarining boshqa subyektlari tomonidan amalga oshiriladigan harakatlar uchun javobgar boʻlmaydi.

Xarid komissiyasi tomonidan oʻz vakolati doirasida qabul qilinadigan qarorlar davlat buyurtmachisi va xarid qilish tartib-taomillari ishtirokchilari uchun majburiydir.

Ixtisoslashgan tashkilot davlat buyurtmachisining topshirigʻiga koʻra tovarlarning (ishlarning, xizmatlarning) davlat xaridlarini amalga oshirishni tashkil etish boʻyicha shartnomaga asosan pulli asosda xizmatlar koʻrsatish huquqiga ega boʻlgan yuridik shaxsdir.

Davlat buyurtmachisi xarid qilish tartib-taomillarini oʻtkazishni tashkil etish maqsadida ixtisoslashgan tashkilotni jalb qilishga haqli.

Shartnomaning muhim shartlarini belgilash va shartnomani imzolash faqat davlat buyurtmachisi tomonidan amalga oshiriladi.

Ixtisoslashgan tashkilotni jalb qilish ushbu Qonunda belgilangan talablar va mezonlar asosida davlat buyurtmachisi tomonidan amalga oshiriladi.

Ixtisoslashgan tashkilotlar davlat xaridlarini oʻtkazishni tashkil etish boʻyicha xizmatlar koʻrsatish uchun quyidagi talablarga muvofiq boʻlishi kerak:

yuridik shaxs maqomiga ega boʻlishi;

ixtisoslashgan tashkilotning muassislari orasida davlat xaridining boshqa subyektlari boʻlmasligi;

davlat xaridlarini oʻtkazishni tashkil etish bilan bogʻliq xizmatlarni koʻrsatish boʻyicha amaliy tajribaga ega boʻlgan bir nafardan kam boʻlmagan xodimga ega boʻlishi;

maxsus axborot portaliga ulanish imkonini taʼminlovchi dasturiy-texnik vositalarga ega boʻlishi.

Ixtisoslashgan tashkilot davlat buyurtmachisidan xarid tartib-taomillarini oʻtkazishni tashkil etish boʻyicha xizmatlar koʻrsatish uchun zarur axborotni olish huquqiga ega, bundan qonunchilikda nazarda tutilgan hollar mustasno.

Ixtisoslashgan tashkilot:

davlat buyurtmachisining talabiga binoan xarid qilish tartib-taomillarini oʻtkazishni tashkil etishning istalgan bosqichida amalga oshirilgan ishlar toʻgʻrisida hisobot taqdim etishi;

davlat xaridlarining asosiy prinsiplariga rioya etgan holda xizmatlar koʻrsatishi;

davlat xaridlari sohasidagi vakolatli organning, Davlat xaridlari sohasidagi shikoyatlarni koʻrib chiqish boʻyicha komissiyaning soʻroviga koʻra ushbu Qonunga va boshqa qonunchilik hujjatlariga rioya etilishi toʻgʻrisidagi axborotni taqdim etishi;

xarid qilish tartib-taomillarining insofsiz ishtirokchilarning davlat xaridlarida ishtirok etishiga yoʻl qoʻymaslik boʻyicha choralar koʻrishi;

har bir davlat xaridi uchun xarid qilish tartib-taomillarini oʻtkazishni tashkil etish uchun masʼul boʻlgan shaxsni belgilashi;

xarid qilish tartib-taomillarini ushbu Qonun va boshqa qonunchilik hujjatlari talablari asosida tashkil etishi shart.

Ixtisoslashgan tashkilot quyidagi xizmatlarni koʻrsatadi:

tovarning (ishning, xizmatning) boshlangʻich narxini aniqlaydi, bundan qonunchilikda belgilangan hollar mustasno;

marketing tadqiqotlarini va boshqa tadqiqotlarni oʻtkazadi;

reklama ishlarini tashkil etadi;

xarid qilish tartib-taomillarini oʻtkazish toʻgʻrisidagi xabarnomalar, eʼlonlar matnlarini, xarid qilish hujjatlarini rasmiylashtiradi;

xarid qilish tartib-taomillari talablari, shartlari va ular boʻyicha tushuntirishlar matnlarini qonunchilikka muvofiq tayyorlaydi;

davlat buyurtmachisiga xarid qilish tartib-taomilining turini taklif qiladi;

davlat buyurtmachisining yozma murojaatiga koʻra davlat xaridlarining tartibi va muddatlari toʻgʻrisidagi axborotni davlat xaridlarining elektron tizimiga va maxsus axborot portaliga qonunchilikka muvofiq joylashtiradi;

gʻoliblar bilan imzolanadigan shartnomalar loyihalarini tayyorlaydi;

davlat buyurtmachisining yozma topshirigʻiga koʻra boʻlajak davlat xaridlari toʻgʻrisidagi eʼlonlarni faqat moliyalashtirish manbalari mavjudligi tasdiqlangan taqdirda, joylashtiradi;

davlat buyurtmachisining yozma topshirigʻiga koʻra xarid qilish tartib-taomillari ishtirokchilariga oʻz takliflarining amal qilish muddatini muayyan muddatga uzaytirish toʻgʻrisidagi taklif bilan murojaat qiladi;

xarid komissiyasi majlislarining bayonnomalarini rasmiylashtiradi;

xarid qilish tartib-taomillarini oʻtkazish yakunlari boʻyicha hisobotlar tuzadi;

xarid qilish tartib-taomilida ishtirok etish uchun taklifnomalar yuborilishini taʼminlaydi.

Ixtisoslashgan tashkilot yoki uning affillangan shaxsi oʻzi tashkilotchi boʻlgan xarid qilish tartib-taomilida xarid qilish tartib-taomillari ishtirokchisi sifatida qatnashishi mumkin emas.

Davlat buyurtmachisi ixtisoslashgan tashkilotni ushbu moddada belgilangan talablarga muvofiq jalb etish uchun javobgardir.

Davlat xaridlarining amalga oshirilishi chogʻida ixtisoslashgan tashkilot tomonidan ushbu Qonun va boshqa qonunchilik hujjatlari talablari buzilgan hollarda javobgarlik davlat buyurtmachisi va ixtisoslashgan tashkilot zimmasiga yuklatiladi.

Xarid qilish tartib-taomillarini tashkil etish va amalga oshirish jarayonida maslahat va (yoki) takliflarni koʻrib chiqish, baholash hamda taqqoslash boʻyicha xulosa olish uchun ekspertlar yoki ekspert tashkilotlari tegishli shartnoma asosida jalb etilishi, shu jumladan tekin asosda jalb etilishi mumkin.

Ekspert maslahat xizmatlarini koʻrsatish va (yoki) xulosa berish uchun davlat xaridlari predmeti bilan bogʻliq sohada maxsus bilimlarga ega boʻlgan jismoniy shaxsdir.

Ekspert tashkiloti xodimlari maslahat xizmatlarini koʻrsatish va (yoki) xulosa berish uchun davlat xaridlari predmeti bilan bogʻliq sohada maxsus bilimlarga ega boʻlgan yuridik shaxsdir.

Ekspert, ekspert tashkiloti xizmatlarni davlat xaridlari toʻgʻrisidagi qonunchilikka rioya etgan holda koʻrsatishi shart.

Xarid qilish tartib-taomillari ishtirokchisi (bundan buyon matnda ishtirokchi deb yuritiladi) xarid qilish tartib-taomilida davlat xaridlarini bajarish uchun talabgor sifatida ishtirok etayotgan, Oʻzbekiston Respublikasining rezidenti yoki norezidenti boʻlgan jismoniy yoki yuridik shaxsdir.

Ishtirokchi:

davlat xaridlari toʻgʻrisidagi axborotdan qonunchilikda nazarda tutilgan hajmda foydalanish;

davlat buyurtmachisiga yoki ushbu buyurtmachi tomonidan jalb etilgan ixtisoslashgan tashkilotga muayyan davlat xaridlarining tartib-taomillari, ularni oʻtkazish talablari va shartlari boʻyicha soʻrovlar berish hamda ulardan tushuntirishlar olish;

xarid komissiyasi tomonidan takliflar ochilayotganda belgilangan tartibda ishtirok etish;

Davlat xaridlari sohasidagi shikoyatlarni koʻrib chiqish boʻyicha komissiyaga xarid qilish tartib-taomillari natijalari yuzasidan shikoyat qilish;

qonunchilikka muvofiq takliflarga oʻzgartirishlar kiritish yoki ularni qaytarib olish huquqiga ega.

Ishtirokchi:

davlat xaridlari toʻgʻrisidagi qonunchilik talablariga rioya etishi;

xarid qilish hujjatlari talablariga muvofiq boʻlgan takliflar va hujjatlarni taqdim etishi hamda taqdim etilgan axborotning ishonchliligi uchun javobgar boʻlishi;

asosiy benefitsiar mulkdor toʻgʻrisidagi maʼlumotlarni oshkor etishi;

gʻolib deb topilgan taqdirda, davlat buyurtmachisi bilan qonunchilikda nazarda tutilgan tartibda va muddatlarda shartnoma tuzishi shart.

Ishtirokchi va uning affillangan shaxsi elektron doʻkon, kichik qiymatli xaridning soddalashtirilgan tartib-taomili, auksion, eng yaxshi takliflarni tanlash, tender va ikki bosqichli davlat xaridlari boʻyicha ayni bitta lotda ishtirok etish huquqiga ega emas.

Davlat xaridlarining ijrochisi (bundan buyon matnda ijrochi deb yuritiladi) xarid qilish tartib-taomillari yakunlari boʻyicha gʻolib deb topilgan va oʻzi bilan davlat xaridlari toʻgʻrisida shartnoma tuzilgan ishtirokchidir.

Ijrochi:

davlat buyurtmachisi bilan tuzilgan shartnomani bajarish jarayonida tushuntirishlar olish uchun unga murojaat qilish;

yetkazib berilgan tovar (ish, xizmat) uchun haq olish;

shartnoma shartlariga muvofiq va (yoki) qonunchilikda nazarda tutilgan hollarda shartnomani bekor qilish huquqiga ega.

Ijrochi:

qonunchilik talablariga rioya etishi;

shartnomani uning shartlariga muvofiq bajarishi;

asosiy benefitsiar mulkdor toʻgʻrisidagi maʼlumotlarni oshkor etishi;

shartnomani bajarish jarayonida davlat buyurtmachisiga yoki vakolatli davlat organiga uning soʻrovi boʻyicha tushuntirishlar va axborot berishi shart.

Davlat xaridlari elektron tizimining operatori qonunchilikda belgilangan tartibda vakolatli organ tomonidan beriladigan ruxsat etish xususiyatiga ega hujjatga asosan davlat xaridlarining subyektlariga davlat xaridlarining elektron tizimlarida xarid qilish tartib-taomillarini amalga oshirish bilan bogʻliq xizmatlar koʻrsatadigan yuridik shaxsdir.

Davlat xaridlari elektron tizimining operatori:

davlat xaridlari elektron tizimining uzluksiz ishlashini, unga joylashtirilgan axborotning but saqlanishini va bir butunligini, oʻz elektron resursining tegishli davlat boshqaruvi organlarining rasmiy veb-saytlari va axborot tizimlari hamda maxsus axborot portali bilan belgilangan tartibda uygʻun ishlashini taʼminlaydi;

qonunchilikka muvofiq axborotning elektron shaklda saqlanishini, shu jumladan elektron hujjatlar va elektron xabarlarning saqlanishini taʼminlash, shuningdek xarid qilish tartib-taomillarini oʻtkazishda davlat xaridlarining elektron tizimini toʻgʻri ishlashi uchun javobgar boʻladi;

oʻz elektron resursini Oʻzbekiston Respublikasi hududidagi apparat-texnika vositalariga joylashtiradi;

vakolatli organ, davlat xaridlari jarayonida ishtirok etayotgan boshqa davlat va xoʻjalik boshqaruvi organlari bilan hamkorlikni amalga oshiradi.

Davlat xaridlari elektron tizimining operatori:

ishtirokchi, ijrochi sifatida, shuningdek oʻzining elektron tizimida davlat buyurtmachisi sifatida davlat xaridlarida ishtirok etishga, ularning affillangan shaxsi boʻlishga;

davlat xaridlarini amalga oshirish va narx belgilash jarayoniga aralashishga, kontragentlarni tanlashda va shartnomalar tuzishda davlat xaridlari subyektlarining erkinligini cheklashga, shuningdek davlat xaridlari subyektlarining huquqlarini boshqacha tarzda cheklashga, bundan qonunchilikda nazarda tutilgan hollar mustasno;

uzatiladigan, olinadigan va saqlanadigan elektron hujjatlar hamda elektron xabarlarning ishonchliligini, shuningdek agar qonunchilikda yoki shartnomada boshqacha qoida nazarda tutilmagan boʻlsa, ularning qonunchilikka muvofiqligini nazorat qilishga yoki tekshirishga;

davlat xaridlari subyektlari tomonidan joylashtiriladigan elektron hujjatlar va elektron xabarlarning mazmunini oʻzgartirishga haqli emas.

Davlat xaridlari elektron tizimining operatori davlat xaridlari subyektlarining ushbu operatorga beriladigan elektron hujjatlari va elektron xabarlarining, shu jumladan boʻlajak davlat xaridlari toʻgʻrisida davlat xaridlarining elektron tizimiga joylashtiriladigan axborotning mazmuni bilan bogʻliq huquqiy oqibatlar uchun javobgar boʻlmaydi.

Davlat xaridlari jarayoni quyidagi bosqichlarni oʻz ichiga oladi:

davlat xaridlarini rejalashtirish;

xarid qilish tartib-taomillarini amalga oshirish;

shartnomani tuzish va bajarish;

davlat xaridlari monitoringi.

Oʻzbekiston Respublikasi Prezidentining farmonlari va qarorlariga muvofiq Oʻzbekiston Respublikasining Investitsiya dasturiga va boshqa davlat dasturlariga kiritilgan loyihalarni “foydalanishga tayyor holda topshirish” shartlari asosida “fast-track” usulida (bir vaqtning oʻzida loyihalashtirish, xarid qilish va qurilish ishlari) amalga oshirishga yoʻl qoʻyiladi.

Maxsus axborot portali vakolatli organ tomonidan yuritiladigan, davlat xaridlari amalga oshirilishi toʻgʻrisidagi eʼlonlar, davlat xaridlarining yakunlari, ishtirokchilarning takliflari haqidagi axborotni va qonunchilikda nazarda tutilgan boshqa axborotni elektron shaklda koʻzdan kechirishni, shuningdek amalga oshirilgan elektron davlat xaridlari toʻgʻrisida davlat xaridlari elektron tizimlarining operatorlari tomonidan kiritiladigan (yuboriladigan) axborotni toʻplashni taʼminlovchi veb-saytdir (maxsus elektron platforma).

Maxsus axborot portalida:

davlat xaridlari toʻgʻrisidagi axborotning jamoatchilik uchun ochiqligi;

davlat xaridlari sohasidagi axborotni jamlash, unga ishlov berish va tahliliy hisobotni shakllantirish;

davlat xaridlarining elektron tizimlari va boshqa axborot tizimlari bilan hamkorlikni amalga oshirish;

xarid qilish tartib-taomillarining davlat nazoratini amalga oshiruvchi vakolatli davlat organlari tomonidan davlat xaridlari subyektlarining oʻz vazifalarini ushbu Qonun va davlat xaridlari sohasidagi boshqa qonunchilik hujjatlari talablari doirasida amalga oshirayotganligi ustidan monitoring va nazorat oʻtkazish taʼminlanadi.

Maxsus axborot portalida davlat xaridlarini rejalashtirish, xarid qilish tartib-taomillarini amalga oshirish, shartnoma tuzish, davlat xaridlari monitoringi va nazoratini oʻtkazish jarayonlari tizimlashtiriladi.

Budjet buyurtmachilarining davlat xaridlari boʻyicha toʻlovlari maxsus axborot portalida davlat xaridlarini rejalashtirish, xarid qilish tartib-taomillarini amalga oshirish, shartnoma tuzish va ular toʻgʻrisida axborot joylashtirish jarayonlari tugaganidan keyin Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasi tomonidan belgilangan tartibda amalga oshiriladi.

Davlat xaridlari subyektlarining hamkorligini, elektron davlat xaridlari jarayonidagi xarid qilish tartib-taomillari oʻtkazilishini taʼminlaydigan tashkiliy, axborotga oid va texnik yechimlarning dasturiy majmui davlat xaridlarining elektron tizimidir.

Davlat xaridlarining elektron tizimi vakolatli organ tomonidan belgilangan talablarga, shu jumladan:

texnik parametrlarga oid talablarga;

texnik va texnologik imkoniyatlarga oid talablarga;

axborotni va tegishli maʼlumotlarni saqlovchi asbob-uskunalarning joylashish yeriga oid talablarga;

axborot xavfsizligi usullari va shartlariga;

maxsus axborot portali va boshqa tashqi axborot tizimlari bilan hamkorlik imkoniyatlariga;

xarid qilish tartib-taomillarini tashkil etish va oʻtkazishga oid talablarga;

davlat xaridlari subyektlarining, vakolatli organning va xarid qilish tartib-taomillari ustidan davlat nazoratini amalga oshiruvchi vakolatli davlat organlarining tizimdan foydalanish imkoniyatlariga;

davlat xaridlari toʻgʻrisidagi qonunchilik hujjatlariga muvofiq boshqa talablarga mos boʻlishi kerak.

Davlat xaridlarini rejalashtirish davlat buyurtmachisi tomonidan amalga oshiriladi va xaridlarni tizimlashtirishdan, davlat xaridlarini rejalashtirish hamda budjet va investitsiya jarayonlaridagi rejalashtirish, shuningdek xoʻjalik faoliyatini rejalashtirish oʻrtasida oʻzaro aloqani taʼminlashdan iborat boʻladi.

Davlat xaridlarining yillik reja-jadvali budjet buyurtmachilari tomonidan joriy yilning 25-martiga qadar maxsus axborot portalida joylashtiriladi.

Kelgusi yil uchun davlat xaridlarining yillik reja-jadvallari korporativ buyurtmachilar tomonidan joriy yilning 25-dekabriga qadar maxsus axborot portalida joylashtiriladi.

Kelgusi chorak uchun davlat xaridlarining choraklik reja-jadvallari davlat buyurtmachilari tomonidan joriy chorak oxirgi oyining 25 sanasiga qadar maxsus axborot portalida joylashtiriladi.

Xarid qilish tartib-taomillarini amalga oshirish turlari quyidagilardan iborat:

elektron doʻkon;

kichik qiymatli xaridning soddalashtirilgan tartib-taomili;

boshlangʻich narxni pasaytirish uchun oʻtkaziladigan auksion;

eng yaxshi takliflarni tanlash;

tender;

ikki bosqichli davlat xaridlari;

toʻgʻridan-toʻgʻri shartnomalar boʻyicha amalga oshiriladigan davlat xaridlari;

Oʻzbekiston Respublikasi Prezidentining farmonlari va qarorlari, Oʻzbekiston Respublikasi Vazirlar Mahkamasining qarorlari bilan ruxsat etilgan xaridlarning boshqa raqobatli turlari.

Xarid qilish tartib-taomillari elektron shaklda amalga oshirilishi mumkin.

Davlat xaridlari toʻgʻrisidagi axborot jumlasiga quyidagilar kiradi:

davlat xaridlari toʻgʻrisidagi qonunchilik;

davlat xaridlarining reja-jadvallari;

davlat xaridlari toʻgʻrisidagi eʼlonlar;

hujjatlarning namunaviy shakllari;

xarid qilish tartib-taomillarida ishtirok etish uchun zarur boʻlgan namunaviy shartnomalar;

davlat xaridlari bosqichlarining natijalari toʻgʻrisidagi axborot;

Shartnomalarning yagona reyestri;

Yagona yetkazib beruvchilar reyestri;

Insofsiz ijrochilarning yagona reyestri;

Davlat xaridlari sohasidagi shikoyatlarni koʻrib chiqish boʻyicha komissiyaning qarorlari;

davlat xaridlari boʻyicha statistik axborot.

Davlat xaridlari toʻgʻrisidagi axborot maxsus axborot portalida eʼlon qilinadi.

Davlat xaridlari toʻgʻrisidagi maʼlumotlar toʻliq, xolis va ishonchli boʻlishi kerak.

Ishtirokchilarning tovarlar (ishlar, xizmatlar) boʻyicha davlat xaridlariga taalluqli boʻlgan takliflarini baholash mezonlarida:

narx;

yetkazib berish bazisi;

yetkazib berish muddatlari;

tavsifnomalar va sifat koʻrsatkichlari;

ekspluatatsiya qilish (foydalanish) muddati;

toʻlov va kafolatlar shartlari;

muayyan davrdagi ekspluatatsiya qilishga, shu jumladan foydalanish va taʼmirlashga doir xarajatlar;

qonunchilik talablariga zid boʻlmagan boshqa mezonlar nazarda tutiladi.

Davlat buyurtmachisi tomonidan belgilanadigan davlat xaridi shartlarida ishtirokchilarning takliflarini baholash mezonlari, ularning nisbiy qiymati, baholash tartib-taomillari doirasida baholash mezonlarini qoʻllash tartibi boʻlishi kerak.

Ishtirokchilarning takliflarini baholash va gʻolibni aniqlashda davlat buyurtmachisi faqat xarid qilish hujjatlarida koʻrsatilgan baholash mezonlari va tartib-taomillaridan foydalanadi hamda bu mezonlar va tartib-taomillarni ushbu hujjatlarda bayon etilgan tartibda qoʻllaydi.

Davlat xaridlarini amalga oshirishda ekologik muhitni yaxshilashga koʻmaklashish yoki atrof-muhitga boʻlgan salbiy taʼsirni kamaytirish maqsadida ishtirokchilarning takliflarini baholash va ijrochini aniqlash jarayonida energiya samaradorligi, tabiiy resurslardan oqilona foydalanish, ekologik jihatdan maqbul materiallardan hamda ikkilamchi xom ashyodan, qayta tiklanuvchi energiya manbalaridan foydalanish kabi mezonlardan va xarid qilinayotgan tovarlarning (ishlarning, xizmatlarning) ekologik maqbulligini baholashga oid boshqa omillardan foydalanilishi mumkin.

Davlat xaridlari qiymatining bozor narxlariga muvofiqligini baholash uchun davlat buyurtmachisi ochiq axborot manbalaridagi axborotlardan yoki boshqa ishonchli manbalardan foydalanadi.

Davlat buyurtmachisi har bir davlat xaridini amalga oshirishda xarid predmetining narxini oʻrganishi shart.

Tovarlarning (ishlarning, xizmatlarning) davlat xaridi tavsifi xolis, funksional va umumiy xususiyatga ega. Tavsifda tovarlar (ishlar, xizmatlar) davlat xaridining tegishli texnik, sifat, zarur hollarda ekspluatatsiya qilinish xususiyatlari koʻrsatiladi.

Davlat xaridlarining tavsifi tovarlarning (ishlarning, xizmatlarning) texnik xossalaridan kelib chiqqan holda, tasniflarni, rejalarni, chizmalarni, eskizlarni, talablarni hamda sinovlar va sinov usullari, qadoqlash, tamgʻalash haqidagi yoki muvofiqlik sertifikati, shuningdek shartli belgilar va atamalar toʻgʻrisidagi axborotni oʻz ichiga olishi mumkin.

Tovarlarning (ishlarning, xizmatlarning) davlat xaridi tavsifiga aniq tovar belgisiga yoki nomiga, patentga, konstruksiyaga yoki modelga, u mansub boʻlgan muayyan manbaga yoki ishlab chiqaruvchiga, eksklyuziv vakolatli huquqqa doir talablar yoki havolalar kiritilmasligi kerak, bundan elektron doʻkon vositasida amalga oshiriladigan xaridlar hamda tovarlarning (ishlarning, xizmatlarning) davlat xaridi xususiyatlarini taʼriflashning boshqa yetarlicha aniq usuli mavjud boʻlmagan hollar mustasno va bunda davlat xaridining tavsifiga “yoki analogi” degan soʻzlar kiritilishi kerak, bundan tovarlarning bir-biriga mos kelmasligi hollari mustasno.

Tovarlarning (ishlarning, xizmatlarning) davlat xaridi tavsifida quyidagilar boʻlishi kerak:

tovarlarning soni;

bajarilishi (koʻrsatilishi) kerak boʻlgan ishlar (xizmatlar);

tovarlar yetkazib berilishi lozim boʻlgan yoki ishlar bajarilishi, xizmatlar koʻrsatilishi kerak boʻlgan joy;

tovarlarni yetkazib berish, ishlarni bajarish yoki xizmatlar koʻrsatishning maqbul yoki talab etiladigan muddatlari, agar ular mavjud boʻlsa.

Xarid qilish hujjatlarida xarid qilinadigan tovarlarning (ishlarning, xizmatlarning) davlat buyurtmachisi tomonidan belgilangan talablarga muvofiqligini aniqlash imkonini beradigan koʻrsatkichlar boʻlishi kerak. Bunda shunday koʻrsatkichlarning eng koʻp va (yoki) eng kam qiymatlari, shuningdek oʻzgartirilishi mumkin boʻlmagan koʻrsatkichlarning qiymatlari koʻrsatiladi.

Zarur boʻlganda davlat buyurtmachisi tomonidan tovarlarning (ishlarning, xizmatlarning) kafolat muddatiga va (yoki) ularning sifatiga beriladigan kafolatlar hajmiga, tovarga kafolat xizmati koʻrsatishga, tovardan foydalanish xarajatlariga, tovarni montaj qilish va sozlashning majburiyligiga, tovardan foydalanuvchi va unga xizmat koʻrsatuvchi shaxslarni oʻqitishga doir talablar belgilanadi.

Mashinalar va asbob-uskunalarni yetkazib beruvchi ijrochi aniqlangan taqdirda davlat buyurtmachisi xarid qilish hujjatlarida tovarning kafolat muddatiga va (yoki) uning sifatiga beriladigan kafolatlar hajmiga, tovarga kafolat xizmati koʻrsatishga, tovarga kafolat muddati mobaynida xizmat koʻrsatish xarajatlariga, shuningdek tovarni montaj qilish va sozlashga doir, agar bu tovarning texnik hujjatlarida nazarda tutilgan boʻlsa, talablarni belgilaydi. Yangi mashinalar va asbob-uskunalarni yetkazib beruvchi ijrochi aniqlangan taqdirda davlat buyurtmachisi xarid qilish hujjatlarida ushbu tovarni ishlab chiqaruvchining va (yoki) yetkazib beruvchining kafolatini taqdim etishga hamda bunday kafolatning amal qilish muddatiga nisbatan qoʻshimcha ravishda talablar belgilaydi. Bunday kafolatni berish ushbu tovar bilan birga amalga oshiriladi.

Agar tovarlarning davlat xaridi tavsifida boshqacha qoida nazarda tutilmagan boʻlsa, yetkazib berilayotgan tovar yangi boʻlishi kerak.

Xarid qilish hujjatlariga tovarni ishlab chiqaruvchiga, ishtirokchiga nisbatan davlat xaridlarining asosiy prinsiplariga zid boʻlgan, oshirib yuborilgan talablarni, shu jumladan ishtirokchining malakasiga nisbatan oshirib yuborilgan talabni (shu jumladan tovarning, ishning yoki xizmatning sifatiga, texnik xususiyatlariga doir talablar, tovarning funksional xususiyatlariga (isteʼmol qilish xususiyatlariga) doir talablar shaklida) kiritishga yoʻl qoʻyilmaydi.

Xarid qilish tartib-taomili natijasi boʻyicha tuzilgan shartnomaga qoʻshimcha kelishuv uning muhim shartlarini, xususan tovar (ish, xizmat), uning sifati va assortimentini oʻzgartirish, miqdorini va bahosini oshirish hamda yetkazib berish muddatini uzaytirish tarzida oʻzgartirmasa qonun hujjatlarida belgilangan tartibda tuzilishi mumkin, bundan qonunchilikda nazarda tutilgan hollar mustasno.

Davlat ulushi 50 foiz va undan ortiq boʻlgan korxonalarga xizmat koʻrsatuvchi anderrayterlar tomonidan qimmatli qogʻozlar shartnomada nazarda tutilganligidan yuqoriroq narxda va (yoki) koʻproq miqdorda joylashtirilgan taqdirda anderrayterlarning xizmatlari uchun shartnoma boshlangʻich summasining 10 foizidan ortiq miqdorda haq toʻlanishiga ruxsat etiladi.

Davlat xaridlari toʻgʻrisidagi axborot davlat tilida eʼlon qilinadi va tarqatiladi. Davlat xaridlari toʻgʻrisidagi axborot davlat tili bilan bir vaqtda boshqa tillarda ham eʼlon qilinishi va tarqatilishi mumkin. Boshqa tillarda eʼlon qilinayotgan davlat xaridlari toʻgʻrisidagi axborotning mazmuni davlat tilida eʼlon qilingan axborotga muvofiq boʻlishi kerak.

Ishtirokchilar quyidagi mezonlarga muvofiq boʻlishi kerak:

shartnomani bajarish uchun zarur texnik, moliyaviy, moddiy, kadrlar resurslarining hamda boshqa resurslarning mavjudligi;

shartnoma tuzish uchun qonuniy huquqqa egalik;

soliqlar va yigʻimlarni toʻlash boʻyicha muddati oʻtgan qarzdorlikning mavjud emasligi;

Oʻzbekiston Respublikasi Bosh prokuraturasi huzuridagi Majburiy ijro byurosining maʼlumotlar bazalarida ishtirokchining sud qarorlari boʻyicha bajarilmagan majburiyatlari mavjud emasligi;

oʻziga nisbatan joriy etilgan toʻlovga qobiliyatsizlik tartib-taomillarining mavjud emasligi;

Insofsiz ijrochilarning yagona reyestrida qayd etilmaganligi.

Davlat buyurtmachisi zarur boʻlganda tovarlarning (ishlarning, xizmatlarning) oʻziga xos xossalaridan yoki xususiyatlaridan kelib chiqqan holda ishtirokchilarga qoʻshimcha talablar belgilashga haqli.

Ishtirokchilarga qoʻyiladigan qoʻshimcha talablar davlat xaridlarining asosiy prinsiplarga zid boʻlmasligi kerak.

Davlat xaridi toʻgʻrisidagi axborotda ishtirokchilarga qoʻyiladigan qoʻshimcha talablar ushbu axborot eʼlon qilingan paytda koʻrsatilgan boʻlishi kerak.

Ishtirokchilarga qoʻshimcha talablar qoʻyiladigan davlat xaridida ishtirok etish uchun ishtirokchilar dastlabki malaka tanlovidan oʻtadi.

Davlat buyurtmachilari tovarlarning (ishlarning, xizmatlarning) ayrim toifalarini yetkazib berishga doir dastlabki malaka tanlovidan oʻtgan malakali ishtirokchilarning roʻyxatini yuritishi mumkin.

Eng yaxshi takliflarni tanlash, tender va ikki bosqichli davlat xaridlari jarayonida xarid qilish hujjatlarida nazarda tutilgan dastlabki malaka tanlovidan oʻtish toʻgʻrisidagi talab mazkur roʻyxatga kiritilgan ishtirokchilarga nisbatan tatbiq etilmaydi.

Davlat buyurtmachilari tomonidan ushbu roʻyxat yuritilishi toʻgʻrisidagi axborot maxsus axborot portalida eʼlon qilinadi va har olti oyda kamida bir marta yangilanadi.

Mazkur roʻyxatga kiritish talablariga yoki shartlariga kiritilgan har qanday oʻzgartirishlar toʻgʻrisidagi axborot bunday oʻzgartirishlar kiritilgan kundan eʼtiboran bir ish kuni ichida maxsus axborot portaliga joylashtirilishi hamda ushbu roʻyxatga kiritilgan barcha ishtirokchilarga yetkazilishi kerak.

Malakali ishtirokchilar oʻrtasida dastlabki malaka tanlovini va xarid qilish tartib-taomillarini oʻtkazish tartibi Oʻzbekiston Respublikasi Vazirlar Mahkamasi tomonidan belgilanadi.

Tovarlarning (ishlarning, xizmatlarning) birgalikdagi davlat xaridlarini shakllantirish ikki va undan ortiq davlat buyurtmachisining davlat xaridlari reja-jadvallariga koʻra amalga oshiriladi.

Birgalikdagi davlat xaridlari natijalari boʻyicha tuzilgan shartnomalar toʻgʻrisidagi axborot davlat buyurtmachilari tomonidan maxsus axborot portaliga shartnomalar tuzilgan sanadan eʼtiboran besh ish kunidan kechiktirmay joylashtiriladi.

Davlat xaridlari uchun ajratilgan mablagʻlardan samarali foydalanish maqsadida bir nechta davlat buyurtmachisi ayni bir turdagi tovarlarning (ishlarning, xizmatlarning) markazlashgan xaridini markazlashgan xarid organi orqali amalga oshirishi mumkin.

Markazlashgan xarid organi Oʻzbekiston Respublikasi Vazirlar Mahkamasi tomonidan, shu jumladan davlat buyurtmachisining tarkibidagi tashkilotlardan belgilanadigan yuridik shaxsdir.

Davlat buyurtmachilari markazlashgan xarid organi tomonidan xarid qilingan tovarlarni (ishlarni, xizmatlarni) qabul qilib olgan taqdirda, davlat buyurtmachilari ushbu Qonunda nazarda tutilgan xarid qilish tartib-taomillariga rioya etgan deb hisoblanadi.

Markazlashgan xarid organi tomonidan xarid qilinadigan tovarlar (ishlar, xizmatlar) roʻyxati maxsus axborot portalida yuritiladi.

Davlat xaridlarini amalga oshirishda ushbu Qonun va boshqa qonunchilik hujjatlari talablari markazlashgan xarid organi tomonidan buzilgan taqdirda javobgarlik markazlashgan xarid organining zimmasiga yuklatiladi.

Markazlashgan davlat xaridlarini amalga oshirish tartibi Oʻzbekiston Respublikasi Vazirlar Mahkamasi tomonidan belgilanadi.

Davlat buyurtmachisi eng yaxshi takliflarni tanlash yoki tender natijalari boʻyicha aniqlanadigan bir nechta gʻolib bilan bir yildan uch yilgacha boʻlgan muddatga hadli kelishuv tuzishi mumkin.

Davlat buyurtmachisi xarid qilish hujjatlarida hadli kelishuvni tuzish shartlarini, shuningdek hadli kelishuvning amal qilish muddati davomida davlat buyurtmachisining kutilayotgan ehtiyojlaridan kelib chiqib, tovarlarning (ishlarning, xizmatlarning) umumiy hajmini koʻrsatadi. Bunda davlat buyurtmachisi hadli kelishuvda koʻrsatilgan toʻliq summa uchun shartnoma tuzishga majbur emas.

Hadli kelishuvni tuzish tartibi Oʻzbekiston Respublikasi Vazirlar Mahkamasi tomonidan belgilanadi.

Xarid komissiyasi ishtirokchilarga nisbatan takliflarning garov, kafolat, zakalat tarzida yoxud qonunchilikda nazarda tutilgan boshqa usulda taʼminlanishi zarurligi toʻgʻrisidagi talabni belgilashga haqli.

Ishtirokchilarga nisbatan takliflarning taʼminlanishi zarurligi tarzidagi talab barcha ishtirokchilarga taalluqli boʻladi va davlat xaridlarining shartlarida koʻrsatiladi.

Xarid komissiyasi ishtirokchilarga nisbatan takliflarning taʼminlanishi zarurligi tarzida talab belgilagan taqdirda, takliflar yuborilguniga qadar ishtirokchi davlat buyurtmachisiga taʼminotning maqbulligini tasdiqlash toʻgʻrisida soʻrov yuborishga haqli. Davlat buyurtmachisi bunday soʻrovga ikki ish kuni davomida javob beradi.

Davlat buyurtmachisi taklifni taʼminlash summasi toʻlanishini talab qilmaydi va taʼminlash toʻgʻrisidagi hujjatni bir ish kuni davomida qaytaradi yoki quyidagi voqealardan biri yuz berganidan keyin uning qaytarilishini taʼminlaydi:

taklifni taʼminlashning amal qilish muddati tugashi;

shartnomaning kuchga kirishi va ushbu shartnomaning bajarilishi taʼminlanishi, agar bunday taʼminlash davlat xaridi shartlarida talab etilsa;

davlat xaridlarining bekor qilinishi;

takliflarni yuborishning oxirgi muddati tugaguniga qadar taklifning chaqirib olinishi.

Xarid qilish tartib-taomillarini amalga oshirishda davlat buyurtmachisining davlat xaridlari elektron tizimining operatori bilan va davlat xaridlari elektron tizimi operatorining ishtirokchi bilan, shuningdek davlat buyurtmachisining gʻolib aniqlanguniga qadar ishtirokchilar bilan muzokaralar olib borishiga yoʻl qoʻyilmaydi.

Ishtirokchilar xarid qilish hujjatlari va qoʻllanilayotgan xarid qilish tartib-taomili yuzasidan tushuntirishlar olish uchun davlat buyurtmachisiga yoki u tomonidan jalb etilgan ixtisoslashgan tashkilotga murojaat qilishi mumkin.

Davlat buyurtmachisi yoki u tomonidan jalb etilgan ixtisoslashgan tashkilot xarid qilish hujjatlari va qoʻllanilayotgan xarid qilish tartib-taomili yuzasidan tushuntirish berish toʻgʻrisida soʻrov olganidan keyin soʻralgan tushuntirishlarni ikki ish kuni ichida taqdim etadi.

Xarid qilish hujjatlari va xarid qilish tartib-taomili xususida tushuntirishlar xarid qilish hujjatlari va qoʻllanilayotgan xarid qilish tartib-taomili yuzasidan tushuntirish berish toʻgʻrisidagi soʻrovi bilan bir xil shaklda taqdim etiladi.

Xarid komissiyasi yoki davlat xaridlari elektron tizimining operatori ishtirokchini xarid qilish tartib-taomillarida ishtirok etishdan chetlatadi, agar:

u toʻgʻrisida Insofsiz ijrochilarning yagona reyestrida qayd mavjud boʻlsa;

unda soliqlar va yigʻimlarni toʻlash boʻyicha muddati oʻtgan qarzdorlik mavjud boʻlsa;

oʻziga nisbatan toʻlovga qobiliyatsizlik tartib-taomillari joriy etilgan boʻlsa;

ishtirokchi xarid qilish hujjatlarining malaka, texnik va tijorat talablariga javob bermasa;

ishtirokchi davlat xaridlari jarayonida davlat buyurtmachisi tomonidan biror-bir xatti-harakatning sodir etilishiga, qaror qabul qilinishiga yoki biror-bir xarid qilish tartib-taomilining qoʻllanilishiga taʼsir oʻtkazish maqsadida davlat buyurtmachisining yoki boshqa davlat organining istalgan hozirgi yoki sobiq mansabdor shaxsiga yoki xodimiga har qanday shakldagi haqni, ishga yollash toʻgʻrisidagi taklifni yoxud istalgan boshqa qimmatbaho ashyoni yoki xizmatni bevosita yoxud bilvosita taklif qilsa, bersa yoki berishga rozilik bildirsa;

ishtirokchi raqobatga qarshi harakatlarni sodir etsa yoki qonunchilikni buzgan holda manfaatlar toʻqnashuvini keltirib chiqarsa, shuningdek affillanganlik hollari aniqlansa.

Xarid komissiyasining yoki davlat xaridlari elektron tizimi operatorining ishtirokchini xarid qilish tartib-taomillarida ishtirok etishdan chetlatish toʻgʻrisidagi qarori va buning sabablari xarid qilish tartib-taomillari haqidagi hisobotga kiritiladi hamda ular haqida tegishli ishtirokchiga darhol xabar beriladi.

Davlat buyurtmachisi oʻtkazilgan xarid qilish tartib-taomillari yakunlari boʻyicha gʻolib boʻlgan taklifning aksepti toʻgʻrisida qaror qabul qiladi.

Gʻolib boʻlgan taklifning aksepti quyidagi hollarda amalga oshirilishi mumkin, agar:

davlat xaridlari bekor qilinmagan boʻlsa;

gʻolib boʻlgan taklifni yuborgan ishtirokchi chetlatilmagan boʻlsa;

xarid qilish tartib-taomillari buzilmagan boʻlsa.

Davlat buyurtmachisi gʻolib boʻlgan taklif akseptiga qadar istalgan vaqtda davlat xaridini bekor qilish huquqiga ega. Davlat xaridi bekor qilingan taqdirda davlat buyurtmachisi bunday qaror qabul qilingandan keyin uch ish kuni ichida davlat xaridlarining elektron tizimi orqali maxsus axborot portalida mazkur qarorning asoslantirilgan sabablarini eʼlon qiladi.

Davlat buyurtmachisi davlat xaridi bekor qilinganligi uchun javobgar boʻlmaydi, bundan bekor qilish davlat buyurtmachisining gʻayriqonuniy harakatlari (harakatsizligi) oqibati boʻlgan hollar mustasno.

Davlat buyurtmachilari, davlat xaridlari elektron tizimining operatori, ixtisoslashgan tashkilotlar, ekspert tashkilotlari davlat xaridlarini amalga oshirish uchun quyidagilarni nazarda tutuvchi Odob-axloq qoidalarini qabul qiladi:

manfaatlar toʻqnashuvining oldini olish chora-tadbirlari;

tegishli xodimlarning kasbiy tayyorgarligini amalga oshirish tartib-taomillari va unga doir talablar.

Odob-axloq qoidalarida davlat buyurtmachilari, davlat xaridlari elektron tizimining operatori, ixtisoslashgan tashkilotlar, ekspert tashkilotlari xodimlarining, xarid komissiyasi aʼzolarining kasbga doir va xizmatdan tashqari faoliyatida odob-axloqning yagona prinsiplari va qoidalari, kasbiy tayyorgarligiga doir talablar belgilanadi.

Davlat buyurtmachisining va davlat xaridlari elektron tizimi operatorining masʼul shaxslari, ixtisoslashgan va ekspert tashkilotlarining xodimlari, xarid komissiyasi aʼzolari, shuningdek ekspertlar tomonidan ishtirokchilar hamda ijrochilardan moddiy va nomoddiy boyliklarni olish taqiqlanadi.

Odob-axloq qoidalari davlat buyurtmachilarining yoki ularning yuqori turuvchi organlarining rasmiy veb-saytlarida eʼlon qilinishi lozim.

Davlat xaridlari jarayonida quyidagilarga yoʻl qoʻyilmaydi:

agar ishtirokchining va (yoki) ushbu ishtirokchi vakolatli vakilining yaqin qarindoshlari ijrochini tanlash boʻyicha qaror qabul qilish huquqiga ega boʻlsa, shuningdek davlat buyurtmachisining yoki u tomonidan jalb etilgan ixtisoslashgan tashkilotning vakili boʻlsa, ishtirokchining davlat xaridlarida ishtirok etishiga;

ishtirokchilarni kamsitishga, boshqa ishtirokchilarga zarar yetkazgan holda bir ishtirokchiga imtiyozlar yoki preferensiyalar taqdim etishga, bundan ushbu Qonun 16-moddasining uchinchi qismida nazarda tutilgan hollar mustasno;

manfaatlar toʻqnashuviga;

davlat xaridlarini amalga oshirishning raqobatli boʻlmagan usullarini qonunga xilof ravishda tanlashga, davlat xaridlari subyektlariga taʼsir oʻtkazishga, davlat xaridlarida ishtirokchilarning ishtirok etishi toʻgʻrisidagi axborotni oshkor etishga, ularning sonini asossiz ravishda cheklashga yoki ularning malakasiga qoʻyilgan talablarni oshirishga, raqobatga yoʻl qoʻymaslikning, uni cheklashning yoki bartaraf etishning boshqa shakllariga;

davlat xaridlari oʻtkazilishi toʻgʻrisidagi eʼlonning matniga ishtirokchilar oʻrtasida raqobatni cheklaydigan qonunga xilof talablarni kiritishga;

narxlarni yoki ishtirokchilarni saralash natijalarini buzib koʻrsatish maqsadida ishtirokchilarning oldindan til biriktirishiga;

ishonchsiz yoki buzib koʻrsatilgan axborotni taqdim etishga yoki tarqatishga, shuningdek davlat xaridlari toʻgʻrisidagi axborotdan foydalanishni asossiz ravishda cheklashga;

davlat xaridlarini amalga oshirishning raqobatga asoslangan usullarini chetlab oʻtish maqsadida davlat xaridlari hajmini qismlarga boʻlib tashlashga;

ishtirokchilarning sunʼiy tarzda pasaytirilgan narxlar boʻyicha takliflar berishiga, keyinchalik shartnomani imzolashni yoki uni tegishli tarzda bajarishni rad etishiga;

davlat xaridi tarkibiga texnologik va funksional jihatdan oʻzaro bir-biri bilan bogʻliq boʻlmagan tovarlarni (ishlarni, xizmatlarni) kiritishga;

firibgarlik, soxtalashtirish va korrupsiyaning namoyon boʻlishiga;

moliyalashtirish manbalari va miqdorlari mavjudligi toʻgʻrisida tasdiqlarga ega boʻlmagan yoki ajratilgan mablagʻlar hajmidan ortiq miqdordagi davlat xaridlarini amalga oshirishga.

Vakolatli organ davlat xaridlari elektron tizimlarining va maxsus axborot portalining axborotlar bazalari oʻrtasida axborot almashish orqali Shartnomalarning yagona reyestrini yuritadi.

Shartnomalarning yagona reyestriga quyidagi hujjatlar va axborot kiritiladi:

davlat buyurtmachisining nomi;

moliyalashtirish manbasi;

ijrochini aniqlash usuli;

xarid qilish tartib-taomilining natijalari sarhisob qilinadigan sana va shartnoma tuzish asoslarini tasdiqlovchi hujjatning rekvizitlari;

shartnoma tuzilgan sana;

tovarning (ishning, xizmatning) nomi, shartnoma bahosi va uni bajarish muddati, tovar (ish, xizmat) birligining narxi, u kelib chiqqan mamlakatning va ishlab chiqaruvchining nomi;

ijrochi soliq toʻlovchining nomi, firma nomi (agar mavjud boʻlsa), joylashgan yeri (yuridik shaxs uchun — pochta manzili), familiyasi, ismi, otasining ismi (agar mavjud boʻlsa), yashash joyi (jismoniy shaxs uchun), ijrochining soliq toʻlovchining identifikatsiya raqami yoki chet ellik shaxs uchun tegishli chet davlatning qonunchiligiga muvofiq ijrochining soliq toʻlovchining identifikatsiya raqami analogi, benefitsiar mulkdor toʻgʻrisidagi axborot, bundan tarixiy, badiiy yoki oʻzgacha madaniy qimmatga ega boʻlgan va davlat muzey, axborot-kutubxona, arxiv fondlarini, kino fondlarini, fotosuratlar fondlarini va shunga oʻxshash fondlarni toʻldirish uchun moʻljallangan madaniy qimmatliklarni, shu jumladan muzey ashyolarini va muzey kolleksiyalarini, shuningdek noyob va qimmatbaho nashrlarni, qoʻlyozmalarni, arxiv hujjatlarini (shu jumladan ularning koʻchirma nusxalarini) yetkazib beruvchi boʻlgan jismoniy shaxs toʻgʻrisidagi axborot mustasno;

shartnomaning oʻzgartirilgan shartlari koʻrsatilgan holda shartnomani oʻzgartirish toʻgʻrisidagi axborot;

shartnomani ijro etish toʻgʻrisidagi axborot, shu jumladan shartnoma uchun haq toʻlash, shartnomada nazarda tutilgan majburiyatlarni tegishli tarzda bajarmaganlik munosabati bilan moliyaviy sanksiyalar (jarimalar, penyalar) hisoblanishi toʻgʻrisidagi axborot;

bekor qilish sabablari va asoslari koʻrsatilgan holda shartnomani bekor qilish toʻgʻrisidagi axborot.

Shartnomalarning yagona reyestridagi axborot toʻlov undirilmagan holda tanishib chiqish uchun ochiqdir.

Shartnomalarning yagona reyestrini yuritish tartibi vakolatli organ tomonidan belgilanadi.

Qaysi shartnomalar toʻgʻrisidagi axborot Shartnomalarning yagona reyestriga kiritilmagan boʻlsa, oʻsha shartnomalar boʻyicha toʻlovlar amalga oshirilmaydi.

Insofsiz ijrochilarning yagona reyestri vakolatli organ tomonidan shakllantiriladigan roʻyxatdan iborat boʻlib, unga quyidagi maʼlumotlar kiritiladi:

xarid qilish tartib-taomillari yakunlari boʻyicha belgilangan shartlar asosida davlat buyurtmachisi bilan shartnoma tuzishni va davlat xaridlarini amalga oshirishni rad etgan yoki boshqacha usulda boʻyin tovlagan xarid qilish tartib-taomillari gʻoliblari toʻgʻrisidagi;

majburiyatlarni bajarmaganlikda yoxud tegishli tarzda bajarmaganlikda belgilangan tartibda aybdor deb topilgan ijrochilar haqidagi, bundan majburiyatlar bartaraf etib boʻlmaydigan kuchlar oqibatida bajarilmagan yoki tegishli tarzda bajarilmagan hollar mustasno;

davlat xaridlari jarayonida yolgʻon yoki soxta hujjatlarni taqdim etgan, ayni bitta lotda ishtirok etgan affillangan shaxslar yoki manfaatlar toʻqnashuvi toʻgʻrisida maʼlumotlarni ochib bermagan ishtirokchilar toʻgʻrisidagi;

sudning qaroriga koʻra firibgarlik, soxtalashtirish va korrupsiya bilan bogʻliq jinoyatlarni sodir etganlikda aybdor deb topilgan ijrochilar toʻgʻrisidagi.

Insofsiz ijrochilarning yagona reyestriga kiritilgan ijrochining ikki yil davomida davlat xaridlarida ishtirok etishi mumkin emas, bu muddat tugaganidan keyin ijrochi Insofsiz ijrochilarning yagona reyestridan chiqarilgan hisoblanadi.

Ijrochilar Insofsiz ijrochilarning yagona reyestriga kiritish toʻgʻrisidagi qaror ustidan sud tartibida shikoyat qilishga haqli.

Insofsiz ijrochilarning yagona reyestrini shakllantirish tartibi vakolatli organ tomonidan tasdiqlanadi.

Elektron doʻkonda:

bir shartnoma boʻyicha bazaviy hisoblash miqdorining yigirma besh ming baravarigacha (budjet buyurtmachilari uchun bazaviy hisoblash miqdorining ikki ming besh yuz baravarigacha) qiymatdagi tovarlarning;

bir shartnoma boʻyicha bazaviy hisoblash miqdorining yuz baravarigacha (budjet buyurtmachilari uchun bazaviy hisoblash miqdorining ellik baravarigacha) qiymatdagi ishlarning, xizmatlarning davlat xaridlari amalga oshirilishi mumkin.

Elektron doʻkon orqali budjet buyurtmachisi tomonidan ayni bir turdagi tovarlarning davlat xaridi bir moliya yili davomida bazaviy hisoblash miqdorining oʻn ming baravarigacha amalga oshirilishi mumkin.

Elektron doʻkon orqali budjet buyurtmachisi tomonidan ayni bir turdagi ishlarning, xizmatlarning davlat xaridi bir moliya yili davomida bazaviy hisoblash miqdorining besh yuz baravarigacha (korporativ buyurtmachilar uchun bazaviy hisoblash miqdorining bir ming baravarigacha) amalga oshirilishi mumkin.

Elektron doʻkon ishtirokchilarning takliflaridan shakllantiriladi. Ishtirokchining elektron doʻkonda qoʻyilgan taklifi davlat buyurtmachilariga yuborilgan ommaviy ofertadir.

Ishtirokchi tomonidan elektron doʻkonda joylashtirilgan taklifda quyidagilar koʻrsatiladi:

taklif etilayotgan tovarlarning (ishlarning, xizmatlarning) nomi;

sotish narxi;

tovarning eng koʻp va eng kam toʻpi;

tovarning rusumi va texnik parametrlari (standartlashtirish boʻyicha normativ hujjat, texnik pasport);

tovarning fotosurati;

tovar yetkazib beriladigan (ish bajariladigan, xizmat koʻrsatiladigan) hudud;

tovarni ishlab chiqaruvchi va u kelib chiqqan mamlakat toʻgʻrisidagi axborot;

kafolat shartlari va muddati toʻgʻrisidagi axborot;

tovar ishlab chiqarilgan yil (oziq-ovqatlar va tez buziladigan tovarlarning ishlab chiqarilgan kuni, oyi, yili);

tovarning yaroqlilik muddati (kun, oy, yil);

ishni bajarish, xizmatni koʻrsatish muddati;

tovarni (ishni, xizmatni) majburiy sertifikatlashtirish talab etiladigan hollarda muvofiqlik sertifikati toʻgʻrisidagi axborot, shuningdek sanitariya-epidemiologik, veterinariya, veterinariya-sanitariya, fitosanitariya xulosalari yoki ekologik ekspertiza haqidagi axborot;

qonunchilikka binoan litsenziyalashning yoki ruxsat etish xususiyatiga ega boshqa hujjat olishning yoxud faoliyatni boshlagani haqidagi xabarnomani yuborishning majburiy talabi mavjud boʻlgan hollarda litsenziya yoki ruxsat etish xususiyatiga ega boshqa hujjat yoxud faoliyatni boshlagani haqidagi xabarnoma mavjudligi toʻgʻrisidagi axborot.

Ishtirokchining ofertasi u elektron doʻkonda joylashtirilgan paytdan eʼtiboran oʻn besh ish kuni mobaynida amal qiladi. Ushbu muddat tugaganidan keyin ishtirokchi uni yana oʻn besh ish kuniga aktivlashtirishga haqli.

Oferta davlat buyurtmachisi tomonidan akseptlangunga qadar ishtirokchi ofertani har qanday muddatda chaqirib olishga yoki unga oʻzgartirish va qoʻshimchalar kiritishga haqli.

Davlat buyurtmachisi elektron doʻkonda ishtirokchilarning ofertalarini oʻrganish yoʻli bilan oʻzi uchun zarur boʻlgan tovarni (ishni, xizmatni) tanlaydi va tovar (ish, xizmat) tanlanganidan keyin narxlar soʻrovi mexanizmidan foydalanadi.

Davlat xaridlarining elektron tizimi avtomatik rejimda, narxlar soʻrovi mexanizmini amalga oshirgan holda tanlab olingan ofertani taklif qilgan ishtirokchiga, shuningdek elektron doʻkonda oʻxshash tovarlarni (ishlarni, xizmatlarni) taklif etayotgan barcha ishtirokchilarga xarid qilish tartib-taomilida ishtirok etish toʻgʻrisida takliflar yuborilishini taʼminlaydi.

Ishtirokchilar narxlar soʻrovida ishtirok etish toʻgʻrisidagi taklif davlat xaridlarining elektron tizimi tomonidan yuborilgan paytdan eʼtiboran ikki ish kuni ichida oʻz takliflarini berishga haqli.

Ishtirokchilarga yuborilayotgan narxlar soʻrovida ishtirok etish toʻgʻrisidagi taklif davlat buyurtmachisi tomonidan tanlangan ishtirokchining ofertasiga doir havolani oʻz ichiga oladi.

Xarid qilish tartib-taomilida ishtirok etish taklifini olgan ishtirokchi davlat buyurtmachisi tomonidan tanlangan oferta narxidan pastroq narx boʻyicha taklif kiritishga haqli.

Ishtirokchilar tomonidan berilgan narx boʻyicha takliflarni taqqoslash davlat xaridlarining elektron tizimi tomonidan avtomatik rejimda amalga oshiriladi.

Davlat xaridlarining elektron tizimi davlat buyurtmachisi va eng past narxni taklif qilgan ijrochi oʻrtasida tuzilgan bitimni roʻyxatdan oʻtkazadi.

Ishtirokchilar toʻgʻrisidagi maʼlumotlardan davlat buyurtmachisi yoki ishtirokchilar yakunlar sarhisob qilinadigan paytga qadar foydalana olmaydi. Ijrochining nomi gʻolib aniqlangan paytda davlat xaridlarining elektron tizimida aks ettiriladi.

Davlat xaridlarining elektron tizimi shartnomani davlat buyurtmachisi tomonidan tanlangan ishtirokchining ofertasida bayon etilgan shartlarga muvofiq hamda ishtirokchilar tomonidan taklif etilgan eng past narxda shakllantiradi.

Xarid qilish tartib-taomillarining yakuniga koʻra faqat tanlab olingan ofertani taklif qilgan ishtirokchigina ishtirok etgan hollarda davlat xaridlarining elektron tizimi davlat buyurtmachisiga elektron shaklda savdolashish imkonini beruvchi soʻrovni yuboradi. Bunda davlat buyurtmachisida tanlab olingan ofertani taklif qilgan ishtirokchiga u taklif qilgan narxdan pastroq asoslangan narx soʻrovini yuborish imkoniyati paydo boʻladi. Tanlab olingan ofertani taklif qilgan ishtirokchi bunday soʻrovni bir ish kuni ichida qabul qilishi yoki rad etishi mumkin.

Tanlab olingan ofertani taklif qilgan ishtirokchi narx soʻrovini qabul qilganda davlat xaridlarining elektron tizimi davlat buyurtmachisi va ijrochi oʻrtasidagi bitimni davlat buyurtmachisi tomonidan yuborilgan soʻrov narxi asosida roʻyxatdan oʻtkazadi.

Agar tanlab olingan ofertani taklif qilgan ishtirokchi narx soʻrovini qabul qilmasa yoki rad etsa, davlat buyurtmachisi oʻz xohishiga koʻra mazkur ishtirokchi bilan shartnomani rasmiylashtirishi yoki ushbu Qonun talablariga muvofiq kichik qiymatli xaridning soddalashtirilgan tartib-taomili yoki boshlangʻich narxni pasaytirish uchun oʻtkaziladigan auksion yoxud eng yaxshi takliflarni tanlash orqali xaridni amalga oshirishi mumkin. Bunda javobgarlik davlat buyurtmachisining zimmasiga yuklatiladi.

Agar xarid qilish tartib-taomillari tugaganidan keyin bir ish kuni ichida davlat buyurtmachisi tomonidan narx soʻrovi yuborilmasa, davlat xaridlarining elektron tizimi davlat buyurtmachisi va ijrochi oʻrtasidagi bitimni roʻyxatdan oʻtkazadi.

Davlat buyurtmachisi tomonidan narxlarni oʻrganish davlat xaridlarining elektron tizimi yoki boshqa ochiq manbalarning maʼlumotlaridan foydalanish orqali amalga oshirilishi mumkin.

Savdolar yakunlariga koʻra shartnoma majburiyatlarini bajarish xarid qilish tartib-taomili ishtirokchisi tomonidan rad etilgan taqdirda davlat xaridlarining elektron tizimi gʻolibdan keyingi eng past narxni taklif etgan boshqa ishtirokchini gʻolib deb belgilaydi, bunda mazkur ishtirokchiga gʻolib tomonidan taklif etilgan narx asosida shartnoma tuzish taklif qilinadi.

Agar gʻolibdan keyingi eng past narxni taklif qilgan ishtirokchi shartnoma tuzishni rad etsa, davlat buyurtmachisi xaridni ushbu Qonun talablariga muvofiq kichik qiymatli xaridning soddalashtirilgan tartib-taomili (ushbu Qonunning 51¹-moddasida belgilangan mezonlar doirasida) yoki boshlangʻich narxni pasaytirish uchun oʻtkaziladigan auksion yoxud eng yaxshi takliflarni tanlash orqali amalga oshirishi mumkin.

Summasi bir shartnoma boʻyicha bazaviy hisoblash miqdorining ellik baravari miqdoridan oshmaydigan (budjet buyurtmachilari uchun bazaviy hisoblash miqdorining yigirma besh baravari miqdoridan oshmaydigan) davlat xaridlari xarid komissiyasining ishtirokisiz oʻtkazilishi mumkin, biroq bir moliya yilida bir korporativ buyurtmachi uchun bazaviy hisoblash miqdorining bir ming baravari miqdoridan oshmasligi va bir moliya yilida bir budjet buyurtmachisi uchun bazaviy hisoblash miqdorining besh yuz baravari miqdoridan oshmasligi kerak.

Bunda gʻolib davlat xaridlari oʻtkazilishi toʻgʻrisidagi eʼlon joylashtirilmagan holda, ochiq axborot manbalaridan olingan narxlarni solishtirish yoʻli bilan yoki tovarlarning (ishlarning, xizmatlarning) kamida uchta potensial yetkazib beruvchilaridan narxlarni soʻrash yoʻli bilan davlat buyurtmachisi tomonidan aniqlanadi.

Davlat buyurtmachisi kichik qiymatli xaridning soddalashtirilgan tartib-taomilini amalga oshirish asoslarini, shuningdek tuzilgan shartnomalar va ularga doir qoʻshimcha kelishuvlar toʻgʻrisidagi axborotni ular tuzilgan kundan eʼtiboran besh ish kunidan kechiktirmay maxsus axborot portaliga joylashtiradi.

Kichik qiymatli xaridning soddalashtirilgan tartib-taomilini amalga oshirish natijalari boʻyicha shartnoma davlat buyurtmachisi tomonidan tanlangan ishtirokchining taklifida koʻrsatilgan shartlar asosida hamda ishtirokchilar tomonidan taklif etilgan eng past narx boʻyicha tuziladi.

Boshlangʻich narxni pasaytirish uchun oʻtkaziladigan auksion (bundan buyon matnda auksion deb yuritiladi) vositasidagi davlat xaridi quyidagi shartlar bir vaqtning oʻzida bajarilgan taqdirda amalga oshiriladi:

tovarning standart xususiyatlarga ega boʻlishi;

tovarning texnik, ekspluatatsiya qilinish xususiyatlarini va boshqa xususiyatlarini baholash hamda taqqoslash zarurati mavjud emasligi;

tovarning qiymati bir shartnoma boʻyicha bazaviy hisoblash miqdorining yigirma besh ming baravarigacha (budjet buyurtmachilari uchun olti ming baravarigacha) boʻlgan miqdorini tashkil etishi kerak.

Xizmatlar va ishlarning davlat xaridi auksion obyekti boʻla olmaydi.

Tovarni eʼlonda bayon etilgan shartlar asosida eng past narx boʻyicha yetkazib berishni taklif qilgan ishtirokchi auksion gʻolibi boʻladi. Bunda mazkur norma belgilangan sifat standartlariga muvofiq boʻlgan tovarlarni yetkazib berish talabini bekor qilmaydi.

Auksion faqat elektron shaklda oʻtkaziladi.

Auksionda ishtirok etish uchun davlat buyurtmachisi maxsus axborot portali orqali davlat xaridlarining elektron tizimiga eʼlon joylashtiradi.

Auksion oʻtkazilishi toʻgʻrisidagi eʼlon u amalga oshirilishidan kamida besh ish kuni avval joylashtirilishi kerak.

Auksion oʻtkazilishi toʻgʻrisidagi eʼlonda quyidagi maʼlumotlar boʻlishi kerak:

davlat buyurtmachisining nomi va manzili;

auksionning birinchi va oxirgi kuni (auksion oʻtkaziladigan davr);

auksion predmetining boshlangʻich narxi;

auksion predmeti va uning xususiyati (auksion predmetining tasnifi);

tovarning miqdori;

tovarlarni yetkazib berish muddatlari va shartlari;

tovarlar yetkazib beriladigan joy (manzil);

tovarning amaldagi standart talabiga muvofiqligini tasdiqlovchi hujjat mavjudligi haqidagi talab;

tovar majburiy sertifikatlashtirilishi talab etiladigan hollarda, muvofiqlik sertifikati va sanitariya-epidemiologik xulosa mavjudligi toʻgʻrisidagi talab;

zarur boʻlganda, litsenziya, ruxsat etish xususiyatiga ega boshqa hujjat yoxud faoliyatni boshlagani haqidagi xabarnoma mavjudligi toʻgʻrisidagi talab;

tovarning oʻziga xos xususiy parametrlarini ifodalovchi shartlar.

Auksion oʻtkazilishi toʻgʻrisidagi eʼlonning va davlat buyurtmachisi buyurtmanomasining matniga auksion predmetiga taalluqli boʻlmagan va ishtirokchilar oʻrtasida raqobatni cheklaydigan talablarni kiritish taqiqlanadi.

Maxsus axborot portali orqali davlat xaridlarining elektron tizimiga joylashtirilgan auksion oʻtkazilishi toʻgʻrisidagi eʼlon avtomatik ravishda davlat buyurtmachisining buyurtmanomasi etib oʻzgartiriladi.

Auksion davlat xaridlarining elektron tizimida boshlangʻich narxni qadam-baqadam pasaytirish yoʻli bilan oʻtkaziladi.

Auksionni oʻtkazish, kiritilgan taʼminot summasiga muvofiq har bir lot boʻyicha auksiondan foydalanish, auksion gʻoliblarini aniqlash, bitimni roʻyxatdan oʻtkazish va shartnomani shakllantirish davlat xaridlarining elektron tizimi tomonidan avtomatik rejimda amalga oshiriladi.

Auksionni oʻtkazish chogʻida ishtirokchilar auksion boshlangan paytdan eʼtiboran va u tamom boʻladigan paytga qadar butun muddat ichida narx boʻyicha takliflarni cheklanmagan miqdorda berishga haqli.

Ishtirokchilarning nomi va ular bilan bogʻlanishga doir maʼlumotlar auksion gʻolibi aniqlanadigan paytga qadar davlat xaridlarining elektron tizimida aks ettirilmaydi.

Auksion tugaydigan vaqt kelganda davlat xaridlarining elektron tizimi auksion oʻtkazilgan vaqt davomida berilgan takliflar orasida eng past narxni taklif qilgan taklifni avtomatik ravishda aniqlab oladi. Eng past narx koʻrsatilgan taklifni bergan ishtirokchi auksion gʻolibi sifatida davlat xaridlarining elektron tizimi tomonidan saralab olinadi. Ijrochining nomi davlat xaridlarining elektron tizimida aks ettirilib, ushbu tizim tuzilgan bitimni avtomatik ravishda qayd etadi va davlat buyurtmachisining buyurtmanomasida bayon etilgan shartlarga muvofiq shartnomani shakllantiradi.

Auksion yakunlariga koʻra, shartnoma majburiyatlarini bajarish xarid qilish tartib-taomilining ishtirokchisi tomonidan rad etilgan taqdirda, davlat xaridlarining elektron tizimi gʻolibdan keyingi eng past narxni taklif qilgan ishtirokchini gʻolib deb belgilaydi, bunda mazkur ishtirokchiga gʻolib tomonidan taklif etilgan narx asosida shartnoma tuzish taklif qilinadi.

Agar gʻolibdan keyingi eng past narxni taklif qilgan ishtirokchi shartnoma tuzishni rad etsa, davlat buyurtmachisi xaridni ushbu Qonun talablariga muvofiq elektron doʻkon vositasida (ushbu Qonunning 49-moddasida belgilangan mezonlar doirasida) yoki kichik qiymatli xaridning soddalashtirilgan tartib-taomili (ushbu Qonunning 51¹-moddasida belgilangan mezonlar doirasida) yoxud eng yaxshi takliflarni tanlash orqali amalga oshirishi mumkin.

Agar auksionda bir nafar ishtirokchi ishtirok etgan boʻlsa yoki hech kim ishtirok etmagan boʻlsa, auksion oʻtkazilmagan deb hisoblanadi va gʻolib aniqlanmaydi. Davlat buyurtmachisi auksionni uch ish kuniga uzaytirishi yoki xaridni ushbu Qonun talablariga muvofiq elektron doʻkon vositasida (ushbu Qonunning 49-moddasida belgilangan mezonlar doirasida) yoki kichik qiymatli xaridning soddalashtirilgan tartib-taomili (ushbu Qonunning 51¹-moddasida belgilangan mezonlar doirasida) yoxud eng yaxshi takliflarni tanlash orqali amalga oshirishi mumkin.

Auksionni uzaytirish avvalgi auksion tamom boʻlgan paytdan eʼtiboran uch ish kuni ichida davlat buyurtmachisi tomonidan amalga oshiriladi.

Eng yaxshi takliflarni tanlash (bundan buyon matnda tanlash deb yuritiladi) vositasidagi davlat xaridi quyidagi shartlar bir vaqtning oʻzida bajarilgan taqdirda amalga oshiriladi:

gʻolibni aniqlash mezonlari tovar (ish, xizmat) davlat xaridining nafaqat pul ifodasiga, balki miqdoriy va sifat bahosiga ham ega boʻladi;

tovarning (ishning, xizmatning) qiymati bir shartnoma boʻyicha bazaviy hisoblash miqdorining yigirma besh ming baravarigacha (budjet buyurtmachilari uchun olti ming baravarigacha) boʻlgan miqdorni tashkil etadi.

Agar Oʻzbekiston Respublikasi Prezidentining farmonlari va qarorlari, Oʻzbekiston Respublikasi Vazirlar Mahkamasining qarorlari bilan davlat buyurtmachilariga tender oʻtkazmasdan xaridlarni amalga oshirish huquqi berilsa, xarid qilish tartib-taomili davlat xaridining summasidan qatʼi nazar tanlash orqali amalga oshiriladi. Bunda tovarlarning (ishlarning, xizmatlarning) qiymati bazaviy hisoblash miqdorining yigirma besh ming (budjet buyurtmachilari uchun olti ming) baravari miqdoridan oshgan hollarda davlat xaridiga doir texnik topshiriqlar qonunchilikda belgilangan tartibda ekspertiza uchun Oʻzbekiston Respublikasi Iqtisodiyot va moliya vazirligi huzuridagi “Loyihalar va import kontraktlarini kompleks ekspertiza qilish markazi” davlat unitar korxonasiga (bundan buyon matnda Kompleks ekspertiza qilish markazi deb yuritiladi) kiritiladi.

Tanlash majburiy tartibda elektron shaklda oʻtkaziladi, bundan qonunchilikda nazarda tutilgan hollar mustasno.

Davlat xaridini tanlash orqali amalga oshirish uchun davlat buyurtmachisining xodimlari orasidan kamida besh nafar aʼzodan iborat tarkibda xarid komissiyasi tuziladi.

Tanlashni oʻtkazishda xarid komissiyasi aʼzolarining kamida uchdan ikki qismi hozir boʻlishi lozim, har bir majlis va qabul qilingan qaror bayonnomalar bilan rasmiylashtirilishi kerak.

Tanlash vositasidagi davlat xaridi toʻgʻrisidagi axborot davlat buyurtmachisi tomonidan cheklanmagan miqdordagi shaxslarga maxsus axborot portali orqali davlat xaridlarining elektron tizimiga, shuningdek davlat buyurtmachisining xohishiga koʻra — uning rasmiy veb-saytiga yoki uning yuqori turuvchi organining rasmiy veb-saytiga, shuningdek ommaviy axborot vositalarida tanlash oʻtkazish toʻgʻrisidagi eʼlonni va tanlash boʻyicha xarid qilish hujjatlarini joylashtirish yoʻli bilan maʼlum qilinadi.

Agar Oʻzbekiston Respublikasi Prezidentining farmonlari va qarorlari, Oʻzbekiston Respublikasi Vazirlar Mahkamasining qarorlari bilan davlat buyurtmachilariga tender oʻtkazmasdan xaridlarni amalga oshirish huquqi beriladigan boʻlsa, tanlash oʻtkazish toʻgʻrisidagi eʼlon faqat davlat xaridiga doir texnik topshiriq boʻyicha Kompleks ekspertiza qilish markazining ijobiy xulosasi olinganidan keyin joylashtiriladi.

Tanlash oʻtkazilishi toʻgʻrisidagi eʼlon va tanlash boʻyicha xarid qilish hujjatlari davlat buyurtmachisi tomonidan takliflarni qabul qilish muddati tugaydigan sanadan kamida besh ish kuni oldin maxsus axborot portali orqali davlat xaridlarining elektron tizimiga, shuningdek davlat buyurtmachisining xohishiga koʻra — oʻzining rasmiy veb-saytiga yoki oʻzining yuqori turuvchi organining rasmiy veb-saytiga, shuningdek ommaviy axborot vositalarida joylashtiriladi.

Xarid qilinayotgan tovarning (ishning, xizmatning) oʻziga xos xossalaridan yoki xususiyatlaridan kelib chiqib, davlat buyurtmachisi tanlash oʻtkazilishi toʻgʻrisidagi eʼlonni ushbu moddaning uchinchi qismida belgilanganiga nisbatan uzoqroq muddatga joylashtirishga haqli.

Tanlash oʻtkazilishi toʻgʻrisidagi eʼlon quyidagi axborotlarni oʻz ichiga olishi kerak:

tanlashni oʻtkazish shakli;

tovarning (ishning, xizmatning) batafsil tavsifi va boshlangʻich narxi;

tanlash oʻtkaziladigan joyning manzili;

ishtirokchilarga qoʻyiladigan talablar;

davlat buyurtmachisining ishtirokchilar bilan bogʻlanish uchun aloqa bogʻlovchi shaxslar sifatida belgilangan bir yoki bir nechta mansabdor shaxslarining yoki boshqa xodimlarining familiyasi, ismi, sharifi, lavozimi va manzili;

ishtirokchilar tomonidan takliflar berish muddati tugaydigan sana va vaqt;

taklifni rasmiylashtirishga doir talablar.

Tanlash oʻtkazish toʻgʻrisidagi eʼlon va (yoki) tanlashda ishtirok etish uchun taklif qonunchilikka zid boʻlmagan boshqa axborotlarni ham oʻz ichiga olishi mumkin.

Tanlash boʻyicha xarid qilish hujjatlari maxsus axborot portali orqali davlat xaridlarining elektron tizimiga tanlash oʻtkazilishi toʻgʻrisidagi eʼlonni joylashtirish bilan bir vaqtda davlat buyurtmachisi tomonidan joylashtiriladi.

Tanlash boʻyicha xarid qilish hujjatlari quyidagilarni oʻz ichiga oladi:

tanlash oʻtkazilishi toʻgʻrisidagi eʼlonda koʻrsatilgan axborot;

ijrochilar bilan hisob-kitoblarni shakllantirish uchun foydalaniladigan valyuta, toʻlov tartibi va yetkazib berish shartlari haqidagi axborot;

tanlashda ishtirok etish uchun taklifni davlat tilida va, zaruriyatga qarab, boshqa tillarda tayyorlash majburiyligi toʻgʻrisidagi talab;

ishtirokchilarga tanlash boʻyicha xarid qilish hujjatlari qoidalariga doir tushuntirishlarni taqdim etish tartibi, taqdim etish muddati boshlanadigan va tugaydigan sana;

texnik topshiriq;

ushbu Qonunga muvofiq takliflarni baholash mezonlari va koʻrib chiqish tartibi;

tanlash ishtirokchilari tomonidan korrupsiya koʻrinishlariga yoʻl qoʻymaslik boʻyicha ariza taqdim etish majburiyligi haqidagi talab.

Tanlash boʻyicha xarid qilish hujjatlarida davlat buyurtmachisi har bir tovar (ish, xizmat) xarid qilish tartib-taomilining alohida birligi sifatida koʻrib chiqilishini eʼlon qilishi mumkin. Bunday holda davlat buyurtmachisi turli tovarlarni (ishlarni, xizmatlarni) yetkazib berish uchun tanlashning bir nechta ishtirokchisi bilan shartnomalar tuzishi mumkin, bunda har bir tovar (ish, xizmat) uchun faqat bitta gʻolib aniqlanishi mumkin. Har bir tovar (ish, xizmat) uchun gʻolib xarid qilish tartib-taomilining shartlariga koʻra alohida-alohida aniqlanadi.

Tanlash boʻyicha xarid qilish hujjatlariga ularning ajralmas qismi boʻlgan shartnoma loyihasi ilova qilinadi.

Davlat buyurtmachisi xarid komissiyasi bilan kelishilgan tanlash boʻyicha xarid qilish hujjatlarini tasdiqlaydi.

Davlat buyurtmachisi xarid komissiyasi bilan kelishilgan holda tanlashda ishtirok etish uchun takliflar berish muddati tugaydigan sanadan bir ish kunidan kechiktirmay tanlash boʻyicha xarid qilish hujjatlariga oʻzgartirishlar kiritish toʻgʻrisida qaror qabul qilishga haqli. Bunda ushbu tanlashda takliflarni taqdim etishning tugash muddati kamida uch ish kuniga uzaytiriladi. Shu bilan birga, eʼlonda koʻrsatilgan axborot oʻzgartirilgan boʻlsa, tanlash oʻtkazish toʻgʻrisidagi eʼlonga oʻzgartirishlar kiritiladi. Tovarlarni (ishlarni, xizmatlarni) oʻzgartirishga yoʻl qoʻyilmaydi.

Tanlash ishtirokchilarining takliflari eʼlonda va tanlash boʻyicha xarid qilish hujjatlarida belgilangan tartibda ularning davlat xaridlari elektron tizimidagi shaxsiy kabinetlari orqali, eʼlonda koʻrsatilgan muddatdan kechiktirmay elektron shaklda taqdim etiladi.

Elektron shaklda tanlash oʻtkazish chogʻida tanlash ishtirokchilarining takliflarini berish tartibi Oʻzbekiston Respublikasi Vazirlar Mahkamasi tomonidan belgilanadi.

Taklifda davlat xaridi obyekti boʻlgan tovar eskizining, rasmining, chizmasining, fotosuratining va boshqa materiallarning elektron shakli boʻlishi mumkin.

Tanlash ishtirokchisi taqdim etilayotgan axborot va hujjatlarning haqiqiyligi va toʻgʻriligi uchun javobgar boʻladi.

Tanlash ishtirokchisi faqat bitta taklif berishga haqli.

Tanlash uchun takliflarni qabul qilish maxsus axborot portali orqali davlat xaridlarining elektron tizimida chop etilgan eʼlonda koʻrsatilgan muddat kelishi bilan tugatiladi.

Agar tanlashda ishtirok etish uchun takliflarni taqdim etish muddati tugagan paytda faqat bitta taklif taqdim etilgan yoki birorta ham taklif taqdim etilmagan boʻlsa, tanlash oʻtkazilmagan deb hisoblanadi. Bunda davlat buyurtmachisi ushbu Qonun talablariga muvofiq yangi tanlash oʻtkazishi yoxud elektron doʻkon (ushbu Qonunning 49-moddasida belgilangan mezonlar doirasida) yoki kichik qiymatli xaridning soddalashtirilgan tartib-taomili (ushbu Qonunning 51₁-moddasida belgilangan mezonlar doirasida) yoxud auksion orqali xaridni amalga oshirishi mumkin.

Eʼlonda tanlash oʻtkaziladigan vaqt sifatida koʻrsatilgan vaqtda davlat xaridlarining elektron tizimi avtomatik ravishda ishtirokchilar tomonidan joylashtirilgan va ularning tanlash takliflarini tashkil etadigan elektron hujjatlarni koʻrish imkoniyatini beradi. Davlat xaridlarining elektron tizimi ishtirokchi taklif etgan narxning boshlangʻich narxga muvofiqligini va elektron maydonlarning toʻldirilganligini tekshiradi. Agar ishtirokchi tomonidan taklif etilgan narx boshlangʻich narxdan yuqori boʻlsa, shuningdek biriktirilishi zarur boʻlgan hujjatlarni toʻldirish va joylashtirish uchun majburiy boʻlgan boʻsh maydonlar mavjud boʻlsa, davlat xaridlarining elektron tizimi aniq sababni koʻrsatgan holda, ishtirokchining taklifini rad etadi. Biriktirilgan hujjatlardagi maʼlumotlarning tanlash ishtirokchisining taklifida koʻrsatilgan maʼlumotlarga muvofiqligini tekshirish xarid komissiyasining masʼul kotibi tomonidan amalga oshiriladi.

Agar xarid komissiyasi tomonidan ishtirokchilardan tanlash boʻyicha xarid qilish hujjatlarida koʻrsatilgan talablarga javob beradigan kamida ikkita taklif olingan boʻlsa, tanlash oʻtkazilgan deb hisoblanadi.

Ishtirokchilarning barcha takliflari tanlash boʻyicha xarid qilish hujjatlarida koʻrsatilgan mezonlar asosida baholanadi va tanlash oʻtkazish bayonnomasida qayd etiladi.

Tanlash ishtirokchilarining takliflarini koʻrib chiqish va baholash muddati takliflar berish tugagan paytdan eʼtiboran oʻn ish kunidan oshishi mumkin emas.

Ishtirokchilarning takliflarini baholash ikki bosqichda amalga oshirilishi mumkin.

Takliflarni taqqoslash natijalariga koʻra xarid komissiyasi tanlash gʻolibini aniqlaydi va tanlash oʻtkazish natijalarini bayonnomada aks ettiradi.

Xarid komissiyasining qarori bilan tanlash boʻyicha xarid qilish hujjatlarida va taklifda koʻrsatilgan mezonlarga muvofiq gʻolibning taklifidan keyingi eng maqbul taklifni taqdim etgan ishtirokchi sifatida eʼtirof etilgan zaxiradagi gʻolib aniqlanishi mumkin.

Bayonnoma davlat buyurtmachisi tomonidan u rasmiylashtirilgan kunda davlat xaridlarining elektron tizimiga muhokama qilish uchun ikki ish kuniga joylashtirilishi kerak.

Agar ikki ish kuni ichida tanlash ishtirokchilari tomonidan tanlash oʻtkazish natijalari boʻyicha eʼtirozlar kelib tushmagan boʻlsa, davlat buyurtmachisi va xarid komissiyasi tomonidan gʻolib deb topilgan ishtirokchi oʻrtasida shartnoma tuziladi.

Muhokama uchun belgilangan muddat tugaganidan keyin kelib tushgan eʼtirozlar xarid komissiyasi tomonidan koʻrib chiqilmaydi.

Tanlash ishtirokchilari tomonidan tanlash oʻtkazish natijalari boʻyicha eʼtirozlar kelib tushganda, xarid komissiyasi eʼtirozlarni koʻrib chiqadi va tegishli qaror qabul qiladi.

Davlat buyurtmachisi tomonidan xarid komissiyasiga taqdim etilgan muhokama natijalari toʻgʻrisidagi axborot asosida xarid komissiyasining tegishli majlisi bayonnomasi rasmiylashtiriladi va imzolangan kundan boshlab uch ish kuni ichida davlat xaridlarining elektron tizimiga joylashtiriladi.

Tanlash natijalari boʻyicha tuzilgan shartnoma toʻgʻrisidagi axborot davlat buyurtmachisi tomonidan maxsus axborot portaliga u tuzilgan kundan boshlab besh ish kunidan kechiktirmay joylashtiriladi.

Malakali ishtirokchilar oʻrtasidagi tanlash ushbu Qonunning 37-moddasiga muvofiq dastlabki malaka tanlovidan oʻtgan ishtirokchilar oʻrtasida oʻtkazilishi mumkin.

Davlat buyurtmachisi dastlabki malaka tanlovidan oʻtgan barcha ishtirokchilarni tanlashda ishtirok etishga taklif qiladi yoxud xarid qilinayotgan tovar (ish, xizmat) xususiyatlarining murakkabligidan, ishtirokchilarning oʻz vaqtida sifatli mahsulot ishlab chiqarish, ishlarni bajarish va xizmatlar koʻrsatish borasidagi salohiyati hamda ish tajribasidan kelib chiqqan holda, ularning orasidan ishtirokchilarning cheklangan sonini hamda malakali ishtirokchilar roʻyxatini belgilashi mumkin.

Ishtirokchilarning cheklangan sonini va malakali ishtirokchilar roʻyxatini belgilashda davlat buyurtmachisi ishtirokchilarning saviyasini xolisona va davlat xaridlarining asosiy prinsiplariga muvofiq aniqlaydi hamda ularga tanlashda ishtirok etish toʻgʻrisidagi takliflarni yuboradi.

Tanlash natijalariga doir shartnoma tanlash boʻyicha xarid qilish hujjatlarida va oʻzi bilan shartnoma tuzilayotgan tanlash ishtirokchisi tomonidan taqdim etilgan taklifda nazarda tutilgan shartlar asosida davlat xaridlarining elektron tizimi tomonidan avtomatik tarzda shakllantiriladi.

Davlat buyurtmachisi tomonidan tanlash boʻyicha xarid qilish hujjatlarida gʻolib shartnomaning shartlari bajarilishi taʼminotini taqdim etganidan keyin shartnoma tuzilishini nazarda tutuvchi shart qoʻyilishi mumkin.

Gʻolib shartnoma tuzishni rad etgan taqdirda unga zakalat summasi qaytarib berilmaydi. Agar xarid komissiyasi tomonidan zaxiradagi gʻolib aniqlangan boʻlsa, shartnoma tuzish va unga doir majburiyatlarni bajarish huquqi zaxiradagi gʻolibga oʻtadi. Bunda zaxiradagi gʻolib gʻolib tomonidan taklif etilgan narx boʻyicha (bundan zaxiradagi gʻolib taklif etgan narx gʻolib tomonidan taklif etilgan narxdan past boʻlgan hollar mustasno) shartnoma tuzadi yoki shartnoma tuzishni rad etishi mumkin.

Agar xarid komissiyasi tomonidan zaxiradagi gʻolib aniqlanmagan boʻlsa yoki zaxiradagi gʻolib shartnoma tuzishni rad etgan boʻlsa, davlat buyurtmachisi ushbu Qonun talablariga muvofiq yangi tanlash oʻtkazishi yoxud elektron doʻkon (ushbu Qonunning 49-moddasida belgilangan mezonlar doirasida) yoki kichik qiymatli xaridning soddalashtirilgan tartib-taomili yoxud auksion orqali xaridni amalga oshirishi mumkin.

Tender vositasidagi davlat xaridi quyidagi shartlar bir vaqtning oʻzida bajarilgan taqdirda amalga oshiriladi:

gʻolibni aniqlash mezonlari tovarning (ishning, xizmatning) nafaqat pul bilan baholanishini, balki miqdoriy va sifat jihatidan baholanishini ham oʻz ichiga oladi;

tovarlarning (ishlarning, xizmatlarning) qiymati bir shartnoma boʻyicha bazaviy hisoblash miqdorining yigirma besh ming baravaridan ortiq (budjet buyurtmachilari uchun bazaviy hisoblash miqdorining olti ming baravaridan ortiq) miqdorni tashkil etadi.

Tender majburiy tartibda elektron shaklda oʻtkaziladi, bundan qonunchilikda nazarda tutilgan hollar mustasno.

Davlat xaridini tender oʻtkazish orqali amalga oshirish uchun kamida yetti nafar aʼzodan iborat tarkibda xarid komissiyasi tuziladi.

Shartnomani bajarishning eng yaxshi shartlari tender ishtirokchilarining takliflarini baholash boʻyicha eʼlon qilingan mezonlar asosida xarid komissiyasi tomonidan aniqlanadi.

Agar majlisda xarid komissiyasi aʼzolari umumiy sonining kamida uchdan ikki qismi hozir boʻlsa, xarid komissiyasi vakolatli hisoblanadi. Barcha qabul qilingan qarorlar bayonnomalar bilan rasmiylashtirilishi kerak.

Tender vositasidagi davlat xaridi toʻgʻrisidagi axborot davlat buyurtmachisi tomonidan cheklanmagan miqdordagi shaxslarga maxsus axborot portali orqali davlat xaridlarining elektron tizimiga, shuningdek davlat buyurtmachisining xohishiga koʻra uning veb-saytiga yoki uning yuqori turuvchi organining rasmiy veb-saytiga, shuningdek ommaviy axborot vositalarida tender oʻtkazilishi toʻgʻrisidagi eʼlonni va tender boʻyicha xarid qilish hujjatlarini joylashtirish yoʻli bilan maʼlum qilinadi.

Tender oʻtkazilishi toʻgʻrisidagi eʼlon faqat tender boʻyicha xarid qilish hujjatlari yuzasidan Kompleks ekspertiza qilish markazining ijobiy xulosasi olinganidan keyin joylashtiriladi.

Tender oʻtkazilishi toʻgʻrisidagi eʼlon tender ishtirokchilaridan takliflarni qabul qilish muddati tugaydigan sanadan kamida oʻn ikki ish kuni va koʻpi bilan oʻttiz ish kuni oldin maxsus axborot portali orqali davlat xaridlarining elektron tizimiga davlat buyurtmachisi tomonidan joylashtiriladi.

Tender oʻtkazilishi toʻgʻrisidagi eʼlon quyidagi axborotni oʻz ichiga olishi kerak:

tenderni oʻtkazish shakli;

tovarning (ishning, xizmatning) batafsil tavsifi va boshlangʻich narxi;

tender oʻtkaziladigan joyning manzili;

tender ishtirokchilariga qoʻyiladigan talablar;

davlat buyurtmachisining ishtirokchilar bilan bogʻlanish uchun aloqa bogʻlovchi shaxslar sifatida belgilangan bir yoki bir nechta mansabdor shaxslarining yoki boshqa xodimlarining familiyasi, ismi, sharifi, lavozimi va manzili;

takliflar berish muddati tugaydigan sana va vaqt;

tender taklifini rasmiylashtirishga doir talablar.

Tender oʻtkazish toʻgʻrisidagi eʼlon qonunchilikka zid boʻlmagan boshqa axborotni ham oʻz ichiga olishi mumkin.

Tender boʻyicha xarid qilish hujjatlari maxsus axborot portali orqali davlat xaridlarining elektron tizimiga tender oʻtkazilishi toʻgʻrisidagi eʼlonni joylashtirish bilan bir vaqtda davlat buyurtmachisi tomonidan joylashtiriladi.

Tender boʻyicha xarid qilish hujjatlari quyidagilarni oʻz ichiga olishi kerak:

tender oʻtkazilishi toʻgʻrisidagi eʼlonda koʻrsatilgan axborot;

shartnoma bahosini va ijrochilar bilan hisob-kitoblarni shakllantirish uchun foydalaniladigan valyuta hamda toʻlov tartibi haqidagi axborot;

tenderda ishtirok etish uchun taklifni davlat tilida va, zaruriyatga qarab, boshqa tillarda tayyorlash majburiyligi toʻgʻrisidagi talab;

tender ishtirokchisi taklifining texnik va narxga oid qismi, ularni baholash tartibi haqidagi axborot;

tender ishtirokchilariga tender boʻyicha xarid qilish hujjatlari qoidalariga doir tushuntirishlarni taqdim etish tartibi, taqdim etish muddati boshlanadigan va tugaydigan sana;

texnik topshiriq;

ushbu Qonunga muvofiq tender ishtirokchilarining takliflarini baholash mezonlari va koʻrib chiqish tartibi;

tender ishtirokchilari tomonidan korrupsiya koʻrinishlariga yoʻl qoʻymaslik boʻyicha arizani taqdim etish majburiyligi haqidagi talab.

Tender boʻyicha xarid qilish hujjatlarida davlat buyurtmachisi har bir tovar (ish, xizmat) xarid qilish tartib-taomilining alohida birligi sifatida koʻrib chiqilishini eʼlon qilishi mumkin. Bunday holda davlat buyurtmachisi turli tovarlarni (ishlarni, xizmatlarni) yetkazib berish uchun tenderning bir nechta ishtirokchisi bilan shartnomalar tuzishi mumkin, bunda har bir tovar (ish, xizmat) uchun faqat bitta gʻolib aniqlanishi mumkin. Har bir tovar (ish, xizmat) uchun gʻolib xarid qilish tartib-taomili shartlariga koʻra alohida-alohida aniqlanadi.

Tender boʻyicha xarid qilish hujjatlariga uning ajralmas qismi boʻlgan shartnoma loyihasi ilova qilinadi.

Davlat buyurtmachisi xarid komissiyasi bilan kelishilgan tender boʻyicha xarid qilish hujjatlarini tasdiqlaydi.

Davlat buyurtmachisi xarid komissiyasi bilan kelishilgan holda tenderda ishtirok etish uchun takliflar berish muddati tugaydigan sanadan kamida bir ish kuni oldin tender boʻyicha xarid qilish hujjatlariga oʻzgartishlar kiritish toʻgʻrisida qaror qabul qilishga haqli. Bunda ushbu tenderda takliflar berish tugaydigan muddat kamida oʻn ish kuniga uzaytiriladi. Shu bilan bir vaqtda, agar eʼlonda koʻrsatilgan axborot oʻzgartirilgan boʻlsa, tender oʻtkazish toʻgʻrisidagi eʼlonga oʻzgartishlar kiritiladi. Tovarning (ishning, xizmatning) nomini oʻzgartirishga yoʻl qoʻyilmaydi.

Tender ishtirokchisi davlat buyurtmachisiga tender boʻyicha xarid qilish hujjatlari qoidalariga doir tushuntirishlar berish toʻgʻrisida soʻrov yuborishga haqli. Mazkur soʻrov kelib tushgan sanadan eʼtiboran ikki ish kuni ichida davlat buyurtmachisi, agar ushbu soʻrov davlat buyurtmachisiga takliflar berish muddati tugaydigan sanadan kamida ikki ish kuni oldin kelib tushgan boʻlsa, tender boʻyicha xarid qilish hujjatlarining qoidalariga doir tushuntirishlarni yuboradi. Tender boʻyicha xarid qilish hujjatlarining qoidalariga doir tushuntirishlar ularning mazmun-mohiyatini oʻzgartirmasligi kerak.

Tender boʻyicha xarid qilish hujjatlari qonunchilikda belgilangan tartibda ekspertiza uchun Kompleks ekspertiza qilish markaziga kiritiladi.

Davlat buyurtmachisi tuzilgan shartnomalar, import kontraktlari va ularga qoʻshimcha kelishuvlarning xarid qilish hujjatlariga muvofiqligi va haqiqiyligi uchun javobgar boʻladi.

Tender ishtirokchilarining takliflari eʼlonda va tender boʻyicha xarid qilish hujjatlarida belgilangan tartibda ularning davlat xaridlari elektron tizimidagi shaxsiy kabinetlari orqali, eʼlonda koʻrsatilgan muddatdan kechiktirmay elektron shaklda taqdim etiladi.

Elektron shaklda tender oʻtkazish chogʻida tender ishtirokchilarining takliflarini berish tartibi Oʻzbekiston Respublikasi Vazirlar Mahkamasi tomonidan belgilanadi.

Taklifda davlat xaridi obyekti boʻlgan tovar eskizining, rasmining, chizmasining, fotosuratining va boshqa materiallarining elektron shakli boʻlishi mumkin.

Tender ishtirokchisi taqdim etilayotgan axborot va hujjatlarning haqiqiyligi va toʻgʻriligi uchun javobgar boʻladi.

Tender ishtirokchisi faqat bitta taklif berishga haqli.

Tenderda ishtirok etish uchun takliflarni qabul qilish maxsus axborot portali orqali davlat xaridlarining elektron tizimida chop etilgan eʼlonda koʻrsatilgan muddat kelishi bilan tugatiladi.

Agar takliflar berish muddati tugagan vaqtda tender ishtirokchilaridan kamida ikkita taklif olingan boʻlsa, tender ishtirokchilarining takliflari xarid komissiyasi tomonidan koʻrib chiqiladi.

Tenderda bitta ishtirokchi ishtirok etgan yoki hech kim ishtirok etmagan boʻlsa, tender oʻtkazilmagan deb topiladi. Bunday holda davlat buyurtmachisi xarid qilish tartib-taomilini ayni oʻsha shartlarda hamda tovarga (ishga, xizmatga) doir ayni oʻsha mezonlarga va talablarga muvofiq takroran amalga oshirishi shart. Tovarga (ishga, xizmatga) doir baholash shartlari, mezonlari va talablarni oʻzgartirish zarur boʻlganda, xarid komissiyasi asoslarni koʻrsatgan holda tegishli qarorni qabul qiladi. Tender ishtirokchisi bunday takliflarni berish muddati tugaguniga qadar berilgan taklifni qaytarib olishga yoki unga oʻzgartishlar kiritishga haqli.

Tender ishtirokchilarining takliflarini koʻrib chiqish va baholash muddati takliflar berish tugagan paytdan eʼtiboran qirq besh ish kunidan oshishi mumkin emas.

Agar taklif ushbu Qonunning va tender boʻyicha xarid qilish hujjatlarining talablariga muvofiq kelsa, u tegishli tarzda rasmiylashtirilgan deb topiladi.

Agar taklifni kiritgan tender ishtirokchisi ushbu Qonunda belgilangan talablarga mos kelmasa yoki tender ishtirokchisining taklifi tegishli tarzda rasmiylashtirilmagan boʻlsa, shuningdek tender boʻyicha xarid qilish hujjatlari talablariga muvofiq kelmasa, xarid komissiyasi taklifni rad etadi.

Eʼlonda tender oʻtkaziladigan vaqt sifatida koʻrsatilgan vaqtda davlat xaridlarining elektron tizimi avtomatik ravishda ishtirokchilar tomonidan joylashtirilgan va ularning tender takliflarini tashkil etadigan elektron hujjatlarni koʻrish imkoniyatini beradi. Davlat xaridlarining elektron tizimi ishtirokchi taklif etgan narxning boshlangʻich narxga muvofiqligini va elektron maydonlarning toʻldirilganligini tekshiradi. Agar ishtirokchi tomonidan taklif etilgan narx boshlangʻich narxdan yuqori boʻlsa, shuningdek biriktirilishi zarur boʻlgan hujjatlarni toʻldirish va joylashtirish uchun majburiy boʻlgan boʻsh maydonlar mavjud boʻlsa, davlat xaridlarining elektron tizimi aniq sababni koʻrsatgan holda ishtirokchining tender taklifini rad etadi. Biriktirilgan hujjatlardagi maʼlumotlarning ishtirokchining tender taklifida koʻrsatilgan maʼlumotlarga muvofiqligini tekshirish xarid komissiyasining masʼul kotibi tomonidan amalga oshiriladi.

Tender boʻyicha xarid qilish hujjatlarida koʻrsatilgan mezonlar asosida tender gʻolibini aniqlash uchun xarid komissiyasi rad etilmagan takliflarni baholashni amalga oshiradi.

Birinchi bosqichda tender ishtirokchisi taklifining texnik qismini baholash amalga oshiriladi. Xarid komissiyasining tender taklifining texnik qismini baholash boʻyicha qarori bayonnoma bilan rasmiylashtiriladi, bayonnomada tenderning birinchi bosqichini baholash yakunlari koʻrsatiladi.

Tenderning ikkinchi bosqichi tenderning birinchi bosqichidan oʻtgan kamida ikki nafar ishtirokchining takliflari mavjud boʻlganda oʻtkaziladi.

Tender taklifining miqdoriy koʻrsatkichlarini, shu jumladan narx qismini baholash davlat xaridlarining elektron tizimi tomonidan avtomatik ravishda amalga oshiriladi.

Takliflarni koʻrib chiqish natijalari boʻyicha:

birinchi bosqichda — agar xarid komissiyasi barcha takliflarni rad etgan boʻlsa yoki faqat bitta taklif tender boʻyicha xarid qilish hujjatlari talablariga muvofiq kelsa;

ikkinchi bosqichda — agar xarid komissiyasi barcha takliflarni rad etgan boʻlsa, tender oʻtkazilmagan deb topiladi.

Xarid qilinayotgan tovarning (ishning, xizmatning) texnik xususiyatlaridan kelib chiqib, tender bir bosqichda oʻtkazilishi mumkin. Bunda davlat buyurtmachisi bu haqda tender boʻyicha xarid qilish hujjatlarida koʻrsatishi kerak. Mazkur holatda tender taklifining texnik va narxga oid qismlarini ochish hamda baholash bir vaqtning oʻzida amalga oshiriladi.

Tender bir bosqichda oʻtkazilganda, agar xarid komissiyasi barcha takliflarni rad etgan boʻlsa yoki faqat bitta taklif tender boʻyicha xarid qilish hujjatlari talablariga muvofiq kelsa, tender oʻtkazilmagan deb topiladi.

Tender boʻyicha xarid qilish hujjatlarida va taklifda koʻrsatilgan mezonlar asosida shartnomani bajarishning eng yaxshi shartlarini taklif qilgan tender ishtirokchisi gʻolib deb topiladi.

Tender boʻyicha xarid qilish hujjatlarida va taklifda koʻrsatilgan mezonlarga muvofiq gʻolibning taklifidan keyingi eng maqbul taklifni taqdim etgan deb topilgan ishtirokchi xarid komissiyasining qarori bilan zaxiradagi gʻolib deb belgilanishi mumkin.

Agar tender boʻyicha xarid qilish hujjatlarida tenderning har bir tovari (ishi, xizmati) xarid qilish tartib-taomilining alohida birligi sifatida koʻrib chiqilishi nazarda tutilgan boʻlsa, xarid komissiyasi gʻolibni tenderning har bir predmeti boʻyicha aniqlaydi.

Takliflarni koʻrib chiqish va baholash natijalari takliflarni koʻrib chiqish hamda baholash bayonnomasida qayd etiladi.

Takliflarni koʻrib chiqish va baholash bayonnomasida quyidagi axborot boʻlishi kerak:

tender takliflari koʻrib chiqiladigan hamda baholanadigan sana va vaqt toʻgʻrisidagi;

hozir boʻlgan xarid komissiyasi aʼzolarining va tender ishtirokchilari vakolatli vakillarining tarkibi haqidagi;

takliflari koʻrib chiqilgan tender ishtirokchilari toʻgʻrisidagi;

takliflari ularni rad etishning aniq sabablari koʻrsatilgan holda rad etilgan tender ishtirokchilari haqidagi;

tender gʻolibi toʻgʻrisida qabul qilingan qaror haqidagi;

tender gʻolibining nomi (yuridik shaxs uchun), familiyasi, ismi, otasining ismi (jismoniy shaxs uchun), turgan joyi (pochta manzili).

Xarid komissiyasi aʼzolari majlisning davlat xaridlarining elektron tizimida avtomatik ravishda shakllantiriladigan elektron bayonnomasini elektron raqamli imzodan foydalangan holda tasdiqlaydi. Elektron bayonnoma davlat xaridlarining elektron tizimida avtomatik ravishda eʼlon qilinadi.

Tenderning istalgan ishtirokchisi takliflarni koʻrib chiqish va baholash bayonnomasi eʼlon qilinganidan keyin davlat buyurtmachisiga tender natijalari boʻyicha tushuntirishlarni taqdim etish toʻgʻrisida soʻrov yuborishga haqli. Davlat buyurtmachisi bunday soʻrov kelib tushgan sanadan eʼtiboran uch ish kuni ichida tender ishtirokchisiga tegishli tushuntirishlarni taqdim etadi.

Davlat buyurtmachisi va xarid komissiyasi takliflarni qabul qilish tugaydigan paytga qadar ularni muhokama qilishga haqli emas.

Tender natijalari boʻyicha shartnoma tender boʻyicha xarid qilish hujjatlarida va shartnoma tuzilayotgan tender ishtirokchisi tomonidan berilgan taklifda koʻrsatilgan shartlar asosida davlat xaridlarining elektron tizimi tomonidan avtomatik tarzda shakllantiriladi.

Gʻolib shartnoma tuzishdan bosh tortgan taqdirda unga zakalat summasi qaytarib berilmaydi. Agar xarid komissiyasi tomonidan zaxiradagi gʻolib aniqlangan boʻlsa, shartnoma tuzish va unga doir majburiyatlarni bajarish huquqi zaxiradagi gʻolibga oʻtadi. Bunda zaxiradagi gʻolib gʻolib tomonidan taklif etilgan narxda (bundan zaxiradagi gʻolib taklif etgan narx gʻolib tomonidan taklif etilgan narxdan past boʻlgan hollar mustasno) shartnoma tuzadi yoki shartnoma tuzishdan bosh tortishi mumkin. Agar xarid komissiyasi tomonidan zaxiradagi gʻolib aniqlanmagan boʻlsa yoki zaxiradagi gʻolib shartnoma tuzishdan bosh tortsa, davlat buyurtmachisi yangi tender oʻtkazadi.

Tender natijalari boʻyicha tuzilgan shartnoma toʻgʻrisidagi axborot davlat buyurtmachisi tomonidan maxsus axborot portaliga u tuzilgan sanadan boshlab besh ish kunidan kechiktirmay joylashtiriladi.

Malakali ishtirokchilar oʻrtasidagi tender ushbu Qonunning 37-moddasiga muvofiq dastlabki malaka tanlovidan oʻtgan ishtirokchilar oʻrtasida oʻtkazilishi mumkin.

Davlat buyurtmachisi dastlabki malaka tanlovidan oʻtgan barcha ishtirokchilarni tenderda ishtirok etishga taklif qiladi yoxud xarid qilinayotgan tovar (ish, xizmat) xususiyatlarining murakkabligidan, ishtirokchilarning oʻz vaqtida sifatli mahsulot ishlab chiqarish, ishlarni bajarish va xizmatlar koʻrsatish borasidagi salohiyati hamda ish tajribasidan kelib chiqqan holda, ularning orasidan ishtirokchilarning cheklangan sonini hamda malakali ishtirokchilar roʻyxatini belgilashi mumkin.

Ishtirokchilarning cheklangan sonini va malakali ishtirokchilar roʻyxatini belgilashda davlat buyurtmachisi ishtirokchilarning saviyasini xolisona va davlat xaridlarining asosiy prinsiplariga muvofiq aniqlaydi hamda ularga tenderda ishtirok etish toʻgʻrisidagi takliflarni yuboradi.

Ikki bosqichli davlat xaridlari quyidagi shartlar bir vaqtning oʻzida bajarilgan taqdirda amalga oshiriladi:

gʻolibni aniqlash mezonlari tovarning (ishning, xizmatning) nafaqat pul bilan baholanishini, balki texnik, ekspluatatsiya qilinish xususiyatlarini va boshqa xususiyatlarini aniqlash imkoniyati mavjud boʻlmagan texnik jihatdan murakkab tovarlarning (ishlarning, xizmatlarning) miqdoriy va sifat jihatidan baholanishini ham oʻz ichiga oladi;

tovarlarning (ishlarning, xizmatlarning) qiymati bir shartnoma boʻyicha bazaviy hisoblash miqdorining yigirma besh ming baravaridan ortiq (budjet buyurtmachilari uchun bazaviy hisoblash miqdorining olti ming baravaridan ortiq) miqdorni tashkil etadi.

Davlat xaridini ikki bosqichli davlat xaridlari oʻtkazish orqali amalga oshirish uchun kamida yetti nafar aʼzodan iborat tarkibda xarid komissiyasi tuziladi.

Agar majlisda xarid komissiyasi aʼzolari umumiy sonining kamida uchdan ikki qismi hozir boʻlsa, xarid komissiyasi vakolatli hisoblanadi. Barcha qabul qilingan qarorlar bayonnomalar bilan rasmiylashtirilishi kerak.

Ikki bosqichli davlat xaridlari toʻgʻrisidagi axborot davlat buyurtmachisi tomonidan cheklanmagan miqdordagi shaxslarga maxsus axborot portali orqali davlat xaridlarining elektron tizimiga, shuningdek davlat buyurtmachisining xohishiga koʻra uning rasmiy veb-saytiga yoki uning yuqori turuvchi organining rasmiy veb-saytiga, shuningdek ommaviy axborot vositalariga xaridlarni oʻtkazish toʻgʻrisidagi eʼlonni va xarid boʻyicha xarid qilish hujjatlarini joylashtirish yoʻli bilan maʼlum qilinadi.

Ikki bosqichli davlat xaridlari oʻtkazilishi toʻgʻrisidagi eʼlon faqat xarid qilish hujjatlari yuzasidan Kompleks ekspertiza qilish markazining ijobiy xulosasi olinganidan keyin joylashtiriladi.

Ikki bosqichli davlat xaridlari oʻtkazilishi toʻgʻrisidagi eʼlon va xarid qilish hujjatlari davlat buyurtmachisi tomonidan har bir bosqich boʻyicha takliflarni qabul qilish muddati tugaydigan sanadan kamida yigirma ish kuni oldin maxsus axborot portali orqali davlat xaridlarining elektron tizimiga, shuningdek davlat buyurtmachisining xohishiga koʻra, uning rasmiy veb-saytiga yoki uning yuqori turuvchi organining rasmiy veb-saytiga, shuningdek ommaviy axborot vositalariga joylashtiriladi.

Birinchi bosqichda ikki bosqichli davlat xaridlari ishtirokchilari xarid qilinayotgan tovarning (ishning, xizmatning) eng kam texnik xususiyatlarini aks ettiruvchi dastlabki oʻz texnik takliflarini taqdim etadi.

Texnik talablar davlat buyurtmachisining ehtiyojlaridan, xarid qilinayotgan tovarning (ishning, xizmatning) moʻljallanilgan maqsadi va funksiyalaridan kelib chiqqan holda belgilanishi kerak.

Ikki bosqichli davlat xaridlari ishtirokchilari tomonidan taqdim etiladigan takliflar ikki bosqichli davlat xaridlarining xarid qilish hujjatlariga va ushbu Qonunda belgilangan talablarga muvofiq boʻlishi kerak.

Ikki bosqichli davlat xaridlarini elektron shaklda oʻtkazish chogʻida ikki bosqichli davlat xaridlari ishtirokchilarining takliflarini berish tartibi Oʻzbekiston Respublikasi Vazirlar Mahkamasi tomonidan belgilanadi.

Birinchi bosqichda takliflarni taqdim etish muddati tugagach, davlat buyurtmachisi takliflarni koʻrib chiqadi va baholaydi. Bunda xarid qilish hujjatlarida nazarda tutilgan texnik parametrlarga asosan texnik va ekspluatatsiya qilinish xususiyatlari boʻyicha eng maqbul takliflarni taqdim etgan ishtirokchilar birinchi bosqichdan muvaffaqiyatli oʻtgan hisoblanadi.

Davlat xaridlarining ikkinchi bosqichi birinchi bosqichdan oʻtgan kamida ikki nafar ishtirokchining takliflari mavjud boʻlganda oʻtkaziladi.

Ikkinchi bosqichni oʻtkazishga tayyorgarlik koʻrish jarayonida davlat buyurtmachisi kelib tushgan dastlabki takliflarga muvofiq oʻzining dastlabki talablarini qayta koʻrib chiqadi va takomillashtiradi, bunda davlat xaridi predmetini oʻzgartirishga yoʻl qoʻyilmaydi.

Ikki bosqichli davlat xaridlarining ikkinchi bosqichida davlat buyurtmachisi tomonidan oʻzgartirish kiritilgan xarid qilish hujjatlari birinchi bosqichdan muvaffaqiyatli oʻtgan ishtirokchilarga yigirma ish kunidan ortiq boʻlmagan muddatda yuboriladi va ularga oʻz uzil-kesil takliflarini taqdim etish orqali xaridda ishtirok etish taklif qilinadi.

Takliflar turli darajadagi texnik afzalliklardan, iqtisodiy barqarorlik jihatlaridan, shu jumladan hayotiy davrning qiymatidan kelib chiqqan holda baholanadi. Yakuniy baholash xarid qilish hujjatlarida koʻrsatilgan tartibda davlat buyurtmachisi tomonidan amalga oshiriladi.

Ikki bosqichli davlat xaridlari ishtirokchilarining takliflarini koʻrib chiqish va baholash muddati har bir bosqich boʻyicha takliflar berish tugagan paytdan eʼtiboran yigirma ish kunidan oshishi mumkin emas.

Takliflarni koʻrib chiqish natijalari boʻyicha ikki bosqichli davlat xaridlari, agar ikkinchi bosqichda xarid komissiyasi barcha takliflarni rad etgan boʻlsa, oʻtkazilmagan deb hisoblanadi.

Ikki bosqichli davlat xaridlarining natijalari boʻyicha shartnoma tuziladi.

Ikki bosqichli davlat xaridlarining natijalari boʻyicha tuzilgan shartnomalar toʻgʻrisidagi axborot davlat buyurtmachisi tomonidan maxsus axborot portaliga ular tuzilgan sanadan eʼtiboran besh ish kunidan kechiktirmay joylashtiriladi.

Toʻgʻridan-toʻgʻri shartnomalar boʻyicha davlat xaridlari quyidagi hollarda amalga oshirilishi mumkin:

1) Yagona yetkazib beruvchilar reyestriga kiritilgan yagona yetkazib beruvchi bilan davlat xaridini amalga oshirish uchun ruxsat etilgan tovarlarning (ishlarning, xizmatlarning) davlat xaridi;

2) Oʻzbekiston Respublikasi Prezidentining farmonlari va qarorlari, Oʻzbekiston Respublikasi Vazirlar Mahkamasining qarorlari asosida toʻgʻridan-toʻgʻri shartnomalar boʻyicha amalga oshiriladigan tovarlarning (ishlarning, xizmatlarning) davlat xaridi;

3) favqulodda vaziyatlarni bartaraf etish maqsadida Oʻzbekiston Respublikasining ehtiyojlarini taʼminlash uchun zarur boʻlgan tovarlarning (ishlarning, xizmatlarning) davlat xaridi;

4) sud muhokamalarida ishtirok etish uchun advokatni (vakilni) tayinlash bilan bogʻliq boʻlgan davlat xaridi;

5) boshqa yetkazib beruvchi tomonidan mahsulot yetkazib berish imkoniyati boʻlmagan taqdirda, litsenziya bitimiga (shartnomasiga, kontraktiga) asosan tovarlarning (ishlarning, xizmatlarning) intellektual faoliyat natijalari muallifidan yoki intellektual faoliyat natijalaridan mutlaq foydalanish huquqiga ega boʻlgan yetkazib beruvchidan, shuningdek fan, adabiyot va sanʼat asarlari, ijrolar, fonogrammalar, efir yoki kabel orqali koʻrsatuv yoxud eshittirish beruvchi tashkilotlarning koʻrsatuvlari yoki eshittirishlari kabi intellektual faoliyat natijalarining ushbu intellektual mulk obyektiga nisbatan mutlaq huquqqa ega boʻlgan yagona shaxsdan davlat xaridi;

6) narxi (tarifi) davlat tomonidan tartibga solinadigan tovarlarning (ishlarning, xizmatlarning) davlat xaridi;

7) davlat buyurtmachisi faoliyatini amalga oshirish bilan bogʻliq boʻlgan xizmat safarlari va boshqa hollar uchun chiptalarning davlat xaridi (avia, temir yoʻl va yoʻnalishli transportiga), shuningdek yashash xarajatlari;

8) boshqa yetkazib beruvchi tomonidan xizmat koʻrsatish imkoniyati boʻlmagan taqdirda, yetkazib beruvchi tomonidan avval olib kelingan tovarlarga (ishlarga, xizmatlarga) kafolat muddati tugaganidan keyin va joriy xizmat koʻrsatish (ehtiyot qismlarni xarid qilish), shuningdek avval xarid qilingan dasturiy mahsulotni kuzatish va (yoki) uni funksiyaviy jihatdan kengaytirish;

9) giyohvandlik vositalarini va psixotrop moddalarni saqlash hamda olib kirish (olib chiqish);

10) favqulodda hollarda tabiat hodisalari, epidemiyalar va kasalliklar tarqalishining oldini olish yoki uning oqibatlarini bartaraf etish uchun zarur tovarlarning (ishlarning, xizmatlarning) vakolatli idoralar tomonidan tasdiqlanadigan davlat xaridi;

11) tabiiy ofatlarning va texnogen halokatlarning oqibatlarini tezkor bartaraf etish, shuningdek davlat buyurtmachisining toʻlaqonli faoliyat olib borishiga taʼsir koʻrsatadigan tarzda kommunikatsiyalar, mexanizmlar, jihozlar va boshqa asbob-uskunalar ishdan chiqqan hollarda avariyalarni bartaraf etish uchun tovarlarning (ishlarning, xizmatlarning) davlat xaridi;

12) Oʻzbekiston Kasaba uyushmalari Federatsiyasi Kengashining, vazirliklar, idoralar, davlat korxonalari va muassasalarining sanatoriy-kurort va sogʻlomlashtirish muassasalariga, bolalar sogʻlomlashtirish oromgohlariga yoʻllanmalarning, shuningdek madaniy-ommaviy tadbirlarga chiptalarning davlat xaridi;

13) Oʻzbekiston Respublikasining ishlab chiqaruvchilaridan yoki ularning rasmiy dilerlaridan va distribyutorlaridan xarid qilinadigan yangi avtotransport vositalarining, maxsus va qishloq xoʻjaligi texnikasining davlat xaridi;

14) qoʻshimcha ishlarni va xizmatlarni amalga oshirish uchun shartnoma umumiy boshlangʻich summasining 10 foizidan oshmaydigan miqdordagi xarajatlar, bundan ushbu Qonun 34-moddasining oʻn birinchi qismida nazarda tutilgan hol mustasno;

15) aviatsiya korxonalari tomonidan ishlab chiqaruvchilardan yoki sertifikatlashtirilgan yetkazib beruvchilardan import shartnomalari boʻyicha xarid qilinadigan aviatsiya texnika jihozlari, shu jumladan havo kemalari, aviadvigatellar va ularning butlovchi qismlari, aviatsiya uchun axborot-kommunikatsiya texnologiyalari va dasturiy mahsulotlarning davlat xaridi;

16) Oʻzbekiston Respublikasi Prezidentining, chet davlatlar va hukumatlar rahbarlarining, shuningdek parlament aʼzolarining va xalqaro tashkilotlar rasmiy delegatsiyalarining tashriflari munosabati bilan yashash, ovqatlanish, madaniy tadbirlarni tashkil etish hamda oʻtkazish bilan bogʻliq boʻlgan xarajatlar, transport xarajatlari, suvenirlar, sovgʻalar xaridi va boshqa tashkiliy masalalar uchun nazarda tutilgan xarajatlar;

17) Oʻzbekiston Respublikasi Vazirlar Mahkamasining zaxira jamgʻarmasidan ajratiladigan mablagʻlar, shuningdek Oʻzbekiston Respublikasi Oliy Majlisi palatalarining chet el delegatsiyalarini qabul qilish va xorijiy mamlakatlarga delegatsiyalarni yuborish boʻyicha rejalashtirilgan mablagʻlar hisobidan xarid qilinadigan tovarlar (ishlar, xizmatlar);

18) quyidagilar uchun oziq-ovqat mahsulotlarining davlat xaridi:

davolash-profilaktika va taʼlim muassasalari;

mehmonxona va restoran xizmatlari koʻrsatish;

muruvvat va nogironligi boʻlgan shaxslar uylari;

mehribonlik uylari va internatlar;

qariyalar uylari;

19) fuqarolarni tibbiy koʻrikdan oʻtkazish va davolash, shu jumladan jarrohlik amaliyoti va reabilitatsiya yordami bilan bogʻliq xarajatlar;

20) mutaxassislarni xorijda tayyorlash va vatandoshlar bilan muloqot qilish yuzasidan “El-yurt umidi” jamgʻarmasi tomonidan taʼlim dasturlarini tashkil etish, respublikaga xorijiy olimlar va mutaxassislarni, shu jumladan vatandoshlarni jalb etish xizmatlari;

21) avval tuzilgan shartnomalardagi yetkazib beruvchilar bilan aloqa, Internet va teleradiouzatish xizmatlari boʻyicha davlat xaridi.

Davlat buyurtmachilari toʻgʻridan-toʻgʻri shartnomalar tuzilganligi toʻgʻrisidagi axborotni shartnoma tuzilgan paytdan eʼtiboran besh ish kuni ichida maxsus axborot portaliga joylashtirishi shart.

Toʻgʻridan-toʻgʻri shartnomalar tuzilganligi toʻgʻrisidagi axborot maxsus axborot portaliga joylashtirilmagan boʻlsa, ushbu shartnomalar boʻyicha toʻlovlar amalga oshirilmaydi.

Davlat buyurtmachisi ushbu moddada nazarda tutilgan davlat xaridlarini amalga oshirish chogʻida xarid qilish tartib-taomillarining boshqa raqobatli turlaridan ham ushbu Qonun talablariga muvofiq foydalanishi mumkin.

Agar Oʻzbekiston Respublikasi Prezidentining farmonlari va qarorlarida, shuningdek Oʻzbekiston Respublikasi Vazirlar Mahkamasining qarorlarida tovarning (ishning, xizmatning) davlat xaridini toʻgʻridan-toʻgʻri shartnoma asosida amalga oshirishga ruxsat berilsa, shartnoma va shartnomaga oid qoʻshimcha kelishuvlar Kompleks ekspertiza qilish markazida kompleks ekspertizadan oʻtkazilishi lozim, bundan qonunchilikda belgilangan hollar mustasno.

Favqulodda holatning oldini olish maqsadida vakolatli organ tomonidan toʻgʻridan-toʻgʻri shartnomalar tuzish oʻrniga hadli kelishuvdan yoki kichik qiymatli xaridning soddalashtirilgan tartib-taomilidan foydalanishga ruxsat beriladi.

Ushbu Qonunda belgilangan tartibda yagona yetkazib beruvchi deb topilgan va Yagona yetkazib beruvchilar reyestriga kiritilgan tovarlar (ishlar, xizmatlar) yetkazib beruvchisi yagona yetkazib beruvchidir.

Yagona yetkazib beruvchidan tovar (ish, xizmat) olish zarur boʻlgan taqdirda, yetkazib beruvchi hamda davlat buyurtmachisi oʻrtasida toʻgʻridan-toʻgʻri shartnoma tuziladi va bu shartnoma toʻgʻrisidagi axborot u tuzilgan paytdan eʼtiboran besh ish kuni ichida maxsus axborot portaliga joylashtirilishi lozim.

Yagona yetkazib beruvchidan davlat xaridi quyidagi alohida hollarda amalga oshiriladi:

bozorda muqobillari boʻlmagan va faqat yagona yetkazib beruvchidan olish mumkin boʻlgan texnik jihatdan murakkab tovarlarning (ishlarning, xizmatlarning) davlat xaridi;

madaniy qimmatliklarni olish;

Oʻzbekiston Respublikasi Prezidentining farmonlari va qarorlarida yoki Oʻzbekiston Respublikasi Vazirlar Mahkamasining qarorlarida yagona yetkazib beruvchi sifatida belgilangan subyektlardan davlat xaridlari;

tabiiy monopoliya subyekti tovarlarining (ishlarining, xizmatlarining) davlat xaridi;

oʻz vakolatlariga muvofiq faqat davlat hokimiyati va boshqaruvi organlari yoki ularning tasarrufidagi davlat muassasalari va tashkilotlar tomonidan amalga oshirilishi mumkin boʻlgan ishlarga yoki koʻrsatilishi mumkin boʻlgan xizmatlarga ehtiyoj paydo boʻlishi.

Yagona yetkazib beruvchilar reyestri vakolatli organ tomonidan maxsus axborot portalida yuritiladigan axborot resursidir.

Yagona yetkazib beruvchilar reyestri yagona yetkazib beruvchidan davlat xaridini amalga oshirish uchun ruxsat etilgan tovarlar (ishlar, xizmatlar) roʻyxati va yagona yetkazib beruvchilar roʻyxatidan iboratdir.

Davlat xaridlari sohasidagi monitoring davlat xaridlari toʻgʻrisidagi qonunchilikka rioya etilishini, davlat xaridlarining ushbu Qonunda belgilangan maqsadlari, prinsiplari va cheklovlari amalga oshirilishini davlat xaridlarining oʻtkazilishi haqidagi axborotni toʻplash, umumlashtirish, tizimlashtirish va baholash orqali doimiy asosda kuzatish tizimidir.

Davlat xaridlari sohasidagi nazorat mazkur sohadagi qonunchilik talablari buzilishining oldini olish, uni aniqlash va unga chek qoʻyishga qaratilgan chora-tadbirlar tizimidir.

Qonunchilikda belgilangan tartibda statistik va boshqa axborotni taqqoslash hamda tahlil qilish orqali amalga oshiriladigan tekshirishlar davlat organlarining davlat xaridlari toʻgʻrisidagi qonunchilikka rioya etishi ustidan nazorat qilishning asosiy shaklidir.

Davlat xaridlari sohasidagi monitoring va nazorat tegishli vakolatli davlat organlari tomonidan amalga oshiriladi.

Davlat xaridlarini amalga oshiruvchi davlat organlari oʻz tasarrufidagi davlat buyurtmachilari tomonidan amalga oshirilgan davlat xaridlari boʻyicha monitoring va nazorat oʻtkazishga haqlidir.

Xarid qilish tartib-taomillarini tashkil etish va oʻtkazish chogʻida qonunchilikda nazarda tutilmagan tekshirishlar oʻtkazilishiga va hisobot berish shakllarini talab qilishga yoʻl qoʻyilmaydi.

Ushbu Qonunning va davlat xaridlari sohasidagi boshqa qonunchilik hujjatlarining toʻgʻri qoʻllanilishi ustidan davlat nazoratini quyidagilar oʻz vakolatlari doirasida amalga oshiradi:

Oʻzbekiston Respublikasi Hisob palatasi;

Oʻzbekiston Respublikasi Bosh prokuraturasi;

Oʻzbekiston Respublikasi Korrupsiyaga qarshi kurashish agentligi;

Oʻzbekiston Respublikasi Iqtisodiyot va moliya vazirligi;

Oʻzbekiston Respublikasi Raqobatni rivojlantirish va isteʼmolchilar huquqlarini himoya qilish qoʻmitasi.

Oʻzbekiston Respublikasi Hisob palatasi davlat buyurtmachilari tomonidan amalga oshirilgan davlat xaridlarini auditdan oʻtkazadi va audit natijalarini Oʻzbekiston Respublikasi Oliy Majlisining Qonunchilik palatasiga har yilning yakuni boʻyicha kiritadigan hisobotida koʻrsatadi, shuningdek ochiq axborot manbalariga joylashtiradi.

Ushbu Qonunning va davlat xaridlari sohasidagi boshqa qonunchilik hujjatlarining toʻgʻri qoʻllanilishi ustidan davlat nazoratini qonunchilikka muvofiq boshqa vakolatli davlat organlari ham oʻz vakolatlari doirasida amalga oshiradi.

Xarid qilish tartib-taomillari ustidan jamoatchilik nazorati davlat xaridlarini rivojlantirish va takomillashtirishga koʻmaklashish, davlat xaridlari toʻgʻrisidagi qonunchilik talablari buzilishlarining oldini olish va ularni aniqlash hamda davlat buyurtmachilarini, vakolatli davlat organlarini aniqlangan qoidabuzarliklar haqida xabardor qilish maqsadida amalga oshiriladi.

Xarid qilish tartib-taomillari ustidan jamoatchilik nazorati ochiqlik va shaffoflik prinsiplarini roʻyobga chiqarish vositasida amalga oshiriladi.

Oʻzbekiston Respublikasi fuqarolari, fuqarolarning oʻzini oʻzi boshqarish organlari, shuningdek qonunchilikda belgilangan tartibda roʻyxatdan oʻtkazilgan nodavlat notijorat tashkilotlari va ommaviy axborot vositalari davlat xaridlari toʻgʻrisidagi qonunchilikka rioya etilishi ustidan jamoatchilik nazoratini amalga oshirishga haqli.

Jamoatchilik nazoratini amalga oshiruvchi Oʻzbekiston Respublikasi fuqarolari, fuqarolarning oʻzini oʻzi boshqarish organlari, shuningdek qonunchilikda belgilangan tartibda roʻyxatdan oʻtkazilgan nodavlat notijorat tashkilotlari va ommaviy axborot vositalari:

davlat xaridlari toʻgʻrisidagi qonunchilikni takomillashtirishga doir takliflar tayyorlashga;

xarid qilish tartib-taomillarini amalga oshirish va shartnomalarni bajarishning borishi toʻgʻrisida axborot taqdim etish haqidagi soʻrovlarni davlat buyurtmachilariga yuborishga;

xarid qilish tartib-taomillari yuzasidan mustaqil monitoringni va davlat xaridlari samaradorligini baholashni, shu jumladan ularning ushbu Qonun talablariga muvofiqligini baholashni amalga oshirishga;

tekshiruv tadbirlarini oʻtkazish tashabbusi bilan davlat organlariga murojaat qilishga;

davlat buyurtmachisi, davlat xaridlari elektron tizimi operatori, vakolatli organ, xarid komissiyalari va ularning aʼzolari harakatlarida (harakatsizligida) qoidabuzarliklar aniqlangan hollarda huquqni muhofaza qiluvchi organlarga murojaat qilishga;

qonunchilikka muvofiq sudga murojaat qilishga haqli.

Loyihaga doir faoliyat boʻyicha amalga oshirilgan davlat xaridlarining samaradorligi va natijadorligi tahlili tegishli vakolatli organ tomonidan oʻtkaziladi.

Oʻtkazilgan tahlil natijalari bilan davlat buyurtmachisining rahbari yoki loyihani boshqarish boʻyicha davlat buyurtmachisi tomonidan tayinlangan vakil imzo qoʻygan holda tanishib chiqadi.

Davlat xaridlarining samaradorligi va natijadorligi yuzasidan loyihadan keyingi monitoring loyiha boʻyicha davlat xaridi tugallanganidan keyin uch yil ichida tegishli vakolatli organ tomonidan amalga oshiriladi.

Vakolatli organ tomonidan shikoyatlarni adolatli, tezkor va samarali koʻrib chiqish maqsadida doimiy ravishda faoliyat koʻrsatadigan Davlat xaridlari sohasidagi shikoyatlarni koʻrib chiqish boʻyicha komissiya tuziladi, uning tarkibi tegishli davlat organlari, davlat xaridlari elektron tizimining operatorlari va jamoatchilik vakillaridan iborat boʻladi va Oʻzbekiston Respublikasi Vazirlar Mahkamasi tomonidan tasdiqlanadi.

Davlat xaridlari sohasidagi shikoyatlarni koʻrib chiqish boʻyicha komissiyaga kelib tushgan shikoyatlarni koʻrib chiqish tartibi Oʻzbekiston Respublikasi Vazirlar Mahkamasi tomonidan belgilanadi.

Vakolatli organ Davlat xaridlari sohasidagi shikoyatlarni koʻrib chiqish boʻyicha komissiyaning ishchi organi boʻlib, uning faoliyatini tashkil etadi.

Har bir ishtirokchi, shuningdek nazoratni amalga oshirayotgan shaxslar davlat buyurtmachisining, xarid komissiyasining, uning aʼzolarining, davlat xaridlari elektron tizimi operatorining harakatlari (harakatsizligi) ustidan, agar bunday harakatlar (harakatsizlik) ishtirokchining huquqlari va qonuniy manfaatlarini buzayotgan boʻlsa, sud tartibida yoki ushbu bobda belgilangan tartibda Davlat xaridlari sohasidagi shikoyatlarni koʻrib chiqish boʻyicha komissiyaga shikoyat qilish huquqiga ega.

Davlat xaridlari sohasidagi shikoyatlarni koʻrib chiqish boʻyicha komissiya aʼzolariga doir malaka talablari qonunchilikda belgilanadi.

Davlat xaridlari sohasidagi shikoyatlarni koʻrib chiqish boʻyicha komissiya shikoyatni qabul qilib olganda shikoyat kelib tushgan kundan eʼtiboran uch ish kuni ichida shikoyat haqida davlat buyurtmachisini xabardor qiladi hamda xarid qilish tartib-taomilini oʻn ish kunigacha boʻlgan umumiy muddatga toʻxtatib turadi.

Davlat xaridlari sohasidagi shikoyatlarni koʻrib chiqish boʻyicha komissiya shikoyatni davlat buyurtmachisi va ishtirokchining ishtirokida koʻrib chiqadi, bundan ishtirokchi shikoyatni uning ishtirokisiz koʻrib chiqishga rozilik bildirgan yoki uzrli sabablarsiz ishtirok etmagan hollar mustasno.

Davlat xaridlari sohasidagi shikoyatlarni koʻrib chiqish boʻyicha komissiya shikoyat olinganidan keyin yetti ish kuni ichida u boʻyicha qaror chiqarishi va bu haqdagi axborotni maxsus axborot portalida joylashtirishi kerak.

Qabul qilingan qarorda oshkor etilishi ishtirokchining (ijrochining) tijoratga oid manfaati buzilishiga olib keladigan yoki insofli raqobatga xavf soladigan axborot boʻlmasligi kerak, bundan Davlat xaridlari sohasidagi shikoyatlarni koʻrib chiqish boʻyicha komissiya ushbu axborotni eʼlon qilish toʻgʻrisida qaror chiqargan hollar mustasno.

Ishtirokchining shikoyati asosli deb topilgan taqdirda, Davlat xaridlari sohasidagi shikoyatlarni koʻrib chiqish boʻyicha komissiya quyidagi choralarni koʻrishi mumkin:

davlat buyurtmachisining qonunga xilof harakatlariga, qarorlariga yoki u tomonidan qonunga xilof tartib-taomillar bajarilishiga doir taqiq belgilash;

davlat buyurtmachisining qonunga xilof qarorlarini, shu jumladan davlat xaridlari sohasidagi hujjatlarning shartlarini buzadigan qarorlarini qisman yoki toʻliq bekor qilish;

xarid qilish tartib-taomillarini tugatish haqida qaror chiqarish;

ijrochini Insofsiz ijrochilarning yagona reyestriga kiritish.

Davlat xaridlari sohasidagi shikoyatlarni koʻrib chiqish boʻyicha komissiyaning qarorlari davlat xaridlarining barcha subyektlari tomonidan ijro etilishi shart.

Davlat xaridlari sohasidagi shikoyatlarni koʻrib chiqish boʻyicha komissiya oʻz faoliyatini ushbu Qonunga va boshqa qonunchilik hujjatlariga muvofiq amalga oshiradi.

Ijrochi Davlat xaridlari sohasidagi shikoyatlarni koʻrib chiqish boʻyicha komissiyaning qarori ustidan sud tartibida shikoyat qilishi mumkin.

Davlat xaridlari sohasidagi shikoyatlarni koʻrib chiqish boʻyicha komissiya aʼzolarida xarid qilish tartib-taomillari ishtirokchilari bilan manfaatlar toʻqnashuvi, shuningdek affillanganlik mavjud boʻlgan taqdirda, Davlat xaridlari sohasidagi shikoyatlarni koʻrib chiqish boʻyicha komissiyaning bunday aʼzosi bu masala koʻrib chiqilgan majlisda oʻzini oʻzi rad etishi va mazkur masala boʻyicha ovoz berishda ishtirok etmasligi kerak, bu haqda Davlat xaridlari sohasidagi shikoyatlarni koʻrib chiqish boʻyicha komissiya majlisining bayonnomasida qayd etiladi.

Agar Davlat xaridlari sohasidagi shikoyatlarni koʻrib chiqish boʻyicha komissiyaga mazkur komissiya aʼzosining manfaatlar toʻqnashuvi, shuningdek affillanganligi mavjudligi tegishli masala yuzasidan qaror qabul qilinguniga qadar maʼlum boʻlib qolgan boʻlsa, uning oʻzi esa oʻzini oʻzi rad etmagan boʻlsa, Davlat xaridlari sohasidagi shikoyatlarni koʻrib chiqish boʻyicha komissiya bunday aʼzosining mazkur masala boʻyicha ovoz berishiga yoʻl qoʻyilmaydi.

Agar qaror qabul qilinganidan keyin Davlat xaridlari sohasidagi shikoyatlarni koʻrib chiqish boʻyicha komissiyaga tegishli masala boʻyicha ovoz bergan mazkur komissiya aʼzosining manfaatlar toʻqnashuvi, shuningdek affillanganligi mavjudligi toʻgʻrisida maʼlum boʻlib qolsa, Davlat xaridlari sohasidagi shikoyatlarni koʻrib chiqish boʻyicha komissiyaning bunday aʼzosi ovozi mazkur masala boʻyicha ovoz berish natijalaridan chiqarib tashlanadi.

Davlat xaridlari sohasidagi shikoyatlarni koʻrib chiqish boʻyicha komissiya raisi ushbu moddaning ikkinchi va uchinchi qismlarida nazarda tutilgan hollarda, Oʻzbekiston Respublikasi Vazirlar Mahkamasiga tegishli axborotni kiritadi.

Davlat xaridlari sohasida yuzaga keladigan nizolar qonunchilikda belgilangan tartibda hal etiladi.

Davlat xaridlari subyektlari va ularning mansabdor shaxslari ushbu Qonunga va boshqa qonunchilik hujjatlariga, shuningdek korrupsiyaga qarshi kurashish toʻgʻrisidagi qonunchilikka muvofiq davlat xaridlari toʻgʻrisidagi qonunchilikka rioya etilishi va shartnoma boʻyicha oʻz zimmasiga yuklatilgan majburiyatlar lozim darajada bajarilishi uchun javobgar boʻladi.

Davlat xaridlari toʻgʻrisidagi qonunchilikni buzganlikda aybdor shaxslar belgilangan tartibda javobgar boʻladi.

Quyidagilar oʻz kuchini yoʻqotgan deb topilsin:

1) Oʻzbekiston Respublikasining 2018-yil 9-aprelda qabul qilingan “Davlat xaridlari toʻgʻrisida”gi OʻRQ-472-sonli Qonuni (Oʻzbekiston Respublikasi Oliy Majlisining Axborotnomasi, 2018-yil, № 4, 220-modda);

2) Oʻzbekiston Respublikasining 2019-yil 3-dekabrda qabul qilingan “Mehnatga haq toʻlash, pensiyalar va boshqa toʻlovlar miqdorlarini aniqlash tartibi takomillashtirilganligi munosabati bilan Oʻzbekiston Respublikasining ayrim qonun hujjatlariga oʻzgartishlar kiritish toʻgʻrisida”gi OʻRQ-586-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2019-yil, № 12, 880-modda) 53-moddasi.

Oʻzbekiston Respublikasi Iqtisodiyot va moliya vazirligi, Adliya vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

Ushbu Qonun rasmiy eʼlon qilingan kundan eʼtiboran uch oy oʻtgach kuchga kiradi.

Eng yaxshi takliflarni tanlash va tender xarid qilish tartib-taomillarini majburiy tartibda elektron shaklda oʻtkazish toʻgʻrisidagi talab 2022-yil 1-yanvardan eʼtiboran amalga kiritiladi.