Hujjat kuchini yo‘qotgan " " 14.02.2022
Oʻzbekiston Respublikasi Vazirlar Mahkamasining
qarori
Tadbirkorlik va shaharsozlik faoliyatini amalga oshirish uchun boʻsh turgan yer uchastkalarini berish tartib-taomillarini yanada takomillashtirish chora-tadbirlari toʻgʻrisida
Oʻzbekiston Respublikasi Prezidentining “Qishloq xoʻjaligiga moʻljallanmagan boʻsh turgan yer uchastkalarini berish hamda arxitektura-qurilish ishlarini amalga oshirish tartib-taomillarini yanada takomillashtirish chora-tadbirlari toʻgʻrisida” 2019-yil 26-avgustdagi PQ-4427-son qarori ijrosini taʼminlash maqsadida Vazirlar Mahkamasi qaror qiladi:
1. Maʼlumot uchun qabul qilinsinki, 2019-yil 1-oktabrdan boshlab joriy etilgan tartibga muvofiq:
Qoraqalpogʻiston Respublikasi, viloyatlar va Toshkent shahrida qishloq xoʻjaligiga moʻljallanmagan boʻsh turgan yer uchastkalari (keyingi oʻrinlarda yer uchastkalari deb ataladi) tadbirkorlik va shaharsozlik faoliyatini amalga oshirish uchun faqat “E-IJRO AUKSION” savdo maydonchasida elektron onlayn-auksion orqali beriladi, eng yaxshi taklifni tanlash orqali yirik investitsiya loyihasini amalga oshirish uchun Vazirlar Mahkamasining qarorlariga muvofiq yer uchastkalarini taqdim etish hollari bundan mustasno;
(1-bandning ikkinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
jismoniy va yuridik shaxslarga “YERELEKTRON” avtomatlashtirilgan axborot tizimida (keyingi oʻrinlarda “YERELEKTRON” AAT deb ataladi) aniq investitsiya majburiyatlari bilan birga yer uchastkasi va rejalashtirilayotgan qurilish obyekti toʻgʻrisidagi maʼlumotlarni keyinchalik ularni elektron onlayn-auksionga qoʻyish masalasini belgilangan tartibda koʻrib chiqish uchun joylashtirish boʻyicha takliflar kiritish huquqi beriladi.
2. Quyidagilar:
Tadbirkorlik va shaharsozlik faoliyatini amalga oshirish uchun yer uchastkalarini elektron onlayn-auksion orqali berish tartibi toʻgʻrisidagi nizom 1-ilovaga muvofiq;
“YERELEKTRON” avtomatlashtirilgan axborot tizimiga ulanadigan vazirliklar, idoralar va tashkilotlar roʻyxati 2-ilovaga muvofiq tasdiqlansin.
3. Belgilansinki:
a) jismoniy va yuridik shaxslar aniq investitsiya majburiyatlari bilan birga yer uchastkasi va rejalashtirilayotgan qurilish obyekti toʻgʻrisidagi maʼlumotlarni joylashtirish yuzasidan takliflar kiritish uchun “YERELEKTRON” AATda bepul roʻyxatdan oʻtadi;
b) Oʻzbekiston Respublikasi Davlat aktivlarini boshqarish agentligi huzuridagi “Elektron onlayn-auksionlarni tashkil etish markazi” davlat unitar korxonasi “E-IJRO AUKSION” savdo maydonchasida elektron onlayn-auksionni tashkil etish va oʻtkazish operatori hisoblanadi;
v) yer uchastkasini tanlash materiallarini tayyorlash, kelishish va xulosalarni olish vakolatli organlar tomonidan faqat “YERELEKTRON” AAT orqali elektron shaklda amalga oshiriladi;
g) “E-IJRO AUKSION” savdo maydonchasida yer uchastkalariga mulk huquqi va ijara huquqi elektron onlayn-auksionda “Elektron onlayn-auksionlarni tashkil etish markazi” davlat unitar korxonasi tomonidan realizatsiya qilinadi;
(3-bandning “g” kichik bandi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
d) Oʻzbekiston Respublikasi Qurilish vazirligining hududiy boʻlinmalari:
hududlarni rivojlantirish rejalari va qurilish ishlarini amalga oshirish boʻyicha tasdiqlangan shaharsozlik hujjatlari asosida yer uchastkasida qurilishiga ruxsat berilgan yoki taqiqlangan obyektlar turi aniqlanishini;
arxitektura-rejalashtirish topshirigʻi ishlab chiqilishini;
yer uchastkasida qurilishiga ruxsat etilgan yoki taqiqlangan obyektlar turining tegishli hududlari va inshootlaridan rejim asosida foydalanish va ularni ekspluatatsiya qilish, yongʻin xavfsizligi va yoʻl harakati xavfsizligi talablariga muvofiqligini tekshirishni;
umumiy foydalanishdagi avtomobil yoʻllarigacha boʻlgan masofa toʻgʻrisidagi maʼlumotlarni shakllantirishni taʼminlaydi;
e) turizm infratuzilmasi obyektlarini rivojlantirish hududlarida boʻsh yer uchastkalarining roʻyxatini tuzish, keyinchalik ularni tadbirkorlik va shaharsozlik faoliyatini amalga oshirish uchun ijaraga berish Oʻzbekiston Respublikasi Turizmni rivojlantirish davlat qoʻmitasi tomonidan amalga oshiriladi;
(3-bandning “e” kichik bandi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
j) muhandislik-kommunikatsiya tarmoqlaridan foydalanuvchi tashkilotlar Oʻzbekiston Respublikasi Qurilish vazirligining hududiy boʻlinmalaridan soʻrov kelib tushgan kundan boshlab uch ish kuni ichida ularga muhandislik-kommunikatsiya tarmoqlariga ulanish boʻyicha texnik shartlarni tayyorlab, elektron shaklda yuborishi shart.
4. Oʻzbekiston Respublikasi Hukumatining 3-ilovaga muvofiq ayrim qarorlari oʻz kuchini yoʻqotgan deb hisoblansin.
5. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — transport vaziri A.J. Ramatov, Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha maslahatchisi A.D. Vaxabov hamda Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi raisi A.X. Abdullayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 20-dekabr,
1023-son
Vazirlar Mahkamasining 2019-yil 20-dekabrdagi 1023-son qaroriga
1-ILOVA
Tadbirkorlik va shaharsozlik faoliyatini amalga oshirish uchun yer uchastkalarini elektron onlayn-auksion orqali berish tartibi toʻgʻrisida
NIZOM
1-bob. Umumiy qoidalar
1. Ushbu Nizom tadbirkorlik va shaharsozlik faoliyatini amalga oshirish uchun qishloq xoʻjaligiga moʻljallanmagan boʻsh turgan yer uchastkalarini (keyingi oʻrinlarda yer uchastkasi deb ataladi) elektron onlayn-auksion orqali ijaraga va mulk huquqi asosida berish tartibini belgilaydi.
(1-band Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
(2-band Oʻzbekiston Respublikasi Prezidentining 2021-yil 8-iyundagi PF-6243-sonli Farmoniga asosan 2021-yil 1-avgustdan oʻz kuchini yoʻqotadi — Qonunchilik maʼlumotlari milliy bazasi, 09.06.2021-y., 06/21/6243/0540-son)
3. Ushbu Nizomda quyidagi asosiy tushunchalardan foydalaniladi:
“YERELEKTRON” avtomatlashtirilgan axborot tizimi (keyingi oʻrinlarda “YERELEKTRON” AAT deb ataladi) — yer uchastkalari berish boʻyicha materiallarni toʻplash, koʻrib chiqish va vakolatli organlar va tashkilotlar bilan kelishish tartibotlarini amalga oshirishga moʻljallangan avtomatlashtirilgan axborot tizimi;
yer uchastkasining boshlangʻich narxi — yer uchastkasiga mulk va ijara huquqining auksionga qoʻyish uchun belgilangan narxi;
(3-bandning uchinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
yagona elektron savdo maydonchasi (keyingi oʻrinlarda savdo maydonchasi deb ataladi) — elektron onlayn-auksionlarni tashkil etish va oʻtkazish uchun zarur axborotni kiritish, saqlash va qayta ishlash, shuningdek, manfaatdor shaxslarning elektron onlayn-auksionlar jarayonlaridan bevosita foydalanish imkonini taʼminlaydigan axborot tizimi;
elektron onlayn-auksion (keyingi oʻrinlarda auksion deb ataladi) — savdo maydonchasi orqali tadbirkorlik va shaharsozlik faoliyatini amalga oshirish uchun yer uchastkasiga mulk va ijara huquqini sotish boʻyicha ochiq auksion;
(3-bandning beshinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
operator — savdo maydonchasi orqali tadbirkorlik va shaharsozlik faoliyatini amalga oshirish uchun yer uchastkasiga mulk va ijara huquqini amalga oshirish boʻyicha ochiq auksionlarni tashkil etuvchi va oʻtkazuvchi ixtisoslashgan tashkilot;
(3-bandning oltinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
vakolatli tashkilotlar — xulosa beradigan organ — Qoraqalpogʻiston Respublikasi Ekologiya va atrof muhitni muhofaza qilish qoʻmitasi, viloyatlar va Toshkent shahar ekologiya va atrof muhitni muhofaza qilish boshqarmalari; materiallarini kelishadigan tashkilot — Oʻzbekiston Respublikasi Madaniyat vazirligi huzuridagi Madaniy meros departamenti Qoraqalpogʻiston Respublikasi, viloyatlar va Toshkent shahar madaniy meros boshqarmalari;
auksion ishtirokchisi — auksionda ishtirok etish uchun ariza bergan va unda ishtirok etishga ruxsat etilgan jismoniy yoki yuridik shaxs;
lot — auksionda sotiladigan yer uchastkasiga mulk va ijara huquqi;
(3-bandning toʻqqizinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
shaxsiy hisobraqam — operatorning maʼlumotlar bazasida roʻyxatga olingan operatsiyalarni amalga oshirish uchun operatorning ichki elektron tizimida operator tomonidan elektron savdo ishtirokchisiga ochiladigan hisobraqam;
savdo maydonchasida texnik uzilish — auksion jarayonida bir yoki bir nechta ishtirokchining ishtirok etish yoki operatorning xizmat koʻrsatish imkoniyatini cheklaydigan elektron savdo maydonchasidagi texnik nosozliklar;
nohalol auksion ishtirokchisi — ketma-ket ikki marta auksion shartlarini buzgan yoki lot qiymatini toʻliq toʻlamagan auksion ishtirokchisi;
nohalol auksion ishtirokchilari reyestri — operator tomonidan shakllantiriladigan nohalol auksion ishtirokchilarining elektron reyestri.
4. Tadbirkorlik va shaharsozlik faoliyatini amalga oshirish uchun yer uchastkalari auksion orqali Oʻzbekiston Respublikasi fuqarolari va Oʻzbekiston Respublikasi rezidentlari boʻlgan yuridik shaxslariga mulk huquqi yoki ijara huquqi asosida, boshqa jismoniy va yuridik shaxslarga ijara huquqi asosida ushbu Nizomga ilovaga muvofiq sxema boʻyicha beriladi.
(4-band Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
5. Yer uchastkasini tanlash materiallari Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi (keyingi oʻrinlarda “Davyergeodezkadastr” qoʻmitasi deb ataladi), Qoraqalpogʻiston Respublikasi Qurilish vazirligi, viloyatlar va Toshkent shahar qurilish bosh boshqarmalari (arxitektura va rejalashtirish topshirigʻini ishlab chiqish boʻyicha), tuman (shahar)lar qurilish boʻlimlari (yer uchastkasini tanlash uchun boshqa materiallarni tayyorlash va kelishish boʻyicha) tomonidan tayyorlanadi.
Yer uchastkasini tanlash materiallarini kelishish va (yoki) ular boʻyicha xulosalar berish ushbu Nizomda nazarda tutilgan tartibda vakolatli tashkilotlar tomonidan amalga oshiriladi.
6. Qoraqalpogʻiston Respublikasi, viloyatlar va Toshkent shahar yer tuzish va koʻchmas mulk kadastri davlat korxonalarining tegishli tuman (shahar) filiallari (keyingi oʻrinlarda “Davyergeodezkadastr” organlari deb ataladi) yer uchastkasini tanlash materiallarini, shu jumladan yer uchastkasining topografik xaritasini tayyorlaydi, yer uchastkasiga tutash yer uchastkalari (obyektlar)ning belgilangan maqsadi turlari haqidagi maʼlumotlarni shakllantiradi, shuningdek, yer uchastkasi chegaralarini naturada belgilash ishlarini amalga oshiradi hamda yer uchastkasining boshlangʻich narxini belgilaydi.
Bunda “Davyergeodezkadastr” qoʻmitasi organlarining yer uchastkasini tanlash materiallarini tayyorlash ishlarining qiymati quyidagi miqdorlarda belgilanadi:
yer uchastkasi maydoni 0,01 gektardan koʻp boʻlmaganda — eng kam bazaviy hisoblash miqdorining ikki baravari;
yer uchastkasi maydoni 0,01 gektardan koʻp, lekin 0,05 gektardan koʻp boʻlmaganda — eng kam bazaviy hisoblash miqdorining uch baravari;
yer uchastkasi maydoni 0,05 gektardan koʻp, lekin 0,1 gektargacha boʻlganda — eng kam bazaviy hisoblash miqdorining toʻrt baravari;
yer uchastkasi maydoni 0,1 gektar yoki undan koʻp boʻlganda — eng kam bazaviy hisoblash miqdorining besh baravari miqdorida.
7. Qoraqalpogʻiston Respublikasi Qurilish vazirligi, viloyatlar va Toshkent shahar qurilish bosh boshqarmalari, tuman (shahar)lar qurilish boʻlimlari (keyingi oʻrinlarda Qurilish organlari deb ataladi) ushbu Nizomning 14-bandida nazarda tutilgan yer uchastkasini tanlash materiallarini tayyorlaydi, bunda qurilish organlari tomonidan amalga oshiriladigan ishlarning qiymati quyidagi miqdorlarda belgilanadi:
a) arxitektura va rejalashtirish topshirigʻini (keyingi oʻrinlarda ART deb ataladi) ishlab chiqish uchun — eng kam bazaviy hisoblash miqdorining toʻrt baravari;
b) yer uchastkasini tanlashga doir boshqa materiallarni tayyorlash uchun — eng kam bazaviy hisoblash miqdorining ikki baravari miqdorida.
8. ARTni ishlab chiqish qiymati tuman (shahar) hokimligi tomonidan mahalliy budjetning qoʻshimcha manbalari hisobidan ART ishlab chiqilgan kunda toʻliq toʻlab beriladi.
Ushbu Nizomning 6-bandi hamda 7-bandining “b” kichik bandida nazarda tutilgan yer uchastkasini tanlash materiallarini tayyorlash ishlarining kiymati ushbu Nizomda belgilangan tartibda auksionda yer uchastkasiga mulk va ijara huquqini sotishdan tushadigan mablagʻlar hisobidan qoplanadi.
(8-bandning ikkinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
9. Vakolatli tashkilotlar tomonidan yer uchastkasini tanlash materiallarini kelishish va (yoki) ular boʻyicha xulosalar berish “YERELEKTRON” AATga yer uchastkasi haqidagi maʼlumotlar joylashtirilgan kundan boshlab besh ish kuni ichida amalga oshiriladi.
Yer uchastkasini tanlash materiallari boʻyicha kelishish va xulosalar berish faqat “YERELEKTRON” AAT orqali amalga oshiriladi.
Oʻzbekiston Respublikasi Sogʻliqni saqlash vazirligi hamda Davlat geologiya va mineral resurslar qoʻmitasi “Davyergeodezkadastr” qoʻmitasiga “YERELEKTRON” AAT orqali tadbirkorlik faoliyati uchun berilishi mumkin boʻlmagan hududlar koordinatalarini koʻrsatgan holda elektron xaritalarni taqdim etadi.
Taqdim etilgan elektron xaritalarda tadbirkorlik faoliyati uchun berilishi mumkin boʻlmagan hududlar koordinatalari mavjud boʻlmagan taqdirda, yer uchastkasini tanlash materiallari kelishilgan, ular boʻyicha xulosalar esa ijobiy deb hisoblanadi.
Elektron xaritalarni taqdim etish, shuningdek, vakolatli tashkilotlar tomonidan yer uchastkasini tanlash materiallarini kelishish va (yoki) ular boʻyicha xulosalar berish, shu jumladan Oʻzbekiston Respublikasi Ekologiya va atrof muhitni muhofaza qilish davlat qoʻmitasi organlari tomonidan ekologik ekspertizadan oʻtkaziladigan obyektlarni qurishga yer uchastkasini tanlash materiallari boʻyicha xulosa berish uchun toʻlov undirilmaydi.
2-bob. Auksionlarga chiqarish uchun yer uchastkasini tanlash materiallarini tayyorlash
1-§. Yer uchastkasini tanlash materiallarini kelishish va yer uchastkasini “YERELEKTRON” AATga joylashtirish tartibi
10. “Davyergeodezkadastr” qoʻmitasi organlari yerlarni xatlovdan oʻtkazish natijalariga koʻra, boʻsh yer uchastkalarini “YERELEKTRON” AATga har oyning 5 va 20-sanalarida joylashtirishni taʼminlaydi.
Jismoniy va yuridik shaxslar “YERELEKTRON” AATda aniq investitsiya majburiyatlari bilan birga yer uchastkasi va rejalashtirilayotgan qurilish obyekti toʻgʻrisidagi maʼlumotlarni keyinchalik ularni auksionga qoʻyish masalasini belgilangan tartibda koʻrib chiqish uchun joylashtirish boʻyicha takliflar kiritish huquqiga ega.
“Davyergeodezkadastr” qoʻmitasi organlari jismoniy yoki yuridik shaxsning taklifi kelib tushgan kundan eʼtiboran besh ish kuni ichida qishloq joylarda turgʻun chakana savdo shahobchasini qurish moʻljallangan yerlar boʻyicha uch ish kuni ichida yer uchastkasi boʻyicha zarur materiallarni koʻrib chiqadi va tayyorlaydi, natijasi boʻyicha taklif etilgan yer uchastkasini “YERELEKTRON” AATga joylashtiradi yoki sabablarni koʻrsatgan holda joylashtirishni rad etadi.
(10-bandning uchinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
Turizmni rivojlantirish davlat qoʻmitasi turizm infratuzilmasi obyektlarini rivojlantirish hududlarida boʻsh yer uchastkalarini aniqlaydi va Oʻzbekiston Respublikasi Prezidentining 2017-yil 16-avgustdagi PQ-3217-son qarori bilan tashkil etilgan Turizmni rivojlantirish boʻyicha muvofiqlashtiruvchi kengashga kelishish uchun, yer tuzish va koʻchmas mulk kadastri davlat korxonasining tuman (shahar) filiallari yer uchastkasini zaxira olish uchun yuboradi.
Turizmni rivojlantirish boʻyicha muvofiqlashtiruvchi kengashning ijobiy qarori asosida turizm infratuzilmasi obyektlarini rivojlantirish hududlarida boʻsh yer uchastkalari “YERELEKTRON” AATda “Davyergeodezkadastr” qoʻmitasi organlari tomonidan besh ish kunida zaxiraga olinadi. Zaxiraga olingan yer uchastkalarida turizm infratuzilmasi obyektlarini joylashtirish maqsadida Turizmni rivojlantirish davlat qoʻmitasi tomonidan rejalashtirish va loyihalashtirish ishlari tashkil etiladi va “YERELEKTRON” AATda taklif tashabbus qilinadi. Turizmni rivojlantirish davlat qoʻmitasi tomonidan “YERELEKTRON” AATda takliflar tashabbus qilinganida “Davyergeodezkadastr” organlari tomonidan besh ish kuni mobaynida qonunchilikda nazarda tutilgan zarur materiallar tayyorlanadi. Bunda yer uchastkasini tanlash materiallarini tayyorlash ishlarining qiymati qonunchilikda belgilangan tartibda qoplanadi.
(10-band Oʻzbekiston Respublikasi Vazirlar Mahkamasining 2020-yil 10-iyuldagi 433-sonli qaroriga asosan uchinchi va toʻrtinchi xatboshilar bilan toʻldirilgan — Qonun hujjatlari maʼlumotlari milliy bazasi, 10.07.2020-y., 09/20/433/1140-son)
11. “YERELEKTRON” AATga joylashtiriladigan har bir yer uchastkasi haqidagi maʼlumotlar quyidagilarni oʻz ichiga olishi kerak:
yer uchastkasi, jumladan, uning maydoni (gektarda), yer uchastkasining yer fondi toifasi, mavjud majburiyatlar va boshqalar haqida qisqacha maʼlumot;
yer uchastkasini elektron davlat kadastr xaritasida koʻrsatish uchun yer uchastkasini topografik xaritada (koordinatali nuqtalari bilan), bunday xarita boʻlmagan taqdirda — elektron xaritada yer uchastkasining chegaralari va manzillarini (aholi punkti va koʻchalar, koʻcha boʻlmaganda esa mavjud obyektdan metr hisobidagi masofa koʻrsatiladi) M 1:500 dan M 1:1000 cha boʻlgan kattalikda koʻrsatilgan holda tegishli formatda (geojson, arcgis JSON, csv, kml va boshqalar) joylashtirish rejasi;
chegaradosh yer uchastkalaridan foydalanish turlari koʻrsatilgan vaziyat bilan bogʻliq sxema;
yer uchastkasini kamida ikki tomondan oʻrab turgan obyektlarning fotosurati (15 x 20 sm).
Har bir yer uchastkasiga oʻziga xos raqam beriladi.
12. “Davyergeodezkadastr” qoʻmitasining organlari “YERELEKTRON” AATga joylashtirilgan yer uchastkalari toʻgʻrisidagi maʼlumotlarning toʻliqligi va toʻgʻriligini, shu jumladan elektron xaritalarni taqdim etishda vakolatli tashkilotlar faoliyatini muvofiqlashtirish yoʻli bilan taʼminlaydi.
13. Jismoniy va yuridik shaxslar “YERELEKTRON” AATdan roʻyxatdan oʻtish orqali aniq investitsiya majburiyatlarini koʻrsatgan holda, yer uchastkasi va rejalashtirilgan qurilish obyekti toʻgʻrisidagi maʼlumotni joylashtirish boʻyicha takliflar kiritadi.
Jismoniy va yuridik shaxslarning takliflari mazkur Nizomda belgilangan tartibda koʻrib chiqiladi.
14. Qurilish organlari yer uchastkasi toʻgʻrisidagi maʼlumotlar “YERELEKTRON” AATga joylashtirilgan kundan boshlab besh ish kuni ichida ushbu yer uchastkasi toʻgʻrisida tegishli xulosani tayyorlaydi, bunda:
1) ushbu yer uchastkasida qurilishga ruxsat berilgan yoki taqiqlangan obyektlarning turlarini hududlarni rivojlantirish rejalari va qurilish ishlarini amalga oshirish boʻyicha tasdiqlangan shaharsozlik hujjatlari asosida aniqlaydi va zarur hollarda ularni:
a) tegishli hududlar va inshootlardan rejim asosida foydalanish hamda ularni ekspluatatsiya qilish;
b) yongʻin xavfsizligi;
v) yoʻl harakati xavfsizligi;
g) shaharsozlik norma va qoidalari, shuningdek, aholi punktlari va shaharlararo hududlarni hududiy rivojlantirish istiqbollari talablarga muvofiqligini kelishib beradi;
2) umumiy foydalanishdagi avtomobil yoʻllarigacha boʻlgan masofa toʻgʻrisidagi maʼlumotlarni shakllantiradi;
3) elektron hamkorlik orqali muhandislik-kommunikatsiya tarmoqlaridan foydalanuvchi tashkilotlarga muhandislik-kommunikatsiya tarmoqlariga ulanishga tegishli texnik shartlarni olish uchun soʻrov yuboradi.
15. Zarur hollarda, qurilish organlari obyektlarning turini aniqlashda “YERELEKTRON” AAT orqali ularning quyidagi talablarga muvofiqligini kelishadi:
a) tegishli hududlar va inshootlardan rejim asosida foydalanish hamda ularni ekspluatatsiya qilish boʻyicha — mazkur obyektlardan foydalanadigan hamda ularni ekspluatatsiya qiladigan tashkilotlar;
b) yongʻin xavfsizligi boʻyicha — yongʻin xavfsizligi boʻlimlari, Toshkent shahrida — yongʻin xavfsizligi boshqarmasi;
v) yoʻl harakati xavfsizligi boʻyicha — davlat yoʻl harakati xavfsizligi xizmati hududiy organlari;
g) shaharsozlik norma va qoidalari, shuningdek, aholi punktlari va qishloqlararo zonalarni hududiy rivojlantirish istiqbollari boʻyicha — tegishli hududiy arxitektura va shaharsozlik kengashlari (keyingi oʻrinlarda kengashlar deb ataladi) bilan.
Mazkur bandning “a — v” kichik bandlarida koʻrsatilgan tashkilotlar ularga soʻrov kelib tushgan kundan boshlab uch ish kun ichida “YERELEKTRON” AATga tegishli belgini qoʻyish orqali elektron raqamli imzo bilan tasdiqlagan holda materiallarni kelishadi yoki kelishishni rad etadi.
Kengashlar ularga soʻrov kelib tushgan kundan boshlab besh ish kunidan kechiktirmasdan navbatdagi majlisda har bir yer uchastkasi boʻyicha materiallarni koʻrib chiqadi. Kengash qarori u qabul qilingandan keyingi ish kundan kechiktirmasdan qurilish organlariga yuboriladi.
Kelishuv hech qanday eʼtiroz va shartlarsiz amalga oshiriladi.
Kelishuv rad etilganda, sohaga oid qonun hujjatlari normalariga havolalar qilingan holda, yer uchastkasini tadbirkorlik va shaharsozlik faoliyati uchun ajratish imkoni yoʻqligining asoslangan sabablari koʻrsatiladi hamda mazkur yer uchastkalari aynan qaysi jihatdan ushbu normalarga muvofiq emasligi aks ettiriladi.
Belgilangan muddatda javob taqdim etilmagan hollarda, yer uchastkasini tanlash materiallari kelishilgan hisoblanadi.
Mazkur bandda nazarda tutilgan muddatlar ushbu Nizomning 14-bandida koʻrsatilgan muddatga kiritilmaydi.
16. Qurilish organlarining xulosalari “YERELEKTRON” AATga elektron shaklda kiritiladi va elektron raqamli imzo bilan tasdiqlanadi.
Xulosalar ijobiy yoki salbiy boʻlishi mumkin. Xulosaning sarlavhasida “Ijobiy xulosa” yoki “Salbiy xulosa” degan soʻzlar koʻrsatiladi.
Ijobiy xulosada yer uchastkasiga mulk va ijara huquqi egasiga nisbatan shaharsozlik hamda boshqa norma va qoidalarga rioya etish talablari bayon etiladi.
(16-bandning uchinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
Salbiy xulosada sohaga oid qonun hujjatlari normalariga havolalar qilingan holda, tadbirkorlik yoki shaharsozlik faoliyatini amalga oshirish uchun yer uchastkalarini ajratish imkoni yoʻqligining asoslangan sabablari koʻrsatiladi hamda mazkur yer uchastkalari aynan qaysi jihatdan ushbu normalarga muvofiq emasligi aks ettiriladi.
17. “YERELEKTRON” AAT orqali qurilish organlarining ijobiy xulosasi olingandan soʻng besh ish kuni ichida:
a) Qoraqalpogʻiston Respublikasi Ekologiya va atrof muhitni muhofaza qilish qoʻmitasi, viloyatlar va Toshkent shahar ekologiya va atrof muhitni muhofaza qilish boshqarmalari yer uchastkasi boʻyicha tegishli xulosa tuzadi hamda uni elektron shaklda “YERELEKTRON” AATga kiritadi va elektron raqamli imzo bilan tasdiqlaydi.
Xulosalar ijobiy yoki salbiy boʻlishi mumkin. Xulosaning sarlavhasida “Ijobiy xulosa” yoki “Salbiy xulosa” degan soʻzlar koʻrsatiladi.
Ijobiy xulosada yer uchastkasiga mulk va ijara huquqi egasiga nisbatan shaharsozlik hamda boshqa norma va qoidalarga rioya etish talablari bayon etiladi.
(17-band “a” kichik bandining uchinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
Salbiy xulosada sohaga oid qonun hujjatlari normalariga havolalar qilingan holda, tadbirkorlik yoki shaharsozlik faoliyatini amalga oshirish uchun yer uchastkalarini ajratish imkoni yoʻqligining asoslangan sabablari koʻrsatiladi hamda mazkur yer uchastkalari aynan qaysi jihatdan ushbu normalarga muvofiq emasligi aks ettiriladi;
b) Oʻzbekiston Respublikasi Madaniyat vazirligi huzuridagi Madaniy meros departamenti Qoraqalpogʻiston Respublikasi, viloyatlar va Toshkent shahar madaniy meros boshqarmalari materiallarni kelishadi yoki kelishishni rad etadi.
Bunda “YERELEKTRON” AATda qabul qilingan qaror haqida elektron raqamli imzo bilan tasdiqlanadigan tegishli belgi qoʻyiladi.
Kelishuv hech qanday eʼtiroz va shartlarsiz amalga oshiriladi.
Kelishish rad etilganda, sohaga oid qonun hujjatlari normalariga havolalar qilingan holda, tadbirkorlik yoki shaharsozlik faoliyatini amalga oshirish uchun yer uchastkalarini ajratish imkoni yoʻqligining asoslangan sabablari koʻrsatiladi hamda mazkur yer uchastkalari aynan qaysi jihatdan ushbu normalarga muvofiq emasligi aks ettiriladi.
Belgilangan muddatda javob berilmagan hollarda, yer uchastkasini tanlash materiallari kelishilgan hamda ular yuzasidan xulosalar esa ijobiy hisoblanadi.
18. Muhandislik-kommunikatsiya tarmoqlaridan foydalanuvchi tashkilotlar soʻrov kelib tushgan kundan eʼtiboran uch ish kuni ichida qurilish organlariga elektron hamkorlik orqali muhandislik-kommunikatsiya tarmoqlariga ulanishning texnik shartlarini elektron shaklda yuboradi.
Texnik, shu jumladan qoʻshimcha shartlarni ishlab chiqish va ularni yuborish uchun toʻlov undirilmaydi.
19. Qurilish organlari muhandislik-kommunikatsiya tarmoqlariga ulanishning texnik shartlari kelib tushgan kundan eʼtiboran uch ish kuni ichida ART ishlab chiqadi va materiallarni elektron shaklda “YERELEKTRON” AATga kiritadi hamda ularni elektron raqamli imzo bilan tasdiqlaydi va bunda “YERELEKTRON” AAT orqali yer uchastkasini tanlash materiallari avtomatik rejimda tuman (shahar) hokimligiga yuboriladi.
20. Tuman (shahar) hokimligi yer uchastkasining materiallari kelib tushgan kundan boshlab besh ish kuni mobaynida Qoraqalpogʻiston Respublikasi Investitsiyalar va tashqi savdo vazirligi, viloyatlar va Toshkent shahar investitsiyalar va tashqi savdo boshqarmalari bilan kelishilgan holda, yer uchastkasiga investitsiya kiritish majburiyatlarini belgilaydi.
Tuman (shahar) hokimligi besh ish kunida turizm infratuzilmasi obyektlarini rivojlantirish hududlarida Turizmni rivojlantirish davlat qoʻmitasi va Qorqalpogʻiston Respublikasi Investitsiyalar va tashqi savdo vazirligi, viloyatlar va Toshkent shahar investitsiyalar va tashqi savdo boshqarmalari bilan kelishgan holda, yer uchastkalariga investitsiya kiritish majburiyatlarini belgilaydi.
(20-band Oʻzbekiston Respublikasi Vazirlar Mahkamasining 2020-yil 10-iyuldagi 433-sonli qaroriga asosan ikkinchi xatboshi bilan toʻldirilgan — Qonun hujjatlari maʼlumotlari milliy bazasi, 10.07.2020-y., 09/20/433/1140-son)
Bunda yer uchastkasiga mulk va ijara huquqini investitsiya majburiyatlarini qabul qilish sharti bilan olish toʻgʻrisidagi oldi-sotdi shartnomasi (keyingi oʻrinlarda Investitsiya majburiyatlari shartnomasi deb ataladi) avtomatik tarzda “YERELEKTRON” AAT tomonidan elektron shaklda shakllantiriladi va tuman (shahar) hokimining investitsiyalar boʻyicha oʻrinbosarining (agar u boʻlmagan taqdirda — boshqa oʻrinbosarining) elektron raqamli imzosi bilan tasdiqlanadi.
(20-bandning uchinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
21. “YERELEKTRON” AATga koordinatalari kiritilgan tadbirkorlik va shaharsozlik faoliyati uchun berilishi mumkin boʻlmagan hududlarda joylashgan, salbiy xulosalar berilgan yer uchastkalari auksionga chiqarilmaydi va ajratish imkoni yoʻqligining asoslangan sabablari koʻrsatilgan holda, “YERELEKTRON” AATda ushbu xulosa olingan kundan boshlab bir ish kuni ichida eʼlon qilinadi.
2-§. Tadbirkorlik va shaharsozlik faoliyatini amalga oshirish uchun taqdim etilmaydigan hududlarning koordinatalarini taqdim etish va ularni yangilash tartibi
22. Tadbirkorlik va shaharsozlik faoliyatini amalga oshirish uchun berilishi mumkin boʻlmagan hududlarning koordinatalari “YERELEKTRON” AAT orqali “Davyergeodezkadastr” qoʻmitasiga u tomonidan belgilanadigan shaklda taqdim etiladi.
Hududlarning koordinatalari zaruratga qarab, lekin har oyda kamida bir marta yangilanadi.
Davlat kadastrlarini yuritish sohasidagi vakolatli organlar kadastr maʼlumotlari shakllantirilishiga qarab, “Davyergeodezkadastr” qoʻmitasiga tadbirkorlik va shaharsozlik faoliyati uchun berilishi mumkin boʻlmagan hududlarning koordinatalarini “YERELEKTRON” AAT orqali taqdim etib borishlari shart.
3-§. Yer uchastkasiga mulk va ijara huquqini auksionga chiqarishga tayyorlash
(3-paragrafning nomi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
23. Yer uchastkasiga mulk va ijara huquqi “YERELEKTRON” AAT orqali yer uchastkasining boshlangʻich narxi va investitsiya majburiyatlari belgilangandan soʻng avtomatik ravishda qoʻshimcha qarorlar qabul qilinmasdan operatorga yuboriladi.
(23-band Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
24. Yer uchastkasiga mulk va ijara huquqining minimal qiymati har bir tuman (shahar) uchun har yili 10-iyun va 10-dekabrgacha Qoraqalpogʻiston Respublikasi Vazirlar Kengashi, viloyatlar, Toshkent shahar hokimliklari tomonidan Qoraqalpogʻiston Respublikasi Moliya vazirligi va viloyat hokimliklari moliya bosh boshqarmalari, Qoraqalpogʻiston Respublikasi va viloyatlar davlat soliq boshqarmalari, Qoraqalpogʻiston Respublikasi va viloyatlar yer resurslari va davlat kadastri boshqarmalari tavsiyalariga asosan quyidagi mezonlar boʻyicha tasdiqlanadi:
(24-bandning birinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
yer soligʻining yillik miqdori;
yer uchastkasini tanlash materiallarini tayyorlash ishlarining qiymati va yer uchastkasiga boʻlgan huquqlarni davlat roʻyxatidan oʻtkazishga oid xarajatlar;
yer uchastkasining joylashgan joyi;
muhandislik-kommunikatsiya tarmoqlariga ulanish nuqtalarining mavjudligi.
Har bir tuman (shahar) uchun yer uchastkasiga mulk va ijara huquqining minimal qiymati u tasdiqlangan sanadan eʼtiboran bir ish kuni ichida soliq organlari tomonidan “YERELEKTRON” AATga kiritiladi.
(24-bandning oltinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
Oxirgi tasdiqlangan yer uchastkasiga mulk va ijara huquqining minimal qiymati uning yangi qiymati tasdiqlangunga qadar amalda boʻladi.
(24-bandning yettinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
25. “Davyergeodezkadastr” qoʻmitasi organlari yer uchastkalari boʻyicha kelishilgan yoki ijobiy xulosa berilgan kundan boshlab besh ish kuni ichida yer uchastkasiga mulk va ijara huquqining tasdiqlangan minimal qiymati asosida yer uchastkasining boshlangʻich narxini belgilaydi.
(25-band Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
26. Yer uchastkasiga mulk va ijara huquqi ushbu Nizom bilan belgilangan tartibda kelishuv amalga oshirilganligi va ijobiy xulosa olinganligiga qarab, har bir yer uchastkasi boʻyicha alohida auksionga chiqariladi.
(26-band Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
27. Auksionga chiqarishda yer uchastkasi toʻgʻrisida koʻrsatilishi shart boʻlgan maʼlumotning minimal hajmi quyidagilarni oʻz ichiga olishi lozim:
yer uchastkasining oʻziga xos raqami va joylashgan joyi;
yer uchastkasi kiradigan yerlar toifasi;
yer uchastkasi maydoni (gektarda);
yer uchastkasiga tutash yer uchastkalari (obyektlari)ning belgilangan maqsadi va turlari;
umumiy foydalanishdagi avtomobil yoʻllarigacha boʻlgan masofa toʻgʻrisida maʼlumot;
mazkur yer uchastkasida qurilishga ruxsat berilgan yoki taqiqlangan obyektlar turlari roʻyxati;
muhandislik-kommunikatsiya tarmoqlariga ulanish uchun ART va texnik shartlar;
yer uchastkalarining boshlangʻich narxi;
ajratilgan yer uchastkasida obyektlarni qurish muddatlariga oid talablar;
yer uchastkasi boʻyicha yoki undan foydalanish huquqiga nisbatan mavjud cheklovlar;
investitsiya majburiyatlari shartnomasi;
investitsiya majburiyatlarining miqdori va bajarish muddati;
yer uchastkasidan foydalanish shartlari va tartibiga taalluqli boshqa axborot.
28. Yer uchastkasini auksionga chiqarish toʻgʻrisidagi maʼlumotlar ommaviy axborot vositalarida hamda “Davyergeodezkadastr” qoʻmitasi, Oʻzbekiston Savdo-sanoat palatasi, Oʻzbekiston Respublikasi Davlat aktivlarini boshqarish agentligi, Investitsiyalar va savdo vazirligining rasmiy veb-saytlarida eʼlon qilinishi lozim.
“Davyergeodezkadastr” qoʻmitasi organlari ommaviy axborot vositalarining soʻroviga asosan bir kun muddatda auksionga chiqarilgan yer uchastkalari toʻgʻrisidagi maʼlumotlarni taqdim etishi shart.
3-bob. Auksionni tashkil qilish va oʻtkazish
1-§. Auksionni tashkil qilish va oʻtkazishning umumiy shartlari
29. Operator yer uchastkasiga mulk va ijara huquqining auksionga qoʻyilishiga oid buyurtma kelib tushgan kundan boshlab bir ish kuni ichida auksion oʻtkazilishi toʻgʻrisidagi xabarnomani savdo maydonchasida joylashtiradi.
(29-band Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
30. Auksion unda Internet jahon axborot tarmogʻi orqali ishtirok etish imkonini beradigan va ariza qabul qilish hamda auksion gʻoliblarini aniqlash jarayonlariga aralashish imkoniyatlarini istisno qiluvchi maxsus dasturiy mahsulotdan foydalangan holda oʻtkaziladi.
31. Operator quyidagi majburiyatlarga ega:
auksionni belgilangan vaqtda tashkil etish;
auksionning inson omili aralashuvisiz oʻtishini taʼminlash;
dasturiy mahsulotlar, oʻz kompyuter texnikalarini, server qurilmalari, kommunikatsiya uskunalari va auksionni oʻtkazishda foydalaniladigan barcha vositalarini texnik uzilishlarsiz ishlashiga qaratilgan barcha zarur choralarni oʻz vaqtida, toʻliq va sifatli amalga oshirilishini tashkil etish;
auksion qoidalari buzilishining oldini olish va tezkorlik bilan bunday holatlarni aniqlash va bartaraf etish;
barcha ishtirokchilar uchun savdoda ishtirok etishda shart-sharoitlarning tengligini taʼminlash;
savdolarni oʻtkazishning oshkoraligi va ommaviyligini taʼminlash;
savdo ishtirokchilari va barcha manfaatdor taraflar uchun savdoga oid maʼlumotlarni qulay va tezkor ravishda doimiy oshkor etib borish.
Operator qonun hujjatlariga muvofiq boshqa majburiyatlarga ham ega boʻlishi mumkin.
32. Auksionda elektron raqamli imzo bilan tasdiqlangan elektron arizani yuborish va zakalat kiritish orqali ishtirok etiladi.
Auksionda fuqarolar, shuningdek, Oʻzbekiston Respublikasi rezidenti boʻlgan yuridik shaxslar, jumladan, chet el fuqarolari va yuridik shaxslari ishtirok etishga haqli.
33. Auksion narxlarni oshirish prinsipi boʻyicha oʻtkaziladi.
34. Ushbu Nizomda nazarda tutilgan holatlar va tartibda auksion oʻtkazilmagan deb eʼtirof etilganda, tegishli lot takroran auksionga chiqariladi.
Auksion oʻtkazilmagan deb topilganda, tegishli yer uchastkasining boshlangʻich narxini kamaytirishga yoʻl qoʻyilmaydi.
35. Operator auksionni tashkil qilish xizmatlari uchun mazkur Nizomning 73-bandida nazarda tutilgan miqdorda mukofot oladi.
2-§. Auksionni oʻtkazish toʻgʻrisidagi xabarnomani joylashtirish
36. Auksion oʻtkazilishi toʻgʻrisidagi xabarnoma (keyingi oʻrinlarda xabarnoma deb ataladi) buyurtma va belgilangan talablarga mos keladigan hujjatlar kelib tushganda, operator bir ish kuni davomida joylashtiradi.
Xabarnoma va lot haqidagi maʼlumotlar (hujjatlar) auksion boshlanishidan kamida 15 kalendar kundan avval operatorning veb-portalida joylashtiriladi.
Tegishli lot boʻyicha auksion boshlangach, veb-portalda avtomatik rejimda auksion boshlanganligi toʻgʻrisidagi axborot shakllantiriladi va eʼlon qilinadi.
Tegishli lot boʻyicha auksion nihoyasiga yetgach, veb-portalda avtomatik rejimda auksion tugagan vaqti va uning natijalari toʻgʻrisidagi axborot shakllantiriladi va eʼlon qilinadi.
37. Xabarnoma va lot boʻyicha maʼlumot quyidagilarni oʻz ichiga olishi zarur:
a) auksion oʻtkaziladigan sana, jumladan, uning boshlanish va tugash vaqti;
b) lot raqami va nomi;
v) auksionda ishtirok etish uchun buyurtmanomalarni qabul qilish sanasi va tugash vaqti;
g) auksion obyekti haqida mazkur Nizomning 27-bandida qoʻrsatilgan maʼlumotlar;
d) boshlangʻich narxdan foiz koʻrinishida va qatʼiy summada ifodalangan auksion qadami;
e) zakalat pulining boshlangʻich narxdan foiz koʻrinishida va qatʼiy summada ifodalangan miqdori, zakalat puli oʻtkazilishi lozim boʻlgan operatorning bank hisobraqami rekvizitlari;
j) boshqa qoʻshimcha maʼlumot (shu jumladan, fotosuratlar, Internet tarmogʻida keng foydalaniladigan kartografik servislarga oʻtish imkonini beruvchi, uning geolokatsiya va koordinatalari koʻrsatilgan va ularga bogʻlangan giperhavolalar).
38. Operator oʻz veb-portalida:
Shuningdek, ushbu Nizomning 37-bandida koʻrsatilgan hujjatlar va elektron auksionni oʻtkazish qoidalari bilan erkin tanishishni;
savdoga qoʻyilgan barcha lotlarni ularning maydoni, joylashuvi, narxi, investitsiya majburiyatlari miqdori va boshqa parametrlar boʻyicha filtrlagan holda, foydalanuvchilar uchun qulay formatlarda koʻrish hamda lotlar reyestri koʻrinishida umumfoydalaniladigan va mashinada oʻqiladigan formatlarda yuklab olishni;
oʻtkazilgan savdolarga oid barcha maʼlumotlarni (xaridorning shaxsini oshkor qilmagan holda) kunlik tarzda va muntazam (haftalik, oylik va choraklik) davriylik bilan bitimlar reyestri koʻrinishida umumfoydalaniladigan va mashinada oʻqiladigan formatlarda yuklab olishni;
foydalanuvchilar veb-portal yanada qulayroq ishlashi borasidagi fikrlarini erkin va oshkora bildirishi uchun maxsus veb-forum va ushbu maqsadlarda keng foydalaniladigan boshqa servislar va imkoniyatlar doimiy ishlashini taʼminlaydi.
Operator aholi va tadbirkorlarni ommaviy axborot vositalari orqali, shuningdek, boshqa usullarda elektron auksionlarda ishtirok etish tartibi haqida muntazam tanishtirib boradi.
3-§. Auksionda ishtirok etish shartlari
39. Auksionda ishtirok etish uchun jismoniy yoki yuridik shaxslar operator veb-portalida roʻyxatdan oʻtgan boʻlishi lozim.
Ariza taqdim etishdan avval jismoniy va yuridik shaxslar:
investitsiya majburiyatlari shartnomasi bilan tanishishi va uning shartlarini qabul qilishi;
lot haqidagi maʼlumotlar (hujjatlar) bilan tanishishi;
shaxsiy hisobraqamini oʻzi tanlagan lotning zakalat puli miqdoridan kam boʻlmagan miqdorda toʻldirishi lozim.
40. Auksionda ishtirok etish uchun arizalarni qabul qilish:
xabarnoma joylashtirilgan kundan boshlanadi va auksion oʻtkazilishidan oldingi kun soat 24-00 da yakunlanadi;
operatorning veb-portalida avtomatik tarzda amalga oshiriladi.
Qabul qilish uchun belgilangan muddat oʻtgandan keyin kelib tushgan arizalar qabul qilinmaydi.
41. Lotning zakalat puli uning boshlangʻich narxining 20 foizi miqdorida belgilanadi.
42. Auksion ishtirokchisi oʻz arizasini ariza qabul qilish uchun belgilangan vaqt oraligʻida operator veb-portali orqali oʻzgartirishga yoki chaqirib olishga haqli. Bunda operatorga xabarnoma yuborilishi va zakalat summasi auksion ishtirokchisining shaxsiy hisobraqamiga qaytarilishi operator veb-portalida avtomatik tarzda amalga oshiriladi.
43. Ariza avtomatik tarzda tekshiriladi. Tekshiruv natijalari va qabul qilingan qaror haqida arizachiga zudlik bilan xabar qilinadi.
44. Ariza mazkur Nizom talablariga muvofiq kelgan taqdirda, operator zudlik bilan arizachiga auksionda ishtirok etishiga ruxsat beradi, shuningdek, elektron pochta orqali arizachini auksion ishtirokchisi maqomini olganligi haqida qoʻshimcha ravishda xabardor qiladi.
Auksionning har bir ishtirokchisiga auksionda foydalanish uchun alohida shaxsiy tartib raqam beriladi.
Zakalat puli ishtirokchining shaxsiy hisobraqamidan avtomatik tarzda yechib olinib, operatorning bank hisobraqamiga oʻtkaziladi.
45. Ariza mazkur Nizom talablariga muvofiq kelmagan taqdirda, operator zudlik bilan uni rad etadi va bu haqida arizachiga elektron bildirishnoma yuboradi.
Bunda arizachi kamchiliklarni bartaraf qilgandan soʻng xabarnomada koʻrsatilgan ariza qabul qilish vaqtidan kechiktirmay, auksionda ishtirok etish uchun arizani takroran yuborishga haqli.
Operator unga kelib tushgan maʼlumot va xabarlarning mazmuni bilan bogʻliq huquqiy oqibatlar uchun javobgar emas.
46. Operator arizalar va ularga ilova qilingan hujjatlarning saqlanishini, shuningdek, qonun hujjatlarida nazarda tutilgan hollarda sir tutilishini taʼminlaydi.
47. Arizalarni qabul qilish davrida, shuningdek, auksion davomida operatorning veb-portalida auksion ishtirokchilari haqidagi maʼlumotlarni (jismoniy shaxsning familiyasi, ismi, otasining ismi, yashash manzili, yuridik shaxsning nomi va pochta manzili, soliq toʻlovchining identifikatsiya raqami, ishtirokchini aniqlash imkonini beradigan boshqa maʼlumotlarni) aks ettirishga yoʻl qoʻyilmaydi.
4-§. Auksionda ishtirok etish tartibi
48. Auksion operatorning veb-portalidagi xabarnomada koʻrsatilgan kun va vaqtda boshlanadi.
49. Auksion unga qoʻyilgan ikki va undan ortiq ishtirokchi mavjud boʻlganda oʻtkaziladi.
50. Auksion ish kuni mobaynida soat 9-00 dan 18-00 gacha oʻtkaziladi, mazkur Nizomning 54 — 56-bandida qayd etilgan hollar bundan mustasno.
51. Lotning boshlangʻich narxi yer uchastkasining boshlangʻich narxiga teng belgilanadi hamda ushbu narxning besh foiziga teng miqdori — auksion qadamining miqdori sifatida qayd etiladi.
52. Auksion uning ishtirokchilaridan lotni boshlangʻich narxdan bitta qadamga oshirilgan narxda sotib olish boʻyicha taklifni tasdiqlashni soʻrashdan boshlanadi.
53. Agar taklif berilgandan soʻng 10 daqiqa davomida auksion ishtirokchilaridan biri belgilangan qadamga oshirilgan lot narxini tasdiqlasa, keyingi taklifni tasdiqlash uchun vaqt yana 10 daqiqaga uzaytiriladi.
54. Agar tasdiqlangan oxirgi taklifdan soʻng 10 daqiqa davomida keyingi oshirilgan lot narxi boʻyicha taklif auksion ishtirokchilarining birontasi tomonidan tasdiqlanmasa, auksion uning natijalari haqidagi bayonnomani avtomatik tarzda shakllantirgan holda yakunlanadi. Lot narxi boʻyicha taklifni oxirgi tasdiqlagan ishtirokchi auksion gʻolibi deb topiladi.
55. Auksion ishtirokchilariga navbatdagi stavkani dastlab belgilangan qadamdan 5, 10 yoki 20 baravar miqdorda mustaqil belgilash imkoniyati beriladi.
56. Agar lot narxini oshirish boʻyicha taklifni oxirgi tasdiqlagan auksion ishtirokchisi buni auksionni oʻtkazish vaqti yakunlanishiga oʻn daqiqadan kam qolganda amalga oshirgan boʻlsa, auksionni oʻtkazish vaqti oxirgi taklif tasdiqlangan paytdan boshlab keyingi 10 daqiqaga uzaytiriladi. Keyingi har bir taklif auksionni oʻtkazish vaqtini oʻn daqiqadan uzaytirib boradi. Biroq, bunda auksionni oʻtkazish vaqti 3 soatdan ortiq boʻlmagan muddatga uzaytirilishi mumkin, auksion oʻtkaziladigan kun soat 21-00 ga qadar yakunlanishi lozim. Lot narxi boʻyicha oxirgi taklifni soat 21-00 ga qadar bildirgan ishtirokchi auksion gʻolibi deb topiladi.
57. Auksionni oʻtkazishga toʻsqinlik qiladigan savdo maydonchasida texnik uzilish sodir boʻlgan hollarda, auksion oʻtkazish sanasi va vaqti haqida auksion ishtirokchilariga xabar berilgan holda, auksion texnik uzilish bartaraf qilingan kundan keyingi kunda davom ettiriladi.
58. Auksion yakunlanganda operatorning veb-portalida avtomatik tarzda quyidagi maʼlumotlar aks ettiriladi:
lotning boshlangʻich narxi;
oxirgi va oxirgidan oldin tasdiqlangan takliflar (oxirgi va oxirgidan oldingi qadamlarni hisobga olgan holda, auksion ishtirokchilari tomonidan tasdiqlangan takliflar boʻyicha shakllangan narxlar);
auksion gʻolibining hamda oxirgidan oldingi taklifni tasdiqlagan ishtirokchining familiyasi, ismi, otasining ismi yoki nomi.
59. Auksion quyidagi hollarda oʻtkazilmagan deb topiladi:
a) auksionda ishtirok etish uchun uning bironta ham ishtirokchisi qoʻyilmagan boʻlsa, shu jumladan unda ishtirok etish uchun ariza kelib tushmagan boʻlsa;
b) auksionda ishtirok etish uchun faqat bir nafar ishtirokchi ariza topshirgan boʻlsa;
v) auksion ishtirokchilaridan hech biri yer uchastkasidan foydalanish huquqini auksion jarayonidan taklif etilgan narxda sotib olish istagini bildirmasa;
g) auksion gʻolibi va ushbu Nizomning 71-bandida belgilangan tartibda yer uchastkasiga mulk va ijara huquqini sotib olish taklif etilgan oxiridan oldingi taklifni bildirgan ishtirokchi uning bahosini belgilangan muddatda toʻliq toʻlamasa.
(59-bandning “g” kichik bandi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
60. Auksion oʻtkazilmagan deb topilganda, operatorning veb-portalida bu haqida uning sabablari, shuningdek, lotning boshlangʻich narxi koʻrsatilgan maʼlumot aks ettiriladi.
61. Auksion oʻtkazilmagan deb topilganda, lot mazkur Nizomda belgilangan tartibda takroran auksionga qoʻyiladi.
Bunda agar ushbu Nizomning 59-bandi “v” kichik bandiga asosan auksion ketma-ket 4-martadan ortiq amalga oshmagan deb topilgan taqdirda, bir yoki bir nechta ishtirokchining iltimosiga koʻra, “Davyergeodezkadastr” qoʻmitasi organlari tomonidan yer uchastkalarini birlashtirishga yoki ularni alohida qismlarga ajratishga yoʻl qoʻyiladi.
Bunday holatda:
a) operator auksiondan lotni olib tashlaydi va u boʻyicha maʼlumotlarni “YERELEKTRON” AAT orqali “Davyergeodezkadastr” qoʻmitasi organlariga qaytaradi;
b) “Davyergeodezkadastr” qoʻmitasi organlari bir ish kuni mobaynida qurilish organlari va tuman (shahar) hokimliklariga materiallarni yuboradi.
Qurilish organlari materiallar kelib tushgan kundan boshlab besh ish kuni mobaynida birlashtirilgan yoki ajratilgan yer uchastkalarida qurilishiga ruxsat etilgan yoki taqiqlangan obyektlar turlari roʻyxatini yangilaydi.
Tuman (shahar) hokimliklari yer uchastkalarida qurilishiga ruxsat etilgan yoki taqiqlangan obyektlar turlari roʻyxati aniqlangan kundan boshlab besh ish kuni mobaynida Qoraqalpogʻiston Respublikasi Investitsiyalar va tashqi savdo vazirligi, viloyatlar va Toshkent shahar investitsiyalar va tashqi savdo boshqarmalari bilan kelishilgan yer uchastkasiga nisbatan investitsiya majburiyatlarini aniqlaydi.
Bunda investitsiya majburiyatlari shartnomasi avtomatik tarzda “YERELEKTRON” AAT tomonidan elektron koʻrinishda shakllantiriladi va tuman (shahar) hokimining investitsiyalar boʻyicha oʻrinbosarining (agar u boʻlmagan taqdirda — boshqa oʻrinbosarining) elektron raqamli imzosi bilan tasdiqlanadi;
v) “Davyergeodezkadastr” qoʻmitasi organlari yer uchastkasining boshlangʻich narxini belgilaydi.
Bunda qayta tasdiqlash yoki ijobiy xulosalar olish talab qilinmaydi.
5-§. Lotni auksiondan chaqirib olish tartibi va muddatlari
62. Auksionga qoʻyish uchun operatorga yuborilgan yer uchastkasi auksion boshlanishidan oldingi ish kunida soat 18-00 ga qadar chaqirib olinishi mumkin.
63. Auksiondan chaqirib olish “Davyergeodezkadastr” qoʻmitasi tomonidan buyurtmani bekor qilish yoʻli bilan amalga oshiriladi.
Quyidagi hollarda buyurtma bekor qilinishi mumkin:
yer uchastkasi Oʻzbekiston Respublikasi Prezidenti va Vazirlar Mahkamasining qaroriga asosan ajratib berilganda;
yer uchastkasi boʻyicha muqaddam berilgan ijobiy xulosalar bekor qilinganda;
yer uchastkasi koordinatalari Oʻzbekiston Respublikasi Sogʻliqni saqlash vazirligi hamda Davlat geologiya va mineral resurslar qoʻmitasi tomonidan taqdim etilgan elektron xaritalar yangilanishi natijasida tadbirkorlik va (yoki) shaharsozlik faoliyati uchun taqdim etilmaydigan hududlarga kiritilganda;
tergovchi yoki sud qaroriga asosan.
Boshqa hollarda buyurtmani bekor qilishga yoʻl qoʻyilmaydi.
64. “Davyergeodezkadastr” qoʻmitasining buyurtmani bekor qilish haqidagi soʻroviga asos boʻluvchi hujjatlar ilova qilinadi.
65. Operator buyurtmani bekor qilish haqidagi soʻrov kelib tushgan paytdan boshlab darhol yer uchastkasini auksiondan chiqaradi, bu haqda veb-portalda eʼlon joylashtiradi hamda buyurtmanoma bergan ishtirokchilarning zakalat puli ularning shaxsiy hisobraqamiga qaytariladi.
6-§. Hisob-kitob qilish va auksion natijalari toʻgʻrisidagi bayonnomani rasmiylashtirish tartibi
66. Auksion gʻolibi auksion yakunlangan kundan boshlab besh ish kunidan kechiktirmay, lot qiymatini toʻliq toʻlashi lozim.
Bunda ushbu lot boʻyicha avval toʻlangan zakalat puli mol-mulk qiymatiga qoʻshib hisoblanadi.
Agar yer uchastkasining qiymati bazaviy hisoblash miqdorining besh ming barobaridan ortiq boʻlsa, auksion gʻolibi auksion natijalari toʻgʻrisidagi bayonnoma rasmiylashtirilgan kundan boshlab besh bank kunidan kechiktirmasdan, auksion davomida belgilangan narxning ellik foizi miqdorida avans toʻlovini kiritish huquqiga ega. Zakalat puli avans toʻlovi hisobiga oʻtkaziladi.
Qolgan mablagʻ auksion natijalari toʻgʻrisidagi bayonnoma rasmiylashtirilgan kundan boshlab oʻttiz kalendar kunidan kechiktirmay toʻlanadi.
Elektron savdo maydonchasida auksion orqali yer uchastkasiga boʻlgan huquqlarni sotishda oʻrnatilgan tartibda toʻlovlarni amalga oshirmagan taqdirda, yer uchastkasiga boʻlgan huquq investor (auksion gʻolibi)ning xarajatlari qoplanmagan holda bekor qilinadi.
67. Operator toʻlov toʻliq amalga oshirilgan kundan keyingi ish kunida, lot qiymatining QR-kodini (matrik shtrixli kod) qoʻllash orqali auksion natijalari toʻgʻrisidagi elektron bayonnomani rasmiylashtiradi.
Bayonnoma auksion gʻolibining shaxsiy kabinetiga, “YERELEKTRON” AAT orqali tuman (shahar) hokimligi va tuman (shahar) yer tuzish va koʻchmas mulk kadastri davlat korxonasining tegishli filialiga yuboriladi.
68. Auksion natijalari toʻgʻrisidagi bayonnomada quyidagi maʼlumotlar koʻrsatiladi:
a) oʻtkazilgan auksion sanasi toʻgʻrisida;
b) auksion gʻolibi toʻgʻrisida;
v) lot toʻgʻrisida, shu jumladan:
yer uchastkasining oʻziga xos raqami, maydoni va joylashgan joyi;
yer uchastkasiga tutash yer uchastkalarining (obyektlarining) belgilangan maqsadi va turlari.
Bayonnomaga quyidagilar ilova qilinadi:
ART va muhandislik-kommunikatsiya tarmoqlariga ulanish uchun texnik shartlar;
investitsiya majburiyatlarini bajarish uchun tarmoq jadvali;
investitsiya majburiyatlari shartnomasi.
69. Auksion natijalari toʻgʻrisidagi bayonnoma oldi-sotdi shartnomasi kuchiga ega boʻlib, ushbu yer uchastkasiga mulk va ijara huquqini auksion gʻolibi nomiga davlat roʻyxatidan oʻtkazish uchun asos hisoblanadi.
(69-bandning birinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
Yer uchastkalariga boʻlgan huquqlarni davlat roʻyxatidan oʻtkazish tuman (shahar) yer tuzish va koʻchmas mulk kadastri davlat korxonasining filiali tomonidan bayonnoma kelib tushgan kundan boshlab ikki ish kuni ichida amalga oshiriladi. Koʻchmas mulk obyektlariga boʻlgan huquqlarning davlat reyestridan yer uchastkasiga mulk va ijara huquqi davlat roʻyxatidan oʻtkazilganligi toʻgʻrisidagi koʻchirma auksion gʻolibiga belgilangan tartibda yuboriladi.
(69-bandning ikkinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
Bunda tuman (shahar) yer tuzish va koʻchmas mulk kadastri davlat korxonasining filiali tomonidan yer uchastkasi joylashgan joydagi davlat soliq xizmati organlariga qonun hujjatlarida belgilangan tartibda maʼlumot yuboriladi.
Yer uchastkalariga boʻlgan huquqlarni davlat roʻyxatidan oʻtkazish va Koʻchmas mulk obyektlariga boʻlgan huquqlarning davlat reyestridan koʻchirma qiymati Vazirlar Mahkamasining 2014-yil 10-iyuldagi 186-son qarori bilan tasdiqlangan Koʻchmas mulk obyektlarining davlat kadastri sohasida davlat xizmatlari qiymatini aniqlash tartibi bilan belgilanadi va ushbu Nizomda belgilangan tartibda yer uchastkasiga mulk va ijara huquqini auksionda sotishdan tushgan mablagʻlar hisobidan qoplanadi.
(69-bandning toʻrtinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
70. Tuman (shahar) hokimligi auksion natijalari toʻgʻrisidagi bayonnoma kelib tushgan kundan boshlab besh ish kuni mobaynida investitsiya majburiyatlarini bajarish uchun tarmoq jadvalini tayyorlaydi va uni auksion gʻolibiga beradi.
71. Agar auksion natijalariga koʻra, auksion gʻolibi besh ish kuni ichida lot qiymatini toʻliq toʻlamasa, operator keyingi kalendar kunidan kechiktirmay oxirgidan oldingi taklifni bildirgan auksion ishtirokchisiga elektron shaklda u auksion davomida taklif etgan narxda lot qiymatini besh ish kuni ichida toʻlashni taklif qiladi.
Agar oxirgidan oldingi taklifni bildirgan auksion ishtirokchisi besh ish kuni ichida lot qiymatini toʻliq toʻlasa, u auksion gʻolibi deb topiladi va unga mazkur Nizomning 66-67-bandlarida belgilangan tartibda auksion natijalari toʻgʻrisidagi bayonnoma rasmiylashtiriladi.
Agar auksion ishtirokchisi besh ish kuni ichida lotni sotib olish istagi yoʻqligi toʻgʻrisida operatorni xabardor qilsa yoki ushbu muddat ichida uning qiymatini toʻliq toʻlamasa, lotni sotib olishdan bosh tortgan deb hisoblanadi.
Mazkur Nizomning 66-bandi uchinchi xatboshi bundan mustasno.
7-§. Zakalat pulini qaytarish tartibi va shartlari
72. Auksion yakunlanganidan yoki oʻtkazilmagan deb topilganidan soʻng zakalat puli quyidagilarga qaytariladi:
oxirgidan oldingi taklifni bildirgan auksion ishtirokchisiga — auksion yakunlangan kundan boshlab oʻn ikki ish kuni ichida;
boshqa ishtirokchilarga — auksion yakunlangan yoki oʻtkazilmagan deb topilgan kundan boshlab uch ish kuni ichida.
Bunda zakalat puli auksion ishtirokchisining arizasiga asosan aynan shu lot boʻyicha takroriy auksionda qatnashish uchun operatorning bank hisobraqamida qoldirilishi mumkin.
Auksion obyektining qiymatini toʻliq toʻlamagan auksion ishtiroklariga (auksion gʻolibi va ikkinchi ishtirokchi), shuningdek, mazkur Qoidalarning 71-bandi uchinchi xatboshidi va 66-bandi toʻrtinchi xatboshida koʻrsatilgan auksion ishtirokchilariga zakalat puli qaytarilmaydi va operatorning tasarrufida qoladi.
4-bob. Auksiondan tushadigan mablagʻlarni taqsimlash
73. Yer uchastkasiga mulk va ijara huquqini auksion orqali sotishdan kelib tushgan pul mablagʻlari “Davyergeodezkadastr” qoʻmitasining maxsus hisobraqamiga koʻchiriladi va Qoʻmita tomonidan quyidagi tartibda taqsimlanadi:
(73-bandning birinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
a) mazkur Nizomning 6-bandida nazarda tutilgan miqdorda tegishli yer tuzish va koʻchmas mulk kadastri davlat korxonasining bank hisobraqamiga oʻtkazadi, uning 20 foizi “Davyergeodezkadastr” qoʻmitasining Yer munosabatlari va davlat kadastrlarini rivojlantirish jamgʻarmasining maxsus gʻaznachilik hisobraqamiga (4001);
b) ushbu Nizomning 7-band “b” kichik bandida nazarda tutilgan miqdorda tegishli qurilish organining bank hisobraqamiga;
v) ushbu Nizomning 69-bandida nazarda tutilgan miqdorda — tegishli yer tuzish va koʻchmas mulk kadastri davlat korxonasiga;
g) yer uchastkasiga mulk va ijara huquqini auksion orqali sotishdan kelib tushgan pul mablagʻlaridan mazkur bandning “a — v” kichik bandlarida nazarda tutilgan summalarni chegirib tashlagadan soʻng qolgan summadan 5 foiz — operatorga mukofot sifatida;
(73-bandning “g” kichik bandi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
d) mazkur bandning “a” — “g” kichik bandlarida nazarda tutilgan mablagʻlar chegirib tashlagandan soʻng qolgan summadan:
50 foizi — yer uchastkalari davlat organlari, muassasalari va korxonalari foydalanishida boʻlgan va ularning tashabbusi bilan elektron onlayn-auksionga qoʻyilgan taqdirda — ushbu davlat organlari va tashkilotlariga, qolgan hollarda — davlat va jamiyat ehtiyojlari uchun yer uchastkalarining olib qoʻyilishi munosabati bilan jismoniy va yuridik shaxslarga yetkazilgan zararlarni qoplash boʻyicha hududiy jamgʻarmaga;
50 foizi — Qoraqalpogʻiston Respublikasi Joʻqorgʻi Kengesi, xalq deputatlari viloyatlar hamda Toshkent shahar Kengashlari qarorlari asosida tegishli mahalliy budjeti daromadiga oʻtkaziladi.
(73-band “d” kichik bandining uchinchi xatboshisi Oʻzbekiston Respublikasi Prezidentining 2021-yil 30-dekabrdagi PQ-73-sonli qarori tahririda — Qonunchilik maʼlumotlari milliy bazasi, 30.12.2021-y., 07/21/73/1227-son)
(73-bandning “e” kichik bandi Oʻzbekiston Respublikasi Prezidentining 2021-yil 8-iyundagi PF-6243-sonli Farmoniga asosan 2021-yil 1-avgustdan chiqariladi — Qonunchilik maʼlumotlari milliy bazasi, 09.06.2021-y., 06/21/6243/0540-son)
5-bob. Ushbu nizom talablariga rioya etilishini tizimli nazorat va monitoring qilish
74. Davlat xizmatlari markazlari, prokuratura organlari va adliya organlari davlat organlari va boshqa tashkilotlar tomonidan ushbu Nizom talablariga soʻzsiz rioya etilishi boʻyicha tizimli nazorat va monitoringni amalga oshiradi.
Tizimli nazorat va monitoring yer uchastkasi materiallarini tayyorlash jarayoniga aralashmasdan, “YERELEKTRON” AAT orqali amalga oshiriladi.
75. Prokuratura va adliya organlari yer uchastkasi materiallarini tayyorlashning qonuniyligini taʼminlaydi va yer uchastkasi materiallarini tayyorlash jarayonining huquqni qoʻllash amaliyotini, shu jumladan vakolatli tashkilotlar tomonidan kelishuvni rad etish va salbiy xulosa berishning qonuniyligini, normativ-huquqiy hujjatlarni notoʻgʻri yoki qarama-qarshi qoʻllash amaliyotini, shuningdek, huquqni qoʻllash amaliyotida huquqbuzarlik sodir etilishiga olib keladigan salbiy omillarni, sabab va sharoitlarni bartaraf etish usullarini oʻrganadi.
76. Ushbu Nizomda nazarda tutilgan tartibni buzish davlat xizmatlari koʻrsatish talablari va tartibini buzish hisoblanadi.
77. Nizomda nazarda tutilgan tartib buzilishi aniqlangan taqdirda, davlat xizmatlari markazlari yoki adliya organlari Oʻzbekiston Respublikasi Adliya vazirligi huzuridagi Davlat xizmatlari agentligi yoki uning hududiy boshqarmalariga yoxud prokuratura organlariga buzilish holatini tasdiqlovchi zarur materiallarni yuboradi.
Maʼmuriy huquqbuzarliklar toʻgʻrisidagi ishlarni koʻrib chiqish va maʼmuriy jazo choralarini qoʻllash vakolatli shaxslar tomonidan qonun hujjatlarida belgilangan tartibda amalga oshiriladi.
6-bob. Yakunlovchi qoidalar
78. Auksion natijalari toʻgʻrisidagi bayonnomani auksion gʻolibining aybi boʻlmagan taqdirda, maʼmuriy tartib-qoidalarga rioya qilmaslik munosabati bilan bekor qilish yoki oʻzgartirish mumkin emas.
79. Investitsiya majburiyatlari toʻgʻrisidagi shartnomada nazarda tutilgan auksion gʻolibi majburiyatlarining bajarilishini nazorat qilish tuman (shahar) hokimliklari tomonidan amalga oshiriladi.
80. Auksion shartlarini buzgan, shu jumladan ketma-ket ikki marta lotning toʻliq qiymati toʻlanishini taʼminlamagan auksion ishtirokchisi nohalol auksion ishtirokchisi hisoblanadi va operator tomonidan olib boriladigan nohalol auksion ishtirokchilari reyestriga (keyingi oʻrinlarda reyestr deb ataladi) kiritiladi.
Auksion ishtirokchisini reyestrga kiritish toʻgʻrisidagi qaror operator tomonidan qabul qilinadi.
Reyestrga kiritilgan auksion ishtirokchilarining reyestrga kiritilgan paytdan eʼtiboran bir yil ichida yer uchastkasiga mulk va ijara huquqi sotiladigan auksionlarda ishtirok etishiga yoʻl qoʻyilmaydi.
(80-bandning uchinchi xatboshisi Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
Belgilangan muddat oʻtgach, reyestrga kiritilgan ishtirokchi avtomatik ravishda undan chiqarib tashlanadi.
81. Agar yer uchastkasiga mulk va ijara huquqi investitsiya majburiyatlari bilan sotilgan taqdirda, yer uchastkalarini, shu jumladan unda qurilgan bino va inshootlarni investitsiya majburiyatlari bajarilguniga qadar begonalashtirish, garovga qoʻyish, yuridik shaxslarning ustav fondlariga kiritish yoki boshqacha tarzda tasarruf etilishiga yoʻl qoʻyilmaydi.
(81-band Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
82. Ushbu Nizomni qoʻllashda yuzaga keladigan nizolar qonun hujjatlarida belgilangan tartibda hal etiladi.
83. Ushbu Nizom talablarini buzganlikda aybdor shaxslar qonun hujjatlarida belgilangan tartibda javobgar boʻladi.
84. Auksion paytida mol mulkni savdodan yechish boʻyicha bildirishnoma operatorga kelib tushganligi munosabati bilan yuzaga kelgan va lot bilan bogʻliq boʻlgan masalalar hamda nizolar sud tomonidan auksion gʻolibining qonuniy manfaatlarini va auksion natijalari toʻgʻrisidagi bayonnoma rasmiylashtirilganligi holatini hisobga olingan holda koʻrib chiqiladi.
Tadbirkorlik va shaharsozlik faoliyatini amalga oshirish uchun yer uchastkalarini elektron onlayn-auksion orqali berish tartibi toʻgʻrisidagi nizomga
ILOVA
Tadbirkorlik va shaharsozlik faoliyatini amalga oshirish uchun yer uchastkalarini onlayn-auksion orqali ijaraga va mulk huquqi asosida berish
SXEMASI

Bosqichlar

Subyektlar

Tadbirlar

Muddatlar

I. “YERELEKTRON” AATga boʻsh turgan yer uchastkalarini joylashtirish tartib-taomillari

1-bosqich

Qoraqalpogʻiston Respublikasi, viloyatlar va Toshkent shahar yer tuzish va koʻchmas mulk kadastri davlat korxonalarining tegishli tuman (shahar) filiallari (keyingi oʻrinlarda “Davyergeodezkadastr” organlari deb ataladi)

Yerlarni xatlovdan oʻtkazish natijalariga koʻra, boʻsh turgan yer uchastkalarini “YERELEKTRON” AATga mustaqil ravishda joylashtiradi.

Har oyning 5 va 20 sanasida


Jismoniy va yuridik shaxslar

Aniq investitsiya majburiyatlari bilan birga
boʻsh turgan yer uchastkasi va rejalashtirilayotgan qurilish obyekti toʻgʻrisidagi maʼlumotlarni keyinchalik ularni auksionga qoʻyish masalasini belgilangan tartibda koʻrib chiqish uchun “YERELEKTRON” AATga joylashtirish boʻyicha takliflar kiritadi.

Xohishiga koʻra


II. “YERELEKTRON” AAT orqali elektron shaklda amalga oshiriladigan tartib-taomillar


2-bosqich

“Davyergeodezkadastr” qoʻmitasi organlari

1. Taklif etilgan yer uchastkasi boʻyicha zarur materiallarni koʻrib chiqiladi hamda tegishli materiallar tayyorlanadi.

2. Taklif etilgan yer uchastkasini “YERELEKTRON” AATga joylashtiradi yoki sabablarini koʻrsatgan holda joylashtirishni rad etadi.

5 ish kuni ichida


3-bosqich

Qoraqalpogʻiston Respublikasi Qurilish vazirligi, viloyatlar va Toshkent shahar qurilish bosh boshqarmalari, tuman (shahar)lar qurilish boʻlimlari (keyingi oʻrinlarda Qurilish organlari deb ataladi)

1. Hududlarni rivojlantirish rejalari va qurilish ishlarini amalga oshirish boʻyicha tasdiqlangan shaharsozlik hujjatlari asosida ushbu yer uchastkasida qurilishga ruxsat berilgan yoki taqiqlangan obyektlarning turlarini aniqlaydi.

Zarur hollarda ularni:

a) tegishli hududlar va inshootlaridan rejim asosida foydalanish hamda ularni ekspluatatsiya qilish;

b) yongʻin xavfsizligi;

v) yoʻl harakati xavfsizligi;

g) shaharsozlik norma va qoidalari, shuningdek, aholi punktlari va shaharlararo hududlarni hududiy rivojlantirish istiqbollari talablarga muvofiqligini kelishib beradi.

2. Umumiy foydalanishdagi avtomobil yoʻllarigacha boʻlgan masofa toʻgʻrisidagi maʼlumotlarni shakllantiradi.

3. Elektron hamkorlik orqali muhandislik-kommunikatsiya tarmoqlaridan foydalanuvchi tashkilotlarga tegishli muhandislik-kommunikatsiya tarmoqlariga ulanishga texnik shartlarni olish uchun soʻrov yuboradi.

5 ish kuni ichida


1. Hududlar va inshootlardan rejim asosida foydalanadigan hamda ularni ekspluatatsiya qiladigan tashkilotlar.

2. Yongʻin xavfsizligi boʻlimlari, Toshkent shahrida — yongʻin xavfsizligi boshqarmasi.

3. Davlat yoʻl h?rakati xavfsizligi xizmati hududiy organlari.

4. Hududiy arxitektura va shaharsozlik kengashlari.

Yer uchastkasida qurilishiga ruxsat berilgan yoki taqiqlangan obyektlarning turlarini kelishadi yoki kelishishni rad etadi.

3 ish kuni ichida*

Soʻrov kelib tushgan kundan boshlab navbatdagi majlisda har bir yer uchastkasi boʻyicha materiallarni koʻrib chiqadi.

5 ish kuni ichida*


4-bosqich

1. Qoraqalpogʻiston Respublikasi Ekologiya va atrof-muhitni muhofaza qilish qoʻmitasi, viloyatlar va Toshkent shahar ekologiya va atrof muhitni muhofaza qilish boshqarmalari.

Boʻsh turgan yer uchastkasi boʻyicha xulosa beradi.

5 ish kuni ichida

2. Oʻzbekiston Respublikasi Madaniyat vazirligi huzuridagi Madaniy meros departamenti Qoraqalpogʻiston Respublikasi, viloyatlar va Toshkent shahar madaniy meros boshqarmalari.

Yer uchastkasini tanlash materiallarini kelishadi yoki kelishishni rad etadi.


5-bosqich

Muhandislik-kommunikatsiya tarmoqlaridan foydalanuvchi tashkilotlar

Muhandislik-kommunikatsiya tarmoqlariga ulanish uchun texnik shartlar ishlab chiqadi va qurilish organlariga yuboradi.

3 ish kuni ichida*


6-bosqich

Qurilish organlari

1. Arxitektura-rejalashtirish topshirigʻini ishlab chiqadi va materiallarni elektron shaklda “YERELEKTRON” AATga kiritadi.

2. Yer uchastkasini tanlash materiallari avtomatik rejimda “YERELEKTRON” AAT orqali tuman (shahar) hokimligiga yuboriladi.

3 ish kuni ichida


7-bosqich

Tuman (shahar) hokimligi

1. Qoraqalpogʻiston Respublikasi Investitsiyalar
va tashqi savdo vazirligi, viloyatlar va Toshkent shahar investitsiyalar va tashqi savdo boshqarmalari bilan kelishilgan holda yer uchastkasiga investitsiya kiritish majburiyatlarini belgilaydi.

2. Investitsiya kiritish majburiyatlari toʻgʻrisidagi shartnomasini elektron raqamli imzosi bilan tasdiqlaydi.

5 ish kuni ichida

“Davyergeodezkadastr” qoʻmitasi organlari

3. Yer uchastkasining boshlangʻich narxini belgilaydi.

Yer uchastkasiga mulk va ijara huquqi auksionga chiqarish uchun qoʻshimcha qaror qabul qilinmasdan avtomatik ravishda yuboriladi.


III. Auksion oʻtkazishda savdo maydonchasi orqali elektron shaklda amalga oshiriladigan tartib-taomillari


8-bosqich

Operator

Savdo maydonchasida auksion oʻtkazilishi boʻyicha xabarnoma joylashtiradi.

1 ish kuni ichida


9-bosqich

Jismoniy va yuridik shaxslar

1. Elektron raqamli imzo bilan tasdiqlangan elektron arizani yuboradi va zakalat kiritadi.

15 kun ichida

2. Auksionda ishtirok etadi.

Auksion oʻtkaziladigan kuni soat 9:00 dan 18:00 gacha, ayrim hollarda 21:00 gacha


10-bosqich

Auk�ion gʻolibi

1. Agar yer uchastkasining qiymati bazaviy hisoblash miqdorining besh ming barobaridan oshmasa toʻlov toʻliq amalga oshiriladi.

2. Agar yer uchastkasining qiymati bazaviy hisoblash miqdorining besh ming barobaridan oshsa:

5 ish kun ichida

a) auksion davomida belgilangan kiymatning ellik foizi miqdorida avans toʻlovini amalga oshiradi;

5 bank ish kuni ichida

b) qiymatning qolgan qismini toʻliq toʻlaydi.

30 kalendar kun ichida


11-bosqich

Operator

1. QR-kodini qoʻllash orqali auksion natijalari toʻgʻrisidagi elektron bayonnomani rasmiylashtiradi.

2. Bayonnomani gʻolibning shaxsiy kabinetiga “YERELEKTRON” AAT orqali tuman (shahar) hokimligi va tuman (shahar)dagi yer tuzish va koʻchmas mulk kadastri davlat korxonasining tegishli filialiga hamda tuman (shahar) hokimligiga yuboradi.

3. Auksion natijalari toʻgʻrisida xabar eʼlon qiladi.

4. Kelib tushgan pul mablagʻlarini taqsimlaydi.

1 kun ichida


12-bosqich

“Davyergeodezkadastr” qoʻmitasi organlari

Yer uchastkasiga boʻlgan huquqni davlat roʻyxatidan oʻtkazadi va auksion gʻolibiga Davlat reyestridan elektron koʻchirma yuboradi.

2 �sh kuni ichida

Tuman (shahar) hokimligi

Investitsiya majburiyatlarini bajarish uchun tarmoq jadvalini tayyorlaydi va uni auksion gʻolibiga beradi.

5 ish kuni ichida

Izoh. Ushbu muddatlar materiallarni kelishish muddatlariga kirmaydi.
(ilovaning matni Oʻzbekiston Respublikasi Prezidentining 2021-yil 8-iyundagi PF-6243-sonli Farmoni tahririda — Qonunchilik maʼlumotlari milliy bazasi, 09.06.2021-y., 06/21/6243/0540-son — 2021-yil 1-avgustdan kuchga kiradi)
Vazirlar Mahkamasining 2019-yil 20-dekabrdagi 1023-son qaroriga
2-ILOVA
“YERELEKTRON” avtomatlashtirilgan axborot tizimiga ulanadigan vazirliklar, idoralar va tashkilotlar
ROʻYXATI
1. Oʻzbekiston Respublikasi Vazirlar Mahkamasi.
2. Qoraqalpogʻiston Respublikasi Vazirlar Kengashi, viloyatlar, Toshkent shahri va tumanlar (shaharlar) hokimliklari.
3. Oʻzbekiston Respublikasi Qurilish vazirligi va uning hududiy boʻlinmalari.
4. Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik agentligi va uning hududiy boʻlinmalari.
5. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi va uning hududiy boʻlinmalari.
6. Oʻzbekiston Respublikasi Davlat geologiya va mineral resurslar qoʻmitasi va uning hududiy boʻlinmalari.
7. Oʻzbekiston Respublikasi Ekologiya va atrof muhitni muhofaza qilish davlat qoʻmitasi va uning hududiy boʻlinmalari.
8. Oʻzbekiston Respublikasi Davlat aktivlarini boshqarish agentligi va Davlat aktivlarini boshqarish agentligi qoshidagi “Elektron onlayn-auksionlarni tashkil etish markazi” DUK.
9. Oʻzbekiston Respublikasi Madaniyat vazirligi Madaniy meros obyektlarini muhofaza qilish va ulardan foydalanish ilmiy ishlab chiqarish bosh boshqarmasining hududlararo (hududiy) davlat inspeksiyalari.
10. Oʻzbekiston Respublikasi Bosh prokuraturasi va Qoraqalpogʻiston Respublikasi, viloyatlar, Toshkent shahar va tumanlar (shaharlar) prokuraturalari.
11. Oʻzbekiston Respublikasi Adliya vazirligi, Qoraqalpogʻiston Respublikasi Adliya vazirligi, viloyatlar, Toshkent shahar adliya boshqarmalari va tumanlar (shaharlar) adliya boʻlimlari.
12. Oʻzbekiston Respublikasi Adliya vazirligi huzuridagi Davlat xizmatlari agentligi, uning hududiy boshqarmalari va davlat xizmatlari markazlari.
13. Oʻzbekiston Respublikasi Savdo-sanoat palatasi va uning hududiy boʻlinmalari.
14. Oʻzbekiston Respublikasi Turizmni rivojlantirish davlat qoʻmitasi.
(14-band Oʻzbekiston Respublikasi Vazirlar Mahkamasining 2020-yil 10-iyuldagi 433-sonli qaroriga asosan kiritilgan — Qonun hujjatlari maʼlumotlari milliy bazasi, 10.07.2020-y., 09/20/433/1140-son)
15. Oʻzbekiston Respublikasi Vazirlar Mahkamasining tegishli qarorlariga asosan “YERELEKTRON” avtomatlashtirilgan axborot tizimiga ulanishi belgilangan boshqa tashkilotlar.
Eslatma. Davlat organlari tizimga elektron hukumatning idoralararo maʼlumotlar uzatish tarmogʻi orqali belgilangan tartibda ulanadi.
Vazirlar Mahkamasining 2019-yil 20-dekabrdagi 1023-son qaroriga
3-ILOVA
Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan ayrim qarorlari
ROʻYXATI
1. Vazirlar Mahkamasining “Tadbirkorlik va shaharsozlik faoliyatini amalga oshirish uchun yer uchastkalarini doimiy foydalanishga berishning zamonaviy va shaffof mexanizmlarini joriy etish chora-tadbirlari toʻgʻrisida” 2018-yil 30-iyundagi 493-son qarori (Oʻzbekiston Respublikasi QHT, 2018-y., 6-son, 158-modda).
2. Vazirlar Mahkamasining “Oʻzbekiston Respublikasi Hukumatining ayrim qarorlariga qoʻshimchalar kiritish toʻgʻrisida (Oʻzbekiston Respublikasi Prezidentining “Oʻzbekiston Respublikasi investitsiya dasturini shakllantirish va amalga oshirishning sifat jihatidan yangi tizimiga oʻtish chora-tadbirlari toʻgʻrisida” 2019-yil 14-maydagi PF-5717-son Farmoni)” 2019-yil 9-avgustdagi 653-son qaroriga ilovaning 1-bandi.
3. Vazirlar Mahkamasining “Yer uchastkalari berish va yakka tartibdagi uy-joy qurish uchun yer uchastkalariga meros qilib qoldiriladigan umrbod egalik qilish huquqini realizatsiya qilishning zamonaviy va shaffof mexanizmlarini joriy etish boʻyicha qoʻshimcha chora-tadbirlar toʻgʻrisida” 2019-yil 28-yanvardagi 63-son qarorining 3-bandi va qarorga 3-ilova.
4. Vazirlar Mahkamasining “Oʻzbekiston Respublikasi Madaniyat vazirligi huzuridagi Madaniy meros departamenti faoliyatini tashkil etish hamda moddiy madaniy meros obyektlarini muhofaza qilish va ulardan foydalanishga oid ayrim normativ-huquqiy hujjatlarni tasdiqlash toʻgʻrisida” 2019-yil 30-martdagi 265-son qaroriga 13-ilovaning 9-bandi.

(Qonun hujjatlari maʼlumotlari milliy bazasi, 21.12.2019-y., 09/19/1023/4182-son; 10.07.2020-y., 09/20/433/1140-son; Qonunchilik maʼlumotlari milliy bazasi, 09.06.2021-y., 06/21/6243/0540-son, 30.12.2021-y., 07/21/73/1227-son)