Hujjat kuchini yo‘qotgan " " 01.08.2018

Oʻzbekiston Respublikasi Vazirlar Mahkamasining

Qurilish sohasida islohotlarning amalga oshirilishi monitoringi va faoliyatni litsenziyalash boʻyicha respublika komissiyasi tarkibini tasdiqlash toʻgʻrisida

Kapital qurilishda bozor prinsiplarining yaxlit tizimini joriy etish hamda Oʻzbekiston Respublikasi Prezidentining “Kapital qurilishda iqtisodiy islohotlarni yanada chuqurlashtirishning asosiy yoʻnalishlari toʻgʻrisida” 2003-yil 6-maydagi PF–3240-son Farmonida va Hukumatning kapital qurilishda islohotlarga doir keyingi qarorlarida belgilangan kapital qurilishda yangi xoʻjalik munosabatlariga samarali oʻtishni taʼminlash maqsadida Vazirlar Mahkamasi qaror qiladi:

1. Quyidagilar:

Qurilish sohasida islohotlarning amalga oshirilishi monitoringi va faoliyatni litsenziyalash boʻyicha Respublika komissiyasi tarkibi 1-ilovaga muvofiq;

Qurilish sohasida islohotlarning amalga oshirilishi monitoringi va faoliyatni litsenziyalash boʻyicha Respublika komissiyasi toʻgʻrisidagi nizom 2-ilovaga muvofiq tasdiqlansin.

2. Quyidagilar Qurilish sohasida islohotlarning amalga oshirilishi monitoringi va faoliyatni litsenziyalash boʻyicha Respublika komissiyasining asosiy vazifalari etib belgilansin:

kapital qurilishda iqtisodiy islohotlarning amalga oshirilishi, islohotlarni chuqurlashtirishga doir qabul qilingan qonun hujjatlari va normativ hujjatlarning oʻz vaqtida va toʻliq bajarilishi, pudrat va loyihalash ishlari bozorining shakllantirilishi boʻyicha doimiy monitoringni amalga oshirish;

bozor prinsiplari va mexanizmlarini kapital qurilishda boshqaruv, narx belgilash va xoʻjalik munosabatlari tizimiga keng joriy qilishni, loyihalash va qurilish ishlarini bajarishga buyurtmalarni joylashtirishda tanlov savdolari (tendyerlar) tashkil etish darajasini oshirishni, pudrat shartnomalari rolini kuchaytirishni hamda ularning ijrosi yuzasidan buyurtmachilar va pudratchilarning javobgarligini oshirishni, qurilishda loyiha, smeta va texnologiya intizomini mustahkamlashni taʼminlash;

qurilishni tashkil etishning asosiy shakli sifatida, qurilishda obyektlarni foydalanishga tayyor holda barpo etishga oʻtish, markazlashtirilgan manbalar hisobiga amalga oshiriladigan obyektlar qurilishini tashkil etish va moliyalashtirish tizimini yanada takomillashtirish boʻyicha chora-tadbirlar kompleksini amalga oshirish;

loyihalash va pudrat qurilish tashkilotlarini davlat tasarrufidan chiqarish va xususiylashtirish jarayonlarini tugallash, ular negizida asosan xususiy va qoʻshma korxonalar tashkil etish, loyihalash va pudrat ishlari bozorida raqobat muhitini shakllantirishni davom ettirish boʻyicha takliflar ishlab chiqish yuzasidan monitoring oʻrnatish;

Kapital qurilishda narx belgilashning smeta-normativ bazasini takomillashtirish va yangilash dasturining oʻz vaqtida amalga oshirilishi, yangi ishlab chiqilgan smeta-normativ hujjatlarni qurilish jarayoni qatnashchilariga yetkazish ustidan taʼsirchan nazoratni amalga oshirish;

qurilish materiallari bozorini yanada kengaytirish, qurilish materiallari, konstruksiyalari va buyumlari birja savdosini tashkil etish va rivojlantirish tizimini takomillashtirish boʻyicha takliflar tayyorlash;

qurilish sohasida faoliyatning ayrim turlarini amalga oshirish huquqiga litsenziyalar berish, litsenziyalarning amal qilishini toʻxtatish va litsenziyalarni bekor qilish toʻgʻrisida qarorlar qabul qilish.

3. Vazirlar Mahkamasining “Iqtisodiy islohotlarni chuqurlashtirishga doir qabul qilingan hujjatlarning amalga oshirilishi monitoringi boʻyicha Hukumat komissiyasini tashkil etish toʻgʻrisida” 2003-yil 19-iyundagi 278-son qarori bilan tuzilgan Hukumat komissiyasining kapital qurilishda iqtisodiy islohotlarga doir vazifalari va funksiyalari Qurilish sohasida islohotlarning amalga oshirilishi monitoringi va faoliyatni litsenziyalash boʻyicha Respublika komissiyasiga yuklansin.

4. Oʻzbekiston Respublikasi Hukumatining 3-ilovaga muvofiq ayrim qarorlari oʻz kuchini yoʻqotgan deb hisoblansin va baʼzilariga oʻzgartirishlar kiritilsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.F. Fayzullayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 14-aprel,

181-son

Vazirlar Mahkamasining 2004-yil 14-apreldagi 181-son qaroriga
1-ILOVA

Qurilish sohasida islohotlarning amalga oshirilishi monitoringi va faoliyatni litsenziyalash boʻyicha Respublika komissiyasi

TARKIBI

Xanov N.M.	—	Oʻzbekiston Respublikasi Bosh vazirining oʻrinbosari, Komissiya raisi
Xoʻjayev B.A.	—	Oʻzbekiston Respublikasi iqtisodiyot vaziri, Komissiya raisining oʻrinbosari
Maqsumov N.E.	—	Vazirlar Mahkamasi Kommunal soha, transport, kapital qurilish va qurilish industriyasi masalalari axborot-tahlil departamenti mudiri, Komissiya kotibi
Komissiya aʼzolari:
lavozimiga koʻra	—	Vazirlar Mahkamasi Makroiqtisodiy rivojlantirish, tarkibiy oʻzgartirishlar, xorijiy investitsiyalarni jalb etish va hududlarni kompleks rivojlantirish masalalari yigʻma axborot-tahlil departamentining mudiri
Obidov O.O.	—	Oʻzbekiston Respublikasi Mehnat va aholini ijtimoiy muhofaza qilish vaziri
Turdiyev U.T.	—	Oʻzbekiston Respublikasi Davlat raqobat qoʻmitasi raisining oʻrinbosari
Toxtayev A.R.	—	Oʻzbekiston Respublikasi Davlat arxitektura va qurilish qoʻmitasi raisi
Hasanov S. S.	—	Oʻzbekiston Respublikasi Iqtisodiyot vazirining oʻrinbosari
Abdullayev I.B.	—	Oʻzbekiston Respublikasi Adliya vazirining birinchi oʻrinbosari
Abdurahmonov M.S.	—	Oʻzbekiston Respublikasi Moliya vazirining oʻrinbosari
Gadoyev E.F.	—	Oʻzbekiston Respublikasi Davlat soliq qoʻmitasi raisining birinchi oʻrinbosari
Rogoznikova T.A.	—	Oʻzbekiston Respublikasi Davlat statistika qoʻmitasi raisining birinchi oʻrinbosari
Xonazarov B.D.	—	Oʻzbekiston Respublikasi Mudofaa vazirining oʻrinbosari
lavozimiga koʻra	—	“Oʻzmaxsusmontajqurilish” aksiyadorlik kompaniyasi boshqaruvi raisi
Zaripov B.K.	—	“Oʻzqurilishmateriallari” AJ raisi
Jumageldiyev M.R.	—	Markaziy bank raisining birinchi oʻrinbosari
Shorahbarov R.Q.	—	“Ipoteka” - bank” aksiyadorlik tijorat ipoteka banki raisi
Rustamov Q.Q.	—	“Oʻzsanoatqurilishbank” Boshqaruvi raisi
Hafizov B.Y.	—	“Oʻzbekneftgaz” milliy xolding kompaniyasi boshqaruvi raisining oʻrinbosari
lavozimiga koʻra	—	“Oʻzavtoyoʻl” davlat-aksiyadorlik kompaniyasi raisining oʻrinbosari
Gʻulomov B.V.	—	“Sanoatgeokontexnazorat” davlat inspeksiyasining boshligʻi
Teshaboyev B.M.	—	Oʻzbekiston Respublikasi Elektr energetikada nazorat boʻyicha davlat inspeksiyasining bosh direktori
Mirtemirov R.M.	—	Qurilish va qurilish materiallari sanoati xodimlari kasaba uyushmalari markaziy qoʻmitasi raisi
Shayxov A.E.	—	Oʻzbekiston Respublikasi Savdo-sanoat palatasi raisi
lavozimiga koʻra	—	Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimlarining sanoatni rivojlantirish, kapital qurilish, kommunikatsiyalar va kommunal xoʻjalik masalalari boʻyicha oʻrinbosarlari

Izoh. Respublika komissiyasi aʼzolari boshqa ishga oʻtgan taqdirda uning tarkibiga ularning lavozimiga yangidan tayinlangan shaxslar kiritiladi.

(1-ilova Oʻzbekiston Respublikasi Vazirlar Mahkamasining 2016-yil 22-dekabrdagi 412-sonli qarori tahririda — OʻR QHT, 2016-y., 52-son, 602-modda)

Vazirlar Mahkamasining
2004-yil 14-apreldagi 181-son qaroriga
2-ILOVA

Qurilish sohasida islohotlarning amalga oshirilishi monitoringi va faoliyatni litsenziyalash boʻyicha Respublika komissiyasi toʻgʻrisida

NIZOM

I. Umumiy qoidalar

1. Ushbu Nizom Qurilish sohasida islohotlarning amalga oshirilishi monitoringi va faoliyatni litsenziyalash boʻyicha Respublika komissiyasi (keyingi oʻrinlarda Komissiya deb ataladi) faoliyati tartibini belgilaydi.

2. Komissiya oʻz faoliyatini qurilish munosabatlarini isloh qilishni taʼminlashni tashkil etish, qurilishda iqtisodiy islohotlarning amalga oshirilishini chuqur tahlil qilish, islohotlarni yanada chuqurlashtirish boʻyicha tashabbus koʻrsatish va takliflar tayyorlash maqsadida amalga oshiradi.

3. Komissiya oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Prezidentining farmonlari, qarorlari va farmoyishlariga, Hukumat qarorlariga va ushbu Nizomga amal qiladi.

4. Komissiyaning oʻz vakolatlari doirasida qabul qilingan qarorlari davlat boshqaruvi organlarining va mulkchilik shakllaridan qatʼi nazar, xoʻjalik yurituvchi subyektlarning bajarishi uchun majburiy hisoblanadi.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzurida qurilishda iqtisodiy islohotlarni chuqurlashtirish boʻyicha hududiy komissiyalar (keyingi oʻrinlarda hududiy komissiyalar deb ataladi) faoliyat koʻrsatadi.

6. Hududiy komissiyalarning nizomlari va tarkiblari Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan tasdiqlanadi.

II. Komissiyaning vazifalari va faoliyat yoʻnalishlari

7. Quyidagilar Komissiyaning asosiy vazifalari va faoliyat yoʻnalishlari hisoblanadi:

Oʻzbekiston Respublikasining Shaharsozlik kodeksini va qurilish sohasidagi boshqa qonun hujjatlarini, Oʻzbekiston Respublikasi Prezidentining “Kapital qurilishda iqtisodiy islohotlarni yanada chuqurlashtirishning asosiy yoʻnalishlari toʻgʻrisida” 2003-yil 6-maydagi PF–3240-son Farmonini va Hukumatning qurilishda islohotlar boʻyicha qarorlarini, shuningdek kapital qurilishni isloh qilishga yoʻnaltirilgan boshqa normativ-huquqiy hujjatlarni bajarishni taʼminlashga doir ishlarni tashkil etish;

qurilishda iqtisodiy islohotlarni chuqurlashtirish boʻyicha Oʻzbekiston Respublikasi Prezidenti farmonlarida hamda Hukumat qarorlarida bayon qilingan talablar va qoidalarning oʻz vaqtida, toʻliq bajarilishi monitoringini muntazam ravishda amalga oshirish, qurilish sohasida yagona davlat siyosati izchil amalga oshirilishini taʼminlash;

qurilish jarayoni qatnashchilarining joriy xoʻjalik faoliyatiga maʼmuriy aralashuvga yoʻl qoʻymaslik chora-tadbirlarini amalga oshirish;

qurilish sohasidagi boshqaruv organlari tashkiliy tuzilmasini xoʻjalik yuritishning bozor shakllari talablariga muvofiq takomillashtirishga yoʻnaltirilgan chora-tadbirlarni muntazam ravishda amalga oshirish;

kapital qurilishda iqtisodiy islohotlarning borishini aks ettiruvchi koʻrsatkichlar tizimining ishlab chiqilishi va joriy etilishini nazorat qilish;

kapital qurilish sohasidagi ilmiy-tadqiqot ishlarining ahvolini tahlil qilish, kapital qurilishni yanada isloh qilish masalalarini tartibga soluvchi normativ-huquqiy hujjatlarning ijrosi monitoringini olib borish, ularni qurilish jarayoni qatnashchilariga yetkazish;

qurilishdagi iqtisodiy islohotlarni doimiy ravishda metodik va huquqiy taʼminlashni, qurilish va qurilish biznesi sohasida xoʻjalik yuritishning zamonaviy metodlarini egallagan kadrlarni tayyorlash va ularning malakasini oshirish ishlarini tashkil etish;

III. Komissiyaning huquqlari

8. Komissiya quyidagi huquqlarga ega:

tegishli idoralar va tashkilotlar, shuningdek hududiy komissiyalar rahbar xodimlarining qurilishda iqtisodiy islohotlarni chuqurlashtirish boʻyicha ular tomonidan amalga oshirilayotgan ishlar toʻgʻrisidagi hisobotlarini eshitish;

Vazirlar Mahkamasiga kapital qurilishda iqtisodiy islohotlarni chuqurlashtirishga yoʻnaltirilgan normativ-huquqiy hujjatlarni takomillashtirish boʻyicha takliflar kiritish;

qurilishda iqtisodiy islohotlarni chuqurlashtirish boʻyicha hududiy komissiyalar faoliyatini muvofiqlashtirish;

Vazirlar Mahkamasiga past rentabelli, zarar koʻrib ishlayotgan va istiqbolsiz qurilish tashkilotlari va korxonalarini qayta tashkil etish toʻgʻrisida takliflar kiritish;

vazirliklar, idoralar va xoʻjalik birlashmalaridan Komissiyaga yuklangan vazifalarning bajarilishini taʼminlash uchun zarur axborotlarni soʻrash;

tegishli vazirliklar va idoralar, korxonalar va tashkilotlar mutaxassislarini, institutlarning olimlarini hamda qurilish yoʻnalishidagi oliy oʻquv yurtlari oʻqituvchilarini materiallar tayyorlash uchun jalb etish;

joylarda qurilishda iqtisodiy islohotlarni amalga oshirish uchun masʼul boʻlgan mansabdor shaxslarning lavozimiga loyiqligini va amaliy faoliyati natijalarini baholash, oʻz vakolatlari doirasida qurilish kompleksini yuqori malakali mutaxassislar bilan mustahkamlashga doir chora-tadbirlar koʻrish;

litsenziyalangan faoliyat sohasidagi qonun hujjatlari talablari buzilishiga yoʻl qoʻygan mansabdor shaxslarga nisbatan belgilangan tartibda choralar koʻrish toʻgʻrisida tegishli organlarga takliflar kiritish.

IV. Komissiya faoliyatini tashkil etish

9. Komissiyaga Vazirlar Mahkamasi qarori bilan tayinlanadigan rais rahbarlik qiladi.

Komissiya raisi Komissiya ishlarini boshqaradi, majlislarini olib boradi, majlislar protokollarini, ish rejalarini va Komissiyaning boshqa hujjatlarini tasdiqlaydi.

10. Komissiya majlislari tasdiqlangan ish rejasiga muvofiq har oyda kamida bir marta oʻtkaziladi. Komissiya raisi tomonidan navbatdan tashqari majlislar chaqirilishi mumkin.

11. Komissiyaning koʻrib chiqilayotgan masalalar boʻyicha qarori uning uchun Komissiya aʼzolari oddiy koʻpchiligi ovoz berishgan taqdirda qabul qilingan hisoblanadi. Komissiyaning har bir aʼzosi qabul qilinayotgan qarorlar boʻyicha yozma ravishda oʻz fikrini bildirishga haqlidir.

12. Komissiya raisi bilan kelishuvga koʻra Komissiyaning obyektiv sabablar bilan majlisda qatnashmayotgan aʼzolari oʻrniga ularning vakolatli vakillari majlisda ovoz berish huquqisiz qatnashishi mumkin.

13. Komissiya raisi qarorlarni tezkorlik bilan qabul qilish maqsadida Komissiya aʼzolari bilan kelishilgan ayrim masalalar boʻyicha Komissiya qarorlarini soʻrov yoʻli bilan tasdiqlashi mumkin.

14. Zarurat boʻlganda Komissiya majlisiga koʻrib chiqilayotgan masalalar xarakteriga qarab, vazirliklar va idoralar, xoʻjalik birlashmalari, jamoat tashkilotlari, korxonalar, muassasalar va tashkilotlar rahbarlari taklif etiladi.

15. Komissiya har chorakda Vazirlar Mahkamasiga amalga oshirilgan ishlar toʻgʻrisida axborot taqdim etadi.

V. Komissiya majlisiga materiallarni tayyorlash tartibi

16. Komissiya majlisiga materiallar ishchi organlar tomonidan manfaatdor vazirliklar va idoralar, mahalliy davlat hokimiyati organlari, shuningdek Komissiyaning ularni tayyorlash uchun masʼul boʻlgan aʼzolari bilan birgalikda Komissiyaning ish rejasiga muvofiq tayyorlanadi.

17. Komissiya majlisi kun tartibining har bir masalasi boʻyicha hujjatlar paketida Komissiya qarorini qabul qilish uchun zarur boʻlgan materiallar (tahliliy maʼlumotnomalar, jadvallar va boshqalar) hamda Komissiya qarori loyihasi mavjud boʻlishi kerak.

VI. Komissiyaning ishchi organlari va kotibi

18. Quyidagilar:

kapital qurilishda iqtisodiy islohotlarning amalga oshirilishi monitoringi boʻyicha — Oʻzbekiston Respublikasi Vazirlar Mahkamasi, Iqtisodiyot vazirligi, Moliya vazirligi, “Davarxitektqurilish” qoʻmitasi va Davlat raqobat qoʻmitasining yuqori malakali mutaxassislaridan 5 kishidan iborat doimiy ishlaydigan ishchi guruh;

(18-bandning ikkinchi xatboshisi Oʻzbekiston Respublikasi Vazirlar Mahkamasining 2014-yil 25-apreldagi 104-sonli qarori tahririda — OʻR QHT, 2014-y., 17-son, 196-modda)

qurilish sohasidagi faoliyatni litsenziyalash boʻyicha — Oʻzbekiston Respublikasi Davlat arxitektura va qurilish qoʻmitasi Komissiyaning ishchi organlari hisoblanadi.

Kapital qurilishda iqtisodiy islohotlarning amalga oshirilishi monitoringi boʻyicha ishchi guruhning shaxsiy tarkibi Komissiya tomonidan tasdiqlanadi.

19. Komissiyaning kapital qurilishda iqtisodiy islohotlarning amalga oshirilishi monitoringi boʻyicha ishchi organi:

Komissiyaning navbatdagi davr uchun ish rejasi loyihasini tayyorlaydi;

Komissiyaning navbatdagi majlisiga barcha zarur materiallarni oʻz vaqtida tayyorlashni taʼminlaydi va vazirliklar, idoralar, yuridik shaxslar birlashmalari, mahalliy davlat hokimiyati organlari, tijorat banklari, korxonalar hamda Komissiya aʼzolaridan zarur materiallarni va ekspert xulosalarni olish huquqiga ega;

kun tartibidagi masalalar boʻyicha tahliliy materiallarni tayyorlashni va Komissiya majlislarini oʻtkazishni tashkil qiladi;

Komissiyaga qurilishda iqtisodiy islohotlarni chuqurlashtirish jarayonlari monitoringi boʻyicha axborotlar va tahliliy materiallarni koʻrib chiqish uchun taqdim etadi;

joylarga borgan holda hududiy komissiyalar faoliyatini va Komissiyaning qabul qilingan qarorlari bajarilishini oʻrganadi;

Komissiya aʼzolarini va taklif etilgan shaxslarni, tegishli materiallarni yuborgan holda, majlisning oʻtkaziladigan sanasi, vaqti, joyi toʻgʻrisida xabardor qiladi;

Komissiyaga uning qarorlariga muvofiq boshqa materiallarni koʻrib chiqish uchun taqdim etadi.

20. Qurilish sohasidagi faoliyatni litsenziyalash boʻyicha ishchi organ Komissiya qarorlariga muvofiq litsenziyalarni rasmiylashtiradi, qayta rasmiylashtiradi, litsenziya bitimlari tuzadi, litsenziyalar reyestrini yuritadi, litsenziatlar tomonidan litsenziya talablari va shartlariga rioya etilishini nazorat qiladi, qonun hujjatlarida belgilangan tartibda litsenziyalarning amal qilishini toʻxtatib turadi va tiklaydi.

21. Qurilish sohasidagi faoliyatni litsenziyalash boʻyicha ishchi organ ishlari Vazirlar Mahkamasining “Qurilish sohasidagi faoliyatni litsenziyalash toʻgʻrisidagi nizomlarni tasdiqlash haqida” 2003-yil 24-sentabrdagi 410-son qaroriga muvofiq tashkil etiladi.

22. Komissiya kotibi:

ishchi organlar ishlariga rahbarlik qiladi;

Komissiya qarorlarining ijrosi monitoringini yuritadi va uning natijalarini Komissiya majlisida koʻrib chiqish uchun taqdim etadi;

ishchi organlarning Komissiya majlisiga materiallarni tayyorlashga doir ishlarini tashkil qiladi;

Komissiya raisi bilan majlisning oʻtkaziladigan muddatlari va joyini, shuningdek taklif etiladiganlar kontingentini kelishib oladi;

Komissiya protokollarini rasmiylashtiradi va tasdiqlangan protokollarni Komissiya aʼzolariga, manfaatdor vazirliklar, idoralar va mahalliy davlat hokimiyati organlariga yuboradi.

Vazirlar Mahkamasining
2004-yil 14-apreldagi 181-son qaroriga
3-ILOVA

I. Oʻzbekiston Respublikasi Hukumatining oʻz kuchini yoʻqotgan qarorlari roʻyxati

1. Vazirlar Mahkamasining “Kapital qurilishni boshqarish tuzilmasini yanada qayta tashkil etish chora-tadbirlari toʻgʻrisida” 2000-yil 13-apreldagi 144-son qarorining 2-bandi.

2. Vazirlar Mahkamasining “Oʻzbekiston Respublikasi Prezidentining farmonlari va Oʻzbekiston Respublikasi Hukumatining qarorlari bilan tashkil etilgan komissiyalar va kengashlar tarkibini tasdiqlash toʻgʻrisida” 2000-yil 30-sentabrdagi 374-son qaroriga 23-ilova.

II. Oʻzbekiston Respublikasi Hukumatining ayrim qarorlariga kiritilayotgan oʻzgartirishlar

1. Vazirlar Mahkamasining “Qurilish sohasidagi faoliyatni litsenziyalash toʻgʻrisidagi nizomlarni tasdiqlash haqida” 2003-yil 24-sentabrdagi 410-son qarorida (Oʻzbekiston Respublikasi QT, 2003-y., 9-son, 87-modda):

2-band va 7-ilova oʻz kuchini yoʻqotgan deb hisoblansin;

1—6-ilovalarning 2-bandlaridagi “Vazirlar Mahkamasining qurilish sohasidagi faoliyatni litsenziyalash komissiyasi” soʻzlari “Qurilish sohasida islohotlarning amalga oshirilishi monitoringi va faoliyatni litsenziyalash boʻyicha Respublika komissiyasi” soʻzlari bilan almashtirilsin;

Qurilish sohasidagi faoliyatni litsenziyalash toʻgʻrisidagi nizomlarga ilovalar sifatida berilgan sxemalardagi “Vazirlar Mahkamasining qurilish sohasidagi faoliyatni litsenziyalash komissiyasi” soʻzlari “Qurilish sohasida islohotlarning amalga oshirilishi monitoringi va faoliyatni litsenziyalash boʻyicha Respublika komissiyasi” soʻzlari bilan almashtirilsin.

(2-band Oʻzbekiston Respublikasi Vazirlar Mahkamasining 2005-yil 22-fevraldagi 73-sonli qaroriga muvofiq oʻz kuchini yoʻqotgan — OʻR QHT, 2005-y.,8-9-son, 67-modda)

(Oʻzbekiston Respublikasi qonun hujjatlari toʻplami, 2004-y., 15-son, 177-modda; 2005-y., 5-6-son, 34-modda, 8-9-son, 67-modda, 22-son, 159-modda; 2006-y., 30-son, 289-modda; 2009-y., 52-son, 574-modda; 2010-y., 51-son, 486-modda; 2012-y., 8-9-son, 82-modda; 2014-y., 17-son, 196-modda; 2016-y., 18-son, 198-modda, 52-son, 602-modda)