Norasmiy tarjima

Oʻzbekiston Respublikasi Vazirlar Mahkamasining

qarori

Aerodromlarni tugatish tartibi toʻgʻrisidagi nizomni tasdiqlash haqida

Oʻzbekiston Respublikasi Havo kodeksining 34-moddasiga muvofiq Vazirlar Mahkamasi qaror qiladi:

1. Aerodromlarni tugatish tartibi toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi Parvozlar xavfsizligini nazorat qilish davlat inspeksiyasi ikki oy muddatda idoraviy normativ-huquqiy hujjatlarni ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2014-yil 11-avgust,

223-son

Vazirlar Mahkamasining 2014-yil 11-avgustdagi 223-son qaroriga
ILOVA

Aerodromlarni tugatish tartibi toʻgʻrisidagi

NIZOM

I. Umumiy qoidalar

1. Mazkur Nizom Oʻzbekiston Respublikasi Havo kodeksining 34-moddasiga muvofiq aerodromlarni tugatish (shu jumladan, ularni boshqa joyga koʻchirish maqsadida) tartibini belgilaydi.

2. Ushbu Nizom fuqaro, eksperimental va davlat aviatsiyasining sertifikatlangan aerodromlariga, shuningdek, birgalikda foydalanish (joylashish) aerodromlariga tatbiq etiladi.

II. Aerodromlarni tugatish sabablari va shartlari

3. Aerodromlarni tugatish, shu jumladan, ularni boshqa joyga koʻchirish quyidagi sabablarga koʻra amalga oshiriladi:

aerodrom asosiy elementlarining tabiiy eskirishi yoki tabiiy ofatlar natijasida vayron boʻlishi va foydalanishga yaroqsizligi tufayli;

davlatning milliy xavfsizligi manfaatlarini koʻzlab;

aerodrom ekspluatantining foydalanishida boʻlgan yer uchastkasi yoki uning bir qismi olib qoʻyilganligi munosabati bilan;

bosh rejaga muvofiq shaharlar va aholi punktlarini rivojlantirish munosabati bilan;

atrof-muhitga, fuqarolarning hayoti va sogʻligʻiga zararli taʼsiri tufayli.

Aerodromlarni tugatish, shu jumladan, ularni boshqa joyga koʻchirish ishlari Qonun hujjatlarida nazarda tutilgan boshqa hollarda ham amalga oshirilishi mumkin.

4. Aerodromlarni tugatish, shu jumladan, ularni boshqa joyga koʻchirish quyidagi shartlar bajarilgan holda amalga oshiriladi:

aerodromlarning tugatilishi Oʻzbekiston Respublikasi jismoniy va yuridik shaxslarining hamda boshqa davlatlarning aerodromga nisbatan huquqlari yoki manfaatlarini buzmasa;

aerodromlarning tugatilishi fuqarolarning hayotiga va sogʻligʻiga yoki atrof-muhit xavfsizligiga tahdid solmasa;

aerodromlarning tugatilishi davlatning milliy xavfsizligi manfaatlarini va parvozlar xavfsizligini buzmasa.

III. Aerodromlarni tugatish tartibi

5. Aerodromlarni tugatish, shu jumladan, ularni boshqa joyga koʻchirish toʻgʻrisidagi qaror (bundan buyon matnda qaror deb yuritiladi) Oʻzbekiston Respublikasi Vazirlar Mahkamasi bilan kelishilgan holda aerodrom ekspluatanti tomonidan qabul qilinadi.

Qaror quyidagilarni oʻz ichiga olishi kerak:

aerodrom ekspluatantining nomi va maʼlumotlari;

aerodrom (uchish maydoni, yerda boshqarish yoʻlaklari, perron oʻlchamlari, uchish-qoʻnish yoʻlagining xususiyatlari va aerodromning ishga tushirilgan sanasi) toʻgʻrisidagi maʼlumotlar;

aerodromlarni tugatish, shu jumladan, ularni boshqa joyga koʻchirish sabablari;

aerodromlarni tugatish, shu jumladan, ularni boshqa joyga koʻchirish muddatlari.

6. Kelishish uchun qaror yozma ravishda rasmiylashtiriladi va aerodromlar tugatilishidan yoki ular boshqa joyga koʻchirilishidan uch oy oldin koʻrib chiqish uchun Oʻzbekiston Respublikasi Vazirlar Mahkamasiga yuboriladi.

Qaror bilan bir qatorda aerodrom ekspluatanti Oʻzbekiston Respublikasi Vazirlar Mahkamasiga aerodrom hududida joylashgan inshootlar va jihozlarni demontaj qilish va oʻrnatish tartibi toʻgʻrisida ishlab chiqilgan va tasdiqlangan yoʻriqnomani kiritadi.

7. Aerodromlarni tugatish, shu jumladan, ularni boshqa joyga koʻchirish toʻgʻrisidagi qarorni koʻrib chiqish ushbu Nizomning 1-ilovasiga muvofiq amalga oshiriladi.

8. Oʻzbekiston Respublikasi Vazirlar Mahkamasi taqdim etilgan hujjatlarni bir oy muddatda koʻrib chiqadi va aerodromlarni tugatish, shu jumladan, ularni boshqa joyga koʻchirish boʻyicha komissiya (bundan buyon matnda komissiya deb yuritiladi) tuzadi.

Komissiya tarkibiga manfaatdor vazirlik va idoralar vakillari, aerodrom ekspluatanti hamda zarur boʻlgan hollarda tegishli ilmiy-tadqiqot va loyiha tashkilotlarining vakillari kiritiladi.

Tugatilayotgan yoki boshqa joyga koʻchirilayotgan aerodrom yoxud uning mulkining bir qismi davlat mulki boʻlgan hollarda komissiya tarkibiga Oʻzbekiston Respublikasi Davlat aktivlarini boshqarish agentligi va Oʻzbekiston Respublikasi Iqtisodiyot va moliya vazirligining yoki ularning hududiy organlarining vakillari kiritiladi.

9. Ushbu Nizomning 4, 5 va 6-bandlarida nazarda tutilgan sabablar mavjud boʻlmasa hamda aerodromdan foydalanuvchi tomonidan belgilangan shartlarga rioya qilinmagan boʻlsa Oʻzbekiston Respublikasi Vazirlar Mahkamasi aerodromlarni tugatishni, shu jumladan ularni boshqa joyga koʻchirishni rad etishi mumkin.

10. Komissiya tuzilgan kundan boshlab 30 kun ichida:

hujjatlarni oʻrganadi, aerodromni koʻzdan kechiradi, uning texnik va ekspluatatsion holatini belgilaydi;

aerodromdan hamda uning alohida inshootlari va jihozlaridan doimiy foydalanish imkoniyati mavjudligini yoki mavjud emasligini aniqlaydi;

ushbu Nizomning 5- va 6-bandlarida nazarda tutilgan aerodromlarni tugatish shartlariga rioya etilishini tekshiradi;

ushbu Nizomning 2-ilovasiga muvofiq aerodromni tugatish, shu jumladan, uni boshqa joyga koʻchirish imkoniyati toʻgʻrisida dalolatnoma (bundan buyon matnda dalolatnoma deb yuritiladi) tuzadi.

11. Dalolatnomada aerodrom inshootlari va jihozlarining texnik va ekspluatatsion holatining tekshiruvi, tekshiruv natijalari, shuningdek, aerodromni tugatish, shu jumladan uni boshqa joyga koʻchirish imkoniyati mavjudligi yoki mavjud emasligi toʻgʻrisidagi xulosa aks ettirilishi kerak.

Dalolatnoma ikki nusxada tuziladi va komissiyaning barcha aʼzolari tomonidan imzolanadi.

Aerodrom inshootlari va jihozlarini tekshirish natijalari boʻyicha ularning texnik holatini baholash dalolatnomasi va obyektlar yoki jihozlarni foydalanishdan chiqarish toʻgʻrisidagi dalolatnomalar tuziladi, ular komissiya xulosasiga ilova qilinadi.

Komissiya qarori bilan dalolatnomada tugatilayotgan yoki boshqa joyga koʻchirilayotgan aerodromga oid boshqa qoʻshimcha maʼlumotlar ham aks ettirilishi mumkin.

12. Oʻzbekiston Respublikasi Vazirlar Mahkamasiga rasmiylashtirilgan dalolatnoma va unga ilova qilingan hujjatlar kiritiladi. Oʻrganish natijalari boʻyicha aerodromni tugatish, shu jumladan uni boshqa joyga koʻchirish toʻgʻrisida Oʻzbekiston Respublika Vazirlar Mahkamasining reglamentiga muvofiq Vazirlar Mahkamasining qarori loyihasi tayyorlanadi.

13. Oʻzbekiston Respublikasi Vazirlar Mahkamasining qarori aerodromni tugatish, shu jumladan uni boshqa joyga koʻchirish uchun asos boʻladi.

14. Aerodrom tugatilgandan keyin aerodrom ekspluatanti yer uchastkasini maqsadli foydalanish uchun yaroqli holatga keltiradi.

15. Aerodrom ekspluatanti aerodromni tugatish boʻyicha ishlar yakunlangandan soʻng Oʻzbekiston Respublikasi Vazirlar Mahkamasiga tegishli maʼlumotlarni taqdim etadi.

Aerodromlarni tugatish tartibi toʻgʻrisidagi nizomga
1-ILOVA

Aerodromlarni tugatish, shu jumladan, ularni boshqa joyga koʻchirish toʻgʻrisidagi qarorni koʻrib chiqish

SXEMASI

Aerodromlarni tugatish tartibi toʻgʻrisidagi nizomga
2-ILOVA

Aerodromni tugatish (koʻchirish) imkoniyati toʻgʻrisidagi DALOLATNOMA
Tugatish (koʻchirish) komissiyasi quyidagilardan iborat:
Komissiya raisi ___________________________________________________________________________________________________
Komissiya aʼzolari ________________________________________________________________________________________________
aerodromni tugatish (koʻchirish) toʻgʻrisida qaror qabul qilish uchun uning obyektlari va jihozlarini koʻrikdan oʻtkazdi.
Aerodromning yuridik manzili _____________________________________________________________________________________
Aerodrom egasi __________________________________________________________________________________________________
Aerodrom ekspluatanti __________________________________________________________________________________________
Aerodrom toifasi _______________________________________________________________________________________________
Faoliyat boshlangan sana __________________________________________________________________________________________
Bino va inshootlarni texnik koʻrikdan oʻtkazish ______________________________________________________________________
Asosiy ishlab chiqarish fondlarining tannarxi (jami)_____________________________________________________________ soʻm.
Asosiy ishlab chiqarish fondlarining hisoblangan eskirish summasi
_____________________________________________________________________________________________________________ soʻm.
Asosiy ishlab chiqarish fondlarining qoldiq qiymati ________________ soʻm.
Asosiy ishlab chiqarish fondlarini hisobdan chiqarishdan (tugatishda, avariya yoki tabiiy ofatda) yoʻqotishlar ____________ soʻm.
Aerodromning asosiy ishlab chiqarish fondlariga tegishli har bir obyekt va uskunaning qoldiq qiymati: _________________ soʻm.
________________________________________________________________________________________________________________
Aerodromni tugatish yoki koʻchirish uchun zarur boʻlgan xarajatlar
______________________________________________________________________________________________________________ soʻm.
Aerodromning texnik holati tavsifi ___________________________________________________________________________________________________________________
Komissiyaning xulosasi ______________________________________________________________________________________________ __________________________________________________________________________________________________________________
Komissiya raisi:
Komissiya aʼzolari: