Haqiqiy harbiy xizmatga chaqirilayotgan Oʻzbekiston SSJ fuqarolarining huquqlari va erkinliklariga rioya etilishini, ularning oilalari manfaatlari himoya qilinishini taʼminlash, shuningdek jumhuriyat yoshlarini harbiy xizmatga chaqirishni va xizmatni oʻtashni takomillashtirish maqsadida:

1. 1990-yil kuzgi chaqiriqdan boshlab jumhuriyat yigitlarini Oʻzbekiston SSJdan tashqarida joylashgan harbiy qurilish qismlariga chaqirish toʻxtatilsin.

2. Bundan buyon yoshlarni SSSR Qurolli Kuchlariga jumhuriyat Hukumati Ittifoq idoralari bilan tuzadigan shartnomalarga muvofiq chaqirish maqsadga muvofiq deb hisoblansin.

Oʻzbekiston SSJ Vazirlar Kengashi 1991-yil bahorgi chaqiriqqa qadar tegishli Ittifoq idoralari bilan chaqiriluvchilar sonini, ularning harbiy xizmatni oʻtash shartlarini, ularning xavfsizligi hamda muddatli xizmatdagi harbiy xizmatchilar va ularning oila aʼzolari ijtimoiy jihatdan himoya qilinishiga kafolatlarni belgilab beradigan shartnomalar tuzsin. Chaqiriluvchilarni harbiy qismlarga kuzatib borish va ularni doimiy istiqomat joylariga qaytarish koʻzda tutilsin.

3. Tinch davrda harbiy xizmat burchini bajarish chogʻida akasi yoki ukasi halok boʻlgan yigitlarni muddatli harbiy xizmatga chaqirish taʼqiqlansin.

4. Shikast yetishi natijasida hozirgi vaqtda nogiron boʻlib qolgan muddatli xizmatdagi harbiy xizmatchilarga, shuningdek harbiy xizmatni oʻtash davrida halok boʻlganlarning oilalariga jumhuriyat mablagʻi hisobidan qoʻshimcha nafaqa belgilansin.

Oʻzbekiston SSJ Vazirlar Kengashi mazkur qoʻshimcha nafaqalarni ajratish tartibi va shartlarini tasdiqlasin.

5. Ushbu Farmonning 1, 2, 3-bandlarini bajarilishini taʼminlash, shuningdek armiyaga chaqiriluvchilar harbiy xizmatni oʻtashida konstitutsion normalarga soʻzsiz rioya qilinishi uchun tegishli idoralarning masʼuliyatini oshirish maqsadida:

Oʻzbekiston SSJ Harbiy komissarligiga jumhuriyat idorasi maqomi berilsin;

Toshkent viloyati harbiy komissarligini tashkil etish uchun jumhuriyat budjetidan mablagʻ ajratilsin.

Jumhuriyat harbiy komissarligi toʻgʻrisidagi Nizom Oʻzbekiston Oliy Kengashi koʻrib chiqishi uchun taqdim etilsin.

6. Oʻzbekiston SSJ Vazirlar Kengashi armiyaga chaqirilish yoshidagi yigitlarning salomatligini mustahkamlash, chaqiriq komissiyalarida qattiq nazoratni taʼminlash ishlarini tashkil etish uchun qoʻshimcha ravishda Oʻzbekiston SSJ Sogʻliqni saqlash vazirining oʻrinbosari lavozimini joriy etsin hamda Qoraqalpogʻiston MSSJ Sogʻliqni saqlash vazirligiga, viloyat ijroiya qoʻmitalari va Toshkent shahar ijroiya qoʻmitasi sogʻliqni saqlash boshqarmalari (boʻlimlari)ga bittadan shtat ajratsin.

7. Qoraqalpogʻiston MSSJ Vazirlar Kengashi, viloyat ijroiya qoʻmitalari va Toshkent shahar ijroiya qoʻmitasi kasaba uyushmalari va komsomol tashkilotlari bilan birgalikda Oʻzbekiston SSJdan chaqirilgan yigitlar xizmat qilayotgan harbiy qismlarga otalik qilish ishlarini kuchaytirsinlar.

Jamoatchilik, urush va mehnat veteranlari vakillari, madaniyat va sanʼat arboblari, badiiy havaskorlarning harbiy boʻlinmalarga muntazam borib turishi tashkil etilsin, jumhuriyat hayotini yorituvchi kitoblar, davriy nashrlar, kinofilmlar yuborib turilsin.

Ofitsyerlar sostavini tayyorlash maqsadida tub millatga mansub yigitlarni tanlash va ularni harbiy oʻquv yurtlariga yuborish yuzasidan sobitqadamlik bilan ish olib borilsin.

8. Oʻzbekiston SSJ Vazirlar Kengashi quyi harbiy komissarliklar oʻzbek tilini va mazkur joyda yashovchi aholi koʻpchiligining tilini bilgan xodimlar bilan mustahkamlashda jumhuriyat harbiy komissarligiga zarur yordam koʻrsatsin.

9. Oʻzbekiston SSJdan saylangan SSSR xalq deputatlari, Oʻzbekiston SSJ Oliy Kengashining qoʻmitalari va komissiyalari SSSR Oliy Kengashida boʻlajak harbiy islohot loyihasini koʻrib chiqish chogʻida jumhuriyat manfaatlari va mamlakatning mudofaa qobiliyatiga asoslanib, faol ishtirok etsinlar.

10. Ommaviy axborot vositalari qismlarda harbiy intizomni buzish faktlarini va aybdorlarga nisbatan koʻrilgan choralarni keng yoritsinlar.