Qishloq xoʻjaligini va sanoatning qayta ishlovchi tarmoqlarini mamlakatimizda ishlab chiqarilgan, jahon talablari va standartlariga javob beradigan zamonaviy yuqori unumli qishloq xoʻjaligi texnikasi va texnologik asbob-uskunalar bilan jihozlash darajasini tubdan oshirish, qishloq xoʻjaligi mashinasozligi korxonalarini modernizatsiya qilish, texnik va texnologik jihatdan yangilash uchun xorijiy investitsiyalarni, eng avvalo yetakchi xorijiy kompaniyalarning toʻgʻridan toʻgʻri investitsiyalarini keng jalb etish maqsadida:

1. Oʻzbekiston Respublikasi Qishloq va suv xoʻjaligi vazirligi tomonidan Iqtisodiyot vazirligi, Moliya vazirligi, “Oʻzqishloqxoʻjalikmashlizing” AJ, “Oʻzagromashservis” uyushmasi, qishloq xoʻjaligi mashinasozligi korxonalari bilan birgalikda ishlab chiqilgan 2012 — 2016-yillarda Qishloq xoʻjaligi ishlab chiqarishini yanada modernizatsiya qilish, texnik va texnologik jihatdan qayta jihozlash dasturi maʼqullansin. Dastur:

2012 — 2016-yillarda mamlakatimizda qishloq xoʻjaligi texnikasini ishlab chiqarish va uning asosiy turlarini yangilashning 1-ilovaga* muvofiq prognoz parametrlarini;

2012 — 2016-yillarda qishloq xoʻjaligi va melioratsiya texnikasi, transport vositalari va qishloq xoʻjaligi mahsulotlari yetishtirish va ularni qayta ishlash boʻyicha texnologik asbob-uskunalarning yangi turlarini ishlab chiqarishni tashkil etish boʻyicha 2 va 3-ilovalarga* muvofiq investitsiya loyihalari roʻyxatini oʻz ichiga oladi.

Vazirlar Mahkamasining Mashinasozlik, elektrotexnika va aviatsiya sanoatini rivojlantirish, mahsulotlarni standartlashtirish masalalari kompleksi (U.U.Rozuqulov), qishloq xoʻjaligi mashinasozligi korxonalari manfaatdor vazirliklar, idoralar hamda tijorat banklari bilan birgalikda 2 va 3-ilovalarda nazarda tutilgan investitsiya loyihalarini amalga oshirishning barcha bosqichlari oʻz vaqtida roʻyobga chiqarilishini, shu jumladan loyiha hujjatlari ishlab chiqilishi va ekspertizadan oʻtkazilishini, qurilish-montaj ishlari bajarilishini hamda quvvatlar foydalanishga topshirilishini taʼminlasinlar.

2. 2012 — 2016-yillarda Qishloq xoʻjaligi ishlab chiqarishini yanada modernizatsiya qilish, texnik va texnologik jihatdan qayta jihozlash dasturini amalga oshirishni taʼminlash yuzasidan 4-ilovaga* muvofiq tarkibda Ishlarni muvofiqlashtirish va masalalarni tezkor hal etish boʻyicha idoralararo komissiya tashkil etilsin.

Idoralararo komissiya (U.U.Rozuqulov):

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi bilan birgalikda har yili 1-sentabrgacha ushbu qarorning 1 va 2-ilovalariga muvofiq qishloq xoʻjaligi texnikasining barcha turlari va tiplari koʻrgazmalari oʻtkazilishini taʼminlasin va ularning natijalari boʻyicha 15-sentabrgacha boʻlgan muddatda Vazirlar Mahkamasiga eng yaxshi jahon namunalariga mos hamda xalqaro talablar va standartlarga javob beradigan texnikaning zamonaviy va samarali tiplarini ishlab chiqarish hamda qishloq xoʻjaligiga yetkazib berish uchun tanlab olish boʻyicha takliflarni kiritsin;

ikki oy muddatda Vazirlar Mahkamasiga eng yangi qishloq xoʻjaligi texnikasiga oid maxsus konstruktorlik byurosi tashkil etish boʻyicha takliflar kiritsin, bunda respublikadagi qishloq xoʻjaligi ishlab chiqarishining oʻziga xos xususiyatlari hamda paxtachilik, ozuqa yetishtirish, sabzavotchilik, bogʻdorchilik va uzumchilik singari qishloq xoʻjaligining yetakchi tarmoqlarida tuproqqa ishlov beradigan, koʻchat oʻtqazadigan, hosilni yigʻishtiradigan va xizmat koʻrsatuvchi texnikaga nisbatan qoʻyiladigan talablar nazarda tutilsin.

Idoralararo komissiyaga (U.U.Rozuqulov) Oʻzbekiston Respublikasi Qishloq va suv xoʻjaligi vazirligi, Iqtisodiyot vazirligi, Moliya vazirligi hamda qishloq xoʻjaligi mashinasozligi korxonalarining birgalikdagi taqdimnomasiga koʻra qishloq xoʻjaligi va melioratsiya texnikasini ishlab chiqarish va xarid qilish hajmlari, shuningdek bozor konyunkturasiga va qishloq xoʻjaligi ishlab chiqarishi texnologiyasi rivojlanishiga muvofiq investitsiya loyihalarini amalga oshirish muddatlari oʻzgarishi mumkinligini nazarda tutgan holda Dasturga aniqlashtirish va qoʻshimchalar kiritishga ruxsat berilsin.

5. Quyidagicha tartib oʻrnatilsin, unga muvofiq:

Oʻzbekiston Respublikasi Moliya vazirligi huzuridagi Qishloq xoʻjaligini texnika bilan taʼminlashni davlat tomonidan ragʻbatlantirish jamgʻarmasi mablagʻlaridan foydalangan holda lizing asosida qishloq xoʻjaligi texnikasi sotib olish 5-ilovaga* muvofiq haq toʻlash shartlarida amalga oshiriladi.

Vazirlar Mahkamasi qishloq xoʻjaligi ekinlarini joylashtirishni, ekin maydonlari va mexanizatsiyalashtirilgan ishlar hajmini hisobga olgan holda moliyalashtirishning turli manbalari boʻyicha qishloq xoʻjaligi texnikasiga boʻlgan ehtiyojni va ularni xarid qilishning zarur hajmini aniqlash asosida qishloq xoʻjaligi texnikasi sotib olish uchun har yilgi shartnoma kampaniyasini oʻtkazish tartibi toʻgʻrisidagi Nizomni bir oy muddatda tasdiqlasin.

6. Qoraqalpogʻiston Respublikasi Vazirlar Kengashi Raisi, viloyatlar va tumanlar hokimlari zimmasiga shartnoma kampaniyasi oʻz vaqtida va sifatli tashkil etilishi, shuningdek ehtiyot qismlar sotib olishga va qishloq xoʻjaligi texnikasiga servis xizmati koʻrsatish boʻyicha xizmat shartnomalari tuzilishi borasida shaxsiy javobgarlik yuklansin.

7. Qishloq xoʻjaligi mashinasozligi korxonalari ishlab chiqariladigan mahsulotlarga narxlarni shakllantirishda ilmiy-tadqiqot va tajriba-konstruktorlik ishlarini moliyalashtirishga sotiladigan mahsulot tannarxining 1 foizi miqdoridagi sarf-xarajatlarni nazarda tutsinlar, ushbu mablagʻlar keyinchalik korxonalarning alohida hisob raqamlarida jamlanadi va ulardan korxonalarni boshqarishning tegishli organlari bilan kelishgan holda qonun hujjatlarida belgilangan tartibda foydalaniladi.

8. Qishloq xoʻjaligi mashinasozligi korxonalari ushbu qarorning 2-ilovasida nazarda tutilgan investitsiya loyihalarini amalga oshirish doirasida, shu jumladan jahonning yetakchi ishlab chiqaruvchilari bilan litsenziya bitimlari asosida texnika, butlovchi buyumlar va ularga detallarning yangi turlarini ishlab chiqarishni oʻzlashtirishda:

texnika, butlovchi uzellar, detallar va ularga ehtiyot qismlarning yangi turlari sotilishi yuzasidan foydadan olinadigan soliqdan;

texnika, butlovchi uzellar, detallar va ularga ehtiyot qismlarning yangi turlarini ishlab chiqarish uchun foydalaniladigan asosiy mablagʻlar yuzasidan mol-mulk soligʻidan 5 yil muddatga ozod qilinsin.

9. Oʻzbekiston Respublikasi Qishloq va suv xoʻjaligi vazirligi Iqtisodiyot vazirligi, Moliya vazirligi, Adliya vazirligi, boshqa manfaatdor vazirliklar va idoralar bilan birgalikda bir oy muddatda Vazirlar Mahkamasiga:

2012 — 2016-yillarda Qishloq xoʻjaligi ishlab chiqarishini yanada modernizatsiya qilish, texnik va texnologik jihatdan qayta jihozlash dasturini amalga oshirishni taʼminlash boʻyicha kompleks tadbirlarni;

qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisidagi takliflarni kiritsin.

10. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M.Mirziyoyev zimmasiga yuklansin.