Республикамизнинг иқлим шароитларига мос келадиган кам қаватли хизмат бинолари ва уй-жойларга бўлган эҳтиёжларнинг ўсиб бораётганлигини ҳисобга олиб Вазирлар Маҳкамаси қарор қилади:

1. «Тошкенттикланиш» давлат-кооператив қурилиш бирлашмаси «Тошкентқурилиш» давлат-акционерлик қурилиш корпорацияси ихтиёрига берилсин ва унинг негизида таркибига иловага* мувофиқ корхоналар ва ташкилотлар кирган «Тошхорижийқурилиш» давлат-акционерлик қурилиш бирлашмаси ташкил этилсин.

«Тошкентқурилиш» давлат корпорацияси, «Ўзшартномасавдо» давлат уюшмаси янги ташкил этилган «Тошхорижийқурилиш» бирлашмасини етишмаган зарур ишлаб чиқариш бўлинмалари билан тўлдиришни, машиналар, механизмлар ва асбоб-ускуналар билан жиҳозлашни таъминласинлар.

2. Ўзбекистон Республикаси Давлат мулки қўмитаси «Тошкентқурилиш» корпорацияси ва «Тошхорижийқурилиш» бирлашмаси билан биргаликда 1993-1994 йилларда амалдаги қонун ҳужжатларига биноан «Тошхорижийқурилиш» бирлашмаси таркибий бўлинмаларини очиқ турдаги акционерлик жамиятларига айлантириш бўйича зарур ташкилий чора-тадбирларни амалга оширсин. Акцияларнинг давлатга қарашли улуши 51 фоиз миқдорида белгилаб қўйилсин.

3. Белгилаб қўйилсинки, янги ташкил этилган «Тошхорижийқурилиш» бирлашмасининг бошлиғи «Тошкентқурилиш» давлат корпорацияси раисининг биринчи ўринбосари ҳисобланади. Қўшимча равишда «Тошкентқурилиш» давлат корпорацияси раисининг биринчи ўринбосари лавозими жорий этилсин.

4. «Тошхорижийқурилиш» зиммасига Ташқи ишлар вазирлиги Дипломатик сервис хизматининг, юридик шахслар ва Ўзбекистон Республикаси фуқаролари бўлган жисмоний шахсларнинг буюртмаларига биноан мебель билан жиҳозланган кам қаватли уй-жой-хўжалик объектларини лойиҳалаш ва фойдаланишга тайёр ҳолда қуриш вазифаси юклатилсин.

Қурилиш буюртмачилар маблағлари, Дипломатик сервис хизматининг ўз маблағлари ва банк кредитлари ҳисобига амалга оширилсин. Маблағ билан таъминловчи банклар Дипломатик сервис хизматини унинг 1994-1995 йилларга ҳисоб-китобига мувофиқ ҳажмлардаги кредит ресурслари билан таъминласинлар.

5. Ўзбекистон Республикаси Марказий банкига кейинчалик марказлаштирилган тартибда «Тошкентқурилиш» корпорациясининг «Тошхорижийқурилиш» бирлашмасига айланма маблағларини кўпайтиришга белгиланган тартибга мувофиқ икки йил муддатга бериш учун Молия вазирлигига 2 млрд сўм миқдорида 5 фоизли мақсадли кредит ажратиш тавсия этилсин.

«Тошхорижийқурилиш» бирлашмаси учун 1993-1994 йилларда даромад солиғи ставкаси 12 фоиз миқдорида белгилансин.

6. Тошкент шаҳар ҳокимлигининг қурилиш учун берилган участкалар ҳамда уларнинг «Тошхорижийқурилиш» бирлашмасининг буюртмалари бўйича тезкорлик билан ажратилиши тўғрисидаги таклифлари маъқуллансин.

7.«Ўзқурилишматериаллари» концерни, «Ўзметаллконцерн», «Тошкентқурилиш», «Ўзсаноатхўжаликқурилиш» давлат корпорациялари, «Ўзбошёғочқурилиш» бошқармаси, «Ўзшартномасавдо», «Ўзбексавдо» давлат уюшмалари техник ҳужжатларга мувофиқ бирлашмага ўз номенклатураларига биркитилган металл прокати ва трубаларни, юқори сифатли материаллар, йиғма темир-бетон конструкциялар ва ёғочнинг қаттиқ турларидан тайёрланган паркет, ёритиш приборлари, санфаянс, пояндоз қопламаларни етказиб бериш ва сотишни таъминласинлар.

8. Ўзбекистон Республикаси Давлат мулки қўмитаси ва Ташқи ишлар вазирлиги бир ой муддатда хорижий фуқаролиги бўлган жисмоний шахсларга ва Ўзбекистон Республикаси фуқароларига офисларни ва уй-жойларни мулк қилиб сотиш ёки ижарага бериш тартибини ва шартларини ишлаб чиқсинлар ва кўриб чиқиш учун Вазирлар Маҳкамасига киритсинлар.

9. Ўзбекистон Республикаси Ташқи ишлар вазирлиги республикада рўйхатга олинган хорижий ваколатхоналар ва фирмаларнинг дипломатик ва бошқа воситалари орқали республика Ҳукуматининг ушбу масала бўйича қарорини кенг реклама қилсин ҳамда қайд этилган объектларни қуришга якка тартибдаги буюртмаларни кўпайтириш бўйича амалий чора-тадбирлар кўрсин.

10. Ушбу қарорнинг бажарилишини назорат қилиш Бош вазирнинг ўринбосари К. Н. Тўлаганов зиммасига юклатилсин.