Янги ерларни, фойдали қазилмалар конларини комплекс ўзлаштириш, темир йўлда юк ташишнинг транспорт таъминотини яхшилаш, Навоий вилояти ва Қорақалпоғистон Республикаси янги минтақаларнинг ишлаб чиқариш ва ижтимоий масалаларини ҳал этиш, Ўзбекистоннинг ягона темир йўл тармоғини шакллантириш мақсадида Вазирлар Маҳкамаси қарор қилади:

1. Навоий—Учқудуқ, Султонуиздоғ—Нукус йўналишларидаги темир йўлни электрлаштирган ҳолда қайта қуриш ҳамда Учқудуқ—Султонуиздоғ йўналишида янги темир йўлни электрлаштирган ҳолда қуриш мақсадга мувофиқ деб ҳисоблансин.

2. 1994—2000 йилларда қайта қуриш ва қуришни бошлаш ва ниҳоясига етказиш муддатлари иловага* мувофиқ, қурилишнинг буюртмачиси этиб — Ўрта Осиё темир йўл бошқармаси, темир йўл транспорти ишлаб чиқариш ва ноишлаб чиқариш соҳалари объектларини лойиҳалаш ва қуриш бўйича бош пудратчи этиб – «Ўзбектрансқурилиш» уюшмаси белгилансин.

Навоий—Учқудуқ—Султонуиздоғ—Нукус янги темир йўлини электрлаштирилган ҳолда қуриш ва қайта қуришни амалга ошириш республиканинг давлат мақсадли дастури ҳисоблансин.

3. Хоразм вилояти ва Қорақалпоғистоннинг жанубий туманларининг республиканинг темир йўл магистралига чиқишларини таъминлаган ҳолда узунлиги 120 километрли Султонуиздоғ—Тўрткул—Ленин йўли темир йўл участкаси қурилиши давом эттирилсин.

4. Энергетика ва электрлаштириш вазирлиги, «Ўзбекнефтгаз» миллий корпорацияси, Коммунал хизмат кўрсатиш вазирлиги, Ўзбекистон Республикаси Алоқа вазирлиги Ўрта Осиё темир йўли ва «Ўзбектрансқурилиш» уюшмасининг топшириғи бўйича бош пудратчилар сифатида белгиланган муддатларда мавжуд электрузатиш линияларини, газ ва нефть ўтказиш қувурларини, алоқа қурилмалари ва бошқа муҳандислик коммуникацияларни буюртмачининг маблағи ҳисобига бошқа жойга кўчиришни ва янгиларини қуришни таъминласинлар.

5. «Ўзистиқболстат» давлат қўмитаси 1994—2005 йиллар капитал қурилиш прогнозида Ўрта Осиё темир йўл бошқармасига темир йўл линияларини лойиҳалаш, қуриш ва қайта қуриш учун республика бюджетидан зарур капитал маблағларни ажратишни назарда тутсин. 1993 йилда лойиҳалаш ишлари ўз маблағлари, у етишмагани тақдирда банк кредитлари ҳисобига амалга оширилсин.

6. Ўзбекистон Республикаси Марказий банкига, давлат ҳамда акционерлик — тижорат банкларига лойиҳалаш, объектлар қурилишида бажарилган ишларнинг ҳақиқий ҳажмлари бўйича имтиёзли шартларда маблағ билан таъминлашни амалга ошириш тавсия этилсин.

7. «Ўзбектрансқурилиш» уюшмаси бўлинмалари томонидан бажарилаётган иш ҳажмларининг кўпайиб бораётганлиги ҳамда янги темир йўл линияси қурилиши ва қайта қурилиши зонасидаги пудрат ташкилотларининг зарур механизмлар билан етарли таъминланмаганлиги муносабати билан лойиҳа – смета ҳужжатларида ишлаб чиқариш базаларни ривожлантириш учун смета қийматининг 10 фоизи миқдорида маблағ ажратиш назарда тутилсин.

8. «Ўзшартномасавдо» уюшмаси, «Ўзқурилишматериаллари» концерни ҳамда республиканинг бошқа таъминот—сотув ташкилотлари темир йўл линиялари қурилиши ва қайта қурилиши қатнашчи—ташкилотларига квоталанган маҳсулотларни биркитилган номенклатураси бўйича тасдиқланган капитал маблағлар миқдорига қараб ажратилишини амалга оширсинлар, шунингдек, шартномавий нархлар бўйича маҳсулот етказиб берувчилар билан хўжалик алоқаларини ўрнатишда кўмаклашсинлар.

9. Қорақалпоғистон Республикаси Вазирлар Кенгаши ва Навоий вилояти ҳокимлиги:

Ўрта Осиё темир йўл бошқармаси ва «Ўзбектрансқурилиш» уюшмаси билан биргаликда белгиланган тартибда темир йўл линиялари, муҳандислик ва транспорт коммуникациялари, бошқа объектлар қурилиши ва қайта қурилиши учун ер майдонларини ажратишни амалга оширсинлар;

«Ўзбексавдо» уюшмаси, «Ўзбекбирлашув» ва «Ўзбектрансқурилиш» уюшмаси билан биргаликда қурилишга жалб қилинган ишчиларга ижтимоий-маиший шароитлар яратилишини, уларни жойлаштиришни ва овқатланишларини ташкил этишни таъминласинлар;

темир йўл линиялари қурилиши ва қайта қурилиши ишларига қурилиш бўлинмаларини уларнинг механизмлари ва одам ресурслари билан жалб этиш имкониятлари кўриб чиқилсин.

10. Вазирликлар, идоралар, уюшмалар, корпорациялар янги темир йўл қурилиши ва қайта қурилишида бевосита қатнашувчи лойиҳалаш, қурилиш, монтаж, ишга тушириш-созлаш ташкилотлари ишчилари ва мутахассислари ва эксплуатация қилувчи мутахассисларга тариф ставкалари ва лавозим окладлари 30 фоизгача оширилган ҳолда, ушбу сарфлар қурилиш сметасига киритган тақдирда иш ҳақи тўлашни амалга оширсинлар.

Хизмат сафарига юборилаётганлар учун бир суткалик харажатлар миқдори белгиланган энг кам иш ҳақининг 10 фоизи миқдорида белгилансин.

11. Ўзбекистон Республикаси Давлат табиатни муҳофаза қилиш қўмитаси Навоий—Учқудуқ—Султонуиздоғ—Нукус темир йўл линияси қурилиши ва қайта қурилиши лойиҳасининг техник-иқтисодий асосининг экологик экспертизасини ўтказсин ҳамда ушбу объектнинг атроф муҳитга таъсири тўғрисида хулоса тайёрласин.

12. Ушбу қарорнинг бажарилишини назорат қилиш Бош вазирнинг ўринбосари К.Н Тўлаганов зиммасига юклатилсин.