Ўзбекистон Республикаси Президентининг «Маҳаллий енгил саноат корхоналарининг халқаро етказиб бериш занжирларида иштирокини кенгайтириш ҳамда ташқи бозорларда ўрнини мустаҳкамлашга қаратилган чора-тадбирлар тўғрисида» 2026 йил 12 январдаги ПФ-4-сон Фармонига мувофиқ Вазирлар Маҳкамаси қарор қилади:

1. Ўзбекистон Республикаси Президентининг «Маҳаллий енгил саноат корхоналарининг халқаро етказиб бериш занжирларида иштирокини кенгайтириш ҳамда ташқи бозорларда ўрнини мустаҳкамлашга қаратилган чора-тадбирлар тўғрисида» 2026 йил 12 январдаги ПФ-4-сон Фармонига мувофиқ 50 миллион АҚШ доллари 2026 йилда тижорат банклари орқали енгил саноат корхоналарига қуёш фотоэлектр станциясини қуриш мақсадида 4 йил муддатгача йиллик 6 фоиз ставкада (банк маржаси 1,5 фоиз ва Агентлик харажатлари 0,5 фоиз) кредитлар бериш учун Енгил саноатни ривожлантириш агентлиги буюртмасига асосан Енгил саноатни қўллаб-қувватлаш жамғармасига ажратилиши белгилангани маълумот учун қабул қилинсин.

2. Қуйидагиларни назарда тутувчи Енгил саноат корхоналарига қайта тикланувчи энергия манбалари қурилмаларини харид қилиш ва ўрнатиш учун тижорат банклари орқали кредит ажратишга ресурсларни жойлаштириш тартиби тўғрисидаги низом 1-иловага мувофиқ тасдиқлансин:

енгил саноат корхоналари томонидан қайта тикланувчи энергия манбалари қурилмаларини харид қилиш ва ўрнатиш мақсадида кредит олиш учун тижорат банкларига мурожаатларни кўриб чиқиш тартиби ва муддатлари;

мурожаатларни кўриб чиқиш натижалари бўйича ресурсларни тақдим этиш ва/ёки тақдим этишни рад этиш асослари;

ажратилган ресурслардан мақсадли фойдаланганлик ҳолатини доимий мониторинг қилиш тартиби.

3. Вазирлар Маҳкамасининг «Ўзбекистон Республикаси Вазирлар Маҳкамаси ҳузуридаги Енгил саноатни ривожлантириш агентлиги фаолиятини ташкил этиш тўғрисида» 2025 йил 17 ноябрдаги 729-сон қарорига 2-иловага мувофиқ ўзгартириш ва қўшимчалар киритилсин.

4. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров ҳамда Вазирлар Маҳкамаси ҳузуридаги Енгил саноатни ривожлантириш агентлиги директори Н.Қ. Холмуродов зиммасига юклансин.

1. Ушбу Низом Вазирлар Маҳкамаси ҳузуридаги Енгил саноатни ривожлантириш агентлиги (кейинги ўринларда — Агентлик) қошидаги Енгил саноатни қўллаб-қувватлаш жамғармаси (кейинги ўринларда — Жамғарма) ҳисобидан енгил саноат корхоналарига қайта тикланувчи энергия манбалари қурилмаларини харид қилиш ва ўрнатиш учун тижорат банкларига молиявий ресурсларни жойлаштириш тартибини белгилайди.

2. Ушбу Низомда қуйидаги тушунчалардан фойдаланилади:

енгил саноат корхоналари — Ўзбекистон Республикасида рўйхатдан ўтган ва тўқимачилик, ипакчилик, чарм-пойабзал ҳамда гиламчилик саноатида фаолият кўрсатаётган тадбиркорлик субъектлари;

етказиб берувчи — Вазирлар Маҳкамаси ҳузуридаги Энергия самарадорлиги миллий агентлигининг Энергия самарадорлигини ошириш рақамли платформаси (кейинги ўринларда — платформа) орқали аниқланган қуёш панеллари, гелиоколлекторлар, иссиқлик насослари ҳамда бошқа қурилма ва ускуналарни харид қилиш ва ўрнатишни таклиф этувчи юридик шахс;

молиявий ресурслар — Агентлик томонидан енгил саноат корхоналарига қайта тикланувчи энергия манбалари қурилмаларини харид қилиш ва ўрнатиш учун тижорат банкларига жойлаштирилган чет эл валютасидаги пул ресурси;

қайта тикланувчи энергия манбалари қурилмалари — қайта тикланувчи энергия манбаларидан энергия ишлаб чиқариш, энергияни қабул қилиб олиш, ўзгартириш, тўплаш ва (ёки) узатиш, шунингдек, ҳисобга олиш бўйича технологик асбоб-ускуналар мажмуаси, технологик ва (ёки) бутловчи асбоб-ускуналар (фотопанеллар (PV модуллар), қуёш панеллари, гелиоколлектор, иссиқлик насослари).

3. Енгил саноат корхонаси молиявий ресурсларни олиш мақсадида платформа орқали ёки мустақил равишда қайта тикланувчи энергия манбалари қурилмаларининг бозор нархларини ўрганади. Ўрганиш натижаларига кўра нарх ва сифат омилларидан келиб чиққан ҳолда танлаб олинган дастлабки нархлар асосида хизмат кўрсатувчи тижорат банкига мурожаат қилади.

4. Тижорат банки мурожаатни беш иш кунида кўриб чиқади, мурожаат кўриб чиқилишида енгил саноат корхоналарининг қуйидаги шартларга мувофиқлигини текширади:

енгил саноат корхонаси тугатиш босқичида эмаслиги ёки унга нисбатан тўловга қобилиятсизлик тартиботи қўзғатилмагани;

енгил саноат корхонаси томонидан тақдим қилинган дастлабки нархлар платформадаги нархларга мувофиқлиги;

енгил саноат корхонасининг барча молиявий ва савдо операциялари бўйича муддати ўтган дебиторлик қарздорлиги ушбу операцияларнинг 10 фоиздан юқори эмаслиги;

енгил саноат корхонасига кредит тақдим этиш банкнинг ички кредит сиёсатига мувофиқлиги.

5. Тижорат банки қайта тикланувчи энергия манбалари қурилмаларини харид қилиш ва ўрнатиш учун ажратиладиган кредитларга молиявий ресурс ажратилиши бўйича Агентликка белгиланган тартибда электрон ахборот тизими орқали буюртманома тақдим этади.

6. Агентлик уч иш кунида буюртманомани кўриб чиқади ва кўриб чиқиш натижалари бўйича қабул қилинган қарор тўғрисида электрон ахборот тизими орқали тижорат банкига маълум қилади.

7. Агентлик томонидан молиявий ресурслар Жамғарма маблағлари ҳисобидан енгил саноат корхоналарига тижорат банклари орқали қайта тикланувчи энергия манбалари қурилмаларини харид қилиш ва ўрнатиш учун 4 йил муддатгача йиллик 6 фоиз ставкадан (шундан 1,5 фоизи банк маржаси, 0,5 фоизи Агентлик харажатлари) ошмаган ҳолда кредитларни ажратиш мақсадлари учун тақдим этилади.

8. Агентликнинг молиявий ресурслари ҳисобидан берилган кредитларни ўз вақтида сўндириб келаётган енгил саноат корхоналарига айнан шу мақсадлар бўйича бир неча марта қўшимча молиявий ресурс ажратишга рухсат этилади.

9. Молиявий ресурслардан фойдаланиш учун тижорат банкида алоҳида ҳисобварақ очилади.

10. Молиявий ресурслардан фақат қайта тикланувчи энергия манбалари қурилмаларини платформа орқали харид қилиш ва ўрнатиш учун кредитлар ажратиш мақсадларида фойдаланилади.

11. Тижорат банкига молиявий ресурслар тақдим этишни рад этиш учун ушбу Низомнинг 4-бандида кўрсатилган шартлар ёки улардан бирининг бажарилмаслиги асос бўлади.

12. Тижорат банки буюртманома бўйича рад этиш тўғрисида билдиришнома олганда, рад этиш асосларида кўрсатилган камчиликларни бартараф этган ҳолда, молиявий ресурс олиш учун Агентликка қайта буюртманома тақдим этишга ҳақли.

13. Агентликнинг кредит мақсадлари учун молиявий ресурслар ажратиш тўғрисидаги Агентлик қарори юборилган кундан бошлаб уч иш кунида молиявий ресурс ажратилиши билдирилган буюртманома бўйича тўлов талабномаси тижорат банки томонидан Агентликка киритилади.

Агентлик талабнома келиб тушган кундан бошлаб беш иш кунида ундаги маълумотларнинг буюртманома маълумотларига мувофиқлигини ўрганади ҳамда ўрганиш натижаларига кўра тижорат банкларида очилган алоҳида ҳисобвараққа молиявий ресурсларни ўтказиб беради.

14. Талабномадаги маълумотлар буюртманомадаги маълумотларга мувофиқ келмаган ҳолларда, Агентлик бир иш кунида тўлов талабномасини тижорат банкига қайтаради.

15. Тижорат банки талабномадаги номувофиқликларни бартараф этган ҳолда, бир иш куни ичида Агентликка қайта талабнома киритиши мумкин.

16. Мазкур Низомнинг 13-бандида белгиланган муддатларда тижорат банки томонидан Агентликка белгиланган тартибда талабнома киритилмаган ёки талабномадаги номувофиқликлар бартараф этилиб қайта киритилмаган тақдирда, мазкур буюртманома бўйича талабнома ўз кучини йўқотган ҳисобланади ва ресурс ажратиш тўғрисидаги қарор бекор қилинади.

Бунда тижорат банки томонидан қайтадан буюртманома расмийлаштирилиб, Агентликка кўриб чиқиш учун киритилиши мумкин.

17. Тижорат банки унинг ҳисобварағига келиб тушган маблағларни имзоланган тегишли кредит шартномасига мувофиқ уч иш кунида енгил саноат корхонасига қайта тикланувчи энергия манбалари қурилмаларини харид қилиш ва ўрнатиш учун ажратилган молиявий ресурслар учун банк ҳисобварағига ўтказиб беради ва буни тасдиқловчи банк ҳужжатларини Агентликка тақдим этади.

18. Тижорат банкининг ҳисобварағига Агентликдан келиб тушган маблағлардан буюртманомада кўрсатилган мақсадлардан бошқа мақсадлар учун фойдаланиш тақиқланади.

19. Тижорат банклари Агентлик томонидан ажратилган молиявий ресурслар ҳисобидан енгил саноат корхоналарига тақдим этилган кредит суммалари билан боғлиқ молиявий операцияларни амалга оширишда шартнома платформа орқали тузилганини текширади.

20. Ҳужжатлар тақдим этилган куннинг ўзидаёқ тижорат банклари енгил саноат корхонасига тақдим қилинган кредит маблағлари ҳисобидан платформа орқали тузилган шартномалар бўйича банк операцияси амалга оширилаётган кундаги курс билан чет эл валютасини конвертация қилган ҳолда тўловларни тўлайди.

21. Тижорат банки Агентлик томонидан ажратилган молиявий ресурслар ушбу Низомнинг 7-бандида белгиланган фоиз ставкалари асосида ҳисобланган устама ҳақи билан бирга ўзаро тасдиқланган молиявий ресурсларни қайтариш графигига асосан Агентликка ўтказиб борилишини таъминлайди, форс-мажор ҳолатлар бундан мустасно.

Бунда тижорат банкига ажратилган молиявий ресурслар бўйича ҳисобланган фоизлар ва асосий қарз суммаси тижорат банкининг жамғариб бориладиган ҳисобварағида йиғилади ва молиявий ресурсларни қайтариш графигида белгиланган муддатларда Агентликка ўтказиб борилади.

22. Молиявий ресурслардан фойдаланаётган енгил саноат корхоналари ушбу Низомда белгиланган молиялаштириш тури бўйича олган маблағларни муддатидан олдин қайтарган тақдирда, тегишли маблағлар (молиявий ресурс ва у бўйича ҳисобланган фоизлар) тижорат банки томонидан далолатномага асосан 5 иш кунида Агентликка ўтказиб берилади.

23. Молиявий ресурслардан фойдаланаётган енгил саноат корхоналари ушбу Низомда белгиланган молиялаштириш тури бўйича олган маблағларини ўз муддатида қайтара олмаган ҳолларда, молиявий ресурсларнинг белгиланган муддатларда Агентликка қайтарилиши бўйича жавобгарлик тижорат банкларига юкланади.

Бунда тижорат банклари енгил саноат корхоналари томонидан график бўйича тўловлар тўланишидан қатъи назар, Агентлик ва тижорат банклари ўртасида тузилган бош келишувга мувофиқ тўловларни (асосий қарз ва фоизлар) Агентликнинг ҳисобварағига ўтказиб боради.

24. Тижорат банки томонидан қуйидаги ҳолларда муддати ўтган ҳар бир кун учун кечиктирилган қарз суммасининг 0,1 фоизи миқдорида, бироқ мажбуриятлари бажарилмаган қисми миқдорининг 30 фоизидан кўп бўлмаган миқдорда неустойка (пеня) тўлайди:

бош келишувга асосан молиявий ресурс ва унга ҳисобланган устама ҳақи бўйича молиявий ресурсларни қайтариш графигида кўрсатилган муддатлардан кечиктирилганда;

тижорат банкининг махсус ҳисобварағига ўтказилган, лекин тадбиркорлик субъекти томонидан фойдаланиш рад этилган маблағларни Агентликка ўтказиб бериш кечиктирилганда.

25. Тижорат банклари енгил саноат корхоналарига тақдим этилган кредитларнинг мақсадли сарфланиши бўйича жойига чиққан ҳолда ҳамда онлайн платформа орқали доимий мониторинг юритади.

26. Агентлик ва тижорат банки ўртасидаги низолар суд тартибида ҳал этилади.

27. Агентлик томонидан тижорат банкига ажратилган молиявий ресурслардан мақсадли фойдаланиш бўйича жавобгарлик тижорат банкига юкланади.

28. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

1. 1-иловада:

а) 11-банд «а» кичик банди бешинчи хатбошиси ва «б» кичик банди ўн бешинчи хатбошисидаги «малакали мутахассисларни» сўзлари «ишчи ва мутахассисларни» сўзлари билан алмаштирилсин;

б) 35-банднинг «а» кичик банди учинчи хатбошисидаги «узлуксиз» сўзи чиқариб ташлансин;

в) 38-банддаги «жамоа келишувига» сўзлари «жамоа шартномасига» сўзлари билан алмаштирилсин.

2. 2-иловада:

а) 5-бандда:

«в» кичик банддаги «малакали мутахассисларни» сўзлари «ишчи ва мутахасиссларни» сўзлари билан алмаштирилсин;

қуйидаги мазмундаги «м», «н», «о», «п» ва «р» кичик бандлар билан тўлдирилсин:

«м) йирик брендлар ва ритейлерлар иштирокидаги халқаро кўргазма ва конференцияларда «ҳомийлик» тўловларини тўлайди;

н) хорижий бренд, «сорсинг» ва ритейлерлар мутахассисларининг Ўзбекистонга ташрифи харажатларини қоплаш (авиачипта, транспорт, меҳмонхона);

о) терини қайта ишлаш, пойабзал ва чарм-атторлик йўналишида:

терини қайта ишлаб, тайёр чарм ишлаб чиқарувчи корхоналарга ишлаб чиқариб, реализация қилинган тайёр чармнинг (краст, финиш) ҳар бир дециметр квадрати учун 350 сўм миқдорида субсидия ажратилади;

пойабзал ва чарм-атторлик маҳсулотларини ишлаб чиқарувчи корхоналарга ишлаб чиқаришга жорий қилинган ҳар бир янги модел учун 1 миллион сўм, бироқ бир корхона учун бир календарь йилида 50 миллион сўмдан ошмаган миқдорда субсидия ажратилади;

пойабзал ишлаб чиқарувчи корхоналар томонидан ўз эҳтиёжлари учун импорт қилинган пойабзал қолиплари (колодка, пресс-форма) қийматининг 50 фоиз қисми, бироқ бир календарь йилда Европа Иттифоқи давлатлари учун 10 минг АҚШ доллари, бошқа давлатлар учун 5 минг АҚШ долларидан ошмаган миқдорда қоплаб берилади;

пойабзал ва чарм-атторлик маҳсулотларини ишлаб чиқарувчи корхоналарга ёки уларнинг рўйхатга олинган савдо белгиси (бренд номи) билан Қорақалпоғистон Республикаси маъмурий маркази, вилоятлар марказлари ва Тошкент шаҳри, шунингдек, республиканинг аҳоли сони 100 минг кишидан ошадиган йирик шаҳарларида савдо уйлари ва фирма дўконларини ташкил этган тадбиркорларга дастлабки 1 йил давомида бино ва майдонларни ижарага олиш харажатларининг 50 фоиз қисми, бироқ 100 миллион сўмдан ошмаган миқдорда қоплаб берилади;

п) енгил саноат корхоналари томонидан сув тозалаш иншоотларида белгиланган меъёрлар доирасида сувни тозалаш учун харид қилинган кимёвий воситалар ва реагентлар қийматининг 50 фоиз қисми қоплаб берилади;

р) Чарм-пойабзал саноат зоналарини бошқариш дирекцияси ходимларини сақлаш харажатлари».

3. 3-иловада:

а) 3-банд қуйидаги мазмундаги хатбоши билан тўлдирилсин:

«Ўзбекистон Республикаси Президенти ва Вазирлар Маҳкамасининг қарорларида кўзда тутилган молиялаштиришнинг бошқа турлари ва йўналишлари»;

б) 4-бандда:

«а» кичик банд қуйидаги мазмундаги еттинчи хатбоши билан тўлдирилсин:

«хорижий бренд активларини бренд номи билан биргаликда харид қилиб, республикага релокация қилган енгил саноат корхоналарига улар томонидан сотилган маҳсулот ҳажмидан қатъи назар, 5 миллион АҚШ долларигача»;

еттинчи — тўққизинчи хатбошилар тегишлича саккизинчи — ўнинчи хатбошилар деб ҳисоблансин;

қуйидаги мазмундаги «г» кичик банд билан тўлдирилсин:

«г) Ўзбекистон Республикаси Президенти ва Вазирлар Маҳкамасининг қарорларида белгиланган бошқа молиялаштириш турлари учун ушбу ҳужжатларда белгилаб берилган шартлар ва миқдорларда».

4. 4-иловада:

а) 2-банд қуйидаги мазмундаги хатбоши билан тўлдирилсин:

«фоиз харажатларининг бир қисмини қоплаш — хорижий бренд активларини бренд номи билан биргаликда харид қилиб, республикага релокация қилган енгил саноат корхоналарининг мазкур қарорга 3-илова 4-банди «а» қисмининг еттинчи хатбошисида назарда тутилган шартларда ажратилган кредит фоиз харажатларининг 2 фоиз пунктини қоплаб бериш»;

б) 3-банд қуйидаги мазмундаги «н», «о» ва «п» кичик бандлар билан тўлдирилсин:

«н) енгил саноат корхоналарини жаҳон бозорларига жалб қилишни кенгайтириш мақсадида:

йирик брендлар ва ритейлерлар иштирокдаги халқаро кўргазма ва конференцияларда «ҳомийлик» тўловларини тўлаш;

хорижий бренд, «сорсинг» ва ритейлерлар мутахассисларининг Ўзбекистонга ташрифи харажатларини қоплаш (авиачипта, транспорт, меҳмонхона);

о) терини қайта ишлаш, пойабзал ва чарм-атторлик соҳасини қуйидаги механизмлар орқали қўллаб-қувватлаш:

терини қайта ишлаб, тайёр чарм ишлаб чиқарувчи корхоналарга ишлаб чиқариб, реализация қилинган тайёр чармнинг (краст, финиш) ҳар бир дециметр квадрати учун 350 сўм миқдорида субсидия ажратиш;

пойабзал ва чарм-атторлик маҳсулотларини ишлаб чиқарувчи корхоналарга ишлаб чиқаришга жорий қилинган ҳар бир янги модел учун 1 миллион сўм, бироқ бир корхона учун бир календарь йилда 50 миллион сўмдан ошмаган миқдорда субсидия ажратиш;

пойабзал ишлаб чиқарувчи корхоналар томонидан ўз эҳтиёжлари учун импорт қилинган пойабзал қолиплари (колодка, пресс-форма) қийматининг 50 фоиз қисми, бироқ бир календарь йилда Европа Иттифоқи давлатлари учун 10 минг АҚШ доллари, бошқа давлатлар учун 5 минг АҚШ долларидан ошмаган миқдорда қоплаб бериш;

пойабзал ва чарм-атторлик маҳсулотларини ишлаб чиқарувчи корхоналарга ёки уларнинг рўйхатга олинган савдо белгиси (бренд номи) билан Қорақалпоғистон Республикаси маъмурий маркази, вилоятлар марказлари ва Тошкент шаҳри, шунингдек, республиканинг аҳоли сони 100 минг кишидан ошадиган йирик шаҳарларида савдо уйлари ва фирма дўконларини ташкил этган тадбиркорларга дастлабки 1 йил давомида бино ва майдонларни ижарага олиш харажатларининг 50 фоиз қисми, бироқ 100 миллион сўмдан ошмаган миқдорда қоплаб бериш;

п) енгил саноат корхоналари томонидан сув тозалаш иншоотларида белгиланган меъёрлар доирасида сувни тозалаш учун харид қилинган кимёвий воситалар ва реагентлар қийматининг 50 фоиз қисми қоплаб бериш»;

в) 5-бандда:

«о» кичик банд «Агентлик томонидан тасдиқланадиган дастур» сўзларидан кейин «ва имзоланган шартнома бўйича «Лойиҳалар ва харидлар самарадорлигини ошириш маркази» ДМнинг экспертиза хулосаси» сўзлари билан тўлдирилсин;

қуйидаги таҳрирдаги «с», «т», «у» ва «ф» кичик бандлар билан тўлдирилсин:

«с) йирик брендлар ва ритейлерлар иштирокдаги халқаро кўргазма ва конференцияларда «ҳомийлик» тўловларини тўлаш йўналишида Инвестицияларни жалб қилиш, саноатни ривожлантириш ва савдони тартибга солиш масалалари бўйича Ҳукумат комиссияси қарори, йирик брендлар ва ритейлерлар ҳамда Агентлик ўртасида тузилган шартномалар;

т) хорижий бренд, «сорсинг» ва ритейлерлар мутахассисларининг Ўзбекистонга ташрифи харажатларини қоплаш йўналишида Инвестицияларни жалб қилиш, саноатни ривожлантириш ва савдони тартибга солиш масалалари бўйича Ҳукумат комиссияси қарори, Агентлик ва хорижий бренд, «сорсинг» ва ритейлер компаниялари билан Агентлик ўртасида тузилган шартномага мувофиқ;

у) терини қайта ишлаш, пойабзал ва чарм-атторлик соҳасини қуйидаги механизмлар орқали қўллаб-қувватлаш йўналишида:

терини қайта ишлаб, тайёр чарм ишлаб чиқарувчи корхоналарга ишлаб чиқариб, реализация қилинган тайёр чармнинг (краст, финиш) ҳар бир дециметр квадрати учун субсидия ажратишда:

тайёр чарм (краст, финиш) ишлаб чиқариш корхонасининг ўзи фойдаланаётган ва ижарага берган йиллик қувватлари тўғрисида маълумот, ҳисобот даврида солиқ органларига топширилган ҚҚС ҳисоботлари иловалари билан (солиқ органлари томонидан электрон тасдиқланган), ишлов берилмаган тери маҳсулотларини харид қилинганлиги тўғрисида шартнома, ҳисоб-фактуралар (электрон ҳужжатлар айланмаси орқали олинган ва корхонанинг муҳри билан тасдиқланган) ёки сотиб олиш акти (корхона томонидан харид қилинган) ва банк операцияси амалга оширилганлиги тўғрисидаги ҳужжатлари (банк томонидан муҳр қўйиб тасдиқланган);

ҳисобот даври бошига ишлов берилмаган тери маҳсулотлари номенклатураси, ҳажми ва нархи бўйича қолдиғи, ҳисобот даврида харид қилинган ишлов берилмаган тери маҳсулотлари номенклатураси, ҳажми ва нархи, ҳисобот даврида ишлаб чиқаришга йўналтирилган ишлов берилмаган тери маҳсулотлари номенклатураси, ҳажми ва нархи;

ҳисобот даврида ишлаб чиқарилган ва реализация қилинган тайёр чарм (краст, финиш) маҳсулотлари тўғрисидаги маълумотнома, унда ҳисобот даври бошига тайёр чарм номенклатураси, ҳажми ва нархи бўйича қолдиғи, ҳисобот даврида ишлаб чиқарилган тайёр чарм номенклатураси, ҳажми ва нархи, ҳисобот даврида сотилган тайёр чарм номенклатураси, ҳажми ва нархи контерагентлар кесимида кўрсатилади;

тайёр чарм (краст, финиш) ички бозорга реализация қилинганида:

тайёр чарм маҳсулотини сотиб олган пойабзал ёки чарм-атторлик маҳсулотлари ишлаб чиқариш корхонасининг ишлаб чиқариш қувватлари тўғрисида (улар томонидан тасдиқланган) маълумотнома, корхона томонидан тайёр чармдан ишлаб чиқарган маҳсулоти реализация қилинганлиги бўйича ҳужжатлар (счет фактура ёки чакана савдо чеки);

тайёр чарм маҳсулотини сотиб олиб, кейинчалик экспорт қилган савдо корхонаси билан тузилган шартнома (электрон ҳужжатлар айланмаси орқали олинган ва корхонанинг муҳри билан тасдиқланган, ҳисоб фактуралар (электрон ҳужжатлар айланмаси орқали олинган ва корхонанинг муҳри билан тасдиқланган), экспорт шартномаси (Ташқи савдо операциялари ягона электрон ахборот тизими — ТСОЯЭАТ дан кўчирма), божхона юк декларацияси, инвойс, товар ишлаб чиқарилган давлатни тасдиқловчи сертификат нусхаси;

тайёр чарм (краст, финиш) ишлаб чиқарувчи корхона томонидан ташқи бозорга реализация қилинганда экспорт шартномаси (Ташқи савдо операциялари ягона электрон ахборот тизими — ТСОЯЭАТ дан кўчирма) ҳамда божхона юк декларацияси, инвойс, товар ишлаб чиқарилган давлатни тасдиқловчи сертификат (сертификат происхождения товара);

ишлаб чиқарувчи корхонанинг ўз ишлаб чиқариш қувватлари бўлмаган тақдирда, бошқа қувватларни ижарага олиш бўйича ижара шартномаси (e-ijara электрон платформасидан рўйхатдан ўтказилган ва корхонанинг муҳри билан тасдиқланган). Бунда ижара шартнома камида 12 ойга тузилган ва ижарачи 6 ой ишлаган бўлиши керак. Ижарага берувчи корхонанинг ойлик ишлаб чиқариш қуввати ва берилаётган қувват бўйича маълумот бўлиши шарт;

мурожаат қилувчи корхонада ишлов берилмаган терини қайта ишлаш имкониятлари бўлмаганда, харид қилинган хом терига нисбатан реализация қилинган тайёр чарм (краст, финиш) маҳсулотлари тўғрисидаги маълумотлар ўзаро номувофиқ бўлганда, шунингдек, шартномалар ўзаро аффилланган шахслар ўртасида тузилганда субсидия тақдим этиш рад этилади;

пойабзал ва чарм-атторлик маҳсулотларини ишлаб чиқарувчи корхоналарга ишлаб чиқаришга жорий қилинган янги модел учун субсидия ажратишда:

янги моделдаги пойабзал ва чарм-атторлик маҳсулотларини ишлаб чиқаришга жорий қилиш тўғрисида корхона раҳбарининг буйруғи, янги моделнинг техник паспорти, фотосуратлари ва эскиз нусхалари, моделни ишлаб чиқаришга жорий қилиш бўйича далолатнома, янги модел бўйича камида 100 жуфт пойабзал ёки 50 дона чарм-атторлик маҳсулотлари ишлаб чиқарилганлиги тўғрисида тасдиқланган ҳисобот, сотувни тасдиқловчи ҳужжатлар (электрон ҳисобварақ-фактура, шартнома ёки товар юкхатлари), агар янги модел мустақил модельер-дизайнер ёки шу турдаги хизмат кўрсатувчи бошқа тадбиркорлик субъекти томонидан тайёрланган бўлса унинг фаолият турига мувофиқ тегишли ҳужжатлари (гувоҳномаси, модел ишлаб чиқиш бўйича сертификати);

пойабзал ишлаб чиқарувчи корхоналар томонидан ўз эҳтиёжлари учун импорт қилинган пойабзал қолиплари (колодка, пресс-форма) қийматининг 50 фоизини қоплаб бериш йўналишида харажатларни тасдиқловчи ҳужжатлар (импорт шартнома ва (ёки) оферта, божхона юк декларацияси ва бажарилган ишлар бўйича далолатнома, хизмат кўрсатувчи банк томонидан тасдиқланган тўлов топшириқномаси нусхалари, товар ишлаб чиқарилган давлатни тасдиқловчи сертификат (товарнинг келиб чиқиш сертификати);

пойабзал ва чарм-атторлик маҳсулотларини ишлаб чиқарувчи корхоналарга ёки уларнинг рўйхатга олинган савдо белгиси (бренд номи) билан Қорақалпоғистон Республикаси маъмурий маркази, вилоятлар марказлари ва Тошкент шаҳри, шунингдек, республиканинг аҳоли сони 100 минг кишидан ошадиган йирик шаҳарларида савдо уйлари ва фирма дўконларини ташкил этган тадбиркорларга дастлабки 1 йил давомида бино ва майдонларни ижарага олиш харажатларининг қоплаб бериш йўналишида савдо уйи ёки дўкон очиш тўғрисидаги корхона раҳбарининг қарори, e-ijara электрон платформасидан рўйхатдан ўтказилган ва корхонанинг муҳри билан тасдиқланган ижара шартномаси (бунда шартнома бир йилдан кам бўлмаган муддатга тузилган ва камида 3 ой ўз иш фаолиятини олиб борган бўлиши керак) савдо уйи ёки дўконда ўрнатилган касса аппаратини туман солиқ инспекциясида рўйхатдан ўтганлиги тўғрисида маълумотнома, савдо уйи ёки дўкон учун ижарага олинган бинога бўлган ҳуқуқни тасдиқловчи ҳужжат, шартнома бўйича топшириш қабул қилиш далолатномаси, тўловларни тўлаганлик тўғрисидаги ҳужжат (банк томонидан тасдиқланган), ҳар ой якуни бўйича ижара шартномаси бўйича такдим этилган ҳисоб-фактуралари;

ф) енгил саноат корхоналари томонидан сув тозалаш иншоотларида белгиланган меъёрлар доирасида сувни тозалаш учун харид қилинган кимёвий воситалар ва реагентлар қийматининг 50 фоиз қисми қоплаб бериш йўналиши бўйича белгиланган тартибда тасдиқланадиган тегишли техник регламентдаги меъёрлар асосида»;

г) 18-бандда:

«л» кичик банднинг тўртинчи хатбошиси «савдо майдончаларига» сўзларидан кейин «ва B2B платформаларга» сўзлари билан тўлдирилсин;

қуйидаги мазмундаги «с» ва «т» кичик бандлар билан тўлдирилсин:

«с) йирик брендлар ва ритейлерлар иштирокидаги халқаро кўргазма ва конференцияларда «ҳомийлик» тўловларини тўлаш йўналишида:

кўргазма ва конференцияларни ташкил қилиш билан боғлиқ харажатлар;

кўргазма ва конференцияларни ўтказиш павильонларини ижарага олиш билан боғлиқ харажатлар;

баннерлар тайёрлаш, мультимедия маҳсулотларини тайёрлаш, стендлар тайёрлаш билан боғлиқ харажатлар;

т) хорижий бренд, «сорсинг» ва ритейлерлар мутахассисларининг Ўзбекистонга ташрифи харажатларини қоплаш йўналишида:

авиачипта — эконом класс учун;

Ўзбекистон Республикаси ҳудудидаги меҳмонхона харажатлари — стандарт хона;

Ўзбекистон Республикаси ҳудудидаги транспорт харажатлари — эконом класс учун;

таржимонлик хизмати»;

д) 19-бандда:

«харажатларнинг камида 10 баравари миқдорида хорижий валютада» сўзлари «харажатларнинг камида 10 баравари миқдорида айнан ўша савдо уйи ёки омбор орқали хорижий валютада Ўзбекистонда ишлаб чиқарилган» сўзлари билан алмаштирилсин;

қуйидаги мазмундаги хатбоши билан тўлдирилсин:

«Бунда Ҳукуматнинг алоҳида топшириқларига асосан Агентлик томонидан тадбиркорлик субъектларининг офис, савдо ва омбор биноларини ижарага олиш, шу жумладан, чет элда ташкил қилинган савдо уйларининг ижара шартномалари бўйича харажатларини қоплаш юзасидан молиявий ёрдам миқдори ва шартларини ўзгартиришга рухсат берилади»;

«н» кичик банддаги «Вазирлар Маҳкамаси билан келишилган ҳолда» сўзлари чиқариб ташлансин;

«р» кичик банднинг биринчи хатбошиси «етказиб берувчилар (бажарувчи, кўрсатувчи) билан тўғридан-тўғри» сўзларидан кейин «ёки халқаро етказиб берувчи почта хизматларининг Ўзбекистондаги ваколатхоналари ва шу хизматни кўрсатувчи учинчи юридик шахслар билан» сўзлари билан тўлдирилсин;

қуйидаги мазмундаги «с» ва «т» кичик бандлар билан тўлдирилсин:

«с) йирик брендлар ва ритейлерлар иштирокидаги халқаро кўргазма ва конференцияларда «ҳомийлик» тўловларини тўлаш йўналишида Ҳукумат комиссиясининг қарорига мувофиқ битта йирик брендлар ва ритейлерлар корхонасига битта кўргазма ёки конференция учун 100 минг АҚШ долларидан кўп бўлмаган миқдорда;

т) хорижий бренд, «сорсинг» ва ритейлерлар мутахассисларининг Ўзбекистонга ташрифи харажатларини қоплаш йўналишида Ҳукумат комиссиясининг қарори билан битта корхона учун 100 фоиз миқдордаги харажатлар қоплаб берилади».