Мазкур Тартиб Ўзбекистон Республикаси Вазирлар Маҳкамасининг 1999 йил 14 январдаги 19-сонли «Дори воситалари ва тиббий маҳсулотларни сотишни тартибга солиш ҳақида»ги қарорига мувофиқ ишлаб чиқилган бўлиб, стационар даволаш-профилактика муассасаларида бюджет маблағлари ҳисобидан сотиб олинадиган дори-дармон воситалари ва тиббиёт маҳсулотларни бериш, ҳисобга олиш ва улардан фойдаланиш назоратини ташкил қилиш умумий услублари ва шаклларини эътиборга олади, бу ҳужжат 1999 йилнинг 1 мартидан амалга киритилади.

1. Тиббий санитария хизматининг кафолатланган ҳажми доирасида бепул хизмат кўрсатувчи стационар даволаш-профилактика муассасаларида қуйидагилар ҳисобга олинади:

а) дори воситалари, дамлама ва вакциналар, шифобахш ўсимликлар хом ашёси, шифобахш маъданли сувлар, дезинфекцияловчи моддалар, тикув материаллари ва бошқа тиббий маҳсулотлар;

б) қон, унинг препаратлари ва компонентлари;

в) реактивлар, рентген тасма, спирт ва бошқалар;

г) боғлаш материаллари: дока, бинт, пахта, сиқувчи клеёнка ва қоғоз, алегнин ва бошқалар;

д) ёрдамчи материаллар: мумланган, пергамент ва фильтрловчи қоғозлар, қоғоз қути ва халтачалар, капсула ва ғилофлар, қалпоқча, тиқин, иплар, сигнатуралар, ёрлиқ, резина доирачалар, қатрон ва рецептур банкалари;

е) харид қилинган дори воситаларининг нархига қўшилмай, тўлов варақаларида алоҳида кўрсатилган идишлар: 500 мл ва ундан каттароқ ҳажмли склянка ва банкалар, шиша идишлар, бидонлар, қути ва қайтариладиган идишлар.

2. Дори воситалари ва тиббий маҳсулотлар шифохона дорихонасидан қуйидаги мақсадлар учун тарқатилади:

ижтимоий аҳамиятга эга бўлган касалликлар ва атрофдагилар учун хавф туғдирувчи касалликлар (сил, онкологик, руҳий, наркология, эндокрин, инфекциявий, таносил, ОИТС, мохов ва касб касалликларига чалинган шахслар)га махсус тиббий ёрдам кўрсатиш;

аҳолига даволаш-профилактика муассасаларида шошилинч, тез тиббий ёрдам кўрсатиш;

болаларни текширувдан ўтказиш ва даволаш (пуллик шифохоналардан ташқари);

чақирув комиссияси йўлланмалари бўйича 18 — 27 ёшли чақирилувчи шахсларни ва 15 — 17 ёшли ўсмирларни текширувдан ўтказиш ва даволаш;

туғишга ёрдам берувчи хизматлар кўрсатиш (пул тўланадиган муассасалардан ташқари);

давлат даволаш-профилактика муассасаларида имтиёзли тоифаларга мансуб беморлар (ногирон, уруш фахрийлари, чин етимлар)ни даволаш.

3. Мазкур Тартибнинг 1-бандида санаб ўтилган дори воситалари ва тиббий маҳсулотларнинг ҳисоби муассасалар таркибида дорихона мавжуд ёки мавжуд эмаслигига қараб ҳар хил олиб борилади.

4. Шифохона таркибида ички дорихонаси бўлган стационар даволаш-профилактика муассасаларида дори воситалари ва тиббий маҳсулотларни бериш, ҳисобга олиш ва улардан фойдаланишни назорат қилиш Соғлиқни сақлаш вазирлигининг амалдаги йўриқномасига мувофиқ олиб борилади.

5. Бир вақтнинг ўзида бўлимнинг катта ҳамшираси дорихонадан олинган дори воситалари ҳисобини олиб бориш учун «Олинган дориларни ҳисобга олиш журнали»ни юритади, бу журналда қайси беморлар учун дори олинган бўлса, уларнинг фамилия, исм, отасининг исмлари ва касаллик варақаларининг тартиб рақамларини рўйхатдан ўтказади, шунингдек дори воситалари ва тиббий маҳсулотларни шифокор тавсияларини бажариш учун палата ҳамшираларига имзо қўйдириб тарқатади.

6. Палата ҳамширалари шифокор тавсияларининг бажарилиши ҳақида ва унга ишлатилган дориларни қайд этиш, шунингдек беморларнинг фамилия, исм, отасининг исмлари ва касаллик варақаларининг тартиб рақамларини белгилаб бориш учун махсус «Фойдаланилган дориларни ҳисобга олиш журнали»ни юритадилар.

Қайд этилган журналнинг саҳифалари, тартиб рақами қўйилган, қалин ип ўтказилиб тикилган ва муассаса раҳбарининг имзоси билан муҳрланган бўлиши шарт.

Мазкур журналда стационар даволанишда бўлган беморлар ҳақиқатда уларга ишлатилган дорилар миқдорини тасдиқлаб имзоларини қўядилар.

Эс-хушини йўқотган ёки реанимация бўлими ҳамда сунъий нафас олдириш бўлимида даволанаётган беморларга ишлатилган дори воситалари ва тиббий маҳсулотлар миқдори ҳисобга олиш журналида бўлим мудири, даволовчи шифокор ва катта ҳамширанинг имзолари билан тасдиқланади.

7. «Олинган дориларни ҳисобга олиш журнали» ва «Фойдаланилган дориларни ҳисобга олиш журнали» китоблари тўлдирилиб бўлингандан сўнг катта ҳамшира ва палата ҳамширалари томонидан бўлим мудирларига сақлаш учун топширилади.

8. Фойдаланилган «Олинган дориларни ҳисобга олиш журнали» ва «Фойдаланилган дориларни ҳисобга олиш журнали» бўлимда 3 йил давомида сақланади.

9. Таркибида ички дорихонаси мавжуд бўлмаган стационар даволаш-профилактика муассасалари «Дори-дармон» Давлат акциядорлик уюшмаси (ДАУ)нинг ўзлари бириктирилган хўжалик ҳисобидаги дорихоналаридан дори воситалари ва тиббий маҳсулотлар билан таъминланадилар. Даволаш-профилактика муассасаларига барча дори воситалари ва тиббий маҳсулотлар фақат жоиз эҳтиёжларига қараб сотиб олинади.

10. Дори воситалари ва тиббий маҳсулотлар хўжалик ҳисобидаги дорихоналардан стационар даволаш-профилактика муассасаларига Соғлиқни сақлаш вазирлигининг амалдаги йўриқномасига мувофиқ ёзиб берилади.

11. Дорихонадан олинган ва фойдаланилган дориларнинг ҳисобини олиб бориш, мазкур Тартибнинг иккинчи бўлими 5, 6, 7, 8-бандларидаги «Олинган дориларни ҳисобга олиш журнали» ва «Фойдаланилган дориларни ҳисобга олиш журнали»да баён этилган тарзда, таркибида дорихона мавжуд бўлмаган стационар даволаш-профилактика муассасаларида ҳам қўлланилади.

12. Ҳар бир даволаш-профилактика муассасаси ўзининг муайян шароити ва хусусиятларидан келиб чиққан холда, мазкур Тартиб талабларининг бажарилишини таъминлайдиган муассаса ҳужжатини ишлаб чиқади ва амалга киритади.

13. Мазкур Тартибнинг бажарилиши ва бюджет маблағлари ҳисобидан сотиб олинадиган дори воситалари ва тиббий маҳсулотлардан фойдаланиш учун масъулият стационар даволаш-профилактика муассасаларининг раҳбарларига юклатилади.