Ўзбекистон Республикаси Президентининг 2022 йил 21 декабрдаги «Янги Ўзбекистон маъмурий ислоҳотларини амалга ошириш чора-тадбирлари тўғрисида»ги ПФ-269-сон Фармонига мувофиқ, шунингдек, Ҳарбий-маъмурий секторларни ривожлантириш жамғармаси маблағларидан самарали фойдаланишни таъминлаш мақсадида қарор қиламан:

1. Ўзбекистон Республикаси Президентининг 2018 йил 4 августдаги «Ҳарбий-маъмурий секторларни ривожлантириш жамғармасини ташкил этиш тўғрисида»ги ПҚ-3897-сон қарорига иловага мувофиқ қуйидагиларни назарда тутувчи ўзгартиришлар киритилсин:

(а) Молия вазирлиги негизида Иқтисодиёт ва молия вазирлиги ташкил этилганлиги муносабати билан қонунчилик ҳужжатларини ўзаро мувофиқлаштириш;

(б) Ҳарбий-маъмурий секторларни ривожлантириш жамғармаси маблағларидан асосий вазифалар кетма-кетлигига мувофиқ равишда фойдаланиш.

2. Мудофаа вазирлиги уч ой муддатда манфаатдор вазирлик ва идоралар билан биргаликда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

3. Ушбу қарорнинг ижросини назорат қилиш Ўзбекистон Республикасининг Бош вазири А.Н. Арипов ва Ўзбекистон Республикаси Президенти ҳузуридаги Хавфсизлик кенгаши котиби В.В. Махмудов зиммасига юклансин.

1. 3-банднинг иккинчи хатбошисидаги «Молия» сўзи «Иқтисодиёт ва молия» сўзлари билан алмаштирилсин.

2. 4-банд қуйидаги таҳрирда баён этилсин:

«4. Қуйидагилар Жамғарма маблағларини сарфлашнинг асосий йўналишлари этиб белгилансин:

а) уч йиллик стратегик режалар («йўл хариталари») бўйича:

замонавий талаб ва стандартларни инобатга олган холда, ҳарбий шаҳарча ва полигонлар инфратузилмаси объектларини такомиллаштириш, капитал қуриш, реконструкция қилиш ва таъмирлаш;

ҳарбий хизматчилар ва уларнинг оила аъзолари учун янги уй-жойлар, болалар боғчалари ва ўйин майдончаларини қуриш, мавжуд уй-жой фондини таъмирлаш ишларини молиялаштириш;

б) бир йиллик тадбирлар режалари («йўл хариталари») бўйича:

ҳарбий қисмлар, бўлинмалар ва муассасаларнинг моддий-техника базасини мустаҳкамлаш;

замонамиз миллий қаҳрамонлари хотирасини абадийлаштириш, уларнинг оилаларига маънавий ва моддий ёрдам кўрсатиш;

семинарлар, давра суҳбатлари, конференциялар, амалий машғулотлар, спорт мусобақалари, эстафеталар, турнирлар, тренинглар, ёшларни тарбиялаш бўйича тадбирлар (шу жумладан, амалий ва техник турлар бўйича тўгараклар фаолиятини йўлга қўйиш, қонунчиликда белгиланган ҳолларда қўшимча озиқ-овқат, кийим-кечак ва оёқ кийим билан таъминлаш), шунингдек, маданий-оммавий ҳамда бошқа тантанали тадбирларни ташкил этиш ва ўтказиш;

уй-жой-коммунал хўжалиги, энергия, сув ва иссиқлик таъминоти, транспорт қатнови соҳасидаги масалаларни ҳал этиш;

в) Ўзбекистон Республикасининг Давлат чегарасида юзага келган оператив вазиятдан келиб чиқиб, Давлат чегарасининг айрим ҳудудларини муҳандислик жиҳатдан жиҳозлаш, замонавий ахборот-коммуникация технологияларини татбиқ этиш, чегара хизматини ўташ учун зарур инфратузилма яратиш ва ҳарбий мол-мулк билан таъминлаш тадбирларини амалга ошириш.

Ушбу бандда кўрсатилган тадбирларни молиялаштиришда Жамғарма маблағларида тақчиллик юзага келган ҳолларда биринчи навбатда ушбу банднинг «а» кичик бандида кўрсатилган уч йиллик стратегик режалар («йўл хариталар») бўйича тадбирларни молиялаштириш учун маблағлар ажратилади (бундан ушбу банднинг «в» кичик бандида кўрсатилган ҳоллар мустасно).

Белгилансинки, ушбу қарорнинг 4-банди «а» кичик бандида кўрсатилган уч йиллик стратегик режалар («йўл хариталари») ҳамда «б» кичик бандида кўрсатилган бир йиллик тадбирлар режалари («йўл хариталари») тегишлича Қорақалпоғистон Республикаси Жўқорғи Кенгеси Раиси, вилоятлар ва Тошкент шаҳар ҳокимларининг қарорлари билан тасдиқланади».