Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi Qonuni, Oʻzbekiston Respublikasi Prezidentining 2025-yil 10-dekabrdagi PF-246-son “Naqdsiz hisob-kitoblarni ommalashtirish va yashirin iqtisodiyot ulushini qisqartirishga qaratilgan qoʻshimcha chora-tadbirlar toʻgʻrisida”gi Farmoni hamda 2025-yil 27-noyabrdagi PQ-359-son “Oʻzbekistonda moliyaviy texnologiyalar sohasini yanada rivojlantirish chora-tadbirlari toʻgʻrisida”gi qaroriga muvofiq Oʻzbekiston Respublikasi Markaziy banki boshqaruvi qaror qiladi:

1. Toʻlovlarni amalga oshirishda yagona QR-kod orqali toʻlov xizmatlarini koʻrsatish qoidalari ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Qoidalar yagona QR-kod (bundan buyon matnda QR-kod deb yuritiladi) orqali toʻlov xizmatlarini koʻrsatish va hisob-kitoblarni amalga oshirish tartibini belgilaydi.

Mazkur Qoidalar QR-kodlarni (maxsus shtrix-kodlarni) standartlashtirish orqali toʻlovlarni amalga oshirish va turli toʻlov tizimlari oʻrtasida oʻzaro integratsiya imkoniyatini yaratish orqali toʻlovchilar uchun toʻlov vositasini shakllantirish maqsadida ishlab chiqilgan.

1. Ushbu Qoidalarda quyidagi asosiy tushunchalardan foydalaniladi:

ekvayer — toʻlovni qabul qiluvchini QR-kod tizimida roʻyxatdan oʻtkazish, QR-kodni generatsiya qilish, hisob-kitoblarni amalga oshirish va hisobvaraqlarni yuritish uchun masʼul boʻlgan bank;

ekvayer agenti — toʻlovni qabul qiluvchini identifikatsiya qilish va uni QR-kod tizimida roʻyxatdan oʻtkazish uchun maʼlumotlarni ekvayerga uzatishni taʼminlaydigan toʻlov tashkiloti;

toʻlovni qabul qiluvchi — ekvayer yoki uning agenti bilan tuzilgan shartnomaga asosan QR-kod orqali tovarlarni (ish, xizmatlarni) realizatsiya qiluvchi yuridik shaxs, yuridik shaxs maqomiga ega boʻlmagan tadbirkorlik faoliyati bilan shugʻullanuvchi jismoniy shaxs, oʻzini oʻzi band qilgan shaxs hamda davlat budjeti va davlat maqsadli jamgʻarmalari foydasiga toʻlovlarni qabul qiluvchilar;

toʻlovchi — toʻlovni oʻz nomidan amalga oshirayotgan shaxs;

toʻlovchiga xizmat koʻrsatuvchi bank va toʻlov tashkilotlari (bundan buyon matnda tashabbus koʻrsatuvchi deb yuritiladi) — toʻlovchining topshirigʻi asosida toʻlovni amalga oshirish uchun toʻlov tizimiga farmoyishni uzatgan bank yoki toʻlov tashkiloti;

QR-kod — mazkur Qoidalar maqsadlarida mobil ilova orqali naqd pulsiz toʻlovni boshlash va amalga oshirish uchun moʻljallangan hamda toʻlov rekvizitlarini elektron shaklda uzatish imkonini beruvchi maxsus shtrix kod;

QR-kod tizimi — toʻlovlarni amalga oshirish jarayonida QR-kodlarni yaratish va hisob-kitoblarni amalga oshirish uchun zarur boʻlgan maʼlumotlarni tayyorlashga hamda ushbu maʼlumotlarning toʻlov xizmatlarini yetkazib beruvchilar oʻrtasida almashinuvini taʼminlashga moʻljallangan avtomatlashtirilgan axborot tizimi;

QR-kod tizimi operatori (bundan buyon matnda Operator deb yuritiladi) — QR-kod tizimining doimiy ishlashini taʼminlaydigan, QR-kod orqali amalga oshiriladigan toʻlovlarning yakuniy hisob-kitoblari boʻyicha kliring maʼlumotlarini shakllantiradigan hamda QR-kod boʻyicha maʼlumotlarni QR-kod tizimi ishtirokchilariga yoʻnaltiruvchi va ular oʻrtasida oʻzaro texnik hamkorlikni taʼminlovchi yuridik shaxs;

QR-kod tizimi ishtirokchilari — Operator bilan toʻlov xizmatlarini koʻrsatish boʻyicha shartnoma tuzgan ekvayer, ekvayer agenti va tashabbus koʻrsatuvchi;

onlayn maʼlumotnoma — real vaqt rejimida toʻlovchiga va toʻlovni qabul qiluvchiga amalga oshirilgan toʻlov natijalari toʻgʻrisidagi maʼlumot;

MCC-kod — QR-kod berilgan toʻlovni qabul qiluvchining toifasini ifodalovchi kod boʻlib, savdo va xizmat koʻrsatish faoliyat turini 4 xonali raqam bilan tasniflaydi.

2. Mazkur Qoidalar QR-kod orqali toʻlov xizmatlarini koʻrsatish va hisob-kitoblarni amalga oshirishda banklar, shu jumladan mikromoliya banklari, toʻlov tashkilotlari, QR-kod tizimi operatori, ekvayer, ekvayer agenti hamda qonunchilikka muvofiq boshqa toʻlov xizmatlarini yetkazib beruvchilarga nisbatan tatbiq etiladi.

3. Yagona QR-kod amal qilish tartibiga koʻra quyidagi turlarga boʻlinadi:

statik QR-kod — doimiy toʻlov rekvizitlariga (toʻlovni qabul qiluvchi bank nomi va uning maʼlumotlari) ega oʻzgarmas QR-kod;

dinamik QR-kod — toʻlovni amalga oshirishda toʻlovni qabul qiluvchi qurilmada avtomatik yaratiladigan, toʻlov summasi va parametrlari oʻzgarishi mumkin boʻlgan hamda har bir toʻlovlar boʻyicha operatsiyalar uchun alohida identifikator va amal qilish muddati bilan bogʻlangan QR-kod.

4. Operator toʻlov xizmatlari bilan bogʻliq jarayonlarda QR-kod tizimi ishtirokchilari oʻrtasida maʼlumotlar va axborotlar uzatilishini taʼminlash uchun QR-kod tizimini yaratadi, boshqaradi va uning doimiy ishlashini taʼminlaydi.

Operator QR-kod tizimi ishtirokchilarini QR-kod tizimiga integratsiya qilish va ushbu tizim doirasida ularning ishlashini taʼminlash uchun zarur texnik hujjatlarni ishlab chiqadi.

5. Operator QR-kod tizimi faoliyati uzluksizligini taʼminlash maqsadida yoʻriqnoma ishlab chiqadi va unda koʻzda tutilgan tadbirlarni amalga oshiradi.

6. Operator QR-kod tizimi ishtirokchilarining maʼlumotlarini qayta ishlaydi va ularning birlamchi hisob-kitoblarini amalga oshiradi hamda ushbu hisob-kitoblar va komissiyalar toʻgʻrisidagi maʼlumotlarni QR-kod tizimi ishtirokchilariga real vaqt rejimida yoki eng kamida hisob-kitoblar amalga oshirilgan kunning oʻzida taqdim etadi.

Operator toʻlovlar boʻyicha tranzaksiya oqimini real vaqtda monitoring qiladi hamda toʻlov jarayonidagi nomuvofiqliklar va xatarlar boʻyicha QR-kod tizimi ishtirokchilarini real vaqt rejimida QR-kod tizimi orqali avtomatik ogohlantiradi.

Operator hamda QR-kod tizimi ishtirokchilari oʻrtasidagi oʻzaro maʼlumot almashinuvi Toʻlov tizimlari operatorlari va toʻlov xizmatlarini yetkazib beruvchilarning toʻlov tizimlarida axborot xavfsizligi va kiberxavfsizlikni taʼminlash hamda raqamli texnologiyalar vositasida sodir etiladigan huquqbuzarliklarni oldini olish choralarini koʻrish toʻgʻrisidagi nizom (roʻyxat raqami 3513, 2024-yil 21-may) talablari asosida amalga oshiriladi.

7. Operator QR-kod tizimida dinamik va statik QR-kod identifikatorlarining yagona reyestrini yuritadi.

8. Operator QR-kod orqali amalga oshirilgan toʻlovlar haqidagi maʼlumotni QR-kod tizimi orqali real vaqt rejimida QR-kod tizimi ishtirokchilariga yetkazilishini taʼminlaydi.

9. Operator QR-kod tizimi doirasida koʻrsatiladigan xizmatlar uchun tariflarni (xizmatlar qiymatini) qonunchilikda belgilangan tartibda QR-kod tizimi ishtirokchilari bilan kelishuvga asosan belgilashi mumkin.

10. Operator QR-kod tizimiga oid texnik hujjatlar, ushbu hujjatlarga doir oʻzgartirish va qoʻshimchalar, QR-kod tizimi doirasida koʻrsatiladigan xizmatlar uchun tariflar (xizmatlar qiymati) hamda bu tariflarning (xizmatlar qiymatining) barcha oʻzgarishlari toʻgʻrisidagi maʼlumotlarni ular tasdiqlangandan soʻng uch ish kuni mobaynida oʻzining rasmiy veb-saytida eʼlon qiladi hamda shu muddat ichida QR-kod tizimi ishtirokchilarini shartnoma shartlariga asosan xabardor qiladi.

QR-kod tizimiga oid texnik hujjatlar, ushbu hujjatlarga doir oʻzgartirish va qoʻshimchalar, QR-kod tizimi doirasida koʻrsatiladigan xizmatlar uchun tariflar (xizmatlar qiymati) hamda bu tariflarning (xizmatlar qiymatining) barcha oʻzgarishlari Operatorning rasmiy veb-saytida eʼlon qilinganidan va QR-kod tizimi ishtirokchilari shartnoma shartlariga asosan xabardor qilinganidan soʻng oʻn besh kun oʻtgach Operator va QR-kod tizimi ishtirokchilari tomonidan qoʻllaniladi.

11. Operator Oʻzbekiston Respublikasi Markaziy bankiga:

QR-kod tizimiga oid texnik hujjatlarga kiritilgan oʻzgartirish va qoʻshimchalar toʻgʻrisidagi maʼlumotlarni ushbu oʻzgartirish hamda qoʻshimchalar amalga kiritiladigan sanaga qadar oʻn besh ish kunidan kechiktirmay;

QR-kod tizimi doirasida koʻrsatiladigan xizmatlar uchun tariflarning (xizmatlar qiymatining) oʻzgarishi toʻgʻrisidagi maʼlumotlarni ushbu oʻzgarishlar amalga kiritiladigan sanaga qadar oʻn besh ish kunidan kechiktirmay taqdim etadi.

12. Ekvayer toʻlovni qabul qiluvchining murojaatiga asosan unga tegishli QR-kodni generatsiya qilish va ushbu QR-kod orqali toʻlovlarni uning foydasiga qabul qilish uchun toʻlovni qabul qiluvchi bilan xizmat koʻrsatish (ekvayring) shartnomasini tuzadi.

Bunda Bank hisobvaraqlarini ochish, yuritish va yopish tartibi toʻgʻrisidagi yoʻriqnomaga (roʻyxat raqami 3420, 2023-yil 8-fevral) muvofiq ekvayer va toʻlovni qabul qiluvchi oʻrtasida bank hisobvaragʻi shartnomasi tuzilgan boʻlishi kerak.

Ekvayer va toʻlovni qabul qiluvchi oʻrtasidagi shartnoma yozma yoki elektron shaklda tuzilishi mumkin.

Shartnomada QR-kod orqali toʻlovlarni qabul qilish va ular boʻyicha hisob-kitoblarni amalga oshirish tartibi va shartlari, bu borada toʻlovni qabul qiluvchi hamda ekvayerning huquq va majburiyatlari, taraflarning javobgarligi va ularning maʼlumotlari xavfsizligi, shuningdek, QR-kod tizimi doirasida koʻrsatiladigan xizmatlar uchun tariflar (xizmatlar qiymati)ning miqdori va boshqa shartlar belgilab olinadi.

13. Ekvayer Operator tomonidan ishlab chiqilgan texnik hujjat talablariga muvofiq QR-kodni yaratish choralarini koʻradi hamda toʻlovlarning xavfsiz va uzluksiz amalga oshirilishini taʼminlaydi.

Ekvayer QR-kod toʻlovlari uchun foydalaniladigan dasturiy taʼminot va uskunalarni Toʻlov tizimlari operatorlari va toʻlov xizmatlarini yetkazib beruvchilarning toʻlov tizimlarida axborot xavfsizligi va kiberxavfsizlikni taʼminlash hamda raqamli texnologiyalar vositasida sodir etiladigan huquqbuzarliklarni oldini olish choralarini koʻrish toʻgʻrisidagi nizom (roʻyxat raqami 3513, 2024-yil 21-may) talablariga hamda Operator tomonidan ishlab chiqilgan QR-kod tizimiga oid texnik hujjatlarga muvofiqligini taʼminlashi kerak.

14. Ekvayer Operator tomonidan generatsiya qilingan:

statik QR-kodni toʻlovni qabul qiluvchining soʻroviga binoan chop etilgan holatda va (yoki) elektron koʻrinishda;

dinamik QR-kodni toʻlovni qabul qiluvchiga biriktirilgan toʻlovni qabul qiluvchi qurilmada aks ettirish imkonini yaratgan holda unga taqdim etadi.

Bunda ekvayer toʻlovni qabul qiluvchiga oʻzining faoliyatida QR-kodlardan foydalanish tartibi, QR-kodlardan foydalanmaslik, ularning asl holatiga shikast yetkazish yoki qalbaki QR-kodlardan foydalanish oqibatlari boʻyicha ogʻzaki yoki yozma tushuntirish beradi.

15. QR-kod oʻlchami, yorqin rangda boʻlishi va oʻqilish darajasi boʻyicha Operator tomonidan belgilangan vizual talablarga mos boʻlishi kerak.

Ekvayer QR-kodni chop etishda maxsus emblemali (gologrammali) himoya vositalaridan foydalanishi mumkin.

16. Ekvayer toʻlovni qabul qiluvchining soʻroviga asosan QR-kodni generatsiya qilish paytida uning faoliyati turidan kelib chiqib MCC-kodlarini bank axborot bazasiga kiritadi.

Bunda toʻlovni qabul qiluvchining faoliyat turi oʻzgargan taqdirda u uch bank ish kunida ekvayerga tegishli maʼlumotni taqdim etadi va ekvayer tomonidan bir ish kuni mobaynida toʻlovni qabul qiluvchiga biriktirilgan QR-kod maʼlumotlariga tegishli oʻzgartirishlar kiritiladi.

17. Ekvayer Operator tomonidan tasdiqlangan tariflar rejasini (xizmatlar qiymatini) hisobga olgan holda toʻlovni qabul qiluvchidan shartnomaga asosan xizmat haqi undirishi mumkin. Tariflar (xizmatlar qiymati) oʻzgargan taqdirda ekvayer toʻlovni qabul qiluvchini kamida oʻn besh kun oldin xabardor qiladi.

18. Ekvayer tomonidan masofaviy bank xizmatlarida (internet banking, mobil banking va boshqalar) toʻlovni qabul qiluvchi uchun quyidagi xizmatlar taqdim etilishi kerak:

QR-kod boʻyicha tranzaksiyalarning muvaffaqiyatli yoki muvaffaqiyatsiz amalga oshirilganligi hamda ushbu toʻlovlar haqidagi axborotni olish;

har bir tranzaksiya (toʻlov) uchun onlayn maʼlumotnoma;

tranzaksiyalar tarixi va toʻlovlar haqidagi axborotni koʻrish imkonini beruvchi interfeys;

mijozlarni qoʻllab-quvvatlash xizmati;

murojaat (shikoyat) holatini kuzatish va ularga javob berish, shuningdek, murojaatning holati toʻgʻrisidagi maʼlumotlarni yuklab olish imkoniyatini yaratish.

19. Ekvayer va toʻlovni qabul qiluvchi oʻrtasidagi shartnoma toʻlovni qabul qiluvchining arizasiga muvofiq istalgan vaqtda yoki unda koʻrsatilgan holatlar yuz berganda bekor qilinadi. Shartnomaning bekor qilinishi toʻlovni qabul qiluvchining bank hisobvaragʻini QR-kod tizimidan uzish uchun asos boʻladi.

Toʻlovni qabul qiluvchi QR-kod biriktirilgan asosiy hisobvaragʻini boshqa bankka oʻtkazgan taqdirda, ekvayer va toʻlovni qabul qiluvchi oʻrtasidagi ekvayring shartnomasi bekor qilingan hisoblanadi.

Shartnoma sud orqali bekor qilinganda ham toʻlovni qabul qiluvchining bank hisobvaragʻi QR-kod tizimidan uzilishi mumkin.

20. Roʻyxatdan oʻtkazuvchi organ tomonidan moliya-xoʻjalik faoliyatini amalga oshirmayotgan harakatsiz holatga oʻtkazilgan toʻlovni qabul qiluvchilar (bundan oʻzini oʻzi band qilgan shaxslar mustasno) davlat reyestridan chiqarilgan kundan eʼtiboran shartnoma bekor qilingan hisoblanadi.

21. Ekvayer agenti toʻlovni qabul qiluvchining murojaatiga asosan unga tegishli QR-kodni generatsiya qilish va ushbu QR-kod orqali toʻlovlarni uning foydasiga qabul qilish uchun toʻlovni qabul qiluvchi bilan xizmat koʻrsatish (ekvayring) shartnomasini tuzadi.

Ekvayer agenti va toʻlovni qabul qiluvchi oʻrtasidagi shartnoma yozma yoki elektron shaklda tuzilishi mumkin.

Shartnomada QR-kod orqali toʻlovlarni qabul qilish va ular boʻyicha hisob-kitoblarni amalga oshirish tartibi va shartlari, bu borada toʻlovni qabul qiluvchi hamda ekvayerning huquq va majburiyatlari, taraflarning javobgarligi va ularning maʼlumotlari xavfsizligi, shuningdek, QR-kod tizimi doirasida koʻrsatiladigan xizmatlar uchun tariflar (xizmatlar qiymati)ning miqdori va boshqa shartlar belgilab olinadi.

22. Ekvayer agenti toʻlovni qabul qiluvchini Toʻlov tizimlari operatorlari, elektron pullar tizimlari operatorlari va toʻlov tashkilotlarida jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish boʻyicha ichki nazorat qoidalariga (roʻyxat raqami 3266, 2020-yil 30-iyun) muvofiq identifikatsiyalashni amalga oshiradi.

Ekvayer agenti tomonidan toʻlovni qabul qiluvchini identifikatsiyalash hamda mijozlarning shaxsini tekshirish (KYC) asosida toʻplangan maʼlumotlar ekvayerga QR-kod tizimi orqali avtomatik ravishda uzatiladi.

23. Ekvayer agenti toʻlovni qabul qiluvchiga QR-kodni generatsiya qilish va ushbu QR-kod orqali uning foydasiga toʻlovlarni qabul qilishda Toʻlov tizimlari operatorlari va toʻlov xizmatlarini yetkazib beruvchilarning toʻlov tizimlarida axborot xavfsizligi va kiberxavfsizlikni taʼminlash hamda raqamli texnologiyalar vositasida sodir etiladigan huquqbuzarliklarni oldini olish choralarini koʻrish toʻgʻrisidagi nizom (roʻyxat raqami 3513, 2024-yil 21-may) talablariga rioya qilishi kerak.

24. Ekvayer agenti generatsiya qilingan QR-kodni toʻlovni qabul qiluvchiga unga biriktirilgan toʻlovni qabul qiluvchi qurilmada aks ettirish imkonini yaratgan holda taqdim etadi.

25. Ekvayer agenti tomonidan toʻlovni qabul qiluvchilarga ularning shaxsiy kabineti orqali toʻlovlarni monitoring qilish, toʻlovlar haqidagi axborotni olish va hisobotlarni shakllantirish imkoniyati yaratiladi.

26. Ekvayer agenti va toʻlovni qabul qiluvchi oʻrtasidagi shartnoma mazkur Qoidalarning 19 va 20-bandlarida belgilangan holatlarda bekor qilinadi, bunda toʻlovni qabul qiluvchining bank hisobvaragʻini QR-kod tizimidan uzish choralari koʻriladi.

27. Tashabbus koʻrsatuvchi toʻlovchi uchun mobil ilovaning bosh sahifasida QR-kodni skanerlash imkoniyatini yaratishi zarur.

28. Tashabbus koʻrsatuvchi mobil ilovada toʻlovchi uchun quyidagi xizmatlar taqdim etilishini taʼminlaydi:

QR-kodni skanerlash;

toʻlovni qabul qiluvchining nomi va uning rekvizitlarini aks ettirish;

toʻlanadigan summani kiritish yoki uni avtomatik aks ettirish;

har bir tranzaksiyada komissiya mavjud boʻlsa, uni toʻlovdan oldin ochiq va tushunarli koʻrinishda koʻrsatish;

toʻlanadigan summani tasdiqlash;

tranzaksiyaning holati (muvaffaqiyatli yoki muvaffaqiyatsizligi) toʻgʻrisidagi maʼlumotni aks ettirish;

har bir tranzaksiya (toʻlov) uchun onlayn maʼlumotnoma;

tranzaksiyalar tarixi va toʻlovlar haqidagi axborotni koʻrish imkonini beruvchi interfeys;

mijozlarni qoʻllab-quvvatlash xizmati;

murojaat (shikoyat)larni joʻnatish, ularning holatini kuzatish va ularga javob berish, shuningdek, murojaatning holati toʻgʻrisidagi maʼlumotlarni yuklab olish imkoniyatini yaratish.

29. Tashabbus koʻrsatuvchi toʻlovchiga mobil ilovada elektron toʻlov vositalaridan istalgan birini avtomat tarzda belgilash imkoniyatini taqdim etadi.

Tashabbus koʻrsatuvchi mobil ilovada toʻlovchiga elektron toʻlov vositalaridan foydalanish davomida mazkur tanlovni oʻzgartirish imkoniyatini berishi kerak.

30. Toʻlovni qabul qiluvchi tomonidan statik yoki dinamik QR-kod orqali toʻlovlarni qabul qilishda quyidagilar amalga oshiriladi:

mazkur Qoidalarning 14-bandi toʻrtinchi xatboshisiga asosan oʻz faoliyatida statik yoki dinamik QR-kodning muntazam ishlashini taʼminlaydi;

toʻlovni qabul qiluvchi qurilmada yaratiladigan dinamik QR-kodni yoki chop etilgan statik QR-kodni toʻlovchiga koʻrsatadi;

QR-kod boʻyicha amalga oshirilgan toʻlovning holati bilan tanishadi.

31. Operator QR-kod orqali amalga oshiriladigan toʻlovlarning yakuniy hisob-kitoblari boʻyicha kliring maʼlumotlarini shakllantiradi hamda ushbu maʼlumotlarni toʻlovni qabul qiluvchi va toʻlovchining xizmat koʻrsatuvchi bankiga yuboradi.

32. Dinamik QR-kodlar uchun amal qilish muddati va bir martalik identifikator belgilanadi, bunda amal qilish muddati oʻtgan QR-kodlar boʻyicha toʻlovlarni qabul qilishga yoʻl qoʻyilmaydi.

33. QR-kod orqali toʻlovlarni amalga oshirishda toʻlovchi, toʻlovni qabul qiluvchi hamda QR-kod tizimi ishtirokchilarining mazkur tizim va unda amalga oshirilgan toʻlovlar boʻyicha murojaatlari Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi Qonuniga muvofiq koʻrib chiqiladi.

34. QR-kod tizimi ishtirokchilari QR-kod orqali toʻlovlarni amalga oshirishda Tijorat banklarida jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish boʻyicha ichki nazorat qoidalari (roʻyxat raqami 2886, 2017-yil 23-may) hamda Toʻlov tizimlari operatorlari, elektron pullar tizimlari operatorlari va toʻlov tashkilotlarida jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish boʻyicha ichki nazorat qoidalariga (roʻyxat raqami 3266, 2020-yil 30-iyun) amal qilishi lozim.

35. QR-kod tizimi ishtirokchilarining mazkur Qoidalar talablariga rioya etilishi ustidan monitoring va nazorat Oʻzbekiston Respublikasi Markaziy banki tomonidan amalga oshiriladi.

36. QR-kod orqali toʻlov xizmatlarini koʻrsatish ushbu Qoidalar hamda toʻlov va toʻlov tizimlariga oid boshqa qonunchilik talablariga muvofiq boʻlishi kerak.

37. Ushbu Qoidalar talablarini buzgan shaxslar qonunchilik hujjatlariga muvofiq javobgar boʻladilar.