Андижон вилоятида замонавий менежмент тамойиллари ҳамда давлат ва тадбиркорлик субъектлари ўртасида ўзаро манфаатли ҳамкорлик тизимини жорий этиш, мавжуд ресурслардан самарали фойдаланиш, вилоятнинг ижтимоий инфратузилмаси ва архитектура қиёфасини яхшилаш, шунингдек, ҳаракат хавфсизлигини таъминлашнинг замонавий талабларига тўлиқ мувофиқлаштириш, янги автомобиль йўллари қуриш ва улардан фойдаланиш талабларини янада кучайтириш мақсадида қарор қиламан:

1. Қуйидагилар ушбу қарорни қабул қилишдан кўзланган асосий мақсадлар этиб белгилансин:

(a) муҳандислик-коммуникация тармоқларини кенгайтириш ва тўлиқ модернизация қилиш;

(б) вилоятнинг шаҳар ва туманлари, шу жумладан, Андижон вилояти Андижон тумани Янги Андижон (Бобур) шаҳарчасини ташқи муҳандислик-коммуникация тармоқлари билан таъминлаш;

(в) инвесторлар фаолиятини қўллаб-қувватлаш;

(г) сифатли даражада автомобиль йўлларини қуриш-таъмирлаш ишларини ташкил этиш;

(д) ичимлик суви таъминоти ва оқова сув тармоқларини яхшилаш.

2. Андижон вилоятида давлат ва тадбиркорлик субъектлари ўртасида ўзаро манфаатли ҳамкорлик асосида инвестиция лойиҳаларини амалга ошириш ва вилоят инфратузилмасини яхшилаш бўйича қуйидаги тартиб жорий этилсин:

(а) Андижон вилояти ҳокимлиги муассислигида давлат ва тадбиркорлик субъектлари ўртасида кўприк вазифасини бажарувчи «Андижон Инвест компанияси» акциядорлик жамиятини (кейинги ўринларда — Компания)ни ташкил этиш;

(б) вилоят инфратузилмасини ривожлантиришга қаратилган лойиҳаларни молиялаштириш, аҳолининг кундалик ҳаётидаги коммунал ва бошқа соҳалардаги кечиктириб бўлмайдиган масалаларни тезкор ҳал этиш мақсадида Андижон вилояти ҳокимлиги ҳузуридаги Тадбиркорлик инфратузилмасини ривожлантириш жамғармасини Андижон вилоятини ривожлантириш ҳудудий мақсадли жамғармаси (кейинги ўринларда — Жамғарма) деб қайта номлаш ва Жамғарма маблағларини бошқариш ҳуқуқини Компанияга бериш;

(в) ер участкаларини қурилиш учун рухсат бериш ва лойиҳа ҳужжатлари расмийлаштирилган ҳолда тайёр бизнес шаклида тадбиркорлик субъектлари билан ўзаро манфаатли лойиҳаларни амалга ошириш учун аукцион савдоларига чиқариш;

(г) 2026 йил 1 мартдан бошлаб муҳандислик-коммуникация тармоқлари ва транспорт инфратузилмасини барпо қилиш харажатларининг бир қисмини шаҳарсозлик фаолияти объектини қуриш ёки реконструкция қилишни лойиҳалаштириш учун архитектура-режалаштириш топшириғини ишлаб чиқиш бўйича тўлов қийматига киритиш ва уни бирйўла ёки бўлиб-бўлиб тўлаш имконияти билан тўлиқ Жамғармага йўналтириш (бундан бюджет тизими бюджетлари ҳисобидан молиялаштириладиган объектлар, якка тартибдаги уй-жойлар ҳамда нодавлат мактабгача ва умумий ўрта таълим ташкилотлари мустасно).

3. Қуйидагилар:

(а) «Андижон Инвест компанияси» акциядорлик жамияти фаолиятининг устувор йўналишлари 1-иловага мувофиқ;

(б) Андижон вилояти ҳокимлиги ҳузуридаги Андижон вилоятини ривожлантириш ҳудудий мақсадли жамғармаси маблағларини шакллантириш манбалари ва сарфлаш йўналишлари 2-иловага мувофиқ тасдиқлансин.

4. Белгилансинки:

(а) Компаниянинг устав капитали Халқ депутатлари Андижон вилояти кенгаши қарори асосида Андижон вилояти вилоят бюджетининг қўшимча манбалари ва муниципал мулклар ҳамда қонунчиликда тақиқланмаган бошқа маблағлар ҳисобидан босқичма-босқич шакллантирилади;

(б) Компаниянинг алоҳида йўналишлар бўйича лойиҳа офисларини ташкил этиш ва уларни молиялаштириш масалалари унинг муассиси томонидан белгиланади;

(в) Компания ва Жамғарма маблағларини лойиҳалар ва бошқа мақсадларга йўналтириш ҳамда тижорат банклари ва халқаро молия институтларидан қарз маблағларини жалб этиш (давлат кафолати остидаги жалб этиладиган қарз маблағлари бундан мустасно) Компания муассиси қарори асосида амалга оширилади;

(г) Компания ҳисобварақлари тижорат банкларида, Жамғарма ҳисобварақлари Иқтисодиёт ва молия вазирлиги ҳузуридаги Ғазначилик хизмати қўмитасида очилади;

(д) Жамғарма маблағларидан Андижон вилояти ҳокимлиги мажбуриятлари бўйича ижро ҳужжатлари ва инкассо топшириқномаси асосида маблағ ундиришга йўл қўйилмайди;

(ж) Ўзбекистон Республикаси Президентининг 2022 йил 21 январдаги «Республика ҳудудларида тадбиркорлик инфратузилмасини ривожлантиришга доир қўшимча чора-тадбирлар тўғрисида»ги ПФ-54-сон Фармонида белгиланган тадбирларни Жамғарма маблағлари ҳисобидан молиялаштириш тартиби сақлаб қолинади;

(з) Андижон, Самарқанд, Фарғона вилоятлари ва Тошкент шаҳрини ривожлантириш жамғармалари маҳаллий бюджетлар даражасидаги давлат мақсадли жамғармалари ҳисобланади. Бунда ушбу жамғармаларга ғазначилик хизмати кўрсатишнинг соддалаштирилган тартиби Иқтисодиёт ва молия вазирлиги томонидан тегишли ҳокимликлар билан келишилган ҳолда норматив-ҳуқуқий ҳужжат шаклида ишлаб чиқилади.

5. Компания фаолияти очиқлиги ва унинг жамоатчилик олдидаги ҳисобдорлигини таъминлаш мақсадида шундай тартиб ўрнатилсинки, унга мувофиқ:

(а) Компания бухгалтерия ҳисоботини молиявий ҳисоботнинг халқаро стандартларига (МҲХС) мувофиқ тузади ва мазкур ҳисобот аудитнинг халқаро стандартларига асосан аудиторлик компаниялари томонидан ташқи аудитдан ўтказилгандан кейин 2027 йилдан бошлаб ҳар йили 1 августга қадар Андижон вилояти ҳокимлигининг расмий веб-сайтида жойлаштирилади;

(б) Компания томонидан молиявий ва номолиявий ҳисоботлар ҳамда унга нисбатан тижорат ва нотижорат мақсадлар 2028 йилдан бошлаб Андижон вилояти ҳокимлигининг расмий веб-сайтида жойлаштирилади;

(в) 2028 йилга қадар Компанияда ISO, ERP ва бошқарувнинг бошқа замонавий тизимлари жорий қилиниб, у томонидан етакчи халқаро агентликларнинг кредит рейтинги олиниши таъминланади;

(г) Андижон вилояти ҳокимининг ижтимоий-иқтисодий ривожланишнинг энг муҳим ва долзарб масалалари юзасидан Халқ депутатлари Андижон вилояти кенгаши олдидаги ҳисоботида Компания фаолияти натижадорлиги ва Жамғарма маблағларидан самарали фойдаланилиши тўғрисидаги маълумот акс эттирилади.

6. Вазирлар Маҳкамаси:

(а) бир ҳафта муддатда қуйидагиларни назарда тутувчи тегишли норматив-ҳуқуқий ҳужжатни тасдиқласин:

(i) ер участкалари негизида Компания ва тадбиркорлик субъектлари ўртасида ўзаро манфаатли ҳамкорлик асосида инвестиция лойиҳаларини амалга ошириш;

(ii) Андижон вилояти муҳандислик-коммуникация тармоқлари ва транспорт инфратузилмасини барпо қилиш харажатларининг бир қисмини шаҳарсозлик фаолияти объектини қуриш ёки реконструкция қилишни лойиҳалаштириш учун архитектура-режалаштириш топшириғини ишлаб чиқиш бўйича тўлов қийматига киритиш;

(iii) Андижон вилоятида лойиҳаларни давлат-хусусий шериклик шартларида соддалаштирилган тартибда амалга ошириш;

(iv) Андижон вилоятида шаҳарсозлик реновация лойиҳаларини амалга ошириш;

(б) икки ой муддатда Андижон шаҳрида қурилишга рухсат беришга оид ҳужжатларни рақамли кўринишда расмийлаштириш тартибини назарда тутувчи маъмурий регламентни тасдиқласин.

7. Андижон вилояти ҳокимлиги Қурилиш ва уй-жой коммунал хўжалиги вазирлиги, Рақамли технологиялар вазирлиги, Кадастр агентлиги билан биргаликда қурилишга рухсат беришга оид ҳужжатларни расмийлаштириш жараёнларини рақамлаштириш мақсадида 2026 йил биринчи чорак якунига қадар Андижон шаҳри бош режасининг рақамли форматини ишлаб чиқсин ҳамда унинг «Шаффоф қурилиш» миллий ахборот тизимига интеграция қилинишини таъминласин.

8. Ҳисоб палатаси ҳокимликлар томонидан ташкил этилган инвестиция компаниялари ҳар йили ноябрь ойигача ишлаб чиқадиган бизнес-режани танқидий кўриб чиқиб, уларни такомиллаштириш юзасидан муассисга таклифлар берилишини ҳамда йил якуни билан компаниялар фаолияти аудит назоратидан ўтказилишини таъминласин.

9. Мазкур қарорнинг ижросини самарали ташкил қилишга масъул ва шахсий жавобгар этиб Андижон вилояти ҳокими Ш.К. Абдурахманов белгилансин.

10. Қарор ижросини муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Ўзбекистон Республикаси Бош вазири А.Н. Арипов зиммасига юклансин.

1. «Андижон Инвест компанияси» АЖ (кейинги ўринларда — Компания) томонидан Андижон вилояти, шаҳар ва туманлар ҳокимликлари ҳамда улар таркибидаги корхона ва муассасаларга тегишли мулклар (кейинги ўринларда — муниципал мулклар) ҳолатини таҳлил қилиш, мавжуд ресурс ва имкониятларни аниқлаш ва улардан самарали фойдаланиш бўйича таклифлар ишлаб чиқиш.

2. Компания бошқарувига берилган муниципал мулкларни бошқариш, уларнинг негизида давлат шериги сифатида давлат-хусусий шериклик лойиҳаларини амалга ошириш ҳамда уларни тадбиркорлик субъектларига ижарага ва бошқарувга бериш, уларнинг мониторингини юритиш ва самарадорлигини баҳолаб бориш.

3. Муниципал мулкларнинг инвестицион жозибадорлигини ошириш, компания бошқарувига берилган муниципал мулклар негизида инвесторлар билан ҳамкорликда инвестиция лойиҳаларини амалга ошириш.

4. Компания бошқарувига берилган бозор ва савдо комплекслари ҳамда бошқа муниципал мулкларни замонавий талабларга мослаштириш, яроқсиз ҳолга келганларини бузиб, уларнинг ўрнида янги бинолар қуриш ва белгиланган тартибда сотиш ёки ижарага бериш.

5. Тадбиркорлик субъектларининг Андижон вилояти инфратузилмасини ривожлантириш билан боғлиқ истиқболли лойиҳаларини уларнинг молиявий жозибадорлиги ва самарадорлигидан келиб чиқиб молиялаштиришда иштирок этиш.

6. Андижон вилоятининг алоҳида ҳудудларини ривожлантириш ва реновация дастурлари, мастер режа ва қуриладиган объектларнинг лойиҳа ҳужжатларини ишлаб чиқиш жараёнларини молиялаштириш.

7. Ҳудудларни комплекс ижтимоий-иқтисодий ривожлантириш мақсадида авария ҳолатидаги ёки яроқсиз ҳолга келиб қолган турар ва нотурар жойларни замонавий талаблар асосида қайта қуриш, капитал таъмирлаш, реконструкция қилишга оид тадбирларни амалга ошириш.

8. Андижон вилоятидаги қурилиш ва реконструкция қилиш ишларини ҳамда инфратузилма тармоқларига уланиш жараёнларини мувофиқлаштириш.

9. Бўш ер участкаларини Компания устав фондига киритиш ва тадбиркор билан лойиҳани амалга ошириш ҳуқуқини онлайн аукцион савдоларига қўйиш.

10. Компания бошқарувига берилган муниципал мулкларни ҳамда устав фондига киритилган ер участкалари негизида лойиҳа қиймати 1 миллион АҚШ долларигача бўлган эквивалентдаги давлат-хусусий шериклик лойиҳаларини амалга ошириш.

1. Жамғарма маблағлари ҳисобидан молиялаштирилган лойиҳалардан олинган даромадлар, шу жумладан, «Андижон Инвест компанияси» акциядорлик жамияти (кейинги ўринларда — Компания) томонидан янгидан яратилган активларни сотишдан тушган тушумлар.

2. Компания давлат шериги сифатида иштирок этган давлат-хусусий шериклик лойиҳаларидан олинган даромадлар.

3. Андижон вилоятидаги қишлоқ хўжалигига мўлжалланмаган ер участкаларини хусусийлаштиришдан ҳамда ер участкаларини ижарага олиш ҳуқуқини электрон онлайн аукцион орқали сотишдан тушадиган маблағларнинг Вазирлар Маҳкамаси томонидан белгиланган харажатлар чегириб қолингандан сўнг қолган қисмининг 100 фоизи ва ер участкаси жойлашган туман бюджетига йўналтириладиган қисми, бундан махсус иқтисодий зоналар, ёшлар кичик саноат ва тадбиркорлик зоналаридаги ер участкалари мустасно.

4. Қишлоқ хўжалигига мўлжалланган ер участкаларини ижарага бериш, қишлоқ хўжалиги ерларини ер ижараси ҳуқуқи асосида аукцион орқали сотишдан тушадиган тушумлар, қўшимча тўловлар ҳамда ижара тўловларининг Андижон вилояти маҳаллий бюджетига йўналтириладиган қисмининг 100 фоизи.

5. Андижон вилоятида махсус автоматлаштирилган фото ва видео қайд этиш дастурий-техник воситалар қайд этган йўл ҳаракати қоидалари бузилганлиги учун жарималарнинг Андижон вилояти маҳаллий бюджетига йўналтириладиган қисмининг 100 фоизи.

6. Андижон вилоятида ташқи реклама ва ахборот объектини (конструкциясини) жойлаштириш учун қонунчиликда белгиланган тўловнинг Андижон вилояти маҳаллий бюджетига йўналтириладиган қисмининг 100 фоизи.

7. Андижон вилоятида муҳандислик-коммуникация тармоқлари ва транспорт инфратузилмасини яратиш харажатларининг бир қисмини қоплаш мақсадида шаҳарсозлик фаолияти объектини қуриш ёки реконструкция қилишни лойиҳалаштириш учун архитектура-режалаштириш топшириғини ишлаб чиқиш қийматига киритилган тўловнинг 100 фоизи.

8. Ҳудуди 10 минг метр квадратгача бўлган давлат кўчмас мулк объектлари, шунингдек, вилоят, туман (шаҳар) ҳокимларининг қарорлари асосида сотиладиган давлат кўчмас мулк объектларини сотишдан тушадиган маблағларнинг вилоят маҳаллий бюджетига ҳамда объект жойлашган туман (шаҳар) маҳаллий бюджетига тушган қисмининг 100 фоизи.

9. Ҳудуди 10 минг метр квадратдан ортиқ бўлган давлат кўчмас мулк объектларини сотишдан тушган тушумларнинг республика бюджетига йўналтириладиган қисмининг 50 фоизи.

10. Якка тартибда уй-жой қуриш ва уй-жойни ободонлаштириш учун ер участкаларини мулк ҳуқуқи асосида электрон онлайн аукцион орқали реализация қилиш (сотиш)дан тушадиган маблағларнинг Вазирлар Маҳкамаси томонидан белгиланган харажатлар чегириб қолингандан сўнг қолган қисми ва ер участкаси жойлашган туман бюджетига йўналтириладиган қисмининг 100 фоизи.

11. Вақтинча бўш турган маблағларни тижорат банклари депозитларига жойлаштириш ҳисобидан олинган даромадлар.

12. Андижон вилоятининг вилоят бюджети даромадларининг прогноздан ошириб бажарилган қисмидан ажратмалар.

13. Жисмоний ва юридик шахсларнинг ҳомийлик хайриялари, халқаро молия институтлари ва хорижий ташкилотларнинг грантлари ҳамда кредит маблағлари.

14. Қонунчиликда тақиқланмаган бошқа манбалар.

15. Компания томонидан, шу жумладан, инвесторлар иштирокида инвестиция лойиҳалари, давлат-хусусий шериклик лойиҳалари, Андижон вилоятининг инфратузилмасини ривожлантириш билан боғлиқ истиқболли лойиҳаларни амалга ошириш.

16. Андижон вилоятининг алоҳида ҳудудларини ривожлантириш ва реновация дастурлари, мастер режа ва қуриладиган объектларнинг лойиҳа ҳужжатларини ишлаб чиқиш.

17. Иқтисодиёт тармоқлари ва ижтимоий соҳа объектларини қуриш, реконструкция қилиш, мукаммал таъмирлаш ва жиҳозлаш.

18. Ҳудудларни ободонлаштириш ва кўкаламзорлаштириш.

19. Реновация дастурларини амалга ошириш.

20. Андижон вилояти Андижон тумани Янги Андижон (Бобур шаҳри) шаҳарчасини, «Янги Ўзбекистон» массивлари, давлат уй-жой дастурларида кўзда тутилган массивлар, шунингдек, махсус иқтисодий зоналар, кичик саноат зоналари, ёшлар саноат ва тадбиркорлик зоналарини ташқи муҳандислик-коммуникация тармоқлари (ичимлик ва оқова сув, электр энергияси, табиий газ тармоқлари ва автомобиль йўли) билан таъминлаш.

21. Қиймати 200 миллиард сўмдан ошадиган, инвесторнинг ўз маблағлари улуши 25 фоиздан кам бўлмаган, инвестиция дастурларига киритилган лойиҳалар, шунингдек, халқаро ва республика аҳамиятидаги автомобиль йўллари бўйидаги яхлит ер майдонларида ташкил этиладиган йўл бўйи инфратузилма объектларини ташқи муҳандислик-коммуникация тармоқлари билан таъминлаш.

22. Андижон вилояти ҳокимлигининг бюджет ссудаларини, тижорат банклари ва хорижий молия ташкилотларидан жалб қилинган кредитларни, жисмоний ва юридик шахсларга етказилган мулкий ва маънавий зарарларни қоплаш ҳамда шаҳар ва туманларни ижтимоий-иқтисодий ривожлантиришга оид тадбирларни молиялаштириш, шунингдек, ер участкалари давлат органлари ва муассасалари фойдаланишида бўлган ва уларнинг ташаббуси билан электрон онлайн аукционга қўйилган тақдирда, ушбу давлат органлари ва ташкилотларига йўналтирилиши белгиланган маблағларни тўлаб бериш.

23. Бозорлар, савдо комплекслари, бошқа муниципал мулкларни қайта қуриш ва бузиш, уларнинг ўрнида қурилишлар қилиш билан боғлиқ харажатларни қоплаш.

24. Ер участкаларини савдога чиқаришда улар бўйича барча рухсат берувчи ҳужжатларни расмийлаштиришда (архитектура-режалаштириш топшириғи, қурилиш лойиҳалари ва бошқалар) юзага келадиган харажатларни қоплаш.

25. Компания кузатув кенгаши қарори асосида қонунчилик ҳужжатларига зид бўлмаган Компания фаолияти билан боғлиқ бошқа харажатларни амалга ошириш.