Ўзбекистон Республикаси Президентининг «Энергия самарадорлиги соҳасида давлат бошқарувини такомиллаштириш ва энергия сервис компаниялари хизматлари бозорини ривожлантириш чора-тадбирлари тўғрисида» 2025 йил 27 мартдаги ПФ-63-сон Фармони ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Энергия самарадорлиги соҳасида давлат бошқарувини такомиллаштириш ва энергия сервис компаниялари хизматлари бозорини ривожлантириш чора-тадбирлари тўғрисида» 2025 йил 27 мартдаги ПФ-63-сон Фармони билан:

Ўзбекистон Республикаси Вазирлар Маҳкамаси ҳузуридаги Энергия самарадорлиги миллий агентлиги (кейинги ўринларда — Агентлик);

Агентлик ҳузурида юридик шахс ташкил этмаган ҳолда бюджетдан ташқари Энергия самарадорлигини рағбатлантириш ва қўллаб-қувватлаш жамғармаси (кейинги ўринларда — Жамғарма) ташкил этилгани маълумот учун қабул қилинсин.

2. Қуйидагилар:

а) Ўзбекистон Республикаси Вазирлар Маҳкамаси ҳузуридаги Энергия самарадорлиги миллий агентлиги ташкилий тузилмаси 1-иловага мувофиқ;

б) Қуйидагиларни назарда тутувчи Ўзбекистон Республикаси Вазирлар Маҳкамаси ҳузуридаги Энергия самарадорлиги миллий агентлиги тўғрисидаги низом 2-иловага мувофиқ;

Агентлик фаолиятини ташкил этиш асослари ва тартиби;

Агентликнинг асосий вазифалари ва функциялари;

Агентлик фаолияти самарадорлигини баҳолаш тартиби ва мезонлари;

Агентлик фаолиятини молиялаштириш ва моддий-техник таъминлаш, унинг ходимлари меҳнатига ҳақ тўлаш ва моддий рағбатлантириш;

в) Қуйидагиларни назарда тутувчи Ўзбекистон Республикаси Вазирлар Маҳкамаси ҳузуридаги Энергия самарадорлиги миллий агентлигининг Энергия самарадорлигини рағбатлантириш ва қўллаб-қувватлаш жамғармаси тўғрисидаги низом 3-иловага мувофиқ тасдиқлансин:

Жамғарма фаолиятини ташкил этиш тартиби ва унинг маблағларини шакллантириш манбалари;

Жамғарма маблағларидан фойдаланиш мақсадлари;

Жамғарма маблағларини бошқариш ва ҳисобини юритиш тартиби.

3. Ўзбекистон Республикаси Иқтисодиёт ва молия вазирлиги томонидан энергия самарадорлиги лойиҳаларини сифатли амалга ошириш учун дастлабки босқичда Австрия ҳукумати гранти ҳисобидан халқаро компания — «ILF Consulting Engineers» стратегик консультант сифатида жалб этилгани маълумот учун қабул қилинсин.

4. Агентлик ва стратегик консультант ўртасида ҳамкорлик йўналишлари этиб қуйидагилар белгилансин:

энергия самарадорлигини ошириш лойиҳалари портфелини шакллантириш;

энергия самарадорлигини ошириш лойиҳаларининг техник топшириқлари ва лойиҳа ҳужжатларини тайёрлаш, лойиҳалаштириш, қурилиш ва қабул қилиб олиш жараёнларида муҳандислик масалалари бўйича ҳамроҳлик қилиш;

давлат ҳамда ижтимоий соҳа бино ва иншоотларида ўрнатилган технология ва ускуналарнинг эксплуатациясини хусусий секторга ўтказиш механизмларини ишлаб чиқиш;

5. Белгилансинки:

Ўзбекистон Республикаси Иқтисодиёт ва молия вазирлиги томонидан кейинги босқичларда стратегик консультантнинг хизматлари ҳалқаро молия институтлари кредитлари, шу жумладан, Жаҳон банкининг «Энергетика ислоҳотлари учун инновацион углерод ресурсларини қўллаш» (iCRAFT) лойиҳаси доирасида жалб қилинган грантлар, бюджет маблағлари ва қонунчиликда тақиқланмаган бошқа манбалар ҳисобидан тўғридан-тўғри шартномалар асосида молиялаштирилади;

Агентликка энергия самарадорлиги лойиҳаларини амалга ошириш доирасида соҳалар кесимида энергия самарадор қурилмаларга хизмат кўрсатувчи сервис компанияларнинг энг яхши таклифларини танлаб олиш ва жалб қилишга рухсат берилади.

5.¹ Ҳудудларда энергия самарадорлигини ошириш ва энергия ресурсларини тежаш, энергия самарадор қурилма ва ускуналар жорий этилишини жадаллаштириш борасида ҳудудий ташкилотларнинг ўзаро ҳамкорлигини мувофиқлаштириш, шунингдек, энергия самарадорлиги лойиҳаларини шакллантириш бўйича Агентлик бошқарув ходимлари доирасида ташкил этиладиган лойиҳа офислари 3 та ходимдан, шу жумладан, 1 та лойиҳа офиси раҳбари ва 2 та бош мутахассисдан иборат бўлим сифатида шакллантирилади.

Бунда лойиҳа офиси раҳбари ва мутахассислари иш ҳақи шартларига кўра мос тарзда Агентликнинг бўлим бошлиғи ва бош мутахассисига тенглаштирилади.

6. Ўзбекистон Республикаси Иқтисодиёт ва молия вазирлиги:

икки ҳафта муддатда Агентлик фаолиятини ташкил қилиш учун талаб қилинадиган маблағларни 2025 йил учун Ўзбекистон Республикаси Давлат бюджетининг тасдиқланган параметрлари доирасида ажратсин ҳамда Агентликнинг 2025 йилга мўлжалланган харажатлар сметасини тасдиқласин;

2026 йилдан бошлаб ҳар йили Ўзбекистон Республикаси Давлат бюджети параметрларини шакллантиришда Агентлик фаолиятини молиялаштириш учун зарур маблағларни кўзда тутсин.

7. Агентлик Ўзбекистон Республикаси Иқтисодиёт ва молия вазирлигига тегишли Тошкент шаҳри, Юнусобод тумани Ниёзбек йўли кўчаси 1-уй манзилидаги бинода текин фойдаланиш ҳуқуқи асосида жойлаштирилсин.

8. Ушбу қарорнинг бажарилишини назорат қилиш ва мувофиқлаштириш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.

1. Ушбу Низом Ўзбекистон Республикаси Вазирлар Маҳкамаси ҳузуридаги Энергия самарадорлиги миллий агентлигининг (кейинги ўринларда — Агентлик) мақоми, асосий вазифалари, функциялари, ҳуқуқлари ва мажбуриятлари, фаолиятини ташкил этиш тартиби, шунингдек, Агентлик директори ва унинг ўринбосарларининг асосий функционал вазифалари ва жавобгарлигини белгилайди.

2. Агентлик энергия самарадорлиги соҳасида ягона давлат сиёсатини юритиш, соҳада рағбатлантирувчи ва таъсир этувчи чораларни ишлаб чиқиш ва тартибга солиш давлат сиёсатини амалга оширувчи мустақил республика ижро этувчи ҳокимият органи ҳисобланади.

3. Агентлик бевосита Вазирлар Маҳкамасига бўйсунади ва фаолияти юзасидан ҳисобот беради.

Бунда Агентлик фаолиятини мувофиқлаштириш ҳамда вазирлик ва идоралар билан ҳамкорлигини ташкил қилиш вазифаси Вазирлар Маҳкамасининг Иқтисодиёт, саноат, молия-банк, солиқ, давлат активлари, тадбиркорликни қўллаб-қувватлаш ва камбағалликни қисқартириш масалалари котибиятига юкланади.

4. Агентлик ўз фаолиятида Ўзбекистон Республикасининг Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Вазирлар Маҳкамасининг қарорлари ва фармойишларига, шунингдек, ушбу Низом ва бошқа қонунчилик ҳужжатларига амал қилади.

5. Агентликнинг ўз ваколатлари доирасида қабул қилган қарорлари республика ва маҳаллий ижро этувчи ҳокимият органлари, бошқа ташкилотлар, мансабдор шахслар ва фуқаролар томонидан ижро этилиши мажбурий ҳисобланади.

6. Агентлик Ўзбекистон Республикаси Давлат герби тасвири туширилган ва ўз номи ёзилган муҳрга ва бланкаларга, мустақил балансга, Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида шахсий ғазна ҳисобварақларига, шу жумладан, хорижий валютадаги шахсий ғазна ҳисобварақларига эга бўлади.

7. Агентликнинг расмий номи:

а) давлат тилида:

тўлиқ номи — Ўзбекистон Республикаси Вазирлар Маҳкамаси ҳузуридаги Энергия самарадорлиги миллий агентлиги, қисқартирилган номи — Энергия самарадорлиги миллий агентлиги;

б) рус тилида:

тўлиқ номи — Национальное агентство по энергоэффективности при Кабинете Министров Республики Узбекистан, қисқартирилган номи — Национальное агентство по энергоэффективности.

в) инглиз тилида:

тўлиқ номи — National Agency for Energy Efficiency under the Cabinet of Ministers of the Republic of Uzbekistan, қисқартирилган номи — National Agency for Energy Effiency.

8. Агентликнинг жойлашган жойи (почта манзили): Тошкент шаҳри Юнусобод тумани Ниёзбек йўли кўчаси 1-уй.

9. Қуйидагилар Агентликнинг асосий вазифалари ҳисобланади:

энергия самарадорлигини ошириш соҳасида ягона давлат сиёсатини юритиш, соҳада рағбатлантирувчи ва таъсир этувчи чоралар ишлаб чиқиш ва тартибга солиш;

энергия тежашдан даромад олувчи энергия сервис компаниялари (кейинги ўринларда — ЭСКО) хизматлари бозорини ривожлантириш;

энергия самарадорлиги юқори бўлган лойиҳалар портфелини шакллантириш ва уларни амалга ошириш учун хусусий инвестицияларни жалб қилиш;

энергия самарадорлигини ошириш соҳасида профессионал кадрлар тайёрлаш, қайта тайёрлаш ва малакасини баҳолаб боришни ташкил қилиш;

аҳоли ва тадбиркорлар ўртасида энергия ресурсларидан оқилона фойдаланиш ва исроф қилмасликка асосланган турмуш тарзи ва феъл-атворни шакллантиришга қаратилган энергия истеъмоли маданиятини ошириш ахборот кампанияларини ташкил этиш ва молиялаштириш.

10. Агентлик ўзига юкланган асосий вазифаларга мувофиқ қуйидаги функцияларни амалга оширади:

а) энергия самарадорлигини ошириш соҳасида ягона давлат сиёсатини юритиш, соҳада рағбатлантирувчи ва таъсир этувчи чоралар ишлаб чиқиш ва тартибга солиш соҳасида:

энергия сервис компаниялари хизматлари бозори механизмларига ўтишнинг асосий босқичларини ва уларда кўзда тутилган муҳим шартлар ва қоидаларни, шу жумладан, намунавий шартномалар лойиҳаларини назарда тутувчи норматив-ҳуқуқий ҳужжатлар лойиҳаларини ишлаб чиқишда иштирок этади;

ЭСКО хизматлари бозорини тартибга солишга доир норматив-ҳуқуқий ҳужжатлар ижросини мунтазам равишда таҳлил қилади, заруратга кўра уларни такомиллаштириш бўйича таклифлар тайёрлайди;

ЭСКО хизматлари бозорининг шаффоф ва рақобатли муҳитда ишлашига қаратилган норматив-ҳуқуқий ҳужжатлар лойиҳаларини ишлаб чиқади;

б) энергия тежашдан даромад олувчи ЭСКО хизматлари бозорини ривожлантириш соҳасида:

энергия самарадорлиги соҳасидаги консультантлар ва менежерлар ҳамда энергия аудиторларни бошланғич ва профессионал тоифаларга ажратган ҳолда уларнинг ягона реестрини юритади;

иқтисодиётда энергия аудити, энергия сервис хизматини кўрсатиш, яшил технология воситаларини ишлаб чиқариш ва хизмат кўрсатиш каби янги тадбиркорлик бўғинларини (сегментларини) яратишда иштирок этади;

в) энергия самарадорлиги салоҳияти юқори бўлган лойиҳалар портфелини шакллантириш ва уларни амалга ошириш учун инвестицияларни жалб қилиш соҳасида:

вазирлик ва идоралар томонидан таклиф этилаётган энергия самарадорлигини оширишга қаратилган дастурлар лойиҳаларини ўз ваколатлари доирасида келишади;

ЭСКО хизматлари бозорини жадал ривожлантиришга қаратилган узоқ муддатли инвестиция сиёсатини шакллантириш ва амалга оширишда иштирок этади;

ЭСКО хизматлари бозори фаолиятини мунтазам мониторинг қилиб боради;

ЭСКО хизматлари бозорида маҳаллий товарлар ва хизматлар харид қилинишини рағбатлантирувчи механизмларни жорий қилиш юзасидан таклифлар ишлаб чиқади;

ЭСКО хизматлари бозорининг барча иштирокчилари учун тенг ҳуқуқ ва шаффофликни таъминловчи қонун-қоидаларга риоя этилишини мониторинг қилади;

г) энергия самарадорлигини ошириш соҳасида профессионал кадрлар тайёрлаш, қайта тайёрлаш ва малакасини баҳолаб бориш тизимини йўлга қўйишни ташкил қилиш йўналишида:

маҳаллий ва хорижий экспертларни жалб қилган ҳолда энергия аудиторларини сертификатлаш тартибини ишлаб чиқади ва тасдиқлайди;

маҳаллий ва халқаро экспертларни жалб қилган ҳолда энергия менежерлари малакасини ошириш ва соҳада профессионал кадрлар тайёрлаш, қайта тайёрлаш ва малакасини баҳолаб бориш юзасидан ўқув курслари, семинар, конференция ва форумлар ташкиллаштиради;

д) аҳоли ва тадбиркорлар ўртасида энергия ресурсларидан оқилона фойдаланиш ва исроф қилмасликка асосланган турмуш тарзи ва феъл-атворни шакллантиришга қаратилган энергия истеъмоли маданиятини ошириш ахборот кампанияларини ташкил этиш ва молиялаштириш соҳасида:

оммавий ахборот воситалари ва ижтимоий тармоқларда ахборот кампаниялари ва видеороликларни тизимли намойиш қилиб боради;

республика ҳудудлари бўйича режа-жадваллар асосида маҳаллалар ва таълим ташкилотларида ташвиқот ва тарғибот ишларини амалга оширади;

аҳоли ва бизнес субъектлари билан энергия сервис бозоридаги хизмат кўрсатувчилар, етказиб берувчилар ва молия ташкилотлари ўртасида яқиндан алоқа ўрнатишга кўмаклашади;

энергия самарадорлигини тарғиб қилувчи ахборот кампанияларини ташкил этади ва энергия ресурсларидан оқилона фойдаланишни рағбатлантиришга қаратилган танловлар ва бошқа амалий чора-тадбирларни молиялаштиради.

11. Агентлик ўзига юкланган вазифаларни бажариш учун қуйидаги ҳуқуқларга эга:

ўз ваколати доирасида, шу жумладан, бошқа давлат органлари билан биргаликда норматив-ҳуқуқий ҳужжатларни қабул қилиш;

Вазирлар Маҳкамасига норматив-ҳуқуқий ҳужжатлар лойиҳаларини, шунингдек, Агентликка юкланган вазифалар ва функцияларни бажариш билан боғлиқ бўлган бошқа ҳужжатларни белгиланган тартибда киритиш;

республика ва маҳаллий ижро этувчи ҳокимият органлари ҳамда бошқа ташкилотлар томонидан бажарилиши мажбурий бўлган норматив-ҳуқуқий ҳужжатларни қабул қилиш, зарур ҳолларда бошқа вазирлик ва идоралар билан биргаликда қўшма қарорлар ва бошқа ҳужжатлар қабул қилиш;

энергия самарадорлигига қаратилган чора-тадбирлар ва дастурларни ишлаб чиқиш;

республика ва маҳаллий ижро этувчи ҳокимият органлари ҳамда бошқа ташкилотларга бажарилиши мажбурий бўлган кўрсатмалар киритиш;

республика ва маҳаллий ижро этувчи ҳокимият органлари ҳамда бошқа ташкилотлар билан бозор иштирокчилари фаолиятини мувофиқлаштириш;

зарур маълумотларни статистика ва солиқ органлари, Давлат хизматлари маркази ҳамда вазирлик ва идоралардан бепул сўраш ва олиш;

энергия самарадорлигини ошириш, ЭСКО хизматлари бозорини ривожлантириш, энергия аудиторлари, менежерлари, консультантларини тайёрлаш, қайта тайёрлаш ва уларнинг малакасини ошириш йўналишларида хорижий ташкилотлар, фан ва таълим муассасалари билан ҳамкорлик қилиш;

норматив-ҳуқуқий ҳужжатлар лойиҳаларини ишлаб чиқишда илмий ва бошқа ташкилотлар олимлари ва мутахассисларининг, шунингдек, маҳаллий ва хорижий экспертларни консультант сифатида жалб қилиш ва (ёки) уларнинг хулоса ва тавсияларини олиш;

амалиётда қўллаш тажрибаси таҳлили, олинган тавсиялар ва халқаро тажриба асосида норматив-ҳуқуқий ҳужжатларга ўзгартириш ва қўшимчалар киритиш бўйича ташаббуслар билан чиқиш;

энергия самарадорлиги соҳасида бажариладиган давлат ва тижорат лойиҳалари ҳамда дастурларида иштирок этиш;

ўз ваколатига кирадиган масалалар бўйича хорижий давлатлар, халқаро ва хорижий ташкилотлар вакиллари билан белгиланган тартибда музокаралар ўтказиш;

ушбу Низомда белгиланган мақсадларга эришишга йўналтирилган, қонунчилик ҳужжатларида тақиқланмаган бошқа фаолият турларини амалга ошириш.

12. Агентлик:

энергия самарадорлиги бўйича ягона давлат сиёсати самарали амалга оширилиши, шунингдек, юкланган вазифаларнинг сифатли бажарилиши;

Ўзбекистон Республикаси Президенти ва Ҳукумати топшириқларини ўз вақтида, тўлиқ ва сифатли бажариш, ўрта ва узоқ муддатли ривожланиш дастурлари ишлаб чиқилиши, уларнинг ижроси таъминланиши;

Агентликнинг фаолияти билан боғлиқ бўлган прогноз кўрсаткичларига эришиш соҳасидаги ишларнинг самарали ташкил этилиши;

Вазирлар Маҳкамасига ва Ўзбекистон Республикаси Президенти Администрациясига киритиладиган норматив-ҳуқуқий ҳужжатлар ва бошқа ҳужжатлар лойиҳаларининг сифати, шунингдек, Агентлик томонидан қабул қилинадиган қарорлар самарадорлиги ва натижадорлиги таъминланиши;

тегишли соҳани ривожлантириш ва ҳудудларнинг муаммоли масалаларини ҳал қилиш бўйича дастур, тадбирлар режаси, «йўл хариталари» ва бошқа ҳужжатларнинг самарали бажарилиши;

Ўзбекистон Республикаси Президентининг 2024 йил 14 июндаги ПҚ-222-сон қарори 6-банди «в» кичик бандида белгиланган давлат органлари ва ташкилотларидаги энергия менежерлари (Energy Efficiency Manager) фаолиятини мувофиқлаштириш;

юридик ва жисмоний шахсларнинг мурожаатлари кўриб чиқилиши ва белгиланган муддатларда уларга жавоб берилиши;

мунтазам равишда ходимлар қайта тайёрланиши ва уларнинг малакаси оширилиши учун масъул ҳисобланади.

13. Қуйидагилар директорнинг асосий функционал вазифалари ҳисобланади:

Ўзбекистон Республикаси Конституцияси ва қонунлари ҳамда бошқа норматив-ҳуқуқий ҳужжатлар талабларига риоя этиш;

Агентлик фаолиятига умумий раҳбарлик қилиш, Ўзбекистон Республикаси Президентининг тегишли ҳужжатлари, Вазирлар Маҳкамасининг қарорлари ва бошқа қонунчилик ҳужжатлари билан Агентликка юкланган вазифа ва функциялар бажарилишини ташкил этиш;

Ўзбекистон Республикаси Президенти, Ўзбекистон Республикаси Вазирлар Маҳкамасининг топшириқларини бажариш;

директор ўринбосарлари ва таркибий тузилмалар раҳбарларининг ваколатларини белгилаш ва вазифаларни тақсимлаш;

Агентлик фаолияти режалаштирилишини ташкил этиш, Агентликнинг даврий иш режаларини тасдиқлаш, уларнинг бажарилиши юзасидан назоратни таъминлаш;

Ўзбекистон Республикаси Президенти, Вазирлар Маҳкамаси топшириқларига ва ўз ташаббусига кўра норматив-ҳуқуқий ҳужжатлар лойиҳаларининг сифатли ишлаб чиқилишини, улар Ўзбекистон Республикасининг «Норматив-ҳуқуқий ҳужжатлар тўғрисида»ги Қонуни, Ўзбекистон Республикаси Президенти Администрациясининг Регламенти ва Ўзбекистон Республикаси Вазирлар Маҳкамаси Регламенти талабларига мувофиқ равишда ўз вақтида киритилишини ташкил этиш, лойиҳаларнинг Вазирлар Маҳкамасида пухта ишланишида, Вазирлар Маҳкамаси раҳбарияти ҳузурида ҳимоя қилинишида ва Ўзбекистон Республикаси Президенти Администрациясида кўриб чиқилишида иштирок этиш;

Ўзбекистон Республикаси Президентининг фармонлари, қарорлари, фармойишлари, Вазирлар Маҳкамасининг қарорлари, фармойишлари ва топшириқлари бажарилишини таъминлаш, таркибий бўлинмаларда ижро интизомини мустаҳкамлаш бўйича комплекс чора-тадбирларни амалга ошириш, Ўзбекистон Республикаси Президентининг «Қонунчилик ҳужжатлари ижросини самарали ташкил этишда давлат бошқаруви органлари ва маҳаллий ижро этувчи ҳокимият органлари раҳбарларининг шахсий жавобгарлигини кучайтиришга доир қўшимча чора-тадбирлар тўғрисида» 2021 йил 10 февралдаги ПФ-6166-сон Фармонига ва «Ijro.gov.uz» ижро интизоми идоралараро ягона электрон тизими самарали фаолият кўрсатишини таъминлашга қаратилган қўшимча чора-тадбирлар тўғрисида» 2021 йил 31 майдаги ПҚ-5132-сон қарорига мувофиқ таркибий бўлинма раҳбарларининг шахсий масъулиятини ошириш чораларини кўриш;

Агентлик раҳбарлари ва ходимлари хизмат сафарларини Ўзбекистон Республикаси Президентининг «Мансабдор шахсларнинг хорижий мамлакатларга чиқиш тартибини такомиллаштириш чоралари тўғрисида» 2014 йил 5 мартдаги ПҚ–2142-сон ва «Хорижий хизмат сафарларида бўлиш самарадорлиги ва хорижий делегацияларнинг Ўзбекистон Республикасига ташрифларини ташкил этиш учун мансабдор шахсларнинг шахсий масъулиятини янада ошириш чора-тадбирлари тўғрисида» 2017 йил 3 августдаги ПҚ-3170-сон қарорлари талабларига мувофиқ ташкил этиш, хизмат сафарларининг асослангани, самарадорлиги ва натижадорлигини, сафар учун ажратиладиган маблағлардан мақсадли ва оқилона фойдаланишни таъминлаш;

Агентлик ваколатига кирадиган масалалар бўйича кўрсатмалар чиқариш, буйруқлар ва норматив-ҳуқуқий ҳужжатларни қабул қилиш;

Агентлик ходимлари томонидан Вазирлар Маҳкамасининг 2022 йил 14 октябрдаги 595-сон қарори билан тасдиқланган Давлат фуқаролик хизматчилари одоб-ахлоқининг намунавий қоидалари асосида тасдиқланган Агентлик ходимлари одоб-ахлоқ қоидаларига риоя этилишини таъминлаш;

жисмоний ва юридик шахсларнинг мурожаатларини кўриб чиқиш бўйича ишларни Ўзбекистон Республикасининг «Жисмоний ва юридик шахсларнинг мурожаатлари тўғрисида»ги Қонуни, Вазирлар Маҳкамасининг 2018 йил 7 майдаги 341-сон қарори билан тасдиқланган Давлат органларида, давлат муассасаларида ва давлат иштирокидаги ташкилотларда жисмоний ва юридик шахсларнинг мурожаатлари билан ишлаш тартиби тўғрисидаги намунавий низомга мувофиқ самарали ташкил этиш, жамоатчилик билан бевосита ва очиқ мулоқот ўрнатиш, шахсий қабуллар ўтказиш, шу жумладан, жисмоний ва юридик шахсларнинг вакилларини жойларга чиқиб қабул қилишни ташкил этиш;

давлат органлари ва бошқа ташкилотларда, Ўзбекистон Республикаси судларида, шунингдек, давлат органлари, халқаро ташкилотлар ва хорижий мамлакат вакиллари иштирокида ўтказиладиган расмий тадбирларда Агентлик номидан иштирок этиш;

Ўзбекистон Республикасининг «Коррупцияга қарши курашиш тўғрисида»ги Қонуни ва коррупцияга қарши курашишга доир бошқа қонунчилик ҳужжатларига риоя этиш, фаолиятда коррупциявий хавф-хатарларни ва манфаатлар тўқнашувини ўз вақтида аниқлаш ҳамда уларга чек қўйиш, коррупцияга оид ҳуқуқбузарликлар олдини олиш чораларини кўриш ҳамда тизимда коррупциянинг олдини олиш ва унга қарши муросасиз курашишга доир ишларга раҳбарлик қилиш ва мувофиқлаштириш;

Ўзбекистон Республикасининг «Манфаатлар тўқнашуви тўғрисида»ги Қонуни ва манфаатлар тўқнашуви билан боғлиқ муносабатларни тартибга солишга доир ишларга раҳбарлик қилиш ва мувофиқлаштириш;

Ўзбекистон Республикаси Президентининг Халқ қабулхоналари билан самарали ҳамкорлик қилишни ташкил этиш, Агентлик раҳбарлари ва ходимлари уларнинг фаолиятида фаол иштирок этишини, жисмоний ва юридик шахсларнинг Ўзбекистон Республикаси Президентининг Виртуал қабулхонасидан келиб тушган мурожаатларини ўз вақтида ва тўлақонли кўриб чиқилишини таъминлаш;

Агентлик Ҳайъат мажлисларида раислик қилиш;

Агентликка юкланган вазифаларни бажариш учун шартнома асосида жалб этиладиган малакали хорижий мутахассислар хизматига ҳақ тўлаш шартларини халқаро амалиётдан келиб чиққан ҳолда белгилаш ҳамда уларга Агентлик ҳузуридаги Энергия самарадорлигини рағбатлантириш ва қўллаб-қувватлаш жамғармаси (кейинги ўринларда — Жамғарма) маблағлари ҳисобидан иш ҳақи ва бошқа тўловларни амалга ошириш;

Агентлик ходимларини уларнинг кўп йиллик ва самарали фаолияти, алоҳида хизматлари учун Ўзбекистон Республикаси давлат мукофотлари билан тақдирлаш учун белгиланган тартибда таклифлар киритишни таъминлаш ва тавсиялар бериш;

Агентлик мулкини қонунчилик ҳужжатларида белгиланган тартибда тасарруф этиш;

Агентлик ваколатига кирадиган масалалар юзасидан Ўзбекистон Республикасининг халқаро шартномаларини белгиланган тартибда имзолаш;

Агентликнинг ички ташкилий масалалари юзасидан қарорлар қабул қилиш;

Агентлик номидан ЭСКО хизматлари бозори иштирокчиларига ёзма сўровлар юбориш;

Агентлик ходимларини лавозимга тайинлаш ва лавозимдан озод этиш, меҳнат шартномалари (буйруқлари)ни имзолаш;

Агентлик ходимларига вазифаларни юклаш;

Агентлик ходимларининг малакасини ошириш ва уларни хорижий давлатларга стажировка ва тажриба алмашиш учун юборишни ташкил этиш;

Агентлик ходимларини рағбатлантириш ва интизомий жавобгарликка тортиш масалаларини ҳал қилиш, директор ўринбосарларини рағбатлантириш ва интизомий жавобгарликка тортиш масалаларини, шу жумладан, келгусида унинг эгаллаб турган лавозимида қолишининг мақсадга мувофиқлиги масалаларини кўриб чиқиш тўғрисида Вазирлар Маҳкамасига таклифлар киритиш, уларнинг шахсий жавобгарлигини ошириш бўйича тизимли чораларни амалга ошириш;

Агентликнинг ташқи ва ички ташкилий фаолияти устидан доимий ва қатъий назорат ўрнатиш;

Агентликка киритилган таклифлар ва тақдим этилган норматив-ҳуқуқий ҳужжатлар лойиҳаларининг тўлиқ ва ҳар томонлама кўриб чиқилишини, Ўзбекистон Республикаси Президенти Администрацияси Регламенти ва Ўзбекистон Республикаси Вазирлар Маҳкамасининг Регламентида белгиланган муддатларда келишилишини (виза қўйилиши) таъминлаш;

давлат сири тоифасига киритилган ва махфий ахборот билан ишлашда қонунчилик талабларига риоя қилиш;

ходимларнинг белгиланган чекланган сони доирасида Агентлик штатлар жадвалини, шунингдек, Давлат бюджети маблағлари ҳисобидан молиялаштириладиган Агентликнинг харажатлари сметасини тасдиқлаш;

ушбу Низомда ва қонунчилик ҳужжатларида назарда тутилган бошқа ваколатларни амалга ошириш.

14. Қуйидагилар директор ўринбосарларининг асосий функционал вазифалари ҳисобланади:

Ўзбекистон Республикаси Конституцияси ва қонунлари ҳамда бошқа норматив-ҳуқуқий ҳужжатлар талабларига риоя этиш;

Агентлик директори муайян сабабларга кўра (хизмат сафари, меҳнат таътили, бетоблиги даврида) йўқлигида унинг вазифаларини бажариш;

Агентликнинг ўзи назорат қиладиган таркибий тузилмалари фаолиятини мувофиқлаштириш, назорат ва бевосита раҳбарлик қилиш, ходимлар ўртасида вазифаларни тақсимлаш;

Агентлик фаолиятининг ўзи мутасаддилик қиладиган йўналишларини янада такомиллаштириш юзасидан Ўзбекистон Республикаси Президентининг ҳужжатлари ва Вазирлар Маҳкамаси қарорлари билан тасдиқланган комплекс дастур ва комплекс чора-тадбирлар ижросини танқидий ва чуқур таҳлил қилиш;

мутасаддилигидаги таркибий тузилмалар бўлинма раҳбарларининг ҳисоботларини мунтазам эшитиб бориш ва белгиланган кўрсаткичларга эришиш учун уларнинг шахсий жавобгарлигини ошириш;

Агентлик директорининг қонунчилик доирасидаги буйруқ ҳамда топшириқлари ижросини ўз вақтида ва сифатли таъминлаш;

Агентликка киритилган таклифлар ва тақдим этилган норматив-ҳуқуқий ҳужжатларнинг лойиҳаларини тўлиқ ва ҳар томонлама кўриб чиқиш;

кадрларни белгиланган тартибда танлаш ва жой-жойига қўйиш бўйича Агентлик директорига таклифлар тақдим этиш, уларнинг профессионаллиги, ўз ишини билиши, юксак даражадаги ишчанлик ва маънавий-ахлоқий фазилатларга эга бўлишини таъминлаш, уларнинг касбий малакасини ошириш чораларини кўриш, мутасаддилик бўйича таркибий тузилмаларда кадрлар захирасини шакллантириш чораларини кўриш;

Агентлик ходимлари томонидан Вазирлар Маҳкамасининг 2022 йил 14 октябрдаги 595-сон қарори билан тасдиқланган Давлат фуқаролик хизматчилари одоб-ахлоқининг намунавий қоидалари асосида тасдиқланган Агентлик ходимларининг одоб-ахлоқ қоидалари талабларига риоя этилишини таъминлаш;

жисмоний ва юридик шахсларнинг мурожаатларини кўриб чиқиш бўйича ишларни Ўзбекистон Республикасининг «Жисмоний ва юридик шахсларнинг мурожаатлари тўғрисида»ги Қонуни, Вазирлар Маҳкамасининг 2018 йил 7 майдаги 341-сон қарори билан тасдиқланган Давлат органларида, давлат муассасаларида ва давлат иштирокидаги ташкилотларда жисмоний ва юридик шахсларнинг мурожаатлари билан ишлаш тартиби тўғрисидаги намунавий низомга мувофиқ самарали ташкил этиш, жамоатчилик билан бевосита ва очиқ мулоқот ўрнатиш, шахсий қабуллар ўтказиш, шу жумладан, жисмоний ва юридик шахсларнинг вакилларини жойларга бориб қабул қилишни ташкил этиш;

Ўзбекистон Республикасининг «Коррупцияга қарши курашиш тўғрисида»ги Қонуни ва коррупцияга қарши курашишга доир бошқа қонунчилик ҳужжатларига ҳамда Ўзбекистон Республикасининг «Манфаатлар тўқнашуви тўғрисида»ги Қонунига риоя қилиш ва манфаатлар тўқнашуви билан боғлиқ муносабатларни тартибга солишга доир ишларни мувофиқлаштириш;

Агентлик фаолиятини такомиллаштириш бўйича амалий чоралар кўриш, ушбу соҳада қонунчиликни такомиллаштиришга доир таклифларни ишлаб чиқиб, кўриб чиқиш учун Агентлик директорига киритиш;

энергия самарадорлиги соҳасидаги норматив базанинг тизимли асосда қайта кўриб чиқилишини ташкил этиш;

энергия самарадорлиги соҳасида давлат сиёсатининг асосий йўналишлари бўйича таклифлар тайёрлаш;

хорижий давлатлар, халқаро ва хорижий ташкилотлар билан энергия самарадорлиги соҳасини ривожлантириш ва тартибга солиш масалалари бўйича ҳамкорлик қилиш;

давлат сири тоифасига киритилган ва махфий ахборот билан ишлашда қонунчилик талабларига риоя қилиш.

15. Агентлик директори:

Агентликка юкланган вазифа ва функцияларнинг бажарилиши учун;

Агентликнинг ушбу Низомда назарда тутилган жавобгарлик соҳалари бўйича ҳамда Низомнинг 13-бандида кўрсатилган ўз функционал мажбуриятларининг сифатли бажарилиши учун шахсан жавоб беради.

16. Агентлик директори ўринбосарлари:

мутасаддилик қилинадиган йўналиш ва таркибий бўлинмаларда Агентликка юкланган вазифалар ва функцияларнинг бажарилиши учун;

ушбу Низомнинг 14-бандида кўрсатилган ўз функционал вазифаларининг сифатли бажарилиши учун шахсан жавоб берадилар.

17. Агентликка Ўзбекистон Республикаси Президенти томонидан лавозимга тайинланадиган ва лавозимидан озод этиладиган директор раҳбарлик қилади.

Агентлик директорининг ўринбосарлари Ўзбекистон Республикаси Президенти билан келишилган ҳолда Вазирлар Маҳкамасининг қарори билан лавозимга тайинланади ва лавозимидан озод қилинади.

18. Агентлик директори:

Агентлик фаолиятига якка тартибда раҳбарлик қилади;

Агентлик фаолиятига умумий раҳбарлик қилади ва Агентликка юкланган вазифалар ва функцияларнинг бажарилиши учун шахсан жавоб беради;

Агентлик ходимларининг лавозим мажбуриятларини белгиланган тартибда тасдиқлайди;

ўз ваколати доирасида Агентлик ходимларининг бажариши мажбурий бўлган буйруқлар ва фармойишлар чиқаради, кўрсатмалар беради.

Директор қонунчилик ҳужжатларига мувофиқ бошқа ваколатларни ҳам амалга ошириши мумкин.

19. Агентлик директори маълум сабабларга кўра (хизмат сафари, меҳнат таътили, бетоблиги даврида) йўқлигида унинг биринчи ўринбосари директор вазифаларини бажаради.

20. Агентлик ўз вазифалари ва функцияларини амалга оширишда республика ижро этувчи ҳокимият органлари ва хўжалик бирлашмалари, маҳаллий давлат ҳокимияти органлари ҳамда бошқа ташкилотлар билан ҳамкорлик қилади.

21. Ҳайъат Агентликнинг коллегиал органи ҳисобланиб, директор (ҳайъат раиси), унинг ўринбосарлари (лавозим бўйича), шунингдек, Агентлик фаолиятининг асосий йўналишларини мувофиқлаштирувчи таркибий бўлинмалар раҳбарларидан иборат таркибда ташкил этилади.

Ҳайъат таркибининг сони ва шахсий таркиби белгиланган тартибда Вазирлар Маҳкамаси томонидан тасдиқланади.

Ҳайъат фаолиятининг тартиби Ҳайъат томонидан тасдиқланадиган регламент билан белгиланади.

22. Ҳайъатга қуйидаги вазифалар юкланади:

Агентлик вазифаларининг энг муҳим самарадорлик кўрсаткичларини ишлаб чиқиш ва амалга оширилишини назорат қилиш;

Агентлик фаолияти билан боғлиқ долзарб масалаларнинг жойларда муҳокама этилишини таъминлаган ҳолда ҳайъатнинг кенгайтирилган мажлислари ўтказилишини ташкил этиш, шунингдек, юзага келган муаммоларни ўз ваколатлари доирасида бартараф этиш бўйича тегишли қарорларни ишлаб чиқиш ва қабул қилиш;

Агентлик таркибига кирувчи лавозимлар номенклатурасини кўриб чиқиш ва тасдиқлаш;

Ўзбекистон Республикаси Президенти ва Вазирлар Маҳкамасининг қарор ва топшириқларида белгиланган вазифаларнинг ўз вақтида ва сифатли амалга оширилишини таъминлаш мақсадида Агентлик раҳбарлари ва ходимларининг ижро интизомини мустаҳкамлаш ва шахсий жавобгарлигини ошириш.

Ҳайъат, шунингдек, Агентлик ваколатига киритилган бошқа масалаларни ҳам кўриб чиқишга ҳақли.

23. Агентлик директори қарори билан қуйидагилар:

ҳайъат иш режалари ва белгиланган вазифаларни бажариш муддатлари;

таклифлар ташаббуси билан чиқиш, лойиҳаларни бошлаш ва ҳисобот бериш тартиблари;

ҳайъатнинг фаолиятини самарали таъминлаш учун Агентлик масъул таркибий бўлинмаларининг вазифалари тасдиқланиши мумкин.

24. Ҳайъат йиғилишига Агентлик ваколатига тегишли масалалар юзасидан республика ва маҳаллий ижро этувчи ҳокимият органлари, бошқа ташкилотлар раҳбарлари ва эксперт мутахассислар таклиф этилиши мумкин.

25. Ҳайъат мажлиси аъзоларининг ярмидан кўпи иштирок этган тақдирда, ваколатли ҳисобланади. Ҳайъат қарорлари оддий кўпчилик овози билан қабул қилинади.

26. Директор ва Ҳайъат аъзолари ўртасида келишмовчиликлар юзага келган тақдирда, директор ушбу келишмовчиликлар хусусида Вазирлар Маҳкамасига ва Ўзбекистон Республикаси Президенти Администрациясига ахборот бериб, мустақил равишда қарор қабул қилади. Ҳайъат аъзолари ҳам ўз фикрларини Вазирлар Маҳкамасига ва Ўзбекистон Республикаси Президенти Администрациясига билдиришлари мумкин.

27. Ҳайъат ўз фаолияти учун зарур бўлган ҳужжатлар, ҳисоботлар ва бошқа маълумотларни сўраб олишга ҳақли.

28. Ҳайъат қарорлари Ҳайъат раиси томонидан имзоланади ва Агентлик буйруғи (қарори) билан амалга оширилади.

29. Агентлик фаолиятининг самарадорлиги мунтазам баҳоланади.

30. Агентлик фаолияти самарадорлиги ва натижадорлигига берилган баҳо Вазирлар Маҳкамаси томонидан тасдиқланадиган Агентлик фаолияти самарадорлиги ва натижадорлигини баҳолаш мезонлари ва иш индикаторларига асосланади.

31. Агентлик фаолияти самарадорлиги ва натижадорлигини баҳолаш якунлари бўйича:

Агентлик раҳбарлари ва ходимларини қўшимча рағбатлантириш (мукофотлаш) ёки интизомий жавобгарликка тортиш;

Агентлик фаолиятида аниқланган камчиликларни бартараф этиш ва унинг фаолиятини янада такомиллаштириш чоралари кўрилади.

32. Агентлик фаолияти самарадорлиги ва натижадорлигини баҳолаш тартиби ва услуби қонунчилик ҳужжатлари билан белгиланади.

33. Агентликнинг моддий-техник таъминоти, ходимлари меҳнатига ҳақ тўлаш ва уларни моддий рағбатлантириш бўйича харажатларни молиялаштириш Ўзбекистон Республикаси Давлат бюджети, Жамғарма маблағлари ҳисобидан амалга оширилади.

Ходимларнинг меҳнатига ҳақ тўлаш фонди лавозим маоши, кўп йиллик хизмати учун устама, мукофотлар, шу жумладан, байрам кунлари учун мукофотлар, қўшимча ҳақлар ва устамалар, рағбатлантириш тўловларидан, шунингдек, қонунчилик ҳужжатларида назарда тутилган бошқа тўловлардан иборат.

34. Агентлик ходимларига Ўзбекистон Республикаси Давлат бюджети маблағларидан:

Агентлик ходимлари учун Ягона тариф сеткаси бўйича тасдиқланган разрядларга мувофиқ лавозим маоши, бунда лавозим маошини ҳисоблашда тасдиқланган тариф разрядлари тариф коэффициенти 1,8 бараварга оширилган миқдорда қўлланади.

Агентлик ходимларига кўп йиллик хизмат учун ҳар ойда қуйидаги миқдорда устама ҳақлар (рағбатлантириш коэффициентини ҳисобга олган ҳолда, лавозим маошига нисбатан оширилган тариф коэффициенти ҳисобида):

1 йилдан 3 йилгача — 0,3;

3 йилдан 5 йилгача — 0,6;

5 йилдан 10 йилгача — 0,8;

10 йилдан 15 йилгача — 1,0;

15 йилдан 20 йилгача — 1,2;

20 йилдан ортиқ — 1,5.

35. Агентликни қайта ташкил этиш ва тугатиш қонунчилик ҳужжатларида белгиланган тартибда амалга оширилади.

1. Ушбу Низом Ўзбекистон Республикаси Вазирлар Маҳкамаси ҳузуридаги Энергия самарадорлиги миллий агентлиги (кейинги ўринларда —Агентлик) ҳузуридаги Энергия самарадорлигини рағбатлантириш ва қўллаб-қувватлаш жамғармасининг (кейинги ўринларда — Жамғарма) вазифалари, шунингдек, маблағларни шакллантириш, улардан фойдаланиш ҳамда Жамғармани бошқариш тартибини белгилайди.

2. Жамғарма юридик шахс ҳисобланмайди.

Жамғарма маблағлари ҳисобидан:

энергия самарадорлигини ошириш билан боғлиқ ишларни амалга ошириш соҳасида мониторинг қилиш, тарғибот ишларини ташкил этиш, мутахассисларни тайёрлаш, қайта тайёрлаш ва уларнинг малакасини ошириш, илмий-тадқиқот фаолиятини олиб боришга йўналтирилган энергия самарадорлигини ошириш билан боғлиқ тадбирлар ва лойиҳалар;

Энергия самарадорлиги миллий агентлигига юкланган вазифалар ва функцияларни амалга ошириш билан боғлиқ бошқа мақсадлар молиялаштирилади.

3. Жамғарма маблағлари қуйидаги манбалар ҳисобидан шакллантирилади:

Ўзбекистон Республикаси Давлат бюджети маблағлари;

давлат улуши бўйича дивидендлар ҳисобидан нефть-газ ва электр энергетикаси тармоқлари корхоналарининг соф фойдасидан 5 фоиз миқдоридаги ўтказмалар, корхоналарнинг соф фойдасидан дивидендга йўналтириш тўғрисида қарор қабул қилиш учун қонунчилик ҳужжатларида белгиланган чекловлар юзага келган ҳоллар бундан мустасно. Мазкур ўтказма маблағлари Жамғармага корхоналар соф фойдасининг тақсимоти ва давлат улушига ҳисобланган дивидендлар тўғрисида уларнинг ваколатли бошқарув органлари томонидан қарор қабул қилинган санадан бошлаб бир ой ичида ўтказиб берилиши лозим;

энергияни меъёрдан ортиқча истеъмол қилганлик учун корхоналарга қўлланадиган оширилган тарифлардан тушумлар;

Энергия самарадорлигини ошириш рақамли платформаси оператори — «Ўзбекистон республика товар-хом ашё биржаси» АЖнинг платформада хизматларни кўрсатиш учун олинадиган комиссиянинг 40 фоизи;

энергия самарадорлиги лойиҳаларини амалга оширишда буюртмачини сақлаш харажатлари учун ажратиладиган маблағлар;

халқаро молия институтлари ва хорижий ҳукумат молия ташкилотларининг кредитлари ва грантлари;

Жамғарма активларини бошқариш, шу жумладан, бўш турган маблағларни тижорат банклари депозитига жойлаштиришдан олинадиган даромадлар;

юридик ва жисмоний шахсларнинг ҳомийлик хайриялари;

қонунчилик ҳужжатларида тақиқланмаган бошқа манбалар.

4. Жамғарма маблағлари белгиланган тартибда тасдиқланадиган харажатлар сметасига асосан йўналтирилади.

5. Жамғарма маблағларидан қуйидаги мақсадларда фойдаланилади:

хўжалик юритувчи субъектларда энергия аудити ўтказиш ва энергия самарадорлигини оширишни қўллаб-қувватлаш бўйича чора-тадбирларни амалга ошириш;

аҳоли учун энергия самарадор ускуналарни харид қилиш ва ўрнатишида молиявий ёрдам кўрсатиш (субсидия ажратиш), шунингдек, тижорат банкларига молиявий ресурсларни ажратиш;

энергия аудитини ўтказиш учун зарур ускуналар ва воситаларни харид қилишни қисман молиялаштириш;

энергия самарадорлигини ошириш лойиҳалари доирасида тижорат банклари билан ҳамкорликда энергия сервис компанияларини молиялаштириш;

энергия самарадорлигини ошириш лойиҳаларини амалга ошириш юзасидан давлат идоралари билан энергия сервис хизматларини кўрсатишни молиявий қўллаб-қувватлаш;

энергия аудиторлари, консультантлар, менежерлар ва верификаторларни тайёрлаш, қайта тайёрлаш ҳамда уларнинг малакасини ошириш дастурларини ишлаб чиқиш ва семинарлар ўтказиш;

энергия тежамкорлиги ва энергия самарадорлигини ошириш соҳасида халқаро ҳамкорликни йўлга қўйиш;

энергия самарадорлиги соҳасига оид илмий-техник дастурлар, методик ҳужжатларни, техник бошқарув соҳасида норматив ҳужжатларни ишлаб чиқиш;

энергия самарадор лойиҳалар ва тадбирларни амалга ошириш учун экспертларни (аудиторлар, юристлар, молиячилар, илмий ходимлар ва шу кабилар), шу жумладан, халқаро эксперт ва консультантларни жалб қилиш;

энергия самарадорлиги билан боғлиқ ишларни амалга ошириш соҳасида нодавлат-нотижорат ташкилотлар билан биргаликда тадбирлар ўтказиш;

энергия самарадорлиги соҳасида форумлар, конференциялар, давра суҳбатлари ҳамда семинарлар ташкил этиш ва ўтказиш;

Агентлик тизими ходимларининг энергия самарадорлиги соҳасида халқаро кўргазмалар, лойиҳалар ва дастурларда иштирок этиши билан боғлиқ харажатларни қоплаш;

энергия самарадорлигини ошириш билан боғлиқ ишларни амалга ошириш соҳасида мониторинг қилиш, тарғибот ишларини ташкил этиш, мутахассисларни тайёрлаш, қайта тайёрлаш ва уларнинг малакасини оширишга йўналтирилган энергия самарадорлигини ошириш билан боғлиқ тадбирлар ва лойиҳаларни молиялаштириш;

Агентликка юкланган вазифалар ва функцияларни амалга ошириш билан боғлиқ бошқа мақсадларни молиялаштириш;

Агентлик фаолияти билан боғлиқ ишларни амалга ошириш соҳасида хорижий ва халқаро ташкилотлар раҳбарлари ва мутахассисларининг Ўзбекистон Республикасида бўлиши даврида уларни қабул қилиш ва кузатиш;

қонунчиликда белгиланган тартибда Агентлик фаолиятига доир шартномавий мажбуриятларини қоплаш;

Агентлик фаолиятини таъминлаш, ходимларини тайёрлаш, қайта тайёрлаш ва уларнинг малакасини ошириш, уларни хорижий таълим ташкилотларида тажриба орттириш ҳамда ходимларни моддий рағбатлантириш;

Агентлик тизимининг моддий-техник базасини мустаҳкамлаш ва ривожлантириш учун барча зарур асбоб-ускуналар, жиҳозлар, компьютер дастурларини харид қилиш;

Агентликка юкланган вазифалар ва функцияларни амалга ошириш билан боғлиқ бошқа мақсадлар.

Бунда давлат бюджетидан Жамғармага ажратилган маблағлар ҳисобидан агентликни сақлаш, ходимлар меҳнатига ҳақ тўлаш харажатлари учун сарфлаш тақиқланади.

6. Жамғарма маблағлари ҳисобидан Агентлик ходимларини қуйидаги шаклларда моддий рағбатлантириш устамалари ва ижтимоий қўллаб-қувватлаш (моддий ёрдам) тўловлари амалга оширилади:

а) Агентлик раҳбар ва ходимларини моддий жиҳатдан қўллаб-қувватлаш мақсадида Агентлик директори томонидан ходимларга лавозим маошига (лавозим маошига нисбатан рағбатлантириш коэффициентлари ҳамда кўп йиллик хизмат қилганлик учун устама миқдори ҳисобга олинган ҳолда) нисбатан 200 фоизгача бўлган миқдорда ҳар ойлик устамалар;

в) қонунчиликда белгиланган тартибда Ўзбекистон Республикасининг Меҳнат кодекси 208-моддасида келтирилган байрамлар муносабати билан лавозим маошининг (рағбатлантириш коэффициентлари ҳисобга олинган ҳолда) нисбатан бир баравари миқдорида бир марталик мукофот пули;

г) ҳар ойда (жамоа шартномасига мувофиқ) йўл-транспорт харажатлари учун базавий ҳисоблаш миқдорининг бир бараваригача ҳамда ходимнинг овқатланиши харажатларига кўмаклашиш мақсадида базавий ҳисоблаш миқдорининг икки бараваригача миқдорда тўловлар;

д) қишлоқ хўжалиги маҳсулотларини сотиб олиш учун йилда бир марта (сентябрь — ноябрь ойларида) базавий ҳисоблаш миқдорининг ўн бараваригача миқдорида моддий ёрдам пули;

е) зарур ҳолларда (рағбатлантирувчи коэффициентни ҳисобга олган ҳолда) бир ойлик лавозим маоши миқдорида (Ижтимоий реестрга киритилган оилалар, ходимнинг даволаниши, 50, 55, 60 юбилей ёши муносабати билан, шунингдек, пенсияга чиққанда, тўй, дафн маросими ва бошқалар учун) ходимларга касаба уюшмаси билан келишилган моддий ёрдам пули берилади.

7. Шахсий ва рағбатлантириш устамаларини белгилаш, маънавий ва моддий рағбатлантириш, мукофотлар, ижтимоий муҳофаза қилишнинг аниқ миқдорлари ва улар татбиқ этиладиган ходимлар ушбу низомда белгиланган миқдорлар доирасида, Жамғарма маблағларига тушумлар ҳажмидан келиб чиқиб, Агентлик директори томонидан белгиланади.

8. Агентлик директори раҳбарлик қилувчи Жамғарманинг бошқарув Кенгаши (кейинги ўринларда — Кенгаш) Жамғармани бошқариш органи ҳисобланади.

9. Кенгашнинг шахсий таркиби Агентлик директори, Вазирлар Маҳкамаси масъул вакили, иқтисодиёт ва молия вазири ўринбосари, Агентлик директорининг ўринбосарлари, бош ҳисобчиси, бош юрисконсультидан ташкил топади ҳамда Вазирлар Маҳкамаси томонидан тасдиқланади.

10. Кенгаш қуйидаги функцияларни амалга оширади:

Жамғарманинг йиллик харажатлар сметасини (кейинги ўринларда — Смета) тасдиқлайди;

энергия самарадорлигига қаратилган тадбирларни Жамғарма маблағлари ҳисобидан молиялаштиришнинг устувор йўналишларини белгилайди;

Жамғарма маблағлари ҳисобидан молиялаштириладиган лойиҳаларга киритиладиган таклифларни (аризаларни) кўриб чиқади;

тасдиқланган Смета асосида Жамғарма маблағлари ҳисобидан молиялаштириладиган лойиҳа ва тадбирларни молиялаштиришни, шу жумладан, Ўзбекистон Республикаси Президентининг «Энергия самарадорлиги соҳасида давлат бошқарувини такомиллаштириш ва энергия сервис компаниялари хизматлари бозорини ривожлантириш чора-тадбирлари тўғрисида» 2025 йил 27 мартдаги ПФ-63-сон Фармонида аҳоли учун кўзда тутилган субсидия ва кредитларни ажратиш юзасидан йиллик харажатларни тасдиқлайди;

зарур ҳолларда тасдиқланган Сметага тегишли ўзгартиришлар киритади.

Вазирлар Маҳкамаси билан келишган ҳолда Жамғарма маблағларидан фойдаланиш йўналишларига ўзгартиришларни киритади.

10¹. Кенгашга раис раҳбарлик қилади ва Кенгашнинг вазифалари, ваколатлари ва унинг фаолиятини ташкил этиш тартиби Кенгаш раиси томонидан тасдиқланадиган низомга мувофиқ белгиланади.

11. Агентлик Жамғармага маблағлар тушуми ва улардан фойдаланилиши тўғрисида ҳар ярим йилликда ўрнатилган тартибда Ўзбекистон Республикаси Иқтисодиёт ва молия вазирлигига ҳисобот тақдим этади.

12. Жамғарма маблағларидан оқилона ва мақсадли фойдаланилиши юзасидан давлат молиявий назорати қонунчиликда белгиланган тартибда ваколатли орган томонидан амалга оширилади.

13. Жамғарма маблағларининг ҳисобот йилида фойдаланилмаган қисми олиб қўйилмайди ва ушбу Низомда назарда тутилган тартибда фойдаланиш учун кейинги йилга ўтказилади.

14. Жамғарма маблағларидан фойдаланилишида келиб чиқадиган низолар қонунчиликда белгиланган тартибда ҳал этилади.

15. Ушбу Низом талаблари бузилишида айбдор бўлган шахслар қонунчиликда белгиланган тартибда жавоб берадилар.