ЛОЙИҲАНИ АМАЛГА ОШИРИШНИНГ АСОСИЙ ПРИНЦИПЛАРИ

1. Қидирув натижалари, минерал ресурслар ва руда захиралари ҳисоботи Австралия кодекси (JORC Code) стандартларига мувофиқ захираларни ҳисоблаш.

2. Қимматбаҳо, рангли ва нодир металларни қазиб олишни кўпайтириш натижасида мис катоди, олтин, кумуш, рух ва нодир металларни ишлаб чиқариш ҳажмларини ошириш.

3. Одамлар ва атроф муҳитни ишлаб чиқаришда юзага келадиган заҳарли моддалар ва газларнинг потенциал зарарли таъсиридан ҳимоя қилиш.

4. Янги иш ўринлари яратиш орқали Олмалиқ шаҳри ва Тошкент вилояти аҳолисининг бандлиги даражасини ошириш.

ЛОЙИҲАНИ АМАЛГА ОШИРИШНИНГ КЎРСАТКИЧЛАРИ

1. Мис-молибден рудалари қазиб чиқариш ва қайта ишлашни йиллик 35,0 млн тоннадан 100,0 млн тоннага етказиш.

2. Мис катоди ишлаб чиқаришни 108,0 минг тоннадан 265,0 минг тоннага етказиш.

3. Олтин ишлаб чиқаришни 15,0 тоннадан 31,0 тоннага, кумуш ишлаб чиқаришни 96,0 тоннадан 169,0 тоннага етказиш.

4. Металлургия соҳаси илм-фани, замонавий технологиялар, малакали миллий кадрларни тайёрлаш орқали ишлаб чиқариш қувватларидан хавфсиз фойдаланиш инфратузилмасини таъминлаш.

ЛОЙИҲАНИ АМАЛГА ОШИРИШНИНГ УСТУВОР ЙЎНАЛИШЛАРИ

1. »Ёшлик I» конини, 3-мис бойитиш фабрикасини ҳамда мис эритиш заводи объектларини қуриш, шу жумладан, мис бойитиш фабрикаси ва мис бойитиш жараёнида ҳосил бўладиган қолдиқларни сақлаш объекти қурилиши учун майдонни танлаш, мазкур объектларни лойиҳалаштириш, қуриш ва фойдаланишга топшириш.

2. Мис эритиш заводи қувватларидан фойдаланишда атроф муҳит муҳофазасини ва аҳолини ҳимоя қилишни таъминлаш.

3. Арзон ва иқтисодий самарали хом ашё циклини ташкил этиш, шу жумладан, узоқ муддатга таъминлаш, мис бойитиш жараёнида ҳосил бўладиган қолдиқларини сақлаш учун шароитлар яратишни ташкил этиш.

4. Металлургия соҳасини узоқ муддатли ривожлантиришни таъминлаш, шу жумладан, қимматбаҳо ва рангли металлар ишлаб чиқариш объектларини қуриш ва ундан фойдаланишни қўллаб-қувватлаш учун металлургия соҳаси илм-фани ва технологияларини ривожлантириш, маҳаллий ташкилотлар томонидан лойиҳавий, конструкторлик, экологик ва бошқа билимлар ҳамда тажрибани ўрганиш, бўлажак завод ва фабрикаларнинг референт технологияларини танлаш учун технологияларнинг ривожланиш йўналишларини ўрганиш.

ЛОЙИҲАНИ АМАЛГА ОШИРИШНИНГ АСОСИЙ УСТУВОР ЙЎНАЛИШЛАРИНИ АМАЛГА ОШИРИШ БЎЙИЧА ЧОРА-ТАДБИРЛАР

а) Лойиҳани амалга ошириш инфратузилмасини ривожлантиришнинг асосий йўналишлари:

лойиҳа офисини ташкил этиш;

«Олмалиқ КМК» АЖ Кузатув кенгаши қошида Бошқарув қўмитасини ташкил этиш;

лойиҳа объектларининг эксплуатация фаолиятини таъминлаш;

мустақил компанияларни муҳандис-маслаҳатчилар сифатида жалб қилиш;

малакали кадрлар билан таъминлаш;

б) Лойиҳани амалга оширишнинг асосий босқичлари:

«Ёшлик I» кони ва янги 3-мис бойитиш фабрикаси қурилиши (I босқич);

мис эритиш заводи ишлаб чиқариш қувватларини кенгайтириш ва реконструкция қилиш (II босқич);

атроф муҳит муҳофазасини таъминлаш соҳасидаги тадбирлар.

СТРАТЕГИЯНИ АМАЛГА ОШИРИШ МОНИТОРИНГИ ВА НАЗОРАТИ

1-босқичда Лойиҳа офиси томонидан «Олмалиқ КМК» АЖ Бошқаруви олдида ҳар ҳафтада тезкор ҳисобот берилиши.

2-босқичда «Олмалиқ КМК» АЖ раҳбарияти томонидан Ўзбекистон Республикаси Бош вазирига ҳар ойда ҳисобот берилиши.

3-босқичда «Олмалиқ КМК» раҳбарияти томонидан лойиҳани амалга оширишнинг стратегик ва долзарб йўналишлари бўйича Ўзбекистон Республикаси Президентига ҳар чоракда ҳисобот берилиши.

Стратегияда назарда тутилган тадбирлар амалга оширилиши мониторингини олиб бориш ва назорат қилиш Ўзбекистон Республикаси Президенти Администрацияси раҳбарининг 2019 йил 26 сентябрдаги 21979-хҳ-сон баённомасига мувофиқ «Олмалиқ кон-металлургия комбинати» АЖ томонидан амалга оширилаётган инвестиция лойиҳаларини жадаллаштириш ва жорий фаолиятини самарали ташкил этиш бўйича Доимий ишчи гуруҳ томонидан ҳам амалга оширилади.

2024 ЙИЛДА ЭРИШИЛАДИГАН МАҚСАДЛАР

Қуйидаги янги ишлаб чиқариш қувватлари ишга туширилади:

74,0 миллион тонна руда қазиб олиш қувватига эга бўлган кон;

60,0 миллион тонна рудани қайта ишлаш имкониятга эга бўлган янги 3-мис бойитиш фабрикаси;

275,0 минг тонна мис ишлаб чиқариш қувватига эга бўлган мис электролизи цехи;

республикага ҳар йили 265,0 минг тонна мис катоди, 31,0 тонна олтин ва 169,0 тонна кумуш етказиб бериш;

6000 тадан зиёд янги иш ўринларини яратиш.