Вазирлар Маҳкамаси қарор қилади:

Ўзбекистон Республикаси дон маҳсулотлари («Ўздонмаҳсулот») давлат концернининг илова қилинаётган Устави тасдиқлансин.

1. Ўзбекистон Республикаси дон маҳсулотлари («Ўздонмаҳсулот») давлат концерни, кейинги ўринларда концерн деб аталади, Ўзбекистон Республикаси Президентининг 1992 йил 6 февралдаги Фармонига, Ўзбекистон Республикаси Президенти ҳузуридаги Вазирлар Маҳкамасининг 1992 йил 21 февралдаги 75-сон қарорига мувофиқ ва дон маҳсулотлари тармоқлари, бирлашмалари, корхоналари, ташкилотлари ва муассасаларининг қарори бўйича (таъсис конференциясининг 1992 йил 29 февралдаги 1-сон қарори) ташкил этилган.

2. Концерн турли мулкчилик шаклларига эга бўлган, кейинги ўринларда иштирокчилар деб аталадиган мустақил бирлашмалар, корхоналар, ташкилотлар ва муассасаларнинг кўп тармоқли ихтиёрий бирлашмаси ҳисобланади.

Концерн ишлаб чиқариш, хўжалик ва молиявий фаолиятни илмий-техникавий ва ишлаб чиқариш ривожланиши, шунингдек, инвестиция, молия, ташқи иқтисодий фаолият ва бошқа фаолият бўйича функцияларнинг бир қисми концерн муассислари томонидан ихтиёрий равишда унга берилиши асосида амалга оширади.

3. Концерн таркибига қирувчи бирлашмалар, корхоналар, ташкилотлар ва муассасалар хўжалик мустақиллигини, юридик шахс ҳуқуқини сақлаб қоладилар, Ўзбекистон Республикаси қонунчилигига ва мазкур Уставга мувофиқ фаолият кўрсатадилар. Улар билан концерн ўртасидаги ўзаро муносабатлар таъсис шартномаси, Устав билан белгиланади.

4. Концерн юридик шахс ҳисобланади, Ўзбекистон Республикаси қонунчилиги ва мазкур Уставга мувофиқ фаолият кўрсатади, мустақил ва йиғма балансга, банк ва ташқи иқтисодий банк муассасаларида ҳисоб-китоб ва бошқа счётларига, Ўзбекистон Республикаси давлат тамғаси туширилган ва ўз номи ўзбек ва рус тилларида ёзилган муҳрга эга бўлади. Концернни рўйхатга олиш қонунчиликда белгиланган тартибда амалга оширилади.

Концерннинг асосий фаолияти хўжалик ҳисоби, ўзини ўзи маблағ билан таъминлаш ва ўзини ўзи бошқариш принциплари асосида амалга оширилади.

5. Концерн ўз мажбуриятларига кўра қонунчилик бўйича жазо қўлланилиши мумкин бўлган ўзига тегишли мол-мулк учун жавоб беради.

Концерн давлат ва унинг органларининг мажбуриятлари учун жавоб бермаганидек, давлат ва унинг органлари концерннинг мажбуриятлари учун жавоб бермайди.

Агар концерн билан унинг иштирокчилари ўртасида тузиладиган шартномаларда бошқача ҳол назарда тутилмаса, концерн иштирокчилари концерннинг мажбуриятлари учун жавоб бермаганидек, концерн концерн иштирокчилари бўлган бирлашмалар, корхоналар ва ташкилотларнинг мажбуриятлари учун жавоб бермайди.

6. Концерн ўз таркибига қирувчи бирлашмалар, корхоналар, ташкилотларнинг ҳудудий жойлашувидан қатъи назар, ўз ваколатига тегишли бўлган масалалар бўйича фаолиятини ягона ишлаб чиқариш — хўжалик ва илмий комплекс сифатида амалга оширади.

7. «Ўздонмаҳсулот» концерни таркибига қуйидагилар киради:

дон маҳсулотлари ҳудудий ишлаб чиқариш бирлашмалари;

лойиҳа-саноат-қурилиш бирлашмалари;

«Тошкентдонсаноат» ишлаб чиқариш бирлашмаси;

Тошкент булка-қандолатчилик комбинати;

ишлаб чиқариш-технология комплектлаш бирлашмаси;

республика ахборот-ҳисоблаш ва жорий этиш маркази;

дон маҳсулотларини ҳимоя қилиш бўйича республика экспедицияси;

Қўқон ижарачи нон комбинати;

омихта озуқа саноати бўйича республика назорат-ишлаб чиқариш лабораторияси;

дон маҳсулотлари бўйича республика назорат-ишлаб чиқариш лабораторияси;

Тошкент технология техникуми;

раҳбарлар, мутахассислар ва ишчи кадрларнинг малакасини ошириш курслари.

Идоравий бўйсуниши ва мулкчилик шаклидан қатъи назар, иқтисодий манфаатларининг умумийлиги асосида бошқа корхоналар, ташкилотлар ҳам ихтиёрий равишда концерн таркибига киришлари мумкин.

8. Концерннинг манзилгоҳи: Тошкент-60, Лоҳутий кўчаси, 36.

9. Концерн республика халқ хўжалиги ва аҳолисини дон, ун, нон, нон-булка, макарон ва қандолатчилик маҳсулотлари ҳамда омихта озуқа билан таъминлайди.

10. Қуйидагилар концерннинг асосий вазифалари ҳисобланади:

дон қабул қилиш ва донни қайта ишлаш корхоналари билан колхозлар, совхозлар ва бошқа қишлоқ хўжалиги корхоналари, фермер хўжаликлари ўртасида тузилган шартномалар бўйича, давлат буюртмаларига мувофиқ, шунингдек аҳолидан дон, мойли уруғлар, дон ва мойли ўсимликларнинг навдор ва дурагай уруғларини, ўт уруғларини, пичан ва ўт унини харид қилиш;

дон ресурсларини, шу жумладан, давлат ва сафарбарлик ресурсларини, шунингдек, концерн Устави билан белгиланган вазифаларни бажариш учун зарур бўлган молиявий ва бошқа резервларни марказлаштирилган жамғариш, оқилона ҳудудий жойлаштириш ва сақлаш;

тузилган шартномалар ва савдо ташкилотларининг талабномалари бўйича ун, ёрма, нон, нон-булка, макарон ва қандолатчилик маҳсулотлари, омихта озуқа етиштириш ва етказиб бериш давлат буюртмаси топшириқларини бажариш, ўз дўконлари бўлган кичик новвойхоналар тармоғини ривожлантириш;

дон, ун, ёрма, нон-булка, макарон ва қандолатчилик маҳсулотлари ва омихта озуқа сифатини мунтазам текшириш;

ягона илмий-техника ва технология сиёсатини олиб бориш, ички ва ташқи бозор конъюнктурасини ўрганиш, ташқи иқтисодий фаолиятни амалга ошириш;

давлат ташкилотлари ва бошқа ташкилотларда, шу жумладан хорижий ва халқаро ташкилотларда концерн ва унинг муассисларининг манфаатларини ифодалаш;

ишлаб чиқаришни барча чоралар билан интенсивлаштириш, фан-техника тараққиётини жадаллаштириш, ишлаб турган корхоналарни техника билан қайта жиҳозлаш, моддий ресурслардан тежамкорлик билан фойдаланиш, ишлаб чиқарилаётган маҳсулотларнинг сифатини ошириш чора-тадбирларини ишлаб чиқиш;

мавжуд ишлаб чиқариш имкониятлари: асосий фондлар, меҳнат, моддий ва молиявий ресурслардан самарали фойдаланишга кўмаклашиш, элеватор, тегирмон, ёрма, нон пишириш, макарон, қандолатчилик ва омихта озуқа саноатини жадал ривожлантириш, ишлаб чиқариш ривожланишининг юксак суръатларини ва меҳнат унумдорлигининг ўсишини таъминлаш;

инвестициялардан оқилона фойдаланиш ва уларнинг самарадорлигини оширишга, қурилиш қийматини камайтириш ва муддатини қисқартиришга, ишлаб чиқариш қувватлари ва асосий фондларини ўз вақтида ишга тушириш ва белгиланган муддатларда ўзлаштиришга кўмаклашиш;

буюртмачи функциясини амалга ошириш ва дон маҳсулотлари тармоқлари учун бажариладиган илмий-тадқиқот ва тажриба-конструкторлик ишларини маблағ билан таъминлаш;

тармоқнинг фавқулодда шароитларда барқарор ишлашини ташкил этиш;

амалдаги меъёрий ҳужжатлар асосида ҳарбий-сафарбарлик ишлари ва фуқаро мудофаасини ташкил этиш ва ўтказиш чора-тадбирларини таъминлаш;

дон маҳсулотлари тармоқларининг истиқболдаги ривожланишини ва ишлаб чиқариш кучларини оқилона жойлаштиришни олдиндан белгилаш;

давлат мулкини хусусийлаштиришга кўмаклашиш, акционерлик жамиятлари ташкил этиш;

дон, мойли уруғлар ва тайёр маҳсулотнинг илмий асосланган нархларини ишлаб чиқиш, кўриб чиқиш ва тасдиқлашда қатнашиш;

қўшма ва кичик корхоналар барпо этиш ишларини ташкил қилиш;

кадрлар сиёсатини ишлаб чиқиш ва рўёбга чиқариш, кадрлар резервларини шакллантириш, кадрлар тайёрлаш ва уларнинг малакасини оширишни ташкил этиш;

концерн таркибига қирувчи бирлашмалар, корхоналар ва ташкилотларда амалдаги қонунчиликнинг тўғри қўлланилишини ташкил этиш, шунингдек, концерн ичида бирлашмалар, корхоналар, ташкилотлар ўртасида, қишлоқ хўжалиги ва бошқа корхоналар ва ташкилотлар билан иқтисодий муносабатларни такомиллаштириш бўйича чора-тадбирларни амалга ошириш.

11. Асосий вазифаларига мувофиқ концерн қуйидагиларни таъминлайди:

меҳнат жамоаларининг иқтисодий ва ижтимоий ривожланиши, ишлаб чиқарилаётган маҳсулотларни сотишлари, ишларни бажариши ва хизмат кўрсатишлари учун энг қулай шароитлар яратиш ҳамда уларнинг фаолиятига амалий ёрдам бериш;

тадқиқотларни бажариш ва маҳсулотлар, хом ашё, техника ва технологиянинг янги турларини ишлаб чиқиш ҳамда уларнинг ишлаб чиқаришга жорий этилишини жадаллаштириш мақсадида ягона илмий-техника ва технология сиёсатини ўтказиш;

ўз маҳсулотларини ва концерн аъзоларининг маҳсулотларини сотиш бўйича экспорт-импорт аъмолларини бажариш;

бозор конъюнктурасини ўрганиш, савдони ривожлантириш, хорижий шериклар билан савдо-иқтисодий ва илмий-техникавий алоқаларни янада ривожлантириш ва такомиллаштириш, ўзининг ташқи иқтисодий хизматини ташкил этиш;

истеъмолчилар талабига чаққон жавоб бериш имконини берувчи ишлаб чиқариш-хўжалик тузилмаларини шакллантириш;

оқилона ихтисослаштириш ва кооперативлаштириш, ўзаро фойдали тўғридан-тўғри алоқалар ўрнатиш;

концерн бирлашмалари, корхоналари ва ташкилотларини давлат буюртмаларида назарда тутилган хом ашё, моддий-техника ва товар ресурслар билан барқарор таъминлаш, таъминотнинг прогрессив ташкилий ва тижорат шаклларини қўллаш;

ишлаб турган корхоналар ва ташкилотларнинг ишлаб чиқариш базасини ривожлантириш, кенгайтириш, реконструкциялаш ва техника билан қайта жиҳозлаш учун концерн инвестиция сиёсатини амалга оширишга кўмаклашиш;

хўжалик ҳисоби муносабатларини ҳамда бирлашмалар, корхоналар ва ташкилотларнинг ўзини ўзи маблағ билан таъминлашини ривожлантириш;

бошқарув тизимини такомиллаштириш ишларини амалга ошириш, хўжалик механизмининг янги шаклларини жорий этиш, ишлаб чиқариш, илмий ва бошқа ташкилотларнинг ўзаро ҳамкорлиги ва интеграцияси самарадорлигини ошириш;

истиқболда ўзининг банк кредит-ҳисоб-китоб хизматини ташкил этиш ҳамда концерн ва унинг таркибига қирувчи бирлашмалар, корхоналар, ташкилотлар ва муассасаларнинг барқарор иқтисодий ҳолатини таъминлашга қаратилган ягона тижорат ва молия сиёсатини ўтказиш;

мутахассислар тайёрлаш ва уларнинг малакасини оширишни ташкил этиш бўйича фаол кадрлар сиёсатини юргизиш;

концерн бирлашмалари, корхоналари ва ташкилотларини машиналар, асбоб-ускуналар ва бошқа моддий-техника воситалари билан таъминлашда воситачилик функцияларини амалга ошириш;

республика дон маҳсулотлари тармоғида қонунчиликнинг қўлланилиши амалиётини умумлаштириш ва такомиллаштириш юзасидан таклифлар ишлаб чиқиш;

концерн таркибига кирувчи бирлашмалар, корхоналар, муассасалар ва ташкилотларда ҳуқуқий ишларни яхшилаш.

12. Концерн қуйидаги ҳуқуқларга эгадир:

ўз таркибига кирувчи иштирокчи корхоналарнинг манфаатларини давлат органларида, судда ва ҳакамлик суди органларида, шунингдек, халқаро ташкилотлар ва бирлашмаларда ҳимоя қилиш;

давлат мулкига эгалик қилиш ва уни бошқариш билан боғлиқ масалаларда давлат манфаатларини ҳимоя қилиш;

белгиланган тартибда концерн филиаллари ва ваколатхоналари, шунингдек хорижий шериклар билан қўшма корхоналар, фирмалар, бирлашмалар ташкил этиш. Ташқи иқтисодий битимлар (шартномалар) тузиш ва улардан фойдаланиш бўйича хизмат кўрсатиш учун хорижий фирмаларни жалб этиш.

Филиаллар ва ваколатхоналарга концерн мол-мулки ҳисобидан асосий ва айланма маблағлар берилади ҳамда улар концерн томонидан тасдиқланган низомлар асосида фаолият кўрсатадилар;

концерн ходимларини белгиланган тартибда чет элга хизмат сафарига юбориш;

концерн Кенгашининг қарорига кўра умуман концерн ва унинг алоҳида иштирокчилари манфаатлари йўлида фойдаланиш учун марказлаштирилган мақсадли жамғармалар, молиявий маблағлар резервлари, шу жумладан валюта маблағлари резервлари ташкил этиш;

ўз маблағларини қўшма ва кичик корхоналар ташкил этилишига сарфлаш ҳамда фойда (даромад)нинг тегишли улушини, дивидендлар ёки ижтимоий неъматлар олган ҳолда бошқа тадбирларни амалга ошириш;

иштирокчиларнинг биргаликдаги фаолиятини мувофиқлаштириш;

иштирокчиларнинг розилиги билан айрим функцияларнинг бажарилишини ва ҳуқуқларнинг амалга оширилишини таъминлаш;

таркибига кирувчи бирлашмалар, корхоналар ва ташкилотлар томонидан ишониб топширилган мол-мулкдан самарали фойдаланишни таъминлаш;

белгиланган тартибда акциялар ва бошқа қимматдор қоғозлар чиқариш, улар билан қонунчиликда йўл қўйилган аъмоллар ўтказиш;

ўз номидан шартномалар тузиш, судда, ҳакамлик ва ҳакамлар судида даъвогар ва жавобгар бўлиш;

мақсадли дастурларни маблағ билан таъминлаш учун ташқи бозорда реализация қилинган товарлар ва хизматлардан бирлашмалар, корхоналар ва ташкилотлар олган валюта тушуми ҳисобидан белгиланган тартибда валюта жамғармаси ташкил этиш;

сотишнинг бозор талабларини ҳисобга олган ҳолда концерн нон ёпиш тармоқлари корхоналари маҳсулотлар учун норматив-техника ҳужжатларини белгиланган тартибда ишлаб чиқиш ва тасдиқлаш;

концерн таркибига кирувчи бирлашмалар, корхоналар, ташкилотлар ва муассасалардан концерн зиммасига юклатилган вазифалар ва функцияларни бажариш учун зарур бўлган ахборот ва маълумотларни талаб қилиб олиш;

зарур бўлган ҳолларда республиканинг бошқа вазирликлари, идоралари, давлат қўмиталари ва концернлари билан биргаликда қўшма йўриқномалар ва кўрсатмалар чиқариш.

«Ўздонмаҳсулот» концернининг ўз ваколатига қирувчи давлат дон ресурсларининг сифати, уларнинг ҳаракати ва улардан фойдаланиш масалалари бўйича йўриқнома ва кўрсатмалари идоравий бўйсунишларидан қатъи назар, барча ташкилотлар учун мажбурий ҳисобланади.

13. Юридик шахс ҳуқуқидан фойдаланувчи, Ўзбекистон Республикаси қонунларига амал қилувчи, концерн Уставини эътироф этувчи ва концерннинг мақсад ва вазифаларига мувофиқ ишлаб чиқариш-хўжалик ва бошқа фаолиятни амалга ошириш юзасидан ўз зиммасига мажбурият қабул қилган, 1992 йил 1 январдаги рўйхатдаги таркиб бўйича бир ишловчи ҳисобига 50 сўм миқдорида кириш бадали тўлаган мулкчиликнинг ҳар қандай шаклидаги бирлашмалар, корхоналар ва ташкилотлар иқтисодий манфаатларининг умумийлиги асосида концерн иштирокчилари бўлишлари мумкин.

14. Концерн иштирокчилари қуйидаги ҳуқуқларга эгадир:

концерн, унинг хўжалик бўлинмалари томонидан кўрсатиладиган хизматлар ва бериладиган ахборотдан, уларнинг бухгалтерия учёти маълумотларидан, ҳисобот ва бошқа ҳужжатларидан, шунингдек, концерннинг бошқа иштирокчилари маҳсулотлари, ишлари ва хизматларидан биринчи навбатда фойдаланиш;

концерн ва унинг иштирокчилари фаолияти масалалари бўйича концерн раҳбар органларининг кўриб чиқиши учун таклифлар киритиш;

ўзининг молиявий аҳволини мустаҳкамлаш ва хўжалик фаолияти самарадорлигини ошириш учун концерндан Кенгаш қарорига кўра белгиланган тартибда молиявий ва бошқа ёрдам олиш;

концерн аппарати ходимининг ноқонуний фаолияти туфайли етказилган зарарнинг қопланишини белгиланган тартибда талаб қилиш;

фойда (даромад)нинг тегишли улуши, дивидендлар ёки ижтимоий неъматлар олган ҳолда ўз маблағларини концерн томонидан ўтказилаётган тадбирларга сарфлаш.

15. Концерн иштирокчилари қуйидагиларга мажбурдир:

таъсис шартномаси қоидаларига ва концерн Уставига риоя қилиш;

концерн раҳбар органларининг қарорларини бажариш;

концерннинг марказлаштирилган жамғармалари ва резервларини қўллаб-қувватлаш учун зарур бўлган бадаллар ва улушлари таъсис ҳужжатларида назарда тутилган тартибда, миқдорда ва усулда ўз вақтида ва тўла ҳажмда тўлаш;

тасдиқланган давлат статистика ахборотига мувофиқ ўз молия-хўжалик фаолияти ва молиявий аҳволи тўғрисида ахборот тақдим қилиш;

концерн ва унинг иштирокчилари учун тузилган шартномаларга мувофиқ маҳсулотлар, ишлар, хизматларни биринчи навбатда амалга ошириш;

солиқлар ва тўловлар тўғрисида республикада амал қилувчи қонунчиликка мувофиқ бюджет билан ҳисоб-китобларни амалга ошириш;

концерннинг тижорат сирига риоя қилиш.

Концерн иштирокчиларига унинг Кенгаши қарори билан қўшимча равишда бошқа ҳуқуқ ва мажбуриятлар берилиши мумкин.

16. Концерн бошқарувининг ташкилий тузилмасига қуйидагилар киради: концерн иштирокчилари вакилларининг конференцияси, концерн Кенгаши, раис бошчилик қиладиган концерн бошқаруви ва ижроия ишчи аппарат.

Конференция концерннинг юқори органи ҳисобланади.

Конференция қуйидагиларни амалга оширади:

концерн раисини, унинг ўринбосарларини, Кенгаш аъзоларини ва 7 нафардан иборат концерн бошқаруви аъзоларини 5 йил муддатга сайлаш;

концерн фаолиятининг асосий йўналишларини белгилаш;

концерн Уставини ўзгартириш;

тафтиш комиссиясини сайлаш;

Концерн конференцияси раис томонидан бир йилда камида бир марта чақирилади.

Конференция қарори очиқ ёки яширин овоз бериш йўли билан қабул қилинади, баённома билан расмийлаштирилади ва концерн раисининг буйруқлари, фармойишлари билан ҳаётга татбиқ этилади.

17. Бирлашмалар, корхоналар ва ташкилотлар (муассислар) вакиллари конференцияси томонидан сайланадиган концерн Кенгаши бошқарувнинг юқори органи ҳисобланади.

Концерн Кенгашининг мақоми ва иши Кенгаш тўғрисидаги низом билан тартибга солинади. Концерн Кенгашининг белгиланган тартибда қабул қилинган қарори концерн таркибига кирувчи бирлашмалар, корхоналар ва ташкилотлар учун мажбурий ҳисобланади.

18. Концерн Кенгаши:

концерн ишлаб чиқариш-хўжалик, илмий-техника ва ижтимоий ривожланиши стратегиясини белгилайди, хўжалик фаолиятининг, фан-техника тараққиётини жадаллаштиришнинг, бошқарув тузилмасини такомиллаштиришнинг, меҳнат жамоаларини ижтимоий ривожлантиришнинг, республика аҳолисининг дон маҳсулотларига, чорвачиликнинг омихта озуқага бўлган эҳтиёжини қондиришнинг муҳим масалаларини ҳал этади;

концерн бошқаруви ишчи аппаратининг ходимлари сони ва тузилмасини ҳамда уни сақлаш харажатларини белгилайди;

концерн аъзоларининг таклифлари асосида концерн иқтисодий ривожланишининг истиқбол режалари концепцияси ва прогнозларини тасдиқлайди;

бошқарув томонидан қонун чиқарувчи органларга киритиладиган муҳим меъёрий ҳужжатларнинг лойиҳаларини кўриб чиқади;

корхоналар ва ташкилотлар учун давлат буюртмалари Низомга мувофиқлигини белгилайди;

концерн таркибига кирувчи бирлашмалар, корхоналар ва ташкилотлар ўртасидаги хўжалик низоларини кўриб чиқиш учун ҳакамлар судини тасдиқлайди;

концерн бошқарувининг молия-хўжалик фаолиятини назорат қилишни амалга ошириш учун беш йил муддатга тафтиш комиссиясини сайлайди;

концерн таркибига янги аъзолар қабул қилиш ва унинг таркибидан чиқиш масалаларини ҳал этади;

концерннинг инвестиция сиёсатини тасдиқлайди;

концерннинг, унинг бошқарувининг, шунингдек, бирлашмалар, корхоналар ва ташкилотларнинг асосий вазифалари ва функциялари бажарилишини кўриб чиқади ва баҳо беради;

концерн молия-хўжалик фаолияти тўғрисидаги йиллик ҳисоботни тасдиқлайди;

зарар кўриб ва самарасиз ишлаётган айрим бирлашмалар, корхоналар ва ташкилотларнинг фаолиятини тўхтатиш тўғрисидаги масалаларни белгиланган тартибда ҳал этади.

19. Концерн Кенгашининг мажлислари бир йилда камида икки марта ўтказилади.

Концерн Кенгашининг қарори очиқ ёки яширин овоз бериш йўли билан қабул қилинади. Кенгашнинг ҳар бир аъзоси битта ҳал қилувчи (муассислар) ва маслаҳат овози ҳуқуқидан фойдаланади. Кенгаш мажлисида Кенгаш аъзоларининг камида учдан икки қисми қатнашиши шарт.

Концерн Кенгаши томонидан қабул қилинадиган ечим қарор билан расмийлаштирилади ва уни концерн Кенгаши раиси имзолайди.

20. Концерн Кенгаши қарорларини ҳаётга татбиқ этиш учун концерн бошқаруви ва унинг ишчи аппарати ташкил этилади. Концерн бошқаруви ва ишчи аппарати келишилган нормативлар бўйича бирлашмалар, корхоналар ва ташкилотлар фойдасидан ажратмалар, шунингдек, ўзининг тижорат фаолиятидан олинадиган маблағлар ҳисобидан сақланади.

21. Концерн бошқаруви:

илмий-техника, иқтисодий ривожланиш ва ташқи иқтисодий фаолият соҳасида биргаликдаги фаолият йўналишлари ва шаклларини ишлаб чиқади;

тармоқ давлат буюртмасини жойлаштиришни ташкил этади;

Кенгашнинг розилиги билан концерннинг марказлаштирилган жамғармалари ва резервларидан, шу жумладан валюта жамғармалари ва резервларидан фойдаланиш тўғрисида қарор қабул қилади;

концерн ишчи аппарати ходимлари меҳнатига ҳақ тўлаш ва мукофотлаш тартиби ва шартларини тасдиқлайди;

концерн зиммасига юклатилган вазифаларни бажариш учун давлат, меҳнат жамоалари ва концерн Кенгаши олдида тўла жавоб беради;

концерн Кенгашининг мажлислари ўртасидаги даврда концернни бошқаришни амалга оширади.

22. Бошқарув мажлислари ҳар ойда камида бир марта ўтказилади. Бошқарув концерн фаолиятининг ҳар қандай масалалари бўйича қарор қабул қилиш ҳуқуқига эга бўлади, конференция ва концерн Кенгаши ваколатига тегишли бўлган масалалар бундан мустаснодир.

Бошқарув қарори кўпчилик овоз билан қабул қилинади.

23. Концерн Раиси ва унинг ўринбосарлари конференция томонидан сайланади ҳамда Ўзбекистон Республикаси Президенти ҳузуридаги Вазирлар Маҳкамаси томонидан тасдиқланади.

Концерн раиси:

Кенгаш томонидан қабул қилинган қарорларнинг ижро этилишини ташкил этади, концерннинг биргаликдаги фаолиятини мувофиқлаштиради ва ўз фаолиятида Ўзбекистон Республикаси қонунларига, Ўзбекистон Республикаси Президентининг фармонларига, Вазирлар Маҳкамасининг қарорлар ва фармойишларига, директив органларнинг бошқа қарорларига амал қилади;

концерн Кенгаши ва унинг ижроия аппарати ишига бошчилик қилади, давлат буюртмасини жойлаштириш учун давлат бошқаруви органлари олдида жавоб беради;

объектларни меъёрий муддатларда ишга туширишга қаратилган концерн инвестиция сиёсатини амалга оширади;

ўз ваколатлари доирасида буйруқ ва фармойишлар чиқаради, Низом ва уставларни тасдиқлайди, молиявий ҳисобот ва бошқа ҳужжатларни тасдиқлайди, ишончномалар беради, шартномалар тузади, давлат бошқаруви органларида концерн манфаатларини ифодалайди, амалдаги қонунлар ва концерн Устави доирасида унинг мол-мулкини ва маблағларини бошқаради, битимлар тузади ва аъмолларни бажаради;

концерн иштирокчилари бўлган бирлашмалар, корхоналар, ташкилотлар ва муассасаларнинг хўжалик фаолияти учун иқтисодий шарт-шароитларнинг (инвестициялар, кредит бериш ва бошқаларни тартибга солиш) комплекс ҳал этилишини таъминлайди;

концерн Кенгаши билан биргаликда хўжалик ҳисобидаги фирмалар, акционерлик жамиятлари, тижорат банклари ва тижорат, ташқи савдо, молия, юридик ва бошқа хизматлар кўрсатиш бўйича бўлинмалар ташкил этади, шунингдек МДҲда ва хорижда концерн фирмалари, ваколатхоналарининг, қўшма корхоналарнинг, шу жумладан хорижий фирмалар билан биргаликда, муассиси бўлади.

прогрессив технологиялар, маҳсулотлар ва техниканинг янги турларини ишлаб чиқиш ва жорий этиш бўйича фан-техника сиёсатини амалга оширади;

белгиланган тартибда Ўзбекистон Республикаси Президенти ҳузуридаги Вазирлар Маҳкамасига концерн ваколатига кирувчи масалалар бўйича қонунчилик ва бошқа меъёрий ҳужжатларнинг лойиҳаларини киритади;

ўзига берилган ваколатларга мувофиқ концерн бирлашмалари, корхоналари, ташкилотлари ва муассасалари томонидан амалдаги қонунчиликка, республика ҳукуматининг ва концерн Кенгашининг қарорларига зид равишда чиқарилган буйруқлар, йўриқномаларни бекор қилади;

концернга кирган давлат бирлашмалари, корхоналари, ташкилотлари ва муассасаларининг раҳбарларини концерн бошқарувининг тақдимномаси бўйича ишга тайинлайди ва ишдан бўшатади;

концерн ишчи аппаратининг штатларини, шунингдек, унинг таркибий бўлинмалари тўғрисидаги Низомни тасдиқлайди, аппарат ходимларини ишга тайинлайди ва ишдан бўшатади, лавозим маошлари ва уларга устамаларни белгилайди, аппарат ходимлари таътилининг қанча давом этишини белгилайди, рағбатлантириш чора-тадбирларини кўради ва интизомий жазо беради. Концерн раиси ўринбосарларининг ва аппарат таркибий бўлинмалари раҳбарларининг хизмат вазифалари доирасини белгилайди;

концерн ваколатига кирувчи айрим масалаларнинг ҳал этилишини ишчи аппарат бўлинмаларига, шунингдек, концерн бирлашмалари, корхоналари ва ташкилотларига топширади;

концерн бошқаруви органларининг қарорлари лойиҳаларини тайёрлаш билан боғлиқ аналитик, мувофиқлаштирувчи ва режали ишларни юритади;

Кенгаш, конференция ва Ўзбекистон Республикаси Президенти ҳузуридаги Вазирлар Маҳкамаси олдида концерн зиммасига юклатилган вазифаларни бажариш учун тўла жавоб беради. Раиснинг ваколатига кирувчи масалалар доираси бўйича улар олдида вақт-вақти билан ҳисоб беради.

24. Концерннинг мол-мулки унинг устав фондини ташкил этувчи асосий фондлар ва айланма маблағлардан, шунингдек, концерн иштирокчилари томонидан унга улуш, бадал кўринишида берилган мол-мулкдан, концерн иштирокчилари томонидан хўжалик фаолияти натижасида етиштирилган маҳсулотлардан ва олинган даромадлардан, концерн томонидан бошқа асослар бўйича олинган ҳамда қонунчиликка зид бўлмаган бошқа мол-мулкдан иборат бўлади.

25. Концернга биркитилган мол-мулк унинг мустақил балансида ҳисобга олинади.

26. Концерн ҳар бир иштирокчисининг улушлари ва бадаллари миқдори, уларнинг таркиби, бериш муддатлари ва тартиби таъсис шартномаси ёки бошқа шартномалар, концерн Кенгашининг қарори билан белгиланади.

27. Концерн иштирокчиларининг мол-мулки таркибига пул маблағлари, шу жумладан, ватан ва хорижий валютада ҳам, бинолар, асбоб-ускуналар, транспорт воситалари, хом ашё, материаллар, бошқа моддий ресурслар ва қимматдор қоғозлар кириши мумкин.

Қўшиладиган мол-мулкнинг қиймати концерн иштирокчилари комиссиясининг қўшма қарори билан белгиланади.

Мол-мулкни баҳолаш бўйича харажатларни уни улуш сифатида таклиф қилаётган концерн аъзоси тўлайди.

Ҳар қандай улуш сўмларда баҳоланади ва устав фондида иштирокчининг улушини ташкил этади.

Мол-мулк концерн иштирокчиларига фақат фойдаланиш учун берилган ҳолларда иштирокчиларнинг бадали ва тегишли улуши миқдори шартномада кўрсатилган мол-мулкдан фойдаланишнинг бутун даври учун ҳисоблаб чиқилган бу мол-мулкдан фойдаланганлик учун тўланадиган ижара ҳақидан келиб чиқиб белгиланади.

28. Марказлаштирилган фондлар ва концерннинг резервлари концерн иштирокчиларининг даромадлари ҳисобидан ҳосил бўлади, уларнинг миқдори ва уларни бериш тартиби концерн Кенгаши томонидан белгиланади.

29. Концерн томонидан янгидан ташкил этиладиган фирмалар ва корхоналарнинг устав фондлари қуйидагилар ҳисобидан шаклланади:

акцияларни сотиш;

марказлаштирилган фондлар ва концерн резервлари;

амортизация ажратмалари, банкларнинг кредитлари сифатида ижарага топширилган давлат мулкидан концернга келиб тушувчи ижара ҳақи.

30. Акционерлик капитали ҳосил қилиш ва ундан фойдаланиш, чиқариладиган акцияларнинг тоифалари, уларнинг номинал қиймати, турли тоифалардаги акцияларнинг нисбати, концерн иштирокчилари томонидан сотиб олинадиган акциялар сони, уларни чиқариш муддатлари тўғрисидаги масалалар Ўзбекистон Республикаси қонунчилигига мувофиқ концерн Кенгаши томонидан белгиланади.

31. Концерн иштирокчилари ёзма ариза берилгандан олти ой кейин, лекин илгари қабул қилинган шартнома мажбуриятларини албатта бажариш шарти билан концерн таркибидан чиқиш ҳуқуқига эгадирлар.

32. Концерн фаолиятининг тўхтатилиши концерн иштирокчилари конференциясининг мажлисида иштирок этган аъзоларнинг учдан икки қисми овозидан иборат кўпчилик овоз бўйича концернни қайта ташкил этиш ёки тугатиш йўли билан, шунингдек, бошқа ҳолларда қонунчиликда назарда тутилган тартибда юз беради.

33. Концерн қайта ташкил этилганда концернга тегишли бўлган барча ҳуқуқ ва мажбуриятлар унинг ҳуқуқий ворисига ўтади.

34. Концерннинг тугатилиши тўғрисида қарор қабул қилган орган тугатиш комиссиясини тайинлайди.

35. Тугатиш комиссияси мавжуд мол-мулкни баҳолайди, тугатиш баланси тузади ва уни концерн конференциясига тақдим этади.

36. Концерннинг пул маблағлари, тугатиш пайтида сотилган мол-мулкдан тушган тушум ҳам шу жумлага киради, ишчи аппарат ходимлари билан ҳисоб-китоб қилингандан ва банклар, бюджет ва бошқа кредит берувчилар олдидаги мажбуриятлар бажарилгандан кейин тугатиш комиссияси томонидан конференция томонидан белгиланган тартибда концерн иштирокчилари ўртасида тақсимланади.

37. Концерн ўзининг мавжуд бўлишини Давлат рўйхатга олиш дафтаридан чиқарилган вақтдан бошлаб тўхтатади.

38. Қабул қилинган Уставга концернни ташкил этиш тўғрисидаги шартномага ва амалдаги қонунчиликка зид бўлмаган ўзгартиш ва қўшимчалар концерн аъзолари томонидан концерн Кенгашининг кўриб чиқиши ва тасдиқлаши учун тақдим этилиши мумкин.