Ўзбекистон Республикаси Вазирлар Маҳкамасининг «Угом-Чотқол давлат биосфера резерватини ташкил этиш тўғрисида» 2018 йил 16 майдаги 367-сон қарори ижросини таъминлаш юзасидан Вазирлар Маҳкамаси қарор қилади:

Қуйидагилар

Угом-Чотқол давлат биосфера резервати тўғрисидаги низом 1-иловага мувофиқ;

Угом-Чотқол давлат биосфера резерватининг чегараси ва унинг буфер зонаси тавсифи 2-иловага мувофиқ тасдиқлансин.

2. Белгилаб қўйилсинки:

биосфера резерватининг буфер зонаси қўриқхона участкасининг бутун периметри бўйича жойлашган;

биосфера резервати ҳудудига киритилмаган буфер зонаси ерлари ушбу ҳудудда жойлашган ер эгалари ва ердан фойдаланувчилар тасарруфида қолади;

буфер зонасида махсус қўриқлаш режими ўрнатилади.

3. Ўзбекистон Республикаси Фанлар академияси давлат биосфера резерватида:

илмий ва методик раҳбарлик қилишни ва илмий тадқиқотлар мувофиқлаштирилишини;

таназзулга учраган экотизимларни реабилитация қилишга, тупроқ ва сувни сақлаш, табиий ресурслардан барқарор фойдаланишни таъминлашга йўналтирилган фундаминтал, амалий ва фанлараро тадқиқотлар ўтказилишини;

ўсимлик ва ҳайвонот дунёси объектлари ҳисоби юритилишини, метеорологик ва гидрологик кузатишлар, экологик ва ижтимоий-иқтисодий тусдаги маълумотлар тўпланишини, атроф-муҳит ифлосланишга таъсир ўрганилишини;

биологик хилма-хилликни баҳолаш соҳасида усуллар ва ёндошувлар ишлаб чиқилишини, тест синовидан ўтказилишини ва мониторинг олиб борилишини, зарур чора-тадбирлар кўрилишини таъминласин.

4. Ўзбекистон Республикаси Ер ресурслари, геодезия, картография ва давлат кадастри давлат қўмитаси «Ўзбекистон темир йўллари» АЖ билан биргаликда кадастр ҳужжатларини ушбу қарорга мувофиқлаштирсин.

5. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари — «Ўзбекистон темир йўллари» АЖ раиси А.Ж. Раматов зиммасига юклансин.

1. Угом-Чотқол давлат биосфера резервати (кейинги ўринларда биосфера резервати деб аталади) табиатдан барқарор фойдаланиш, ижтимоий-иқтисодий ривожланиш, маданий ва табиий бойликларни муҳофаза қилиш мақсадида Тошкент вилоятининг тоғли ва тоғолди ҳудудларининг биологик хилма-хиллиги сақланишини таъминлашга мўлжалланган ер ва сув экология тизимларини ўз ичига олувчи қўриқланадиган табиий ҳудуд ҳисобланади.

2. Биосфера резерватининг расмий номи:

давлат тилида — Угом-Чотқол давлат биосфера резервати;

рус тилида — Угам-Чаткальский государственный биосферный резерват;

инглиз тилида — Ugam-Сhatkal State Biosphere Reserve.

3. Биосфера резерватининг ҳудуди доимий фойдаланиш учун биосфера резерватига ажратилган биосфера резервати ер участкалари чегараларида жойлашган.

4. Биосфера резерватининг «Бошқизилсой» қўриқхона ҳудуди ЮНЕСКОнинг Бутунжаҳон табиий мероси мақомига эга бўлган ва Бутунжаҳон биосфера резерватлари тармоғига киритилган қўриқхона зонаси ҳисобланади.

5. Биосферер резервати ҳудуди транспорт инфракструктураси қурилиши, турар жойлар ҳамда ишлаб чиқариш бинолари ва иншоотларини жойлаштириш режалари ва дастурларини, ер тузиш ва туманни режалаштириш схемаларини, шунингдек, табиий ресурсларни муҳофаза қилиш ва улардан фойдаланиш режаларини ишлаб чиқишда ҳисобга олинади.

6. Биосфера резервати ҳудудида зоналаштиришга мувофиқ табиий объектлар ва комплекслардан фойдаланиш ва уларни муҳофаза қилишнинг турли хил режими белгиланади.

Қўриқхона зонасига қўшни бўлган ер эгалари, ердан фойдаланувчилар ва ижарага олувчиларнинг сувдан фойдаланишини ташкил этиш учун биосфера ҳудуди ер участкаларида суғориш хоналари мавжуд бўлишини таъминлаш учун белгиланган тартибда сервитутлар белгиланади.

7. Биосфера резервати ўз фаолиятини табиатдан фойдаланувчилар, ердан фойдаланувчилар ва ер эгалари билан муносабатларни тартибга солувчи Ўзбекистон Республикасининг ер тўғрисидаги қонунларига ва бошқа норматив-ҳуқуқий ҳужжатларга, шунингдек, ушбу Низомга мувофиқ амалга оширади ва ўз ҳудудида жойлашган бошқа ердан фойдаланувчилар ва ижарага олувчилар, фуқароларнинг ўзини ўзи бошқариш органлари билан ўзаро ҳамкорлик қилади.

8. Биосфера резервати атроф табиий муҳитнинг глобал мониторингида иштирок этади.

9. Биосфера резервати тоғ ва тоғолди ўрмонлари ва ландшафтларини, тоғолди ва тоғ экотизимларининг ўсимлик ва ҳайвонот дунёси вакилларини, шу жумладан, тоғолди ва тоғ тизимларининг нодир ва йўқолиб бораётган ўсимлик ва ҳайвонот дунёси вакилларини, бошқа табиий объектларни ва биосфера резервати ҳудуди учун характерли бўлган мажмуаларни сақлаб қолиш ва тиклаш, экологик муҳитни яхшилаш, табиий ресурслардан барқарор фойдаланишни таъминлаш ва аҳолининг ижтимоий фаровонлиги, маданий ва табиий мерос объектларини сақлаш, табиий жараёнларни ўрганиш, туризм, таълим, ўқитиш, маърифат ва тарбиянинг ҳар хил турларини ривожлантиришга кўмаклашиш мақсадида ташкил этилган.

10. Қуйидагилар биосфера резерватининг вазифалари ҳисобланади:

минтақанинг табиий ва маданий меросини сақлаш;

биологик хилма-хилликни сақлаш ва тиклаш;

ландшафтларни муҳофаза қилиш ва тиклаш;

табиий ресурслардан экологик йўналтирилган барқарор фойдаланиш механизмларини яратиш;

фундаментал ва амалий илмий тадқиқотлар олиб бориш;

атроф табиий муҳит мониторингини олиб бориш, биосфера резервати ҳудудини ижтимоий-иқтисодий ривожлантириш;

биосфера резерватини бошқаришнинг турли соҳаларига маҳаллий аҳолини, нодавлат нотижорат ташкилотларни жалб этиш;

экологик маърифат ва таълим олиб бориш;

аҳолининг хабардорлиги ва экологик онги даражасини ошириш;

туризмнинг ҳар хил турларини ташкил этиш ва ривожлантириш.

11. Давлат биосфера резервати «Ўзбекистон темир йўллари» АЖ юритувидаги юридик шахс мақоми билан унитар корхона шаклида ташкил этилади.

12. Қуйидагилар кўрсатиб ўтилган вазифаларга мувофиқ биосфера резерватининг асосий функциялари ҳисобланади:

тоғ ва тоғолди ўрмонларининг биологик хилма-хиллигини, шу жумладан, ўсимлик ва ҳайвонларнинг нодир ва йўқолиб бораётган турларини сақлаб қолиш ва тиклаш ишларини ташкил этиш;

тоғ ва тоғолди экотизимларининг табиий ресурсларини муҳофаза қилиш, такрор кўпайтириш, тиклаш ва фойдаланиш режимларини таъминлашда ердан фойдаланувчилар ва ижарага олувчиларга кўмаклашиш;

биологик хилма-хилликни ривожлантириш бўйича намойиш қилинадиган лойиҳаларни амалга ошириш;

табиий ландшафт тузилмаларни муҳофаза қилиш, сақлаб қолиш ва экотизимлар, тоғ ва тоғолди ўрмонларининг биологик ва генетик хилма-хиллиги турлари яхлитлиги соҳасида илмий фаолиятни амалга ошириш;

атроф табиий муҳит, табиатдан фойдаланувчилар, нодавлат нотижорат ва илмий ташкилотларни жалб этган ҳолда биосфера ҳудудини ижтимоий-иқтисодий ривожлантириш мониторингини олиб бориш, туризм фаолиятининг ҳар хил турларини ташкил этиш ва ривожлантириш;

табиатдан фойдаланиш ва ҳудудни ижтимоий-иқтисодий ривожлантириш масалалари бўйича экологик аҳамиятли қарорларни қабул қилишга маҳаллий аҳолини жалб этиш механизмларини ишлаб чиқиш;

экологик маърифатни амалга ошириш, аҳолининг экологик таълимига ва экологик тарбиясига кўмаклашиш;

биосфера резервати фаолияти ва унинг биологик хилма-хилликни сақлаб қолиш ва барқарор ижтимоий-иқтисодий ривожлантириш бўйича тажрибаси тўғрисидаги ахборотни ёйиш;

қонунчиликка мувофиқ бошқа функцияларни амалга ошириш.

13. Биосфера резервати Ўзбекистон Республикаси Давлат герби тасвири туширилган ва ўз номи давлат тилида ёзилган муҳрга, шунингдек, банкларда ҳисоб рақамларига, шу жумладан, хорижий валютадаги ҳисоб рақамларига эга.

14. Биосфера резервати ўз рамзларига — байроқлар, вимпеллар, эмблемалар ва бошқаларга эга бўлиш ҳуқуқига эга.

Биосфера резервати ҳудудидаги табиий ва тарихий-маданий мажмуалар ва объектларнинг тасвиридан, шунингдек, бошқа ташкилотлар ва жисмоний шахслар билан унинг номлари ва рамзларидан фойдаланган ҳолда босма маҳсулотлар ва бошқа маҳсулотларни, халқ истеъмоли товарларини ишлаб чиқариш фақат биосфера резервати билан тузилган шартномалар асосида амалга оширилади.

15. Биосфера резерватини бошқариш «Ўзбекистон темир йўллари» АЖ томонидан амалга оширилади.

«Ўзбекистон темир йўллари» АЖ:

биосфера резерватини унинг вазифалари ва функцияларини амалга ошириш учун зарур бўлган мол-мулк билан таъминлайди;

даромадлар ва харажатлар сметаларини, шунингдек, биосфера резерватининг молия-хўжалик фаолияти тўғрисидаги ҳисоботни тасдиқлайди;

биосфера резервати томонидан кўрсатиладиган хизматлар рўйхатини ва уларнинг қийматини белгиланган тартибда тасдиқлайди;

биосфера резерватининг даромадлар ва харажатлар сметасини тасдиқлайди;

зарурат бўлганда штат жадвалига ходимларнинг белгиланган умумий сони доирасида белгиланган тартибда ўзгартиришлар киритади;

биосфера резерватининг рамзларини тасдиқлайди;

қонунчиликка ва ушбу Низомга мувофиқ бошқа ваколатларни амалга оширади.

16. Директор ва унинг ўринбосарлари биосфера резерватига бевосита раҳбарлик қилади, улар биосфера резервати фаолияти ташкил этилиши учун жавоб берадилар.

17. Биосфера резерватининг директори, директор ўринбосарлари «Ўзбекистон темир йўллари» АЖ раҳбарияти томонидан лавозимга тайинланадилар ва лавозимдан озод қилинадилар.

18. Биосфера резервати директори қонунчилик ва ушбу Низом асосида иш кўриб биосфера резерватига умумий раҳбарлик қилади.

Биосфера резервати директори:

биосфера резерватининг маблағлари ва мол-мулкини тасарруф этади;

биосфера резервати ходимлари билан меҳнат шартномалари тузади ва уларни тўхтатади;

хўжалик шартномалари тузади ва уларнинг бажарилишини ташкил этади;

биосфера резервати номидан банк муассасаларида молиявий операцияларни содир этади;

давлат органлари ва бошқа ташкилотларда биосфера резерватининг манфаатларини ифодалайди.

Биосфера резервати директори биосфера резерватининг қўриқхона ва бошқа зоналари режими таъминланиши, мол-мулк сақланиши, давлат статистикаси ва бошқа ҳисоботлар ўз вақтида тақдим этилиши, ҳисоботлар ва бошқа зарур ҳужжатлар ЮНЕСКОга ўз вақтида тақдим этилиши, молиявий, шартномавий ва меҳнат интизомига риоя этилиши учун жавоб беради.

19. Директорнинг фан ва экологик маърифат бўйича ўринбосари:

илмий-тадқиқот фаолияти ташкил этилиши ва олиб борилиши, атроф табиий муҳит мониторинги олиб борилиши;

биосфера резервати ҳудуди ижтимоий ва иқтисодий ривожлантириш ривожланиши;

барқарор ривожлантиришни режалаштириш ташкил этилиши;

биосфера резерватининг рекреацион ва туристик фаолияти таъминланиши;

экологик маърифат ва таълим ташкил этилиши ва амалга оширилиши учун жавоб беради.

20. Директорнинг қўриқлаш бўйича ўринбосари:

биосфера резервати қўриқланишини, шу жумладан, ёнғин хавфсизлигини ташкил этиш;

қурол-яроғ, ўқ-дорилар сақланиши таъминланиши, улар тўғри олиб юрилиши ва қўлланилиши, формали кийим-бош, алоқа воситалари, махсус аслаҳа-анжом ва асбоб-ускуналар ва бошқа техника сақланиши;

табиатни муҳофаза қилиш тўғрисидаги қонунчилик бузилиши ҳолатлари бўйича материаллар расмийлаштирилиши, кўриб чиқилиши ва зарурат бўлганда улар айбдор шахсларни жавобгарликка тортиш учун белгиланган тартибда суд-тергов органларига юборилиши;

биосфера резерватини муҳофаза қилиш ходимларига нисбатан маъмурий жавобгарлик чоралари тўғри қўлланилиши учун жавоб беради.

21. Биосфера резерватида:

биосфера резервати зоналарининг чегаралари ва ўлчамларини ўзгартириш;

биосфера резерватининг буфер ва ўтиш зоналари ҳудудида табиатан фойдаланишга ва бошқа фаолиятга чекловлар белгилаш ёки уларни олиб ташлаш;

биосфера резервати ҳудудига тегишли бўлган табиий ресурсларни муҳофаза қилиш ва улардан фойдаланиш бўйича режалар ва дастурлар, ер тузиш схемалари ва туманни режалаштириш лойиҳалари;

биосфера резервати фаолият кўрсатишининг бошқа масалалари бўйича тавсияларни кўриб чиқиш ва ишлаб чиқиш учун Мувофиқлаштирувчи кенгаш ташкил этилади.

Юқорида кўрсатиб ўтилган масалалар бўйича қарор Мувофиқлаштирувчи кенгашда кўриб чиқилганидан кейин қабул қилинади.

Мувофиқлаштирувчи кенгаш таркибига биосфера резервати, ҳудудида биосфера резервати жойлашган маҳаллий давлат ҳокимияти органлари, фуқароларнинг ўзини ўзи бошқариш органлари мутахассислари, шунингдек, илмий ташкилотлар ва нодавлат нотижорат ташкилотлари вакиллари киради.

Мувофиқлаштирувчи кенгашнинг шахсий таркиби, шунингдек, у тўғрисидаги Низом «Ўзбекистон темир йўллари» АЖ томонидан тасдиқланади.

22. Биосфера резервати тўғрисидаги асосий маълумотлар биосфера резерватининг паспортида мавжуд бўлади. Паспортга киритилган маълумотлар рўйхати ва уларни юритиш тартиби қонунчилик билан белгиланади.

23. Биосфера резерватини молиялаштириш бошқарув режалари асосида таъминланади. Бошқарув режаларининг мазмуни, уларни ишлаб чиқиш ва тасдиқлаш тартиби белгиланган тартибда белгиланади.

24. Биосфера резервати атроф табиий муҳит мониторингини олиб бориш ва муҳофаза қилинадиган табиий ҳудудлар давлат кадастрини юритиш учун зарур бўлган маълумотларни белгиланган тартибда Ўзбекистон Республикаси Экология ва атроф-муҳитни муҳофаза қилиш давлат қўмитаси органларига, шунингдек, атроф табиий муҳитнинг фон мониторинги маълумотларини — Ўзбекистон Республикаси Гидрометеорология хизмати марказига тақдим этади.

25. Биосфера резерватида қарорларни коллегиал қабул қилиш учун жамоатчилик асосида иш кўрадиган бошқа маслаҳат органлари ташкил этилиши мумкин.

26. Биосфера резервати зоналарини муҳофаза қилиш режимига риоя этилиши, атроф муҳит мониторинги олиб борилиши, табиий ва маданий мерос сақланиши, геологик хилма-хиллик тикланиши, биосфера резервати самарали бошқарилиши, табиий ресурслардан оқилона фойдаланилиши устидан давлат назорати Ўзбекистон Республикаси Экология ва атроф-муҳитни муҳофаза қилиш давлат қўмитаси томонидан амалга оширилади.

27. Биосфера резервати ҳудуди 42952,8 гектарни ташкил этади ва биосфера резерватига доимий фойдаланиш учун берилган ер участкаларида жойлашган.

Мақсадлар ва вазифаларни амалга ошириш учун биосфера резервати ҳудудида қўриқхона, буфер ва ўтиш зонаси ажратилади.

28. Қўриқхона зона 11018,0 гектарни ташкил этади ва алоҳида қўриқланадиган режимли зона ҳисобланади. Қўриқхона зона табиий объектлар ва мажмуаларни сақлаб қолиш, илмий тадқиқотлар ва мониторинг олиб бориш учун мўлжалланган.

Биосфера резерватининг қўриқхона зонаси ҳудудида қонунчиликка мувофиқ давлат қўриқхоналари режими ўрнатилади.

29. Буфер зона (қўриқхона зонаси периметри бўйлаб 1000 м.) 5197,6 гектарни ташкил этади, ундан 1183,6 га ер Оҳангарон, Бўстонлиқ ва Паркент туманлари ерлари, улар биосфера резервати ҳудудига кирмайди ва табиий объектлар ва мажмуаларни сақлаш, такрор кўпайтириш ва тиклаш учун мўлжалланган. Буфер зонада шундай режим ўрнатилганки, унга мувофиқ ерлар ўрмонни тиклаш, эрозияга қарши тоғ ёнбағирларини мустаҳкамлаш, ҳар хил ўсимликлар ва ҳайвонларни кўпайтириш бўйича питомниклар, ёввойи ҳайвонларни озиқлантириш учун озуқа далалари ташкил этиш, туристик фаолиятни ривожлантириш мақсадида фойдаланиш учун ёки ижарага берилиши мумкин.

30. Ўтиш зонаси 27920,8 гектарни ташкил этади ва табиий объектларга ва биосфера резервати мажмуаларига зарар етказмайдиган хўжалик фаолиятини ва бошқа фаолиятни амалга ошириш учун мўлжалланган. Ўтиш зонаси ерлари яйловларни мелиорациялаш, ўрмонларни тиклаш, доривор ва техник ўсимликлар етиштириш бўйича плантациялар ташкил этиш, молларни ўтлатиш, пичан ўриш, рекреацион ва туристик фаолиятни ривожлантириш учун фойдаланишга ёки ижарага берилиши мумкин.

31. Биосфера резервати ҳудуди ёки зоналари ўлчамлари ва чегараларини ўзгартириш белгиланган тартибда Ўзбекистон Республикаси Вазирлар Маҳкамаси томонидан амалга оширилади.

32. Қўриқхона зонада ҳар қандай хўжалик фаолияти ва бошқа фаолият тақиқланади, илмий тадқиқотлар, атроф табиий муҳит мониторинги бундан мустасно. Биосфера резервати ходимлари ҳисобланмаган шахсларнинг қўриқхонада бўлишига фақат биосфера резервати раҳбариятининг ёзма рухсати билан йўл қўйилади.

33. Буфер зонада:

ўрмонларни тиклаш, эрозияга қарши тоғ ёнбағирларини мустаҳкамлаш, белгиланган тартибда пичан ўриш учун фойдаланишга ёки ижарага беришга;

ҳар хил ўсимликлар ва ҳайвонларни кўпайтириш, ёввойи ҳайвонларни озиқлантириш учун озуқа далалари бўйича питомниклар ва вольерлар ташкил этишга;

рекреацион ва туристик фаолиятни ривожлантиришга, шу жумладан, минерал сувлар ва доривор ресурслардан фойдаланишга;

туристик фаолиятни ривожлантириш учун енгиллаштирилган типдаги бинолар ва иншоотлар қуришга;

биосфера резервати ходимлари учун қонунчиликда белгиланган тартибда хизмат бинолари ва турар жой бинолари қуришга, мутахассисларни тайёрлаш ва қайта тайёрлашга;

белгиланган тартибда доривор ва озуқабоп ўсимликларни йиғишга;

атроф табиий муҳит мониторингини олиб боришга ва экотизимлар ўзгариши устидан назорат қилишга;

илмий тадқиқотлар олиб боришга, мутахассисларни ўқитиш ва тайёрлашга;

биологик хилма-хиллик объектларини тиклаш ва муҳофаза қилиш бўйича фаолиятга;

ўрмонларни муҳофаза қилишга, тиклашга ва муҳофаза қилишга йўналтирилган ўрмон хўжалиги фаолиятини амалга оширишга, асалари уяларини ўрнатишга;

санитария жиҳатидан кесишга, парвариш қилиш учун кесишга, шох-шаббалар ва қуриб қолган дарахтларни йиғишга;

экологик маърифатни амалга оширишга, намойиш қилувчи участкаларни, янги технологиялар марказларини ташкил этишга ва табиатдан фойдаланишни бошқариш бўйича таълим берувчи дастурларни амалга оширишга;

ёнғинга қарши тадбирларни амалга оширишга;

ветеринария ва санитария профилактика тадбирларини ўтказишга рухсат берилади.

34. Ўтиш зонасида муҳофаза қилинадиган объектлар ва мажмуаларга зарар етказмайдиган ишлаб чиқариш фаолиятининг ҳар хил турларига йўл қўйилади. Ўтиш зонасида қишлоқ хўжалиги ва бошқа ишлаб чиқариш объектлари, шунингдек, экологик йўналтирилган технологияларни пухта ишлаш (шу жумладан, чекланган ов қилиш ва балиқчилик) учун тажриба участкалари, шунингдек, буфер зонада рухсат берилган фаолиятнинг барча турлари жойлаштирилади.

35. Биосфера резерватининг илмий-тадқиқот фаолияти табиий жараёнлар ва ҳодисаларни асосли ўрганишга, шунингдек, ҳудудни ижтимоий-иқтисодий ривожлантиришга йўналтирилган.

36. Биосфера резервати ҳудудида атроф табиий муҳитнинг доимий мониторинги, шунингдек, иқтисодий ва ижтимоий параметрлар мониторинги олиб борилади. Мониторинг натижаларидан биосфера резерватини бошқариш режаларини тузиш, унинг ҳудудини ижтимоий-иқтисодий ривожлантириш прогнозлари, биосфера резерватлари халқаро тармоғида глобал мониторинг олиб бориш учун фойдаланилади.

37. Қуйидагилар илмий тадқиқотлар ва мониторинг олиб боришнинг вазифалари ҳисобланади:

фундаментал ва амалий тадқиқотлар, шу жумладан, локал муаммоларни ҳал этишга йўналтирилган фундаментал ва амалий тадқиқотлар, ижтимоий ва табиий фанларини бирлаштирувчи фанлараро тадқиқотлар, шунингдек, таназзулга учраган экотизимларни реабилитация қилишга, тупроқ ва сувни сақлашга, табиий ресурслардан барқарор фойдаланишга йўналтирилган тадқиқотлар олиб бориш;

ўсимлик ва ҳайвонот дунёси объектлари ҳисобини юритиш, метеорологик ва гидрологик кузатишлар, экологик ва ижтимоий-иқтисодий тусдаги маълумотларни тўплаш, ифлослантирувчи моддаларнинг атроф табиий муҳит ва инсонга таъсирини ўрганиш;

биологик хилма-хилликни баҳолаш ва мониторинг олиб бориш соҳасида усуллар ва ёндашувларни ишлаб чиқиш ва тест синовидан ўтказиш;

илмий тадқиқотлар ва мониторинг натижаларидан оқилона фойдаланиш мақсадида маълумотларни бошқаришнинг функционал тизимини яратиш;

инсон фаолиятининг табиий экотизимлар ва мажмуаларга зарарли таъсирини камайтиришнинг энг янги технологияларини жорий этиш.

38. Илмий фаолият ва мониторинг олиб боришга илмий муассасалар, шу жумладан, хорижий мамлакатларнинг илмий муассасалари, шунингдек, алоҳида олимлар жалб этилади. Илмий муассасалар ва алоҳида олимлар биосфера резервати раҳбарияти билан келишув бўйича ўз дастурлари бўйича илмий фаолиятни амалга оширишлари мумкин.

39. Биосфера резерватининг Ўзбекистон Республикаси Давлат бюджети ҳамда Экология ва атроф муҳитни муҳофаза қилиш ва чиқиндилар билан боғлиқ ишларни амалга ошириш жамғармаси маблағлари ҳисобига олинган илмий-тадқиқот фаолияти натижалари биосфера резерватининг мулки ҳисобланади. Юридик ва жисмоний шахсларнинг маблағлари ҳисобидан олинган илмий-тадқиқот фаолияти натижаларига мулк ҳуқуқи биосфера резервати билан кўрсатиб ўтилган шахслар ўртасида тузилган шартномалар билан белгиланади. Биосфера резервати илмий-тадқиқот фаолиятининг барча натижаларидан бепул фойдаланади.

40. Илмий-тадқиқот ишларини олиб бориш учун биосфера резервати ўз ҳудудида илмий фондлар омборларига, дала базалари ва кордонларга эга бўлиши керак. Биосфера резерватининг илмий фондлари муддатсиз сақланиши керак.

41. Биосфера резерватида методик раҳбарлик қилиш ва илмий тадқиқотларни мувофиқлаштириш Ўзбекистон Республикаси Фанлар академияси томонидан амалга оширилади.

42. Биосфера резерватида Илмий кенгаш ташкил этилади. Илмий кенгаш тўғрисидаги низом ва унинг шахсий таркиби Ўзбекистон Республикаси Фанлар академиясининг тақдимномаси бўйича биосфера резервати раҳбарияти томонидан тасдиқланади.

43. Биосфера резервати ўзининг илмий асарлари эълон қилинишини таъминлайди ва ўзининг босма нашрларига эга бўлиши мумкин.

44. Биосфера резервати жамоатчиликни хабардор қилишни ва биосфера резерватига нисбатан қарорлар қабул қилишда унинг иштирокини таъминлайди.

Биосфера резерватини бошқаришга аҳолини жалб этиш мақсадида фуқароларнинг ўзини ўзи бошқариш органлари, нодавлат нотижорат ташкилотлар вакилларидан, шунингдек, фуқаролардан «Ўзбекистон темир йўллари» АЖнинг қарори билан Мувофиқлаштирувчи кенгаш ташкил этилади. Мувофиқлаштирувчи кенгашнинг биосфера резервати ҳудудида яшайдиган аҳолининг манфаатларига дахл қиладиган тавсиялари биосфера резервати раҳбарияти томонидан қабул қилиниши мумкин.

45. Биосфера резерватида жамоатчиликни хабардор қилиш учун ахборот марказлари ташкил этилади. Ахборот марказларида аҳолининг экологик маърифати ва таълими бўйича тадбирлар ўтказилади, Ушбу марказларда биосфера резервати, унинг табиий тавсифлари, зоналаштириш тўғрисидаги умумий ахборот сақланади.

Ахборот марказларидаги иш биосфера резервати ходимлари ҳамда нодавлат нотижорат ташкилотлар томонидан амалга оширилади.

46. Биосфера резерватини қўриқлаш биосфера резерватини қўриқлаш ходимлари томонидан амалга оширилади, улар:

резерват ҳудудидаги шахсларнинг ҳужжатларини текшириш;

шахсан кўздан кечириш, ашёлар ва транспорт воситаларини кўздан кечириш;

маъмурий ҳуқуқбузарлик тўғрисида баённомалар тузиш, фуқароларни, транспорт ва механик воситаларни маъмурий ушлаш, ашёлар, ҳужжатлар, ҳуқуқбузарликларни содир этиш қуролларини, шунингдек, қоидабузарлик ҳолатлари аниқланганда табиатдан ноқонуний фойдаланиш маҳсулотларини олиб қўйиш, маъмурий жазо чораларини қўллаш, табиий объектларга (ўсимлик ва ҳайвонот дунёси объектларига), экотизимлар ва ландшафтларга етказилган зарарни қоплаш бўйича даъво талаблари тақдим этиш;

материалларни айбдорларни жавобгарликка тортиш учун тегишли органларга юбориш;

биосфера резервати режими бузилган ҳолда амалга ошириладиган табиатдан фойдаланиш, хўжалик фаолияти ва бошқа фаолият тўғрисида тегишли инстанцияларга хабар бериш;

қонунчиликка мувофиқ бошқа ваколатларни амалга ошириш ҳуқуқига эга.

47. Биосфера резерватини қўриқлаш ходимларига хизмат вазифаларини адо этишда хизмат қуролини белгиланган тартибда тақиб юришга рухсат берилади. Биосфера резерватини қўриқлаш ходимлари ўз хизмат вазифаларини адо этишда белгиланган тартибда хизмат қуролидан ва махсус воситалардан (кишанлар, резина таёқлар, кўздан ёш оқизувчи газ, транспорт воситаларини мажбурий тўхтатиш қурилмалари) қўллаш, шунингдек, хизмат итларидан фойдаланишга рухсат берилади.

Хизмат қуролини ва махсус воситаларни сотиб олиш, сақлаш, тақиб юриш ва қўллашга рухсатнома олиш белгиланган тартибда амалга оширилади.

48. Биосфера резерватини қўриқлаш ходимлари экология ва атроф-муҳитни муҳофаза қилиш бўйича органлар давлат инспекторларининг барча ҳуқуқлари ва имтиёзларидан фойдаланадилар.

Директор ва директорнинг қўриқлаш бўйича ўринбосари катта давлат инспекторларига, қўриқлаш ходимлари эса — экология ва атроф муҳит муҳофазаси бўйича давлат инспекторларига тенглаштирилади.

49. Биосфера резерватини қўриқлаш ходимлари Ўзбекистон Республикаси Президентининг «Ўзбекистон Республикаси вазирликлари, идоралари ва ташкилотларининг формали кийим-бошини ишлаб чиқиш, стандартлаштириш, тасдиқлаш ва тайёрлаш механизмларини тартибга солиш чора-тадбирлари тўғрисида» 2017 йил 27 февралдаги ПҚ-2800-сон қарорига мувофиқ махсус формали кийим-бош билан таъминланадилар.

Биосфера резерватини қўриқлаш ходимлари ҳуқуқбузарликларнинг олдини олиш ва уларга қарши курашиш учун қонунчиликда белгиланган тартибда ҳуқуқни муҳофаза қилиш органлари билан ўзаро ҳамкорликда тадбирлар ўтказадилар.

50. Биосфера резервати ҳудудини қўриқлашга экологик ва атроф муҳит музофазаси бўйича жамоатчи инспекторлар жалб этилиши мумкин.

51. Табиатни муҳофаза қилиш объектларини сақлаш юзасидан биосфера резервати ходимлари фаолиятини ва уларнинг моддий манфаатдорлигини ошириш, табиий ресурслардан оқилона фойдаланиш ва уларни тиклаш мақсадида баланд тоғли шароитларда ишлайдиган ходимларга денгиз сатҳидан баландлиги даражасига қараб моддий рағбатлантириш тадбирлари амалга оширилади ва ойлик лавозим маошига:

1500 — 1700 метр — 1,1;

1701 — 2000 метр — 1,15;

2001 — 3000 метр — 1,3;

3001 метрдан баланд — 1,4 миқдорида қўшимча коэффициентлар белгиланади.

Биосфера резервати ходимларини махсус қўллаб-қувватлаш ва улар меҳнати самарадорлигини ошириш учун ҳар ойда транспорт харажатларига базавий ҳисоблаш миқдорининг бир баравари миқдорида ва овқатланиш харажатлари учун — базавий ҳисоблаш миқдорининг икки баравари миқдорида тўловлар амалга оширилади.

Давлат биосфера резервати ходимларини рағбатлантиришга ва ижтимоий қўллаб-қувватлашга йўналтирилган барча тўловларни молиялаштириш Ўзбекистон Республикаси Давлат бюджетидан ташқари молиялаштиришнинг барча манбалари ҳисобига амалга оширилади.

52. Биосфера резерватига оператив бошқарув ҳуқуқи билан берилган бинолар, иншоотлар, асбоб-ускуналар, пул маблағлари биосфера резерватининг мол-мулки ҳисобланади.

53. Биосфера резервати:

Ўзбекистон Республикаси Давлат бюджети маблағлари;

«Ўзбекистон темир йўллари» АЖ маблағлари;

Экология, атроф муҳитни муҳофаза қилиш ва чиқиндилар билан боғлиқ ишларни амалга ошириш жамғармаси маблағлари;

илмий-тадқиқот, табиатни муҳофаза қилиш, реклама-ноширлик ва маърифий фаолиятдан олинган даромадлар;

қўриқланадиган табиий ҳудудларга етказилган зарарни қоплаш ҳисобига тушумлар;

қўриқланадиган табиий ҳудудлар режими бузилганлиги учун ундириладиган жарима суммалари;

мусодара қилинган ов ва балиқчилик қуролларини, ноқонуний олинган маҳсулотларни сотишдан олинган суммалар;

юридик ва жисмоний шахсларнинг хайрия эҳсонлари;

қонунчиликда тақиқланмаган бошқа тушумлар ҳисобига молиялаштирилади.

Биосфера резервати ўз маблағларини «Ўзбекистон темир йўллари» АЖ томонидан тасдиқланадиган даромадлар ва харажатлар сметаларига мувофиқ мустақил тасарруф этади.

54. Биосфера резервати қонунчиликка мувофиқ амалга ошириладиган фаолиятнинг ҳисоби ва ҳисоботини юритади.

55. Биосфера резервати фаолияти устидан қонунчиликка мувофиқ ваколатли давлат органлари назорат қиладилар.

56. Биосфера резерватини тугатиш ва қайта ташкил этиш қонунчиликда белгиланган тартибда амалга оширилади.

1) Тошкент вилоятининг Оҳангарон, Паркент ва Бўстонлиқ туманлари ҳудудида жойлашган Угом-Чотқол давлат биосфера резервати маъмурий чегарасининг тавсифи.

Угом-Чотқол давлат биосфера резервати чегарасини аниқлаш учун Тошкент вилоятининг Паркент ва Бўстонлиқ туманлари туташиб кетадиган Нурекотасойнинг юқори қисмидаги 1-бошланғич нуқта қабул қилинган.

1-нуктадан чегара Паркент ва Бўстонлиқ туманларининг маъмурий чегараси чизиғи бўйлаб шарқий йўналишда ўнг томондан 445 метр масофада 2-нуқтагача давом этади.

2-нуқтадан чегара шимолий-шарқий йўналишда Паркент ва Бўстонлиқ туманлари чегара чизиғи бўйлаб тоғ тизмаси бўйича 1105 метр масофада, сўнгра шарқий йўналишда 205 метр масофада 3-нуқтагача давом этади.

3-нуқтадан чегара жанубий-шарқий йўналишда Бўстонлиқ тумани чегараси чизиғи бўйлаб Абулқашқа тоғ тизмаси бўйича 920 метр масофада 4-нуқтагача давом этади.

4-нуқтадан чегара шимолий-шарқий йўналишда Бўстонлиқ тумани чегараси чизиғи бўйлаб Абулқашқа тоғ тизмаси бўйича 1960 метр масофада, сўнгра шарқий йўналиши бўйича 1530 метр масофада Бўстонлиқ тумани чегараси чизиғи бўйлаб 5-нуқтагача давом этади.

5-нуқтадан чегара жанубий-шарқий йўналишда Абулқашқа тоғ тизмаси бўйича 290 метр масофада 6-нуқтагача давом этади.

6-нуктадан чегара жанубий йўналишда Бўстонлиқ тумани чегараси чизиғи бўйлаб Мингжилға тоғ тизмасининг ўнг томони бўйича 1180 метр масофада, сўнгра жанубий-ғарбий йўналишда 1205 метр масофада, сўнгра жанубий-шарқий йўналишда 3346 метр, сўнгра жанубий-ғарбий йўналишда 1714 метр, сўнгра жанубий йўналишда 3940 метр масофада ва Беркотасойнинг юқори қисмигача 7-нуқтагача давом этади.

7-нуқтадан чегара жанубий-ғарбий йўналишда Бўстонлиқ тумани чегараси чизиғи бўйлаб Мингжилға тоғ тизмасининг ўнг томони бўйича 2571 метр масофада 8-нуқтагача давом этади.

8-нуқтадан чегара ғарбий йўналишда Бўстонлиқ тумани чегараси чизиғи бўйлаб Оққўл тоғ тизмаси бўйича 972 метр масофада 9-нуқтагача давом этади.

9-нуқтадан чегара Паркент ва Бўстонлиқ туманлари ўртасидаги маъмурий чегара чизиғи бўйлаб шимолий-ғарб йўналишида, Оққўл тоғ тизмаси бўйича 1295 метр масофада 10-нуқтагача давом этади.

10-нуқтадан чегара жанубий-ғарбий йўналишда 698 метр масофада, сўнгра Бўстонлиқ тумани маъмурий чегараси билан кесишгунигача жанубий йўналишда Таксой бошланишида 1680 метр масофада 11-нуқтагача давом этади.

11-нуқтадан чегара жанубий-ғарбий йўналишда Паркент ва Бўстонлиқ туманлари маъмурий чегараси чизиғигача 1695 метр масофада, сўнгра ушбу йўналишда Паркент ва Бўстонлиқ туманлари ўртасидаги маъмурий чегара чизиғи бўйича, Чарқтов тоғ тизмаси бўйича 3670 метр масофада, Майдонтол тоғ чўққиси ва Бўстонлиқ туманининг Гижал қишлоғи бўйлаб ва Оқсоқота сойи билан кесишгунигача 12-нуқтагача давом этади.

12-нуқтадан чегара жанубий йўналишда Паркент ва Бўстонлиқ туманлари маъмурий чегараси чизиғи, Қизилнури тоғ тизмаси бўйлаб Паркентсойнинг юқори қисмигача 7250 метр масофада, сўнгра жанубий-шарқий йўналишда 1340 метр масофагача ва кейин Паркент ва Оҳангарон туманлари маъмурий чегараси кесишгунигача 13-нуқтагача давом этади.

13-нуқтадан чегара жанубий йўналишда Паркент ва Оҳангарон туманларининг маъмурий чегараси чизиғи, Қизилнури тоғ тизмаси бўйлаб 890 метр масофада, сўнгра жанубий-шарқий йўналишда 470 метр масофада, сўнгра жанубий-ғарбий йўналишда 405 метр масофада, кейин жанубий йўналишда 500 метр масофада, сўнгра жанубий-ғарбий йўналишда 290 метр масофада, сўнгра жанубий-шарқий йўналишда Қизилнур тоғ тизмаси бўйлаб 705 метр масофада, сўнгра жанубий йўналишда 480 метр масофада ва Қўрғонтош тоғ тизмасигача 14-нуқтагача давом этади.

14-нуқтадан чегара жанубий-шарқий йўналишда Бўстонлиқ туманининг Қўрғонтош тоғ тизмаси бўйлаб 1485 метр масофада 15-нуқтагача давом этади.

15-нуктадан чегара жанубий-ғарбий йўналишда Қўрғонтош тоғ тизмаси бўйлаб 430 метр масофада, сўнгра жанубий йўналишда 3185 метр масофада 16-нуқтагача давом этади.

16-нуқтадан чегара шарқий йўналишда Қўрғонтош тоғ тизмаси бўйлаб 290 метр масофада, сўнгра жанубий-шарқий йўналишда 465 метр масофада 17-нуқтагача давом этади.

17-нуқтадан чегара жанубий-ғарбий йўналишда Хўроз ўлган тоғ тизмасигача 2960 метр масофада, сўнгра ушбу йўналишда Деишхонсойнинг юқори қисмидан ўтиб 7210 метр масофада 18-нуқтагача давом этади.

18-нуқтадан чегара жанубий йўналишда, Параликсойнинг юқори қисмидан ўтиб 4410 метр масофада 19-нуқтагача давом этади.

19-нуқтадан чегара жанубий-ғарбий йўналишида, Аямамайдиқсойнинг юқори қисмидан ўтиб 3610 метр масофада 20-нуқтагача давом этади.

20-нуқтадан чегара жанубий-ғарбий йўналишда Қорақия тоғ тизмаси бўйлаб 1830 метр масофага давом этади.

21-нуқтадан чегара шимолий-ғарбий йўналишда 1151 метр масофада «Жартош-Нуробод-Шаввозсой» янги автомобиль йўли кесишмасигача 22-нуқтагача давом этади.

22-нуқтадан чегара шимолий-шарқий йўналишда 940 метр масофада 23-нуқтагача давом этади.

23-нуқтадан чегара шимолий-ғарбий йўналишда 3977 метр масофада 24-нуқтагача давом этади.

24-нуқтадан чегара шимолий-шарқий йўналишда Оҳангарон-Паркент туманларининг маъмурий чегаралари кесишган жойгача 780 метр масофада 25-нуқтагача давом этади.

25-нуқтадан чегара шимолий йўналишда 440 метр масофада 26-нуқтагача давом этади.

26-нуқтадан чегара шимолий-шарқий йўналишда 490 метр масофада ўтади, 27-нуқтада Оҳангарон-Паркент туманлари маъмурий чегаралари кесишган жойгача давом этади.

27-нуқтадан чегара шимолий-ғарбий йўналишда Паркент тумани ҳудудида 1210 метр масофада 28-нуқтагача давом этади.

28-нуқтадан чегара шимолий йўналишда 360 метр масофада 29-нуқтагача давом этади.

29-нуқтадан чегара шимолий-ғарбий йўналишда Човлисой билан йўллар кесишгунигача ўтади ва сўнгра Шоввозсой участкасининг 19-постига олиб борувчи йўлни кесиб ўтади, 1810 метр масофада 30-нуқтада Жийдалисой билан кесишган жойигача.

30-нуқтадан чегара шимолий йўналишда 1535 метр масофада Жийдалисой билан кесишгунгача 31-нуқтагача давом этади.

31-нуқтадан чегара шимолий-шарқий йўналишда қўриқхона ҳудудида Невич қишлоғи ва Сарасуюн тепалиги ўртасида йўл кесишгунгача 1670 метр масофада 32-нуқтагача давом этади.

32-нуқтадан чегара шимолий йўналишда Паркент тумани ҳудудидаги Опанбулоқсой булоғи билан кесишгунгача 1524 метр масофада 33-нуқтагача давом этади.

33-нуқтадан чегара шимолий-шарқий йўналишда Бошқизилсой билан кесишгунгача 806 метр масофада 34-нуқтагача давом этади.

34-нуқтадан чегара шимолий йўналишда Паркент тумани ҳудудидаги Шавзухурдсойнинг ўнг томони бўйлаб 400 метр масофада 35-нуқтагача давом этади.

35-нуқтадан чегара шимолий-шарқий йўналишда Шавзухурдсойнинг ўнг томони бўйлаб 970 метр масофада 36-нуқтагача давом этади.

36-нуқтадан чегара шимолий-шарқий йўналишда Авастакте тоғ тизмаси томонидан 970 метр масофада 37-нуқтагача давом этади.

37-нуқтадан чегара шимолий йўналишда Авастакте тоғ тизмасигача 1040 метр масофада 38-нуқтагача давом этади.

38-нуқтадан чегара жанубий-ғарбий йўналишда 2310 метр масофада 39-нуқтагача давом этади.

39-нуқтадан чегара шимолий-шарқий йўналишда 595 метр масофада 40-нуқтагача давом этади.

40-нуқтадан чегара шимолий-ғарбий йўналишда 623 метр масофада 41-нуқтагача давом этади.

41-нуқтадан чегара жанубий-шарқий йўналишда 285 метр масофада 42-нуқтагача давом этади.

42-нуқтадан чегара шарқий йўналишда Авастакте тоғ тизмасигача 1010 метр масофада 43-нуқтагача давом этади.

43-нуқтадан чегара шимолий йўналишда Қарагашлисойни кесиб ўтиб, 1320 метр масофада 44-нуқтагача давом этади.

44-нуқтадан чегара шарқий йўналишда 1775 метр масофада 45-нуқтагача давом этади.

45-нуқтадан чегара шимолий-ғарбий йўналишда 1330 метр масофада 46-нуқтагача давом этади.

46-нуқтадан чегара шимолий-шарқий йўналишда 650 метр масофада 47-нуқтагача давом этади.

47-нуқтадан чегара шимолий йўналишда 910 метр масофада 48-нуқтагача давом этади.

48-нуқтадан чегара ғарбий йўналишда 2330 метр масофада 49-нуқтагача давом этади.

49-нуқтадан чегара шимолий-шарқий йўналишда, Сўқоқсойни кесиб ўтиб, 2340 метр масофада 50-нуқтагача давом этади.

50-нуқтадан чегара шимолий йўналишда 120 метр масофада ўтади, сўнгра шимолий-шарқий йўналишда 1595 метр масофада 51-нуқтагача давом этади.

51-нуқтадан чегара шимолий йўналишда Тудаксой ва Заркентсойларни кесиб ўтиб, 2 990 метр масофада 52-нуқтагача давом этади.

52-нуқтадан чегара шимолий-ғарбий йўналишда Буриватсойни кесиб ўтиб, 510 метр масофада ўтади, сўнгра шимолий йўналишда 505 метр масофада 53-нуқтагача давом этади.

53-нуқтадан чегара шарқий Паркентсойни кесиб ўтиб шимолий йўналишда 2190 метр масофада 54-нуқтагача давом этади.

54-нуқтадан чегара шимолий йўналишда 1140 метр масофада 55-нуқтагача давом этади.

55-нуқтадан чегара шимолий йўналишда 1235 метр масофада ўтади, сўнгра шимолий-шарқий йўналишда 1150 метр масофада 56-нуқтагача давом этади.

56-нуқтадан чегара шарқий йўналишда Учтош тоғ тизмаси бўйлаб 1225 метр масофада 57-нуқтагача давом этади.

57-нуқтадан чегара шимолий йўналишда Олтинбелсойни кесиб ўтиб 1005 метр масофада 58-нуқтагача давом этади.

58-нуқтадан чегара шарқий йўналишда 780 метр масофада ўтади, сўнгра жанубий-шарқий йўналишда 825 метр масофада, сўнгра жанубий йўналишда 410 метр масофада 59-нуқтагача давом этади.

59-нуқтадан чегара шимолий-шарқий йўналишда Паркент тумани ҳудудидаги Гулбоғ массивининг бир қисми билан кесишгунигача 1684 метр масофада 60-нуқтагача давом этади.

60-нуқтадан чегара Майдонтол тоғ йўли — Бўстонлиқ туманининг Гиджал қишлоғи, Қашқасой, Оқсоқотасойни кесиб ўтиб 4075 метр масофада 61-нуқтагача давом этади.

61-нуқтадан чегара шимолий-шарқий йўналишда 275 метр масофада ўтади, сўнгра шимолий йўналишда 2370 метр масофада 62-нуқтагача давом этади.

62-нуқтадан чегара шимолий-шарқий йўналишда 1070 метр масофада 63-нуқтагача давом этади.

63-нуқтадан чегара жанубий-шарқий йўналишда 640 метр масофада 64-нуқтагача давом этади.

64-нуқтадан чегара Новашаксойни кесиб ўтиб шимолий йўналишда 2774 метр масофада 65-нуқтагача давом этади.

65-нуқтадан чегара Қўрғонтепасой ва Беркота сойларини кесиб ўтиб шимолий-шарқий йўналишда 2405 метр масофада 66-нуқтагача давом этади.

66-нуқтадан чегара Нурекотасойни кесиб ўтиб шимолий йўналишда 265 метр масофада ўтади, сўнгра шимолий-шарқий йўналишда 316 метр масофада, сўнгра шимолий-шарқий йўналишда 1180 метр масофада, сўнгра шимолий-шарқий йўналишда 140 метр масофада 67-нуқтагача давом этади.

67-нуқтадан чегара шарқий йўналишда 402 метр масофада 68-нуқтагача давом этади.

68-нуқтадан чегара Нурекотасойни кесиб ўтиб шимолий-шарқий йўналишда 586 метр масофада ўтади, сўнгра шимолий йўналишда 870 метр масофада 69-нуқтагача давом этади.

69-нуқтадан чегара шимолий-ғарбий йўналишда 370 метр масофада 70-нуқтагача давом этади.

70-нуқтадан чегара шимолий-ғарбий йўналишда 1100 метр масофада ўтади, Паркент ва Бўстонлиқ туманлари маъмурий чегаралари чизиғи кесишган жойда 1-нуқтага туташади.

2) Угом-Чотқол давлат биосфера резерватининг «Бошқизилсой» қўриқхона участкасининг буфер зонаси тавсифи.

Угом-Чотқол давлат биосфера резерватининг Бошқизилсой қўриқхона участкасининг буфер зонаси чегарасини аниқлаш учун Тошкент вилоятининг Паркент ва Бўстонлиқ туманлари маъмурий чегараси чизиғига туташиб кетадиган Қизилнур тоғида жойлашган 1-бошланғич нуқта қабул қилинган.

1-нуктадан чегара жанубий-шарқий йўналишда ўтади ва Бошқизилсой қўриқхона участкасининг ташқи периметри бўйича 1000 метр кенгликдаги ер участкасини ўз ичига олади. Бошқизилсой қўриқхона участкаси буфер зона сифатида белгиланган. Сўнгра Паркент ва Оҳангарон туманлари маъмурий чегаралари чизиқлари ўртасида жойлашган Қизилнур тоғ тизмасининг ўнг томони бўйлаб 1344 метр масофада Паркент ва Оҳангарон туманлари маъмурий чегараси чизиғига туташадиган 2-нуқтагача давом этади.

2-нуқтадан чегара Паркент ва Оҳангарон туманларининг маъмурий чегараси ўртасида жойлашган Қизилнур тоғ тизмасининг ўнг томони бўйлаб жанубий йўналишда 893 метр масофада Бошқизилсойнинг юқори қисмида жойлашган 3-нуқтагача давом этади.

3-нуқтадан чегара Паркент ва Оҳангарон туманларининг маъмурий чегараси ўртасида жойлашган Қизилнур тоғ тизмасининг тоғ тизмасининг ўнг томони бўйлаб 466 метр масофада 4-нуқтагача давом этади.

4-нуқтадан чегара жанубий-шарқий йўналишда Паркент ва Оҳангарон туманлари маъмурий чегараси чизиғи бўйлаб 404 метр масофада Қизилнур тоғ тизмасида жойлашган 5-нуқтагача давом этади.

5-нуқтадан чегара жанубий йўналишда Паркент ва Оҳангарон туманлари маъмурий чегараси чизиғи бўйлаб, Қизилнур тоғ тизмаси бўйича 500 метр масофада 6-нуқтагача давом этади.

6-нуктадан чегара жанубий-ғарбий йўналишда Паркент ва Оҳангарон туманлари маъмурий чегараси чизиғи бўйлаб 293 метр масофада ўтади ва Қизилнур тоғ тизмасида жойлашган 7-нуқтагача давом этади.

7-нуқтадан чегара Қизилнур тоғ тизмасида жойлашган жанубий-шарқий йўналишда Паркент ва Оҳангарон туманларининг маъмурий чегараси чизиғи бўйлаб 710 метр масофада 8-нуқтагача давом этади.

8-нуқтадан чегара жанубий йўналишда Қизилнур тоғ тизмаси орқали Паркент ва Оҳангарон туманлари маъмурий чегараси чизиғи бўйлаб 480 метр масофада Қўрғонтош тоғ тизмасида жойлашган 9-нуқтагача давом этади.

9-нуқтадан чегара жанубий-ғарбий йўналишда Қўрғонтош тоғ тизми орқали Паркент ва Оҳангарон туманлари маъмурий чегараси чизиғи бўйлаб 3610 метр масофада 10-нуқтагача давом этади.

Чегаранинг шарқий томонида 5090 метр масофада 1 — 9-нуқталар ўртасида Оҳангарон ва Бўстонлиқ туманлари давлат ер захираси ерларида жойлашган Бошқизилсой қўриқхона участкасининг буфер зонаси белгиланган.

10-нуқтадан чегара Оқкантоғ тоғ тизмасининг ўнг томони бўйлаб Паркент ва Оҳангарон туманларининг маъмурий чегаралари ўртасида 2240 метр масофада Таксой билан кесишгунгача 11-нуқтагача давом этади.

11-нуқтадан чегара Паркент ва Оҳангарон туманларининг маъмурий чегаралари ўртасида Оқкантоғ тизмасининг ўнг томони бўйлаб 1407 метр масофада 12-нуқтагача давом этади.

12-нуқтадан чегара жанубий йўналишда Паркент ва Оҳангарон туманларининг маъмурий чегаралари ўртасида Катта Такали тоғ тизмасининг ўнг томони бўйлаб 670 метр масофада ўтади ва 13-нуқтагача давом этади.

13-нуқтадан чегара ғарбий йўналишда Паркент ва Оҳангарон туманларининг маъмурий чегаралари ўртасидаги Катта Такали тоғ тизмасининг ўнг томони бўйлаб 1060 метр масофада 14-нуқтагача давом этади.

14-нуқтадан чегара жанубий-ғарбий йўналишда Паркент ва Оҳангарон туманларининг маъмурий чегаралари ўртасида Катта Такали тоғ тизмасининг тоғ йўлини бўйлаб 2420 метр масофада 15-нуқтагача давом этади.

15-нуктадан чегара Паркент ва Оҳангарон туманларининг маъмурий чегаралари ўртасида Кичик Такали тоғ тизмаси бўйлаб 720 метр масофада 16-нуқтагача давом этади.

16-нуқтадан чегара жанубий-шарқий йўналишда Кичик Тақали тоғ тизмасининг юқори қисми орқали, Паркент ва Оҳангарон туманларининг маъмурий чегаралари ўртасидан 1380 метр масофада 17-нуқтагача давом этади.

17-нуқтадан чегара жанубий-ғарбий йўналишда Паркент ва Оҳангарон туманларининг маъмурий чегаралари ўртасидаги Сарасуюн тоғ тизмаси бўйлаб 530 метр масофада Ноксой тепалигигача 18-нуқтагача давом этади.

18-нуқтадан чегара жанубий-ғарбий йўналишда Паркент ва Оҳангарон туманларининг маъмурий чегаралари ўртасидаги Сарасуюн тоғ тизмасининг Ноксой тепалиги бўйлаб 790 метр масофада 19-нуқтагача давом этади.

19-нуқтадан чегара ғарбий йўналишда Паркент ва Оҳангарон туманларининг маъмурий чегаралари ўртасидаги Сарасуюн тоғ тизмаси бўйлаб 1730 метр масофада 20-нуқтагача давом этади.

20-нуқтадан чегара шимолий-ғарбий йўналишда Паркент тумани ҳудудидаги Гавхонасой ва Чавлисойнинг юқори қисми бўйлаб 500 метр масофада 21-нуқтагача давом этади.

21-нуқтадан чегара ғарбий йўналишда Паркент тумани ҳудудидаги Чавлисой тоғ чўққисининг юқори қисми ўнг томони бўйлаб 960 метр масофада 22-нуқтагача давом этади.

22-нуқтадан чегара шимолий-ғарбий йўналишда Паркент тумани ҳудудидаги Чавлисой тоғ чўққисининг юқори қисми ўнг томони бўйлаб 3110 метр масофада 23-нуқтагача давом этади.

Қўриқхона чегарасининг 20 — 23-нуқталарининг ташқи томонидан бошлаб 459 га ер майдони Бошлиқсой қўриқхона участкасининг буфер зонаси сифатида белгиланган.

23-нуқтадан чегара Паркент тумани ҳудудидаги шимолий йўналишда Опанбулоқсой билан кесишгунгача 1527 метр масофада 24-нуқтагача давом этади.

24-нуқтадан чегара шимолий-шарқий йўналишда Бошқизилсой билан кесишгунгача 810 метр масофада 25-нуқтагача давом этади.

25-нуқтадан чегара шимолий йўналишда Паркент тумани ҳудудидаги Шавзухурдсойнинг ўнг томони бўйлаб 400 метр масофада 26-нуқтагача давом этади.

26-нуқтадан чегара шимолий-шарқий йўналишда Авастакте тоғ тизмаси бўйлаб 970 метр масофада 27-нуқтагача давом этади.

27-нуқтадан чегара шимолий-шарқий йўналишда 980 метр масофада ўтади, сўнгра шимолий йўналиш бўйича Авастакте тоғ тизмасигача 1040 метр масофада 28-нуқтагача давом этади.

23 — 28-нуқталарнинг ташқи томонидан қўриқхона чегараси Паркент тумани давлат ер захираси ерларида буфер зона сифатида белгиланган.

28-нуқтадан чегара шимолий-шарқий йўналишда Сувошган тепалиги бўйлаб 4980 метр масофада 29-нуқтагача давом этади.

29-нуқтадан чегара шимолий йўналишда Паркент тумани ҳудудидаги Оқтош тоғ тизими бўйлаб 1675 метр масофада 30-нуқтагача давом этади.

30-нуқтадан чегара шарқий йўналишда Оқтош тоғ тизими бўйлаб 1458 метр масофада 31-нуқтагача давом этади.

31-нуқтадан чегара шимолий-шарқий йўналишда Оқтош тоғ тизими бўйлаб 2360 метр масофада 32-нуқтагача давом этади.

32-нуқтадан чегара Паркент тумани ҳудудидаги Хавли тоғ тизмасидан 472 метр масофада ўтади, сўнгра шарқий йўналишда 717 метр масофада 33-нуқтагача давом этади.

33-нуқтадан чегара шарқий йўналишда Паркент туманидаги Хавли тоғ тизмаси бўйлаб 1890 метр масофада 34-нуқтагача давом этади.

34-нуқтадан чегара шимолий-шарқий йўналишда 750 метр масофада 35-нуқтагача давом этади.

35-нуқтадан чегара шимолий-ғарбий йўналишда 930 метр масофада 36-нуқтагача давом этади.

36-нуқтадан чегара шимолий-шарқий йўналишда Қизилнур тоғ тизмаси орқали Паркентсой билан кесишгунгача 688 метр масофада 37-нуқтагача давом этади.

37-нуқтадан чегара шимолий-ғарбий йўналишда Қизилнур тоғ тизмаси орқали 200 метр масофада 38-нуқтагача давом этади.

38-нуқтадан чегара шимолий шарқий йўналишда Қизилнур тоғ тизмаси бўйлаб 514 метр масофада 39-нуқтагача давом этади.

39-нуқтадан чегара шимолий-шарқий йўналишда Қизилнур тоғ тизмаси орқали 1230 метр масофада ўтади ва 1-бошланғич нуқтага туташади.