Вазирлар Маҳкамаси шуни таъкидлайдики, кейинги йилларда мамлакатда нефть қазиб чиқазиш ҳажмларининг қисқариб кетганлиги, мавжуд кўп йиллик алоқаларнинг бузилиши туфайли республика халқ хўжалигининг ва аҳолининг нефть маҳсулотлари билан таъминланиши ёмонлашди.

Халқ хўжалигининг ва аҳолининг нефть маҳсулотлари билан таъминлашдаги қийинчиликларнинг олдини олиш мақсадида Вазирлар Маҳкамаси қарор қилади:

1. «Ўртаосиёгазсаноати» ишлаб чиқариш бирлашмаси Кўкдумалоқ конидаги нефть ва газ конденсати захираларини ишлаб чиқаришга жалб қилишни жадаллаштириш чора-тадбирларини кўрсин, 1992 йилда режалаштирилган 280 минг тонна ўрнига 600 минг тонна миқдорида нефть қазиб олишни назарда тутсин, 1992—1995 йилларда нефть ва газ конденсати қазиб олишни 1-иловага мувофиқ ҳуқуқларни пармалаш ва ишга туширишни 2-иловага* мувофиқ таъминласин.

2. «Ўртаосиёгазсаноати» ишлаб чиқариш бирлашмаси, «Ўртаосиёнефтьгазқурилиш» ишлаб чиқариш қурилиш-монтаж бирлашмаси, Ўзбекистон Республикаси вазирликлари ва идоралари «Ўртаосиёгазсаноати» ишлаб чиқариш бирлашмаси ҳисобига Кўкдумалоқ кони иншоотлари қурилишини 3-иловага* мувофиқ таъминласинлар.

3. Қашқадарё, Бухоро вилоятлари ҳокимликлари Кўкдумалоқ кони иншоотларини қуриш ва реконструкциялаш учун ўз вақтида ер ажратишни таъминласинлар.

4. «Ўзбекнефть» ишлаб чиқариш бирлашмаси 1992 йилда «Ўртаосиёгазсаноати» ишлаб чиқариш бирлашмасининг буюртмасига кўра 5 комплект ВМ-53 бурғилаш минорасини ва 10 комплект УПР-З мосламасини тайёрлаб берсин. 1992 йилда олинадиган НБО-30 бурғилаш асбоб-ускуналари тўпламини «Ўртаосиёгазсаноати» ишлаб чиқариш бирлашмасига берсин.

5. Ўзбекистон Республикаси Давлат геология ва минерал ресурслар қўмитаси «Ўртаосиёгазсаноати» ишлаб чиқариш бирлашмасининг буюртмасига кўра 2-иловага мувофиқ қудуқларни пармалаб берсин, 1992 йилнинг 1 чорагида 3 комплект ОБ-53 бурғилаш минорасининг асосини тайёрласин, 1992 йил мобайнида 10 комплект МГ2-4 лой қориштиргич тайёрлаб берсин.

6. Ўзбекистон Республикаси Энергетика ва электрлаштириш вазирлиги 1992 йилда коннинг биринчи галдаги иншоотларга ишлаб турган 35/6 кВ «Кўкдумалоқ» ёрдамчи станциясидан 0,3 минг кВтгача миқдорда электр қуввати беришни таъминласин.

Кўкдумалоқ конининг 110—220 кВ ташқи электр таъминоти иншоотларини қуриш юзасидан буюртмачи ва пудратчи вазифалари Вазирлик зиммасига юклатилсин.

«Ўртаосиёгазсаноати» ИБ маблағлари ҳисобига лойиҳа-смета ҳужжатлари бўйича коннинг ташқи электр таъминоти иншоотларини қуришни ва 1993 йилнинг биринчи ярмида ВЛ 110 кВ «Ҳамза-1 —Шимолий Ўртабулоқ»дан узунлиги 80 км ли 110 кВтли электр узатиш линиясига эга бўлган 110/35/6 кВ «Нефтяная» ёрдамчи станциясини, 1994 йилнинг биринчи ярмида Толимаржон ГРЭСидан узунлиги 100 км ли 220 кВ электр узатиш линиясига эга бўлган 35/6 кВ «Кўкдумалоқ» ёрдамчи станциясини ишга туширишни таъминласин.

7. «Электросетьпроект» институтининг Ўрта Осиё бўлими «Ўртаосиёгазсаноати» ишлаб чиқариш бирлашмасининг буюртмасига кўра 110—220 кВ кучланишли ташқи электр таъминоти иншоотларининг лойиҳа-смета ҳужжатларини 1992 йилнинг II—III чоракларида, буюртирилган ҳужжатларни 1992 йилнинг мартида ишлаб чиқсин ва берсин.

8. Ўзбекистон давлат радиоэлектроника, электротехника саноати ва асбобсозлик концерни 1992 йилда «Ўртаосиёгазсаноати» ИБнинг буюртмасига кўра қуввати 6,3 МВА бўлган бир комплект 35/6 трансформатор ёрдамчи станциясини тайёрлаб берсин.

9. Ўзбекистон Республикаси Автомобиль йўллари вазирлиги 1992 йилнинг биринчи ярмида Муборак—Зеварда—Ўртабулоқ йўлини ремонтдан чиқарсин. «Ўртаосиёгазсаноати» ИБ билан шартномага кўра 1992—1994 йилларда ҳар йили узунлиги 20 км.дан бўлган ички саноат йўлларини қуришни таъминласин.

10. Ўзбекистон Республикаси Автомобиль транспорти вазирлиги 1992 йилда конни ўзлаштириш ишларига жалб қилинган корхоналарнинг талабномаларига кўра 50 минг тонна юкни, вахта бригадаларини ташишни таъминласин.

11. Ўзбекистоннинг тараққиёт истиқболини белгилаш қўмитаси, Ўзбекистон Республикаси Ташқи иқтисодий алоқалар вазирлиги, «Ўртаосиёгазсаноати» ИБ 1992 йилнинг биринчи ярмида Кўкдумалоқ конини ўзлаштириш учун чет эллардан 4-иловага* мувофиқ материаллар ва асбоб-ускуналар сотиб олишни таъминласинлар.

12. Вазирлар Маҳкамасининг умумиқтисодиёт комплекси бир ой муддат ичида «Ўртаосиёгазсаноати» ИБга сайклинг-жараён учун дам бериш компрессорларини тайёрлаш юзасидан ҳужжатларни ишлаб чиқишга 575 минг АҚШ доллари миқдорида маблағ ажратсин.

1992 йилда пармалаш ва конни ободонлаштиришни жадаллаштириш учун зарур бўлган материаллар ва асбоб-ускуналарни чет эллардан сотиб олиш учун валюта маблағлари ажратсин.

Тўла комплектли дам бериш компрессорларининг хорижий етказиб берувчисига ҳақ тўлаш юзасидан давлат кафолатлари берилсин.

13. «Ўзшартномасавдо»:

1992 йилда «Ўртаосиёгазсаноати» ИБ учун эҳтиёж нормаларига кўра материаллар, асбоб-ускуналар ва автотранспорт техникасини 5, 6-иловаларга* мувофиқ ажратишни таъминласин;

1992 йилда «Ўзбекнефть» ИБга Ўзбекистон Республикаси Давлат геология ва минерал ресурслар қўмитасига мазкур қарорнинг 4 ва 5-бандларида назарда тутилган пармалаш асбоб-ускуналарини қўшимча тайёрлаш учун эҳтиёж меъёрларига мувофиқ материаллар ва асбоб-ускуналар ажратсин;

1992 йилда Кўкдумалоқ кони иншоотларини қуришда ва реконструкциялашда иштирок этувчи корхоналарга асосланган ҳисоб-китобларга кўра моддий-техника ресурслари ажратсин;

Ўзбекистон Республикаси Энергетика ва электрлаштириш вазирлигига 1992 йилнинг II чорагида ВЛ ва ПС 110 кВ бўйича, 1993 йилнинг I чорагида ВЛ ва ПС 220 кВ бўйича буюртма спецификацияларга мувофиқ моддий-техника ресурслари ва асбоб-ускуналар ажратсин.

14. Ўзбекистоннинг тараққиёт истиқболини белгилаш қўмитаси, Ўзбекистон Республикаси Молия вазирлиги, Меҳнат вазирлиги Кўкдумалоқ конида банд бўлган пармалаш корхоналарини бюджетга ҳақ тўлашдан озод қилиш, район коэффициенти даражасини, чўл ва сувсизлик учун иш ҳақига устамаларни оширишнинг мақсадга мувофиқлиги имкониятларини кўриб чиқсинлар ва 1992 йилги бюджет лойиҳасига таклифлар киритсинлар.

15. Ўзбекистон Республикаси Саноатда ишларнинг бехатар олиб борилишини назорат қилиш ва кончилик назорати давлат қўмитаси (ўртоқ Аҳмадбоев) Кўкдумалоқ конида қудуқлар қазиш, иншоотларни қуриш ва улардан фойдаланишда ишларнинг бехатар олиб борилиши устидан давлат назоратини кучайтириш чораларини кўрсин.

16. Қашқадарё ва Бухоро вилоятлари ҳокимликлари, Ўзбекистон Республикаси соғлиқни сақлаш вазирлиги, Савдо вазирлиги, Ички ишлар вазирлиги, «Ўртаосиёгазсаноати» ИБ Кўкдумалоқ конидаги кўчма посёлкаларда тиббий хизмат кўрсатиш, жамоат тартибини сақлаш жойларини, конга олиб борувчи йўлларда давлат автомобиль назоратининг постларини ташкил этсинлар. «Ўртаосиёгазсаноати» ИБ ишчилар таъминоти бошқармасига ҳар йили (1992—1995 йиллар) 7-иловага* мувофиқ қўшимча озиқ-овқат товарларини, шунингдек, 2000 киши яшаши ҳисобидан конни ўзлаштириш ишларига жалб қилинган ходимлар учун саноат товарларини ажратиш назарда тутилсин.