Ўзбекистон Республикаси Президентининг «Ўзбекистон Республикаси Вазирлар Маҳкамаси ҳузуридаги Ўзбекистонга оид хориждаги маданий бойликларни тадқиқ этиш марказини ташкил этиш тўғрисида» 2017 йил 20 июндаги ПҚ-3074-сон қарори ижросини таъминлаш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикаси Вазирлар Маҳкамаси ҳузуридаги Ўзбекистонга оид хориждаги маданий бойликларни тадқиқ этиш маркази тўғрисида низом 1-иловага мувофиқ;

Ўзбекистонга оид хориждаги маданий бойликларни тадқиқ этиш ишларини мувофиқлаштириш бўйича республика комиссияси тўғрисидаги низом 2-иловага мувофиқ тасдиқлансин.

2. Ўзбекистон Республикаси Вазирлар Маҳкамаси ҳузуридаги Ўзбекистонга оид хориждаги маданий бойликларни тадқиқ этиш маркази (кейинги ўринларда Марказ деб аталади), Давлат архитектура ва қурилиш қўмитаси ҳамда Тошкент шаҳар ҳокимлигининг Марказ жойлашган бинонинг тегишли хоналарини мукаммал таъмирлаш бўйича:

буюртмачи этиб Тошкент шаҳар ҳокимлигининг «Ягона буюртмачи хизмати» инжиниринг компаниясини белгилаш;

бош лойиҳачи ва бош пудратчи ташкилотларни қонун ҳужжатларида белгиланган тартибда танлов савдолари асосида аниқлаш тўғрисидаги таклифларига розилик берилсин.

3. Ўзбекистон Республикаси Давлат архитектура ва қурилиш қўмитаси ишлаб чиқилган лойиҳа-смета ҳужжатларини белгиланган тартибда давлат экспертизасидан ўтказсин ҳамда мукаммал таъмирлаш ишларининг сифатли бажарилиши юзасидан давлат архитектура-қурилиш назоратини ўрнатсин.

4. Марказ:

икки ой муддатда Ўзбекистон Республикаси Фанлар академияси ва Маданият вазирлиги билан биргаликда Марказнинг моддий-техника базасини мустаҳкамлаш, юқори малакали кадрлар билан тўлдириш, Ўзбекистонга оид хориждаги маданий бойликларни тадқиқ этиш соҳасида қонун ҳужжатларини такомиллаштириш юзасидан комплекс чора-тадбирлар режасини ишлаб чиқсин ва ўрнатилган тартибда Ўзбекистонга оид хориждаги маданий бойликларни тадқиқ этиш ишларини мувофиқлаштириш бўйича республика комиссиясига тасдиқлаш учун киритсин;

2017 йилги харажатлар сметасини ҳамда штатлар жадвалини ишлаб чиқиб, ўрнатилган тартибда Ўзбекистон Республикаси Молия вазирлигида рўйхатдан ўтказилишини таъминласин.

5. Мазкур қарорнинг ижросини назорат қилиш Ўзбекистон Республикаси Вазирлар Маҳкамасининг Таълим, илм-фан ва ёшлар сиёсати масалалари ахборот-таҳлил департаментига юклансин.

1. Ушбу Низом Ўзбекистон Республикаси Вазирлар Маҳкамаси ҳузуридаги Ўзбекистонга оид хориждаги маданий бойликларни тадқиқ этиш марказининг (кейинги ўринларда Марказ деб аталади) асосий вазифалари, функциялари, ҳуқуқ ва жавобгарлигини, шунингдек унинг фаолиятини ташкил этиш тартибини белгилайди.

2. Марказ ўз фаолиятини Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, ушбу Низомга ва бошқа қонун ҳужжатларига мувофиқ амалга оширади.

3. Марказ ўз фаолиятида Ўзбекистонга оид хориждаги маданий бойликларни тадқиқ этиш ишларини мувофиқлаштириш бўйича республика комиссиясига (кейинги ўринларда Комиссия деб аталади) ҳисобот беради.

4. Марказ ўз фаолиятини давлат ва хўжалик бошқаруви органлари, маҳаллий давлат ҳокимияти органлари, нодавлат нотижорат ташкилотлари, хорижий ва халқаро ҳамда бошқа ташкилотлар билан ҳамкорликда амалга оширади.

5. Марказ Ўзбекистон Республикаси Вазирлар Маҳкамасининг Маданият, санъат ва ёшлар сиёсати масалалари ахборот-таҳлил департаменти мутасаддилигида фаолият юритади.

6. Марказ юридик шахс ҳисобланади, Ўзбекистон Республикасининг Давлат герби тасвири туширилган ва ўз номи ёзилган муҳр ва бланкаларга, мустақил балансга, банк, жумладан хорижий валюталардаги ҳисоб рақамларига ва Ўзбекистон Республикаси Молия вазирлигининг Ғазначилигида ҳисоб рақамларига эга бўлади.

7. Марказ Комиссиянинг ишчи органи ҳисобланади.

8. Қуйидагилар Марказнинг асосий вазифалари ҳисобланади:

миллий ва хорижий мутахассисларни жалб этган ҳолда, чет элларда сақланаётган, мамлакатимиз тарихи ва маданиятига оид маданий бойликларни аниқлаш, уларнинг тўлиқ маълумотлар базаси — реестрини яратиш ва уни мунтазам янгилаб бориш, шунингдек, ана шу тарихий экспонатларнинг асл ёки кўчирма нусхаларини, фото ва видеотасвирларини юртимизга олиб келиш, тегишли илмий марказлар, хусусан, Абу Райҳон Беруний номидаги Шарқшунослик институти билан биргаликда илмий тадқиқотлар олиб бориб, эришилган натижаларни илмий муомалага киритиш борасидаги ишларни мувофиқлаштириш;

фаолият йўналиши бўйича хорижий давлатлардаги музей ва фондлар, архивлар, илмий-маданий муассасалар билан ўзаро маданий алоқаларни йўлга қўйиш, турли анжуманлар, конференция ва кўргазмалар ташкил этиш;

чет мамлакатларда сақланаётган маданий бойликларни юртимизга қайтариш юзасидан музокаралар олиб бориш ва зарур чора-тадбирлар кўриш, бу борада халқаро миқёсдаги илғор тажрибани ўрганиш ва амалиётга жорий этиш;

маданий бойликларнинг олиб кирилиши ва олиб чиқилиши тўғрисидаги қонун ҳужжатларига риоя қилиниши ва самарали бажарилишини таҳлил қилиш, уларни такомиллаштириш бўйича таклифлар ишлаб чиқиш, шунингдек, халқаро шартномалар ва умумэътироф этилган нормаларни миллий қонунчилигимиз нуқтаи назаридан атрофлича ўрганиш;

хориждаги мамлакатимиз тарихи ва маданиятига оид маданий бойликларни оммавий ахборот воситаларида, жумладан, глобал Интернет тармоғида кенг ёритиш, улар ҳақидаги библиографик тўпламлар, каталоглар, китоб-альбомлар ва бошқа матбаа маҳсулотларини турли тилларда нашр этиб бориш;

тўпланган материалларни мамлакатимиз ва жаҳон миқёсида илмий муомалага киритиш.

9. Марказ ўзига юклатилган вазифаларни бажариш учун қуйидаги функцияларни амалга оширади:

а) миллий ва хорижий мутахассисларни жалб этган ҳолда, чет элларда сақланаётган, мамлакатимиз тарихи ва маданиятига оид маданий бойликларни аниқлаш, уларнинг тўлиқ маълумотлар базаси — реестрини яратиш ва уни мунтазам янгилаб бориш, шунингдек, ана шу тарихий экспонатларнинг асл ёки кўчирма нусхаларини, фото ва видеотасвирларини юртимизга олиб келиш, тегишли илмий марказлар, хусусан, Абу Райҳон Беруний номидаги Шарқшунослик институти билан биргаликда илмий тадқиқотлар олиб бориб, эришилган натижаларни илмий муомалага киритиш борасидаги ишларни мувофиқлаштириш соҳасида:

мамлакатимиз тарихи ва маданиятига оид маданий бойликларни аниқлаш, уларнинг тўлиқ маълумотлар базаси — реестрини яратиш ва уни мунтазам равишда янгилаб бориш;

мамлакатимиз тарихи ва маданиятига оид маданий бойликларга оид тарихий экспонатларнинг асл ёки кўчирма нусхаларини, фото ва видеотасвирларини юртимизга олиб келиш ишларини ҳаётга татбиқ этиш;

мамлакатимиз тарихи ва маданиятига оид юртимизга олиб келинган маданий бойликларни акс эттирувчи экспонатларнинг асл ёки кўчирма нусхаларини, фото ва видеотасвирларини, тегишли илмий муассаса ҳамда марказлар, хусусан, Абу Райҳон Беруний номидаги Шарқшунослик институти билан биргаликда илмий тадқиқотларни олиб бориш;

Марказнинг илмий тадқиқотлари натижалари юзасидан ҳисоботларни тайёрлаш ва уларни Комиссияга тақдим этилишини таъминлаш;

Марказнинг илмий тадқиқотлари натижаларини ахборот бюллетенлари ва бошқа расмий нашрларда чоп этилишини ташкил этиш;

б) фаолият йўналиши бўйича хорижий давлатлардаги музей ва фондлар, архивлар, илмий-маданий муассасалар билан ўзаро маданий алоқаларни йўлга қўйиш, турли анжуманлар, конференция ва кўргазмалар ташкил этиш соҳасида:

хорижий мамлакатлар музей ва фондлари, архивлари, илмий-маданий муассасалари билан, жумладан, қўшимча илмий лойиҳаларни бажариш орқали халқаро илмий-маданий ҳамкорликнинг самарали шакллари ва йўналишларини ривожлантириш;

Марказ ходимларини хориждаги етакчи илмий-маданий ва таълим муассасаларида ўқишини, тажриба орттиришини, малакасини оширишни ташкил этиш;

ўзаро тажриба алмашиш, иш усуллари ва янги илмий-тадқиқотларни йўлга қўйиш ҳамда ёш илмий-маданий кадрларни тайёрлаш учун етакчи хорижий олимларнинг жалб этилишини таъминлаш;

хорижий илмий-маданий ва олий таълим муассасалари билан ҳамкорликдаги илмий тадқиқотларни бажариш учун хорижий ташкилотлар ва жамғармаларнинг халқаро илмий грантларини жалб этилишини таъминлаш;

мамлакатимиз тарихи ва маданиятига оид маданий бойликларни тадқиқ этиш асносида олинган маълумотларни илм аҳлига етказишда ҳамда буюк мутаффакирлар, машҳур фан ва адабиёт арбоблари шарафига бағишланган халқаро илмий, илмий-маданий конгресслар, конференциялар, симпозиумлар, семинарларни ташкил этиш ва ўтказишда, шунингдек, халқаро илмий ва маданий журналларнинг таҳрир ҳайъатлари ишларида иштирок этиш;

в) чет мамлакатларда сақланаётган маданий бойликларни юртимизга қайтариш юзасидан музокаралар олиб бориш ва зарур чора-тадбирлар кўриш, бу борада халқаро миқёсдаги илғор тажрибани ўрганиш ва амалиётга жорий этиш соҳасида:

Ўзбекистон Республикаси Ташқи ишлар вазирлиги билан ҳамкорликда чет мамлакатларда сақланаётган маданий бойликларни аниқлаш, улар сақланаётган ташкилотлар билан илмий алоқалар ўрнатиш ҳамда мазкур бойликларни юртимизга қайтариш юзасидан хориждаги мутасадди муассаса ва ташкилотларни аниқлаш ишларини амалга ошириш;

Ўзбекистон Республикаси Ташқи ишлар вазирлиги билан ҳамкорликда ва унинг ёрдамида чет мамлакатларда сақланаётган маданий бойликларни юртимизга қайтариш юзасидан музокаралар олиб бориш учун зарур чора-тадбирлар кўриш;

чет мамлакатларда сақланаётган маданий бойликларни юртимизга қайтариш юзасидан музокаралар олиб бориш ва зарур чора-тадбирлар кўришда халқаро миқёсдаги илғор тажрибани ўрганиш ва амалиётга жорий этиш;

зарурат туғилган ҳолда халқаро миқёсдаги илғор тажриба асосида чет мамлакатларда сақланаётган маданий бойликларни юртимизга қайтариш бўйича чора-тадбирлар кўриш борасида Комиссияга тегишли таклифлар киритади;

г) маданий бойликларнинг олиб кирилиши ва олиб чиқилиши тўғрисидаги қонун ҳужжатларига риоя қилиниши ва самарали бажарилишини таҳлил қилиш, уларни такомиллаштириш бўйича таклифлар ишлаб чиқиш, шунингдек, халқаро шартномалар ва умумэътироф этилган нормаларни миллий қонунчилигимиз нуқтаи назаридан атрофлича ўрганиш соҳасида:

маданий бойликларни олиб кирилиши ва олиб чиқилиши тўғрисидаги қонун ҳужжатларига риоя қилиниши ва самарали бажарилишини таҳлил қилиш ишларини амалга ошириш;

маданий бойликларни олиб кирилиши ва олиб чиқилиши тўғрисидаги қонун ҳужжатларига риоя қилиниши ва самарали бажарилишини таҳлили натижасида, вазият тақозо этгани ҳолларда, уларни такомиллаштириш бўйича таклифлар киритиш;

маданий бойликларни олиб кирилиши ва олиб чиқилиши тўғрисидаги қонун ҳужжатлари, халқаро шартномалар ва умумэътироф этилган нормаларни миллий қонунчилигимиз нуқтаи назаридан атрофлича ўрганиш;

д) хориждаги мамлакатимиз тарихи ва маданиятига оид маданий бойликларни оммавий ахборот воситаларида, жумладан, глобал Интернет тармоғида кенг ёритиш, улар ҳақидаги библиографик тўпламлар, каталоглар, китоб-альбомлар ва бошқа матбаа маҳсулотларини турли тилларда нашр этиб бориш соҳасида:

хориждаги мамлакатимиз тарихи ва маданиятига оид маданий бойликларни республика оммавий ахборот воситаларида кенг ёритишни амалга ошириш;

хориждаги мамлакатимиз тарихи ва маданиятига оид маданий бойликлар ва уларнинг илмий таҳлилини глобал Интернет тармоғида кенг ёритиш ишларини ташкил этиш ва амалга ошириш;

хориждаги мамлакатимиз тарихи ва маданиятига оид маданий бойликларни чуқур илмий ўрганиш асносида олинган илмий маълумотлар ва уларнинг таҳлилий натижаларига оид библиографик тўпламлар, каталоглар, китоб-альбомлар ва бошқа матбаа маҳсулотларини турли тилларда нашр этиш ишларини амалга оширади;

е) тўпланган материалларни мамлакатимиз ва жаҳон миқёсида илмий муомалага киритиш соҳасида:

хориждаги мамлакатимиз тарихи ва маданиятига оид маданий бойликларни чуқур илмий ўрганиш асносида олинган илмий маълумотлар ва уларнинг таҳлилий натижаларини кенг тарғиб этиш мақсадида илмий ва илмий-амалий конференцияларни уюштириш;

хориждаги мамлакатимиз тарихи ва маданиятига оид маданий бойликларни тадқиқ этишга оид республика ва хориждаги турли даражалардаги конференцияларда қатнашиш;

Ўзбекистон Миллий телерадиокомпанияси билан ҳамкорликда хориждаги мамлакатимиз тарихи ва маданиятига оид маданий бойликларга бағишланган туркум кўрсатувларни тайёрлаш.

Марказ қонунчиликка мувофиқ бошқа функцияларни ҳам амалга оширади.

10. Марказ ўзига юклатилган вазифалар ва функцияларни бажариш учун қуйидаги ҳуқуқларга эга:

давлат ва хўжалик бошқаруви органларидан, маҳаллий давлат ҳокимияти органларидан ва хўжалик юритувчи субъектлардан ўз ваколатига кирувчи масалаларни ҳал этишга доир маълумотларни белгиланган тартибда сўраш ва олиш;

ўз ваколати доирасида конференциялар, семинарлар ва бошқа тадбирлар ўтказиш ҳамда бошқа ташкилотлар ўтказадиган тадбирларда иштирок этиш;

ўз ходимларининг ижтимоий ҳимояси бўйича чора-тадбирларни амалга ошириш;

илмий-тадқиқот ишларига республикадаги ва хориждаги мутахассисларни шартнома асосида жалб қилиш;

Комиссия билан келишилган ҳолда Марказ ходимлари ва жалб қилинган мутахассисларни хорижий илмий-тадқиқот ҳамда таълим муассасаларига илмий тадқиқотларни амалга ошириши учун юбориш;

Марказ фаолиятини такомиллаштириш масалалари бўйича таклифларни Комиссия мажлиси муҳокамасига қўйиш;

Комиссия раиси билан келишилган ҳолда Марказнинг штат жадвалини белгиланган тартибда тасдиқлаш;

Марказда ходимларнинг моддий рағбатлантириш фондини тузиш;

моддий-техникавий базани ривожлантириш ва асосий фондлар реконструкция ва таъмирлаш ишларини амалга ошириш юзасидан Ўзбекистон Республикаси Вазирлар Маҳкамасига тегишли таклифлар киритиш.

Марказ қонун ҳужжатларига мувофиқ бошқа ҳуқуқларга ҳам эга бўлиши мумкин.

11. Марказ ўзига юклатилган вазифалар ва функцияларнинг самарали бажарилиши учун бюджетдан ажратиладиган маблағлар ва унинг ихтиёридаги бошқа маблағлардан мақсадли фойдаланилиши учун жавоб беради.

12. Марказга белгиланган тартибда Вазирлар Маҳкамаси томонидан лавозимга тайинланадиган ва лавозимдан озод этиладиган директор бошчилик қилади.

Директорнинг Вазирлар Маҳкамаси томонидан лавозимга тайинланадиган ва лавозимдан озод қилинадиган бир нафар ўринбосари бўлади.

13. Марказ директори:

Марказ фаолиятига умумий раҳбарликни амалга оширади ҳамда Марказга юкланган вазифалар ва функцияларнинг бажарилиши учун шахсан жавоб беради;

давлат ва хўжалик бошқаруви органларида ва бошқа ташкилотларда, шунингдек, халқаро ташкилотлар ва хорижий мамлакатлар вакиллари иштирокида ўтказиладиган расмий тадбирларда Марказ номидан вакиллик қилади;

Марказ ваколатига кирувчи масалалар бўйича қарорлар қабул қилади ва Марказга юкланган вазифалар ва функцияларнинг бажарилиши учун шахсан жавоб беради;

Марказнинг илмий-тадқиқот ва бошқа жараёнларни ташкил этиш, илмий тадқиқотларни режалаштириш, манфаатдор илмий ва ўқув идоралари, муассасалар ва ташкилотлар билан ҳамкорлик қилишнинг барча масалалари юзасидан қарорлар қабул қилади, илмий ва услубий маълумотлар ва ахборотларни муҳокама қилади, илмий ишларни нашр қилиш ва сақлашга тавсия этади, илмий ва фахрий унвонларни бериш тўғрисида илтимосномалар беради;

аниқ мақсадга йўналтирилган дастур ва танлов мавзуларини, шунингдек, алоҳида топшириқ ва буюртмаларни амалга ошириш мақсадида Марказда вақтинчалик тадқиқот гуруҳини ташкил этади;

Марказда ижро интизоми ҳолати бўйича бевосита раҳбарликни амалга оширади;

ўзининг ўринбосари ва Марказ ходимларининг ваколатлари, мажбуриятлари ва шахсий жавобгарлиги даражасини белгилайди;

Марказ бўлимлари низомини ва Марказ ходимларининг лавозим йўриқномаларини белгиланган тартибда тасдиқлайди;

ўз ваколати доирасида ходимларни қонун ҳужжатларида белгиланган тартибда лавозимга тайинлайди ва лавозимдан озод қилади;

зарурат туғилган ҳолларда, Марказнинг таркибий тузилмасига ходимларнинг белгиланган умумий чекланган сони доирасида ўзгартиришлар киритади;

ўз ваколати доирасида Марказ ходимлари томонидан бажариш учун мажбурий бўлган буйруқлар қабул қилади;

лавозимига кўра Комиссиянинг масъул котиби ҳисобланади;

Марказга юклатилган мақсад ва вазифаларнинг бажарилиши, ходимлар билан тузилган шартномалар, режаларнинг бажарилиши ва натижалари, илм-фан ва техникавий ютуқларни жалб қилиш чора-тадбирлари ҳамда Марказ ва маъмуриятнинг бошқа фаолияти юзасидан Комиссия олдида ҳисобот беради.

Директор қонун ҳужжатларига мувофиқ бошқа ваколатларни ҳам амалга оширади.

14. Марказ директори вақтинча йўқлигида унинг вазифаларини унинг ўринбосари бажаради.

15. Марказ директорининг ўринбосари:

бўлимларга бевосита раҳбарлик қилади ва Марказга юкланган вазифалар ва функцияларнинг бажарилиши ҳамда бўлимларда ижро интизоми ҳолати учун шахсан жавоб беради;

ўзига бириктирилган масалалар бўйича ҳужжатлар лойиҳасини ва материалларни ўз вақтида ва сифатли тайёрлашни ташкил этади, топшириқларнинг бажарилиши юзасидан назоратни таъминлайди;

Марказ иш режасида, шунингдек мутахассисларнинг шахсий иш режаларида назарда тутилган тадбирларни талаб қилинадиган давр мобайнида амалга ошириш ва мувофиқлаштиришни таъминлайди ҳамда ўрганилган масалаларнинг танқидий таҳлили асосида Марказ директорига муҳокама учун таклифлар киритади;

Вазирлар Маҳкамаси йиғилишларида муҳокама қилишга бириктирилган масалалар бўйича материаллар тайёрлаш учун бўлим бошлиқлари ва мутахассислар билан мажлислар ўтказади;

Марказ директорига тегишли мутахассислар мажбуриятларини тақсимлаш бўйича таклифлар киритади;

Марказ директорига бўлимлар ходимларини лавозимга тайинлаш ва лавозимдан озод қилиш, уларнинг малакасини ошириш, уларни мукофотлаш ва интизомий жавобгарликка тортиш бўйича таклифлар киритади;

вазифалар тақсимотига кўра бошқа тегишли ваколатларни ҳам амалга оширади.

16. Марказ ходимларига Ўзбекистон Республикаси Фанлар академияси илмий-тадқиқот муассасаларининг тегишли лавозимлари учун белгиланган меҳнатга ҳақ тўлаш ва моддий рағбатлантириш шартлари қўлланади.

17. Қуйидагилар Марказ фаолиятини молиялаштиришнинг асосий манбалари ҳисобланади:

Ўзбекистон Республикасининг Давлат бюджети маблағлари;

давлат буюртмаси асосида илмий тадқиқотларни бажариш учун Ўзбекистон Республикаси Инновацион ривожланиш вазирлиги томонидан ажратиладиган грант маблағлари.

Марказ мутахассислари ва бошқа ташкилотлардан жалб қилинадиган экспертларни хорижий давлатларга хизмат сафарларига юбориш ва чет эллик мутахассислар (экспертлар)ни жалб этиш харажатлари ва Марказ фаолияти билан боғлиқ бошқа харажатлар учун тадбиркорлик фаолиятидан, жумладан, ноширлик фаолиятидан тушадиган маблағлар, халқаро молиявий институтлар, хорижий ташкилотлар, донор мамлакатлар ва ташкилотларнинг грантлари, шунингдек, ҳомийлик хайриялари ва қонун ҳужжатларида тақиқланмаган бошқа манбалар.

18. Марказни қайта ташкил этиш ва тугатиш қонун ҳужжатларида белгиланган тартибда амалга оширилади.

1. Ушбу Низом Ўзбекистонга оид хориждаги маданий бойликларни тадқиқ этиш ишларини мувофиқлаштириш бўйича республика комиссиясининг (кейинги ўринларда Комиссия деб аталади) фаолиятини ташкил этишни, вазифалари, функциялари ва ҳуқуқларини белгилайди.

2. Комиссия Ўзбекистон Республикаси Вазирлар Маҳкамаси ҳузуридаги коллегиал орган ҳисобланади.

3. Комиссия ўз фаолиятини Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, ушбу Низомга ва бошқа қонун ҳужжатларига мувофиқ амалга оширади.

4. Комиссиясининг ўз ваколатлари доирасида қабул қилган қарорлари давлат ва хўжалик бошқаруви органлари, маҳаллий давлат ҳокимияти органлари ва бошқа ташкилотлар томонидан бажарилиши мажбурий ҳисобланади.

5. Ўзбекистон Республикаси Вазирлар Маҳкамаси ҳузуридаги Ўзбекистонга оид хориждаги маданий бойликларни тадқиқ этиш маркази (кейинги ўринларда Марказ деб аталади) Комиссиянинг ишчи органи ҳисобланади.

6. Қуйидагилар Комиссиянинг асосий вазифалари ҳисобланади:

Марказ томонидан мамлакатимиз тарихи ва маданиятига оид хориждаги маданий бойликларни тадқиқ этиш юзасидан олиб бориладиган илмий-тадқиқот ишларини мувофиқлаштириш;

Марказнинг йиллик фаолият режасини тасдиқлаш ва унинг амалга оширилиши учун кўмаклашиш, шунингдек, заруратдан келиб чиққан ҳолда, Марказга юкланган асосий вазифалар ижросини таъминлаш мақсадида, Марказнинг таклифига асосан унинг мутахассислари ва бошқа ташкилотлардан Марказга жалб қилинадиган экспертларни хорижий давлатларга сафарларга жўнатиш ишларини мувофиқлаштириш;

ҳар чорак якуни бўйича Марказ ҳисоботларини эшитиш, унинг фаолияти самараси ва натижадорлигини баҳолаш;

мамлакатимиз тарихи ва маданиятига оид хориждаги маданий бойликларни тадқиқ этиш бўйича давлат ва хўжалик бошқаруви органлари фаолиятини мувофиқлаштириш ва бу борада зарур чора-тадбирларни амалга ошириш.

7. Комиссия ўзига юклатилган вазифаларни бажариш учун қуйидаги функцияларни амалга оширади:

а) Марказ томонидан мамлакатимиз тарихи ва маданиятига оид хориждаги маданий бойликларни тадқиқ этиш юзасидан олиб бориладиган илмий-тадқиқот ишларини мувофиқлаштириш соҳасида:

мамлакатимиз ижтимоий, маънавий ва маданий тараққиётининг узвий қисмини ташкил этган тарих ва маданиятимизга оид хориждаги маданий бойликларни тадқиқ этиш сиёсатини амалга оширади;

мамлакатимиз тарихи ва маданиятига оид хориждаги маданий бойликларни тадқиқ этиш юзасидан олиб бориладиган илмий-тадқиқот ишларининг устувор ва истиқболли йўналишларини ривожлантириш стратегиясини белгилайди;

мамлакатимиз тарихи ва маданиятига оид хориждаги маданий бойликларни тадқиқ этиш ва янада ривожлантириш соҳасидаги давлат дастурларини амалга оширилишини таъминлайди;

мамлакатимиз тарихи ва маданиятига оид хориждаги маданий бойликларни тадқиқ этиш юзасидан олиб бориладиган илмий-тадқиқот ишларини мувофиқлаштиради;

б) Марказнинг йиллик фаолият режасини тасдиқлаш ва уни амалга оширилиши учун кўмаклашиш, шунингдек, заруратдан келиб чиққан ҳолда, Марказга юкланган асосий вазифалар ижросини таъминлаш мақсадида, Марказнинг таклифига асосан унинг мутахассислари ва бошқа ташкилотлардан Марказга жалб қилинадиган экспертларни хорижий давлатларга сафарларга жўнатиш ишларини мувофиқлаштириш соҳасида:

Марказнинг йиллик фаолият режасини тасдиқлайди;

Марказга юклатилган илмий ва амалий тадбирларни амалга оширилишида кўмаклашади;

Марказнинг йиллик фаолият заруратидан келиб чиққан ҳолда, унга юкланган асосий вазифалар ижросини таъминлаш ишларига амалий ёрдам кўрсатади;

Марказнинг таклифига асосан унинг мутахассислари ва бошқа ташкилотлардан Марказга жалб қилинадиган экспертларни хорижий давлатларга сафарларга жўнатиш ишларини мувофиқлаштиради;

в) ҳар чорак якуни бўйича Марказ ҳисоботларини эшитиш, унинг фаолияти самараси ва натижадорлигини баҳолаш соҳасида:

Марказ фаолияти юзасидан ҳар чорак якуни бўйича ҳисоботларни эшитади;

Марказ режаларида акс этган фундаментал, амалий ва инновацион тадқиқотлари дастурларини шакллантириш жараёнига раҳбарлик қилади;

Марказ ваколати доирасидаги фундаментал, амалий ва инновацион тадқиқотларнинг грант асосидаги давлат дастурларини Ўзбекистон Республикаси Давлат бюджети маблағлари ҳисобига молиялаштиришнинг тегишли ҳажмларини тасдиқлайди;

буюртмачилар — вазирликлар, идоралар, ва бошқа ташкилотлар билан биргаликда молиялаштириладиган амалий ва инновацион тадқиқотларнинг мақсадли давлат илмий-техника дастурларини тасдиқлайди;

зарурат бўлганда, Марказнинг тегишли давлат илмий дастурларига ўзгартириш ва қўшимчалар киритади;

Марказнинг даромадлари ва харажатлари прогноз параметрларини, Марказга маблағлар тушиши ва улардан фойдаланилиши тўғрисидаги ҳисоботларни тасдиқлайди, шунингдек, зарурат бўлганда, уларга тегишли ўзгартириш ва қўшимчалар киритади;

г) мамлакатимиз тарихи ва маданиятига оид хориждаги маданий бойликларни тадқиқ этиш бўйича давлат ва хўжалик бошқаруви органлари фаолиятини мувофиқлаштириш ва бу борада зарур чора-тадбирларни амалга ошириш соҳасида:

давлат органларининг раҳбарлари, мансабдор шахсларининг, шунингдек етакчи олимлар ва экспертларнинг Марказ илмий фаолиятига оид интеграция жараёнларини янада ривожлантириш ва ўзаро фойдали тармоқлараро илмий ҳамкорлик қилиш масалалари бўйича тавсиялари ва таклифларини эшитади;

Марказ томонидан амалга оширилаётган ҳамда тасдиқланган илмий тадқиқотлар ва амалий тадбирларнинг бажарилишида мутасадди давлат ва хўжалик бошқаруви органлари, маҳаллий давлат ҳокимияти органларининг фаолиятларини мувофиқлаштиради.

8. Комиссия ўзига юклатилган вазифаларни бажариш учун қуйидаги ҳуқуқларга эга:

Марказ, Ўзбекистон Республикаси Маданият вазирлиги, Фанлар академияси, бошқа давлат ва хўжалик бошқаруви органлари раҳбарларининг ҳисоботларини эшитиш;

Комиссия аъзолари, давлат ва хўжалик бошқаруви органлари, маҳаллий давлат ҳокимияти органлари мансабдор шахсларининг Комиссияга юклатилган вазифаларнинг бажарилиши юзасидан шахсий ҳисоботларини эшитиш;

ўз ваколатига кирадиган масалалар бўйича зарур материаллар ва ҳужжатларни давлат ва хўжалик бошқаруви органларидан, маҳаллий давлат ҳокимияти органларидан белгиланган тартибда сўраш ва олиш;

Ўзбекистонга оид хориждаги маданий бойликларни тадқиқ этиш масалалари бўйича Ўзбекистон Республикаси Президентига таклифлар киритиш;

Ўзбекистонга оид хориждаги маданий бойликларни тадқиқ этиш масалаларини ўрганиш ва улар бўйича таклифларни ишлаб чиқиш учун ишчи гуруҳлар ташкил этиш;

Марказ томонидан мамлакатимиз тарихи ва маданиятига оид хориждаги маданий бойликларни тадқиқ этиш юзасидан олиб бориладиган илмий-тадқиқот ишларини назорат қилиш;

Марказнинг йиллик иш режасини тасдиқлаш;

Марказнинг таклифига асосан унинг мутахассислари ва бошқа ташкилотлардан Марказга жалб қилинадиган экспертларни хорижий давлатларга сафарларга жўнатиш тартибини белгилаш;

Комиссия томонидан қабул қилинадиган қарорлар изчил амалга оширилишини назорат қилиш.

9. Комиссияга раис бошчилик қилади, унинг ваколатига қуйидагилар киради:

Комиссиянинг самарали ишлашини таъминлаш;

юкланган вазифалар бажарилиши бўйича Комиссия аъзоларининг ишини мувофиқлаштириш;

Комиссия иши регламентини тасдиқлаш;

Комиссия мажлислари кун тартибини белгилаш ва уларни чақириш;

Комиссия томонидан қабул қилинган қарорлар бажарилиши назорат қилинишини ташкил этиш.

Комиссия раиси қонун ҳужжатларига мувофиқ бошқа ваколатларни ҳам амалга оширади.

10. Марказ директори, лавозимига кўра, Комиссиянинг масъул котиби ҳисобланади.

11. Марказ:

Комиссия мажлисларига зарур материалларнинг ўз вақтида тайёрланишини ташкил этади;

Комиссия қарорлари бажарилишини назорат қилишни ва уларнинг мониторинги олиб борилишини ташкил этади ва уларнинг натижаларини кўриб чиқиш учун Комиссияга тақдим этади;

Комиссия баённомаларини расмийлаштиради ва Комиссия аъзоларига тегишли қисми юзасидан тасдиқланган баённомаларни тегишли давлат ва хўжалик бошқаруви органларига, маҳаллий давлат ҳокимияти органларига ва бошқа ташкилотларга юборади;

ўзига юкланган вазифаларни бажариш учун зарур бўлган ахборот ва материалларни давлат ва хўжалик бошқаруви органларидан, маҳаллий давлат ҳокимияти органларидан белгиланган тартибда олади;

Комиссияда иш юритилишини таъминлайди;

Комиссиянинг қарорларига мувофиқ бошқа функцияларни амалга оширади.

12. Комиссия ўз фаолиятини доимий асосда амалга оширади ва ўз мажлисларини заруриятга кўра, ва айни пайтда йил чорагида камида бир марта ўтказади.

Комиссия мажлисини раис, у бўлмаганда — Комиссия раисининг ўринбосари олиб боради.

13. Комиссия йиғилишларининг кун тартиби Марказ томонидан тузилади ва Ўзбекистон Республикаси Вазирлар Маҳкамасига юборилади.

14. Комиссиянинг навбатдаги йиғилиши кун тартиби ва материаллари Марказ томонидан йиғилиш бошланишидан камида 3 календарь кун олдин бўлажак йиғилиш тўғрисидаги билдиришнома билан биргаликда Комиссия аъзоларига юборилади.

15. Комиссиянинг қарорлари унинг аъзоларининг оддий кўпчилик овози билан қабул қилинади. Овозлар тенг бўлганда раиснинг овози ҳал қилувчи овоз ҳисобланади.

16. Истисно ҳолларда қарорларни тезкор қабул қилиш мақсадида раис айрим масалалар бўйича Комиссиянинг қарорларини сўров йўли билан тасдиқлашга ҳақлидир.

17. Комиссиянинг қарорлари баённома билан расмийлаштирилади ва раис томонидан тасдиқланади. Комиссия аъзолари баённомани имзолашда ўзларининг алоҳида фикрини билдиришга ҳақлидир.

Комиссия баённомасининг асл нусхаси ва унга оид материаллар Марказда сақланади.

18. Комиссияни қайта ташкил этиш ва тугатиш қонун ҳужжатларида белгиланган тартибда амалга оширилади.