Аҳолининг кўп квартирали уйларда яшаши учун янада қулай ва хавфсиз шарт-шароитлар яратиш, лифт ускуналарининг авария ҳолатларининг олдини олиш, шунингдек Тошкент шаҳар ҳокимлиги ҳузуридаги Ободонлаштириш бош бошқармасининг моддий-техника базасини мустаҳкамлаш мақсадида Вазирлар Маҳкамаси қарор қилади:

1. Қуйидагилар:

2016 — 2021-йилларда Тошкент шаҳридаги кўп квартирали уйларда лифтларни алмаштириш дастури 1-иловага* мувофиқ;

2016 — 2021-йилларда Тошкент шаҳар ҳокимлиги ҳузуридаги Ободонлаштириш бош бошқармасини махсус транспорт техникаси ва механизация воситалари билан жиҳозлаш дастури 2-иловага* мувофиқ тасдиқлансин.

2. Тошкент шаҳар ҳокимлиги:

ҳар йили, 2016-йилдан бошлаб, кўп квартирали уйларни хатловдан ўтказиш натижаларини ҳисобга олган ҳолда, уйларнинг нуқсонли далолатномаларини тузиш ва туманлар бўйича кўп квартирали уйларнинг лифтларини алмаштиришнинг манзилли дастурларини белгиланган тартибда тасдиқлашни;

кўп квартирали уйлардаги лифтларни алмаштириш бўйича лойиҳа-смета ҳужжатларини ишлаб чиқиш ва белгиланган тартибда тасдиқлаш, кейинчалик уларни ҳар йили тасдиқланадиган манзилли рўйхатларга киритишни;

манзилли рўйхатлар ва тасдиқланган лойиҳа-смета ҳужжатларига мувофиқ кўп квартирали уйлардаги лифтларнинг алмаштирилишини назорат қилишни;

тасдиқланган дастурларнинг амалга оширилиши тўғрисида ҳар чоракда Вазирлар Маҳкамасига таҳлилий ахборот тақдим этишни таъминласин.

3. Қуйидагилар белгилансин:

2016 — 2021-йилларда кўп квартирали уйлардаги лифтларни алмаштириш ва Тошкент шаҳар ҳокимлиги ҳузуридаги Ободонлаштириш бош бошқармасини махсус транспорт техникаси ва механизация воситалари билан жиҳозлашнинг тасдиқланган дастурларини амалга ошириш харажатларини молиялаштириш манбалари этиб — Тошкент шаҳар шаҳар бюджети параметрларида назарда тутилган маблағлар;

Тошкент шаҳар уй-жой коммунал хизмат кўрсатиш бош бошқармаси — лифтларни янгилаш ишларининг буюртмачиси этиб белгилансин.

4. Ўзбекистон Республикаси Молия вазирлиги 2016 йилдан бошлаб келгуси йил учун Ўзбекистон Республикаси Давлат бюджети параметрларини шакллантиришда кўп квартирали уйлардаги лифтларни алмаштириш ҳамда Тошкент шаҳар ҳокимлиги ҳузуридаги Ободонлаштириш бош бошқармасини махсус транспорт техникаси ва механизация воситалари билан жиҳозлашнинг тасдиқланган дастурларини амалга ошириш учун зарур маблағларни назарда тутсин, ажратиладиган бюджет маблағларидан мақсадли фойдаланилиши устидан таъсирчан назоратни амалга оширсин.

5. Ўзбекистон Республикаси Давлат архитектура ва қурилиш қўмитаси кўп квартирали уйларнинг лифтларини алмаштиришни амалга оширишда бажарилаётган ишларнинг сифати, шаҳарсозлик нормалари ва қоидаларига риоя этилиши устидан қатъий назорат ўрнатсин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Б.И. Закиров ва Тошкент шаҳар ҳокими Р.Ж. Усмонов зиммасига юклансин.