Ўзбекистон Республикаси Олий Мажлиси Қонунчилик палатасининг «Ўзбекистон Республикасининг 2014 йилги Давлат бюджети тўғрисида»ги 2013 йил 14 ноябрдаги 770-II-сонли қарори, Ўзбекистон Республикаси Олий Мажлиси Сенатининг «Ўзбекистон Республикасининг 2014 йилги Давлат бюджети тўғрисида»ги 2013 йил 12 декабрдаги СҚ-399-II-сонли қарори ва Ўзбекистон Республикаси Президентининг 2013 йил 25 декабрдаги «Ўзбекистон Республикасининг 2014 йилги асосий макроиқтисодий кўрсаткичлари прогнози ва Давлат бюджети параметрлари тўғрисида»ги ПҚ-2099-сон қарори (Ўзбекистон Республикаси қонун ҳужжатлари тўплами, 2013 й., 52-сон, 690-модда) ижросини таъминлаш мақсадида Ўзбекистон Республикаси «Маҳаллий давлат ҳокимияти тўғрисида»ги Қонунининг 6-моддасига асосан қарор қиламан:

1. Ўзбекистон Республикаси Президентининг 2013 йил 25 декабрдаги «Ўзбекистон Республикасининг 2014 йилги асосий макроиқтисодий кўрсаткичлари прогнози ва Давлат бюджети параметрлари тўғрисида»ги ПҚ-2099-сон ва Халқ депутатлари Қашқадарё вилоят кенгашининг 2013 йил 28 декабрдаги «Вилоят маҳаллий бюджетининг 2013 йилдаги ижроси ҳамда 2014 йилги бюджети параметрлари тўғрисида»ги IV/38-124-сон қарорлари раҳбарлик ва ижро учун қабул қилинсин.

2. Вилоятнинг ижтимоий-иқтисодий ривожлантириш бўйича асосий макроиқтисодий кўрсаткичлар прогнози 1-иловага;

маҳаллий бюджетнинг асосий параметрлари 2-иловага;

Қарши шаҳар ҳамда туманлар маҳаллий бюджетларининг даромадлар ва харажатлар ҳажмлари, вилоят бюджетидан бериладиган мақсадли субвенцияларнинг ва ўтказиб бериладиган даромадларнинг чекланган миқдорлари 3-иловага;

Қарши шаҳар ва туманлар маҳаллий бюджетларига умумдавлат солиқлар тушумларидан ажратмалар нормативлари 4-иловага;

Қарши шаҳар ва туманлар маҳаллий бюджетлари айланма касса маблағининг йўл қўйиладиган энг кам миқдорлари 5-иловага;

маҳаллий солиқлар ва йиғимлар ставкалари 6-иловага;

савдо ва умумий овқатланиш корхоналарига, шунингдек шу соҳага тегишли микрофирмалар ва кичик корхоналар учун ягона солиқ тўлови ставкалари 7-иловага мувофиқ тасдиқлансин.

3. 2014 йил учун вилоят маҳаллий бюджетининг захира жамғармаси 1731,7 млн сўм миқдорида белгилансин.

4. Ўзбекистон Республикаси Президентининг 2013 йил 25 декабрдаги ПҚ-2099-сон қарорига асосан:

қўшилган қиймат солиғи ставкаси 20 фоиз;

Ўзбекистон Республикаси резидентларига дивидендлар ва фоизлар тарзида тўланадиган даромад солиғи ставкалари 10 фоиз;

белгиланган солиққа тортиш объектларидан Ўзбекистон Республикаси Молия вазирлиги ҳузуридаги бюджетдан ташқари Пенсия жамғармасига мажбурий ажратмалар ставкалари 1,6 фоиз, Ўзбекистон Республика Молия вазирлиги ҳузуридаги Республика йўл жамғармасига мажбурий ажратмалар ставкалари 1,4 фоиз ва Ўзбекистон Республика Молия вазирлиги ҳузуридаги бюджетдан ташқари Таълим ва тиббиёт муассасаларини реконструкция қилиш, мукаммал таъмирлаш ва жиҳозлаш жамғармасига мажбурий ажратмалар ставкалари 0,5 фоиз;

маблағларни бюджетдан ташқари Пенсия жамғармаси, Бандликка кўмаклашиш давлат жамғармаси ва Ўзбекистон Касаба уюшмалари Федерацияси Кенгаши ўртасида Ўзбекистон Республикаси Президентининг мазкур қарорининг тегишли иловасида келтирилган нормативларга мувофиқ тақсимланган ҳолда ягона ижтимоий тўлов ставкаси 25 фоиз;

фуқароларнинг Ўзбекистон Республикаси Молия вазирлиги ҳузуридаги бюджетдан ташқари Пенсия жамғармасига мажбурий суғурта бадаллари ставкаси 6,5 фоиз миқдорида белгиланганлиги;

юридик шахслардан олинадиган даромад (фойда) солиғи ставкалари;

жисмоний шахслардан олинадиган даромад солиғи ставкалари;

ягона солиқ тўлови ставкалари;

тадбиркорлик фаолияти айрим турлари бўйича юридик шахслардан ва якка тартибдаги тадбиркорлардан олинадиган қатъий белгиланган солиқ ставкалари;

якка тартибдаги тадбиркорлардан олинадиган қатъий белгиланган солиқ ставкалари;

Ўзбекистон Республикасида ишлаб чиқариладиган ва унинг ҳудудига четдан келтириладиган акциз солиғига тортиладиган товарларга акциз солиғи ставкалари;

сув ресурсларидан фойдаланганлик учун солиқ ставкалари;

ер қаъридан фойдаланганлик учун солиқ ставкалари;

имзоланадиган бонус ва тижорат топилмаси бонуси ставкалари;

айрим турдаги маҳсулотлар бўйича қўшимча фойда солиғи ставкалари;

юридик ва жисмоний шахсларнинг мол-мулкига солинадиган солиқ ставкалари;

юридик ва жисмоний шахслардан олинадиган ер солиғи ставкалари;

ягона ер солиғи ставкалари;

Ўзбекистон Республикаси Молия вазирлиги ҳузуридаги Республика йўл жамғармасига ажратмалар ва йиғимлар ставкалари;

мол-мулкни ижарага берувчи жисмоний шахслар учун ижара ҳақи ставкалари тасдиқланганлиги маълумот учун қабул қилинсин.

5. Маҳаллий ҳокимият ва бошқарув органларнинг барча даражалардаги маҳаллий бюджетлар даромадлари ва харажатларини шакллантиришдаги роли, мустақиллиги ва масъулиятини ошириш, маҳаллий бюджетларнинг Давлат бюджетидаги улушини кўпайтириш мақсадида қуйидаги умумдавлат солиқлари:

сув ресурсларидан фойдаланганлик учун солиқ;

юридик ва жисмоний шахсларнинг тадбиркорлик фаолияти айрим турлари бўйича қатъий белгиланган солиқ;

якка тартибдаги тадбиркорлардан олинадиган қатъий белгиланган солиқ;

Ўзбекистон Республикасида ишлаб чиқариладиган ўсимлик мойи ва пиво маҳсулотининг акциз солиғи бўйича тушумлар;

давлат божи, йиғимлар ва жарималар тўлиқ миқдорда шаҳар ва туманнинг маҳаллий бюджетлар даромадларига ўтказилиши белгилаб қўйилганлиги маълумот учун қабул қилиниб, ижрога йўналтирилсин.

6. Вилоят ҳокимлиги молия бошқармасига маҳаллий бюджетларга бюджетдан мақсадли субвенциялар ва бюджет ссудалари (даромадлар ва харажатлар ўртасидаги вақтинчалик касса тафовутларини қоплаш учун) ажратишда уларнинг миқдорларини ҳудудлар бўйича барча солиқлар ва бошқа мажбурий тўловларнинг тўлиқ тушушидан, шунингдек маҳаллий бюджетнинг биринчи навбатдаги харажатларини (иш ҳақи, иш ҳақидан ажратмалар, стипендиялар, нафақалар ва уларга тенглаштирилган тўловларни) сўзсиз молиялаштириш зарурлигидан келиб чиққан ҳолда аниқлаштириш ҳуқуқи берилсин.

7. Вилоят Иқтисодиёт Бош бошқармаси тегишли ташкилотлар билан биргаликда 1-иловага мувофиқ тасдиқланган вилоятнинг ижтимоий-иқтисодий ривожлантириш бўйича асосий макроиқтисодий кўрсаткичлар прогнозининг бажарилишини таъминлаш юзасидан зарур чоралар кўриб борсин.

8. Ўзбекистон Республикасининг Бюджет кодекси 2014 йилнинг 1 январидан эътиборан кучга киритилганлиги муносабати билан вилоят ҳокимининг 2004 йил 20 февралдаги Х-85/2 сонли «Вилоят маҳаллий бюджетидан маблағ билан таъминланадиган айрим тиббиёт муассасаларини шаҳар ва ҳокимликлари маҳаллий бюджетларига ўтказиш тўғрисида»ги қарори ўз кучини йўқотган ҳисоблансин ҳамда вилоят ҳокимининг 2013 йил 16 январдаги Х-32/01 сонли «Ўзбекистон Республикаси Президентининг 2012 йил 25 декабрдаги «Ўзбекистон Республикасининг 2013 йилги асосий макроиқтисодий кўрсатгичлари прогнози ва Давлат бюджети параметрлари тўғрисида»ги ПҚ-1887 сонли қарори ҳақида»ги қарорининг 8-иловасидаги Шаҳрисабз туманидаги вилоят ихтисослаштирилган санъат мактаб-интернати, Шаҳрисабз Давлат 6-сонли ихтисослаштирилган мактаб-интернати, Шаҳрисабз Давлат 7-сонли ихтисослаштирилган мактаб-интернати, Яккабоғ Давлат 13-сонли ихтисослаштирилган мактаб-интернати, Яккабоғ Давлат 14-сонли ихтисослаштирилган мактаб-интернати ва вилоят соғлиқни сақлаш бошқармаси тасарруфидаги Қарши шаҳридаги тез тиббий ёрдам автохўжаликларини тегишли туман (шаҳар) маҳаллий бюджетининг харажатларидан амалга ошириш вилоят бюджети харажатларига ўтказилиши муносабати билан мазкур иловадан чиқарилсин.

9. Қашқадарё вилоят ҳокимлиги молия бошқармаси, вилоят ғазначилик бошқармаси, вилоят Марказий банк Бош бошқармаси билан биргаликда 2014 йилнинг январь ойида ўтказилган операцияларни 2013 йилги маҳаллий бюджетнинг ижроси тўғрисидаги ҳисоботда акс эттирган ҳолда, 2013 йилги маҳаллий бюджет ижроси бўйича қонун ҳужжатларида белгиланган тартибда якуний операцияларни ўтказсинлар.

10. Ўзбекистон Республикаси Президентининг 2013 йил 25 декабрдаги ПҚ-2099-сон қарорининг 34-иловасига мувофиқ. товарларнинг айрим турларини ишлаб чиқаришни кенгайтириш ва хизматлар соҳасини ривожлантиришни янада рағбатлантириш мақсадида Ўзбекистон Республикаси Президенти ва Вазирлар Маҳкамасининг алоҳида қарорларида илгари берилган имтиёзлар муддати узайтирилганлиги, 35-иловасига мувофиқ Ўзбекистон Республикаси Президентининг ва Ўзбекистон Республикаси Вазирлар Маҳкамасининг айрим қарорлари 2014 йил 1 январдан бошлаб ўз кучини йўқотганлиги, 36-иловасига мувофиқ Ўзбекистон Республикаси Президенти ва Ўзбекистон Республикаси Вазирлар Маҳкамасининг айрим қарорларига ўзгартириш ва қўшимчалар киритилганлиги;

Ўзбекистон Республикаси Президентининг 2009 йил 22 декабрдаги «Ўзбекистон Республикасининг 2010 йилги асосий макроиқтисодий кўрсатгичлари прогнози ва Давлат бюджети параметрлари тўғрисида»ги ПҚ-1245-сонли қарори 24-бандининг амал қилиши 2015 йилнинг 1 январигача узайтирилгани маълумот учун қабул қилинсин.

11. Вилоят ҳокимининг 2014 йил 10 январдаги Х-7/01-сонли қарори бекор қилинган ҳисоблансин.

12. Ушбу қарорнинг бажарилишини назорат қилиш вилоят ҳокимининг ўринбосари Ғ. Джавлиев зиммасига юклатилсин.

13. Мазкур қарор расман эълон қилинган кундан эътиборан кучга киради.