Ўзбекистон Республикаси ҳудудида тинчлик даврининг экстремал шароитларида аҳолини ҳимоя қилишнинг янада самарали тизимини яратиш мақсадида ва Республика бошқарув органлари тизимидаги айрим ўзгаришларни ҳисобга олиб Вазирлар Маҳкамаси қарор қилади:

1. Ўзбекистон ССЖ Президенти ҳузуридаги Вазирлар Маҳкамасининг фавқулодда вазиятлар бўйича Комиссияси Ўзбекистон Республикаси Вазирлар Маҳкамасининг фавқулодда вазиятлар бўйича Комиссиясига айлантирилсин.

2. Қорақалпоғистон Республикаси Вазирлар Кенгаши, вилоят ва Тошкент шаҳар ҳокимликлари фавқулодда вазиятлар бўйича вилоят, шаҳар ва туман комиссияларини тузсинлар.

3. Ўзбекистон Республикасининг потенциал хавфли объектлари бўлган вазирликлари, идоралари ва давлат қўмиталари, корпорациялари, концернлари ва бирлашмалари фавқулодда вазиятлар бўйича тармоқ ва объект комиссияларини тузсинлар.

4. Ўзбекистон Республикаси Вазирлар Маҳкамаси Раисининг биринчи ўринбосари Исмоил Ҳакимович Жўрабеков Ўзбекистон Республикаси фуқаро мудофааси бошлиғи этиб тайинлансин.

Ўзбекистон Республикаси Вазирлар Маҳкамасининг фавқулодда вазиятлар бўйича Комиссияси таркиби 1-иловага мувофиқ тасдиқлансин.

Комиссия раисига Комиссиянинг шахсий таркибини тасдиқлаш юклатилсин.

Ўзбекистон Республикаси Вазирлар Маҳкамасининг фавқулодда вазиятлар бўйича Комиссияси ҳақидаги Низом (2-илова) тасдиқлансин.

5. Ўзбекистон Республикаси Вазирлар Маҳкамаси аппаратининг тизимига Ўзбекистон Республикаси Вазирлар Маҳкамасининг Фавқулодда вазиятлар бўйича Комиссиясининг уч кишидан иборат котибияти киритилсин.

6. Белгилансинки, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари фавқулодда вазиятлар бўйича комиссияларининг раислари Ўзбекистон Республикаси Вазирлар Маҳкамасининг фавқулодда вазиятлар бўйича Комиссияси мажлисида тегишли масалалар кўриб чиқилаётганда ушбу Комиссия аъзолари ҳуқуқи билан қатнашадилар.

7. Ўзбекистон ССЖ Президенти ҳузуридаги Вазирлар Маҳкамасининг 1991 йил 17 апрелдаги 103-сон қарори ўз кучини йўқотган деб ҳисоблансин.

1. Фавқулодда вазият — бу Республиканинг айрим минтақаларида, бир ёки бир қатор корхоналарида рўй берган, табиий иқлимга оид экологик ва техноген офатлар, авариялар, фалокатлар, эпидемия ва эпизоотиялар оқибатида содир бўлган ва кўп миқдорда зарар етказиши мумкин бўлган ёки етказган, одамлар қурбон бўлишига олиб келган ва ҳаёт учун зарур шароитларнинг бузилишига олиб келган аҳвол.

Ўзбекистон Республикаси Вазирлар Маҳкамасининг фавқулодда вазиятлар бўйича Комиссиясининг мақсади қуйидагиларни таъминлашдан иборат:

республика давлат бошқарув органлари, Ўзбекистон Республикасининг авариялар, фалокатлар, табиий ва экологик офатлар, минтақага хос бўлган эпидемия ва эпизоотиялар рўй берадиган ҳолларнинг олдини олиш ва фавқулодда вазиятларда ҳаракат қилиш Давлат тизимига киритилган кучлар ва воситаларнинг доимий тайёр туришини таъминлаш;

Қорақалпоғистон Республикаси Вазирлар Кенгаши, вилоятлар ҳокимликлари ва Тошкент шаҳар ҳокимлигининг фавқулодда вазиятлар бўйича комиссияларининг, республиканинг барча даражалардаги бошқарув органларининг, Вазирлар Маҳкамасининг комплекслари, вазирликлар, давлат қўмиталари, концернлар, корпорациялар, идора ва корхоналарнинг фавқулодда вазиятларнинг олдини олиш ва бартараф этиш борасидаги ишларини мувофиқлаштириш ва назорат қилиш кечиктириб бўлмайдиган қидирув-қутқариш ва авария — қайта тиклаш ишларига, минтақада фавқулодда вазият юз берганда аҳолининг ҳаётини сақлаш ва уларни фалокат зоналаридан эвакуация қилиш.

2. Комиссия ўз фаолиятини Вазирлар Маҳкамаси раҳбарлигида амалга оширади ҳамда Ўзбекистон Республикаси Олий Мажлиси қўмиталари ва комиссиялари билан ўзаро алоқада иш олиб боради.

Комиссия раиси, раис ўринбосарлари ва Комиссия таркиби Вазирлар Маҳкамасининг қарорига биноан тайинланади.

Фавқулодда вазиятлар бўйича Комиссия ўз фаолиятини Ўзбекистон Республикаси Давлат табиатни муҳофаза қилиш қўмитаси, Ўзбекистон Республикаси Саноатда ишларнинг бехатар олиб борилишини назорат қилиш ва кончилик назорати давлат қўмитаси, Ўзбекистон Республикаси Вазирлар Маҳкамаси ҳузуридаги Гидрометеорология бош бошқармаси билан мувофиқлаштириб боради.

3. Комиссиянинг асосий вазифалари:

а) кундалик фаолиятида:

республика вазирликлари, давлат қўмиталари, концернлари корпорациялари, идоралари, бирлашмалари, республика авария-қутқариш хизматлари, Қорақалпоғистон Республикаси Вазирлар Кенгаши, вилоят ҳокимликлари ва Тошкент шаҳар ҳокимлиги фавқулодда вазиятлар бўйича комиссияларининг фавқулодда вазиятларда ҳаракат қилишига тайёргарлик даражасини ошириш, аҳоли хавфсизлигини таъминлаш фавқулодда вазиятларда саноат, энергетика, транспорт, алоқа, ижтимоий-маиший хизмат объектларининг ишончли ва барқарор ишлашини таъминлаш борасидаги фаолиятини ташкил этади ва мувофиқлаштиради;

рўй бериш эҳтимоли бўлган фавқулодда вазиятларни ва уларнинг оқибатларини олдиндан аниқлаш, республика ҳудудида авариялар, фалокатлар, табиий ва экологик офатлар, эпидемиялар ва эпизоотиялар оқибатида юзага келиши мумкин бўлган хавфли зоналарни (районларни) белгилаш, экстремал ҳодисалар хавф-хатарини ва қурилиши мумкин бўлган зарарларни баҳолаш бўйича ишларни бошқаради;

фавқулодда вазиятларнинг олдини олиш ва шундай ҳолларда ҳаракат қилиш бўйича Ўзбекистон Республикаси Давлат тизими ишларига раҳбарликни амалга оширади;

потенциал хавфли объектларда авариялар ва фалокатларнинг олдини олишга, улар юз берган тақдирда ҳамда табиий офатлар, эпидемиялар ва эпизоотиялар рўй берган ҳолларда кўрилиши мумкин бўлган зарарни камайтиришга қаратилган эҳтиёт чоралари тизимини ишлаб чиқади;

рўй бериши мумкин бўлган авариялар, фалокатлар, табиий офатлар, эпидемиялар, эпизоотияларни тугатиш бўйича тадбирларнинг республика режасини тайёрлайди;

республика ҳудудида аҳолининг ҳаёти ва саломатлиги учун потенциал хавфли бўлган халқ хўжалиги ва мудофаа характеридаги объектларнинг жойлашиши нечоғлик мақсадга мувофиқлиги, шунингдек, уларни бекитиш, консервациялаш, тугатиш, фаолиятини тўхтатиб қўйиш масалаларини кўриб чиқади;

республика бошқарув органларининг авария-қутқарув хизматлари, Ўзбекистон Республикаси кучлари ва воситаларининг фавқулодда вазиятларнинг олдини олиш ва шундай ҳоллар юз берганда ҳаракат қилиш бўйича команда-штаб ва махсус машқларни ўтказади;

жамоат ташкилотлари ва тегишли тажрибага эга бўлган фуқароларнинг фавқулодда вазиятларнинг олдини олиш бўйича тадбирларда қатнашиши учун шароит яратиш чора-тадбирларини амалга оширади;

республика аҳолисини фавқулодда вазиятларда ҳаракат қилишга тайёрлаш ишларини ташкил этади ва мувофиқлаштиради;

Ўзбекистон Республикаси Вазирлар Маҳкамасининг фавқулодда вазиятлар бўйича Давлат комиссияси билан биргаликда қутқариш ва авария-қайта тиклаш ишларини самарали олиб бориш учун замонавий техника, асбоб-ускуналар, механизмлар ва материаллар ишлаб чиқариш ҳамда харид қилишни, хавфли техноген ва табиат ҳодисаларини кузатишни, улар устидан назорат тизимини ривожлантирувчи, аҳолини ҳимоя қилиш ва кишиларнинг фавқулодда вазиятларда яшашини таъминловчи ягона илмий-техникавий сиёсатни ишлаб чиқишда қатнашади;

Вазирлар Маҳкамасининг қонунчилик актларини, қарорларини, фармойишларини, Комиссиянинг ҳуқуқ доирасига кирадиган масалалар бўйича бошқа норматив актларни ишлаб чиқишни амалга оширади ва уларнинг бажарилишини назорат қилиб боради;

фавқулодда вазиятлар оқибатлари профилактикаси, уларнинг олдини олиш ва бартараф этиш соҳасидаги ватанимиз ва хорижий мамлакатлар тажрибасини ўрганиш ва ундан фойдаланишни ташкил этади, Комиссиянинг ваколати доирасида марказий бошқарув органлари, бошқа хорижий мамлакатлар ва халқаро ташкилотлар билан ҳамкорликни мувофиқлаштиради;

б) фавқулодда вазиятлар рўй берганда ва уларнинг оқибатларини тугатишда:

фавқулодда вазиятларнинг олдини олиш ва шундай ҳолларда ҳаракат қилиш бўйича Ўзбекистон Республикаси Давлат тизимини тайёр ҳолатга келтиришни ва унинг ишлашини таъминлайди;

тегишли бошқарув органларини ва аҳолини фавқулодда вазиятларнинг рўй берганлиги, характери ва миқёслари, уларнинг оқибатларини тугатишнинг қандай бораётганлиги ҳақида хабардор қилиш ва ахборот билан таъминлашни ташкил этади;

республика ҳудудида минтақавий фавқулодда вазият рўй берган тақдирда қидирув-қутқариш ва авария -тиклаш ишларига бевосита раҳбарлик қилади;

зарур ижтимоий ёрдам кўрсатиш ишларини ташкил этади ва мувофиқлаштиради;

фалокат рўй берган районга ташкилотлар ва фуқаролардан, шу жумладан, хорижий фуқаролардан ёрдам тариқасида тушадиган моддий ва молиявий маблағларни ҳисобга олиш ва тақсимлаш ишларини ташкил этишни назорат қилади;

Қорақалпоғистон Республикаси Вазирлар Кенгаши, вилоят ҳокимликлари ва Тошкент шаҳар ҳокимлиги фавқулодда вазиятлар комиссияларининг авариялар ва фалокатларнинг сабабларини аниқлаш юзасидан олиб борадиган ишида қатнашади;

тегишли тажрибага эга бўлган жамоат ташкилотлари ва фуқароларнинг (шу жумладан, хорижий фуқароларнинг) фавқулодда вазиятларнинг оқибатларини тугатиш бўйича тадбирларда қатнашиши учун шароит яратиш ишларини олиб боради;

одамларнинг ҳаёти ва саломатлиги учун бевосита хавф-хатар бартараф этилгач, қидирув-қутқариш ишлари олиб борилгандан кейин, аҳолининг яшашини таъминловчи объектлар тиклаб бўлингандан сўнг фавқулодда вазиятларнинг оқибатларини тугатиш ишларига раҳбарлик қилиш маҳаллий ҳокимият ва бошқарув органларига, шунингдек, тегишли вазирликлар, давлат қўмиталари, концернлар, идоралар ва бирлашмалар зиммасига ўтказилади.

4. Комиссия қуйидаги ҳуқуқларга эга :

зарур ҳолларда Ўзбекистон Республикаси Олий Мажлисига ёки Ўзбекистон Республикаси Президентига Ички ишлар вазирлигининг ички қўшинлари, шунингдек Ўзбекистон Республикаси Мудофаа вазирлигининг ҳарбий қисмларини ва Миллий Гвардия қўшинларини авариялар, фалокатлар, экологик ва табиий офатларнинг оқибатларини тугатишга, фавқулодда вазиятлар зоналарида жамоат тартибини сақлашни ва аҳолининг ҳаёти учун зарур бўлган ҳамда халқ хўжалиги объектларини муҳофаза қилишни таъминлашга жалб этиш ҳақида белгиланган тартибда таклиф киритиш;

ўз ваколати доирасида Ўзбекистон Республикаси Вазирлар Маҳкамасининг фармойишлар тарзидаги қарорларини қабул қилишда қатнашиш;

Комиссия ваколатига тааллуқли бўлган масалаларни ҳал этишда Ўзбекистон Республикаси халқ хўжалиги мажмуалари, вазирликлари, давлат қўмиталари, концернлар, корпорациялар, идоралар, бирлашмаларнинг раҳбарлари билан биргаликда қатнашиш;

Қорақалпоғистон Республикаси Вазирлар Кенгаши, вилоят ҳокимликлари ва Тошкент шаҳар ҳокимлиги, вазирликлар, давлат қўмиталари, концернлар, корпорациялар, идоралар ва бирлашмаларнинг фавқулодда вазиятлар бўйича комиссияларининг ишини назорат қилиб бориш, ўз мажлисларида ана шу комиссияларнинг ҳисоботларини эшитиш;

фавқулодда вазиятларнинг олдини олиш ва шундай ҳолларда ҳаракат қилиш бўйича Ўзбекистон Республикаси Давлат тизимига кирувчи кучлар ва воситаларнинг тайёрлигини назорат қилишни амалга ошириш;

вазирликлар, давлат қўмиталари, концернлар, корпорациялар, идоралар, бирлашмалар, Қорақалпоғистон Республикаси Вазирлар Кенгаши, ҳокимликлардан Комиссия зиммасига юклатилган вазифаларни амалга ошириш учун зарур бўлган материалларни талаб қилиш ва олиш;

фавқулодда вазиятларнинг олдини олиш ва шундай ҳолларда ҳаракат қилиш бўйича Ўзбекистон Республикаси Давлат тизимига кирувчи кучлар ва воситаларни зарур бўлган қидирув-қутқариш ҳамда авария-қайта тиклаш ишларига белгиланган тартибда жалб этиш;

республика ҳудудидаги минтақавий фавқулодда вазият вужудга келган жойга бориб қидирув-қутқариш ва авария-қайта тиклаш ишларига бевосита раҳбарлик қилиш;

фавқулодда вазият пайдо бўлиши сезилган ҳолларда, қайси идорага бўйсунишидан қатъи назар, республика ҳудудидаги халқ хўжалиги объектларининг ишини тўхтатиб қўйиш;

маҳаллий авариялар, фалокатлар, табиий офатлар, эпидемиялар ва эпизотиялар рўй бергани тақдирда ўз вакиллари ва мутахассисларини Қорақалпоғистон Республикаси, вилоятлар ва Тошкент шаҳридаги фавқулодда вазиятлар бўйича комиссиялар ишида иштирок этиш учун юбориш;

республика халқ хўжалигининг етакчи мутахассисларини потенциал хавфли бўлган объектларнинг бехатар ишлашини назорат қилишга жалб этиш.

5. Вазирлар Маҳкамасининг Комиссияси кундалик фаолиятида Комиссия раиси томонидан тасдиқланган йиллик ва йил чораги режаларига мувофиқ иш олиб боради. Комиссия мажлисларида фавқулодда вазиятларда огоҳлантириш ва ҳаракатлар қилиш масалалари кўриб чиқилади. Комиссия ўз ваколат доирасида барча республика вазирликлари, давлат қўмиталари, бирлашмалари, Қорақалпоғистон Республикаси Вазирлар Кенгаши, вилоят, шаҳар ва туман ҳокимликлари, қайси идорага бўйсунишидан қатъи назар, ташкилотлар, корхоналар ва муассасалар учун бажариш мажбур бўлган қарорлар қабул қилади. Комиссия мажлислари ўртасидаги даврда зарур қарорлар Комиссия раиси ёки унинг биринчи ўринбосари томонидан қабул қилиниб, тегишли кўрсатмалар тарзида ижрочиларга етказилади. Фавқулодда вазиятлар рўй берганда авария фалокат ва табиий офат, эпидемия ва эпизоотияларнинг тури, уларнинг кўлами ва оқибатларига қараб Комиссия таркибидан тезкор гуруҳлар ташкил этилади. Бу гуруҳларга Комиссия раиси ёки унинг ўринбосарлари бошчилик қиладилар ва фавқулодда вазиятлар оқибатларини тугатишга раҳбарликни таъминлайдилар.

6. Комиссия раиси Комиссия зиммасига юклатилган вазифалар ва функцияларнинг бажарилиши учун масъул бўлиб, Комиссия аъзолари ўртасида вазифаларни тақсимлайди, Комиссия ва унинг аппарати ишини ташкил этади.

7. Комиссия раисига амалдаги қонунчиликка биноан қуйидаги ҳуқуқлар берилади:

Ўзбекистон Республикасининг «Фавқулодда ҳолат тўғрисида»ги Қонунига мувофиқ, фавқулодда вазият зонасида жамоат тартибини катта молиявий ва моддий бойликлар тўпланган жойларни, аҳолининг ҳаётий фаолиятини таъминловчи ва халқ хўжалиги объектларини қўриқлашни кучайтириш, шунингдек, фавқулодда вазиятлар зонасида фуқароларнинг кириш- чиқиши учун махсус режимни жорий этиш;

Ўзбекистон Республикаси Президенти билан келишилган ҳолда, фавқулодда ҳолат эълон қилинган ҳудудда фавқулодда вазият ва характерига қараб, офат рўй берган районларда фуқароларнинг яшаши ва юриш-туришининг алоҳида тартибини ўрнатиш;

Фавқулодда вазият оқибатларининг олдини олиш ёки тугатиш учун зарур транспорт, тиббий, қутқариш, қайта тиклаш ҳамда бошқа куч воситаларни, Ўзбекистон Республикаси Президентининг фармойишига биноан ҳарбий бўлинмалар ва қисмларни жалб этиш;

Фавқулодда вазиятлар рўй берган зоналарда ва уларнинг оқибатларини тугатиш учун бўлган ҳаракатларда барча зарур моддий- техника, тиббий, озиқ-овқат ва бошқа давлат ва идора ресурслари, резервлари ва захираларидан фойдаланиш.

Ўзбекистон Республикаси Мудофаа вазирлиги зиммасига фавқулодда вазиятларда ва уларнинг оқибатларини тугатишда бошқарув бўйича мутахассис кадрларнинг малакасини оширишни фавқулодда вазиятларда аҳолини ҳаракат қилишга тайёрлаш ва такомиллаштириш ишларини ташкил этиш юклатилади.

Комиссия ўз тасарруфида қуйидагиларга эга:

тегишли режалаштирилган давр учун иқтисодий ва ижтимоий ривожлантириш давлат режаларида эҳтиёт чораларини ва фавқулодда вазиятлар оқибатларини тугатиш бўйича кузда тутилмаган ишларни амалга оширишга мўлжалланган махсус молиявий ва моддий-техника резервлари. Мазкур резервларнинг ҳажмлари ва номенклатураси тўғрисидаги таклифлар тегишли равишда вазирликлар ва идоралар томонидан комиссия билан келишилган ҳолда тайёрланади ва Вазирлар Маҳкамасининг иккинчи бўлими томонидан мувофиқлаштирилади.

Комиссия томонидан ажратилган маблағларни сарфлаш ва резервлардан фойдаланиш унинг қарори билан амалга оширилади.

Комиссия ишчи аппаратининг ташкилий тузилиши Комиссия раиси томонидан белгиланади.

Комиссия аппарати фавқулодда вазиятларнинг олдини олиш, уларнинг оқибатида кўриладиган зарарни камайтиришга қаратилган тадбирларни амалга ошириш бўйича кундалик ишларни ташкил этади, фавқулодда вазиятларда огоҳлантириш ва ҳаракатлар қилиш бўйича Ўзбекистон Республикаси Давлат тизимининг тайёрлигини назорат қилиб боради. Комиссия мажлисларига ҳужжатлар тайёрлайди, Комиссия қарорларини ижрочиларга етказади, уларнинг бажарилишини назорат қилади.

Потенциал хавфли объектлари бўлган республика вазирликлари, давлат қўмиталари, идоралари, бирлашмалари раҳбарлари (раҳбарларнинг биринчи ўринбосарлари) бошчилик қиладиган фавқулодда вазиятлар бўйича комиссиялар тузадилар. Улар ўзларига қарашли объектларда ва уларга тенгдош районларда фавқулодда вазиятларнинг олдини олиш, уларнинг етказиши мумкин бўлган зарарини камайтириш ва улар оқибатларини тугатиш бўйича тадбирлар ҳамда ишларни тайёрлаш ва ўтказиш учун шахсан масъулдирлар.

Фавқулодда вазиятлар бўйича тармоқ комиссиялари бўйсунувчи корхоналарнинг фавқулодда вазиятлар бўйича объект комиссияларининг фаолиятига, хавфсиз ва чиқитсиз технологияни ишлаб чиқиш ва жорий этиш, ҳимоя ва фавқулодда вазиятларнинг оқибатларини тугатишнинг зарур воситаларини ишлаб чиқиш юзасидан ягона техника сиёсатини ўтказиш, экстремал шароитда бошқариш бўйича мутахассис кадрлар тайёрлаш, фавқулодда вазиятлар оқибатларини тугатишда объект комиссияларига ёрдам бериш, жумладан, фавқулодда вазиятлар бўйича вилоят, шаҳар комиссияларининг куч ва воситаларини бу ишларга жалб этиш (келишув бўйича) ишларига услубий раҳбарлик қилиш, бу ишларни мувофиқлаштириш ва назорат қилишни амалга оширишлари керак.

Комиссия вазирликлар, давлат қўмиталари, концернлар, идоралар, бирлашмалар ва потенциал хавфли объектларда навбатчилик -диспетчерлик хизматини ташкил этади. Фуқаро мудофааси бўйича иккинчи бўлимларнинг штатдаги ходимлари вазирликлар, давлат қўмиталари, концернлар, идоралар, бирлашмаларнинг фавқулодда вазиятлар бўйича комиссияларининг ишчи органи ҳисобланади.

Потенциал хавфли объектлари бўлган Ўзбекистон Республикаси вазирликлари, давлат қўмиталари, концернлари, идоралари, бирлашмалари маҳаллий шароитлардан келиб чиққан ҳолда фавқулодда вазиятлар бўйича комиссиялар ҳақида идоравий низомларни ишлаб чиқадилар, ўз ишларида Вазирлар Маҳкамаси Комиссиясининг Вақтинчалик низомидан фойдаланадилар.

Вазирликнинг комиссия ҳақидаги низоми Вазирлар Маҳкамаси Комиссияси билан келишилган ҳолда, вазир томонидан тасдиқланади. Комиссиянинг шахсий таркиби: раис, раис ўринбосарлари, комиссия аъзолари ҳайъати ( қўмита ) қарори билан тасдиқланади.

Халқ хўжалиги объектининг фавқулодда вазиятлар бўйича Комиссиясининг намунавий лойиҳасини вазирликлар, давлат қўмиталари, концернлар, бирлашмалар (тармоқ комиссиялари) ишлаб чиқадилар. Объект комиссиялари ўз низомида асосий вазифаларни, функцияларни, таркибни ва ҳуқуқларни, фавқулодда вазият хавфи бўлганда унинг олдини олиш ва шундай ҳоллар рўй берганда ҳаракат қилиш бўйича ишларни ташкил этишни, (маҳаллий хусусиятларни ҳисобга олган ҳолда ) жалб этиладиган куч ва воситаларни аниқлайдилар.

Хусусий (цех) ва объект вазиятларини объект комиссиялари зарур ҳолларда фавқулодда вазиятлар бўйича (шаҳар) ва тармоқ комиссияларининг тезкор гуруҳлари, куч ва воситалари иштирокида бартараф этадилар.

Тармоқ комиссиялари идорага қарашли қайси корхоналарда аҳолини шикастланиш (зарарланиш) хавфидан хабардор қилишнинг муайян тизимлари бўлишини белгилайдилар. Уларни жиҳозлашни назорат қилишни ана шу комиссиялар амалга оширадилар.

Офицерлар таркиби билан комплектланган фуқаро мудофааси штаби мавжуд бўлган вилоятлар шаҳарлар ва шаҳарларнинг туманларида фуқаро мудофааси бошлиғи — фавқулодда вазиятлар бўйича комиссия раиси этиб ҳокимнинг биринчи ўринбосари тайинланади. Ишчи аппарати функцияси фуқаро мудофааси штаби ва иккинчи бўлим ходимларига юклатилади.

Республика тез ҳаракат қилиш кўп профилли маркази (РТҲКПМ) республика ҳудудида экстремал вазиятларда одамларни қутқариш бўйича профессионал бош ташкилот бўлиб, фавқулодда вазиятларнинг олдини олиш ва шундай ҳоллар рўй берганда ҳаракат қилиш бўйича ягона Давлат тизимига киради.

РТҲКПМ фаолиятига умумий раҳбарлик қилиш Вазирлар Маҳкамасининг фавқулодда вазиятлар бўйича Комиссияси раиси зиммасига юклатилади ва у Республика тез ҳаракат қилиш кўп профилли маркази ҳақидаги низомни тасдиқлайди.

РТҲКПМнинг белгиланган шаклдаги гувоҳномасини олган қутқазувчилар фавқулодда вазиятлар рўй берган зонага кириш (чиқиш) ҳуқуқига эгадирлар.