Ushbu Qonunda quyidagi asosiy tushunchalar ishlatilmoqda:

“metrologiya” — oʻlchovlar, ularning yagona birlikda boʻlishini taʼminlash usullari va vositalari hamda talab qilinadigan aniqlikka erishish yoʻllari haqidagi fan;

“yagona oʻlchov birligi” — oʻlchovlarning natijalari qonunlashtirilgan birliklarda aks ettirilgan va xatoliklari berilgan ehtimollikda maʼlum boʻlgan oʻlchov holati;

“oʻlchov vositasi” — oʻlchovlar uchun foydalaniladigan va normalangan metrologik xususiyatga ega boʻlgan texnika vositasi;

“birlik etaloni” — fizik oʻlcham birligini boshqa oʻlchov vositalariga oʻtkazish maqsadida uni qayta hosil qilish va saqlash uchun moʻljallangan oʻlchov vositasi;

“davlat etaloni” — vakolat berilgan milliy organning qarori bilan Oʻzbekiston Respublikasi hududida oʻlchov birligining oʻlchami sifatida eʼtirof etilgan etalon;

“metrologiya xizmati” — davlat organlari va yuridik shaxslarning metrologiya xizmatlari tarmogʻi hamda ularning oʻlchovlar yagona birlikda boʻlishini taʼminlashga qaratilgan faoliyati;

“davlat metrologiya nazorati” — metrologiya qoidalariga rioya etilishini tekshirish maqsadida davlat metrologiya xizmati organlari amalga oshiradigan faoliyat;

“oʻlchov vositalarini tekshiruvdan oʻtkazish” — oʻlchov vositalarining belgilab qoʻyilgan texnik talablarga muvofiqligini aniqlash va tasdiqlash maqsadida davlat metrologiya xizmati organlari (vakolat berilgan boshqa organlar, tashkilotlar) tomonidan bajariladigan operatsiyalar majmui;

“oʻlchov vositalarini kalibrlash” — metrologik jihatlarning haqiqiy qiymatlarini va oʻlchov birliklarining qoʻllashga yaroqliligini aniqlash hamda tasdiqlash maqsadida kalibrlash laboratoriyasi bajaradigan operatsiyalar majmui;

“oʻlchov vositalarini yasash (taʼmirlash, sotish, ijaraga berish) uchun litsenziya” — davlat metrologiya xizmati tomonidan yuridik va jismoniy shaxslarga beriladigan, mazkur faoliyat turlari bilan shugʻullanish huquqini guvohlantiruvchi hujjat.

Metrologiya toʻgʻrisidagi qonun hujjatlari ushbu Qonundan va Oʻzbekiston Respublikasining oʻzga qonun hujjatlaridan iboratdir.

Qoraqalpogʻiston Respublikasida metrologiya sohasidagi munosabatlar Qoraqalpogʻiston Respublikasi qonun hujjatlari bilan ham tartibga solinadi.

Basharti xalqaro shartnomada yoki bitimda Oʻzbekiston Respublikasining metrologiya toʻgʻrisidagi qonun hujjatlaridagidan oʻzgacha qoidalar belgilangan boʻlsa, xalqaro shartnoma yoki bitim qoidalari qoʻllanadi.

Metrologiyaga oid faoliyatni davlat tomonidan boshqarishni metrologiya boʻyicha milliy organ — Oʻzbekiston Respublikasi Vazirlar Mahkamasi huzuridagi Oʻzbekiston Davlat standartlash, metrologiya va sertifikatsiya markazi (“Oʻzdavstandart”) amalga oshiradi.

“Oʻzdavstandart” vakolatiga:

metrologiyaga oid faoliyatni mintaqalararo va tarmoqlararo muvofiqlashtirish;

fizik oʻlcham birligi etalonlarini yaratish, tasdiqlash, saqlash va qoʻllash qoidalarini belgilash;

oʻlchov vositalari, usullari va natijalariga qoʻyiladigan umumiy metrologik talablarni aniqlash;

davlat metrologiya tekshiruvi va nazoratini amalga oshirish;

metrologiya masalalari boʻyicha normativ hujjatlarni, shu jumladan davlatning boshqa boshqaruv organlari bilan hamkorlikda Oʻzbekiston Respublikasining butun hududida majburiy kuchga ega boʻlgan normativ hujjatlarni qabul qilish;

metrologiya sohasida ilmiy va muhandis-texnik kadrlar tayyorlash;

Oʻzbekiston Respublikasining metrologiya sohasidagi xalqaro shartnomalariga rioya etilishi ustidan nazoratni amalga oshirish;

metrologiya masalalari boʻyicha xalqaro tashkilotlar faoliyatida qatnashish kiradi.

Oʻzbekiston Respublikasida Xalqaro oʻlchamlar tizimi (SI)ning fizik oʻlcham birliklarini belgilangan tartibda qoʻllashga yoʻl qoʻyiladi.Fizik oʻlcham birliklarining nomi, belgisi, ularni yozish va qoʻllash qoidalari “Oʻzdavstandart”ning taqdimnomasiga binoan Oʻzbekiston Respublikasi Vazirlar Mahkamasi tomonidan tasdiqlanadi.

Oʻzbekiston Respublikasi Vazirlar Mahkamasi Xalqaro oʻlchamlar tizimiga kiritilmagan oʻlchamlarni qoʻllashga ruxsat berishi mumkin.

Tashqi savdo faoliyatini amalga oshirish chogʻida kontrakt shartlariga muvofiq fizik oʻlchamlarning oʻzga birliklari ham ishlatilishi mumkin.

Fizik oʻlchamlarning birliklari etalonlar vositasida saqlanadi va qayta tayyorlanadi.

Etalonlarni yaratish, tasdiqlash, saqlash va qoʻllash tartibini “Oʻzdavstandart” belgilaydi.

Foydalanishda boʻlgan oʻlchov vositalari oʻlchov natijalarining qonunlashtirilgan birliklarda belgilab qoʻyilgan aniqlikda boʻlishini taʼminlashi va qoʻllash shartlariga mos kelishi lozim.

Texnika vositalarini oʻlchov vositalariga mansub deb topish mezonini “Oʻzdavstandart” belgilaydi.

Oʻlchovlarni bajarish uslubiyotlari oʻlchov natijalarining xatoliklarini baholashni oʻz ichiga olishi va oʻlchov oʻtkazishning mavjud sharoitlarida belgilab qoʻyilgan aniqlikni taʼminlashi lozim.

Oʻlchovlarni bajarish uslubiyotlarini ishlab chiqish va attestatsiya qilish tartibini “Oʻzdavstandart” belgilaydi.

Oʻzbekiston Respublikasi metrologiya xizmati davlat metrologiya xizmatidan va yuridik shaxslarning metrologiya xizmatlaridan tarkib topadi.

“Oʻzdavstandart” boshchilik qiladigan davlat metrologiya xizmatiga Qoraqalpogʻiston Respublikasi, viloyatlar va Toshkent shahridagi davlat metrologiya xizmati organlari kiradi.

Davlat metrologiya xizmati organlari davlat metrologiya tekshiruvi va nazoratini, shuningdek faoliyatning boshqa turlarini amaldagi qonun hujjatlariga muvofiq amalga oshiradi.

Yuridik shaxslarning metrologiya xizmatlari zarurat boʻlgan hollarda oʻlchovlarning yagona birligini taʼminlash boʻyicha ishlarni bajarish va metrologiya nazoratini amalga oshirish uchun tuziladi.

Yuridik shaxslar metrologiya xizmatlarining huquq va burchlari davlat metrologiya xizmati organlari bilan kelishib olingan nizomlar bilan belgilanadi.

Davlat metrologiya tekshiruvi va nazorati davlat metrologiya xizmati organlari tomonidan metrologiya normalari va qoidalariga rioya etilishini tekshirish maqsadida amalga oshiriladi.

Davlat metrologiya tekshiruvi va nazorati metrologiya sohasidagi qonun hujjatlari talablariga muvofiq amalga oshiriladi.

Quyidagilar davlat metrologiya tekshiruvi va nazoratining obyektlari hisoblanadi:

etalonlar;

oʻlchov vositalari;

moddalar va materiallar tarkibi hamda xossalarining standart namunalari;

axborot-oʻlchov tizimlari;

oʻlchovlarni bajarish uslubiyotlari;

metrologiya normalari va qoidalarida nazarda tutilgan oʻzga obyektlar.

Davlat metrologiya tekshiruvi va nazorati:

sogʻliqni saqlash, veterinariya, atrof-muhitni muhofaza qilish;

moddiy boyliklarni va energetika resurslarini hisobga olish;

savdo-tijorat, bojxona, pochta va soliq operatsiyalarini oʻtkazish;

zaharli, yengil alangalanuvchan, portlovchi va radioaktiv moddalarni saqlash, tashish hamda yoʻq qilib tashlash;

davlat mudofaasini taʼminlash;

mehnat xavfsizligini va transport harakati xavfsizligini taʼminlash;

sertifikatlanadigan mahsulotning xavfsizligi va sifatini aniqlash;

geodezik va gidrometeorologik ishlar;

oʻlchov vositalarini davlat sinovidan, tekshiruvdan, kalibrlashdan, taʼmirlash va metrologik attestatsiyadan oʻtkazish;

foydali qazilmalarni qazib olish;

milliy va xalqaro sport rekordlarini roʻyxatga olishga nisbatan tatbiq etiladi.

Oʻzbekiston Respublikasining normativ hujjatlariga binoan davlat metrologiya tekshiruvi va nazorati faoliyatning oʻzga doiralariga nisbatan ham tatbiq etilishi mumkin.

Davlat metrologiya tekshiruvi va nazorati:

oʻlchov vositalarini (keyinchalik ularning turini tasdiqlash sharti bilan) sinash;

oʻlchov vositalarini tekshiruvdan oʻtkazish;

yuridik va jismoniy shaxslarni oʻlchov vositalarini tayyorlash, tekshiruvdan oʻtkazish, taʼmirlash, kalibrlash va sotish huquqini beradigan litsenziyalar bilan taʼminlash hamda akkreditatsiya qilish;

oʻlchov vositalarining holati va qoʻllanilishini, oʻlchovlarning bajarilish uslubiyotlarini tekshiruvdan oʻtkazish, metrologiya qoidalariga rioya etilishini nazorat qilish tarzida amalga oshiriladi.

“Oʻzdavstandart” qaroriga binoan zarurat boʻlgan hollarda davlat metrologiya tekshiruvi va nazoratining oʻzga turlari ham belgilanishi mumkin.

Ushbu Qonunning 14-moddasida koʻrsatilgan doiralarda foydalaniladigan, ishlab chiqarilishi va import boʻyicha chetdan olib kelinishi lozim boʻlgan oʻlchov vositalari davlat sinovlaridan (keyinchalik ularning turini tasdiqlash sharti bilan) yoki metrologik attestatsiyadan oʻtkazilishi lozim.

Oʻlchov vositalarining davlat sinovlarini oʻtkazish, turini tasdiqlash va Davlat reyestriga kiritishni “Oʻzdavstandart” amalga oshiradi.

Tasdiqlangan oʻlchov vositalariga yoki ularning foydalanish hujjatlariga ishlab chiqaruvchi Davlat reyestri belgisini qoʻyishi shart.

Boshqa davlatlarning oʻlchov vositalarini sinash va metrologik attestatsiyalash natijalari tuzilgan shartnomalar hamda bitimlarga muvofiq eʼtirof etiladi.

Tekshiruvdan oʻtkazilishi lozim boʻlgan oʻlchov vositalari turkumlarining roʻyxati “Oʻzdavstandart” tomonidan tasdiqlanadi.

Yuridik shaxslarning akkreditatsiya qilingan metrologik xizmatlariga oʻlchov vositalarini tekshiruvdan oʻtkazish huquqi berilishi mumkin.

Boshqa davlatlarda amalga oshirilgan oʻlchov vositalarini tekshirish natijalari xalqaro shartnomalar va bitimlar asosida eʼtirof etiladi.

Ushbu Qonunning 14-moddasida koʻrsatib oʻtilgan doiralarda qoʻllanilishi mumkin boʻlgan oʻlchov vositalarini yuridik va jismoniy shaxslarning talabnomalari boʻyicha tayyorlash, tekshiruvdan oʻtkazish, taʼmirlash, sotish, ularning importi va ijarasi bilan shugʻullanishga litsenziya boʻlgan taqdirdagina yoʻl qoʻyiladi.

Mazkur ishlarni bajarish huquqini beruvchi faoliyatga litsenziya Oʻzbekiston Respublikasi Vazirlar Mahkamasi belgilaydigan tartibda beriladi.

Ushbu Qonunning qoidalari, shuningdek metrologiya normalari va qoidalari buzilishida aybdor boʻlgan Oʻzbekiston Respublikasining yuridik va jismoniy shaxslari, davlat boshqaruv organlari amaldagi qonun hujjatlariga muvofiq javobgar boʻladilar.

Davlat tomonidan quyidagilar:

metrologiyani rivojlantirish istiqbollarini ishlab chiqish;

metrologiya sohasida rasmiy axborotlar bilan taʼminlash;

metrologiya boʻyicha xalqaro, mintaqaviy tashkilotlarning ishida qatnashish va metrologiya boʻyicha chet el milliy xizmatlari bilan ishlar bajarish;

metrologiya boʻyicha xalqaro, mintaqaviy normalar hamda qoidalarni ishlab chiqish va ishlab chiqishga qatnashish;

metrologiya sohasidagi normativ hujjatlarni ishlab chiqish;

metrologiya boʻyicha umumdavlat ahamiyatiga molik ilmiy-tadqiqot va oʻzga ishlarni oʻtkazish;

oʻlchovlarning yagona birligini taʼminlashga doir “Oʻzdavstandart” tomonidan tasdiqlanadigan normativ hujjatlarni ishlab chiqish;

fizik oʻlcham birliklarining etalonlarini va oʻta aniq namunaviy oʻlchov vositalarini ishlab chiqish, takomillashtirish, yasash, saqlash, qoʻllash, sotib olish va asrash;

moddalar va materiallar tarkibi hamda hossalarining standart namunalarini, shuningdek moddalar va materiallarning fizik konstantalari hamda xossalariga oid standart spravka maʼlumotlari ishlab chiqish va joriy etish davlat tizimlarini rivojlantirishga doir ishlar;

davlat tekshiruvi va nazoratiga doir ishlar albatta budjetdan moliyaviy taʼminlanishi shart.

Oʻlchov vositalarini sinash, tekshiruvdan oʻtkazish, standartlashtirilmagan oʻlchov vositalarini attestatsiya qilish, oʻlchovlarni bajarish uslubiyotlarini attestatsiya qilish, normativ hujjatlarni ekspertiza qilish, yuridik hamda jismoniy shaxslarni oʻlchov vositalarini tayyorlash, tekshiruvdan oʻtkazish, taʼmirlash, kalibrlash, realizatsiya qilish va ijarasi bilan shugʻullanish huquqini beruvchi litsenziyalar bilan taʼminlash va ularni akkreditatsiyadan oʻtkazish boʻyicha yuridik hamda jismoniy shaxslarga koʻrsatiladigan metrologik ishlar va xizmatlar, shuningdek metrologik faoliyatning oʻzga turlari uchun tuziladigan shartnomalarning shartlariga muvofiq manfaatdor shaxslar tomonidan haq toʻlanadi.