Shakllantirilayotgan huquqiy, qonunchilik bazasining va huquqni qo‘llash amaliyotining mamlakatni isloh qilish hamda modernizatsiyalash maqsad va vazifalariga muvofiqligini ta’minlash ustidan monitoring qilish maqsadida:

1. O‘zbekiston Respublikasi Adliya vazirligi huzurida Normativ-huquqiy hujjatlarning amalga oshirilishi ustidan monitoring qilish markazi (bundan buyon matnda Markaz deb yuritiladi) tashkil qilinsin.

2. Belgilansinki, Markaz:

yuridik shaxs huquqlariga ega bo‘lgan, o‘z faoliyatida O‘zbekiston Respublikasi Adliya vaziriga hisobot beradigan mustaqil axborot-tahlil muassasasi hisoblanadi;

adliya vazirining o‘rinbosari — direktor rahbarligi ostida faoliyat ko‘rsatadi;

respublika budjeti hamda Sudlar va adliya organlarini rivojlantirish jamg‘armasi mablag‘lari hisobidan moliyalashtiriladi.

3. Quyidagilar Markazning asosiy vazifalari etib belgilansin:

mamlakatning qonun ijodkorligi, huquqiy bazasini rivojlantirish va isloh qilishni, uning jamiyatni demokratlashtirish va yangilash, mamlakatni isloh qilish hamda modernizatsiyalashning ustuvor maqsad va vazifalariga muvofiqligini tizimli tahlil qilish;

sotsial-iqtisodiy, ijtimoiy-siyosiy, gumanitar hamda boshqa faoliyat sohalarida demokratik o‘zgartirishlarni amalga oshirish uchun zarur bo‘lgan normativ-huquqiy hujjatlarni tayyorlash dasturlarining vazirliklar va idoralar tomonidan bajarilishini monitoring qilish, ularning amalga oshirilayotgan islohotlarning maqsad va vazifalariga, inson huquqlari va erkinliklarini himoya qilish bo‘yicha talablarga, xalqaro normalar va standartlarga, O‘zbekiston Respublikasi Konstitutsiyasi va qonunlariga muvofiqligini baholash;

huquqni qo‘llash amaliyotini tizimli tahlil etish, yangilanayotgan va yangi qabul qilinayotgan normativ-huquqiy hujjatlarning vazirliklar, davlat qo‘mitalari, idoralar, huquqni muhofaza qilish organlari, shu jumladan prokuratura va sudlovni amalga oshirish organlari, Adliya vazirligi bo‘linmalari, shuningdek mahalliy davlat hokimiyati organlari faoliyatida qay darajada amalga oshirilayotganligi ustidan doimiy nazorat olib borish;

jamiyatni demokratlashtirish va yangilash, mamlakatni isloh qilish hamda modernizatsiyalashning maqsad va vazifalarini hisobga olgan holda islohotlarning huquqiy, qonunchilik bazasini yangilash va rivojlantirish, huquqni qo‘llash amaliyotini takomillashtirish, huquqiy tartibga solishning yaxlitligi, tizimliligini, qonunchilik normalarining bir xilda qo‘llanilishini ta’minlash bo‘yicha takliflar ishlab chiqish.

4. Normativ-huquqiy hujjatlarning amalga oshirilishi ustidan monitoring qilish markazining tuzilmasi, shtat jadvali va Nizomi 1, 1a va 2-ilovalarga* muvofiq tasdiqlansin.

Markaz xodimlarining cheklangan umumiy soni 34 birlikdan iborat, shu jumladan boshqaruv xodimlari soni — Adliya vazirligi markaziy apparati boshqaruv xodimlari sonini 12 birlikka qisqartirish va Markazga qo‘shimcha 22 ta shtat birligi ajratish hisobiga 28 birlikdan iborat etib belgilansin.

O‘zbekiston Respublikasi Adliya vaziriga belgilangan cheklangan xodimlar soni va mehnat haqi fondi doirasida Markazning tasdiqlangan tuzilmasiga o‘zgartirishlar kiritish huquqi berilsin.

5. Markaz xodimlariga O‘zbekiston Respublikasi Adliya vazirligi xodimlari uchun belgilangan mehnat haqi shartlari tadbiq etilsin.

6. O‘zbekiston Respublikasi Moliya vazirligi (R. Azimov) 2006-yildan boshlab har yili davlat budjetining xarajatlarida Markazni ta’minlash, texnik jihozlash uchun mablag‘larni nazarda tutsin.

7. O‘zbekiston Respublikasi Adliya vazirligi (B. Mustafoyev):

Toshkent shahar hokimligi (A. To‘xtayev) bilan birgalikda bir oy muddatda Markazning joylashtirilishi va obodonlashtirilishini ta’minlasin;

Markazni ofis mebeli, kompyuter texnikasi hamda uning ishini tashkil etish uchun zarur bo‘lgan boshqa moddiy-texnikaviy vositalar bilan jihozlash chora-tadbirlarini amalga oshirsin;

ikki oy muddatda Hukumatning qonun hujjatlari loyihalariga oid ish rejalarini tayyorlash va qabul qilish hamda uning ijrosini monitoring qilish tartibini ishlab chiqsin va tasdiqlash uchun O‘zbekiston Respublikasi Vazirlar Mahkamasiga kiritsin.

8. O‘zbekiston Aloqa va axborotlashtirish agentligi (A. Aripov) bir oy muddatda Markazni belgilangan tartibda zarur aloqa turlari va vositalari, shu jumladan hukumat aloqasi bilan, shuningdek Internet tarmog‘iga ulanishini ta’minlasin.

9. Markaz:

Oliy Majlis palatalarining qonunlari, qarorlari, O‘zbekiston Respublikasi Prezidentining farmonlari, qarorlari va farmoyishlari, O‘zbekiston Respublikasi Vazirlar Mahkamasining qaror va farmoyishlari, vazirliklar va idoralarning normativ-huquqiy hujjatlari bir nusxadan yuborilishi majburiy bo‘lgan tashkilotlar ro‘yxatiga;

O‘zbekiston Respublikasi Davlat statistika qo‘mitasi, moliya, tashqi iqtisodiy aloqalar, investitsiyalar va savdo vazirliklari, mehnat va aholini ijtimoiy muhofaza qilish, ichki ishlar vazirliklari, Davlat soliq qo‘mitasi, Davlat bojxona qo‘mitasi, Davlat mulki qo‘mitasi, Bosh prokuraturasi, Oliy sud va Oliy xo‘jalik sudi, boshqa vazirliklar va idoralarning statistika axboroti yuborilishi majburiy bo‘lgan reyestrga kiritilsin.

10. Adliya vazirligi bir oy muddatda qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risida takliflar kiritsin.

11. Mazkur qarorning ijrosini nazorat qilish O‘zbekiston Respublikasi Prezidentining Davlat maslahatchisi T.A. Xudoybergenov zimmasiga yuklansin.