Mazkur Tartib O‘zbekiston Respublikasi Vazirlar Mahkamasining 1999-yil 14-yanvardagi 19-sonli “Dori vositalari va tibbiy mahsulotlarni sotishni tartibga solish haqida”gi qaroriga muvofiq ishlab chiqilgan bo‘lib, statsionar davolash-profilaktika muassasalarida budjet mablag‘lari hisobidan sotib olinadigan dori-darmon vositalari va tibbiyot mahsulotlarni berish, hisobga olish va ulardan foydalanish nazoratini tashkil qilish umumiy uslublari va shakllarini e’tiborga oladi, bu hujjat 1999-yilning 1-martidan amalga kiritiladi.

1. Tibbiy sanitariya xizmatining kafolatlangan hajmi doirasida bepul xizmat ko‘rsatuvchi statsionar davolash-profilaktika muassasalarida quyidagilar hisobga olinadi:

a) dori vositalari, damlama va vaksinalar, shifobaxsh o‘simliklar xom ashyosi, shifobaxsh ma’danli suvlar, dezinfeksiyalovchi moddalar, tikuv materiallari va boshqa tibbiy mahsulotlar;

b) qon, uning preparatlari va komponentlari;

v) reaktivlar, rentgen tasma, spirt va boshqalar;

g) bog‘lash materiallari: doka, bint, paxta, siquvchi kleyonka va qog‘oz, alegnin va boshqalar;

d) yordamchi materiallar: mumlangan, pergament va filtrlovchi qog‘ozlar, qog‘oz quti va xaltachalar, kapsula va g‘iloflar, qalpoqcha, tiqin, iplar, signaturalar, yorliq, rezina doirachalar, qatron va retseptur bankalari;

e) xarid qilingan dori vositalarining narxiga qo‘shilmay, to‘lov varaqalarida alohida ko‘rsatilgan idishlar: 500 ml va undan kattaroq hajmli sklyanka va bankalar, shisha idishlar, bidonlar, quti va qaytariladigan idishlar.

2. Dori vositalari va tibbiy mahsulotlar shifoxona dorixonasidan quyidagi maqsadlar uchun tarqatiladi:

ijtimoiy ahamiyatga ega bo‘lgan kasalliklar va atrofdagilar uchun xavf tug‘diruvchi kasalliklar (sil, onkologik, ruhiy, narkologiya, endokrin, infeksiyaviy, tanosil, OITS, moxov va kasb kasalliklariga chalingan shaxslar)ga maxsus tibbiy yordam ko‘rsatish;

aholiga davolash-profilaktika muassasalarida shoshilinch, tez tibbiy yordam ko‘rsatish;

bolalarni tekshiruvdan o‘tkazish va davolash (pullik shifoxonalardan tashqari);

chaqiruv komissiyasi yo‘llanmalari bo‘yicha 18 — 27 yoshli chaqiriluvchi shaxslarni va 15 — 17 yoshli o‘smirlarni tekshiruvdan o‘tkazish va davolash;

tug‘ishga yordam beruvchi xizmatlar ko‘rsatish (pul to‘lanadigan muassasalardan tashqari);

davlat davolash-profilaktika muassasalarida imtiyozli toifalarga mansub bemorlar (nogiron, urush faxriylari, chin yetimlar)ni davolash.

3. Mazkur Tartibning 1-bandida sanab o‘tilgan dori vositalari va tibbiy mahsulotlarning hisobi muassasalar tarkibida dorixona mavjud yoki mavjud emasligiga qarab har xil olib boriladi.

4. Shifoxona tarkibida ichki dorixonasi bo‘lgan statsionar davolash-profilaktika muassasalarida dori vositalari va tibbiy mahsulotlarni berish, hisobga olish va ulardan foydalanishni nazorat qilish Sog‘liqni saqlash vazirligining amaldagi yo‘riqnomasiga muvofiq olib boriladi.

5. Bir vaqtning o‘zida bo‘limning katta hamshirasi dorixonadan olingan dori vositalari hisobini olib borish uchun “Olingan dorilarni hisobga olish jurnali”ni yuritadi, bu jurnalda qaysi bemorlar uchun dori olingan bo‘lsa, ularning familiya, ism, otasining ismlari va kasallik varaqalarining tartib raqamlarini ro‘yxatdan o‘tkazadi, shuningdek dori vositalari va tibbiy mahsulotlarni shifokor tavsiyalarini bajarish uchun palata hamshiralariga imzo qo‘ydirib tarqatadi.

6. Palata hamshiralari shifokor tavsiyalarining bajarilishi haqida va unga ishlatilgan dorilarni qayd etish, shuningdek bemorlarning familiya, ism, otasining ismlari va kasallik varaqalarining tartib raqamlarini belgilab borish uchun maxsus “Foydalanilgan dorilarni hisobga olish jurnali”ni yuritadilar.

Qayd etilgan jurnalning sahifalari, tartib raqami qo‘yilgan, qalin ip o‘tkazilib tikilgan va muassasa rahbarining imzosi bilan muhrlangan bo‘lishi shart.

Mazkur jurnalda statsionar davolanishda bo‘lgan bemorlar haqiqatda ularga ishlatilgan dorilar miqdorini tasdiqlab imzolarini qo‘yadilar.

Es-xushini yo‘qotgan yoki reanimatsiya bo‘limi hamda sun’iy nafas oldirish bo‘limida davolanayotgan bemorlarga ishlatilgan dori vositalari va tibbiy mahsulotlar miqdori hisobga olish jurnalida bo‘lim mudiri, davolovchi shifokor va katta hamshiraning imzolari bilan tasdiqlanadi.

7. “Olingan dorilarni hisobga olish jurnali” va “Foydalanilgan dorilarni hisobga olish jurnali” kitoblari to‘ldirilib bo‘lingandan so‘ng katta hamshira va palata hamshiralari tomonidan bo‘lim mudirlariga saqlash uchun topshiriladi.

8. Foydalanilgan “Olingan dorilarni hisobga olish jurnali” va “Foydalanilgan dorilarni hisobga olish jurnali” bo‘limda 3 yil davomida saqlanadi.

9. Tarkibida ichki dorixonasi mavjud bo‘lmagan statsionar davolash-profilaktika muassasalari “Dori-darmon” Davlat aksiyadorlik uyushmasi (DAU)ning o‘zlari biriktirilgan xo‘jalik hisobidagi dorixonalaridan dori vositalari va tibbiy mahsulotlar bilan ta’minlanadilar. Davolash-profilaktika muassasalariga barcha dori vositalari va tibbiy mahsulotlar faqat joiz ehtiyojlariga qarab sotib olinadi.

10. Dori vositalari va tibbiy mahsulotlar xo‘jalik hisobidagi dorixonalardan statsionar davolash-profilaktika muassasalariga Sog‘liqni saqlash vazirligining amaldagi yo‘riqnomasiga muvofiq yozib beriladi.

11. Dorixonadan olingan va foydalanilgan dorilarning hisobini olib borish, mazkur Tartibning ikkinchi bo‘limi 5, 6, 7, 8-bandlaridagi “Olingan dorilarni hisobga olish jurnali” va “Foydalanilgan dorilarni hisobga olish jurnali”da bayon etilgan tarzda, tarkibida dorixona mavjud bo‘lmagan statsionar davolash-profilaktika muassasalarida ham qo‘llaniladi.

12. Har bir davolash-profilaktika muassasasi o‘zining muayyan sharoiti va xususiyatlaridan kelib chiqqan xolda, mazkur Tartib talablarining bajarilishini ta’minlaydigan muassasa hujjatini ishlab chiqadi va amalga kiritadi.

13. Mazkur Tartibning bajarilishi va budjet mablag‘lari hisobidan sotib olinadigan dori vositalari va tibbiy mahsulotlardan foydalanish uchun mas’uliyat statsionar davolash-profilaktika muassasalarining rahbarlariga yuklatiladi.