Ўзбекистон Республикасининг Шаҳарсозлик кодексига мувофиқ буюраман:

1. Ўзбекистон Республикаси Қурилиш ва уй-жой коммунал хўжалиги вазирлиги томонидан қабул қилинган айрим шаҳарсозлик нормалари ва қоидаларига иловага мувофиқ ўзгартириш ва қўшимчалар киритилсин.

2. Мазкур буйруқ Ўзбекистон Республикаси Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекцияси ва «Ўзсаноатқурилишматериаллари» уюшмаси билан келишилган.

3. Мазкур буйруқ расмий эълон қилинган кундан эътиборан кучга киради.

1. ШНҚ 2.03.03-21 «Армоцемент конструкциялар» шаҳарсозлик нормалари ва қоидаларида (ҳисоб рақами 303, 2024 йил 14 октябрь):

а) 2-банднинг иккинчи хатбошиси қуйидаги таҳрирда баён этилсин:

«армоцемент — майда заррали бетондан тайёрланадиган, бутун ҳажми бўйлаб тўқилган ёки пайвандланган металл симли ёхуд металл бўлмаган, шу жумладан базальт асосидаги композит тўрлар билан арматураланган материал;»;

б) 4-банднинг биринчи хатбошиси қуйидаги таҳрирда баён этилсин:

«4. Армоцемент конструкциялар чиғаноқлар ва бурмалар кўринишидаги қопламаларда, девор элементларида, осма шифтларда, санитария-техник воситалар элементларида, пардозлаш элементларида, шунингдек ободонлаштириш ва йўл инфратузилмаси учун мўлжалланган майда йиғма бетон буюмларда қўлланилишига йўл қўйилади.».

2. ШНҚ 2.03.07-21 «Тош ва арматураланган тошли конструкциялар» шаҳарсозлик нормалари ва қоидаларининг (ҳисоб рақами 275, 2024 йил 19 август) 13-бандида:

а) тўртинчи хатбоши қуйидаги таҳрирда баён этилсин:

«кўп қатламли деворларнинг юза қатламини бўйламасига арматуралаш учун — полимер композит материаллардан, шунингдек геотўрдан тайёрланган тўрлар;»;

б) олтинчи хатбоши қуйидаги таҳрирда баён этилсин:

«Кўп қатламли ташқи деворларнинг эгилувчан боғичлари учун А240 синфига мансуб пўлат арматура, тўр кўринишидаги полимер-композит материаллар, шу жумладан геотўрлар, шунингдек анкер мосламалари билан жиҳозланган алоҳида стерженлар қўлланилиши лозим.».

3. ШНҚ 2.03.13-24 «Поллар» шаҳарсозлик нормалари ва қоидаларининг (ҳисоб рақами 262, 2024 йил 1 июль) 54-банди учинчи хатбошиси қуйидаги таҳрирда баён этилсин:

«қуйма (яхлит) ёки йиғма стяжкалар остида зичлиги 150 кг/м³ гача бўлган синтетик боғловчили минерал (базальт ва шиша толали) плиталар ва бордонлар, зичлиги 25 дан 50 кг/м³ гача бўлган пенополистирол плиталар, керамзит ва кварц қумлардан иссиқлик ва товуш ўтказмайдиган қатламларни тайёрлашни;».

4. ШНҚ 2.03.14-22 «Композит полимер арматурали бетон конструкциялар» шаҳарсозлик нормалари ва қоидаларининг (ҳисоб рақами 296, 2024 йил 30 сентябрь) 2-банди қуйидаги мазмундаги хатбоши билан тўлдирилсин:

«базальт композит — базальт толалар билан мустаҳкамланган полимер композитли материал.».

5. ШНҚ 2.03.15-23 «Энергия тежамкор деворбоп тўсувчи конструкциялар. Бинолар қурилишида автоклавда тайёрланган силикатли газбетон блоклардан терилган конструкциялар. Лойиҳалаш ва қурилиш талаблари» шаҳарсозлик нормалари ва қоидаларининг (ҳисоб рақами 186, 2023 йил 19 июль) 49-банди биринчи хатбошиси қуйидаги таҳрирда баён этилсин:

«49. Горизонтал арматуралашда катак ўлчамлари 10×10 мм дан 35×35 мм гача бўлган ҳамда узилишга мустаҳкамлиги 50 кН/м дан кам бўлмаган композит арматураловчи тўрлардан, шу жумладан базальт геотўрлардан, ҚМҚ 2.01.03-19 талабларига мувофиқ сейсмик ҳудудларда фойдаланишга йўл қўйилади.».

6. ШНҚ 2.05.01-23 «Темир йўллар. Лойиҳалаш талаблари» шаҳарсозлик нормалари ва қоидаларида (ҳисоб рақами 291, 2024 йил 17 сентябрь):

а) 891-банд қуйидаги таҳрирда баён этилсин:

«891. Таркибида массасига нисбатан 50 фоиздан ортиқ миқдорда 2 мм дан 0,05 мм гача бўлган зарраларни сақловчи қумлоқлардан ташқари намлигига кўра оқувчанлик даражаси WЛ > 0,23 бўлган барча турдаги лойли тупроқлардан қурилган йўл тўшамасида совуқ таъсирида шишиш деформацияларининг олдини олиш мақсадида асосий майдонча зонасидаги конструкция кучайтирилиши лозим. Бунда балласт призмаси остида дренажловчи тупроқли ҳимоя қатлами ёки базальт-композит геотекстил материаллар билан биргаликда ишлайдиган дренажловчи ҳимоя қатлами қурилиши назарда тутилиши керак.»;

б) 893-банддаги «геотекстил» деган сўздан олдин «базальт-композит,» деган сўзлар билан тўлдирилсин;

д) 894 ва 906-бандлардаги «геотекстил материаллар» деган сўзлардан олдин «базальт-композит,» деган сўзлар билан тўлдирилсин.

7. ШНҚ 2.08.12-24 «Моддий маданий мерос объектлари» шаҳарсозлик нормалари ва қоидаларининг (ҳисоб рақами 334, 2025 йил 7 февраль) 143-банди биринчи хатбошисидаги «чордоқларни изоляциялашда» деган сўзлардан кейин «базальт,» деган сўз билан тўлдирилсин.