Vazirlar Mahkamasi qaror qiladi:

1. Quyidagilar:

O‘zbekiston Respublikasi Qishloq va suv xo‘jaligi vazirligi Mashina va asbob-uskunalarning texnikaviy holatini nazorat qilish davlat bosh inspeksiyasi to‘g‘risidagi nizom 1-ilovaga muvofiq;

mulkchilik shakllaridan qat’i nazar, xo‘jaliklar, korxonalar va tashkilotlardan, xususiy tadbirkorlardan, jismoniy shaxslardan traktorlarni, boshqa mashinalarni texnikaviy ko‘rikdan va ro‘yxatdan hamda mexanizatorlarni attestatsiyadan o‘tkazish uchun “Davtexnazorat” inspeksiyalari tomonidan undiriladigan yig‘imlar ro‘yxati 2-ilovaga muvofiq tasdiqlansin.

2. O‘zbekiston SSR Ministrlar Sovetining 1969-yil 16-apreldagi 178-son va 1976-yil 19-yanvardagi 36-son qarorlari o‘z kuchini yo‘qotgan deb hisoblansin.

1. Qishloq xo‘jaligi mashina va asbob-uskunalarining texnikaviy holatini nazorat qilish O‘zbekiston Respublikasi Qishloq va suv xo‘jaligi vazirligi Mashina va asbob-uskunalarning texnikaviy holatini nazorat qilish davlat bosh inspeksiyasi (“Boshdav-texnazorat”) tomonidan tasarrufidagi organlar orqali amalga oshiriladi, unga quyidagilar kiradi:

Qoraqalpog‘iston Respublikasi Vazirlar Kengashi, viloyatlar hokimliklari huzuridagi “Davtexnazorat” bo‘limlari;

tuman va shahar hokimliklari huzuridagi “Davtexnazorat”ning tuman va shahar inspeksiyalari.

“Davtexnazorat” tuman inspeksiyalarining xodimlari soni belgilangan tartibda xo‘jaliklar, korxonalar va tashkilotlarda mavjud bo‘lgan har 600—800 traktor, don o‘rish-yig‘ish kombayni, paxta terish mashinasi, makkajo‘xori o‘rish-yig‘ish kombaynlari hamda boshqa o‘zi yurar shassilar hisobiga bir nafar muhandis-inspektor hisobidan belgilanadi.

2. “Boshdavtexnazorat”, “Davtexnazorat” bo‘limlari, inspeksiyalarini:

O‘zbekiston Respublikasi Qishloq va suv xo‘jaligi vazirligida — ayni vaqtda davlat bosh muhandis-inspektori hisoblanadigan “Boshdavtexnazorat” boshlig‘i;

Qoraqalpog‘iston Respublikasida, viloyatlarda — ayni vaqtda Qoraqalpog‘iston Respublikasi Vazirlar Kengashi, viloyat hokimliklari huzuridagi ayni vaqtda davlat bosh muhandis-inspektorlari hisoblanadigan bo‘lim boshliqlari;

tumanlar, shaharlarda — tuman, shahar inspeksiyalari boshliqlari — tuman, shahar hokimliklari huzuridagi davlat bosh muhandis-inspektorlari boshqaradilar.

Qoraqalpog‘iston Respublikasi va viloyatlar “Davtexnazorat” bo‘limlari boshliqlari belgilangan tartibda O‘zbekiston Respublikasi Qishloq va suv xo‘jaligi vazirligining “Boshdavtexnazorat” bilan kelishilgan holda Qoraqalpog‘iston Respublikasi Vazirlar Kengashi va viloyatlar hokimliklari tomonidan lavozimga tayinlanadilar va lavozimdan ozod qilinadilar, “Davtexnazorat”ning tuman va shahar inspeksiyalari boshliqlari “Davtexnazorat”ning viloyat bo‘limi bilan kelishilgan holda tuman va shahar hokimliklari tomonidan lavozimga tayinlanadilar va lavozimdan ozod qilinadilar.

3. “Boshdavtexnazorat” bevosita O‘zbekiston Respublikasi Qishloq va suv xo‘jaligi vaziriga bo‘ysunadi.

4. “Boshdavtexnazorat”, Qoraqalpog‘iston Respublikasi Vazirlar Kengashining, viloyat hokimliklarining “Davtexnazorat” bo‘limlari yuridik shaxs hisoblanadilar, bank muassasalarida hisob-kitob, joriy va boshqa schyotlarga, O‘zbekiston Respublikasi Davlat gerbi tasviri tushirilgan va o‘z nomi yozilgan muhrga hamda shtampga, “Davtexnazorat”ning tuman inspeksiyalari o‘z nomi yozilgan yumaloq muhrga ega bo‘ladilar.

5. “Davtexnazorat” organlari diagnostika asboblari, moslamalar va jihozlanganlik tabeliga muvofiq nomenklatura bo‘yicha anjom bilan jihozlangan avtomobillar bilan ta’minlanadi.

6. Mashina va asbob-uskunalarning texnikaviy holatini nazorat qilish bo‘yicha ishlarni o‘tkazishda korxona va tashkilotlar tekshirishlar vaqtida “Davtexnazorat” organlarining davlat muhandis-inspektorlariga zarur yordam ko‘rsatadilar.

7. “Davtexnazorat” organlari ishlarni xo‘jaliklarning, korxonalar va tashkilotlarning keng faollariga, shuningdek shtatsiz muhandis-inspektorlarga tayangan holda, davlat organlari, jamoat tashkilotlari bilan o‘zaro hamkorlikda o‘tkazadilar.

8. “Davtexnazorat” organlari quyidagilar bo‘yicha davlat nazoratini amalga oshiradilar:

idoraviy bo‘ysunishidan qat’i nazar, xo‘jaliklar, korxonalar va tashkilotlardagi traktorlar, kombaynlar va boshqa qishloq xo‘jaligi mashinalari hamda texnologik asbob-uskunalarning texnikaviy holati, shuningdek texnikaviy ishlatish, saqlash va hisobdan chiqarish qoidalariga rioya etish;

xo‘jaliklar, korxonalar va tashkilotlarda, shuningdek “O‘zqishloqxo‘jalikta’minottuzatish” davlat-kooperativ qo‘mitasining xo‘jaliklar bilan shartnomalar bo‘yicha mashina va asbob-uskunalarni ta’mirlovchi hamda ularga texnika xizmati ko‘rsatuvchi tashkilotlarida, ixtisoslashgan ta’mirlash ustaxonalari, zavodlarida traktorlar, kombaynlar, boshqa qishloq xo‘jaligi mashinalari, texnologik va chorvachilik asbob-uskunalarini (“O‘zsanoatkontexnazorat” davlat qo‘mitasi nazoratidagi asbob-uskunalardan tashqari) ta’mirlash hamda ularga texnika xizmati ko‘rsatish sifati;

xo‘jaliklar, korxonalar va tashkilotlarga sotilgan yoki shartnomalar bo‘yicha ular uchun ta’mirlangan traktorlar, avtomobillar, kombaynlar hamda boshqa mashina va asbob-uskunalardagi kafolatli muddat mobaynida aniqlangan kamchiliklarni bartaraf etishning tasdiqlangan tartibiga; xususiy tadbirkorlar va jismoniy shaxslarning qishloq xo‘jaligi texnikasini ro‘yxatdan o‘tkazish, texnikaviy ishlatish va xavfsizlik texnikasi qoidalariga rioya etish.

9. “Davtexnazorat” organlari o‘zlariga yuklangan vazifalarni bajarish maqsadida:

a) xo‘jaliklar, korxonalar va tashkilotlarda ta’mirlash ustaxonalarining hamda qishloq xo‘jaligi mashinalari va asbob-uskunalarini ta’mirlashga, ularga texnika xizmati ko‘rsatishga mo‘ljallangan boshqa turg‘un va ko‘chma obyektlarning holatini, shuningdek ularning zarur texnologik asbob-uskunalar, o‘lchash asboblari, anjomlar va moslamalar bilan ta’minlanganligini tekshiradilar;

b) qishloq xo‘jaligi mashinalari va asbob-uskunalarining, shu jumladan chorvachilik mashinalari va asbob-uskunalarining texnikaviy holatini, ularni texnikaviy ishlatish, ularga texnika xizmati ko‘rsatish, ularni ta’mirlash, saqlash va hisobdan chiqarish qoidalariga, shuningdek kafolat muddati mobaynida mashina va asbob-uskunalarda aniqlangan kamchiliklarni bartaraf qilishning tasdiqlangan qoidasiga rioya etilishini tekshiradilar;

v) mashina va asbob-uskunalar uchun ehtiyot qismlarning saqlanish holatini tekshiradilar;

g) yuqori organlarga, idoralarga va shu kabilarga ular tomonidan qishloq xo‘jaligi mashina va asbob-uskunalarining texnikaviy tayyorligini oshirish, texnikaviy ishlatilishini va ta’mirlanishini yaxshilash masalalari bo‘yicha tashkiliy-texnikaviy tadbirlar rejalarini, yo‘riqnomalar, tavsiyanomalar va boshqa hujjatlarni ishlab chiqish uchun belgilangan tartibda takliflar tayyorlaydilar;

d) qishloq xo‘jaligi texnikasi, mashina va asbob-uskunalarini texnikaviy ishlatish, saqlash, ta’mirlash va texnika xizmati ko‘rsatishni tashkil etishdagi ilg‘or tajribani yoyishga ko‘maklashadilar;

e) bo‘ysunishiga ko‘ra “Davtexnazorat” organlari ishi to‘g‘risida axborotlar taqdim etadilar.

10. “Davtexnazorat” organlarining davlat muhandis-inspektorlari qishloq xo‘jaligi texnikasi, mashina va asbob-uskunalarini tekshirishni tekshirilayotgan xo‘jaliklar, korxonalar va tashkilotlar, ixtisoslashtirilgan ta’mirlash ustaxonalari, ta’mirlash zavodlari, savdo bazalari va boshqa tashkilotlar vakillari ishtirokida amalga oshiradilar.

11. Qishloq xo‘jaligi mashina va asbob-uskunalarini texnikaviy ishlatish, saqlash, hisobdan chiqarish, ta’mirlash, ularga texnika xizmati ko‘rsatish qoidalari buzilishlarini tekshirishda kamchiliklar aniqlangan barcha hollarda “Davtexnazorat” davlat muhandis-inspektorlari aniqlangan qoida buzilishlarini bartaraf etish to‘g‘risida buyruq yozishga majburdirlar, biron-bir moddiy zarar yetkazilgan hollarda esa dalolatnoma ham tuziladi va aybdor shaxslardan amaldagi qonunchilikka muvofiq zarar summasi belgilangan tartibda undirib olinadi.

12. “Davtexnazorat” tuman, shahar inspeksiyalari zimmasiga bulardan tashqari quyidagilar ham yuklanadi:

a) idoraviy bo‘ysunishidan qat’i nazar, xo‘jaliklar, korxonalar va tashkilotlarga, shuningdek fermerlarga, kooperativlarga, shaxsiy qishloq xo‘jaligi texnikasiga ega bo‘lgan fuqarolarga traktorlar, o‘ziyurar shassi va traktor tirkamalari uchun, ularni ro‘yxatdan o‘tkazib, belgilangan tartibda yagona nomer belgilari, texpasportlar berish;

b) mulkchilik shakllaridan qat’i nazar, korxonalar va tashkilotlardan, xususiy tadbirkorlardan, jismoniy shaxslardan traktorlarni, boshqa mashinalarni texnikaviy ko‘rikdan va ro‘yxatdan hamda mexanizatorlarni attestatsiyadan o‘tkazganlik uchun yig‘imlar undirish;

v) traktorchi-mashinistlarni attestatsiyadan o‘tkazish bo‘yicha tuman malaka belgilash komissiyalari ishiga va ularga belgilangan namunadagi guvohnomalar berishga rahbarlik qilish;

g) mulkchilik shakllaridan qat’i nazar, korxonalar va tashkilotlarning, xususiy tadbirkorlarning, jismoniy shaxslarning ular uchun sotilgan yoki ta’mirlangan qishloq xo‘jaligi texnikasi sifatining zarur darajadaligi masalasiga doir e’tirozlarini ko‘rib chiqish bo‘yicha komissiyalarda qatnashish.

13. Tuman davlat bosh muhandis-inspektori xo‘jaliklar, korxonalar va tashkilotlardagi qishloq xo‘jaligi va yer qazish texnikasini ko‘rikdan o‘tkazish hamda amortizatsiya muddatlari o‘tgungacha halokatlar yoki tabiiy ofatlar oqibatida yaroqsiz holga kelgan texnika va asbob-uskunalarning ishlatishga yaroqsizligi va ularni tiklab bo‘lmasligi haqida xulosalar berish zimmasiga yuklanadigan komissiyaga boshchilik qiladi.

14. “Davtexnazorat” organlarining davlat muhandis-inspektorlari zimmalariga yuklangan vazifalarni bajarish maqsadida quyidagi huquqlarga egadirlar:

a) traktorlar, kombaynlar, boshqa qishloq xo‘jaligi mashinalari, asbob-uskunalarining texnikaviy holatini ko‘rikdan o‘tkazish hamda ularni texnikaviy ishlatish, saqlash, hisobdan chiqarish, ularga texnika xizmati ko‘rsatish va ta’mirlash qoidalariga rioya etilishini, shuningdek ularning ta’mirlash sifatini tekshirish uchun xo‘jaliklar, korxonalar va tashkilotlar, ixtisoslashtirilgan ta’mirlash ustaxonalari, ta’mirlash zavodlari, ta’mirlash-ishlab chiqarish, qayta ishlash korxonalari, savdo bazalarining ishlab chiqarish obyektlariga, shu jumladan yangi va ta’mirlangan qishloq xo‘jaligi texnikasi, ta’mirlash fondi hamda ehtiyot qismlar saqlanadigan maydonchalarga kirish va tegishli qishloq xo‘jaligi mashinalari, asbob-uskunalarini ko‘rikdan o‘tkazishga ko‘rsatishni talab qilish;

b) xo‘jaliklar, korxonalar va tashkilotlarning, shuningdek ushbu xo‘jaliklar bilan shartnomalar bo‘yicha traktorlar, kombaynlar, boshqa qishloq xo‘jaligi mashinalari va asbob-uskunalarini ta’mirlovchi hamda ularga texnika xizmati ko‘rsatuvchi tashkilotlar va korxonalarning mansabdor shaxslaridan “Davtexnazorat” organlari vakolatiga kiritilgan masalalarni hal etish uchun zarur bo‘lgan ma’lumotlar va hujjatlarni olish;

v) traktorlar, kombaynlar, boshqa qishloq xo‘jaligi mashinalari, asbob-uskunalaridan, shu jumladan chorvachilikdagilardan foydalanish qoidalari buzilishlarini bartaraf etish to‘g‘risida qishloq xo‘jaligi texnikasi va asbob-uskunalarini ta’mirlash hamda texnika xizmati ko‘rsatish tashkilotlari va korxonalari rahbarlari uchun majburiy bo‘lgan ko‘rsatmalar berish;

g) holati texnika xizmati ko‘rsatishni, ta’mirlashni talab qiladigan yoki ishlash xavfsizligini ta’minlamaydigan traktorlar, kombaynlarni hamda boshqa qishloq xo‘jaligi mashinalari va asbob-uskunalarini ishlatishni taqiqlash;

d) traktorlar, kombaynlar, boshqa qishloq xo‘jaligi mashinalari va asbob-uskunalaridan jinoyatkorona ehtiyotsizlik bilan foydalanish, ularni saqlash, hisobdan chiqarish, ta’mirlash, ularga texnika xizmati ko‘rsatish faktlari to‘g‘risidagi materiallarni, aybdor shaxslarni javobgarlikka tortish uchun, hokimliklarga, qishloq xo‘jaligi organlariga yuborish;

e) qishloq xo‘jaligi mashina va asbob-uskunalarining zarur texnikaviy holatda bo‘lishini ta’minlashda, ularni texnikaviy ishlatishni yaxshilashda, qishloq xo‘jaligida neft mahsulotlarini saqlashda va tejam bilan sarflashda namuna ko‘rsatgan xodimlarni rag‘batlantirish to‘g‘risida xo‘jaliklar va ularning yuqori organlari rahbarlariga takliflar kiritish.

15. “Boshdavtexnazorat” mansabdor shaxslari qishloq xo‘jaligi mashina va asbob-uskunalarini texnikaviy ishlatish qoidalarini qo‘pol ravishda buzganlik hamda boshqa qoida buzishlar uchun aybdor shaxslarni O‘zbekiston Respublikasi Ma’muriy javobgarlik to‘g‘risidagi Kodeksning 112 va 139-moddalariga muvofiq ma’muriy javobgarlikka tortishga haqlidirlar.

16. “Davtexnazorat” xizmati muhandis-inspektorlari o‘z zimmalariga yuklangan vazifalarni bajarmaganlik uchun amaldagi qonunchilikka muvofiq javob beradilar.