“Buxgalteriya hisobi to‘g‘risida” gi O‘zbekiston Respublikasi Qonunining 5-moddasiga asosan va O‘zbekiston Respublikasi Vazirlar Mahkamasining 1992-yil 23-noyabrdagi 553-sonli qarori bilan tasdiqlangan O‘zbekiston Respublikasi Moliya vazirligi to‘g‘risidagi nizomga muvofiq buyuraman:

1. O‘zbekiston Respublikasi buxgalteriya hisobining milliy standarti (6-son BHMS) “Ijara hisobi” ilovaga muvofiq tasdiqlansin.

2. O‘zbekiston Respublikasi Moliya vazirligi tomonidan 1998-yil 30-sentabrda 45-son bilan tasdiqlangan buxgalteriya hisobining milliy standarti (6-son BHMS) “Lizing hisobi” (1998-yil 16-oktabr, ro‘yxat raqami 503-son — Me’yoriy hujjatlar axborotnomasi, 1999-y., 6-son) o‘z kuchini yo‘qotgan deb hisoblansin.

3. Mazkur buyruq O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab 10 kun o‘tgandan keyin kuchga kiradi.

Mazkur Buxgalteriya hisobining milliy standarti (BHMS), “Buxgalteriya hisobi to‘g‘risida”gi O‘zbekiston Respublikasi Qonuniga (O‘zbekiston Respublikasi Oliy Majlisining Axborotnomasi, 1996-y., 9-son, 142 modda), “Lizing to‘g‘risida” gi O‘zbekiston Respublikasi Qonuniga (O‘zbekiston Respublikasi Oliy Majlisining Axborotnomasi, 1999-y., 5-son, 108 modda, O‘zbekiston Respublikasi Qonun hujjatlari to‘plami, 2003-y., 3-son, 63-modda) asosan ishlab chiqilgan va O‘zbekiston Respublikasida buxgalteriya hisobini me’yoriy tartibga solish elementi bo‘lib hisoblanadi.

1. Mazkur BHMS ning maqsadi bo‘lib ijara operatsiyalarini buxgalteriya hisobida yuritish va moliyaviy hisobotlarda aks ettirishning yagona uslubiy asosini aniqlash (belgilash) hisoblanadi.

2. Mazkur BHMS quyidagi obyektlar va operatsiyalarga qo‘llanilmaydi:

a) tabiat resurslari, shu jumladan neft, gaz va boshqa qayta tiklanmaydigan resurslarni qidiruv va foydalanish bilan bog‘liq bo‘lgan ijara kelishuvlari;

b) yer maydonlari ijarasi;

v) intellektual mulk obyektlari bo‘yicha litsenziya kelishuvlari.

3. Mazkur BHMS nuqtai nazaridan ijara quyidagilarga bo‘linadi:

a) lizing (moliyaviy ijara);

b) uzoq muddatli ijara;

v) qisqa muddatli ijara.

4. Lizing (moliyaviy ijara) — ijara munosabatlarining alohida turi bo‘lib, unda bir taraf (lizing beruvchi) ikkinchi tarafning (lizingga oluvchining) topshirig‘iga binoan uchinchi tarafdan (sotuvchidan) lizing shartnomasida shartlashilgan mol-mulkni (lizing obyektini) mulk qilib sotib oladi va uni shu shartnomada belgilangan shartlarda haq evaziga egalik qilish va foydalanish uchun lizingga oluvchiga o‘n ikki oydan ortiq muddatga beradi. Bunda lizing shartnomasi quyidagi shartlardan biriga javob berishi kerak:

a) lizing shartnomasining muddati tugagach, lizing obyekti lizingga oluvchining mulki bo‘lib o‘tsa;

b) lizing shartnomasining muddati lizing obyekti xizmat muddatining 80 foizidan ortiq bo‘lsa yoki lizing obyektining lizing shartnomasi tugaganidan keyingi qoldiq qiymati uning boshlang‘ich qiymatining 20 foizidan kam bo‘lsa;

v) lizing shartnomasining muddati tugagach, lizingga oluvchi lizing obyektini uning bozor qiymatidan past narxda evazini to‘lab sotib olish huquqiga ega bo‘lsa, bunda ana shu huquqni amalga oshirish kunidagi lizing obyekti qiymati asos bo‘ladi;

g) lizing shartnomasi amal qiladigan davr uchun lizing to‘lovlarining umumiy summasi lizing obyekti qiymatining 90 foizidan ortiq bo‘lsa.

5. Uzoq muddatli ijara — ijaraga beruvchi ijarachiga haq evaziga mol-mulkni 12 oydan ko‘p muddatga egalik qilish va foydalanish yoki foydalanish huquqini beradigan kelishuv.

6. Qisqa muddatli ijara — ijaraga beruvchi ijarachiga haq evaziga mol-mulkni 12 oydan kam muddatga egalik qilish va foydalanish yoki foydalanish huquqini beradigan kelishuv.

7. Ikkilamchi ijara (ikkilamchi lizing) — ijarachi (lizingga oluvchi) ijaraga beruvchi (lizingga beruvchi) ning roziligi bilan, ijaraga beruvchi (lizingga beruvchi) ning oldida ijara (lizing) shartnomasi yuzasidan javobgarlikni saqlagan holda ijaraga olingan mulkni (lizing obyektini) boshqa shaxsga ikkilamchi ijara (ikkilamchi lizing) ga topshiradigan shartnoma munosabati.

8. Ijara (lizing) obyektlari — iste’mol qilinmaydigan har qanday buyumlar (ashyolar), shu jumladan korxonalar, mulkiy komplekslar, alohida binolar, inshootlar, uskunalar, transport vositalari, hamda boshqa ko‘char va ko‘chmas mulk (muomaladan chiqarilgan yoki muomalada bo‘lishi cheklangan boshqa mol-mulklar bundan mustasno).

9. Ijara muddatining boshlanishi — ijara shartnomasining shartlariga muvofiq ijarachi ijaraga olingan ijara obyektiga egalik qilish va foydalanish yoki foydalanish huquqini amalga oshirishni boshlagan sana. Bu ijarani dastlabki (boshlang‘ich) tan olish sanasi (ya’ni ijarani amalga oshirish natijasida tegishli aktiv va majburiyatlarning tan olinishi).

10. Ijara muddati — bekor qilinmaydigan ijara kelishuvi amal qiladigan davr, shuningdek har qanday keyingi davrlar bo‘lib, bu davrlar mobaynida ijarachi ijara shartnomasi tuzilganda aytib o‘tilgandek, mazkur kelishuvni uzaytirishi mumkin.

11. Lizing to‘lovlari — lizingga beruvchining lizing obyektini sotib olish uchun qilgan xarajatlarining hammasi yoki ko‘p qismini, shuningdek lizing obyektini yetkazib berish va belgilangan maqsadda foydalanish uchun uni yaroqli holga keltirish bilan bog‘liq bo‘lgan boshqa xarajatlarini lizingga oluvchi tomonidan qoplanishi hamda lizingga beruvchining daromadidir.

12. Lizingga beruvchining daromadi — lizing to‘lovlari bilan lizing obyektini sotib olish, uni yetkazib berish va belgilangan maqsadda foydalanish uchun yaroqli holga keltirish xarajatlari o‘rtasidagi farq sifatida aniqlanadigan, lizingga beruvchi tomonidan lizing operatsiyasini amalga oshirish natijasida oladigan daromadidir.

13. Ijara (lizing) obyektlarining joriy qiymati — ijara (lizing) obyektlarining muayyan bir sanadagi bozor baholari bo‘yicha qiymati yoki mazkur ijara obyektini sotib olish yoki ushbu bitimni amalga oshirishni xohlovchi bir-biriga qaram bo‘lmagan xabardor tomonlar o‘rtasidagi majburiyatni bajarish uchun yetarli bo‘lgan summa.

14. Kafolatlangan qoldiq qiymat — ijara shartnomasining boshlanishida aniqlangan ijara obyekti qiymatining bir qismi bo‘lib, ijarachi tomonidan yoki unga bog‘liq uchinchi taraf tomonidan kafolatlanadi (majburiyat qilib berkitiladi).

15. Kafolatlanmagan qoldiq qiymat — ijara obyekti (ijara shartnomasining boshlanishida aniqlangan) qiymatining bir qismi bo‘lib, uning sotilishini ijaraga beruvchi kafolatlamaydi yoki u ijaraga beruvchi bilan bog‘liq taraf tomonidangina kafolatlangan.

16. Minimal lizing to‘lovlari — lizingga oluvchi tomonidan lizing muddati davomida to‘lanadigan lizing to‘lovlari va lizing obyektining kafolatlangan qoldiq qiymati summasi.

Agar lizingga oluvchi lizing obyektini uni sotib olish sanasidagi joriy qiymatidan past narxda sotib olmoqchi bo‘lgan hollarda minimal lizing to‘lovlari butun lizing muddati davomidagi lizing to‘lovlari va lizing shartnomasida ko‘zda tutilgan lizing obyektini sotib olish summasidan tashkil topadi.

17. Diskontlash — kelajakda aniq bir vaqtda olinishi kutilayotgan pul mablag‘larining joriy ekvivalentini aniqlash.

18. Diskont stavkasi — vaqtning har xil paytiga taalluqli bo‘lgan pul summalarini bir vaqtga (paytga) keltirishda foydalanadigan stavka.

19. Minimal lizing to‘lovlarining diskontlangan qiymati — lizing shartnomasida ko‘zda tutilgan foiz stavkasi yoki qarz sarmoyasining o‘sib boruvchi foiz stavkasiga teng diskont stavkasi bo‘yicha tuzatilgan lizing muddatining boshlanishidagi minimal lizing to‘lovlarining joriy qiymati.

20. Lizing shartnomasida ko‘zda tutilgan foiz stavkasi — bu lizing muddatining boshlanishida lizing obyektining joriy qiymati va quyidagi miqdorlar: minimal lizing to‘lovlari va kafolatlanmagan qoldiq qiymati summasining diskontlangan qiymatining teng bo‘lishini ta’minlaydigan diskont stavkasidir.

21. Qarz sarmoyasining o‘sib boruvchi foiz stavkasi — bu xuddi shunday ijara shartnomasi uchun ijarachi to‘lashi lozim bo‘lgan foiz stavkasi yoki (agar ushbu ko‘rsatkichni aniqlash imkoni bo‘lmasa) ijarachi ijara muddati boshlanishida mol-mulkni (xuddi shunday muddatga va shunga o‘xshash ta’minot bilan) sotib olish uchun zarur bo‘lgan mablag‘larni qarzga olishda qabul qiladigan stavka yoki agar ularni aniqlash imkoniyati bo‘lmasa ijara muddatining boshlanishidagi O‘zbekiston Respublikasi Markaziy bankining rasmiy qayta moliyalashtirish stavkasi.

22. Lizing subyekti bo‘lib quyidagilar hisoblanadi:

a) lizingga beruvchi — lizing shartnomasi bo‘yicha lizingga oluvchiga kelgusida topshirish maqsadida lizing obyektini mulk qilib oluvchi shaxs;

b) lizingga oluvchi — egalik qilish va foydalanish uchun lizing shartnomasi bo‘yicha lizing obyektini olayotgan shaxs;

v) sotuvchi — lizingga beruvchiga lizing obyektini sotayotgan shaxs.

Lizing obyekti lizingga oluvchining krediti (qarzi) hisobidan olinayotgan taqdirda, aniq bir lizing obyektiga nisbatan lizingga beruvchining kreditori va lizingga oluvchi bir shaxs timsolida ish ko‘rishiga yo‘l qo‘yilmaydi.

Lizingga beruvchi lizing obyektini bo‘lgusi foydalanuvchidan keyinchalik uni xuddi shu shaxsga ijaraga berish uchun sotib olgan hollarda, lizingga oluvchi va sotuvchi bir shaxs bo‘lishiga yo‘l qo‘yiladi.

23. Lizingda lizing obyektiga egalik qilish va foydalanish huquqi bilan bog‘liq barcha tavakkalchiliklar lizingga oluvchiga o‘tkaziladi. Lizingga oluvchining buxgalteriya hisobida lizing aktiv va majburiyat sifatida lizing muddati boshlanishidagi lizing obyektining joriy qiymati yoki minimal lizing to‘lovlarining diskontlangan qiymati bo‘yicha, agar u past bo‘lsa, tan olinishi kerak.

24. Minimal lizing to‘lovlarining diskontlangan qiymatini hisoblashda diskontlaydigan omil bo‘lib, lizing shartnomasida ko‘zda tutilgan foiz stavkasi hisoblanadi, agarda uni aniqlash imkoniyati bo‘lsa, aks hollarda lizingga oluvchining qarz sarmoyasi bo‘yicha o‘sib boruvchi foiz stavkasidan foydalaniladi.

25. Lizing muddatining boshlanish vaqtida lizingga oluvchi va lizingga beruvchi lizing to‘lovlari jadvali (tartibi) ni kelishib oladi, unda lizingga beruvchining daromadi, lizing obyektining qiymatini qoplash bo‘yicha majburiyatlar va ularning lizing muddati davomida taqsimlanishi ko‘rsatiladi.

26. Lizing bo‘yicha foizlar lizing shartnomasi davomida davrlar bo‘yicha taqsimlangan bo‘lishi va har bir davrda qoplanmagan majburiyatlar qoldig‘iga doimiy foiz stavkasini o‘rnatish maqsadida lizing to‘lovlari jadvali (tartibi)da aks ettirilishi kerak.

27. Lizingga oluvchi tomonidan amalga oshirilgan lizing obyektini sotib olish, yetkazib berish yoki belgilangan maqsadda foydalanish uchun yaroqli holga keltirish bilan bog‘liq xarajatlar lizing obyektining qiymatiga qo‘shiladi.

28. Lizingga oluvchining lizing obyektini yaxshilash (obodonlashtirish, qo‘shimcha qurish, qo‘shimcha asbob uskunalar bilan ta’minlash, rekonstruksiya, modernizatsiya qilish, texnik qayta qurollantirish va boshqa) xarajatlari lizing obyekti qiymatini ko‘paytiruvchi kapital quyilmalar sifatida aks ettiriladi.

Agar lizing obyekti, lizingga beruvchining ruxsati bilan yaxshilangan bo‘lsa, shartnomaning amal qilish muddati tugagandan so‘ng yoki shartnoma bekor qilingach, lizingga oluvchi ana shu maqsad yo‘lida sarflagan barcha xarajatlarining qoplanishini talab qilish huquqiga ega, agarda lizing shartnomasida o‘zgacha shartlar ko‘zda tutilmagan bo‘lsa.

Lizingga beruvchining ruxsatisiz amalga oshirilgan lizing obyektini yaxshilashga sarflangan mablag‘lar (quyilmalar) va ularni lizing obyektiga zarar yetkazmagan holda ajratib olish imkoniyati bo‘lmasa, lizing shartnomasining amal qilish muddati tugagach yoki shartnoma bekor qilingach, lizingga beruvchiga tekinga o‘tadi. Biroq, agarda ularni lizing obyektiga zarar yetkazmagan holda ajratib olish mumkin bo‘lsa va agar lizingga beruvchi ularning qiymatini to‘lashga rozi bo‘lmasa, bunday hollarda lizingga oluvchi ularni o‘ziga ajratib olishi mumkin.

29. Lizingda har bir hisobot davri uchun lizing obyekti bo‘yicha amortizatsiya ajratmasi kabi xarajatlar yuzaga keladi. Lizing obyektlari bo‘yicha amortizatsiya hisoblash O‘zbekiston Respublikasi Moliya vazirligining 2003-yil 9-oktabrdagi 114-sonli buyrug‘i bilan tasdiqlangan Buxgalteriya hisobining milliy standarti (BHMS 5-son) “Asosiy vositalar” ga (2004-yil 20-yanvar, ro‘yxat raqami 1299-son — O‘zbekiston Respublikasi Qonun hujjatlari to‘plami, 2004-y., 3-son, 35-modda) muvofiq amalga oshiriladi.

30. Lizingga oluvchi lizing shartnomasi muddati tugagandan keyin lizing obyektiga mulkiy egalik qilish huquqini olishiga ishonchi bo‘lmasa, u holda u quyidagilardan qaysi biri qisqaligidan kelib chiqib, lizing shartnomasi muddati davomida yoki lizing obyektining xizmat qilish muddatida to‘liq amortizatsiya qilishi mumkin.

31. Aniq bir davrdagi lizingga oluvchining lizing obyekti bo‘yicha amortizatsiya ajratmasi va moliyaviy xarajatlari (lizing bo‘yicha foizlari) summasi mazkur davrda to‘lanishi kerak bo‘lgan lizing to‘lovlari summasiga teng bo‘lmasligi mumkin.

32. Lizing obyektini yillik qayta baholash lizingga oluvchi tomonidan qonunchilikda o‘rnatilgan tartibda amalga oshiriladi.

33. Lizing shartnomasi to‘xtatilganda lizing obyektini qaytarish, lizing shartnomasiga muvofiq lizing to‘xtatilgan sanadagi lizing obyektining qoplanmagan qiymati summasi bo‘yicha amalga oshiriladi.

Lizing obyektining chiqib ketishidan moliyaviy natija (foyda yoki zarar) lizing obyektining qoldiq (balans) qiymati va lizing to‘lovlari jadvali (tartibi) bo‘yicha qolgan qarz o‘rtasidagi farq sifatida lizing obyektining chiqib ketishi bilan bog‘liq bo‘lgan xarajatlar summasini hisobga olgan holda aniqlanadi.

Lizing obyektining chiqib ketishidan moliyaviy natija (foyda yoki zarar)ni aniqlaganda, oldingi qayta baholashlardagi lizing obyekti qiymatining ko‘paygan summasi, ya’ni oldingi baholashlardagi qiymat ko‘payishi summasining oldingi baholashlardagi qiymat pasayishi summasiga nisbatan ortgan qismi lizing obyektining chiqib ketishidan ko‘rilgan daromad tarkibiga qo‘shiladi va bir vaqtning o‘zida “Mulkni qayta baholash bo‘yicha tuzatishlar” schyoti bo‘yicha rezerv kapitalini kamaytiradi.

34. Lizingga beruvchining buxgalteriya hisobida lizing aktiv (debitorlik qarzi) sifatida lizing muddati boshlanishidagi lizing obyektining joriy qiymati yoki minimal lizing to‘lovlarining diskontlangan qiymati bo‘yicha, agar u past bo‘lsa, tan olinishi kerak.

35. Lizingga beruvchining daromadi lizing shartnomasi muddati davomida davrlar bo‘yicha taqsimlangan bo‘lishi va lizing shartnomasining har bir davrida qoplanmagan majburiyatlar qoldig‘iga doimiy foiz stavkasini o‘rnatish maqsadida lizing to‘lovlari jadvali (tartibi) da aks ettirilishi kerak.

36. Lizingga beruvchi tomonidan amalga oshirilgan va lizing shartnomasiga muvofiq lizingga oluvchi tomonidan qoplanadigan lizing obyektini yetkazib berish va belgilangan maqsadda foydalanish uchun uni yaroqli holga keltirish bilan bog‘liq bo‘lgan xarajatlar lizing obyektining qiymatiga qo‘shiladi. Bunda, agar lizing shartnomasiga muvofiq yuqoridagi xarajatlar lizingga oluvchi tomonidan qoplanmasa, ular yuzaga kelgan paytdagi tegishli hisobot davri xarajatlari sifatida tan olinadi.

37. Obyektni lizingga berish (olish) vaqtida lizingga beruvchining daromadi (lizingga oluvchining lizing foizi bo‘yicha xarajatlari) buxgalteriya hisobida aks ettirilmaydi.

Bunda lizingga beruvchining daromadi va lizingga oluvchining lizing foizi bo‘yicha xarajatlari, pulni to‘lash vaqti va kelib tushishidan qat’i nazar, tegishli hisobot davrlarida lizing to‘lovlari jadvali (tartibi)ga muvofiq hisoblanadi.

38. Keyingi lizing (qaytariluvchi lizing) sharti bilan mol-mulkni sotishga doir bitim, xuddi shu sotuvchiga uni keyinchalik lizingga qaytarish sharti bilan mol-mulkni sotishni o‘z ichiga oladi. Lizing to‘lovlari va sotish narxlari odatda o‘zaro bog‘liqdir, chunki ular haqida yagona bir narsa sifatida kelishib oladilar va ular uchun lizing obyekti qiymatini joriy narxlarda taqdim etish zarurati yo‘q.

39. Uzoq muddatli va qisqa muddatli ijaraning subyektlari bo‘lib quyidagilar hisoblanadi:

a) ijaraga beruvchi — mol-mulk egasi yoki qonunchilik yoki mulk egasi tomonidan mol-mulkni ijaraga berish huquqi berilgan vakolatli shaxs;

b) ijarachi — ijara shartnomasiga muvofiq mol-mulkni ijaraga oluvchi yuridik va jismoniy shaxs.

40. Uzoq muddatli ijaraning tan olinishi ijarachi va ijaraga beruvchining buxgalteriya hisobida xuddi lizingdagidek amalga oshiriladi.

41. Qisqa muddatli ijarada, ijara obyektiga egalik qilish bilan bog‘liq bo‘lgan barcha tavakkalchiliklar ijarachiga o‘tmaydi va shuning uchun qisqa muddatli ijara shartnomasi bo‘yicha olingan ijara obyektlari ijarachining balansida hisobga olinmasligi kerak.

42. Qisqa muddatli ijarada ijarachi tomonidan hisoblangan va to‘lanadigan ijara to‘lovlari, ularni foydalanish joyiga (maqsadiga) qarab mahsulot (ish, xizmat) larning ishlab chiqarish tannarxiga va (yoki) davr xarajatlariga olib boriladi.

43. Qisqa muddatli ijarada, ijaraga beruvchi tomonidan hisoblangan va olinadigan ijara tushumlari daromad sifatida tan olinadi.

44. Ijara shartnomasida ijara obyekti, ijara muddati tugashi yoki tugamasidan, agarda shartnomada shartlashilgan sotib olish narxining barchasi ijarachi tomonidan to‘langanda ijarachining mulkiga o‘tishi ko‘zda tutilishi mumkin.

Agar shartnomada ijara obyektini sotib olish ko‘rsatilmagan bo‘lsa, u tomonlarning qo‘shimcha kelishuvi bilan o‘rnatilishi mumkin, unda ijara obyektidan foydalanish uchun oldin to‘langan to‘lovlar sotib olish bahosida hisobga olinishi haqida kelishish huquqiga ega.

Ijara muddatining tugashi yoki uning tugaguniga qadar shartnomada ko‘zda tutilgan sotib olish narxini ijarachi tomonidan to‘liq kiritilgan holda va ijara obyektiga egalik qilish huquqi unga o‘tganda, u buxgalteriya hisobida ijarachining mulki sifatida hisobga olinishi shart.

45. Ijarachining ijara obyektini yaxshilash (obodonlashtirish, qo‘shimcha qurish, qo‘shimcha asbob-uskunalar bilan ta’minlash, rekonstruksiya, modernizatsiya qilish, texnik qayta qurollantirish va boshqa) xarajatlari ijara obyekti qiymatini ko‘paytiruvchi kapital quyilmalar sifatida aks ettiriladi.

Agar ijara obyekti, ijaraga beruvchining ruxsati bilan yaxshilangan bo‘lsa, shartnomaning amal qilish muddati tugagandan so‘ng yoki shartnoma bekor qilingach, ijarachi ana shu maqsad yo‘lida sarflagan barcha xarajatlarining qoplanishini talab qilish huquqiga ega, agarda ijara shartnomasida o‘zgacha shartlar ko‘zda tutilmagan bo‘lsa.

Ijaraga beruvchining ruxsatisiz amalga oshirilgan ijara obyektini yaxshilashga sarflangan xarajatlar (quyilmalar) va ularni ijara obyektiga zarar yetkazmagan holda ajratib olish imkoni bo‘lmasa, ijara shartnomasining amal qilish muddati tugagach yoki shartnoma bekor qilingach, ijaraga beruvchiga tekinga o‘tadi. Biroq, agarda ularni ijara obyektiga zarar yetkazmagan holda ajratib olish mumkin bo‘lsa va agar ijaraga beruvchi ularning qiymatini to‘lashga rozi bo‘lmasa, bunday hollarda ijarachi ularni o‘ziga ajratib olishi mumkin.

46. Moliyaviy hisobotlarda va unga tushuntirish xatida quyidagilar ochib berilishi lozim:

a) moliyaviy hisobotni taqdim qilish sanasida ijara (lizing) obyektlari hisoblangan aktivlar qiymati to‘g‘risida ma’lumotlar. Mazkur ijara mulklari bilan bog‘liq bo‘lgan qarzlar (debitorlik yoki kreditorlik) qisqa muddatli va uzoq muddatliga ajratilgan holda boshqa qarzlardan alohida tan olinishi kerak;

b) umumlashtirilgan shaklda lizing bo‘yicha lizing to‘lovlariga taalluqli majburiyatlar summasi va ularni to‘lash davri to‘g‘risidagi ma’lumotlar;

v) salmoqli moliyaviy cheklovlar, lizingni qayta tiklash huquqlari, lizing obyektlarini xarid qilish va lizing bilan bog‘liq bo‘lgan boshqa ko‘zda tutilmagan holatlar bo‘yicha ma’lumotlar;

g) har bir moliyaviy hisobotni tuzish sanasiga lizing to‘lovlarining qoldiq summasi va lizingga beruvchining daromadi, shuningdek lizing obyektining kafolatlangan qoldiq qiymati;

d) lizing davri uchun qoplanmagan majburiyat qoldig‘iga doimiy foiz stavkasini olish uchun lizingga beruvchining daromadi (lizing bo‘yicha foizlar) ni taqsimlashda foydalaniladigan usul;

e) moliyaviy hisobot tuzish sanasida ikkilamchi ijara (ikkilamchi lizing) dan olinishi kutilayotgan kelgusi ijara (lizing) to‘lovlari summasi to‘g‘risidagi ma’lumotlar.