Keyingi yillarda mamlakatimizda kasaba uyushmalari tashkilotlari ishining samaradorligini oshirishga, ular a’zolarining huquqlari himoya qilinishini ta’minlashga, shuningdek kasaba uyushmalari tashkilotlarining faoliyatini tartibga soluvchi huquqiy bazani rivojlantirishga qaratilgan chora-tadbirlar amalga oshirildi.

Shu bilan birga amaliyotda yuridik shaxs maqomiga ega bo‘lmagan kasaba uyushmalarining bo‘linmalari va boshlang‘ich kasaba uyushmalari tashkilotlari tomonidan bank hisobvaraqlarini ochish bilan bog‘lik muammolar mavjud bo‘lib, buning uchun soliq to‘lovchining identifikatsiya raqami olinishi taqozo etiladi.

Ushbu Qonun bilan O‘zbekiston Respublikasining Soliq kodeksiga yuridik shaxs maqomiga ega bo‘lmagan kasaba uyushmalarining bo‘linmalariga va boshlang‘ich kasaba uyushmalari tashkilotlariga soliq to‘lovchining identifikatsiya raqami berilishini nazarda tutuvchi qo‘shimcha kiritilmoqda.

Bundan tashqari “Kasaba uyushmalari to‘g‘risida”gi O‘zbekiston Respublikasi Qonuniga yuridik shaxs maqomiga ega bo‘lmagan kasaba uyushmalari bo‘linmalarining va boshlang‘ich kasaba uyushmalari tashkilotlarining adliya organlarida hisobga qo‘yilishi mumkinligini va ushbu tartib O‘zbekiston Respublikasi Vazirlar Mahkamasi tomonidan belgilanishini nazarda tutuvchi qo‘shimchalar kiritilmoqda.

Mazkur Qonun yuridik shaxs maqomiga ega bo‘lmagan kasaba uyushmalarining bo‘linmalari va boshlang‘ich kasaba uyushmalari tashkilotlari tomonidan moliyaviy faoliyatning to‘laqonli amalga oshirilishini ta’minlashga xizmat qiladi.

1-modda. O‘zbekiston Respublikasining 2019-yil 6-dekabrda qabul qilingan “Kasaba uyushmalari to‘g‘risida”gi O‘RQ-588-sonli Qonunining (O‘zbekiston Respublikasi Oliy Majlisi palatalarining Axborotnomasi, 2019-yil, № 12, 882-modda; 2021-yil, 4-songa ilova; 2022-yil, № 5, 464-modda; 2023-yil, № 11, 923-modda) 19-moddasi kuyidagi mazmundagi sakkizinchi va to‘qqizinchi qismlar bilan to‘ldirilsin:

“Yuridik shaxs maqomiga ega bo‘lmagan kasaba uyushmalarining bo‘linmalari va boshlang‘ich kasaba uyushmalari tashkilotlari o‘z ixtiyoriga ko‘ra adliya organlarida hisobga qo‘yiladi.

Yuridik shaxs maqomiga ega bo‘lmagan kasaba uyushmalarining bo‘linmalarini va boshlang‘ich kasaba uyushmalari tashkilotlarini hisobga qo‘yish tartibi O‘zbekiston Respublikasi Vazirlar Mahkamasi tomonidan belgilanadi”.

2-modda. O‘zbekiston Respublikasining 2019-yil 30-dekabrda qabul qilingan O‘RQ-599-sonli Qonuni bilan yangi tahrirda tasdiqlangan O‘zbekiston Respublikasining Soliq kodeksi (O‘zbekiston Respublikasi Oliy Majlisi palatalarining Axborotnomasi, 2019-yil, 12-songa 1-ilova; 2020-yil, № 3, 198-modda, № 10, 593-modda, № 11, 652-modda, № 12, 690, 691-moddalar; 2021-yil, № 1, 6-modda, № 4, 294-modda, 4-songa ilova, № 8, 800-modda, № 9, 901-modda, № 10, 968, 969, 972, 973-moddalar, № 12, 1199-modda; 2022-yil, № 2, 79-modda, № 3, 215, 216-moddalar, № 5, 461, 464, 467-moddalar, № 6, 570-modda, № 7, 664, 666-moddalar, № 12, 1190-modda; 2023-yil, № 6, 444, 446-moddalar, № 7, 540-modda, № 12, 1011-modda; 2024-yil, № 2, 106, 110, 111-moddalar) 127-moddasiga kuyidagi qo‘shimcha va o‘zgartirish kiritilsin:

kuyidagi mazmundagi ikkinchi qism bilan to‘ldirilsin:

“Adliya organlarida hisobga qo‘yilgan, yuridik shaxs maqomiga ega bo‘lmagan kasaba uyushmalarining bo‘linmalariga va boshlang‘ich kasaba uyushmalari tashkilotlariga soliq to‘lovchining identifikatsiya raqami ularning ixtiyoriga ko‘ra beriladi”;

ikkinchi — oltinchi qismlar tegishincha uchinchi — yettinchi qismlar deb hisoblansin.

3-modda. O‘zbekiston Respublikasi Vazirlar Mahkamasi huzuridagi Soliq qo‘mitasi va boshqa manfaatdor tashkilotlar ushbu Qonunning ijrosini, ijrochilarga yetkazilishini xamda mohiyati va ahamiyati aholi o‘rtasida tushuntirilishini ta’minlasin.

4-modda. O‘zbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

respublika ijro etuvchi hokimiyat organlari ushbu Qonunga zid bo‘lgan o‘z normativ-huquqiy hujjatlarini qayta ko‘rib chiqishlari va bekor qilishlarini ta’minlasin;

ushbu Qonun 1-moddasining uchinchi xatboshisida nazarda tutilgan tartibni ushbu Qonun kuchga kirganidan keyin ikki oy ichida belgilasin.

5-modda. Ushbu Qonun rasmiy e’lon qilingan kundan e’tiboran kuchga kiradi.