Ommaviy tadbirlarni oʻtkazishda fuqarolar xavfsizligini taʼminlash va jamoat tartibini saqlash chora-tadbirlarini kuchaytirish, shuningdek, ommaviy tadbir tashkilotchilari va tadbir oʻtkazish obyekti maʼmuriyatining masʼuliyatini oshirish maqsadida Vazirlar Mahkamasi qaror qiladi:

1. Belgilansinki, ommaviy tadbirlarga fuqarolarni reklama, aksiya va boshqa maqsadlarda oziq-ovqat, buyumlar hamda boshqa mahsulotlar va tovar-moddiy boyliklarni bepul tarqatish yoki haddan tashqari arzonlashtirilgan narxda sotish orqali jalb qilish taqiqlanadi.

2. Oʻzbekiston Respublikasi Milliy gvardiyasi va Ichki ishlar vazirligi tegishli vazirlik va idoralar bilan birgalikda:

ushbu qaror bilan belgilanayotgan talabga ommaviy tadbir tashkilotchilari va ommaviy tadbirni oʻtkazish obyekti maʼmuriyati tomonidan soʻzsiz rioya etilishi ustidan nazoratni kuchaytirsin;

ommaviy tadbirlarni oʻtkazish qoidalari buzilishiga yoʻl qoʻygan ommaviy tadbir tashkilotchilari va ommaviy tadbirni oʻtkazish obyekti maʼmuriyati Oʻzbekiston Respublikasining Maʼmuriy javobgarlik toʻgʻrisidagi kodeksida belgilangan tartibda javobgarlikka tortilishini taʼminlasin;

ushbu qaror bilan joriy etilayotgan talabning maqsadi, mazmun-mohiyati va ahamiyati aholi va tadbirkorlik subyektlari oʻrtasida tushuntirilishini tashkil etsin.

3. Oʻzbekiston Respublikasi Hukumatining ilovaga muvofiq ayrim qarorlariga ommaviy tadbirlarga fuqarolarni reklama, aksiya va boshqa maqsadlarda oziq-ovqat, buyumlar hamda boshqa mahsulotlar va tovar-moddiy boyliklarni bepul tarqatish yoki arzonlashtirilgan narxda sotish orqali jalb qilish taqiqlanishini nazarda tutuvchi oʻzgartirish va qoʻshimchalar kiritilsin.

4. Oʻzbekiston Respublikasi Ichki ishlar vazirligi va Milliy gvardiya vazirlik va idoralar bilan birgalikda bir oy muddatda oʻzlari qabul qilgan idoraviy normativ-huquqiy hujjatlarini ushbu qarorga muvofiqlashtirsin.

5. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov va Oʻzbekiston Respublikasi Milliy gvardiyasi qoʻmondoni R.M. Djurayev zimmasiga yuklansin.

1. Vazirlar Mahkamasining 2014-yil 29-iyuldagi 205-son qarori bilan tasdiqlangan Ommaviy tadbirlarni oʻtkazish qoidalarida:

a) 61-bandda:

quyidagi mazmundagi sakkizinchi xatboshi bilan toʻldirilsin:

“ommaviy tadbirni oʻtkazish obyektining maʼmuriyati bilan birgalikda — ommaviy tadbirga fuqarolarning reklama, aksiya va boshqa maqsadlarda oziq-ovqat, buyumlar hamda boshqa mahsulotlar va tovar-moddiy boyliklarni bepul tarqatish yoki haddan tashqari arzonlashtirilgan narxda sotish orqali jalb qilinishiga yoʻl qoʻymaslik”;

sakkizinchi — oʻn toʻqqizinchi xatboshilar tegishli ravishda toʻqqizinchi — yigirmanchi xatboshilar deb hisoblansin;

v) 67-bandda:

quyidagi mazmundagi oʻn birinchi xatboshi bilan toʻldirilsin:

“ommaviy tadbir tashkilotchisi bilan birgalikda — ommaviy tadbirga fuqarolarning reklama, aksiya va boshqa maqsadlarda oziq-ovqat, buyumlar hamda boshqa mahsulotlar va tovar-moddiy boyliklarni bepul tarqatish yoki haddan tashqari arzonlashtirilgan narxda sotish orqali jalb qilinishiga yoʻl qoʻymaslik”;

oʻn birinchi xatboshi oʻn ikkinchi xatboshi deb hisoblansin.

2. Vazirlar Mahkamasining 2022-yil 22-fevraldagi 86-son qarori bilan tasdiqlangan Maxsus elektron tizim orqali ruxsat etish xususiyatiga ega ayrim hujjatlarni berish tartib-taomillari toʻgʻrisida yagona nizomga 11-ilovaning 9-pozitsiyasi quyidagi mazmundagi “v¹” kichik band bilan toʻldirilsin:

“v¹) ommaviy tadbirga fuqarolarning reklama, aksiya va boshqa maqsadlarda oziq-ovqat, buyumlar hamda boshqa mahsulotlar va tovar-moddiy boyliklarni bepul tarqatish yoki haddan tashqari arzonlashtirilgan narxda sotish orqali jalb qilinishiga yoʻl qoʻymaslik”.