O‘zbekiston Respublikasi Prezidentining “O‘zbekiston Respublikasi Sanoatda va konchilikda ishlarning bexatar olib borilishini nazorat qilish davlat qo‘mitasini Sanoatda va konchilikda ishlarning bexatar olib borilishini nazorat qilish agentligiga aylantirish to‘g‘risida” 2000-yil 7-fevraldagi PF-2535-son Farmonini bajarish yuzasidan Vazirlar Mahkamasi qaror qiladi:

1. Quyidagilar:

Sanoatda va konchilikda ishlarning bexatar olib borilishini nazorat qilish agentligining tashkiliy tuzilmasi 1 va 1a-ilovalarga muvofiq;

Sanoatda va konchilikda ishlarning bexatar olib borilishini nazorat qilish agentligi to‘g‘risidagi Nizom 2-ilovaga muvofiq;

Sanoatda va konchilikda ishlarning bexatar olib borilishini nazorat qilish agentligining Mehnat xavfsizligi va yer osti boyliklarini muhofaza qilish jamg‘armasi to‘g‘risidagi Nizom 3-ilovaga muvofiq tasdiqlansin.

Sanoatda va konchilikda ishlarning bexatar olib borilishini nazorat qilish agentligi tizimi shtatdagi xodimlarining cheklangan soni (xizmat ko‘rsatuvchi xodimlardan tashqari) 240 kishidan, shu jumladan, markaziy apparatniki 19 kishidan iborat etib belgilansin.

2. Belgilab qo‘yilsinki:

Sanoatda va konchilikda ishlarning bexatar olib borilishini nazorat qilish agentligini bosh direktor boshqaradi, u maqomiga ko‘ra O‘zbekiston Respublikasi vaziriga, uning o‘rinbosari esa vazir o‘rinbosariga tenglashtiriladi;

Agentlikni, uning tasarrufidagi organlar va tashkilotlarni mablag‘ bilan joriy ta’minlash Davlat budjeti va xizmat ko‘rsatiladigan korxonalar mablag‘lari, shuningdek, Agentlik xo‘jalik hisobidagi tashkilotlarning o‘z faoliyatidan oladigan daromadlari hisobiga amalga oshiriladi.

3. Sanoatda va konchilikda ishlarning bexatar olib borilishini nazorat qilish agentligi bosh direktoriga:

bir nafar o‘rinbosari va shaxsiy tarkibi O‘zbekiston Respublikasi Vazirlar Mahkamasi tomonidan tasdiqlanadigan 5 kishidan iborat hay’at bo‘lishiga;

Agentlikning tasdiqlangan tashkiliy tuzilmasiga xodimlarning belgilangan umumiy soni va mehnatga haq to‘lash fondi doirasida o‘zgartirishlar kiritishga ruxsat etilsin.

4. O‘zbekiston Respublikasi Vazirlar Mahkamasining “Sanoatda va konchilikda ishlarning bexatar olib borilishini nazorat qilish davlat qo‘mitasi faoliyatini takomillashtirish to‘g‘risida” 1996-yil 10-yanvardagi 17-son qaroriga quyidagi o‘zgartirishlar kiritilsin:

2-band, 3-bandning ikkinchi va uchinchi xat boshilari hamda 4-band o‘z kuchini yo‘qotgan deb hisoblansin;

3 va 5-bandlardagi “O‘zsanoatkontexnazorat” davlat qo‘mitasiga ko‘rsatmalar “Sanoatkontexnazorat” agentligiga ko‘rsatmalar bilan almashtirilsin.

5. Mazkur qarorning bajarilishini nazorat qilish O‘zbekiston Respublikasining Bosh vaziri O‘.T. Sultonov zimmasiga yuklansin.

1. Rahbariyat

2. Xavfli ishlab chiqarishlar hamda obyektlarni ekspertizadan o‘tkazish va baholash bo‘limi

3. Texnika boshqarmasi

4. Moliya-iqtisodiyot bo‘limi

5. Dispetcherlik xizmati

6. Kanselyariya

1. Ko‘mir, kon-ruda va noruda sanoatini nazorat qilish inspeksiyasi, shu jumladan uning doimiy joylashgan davlat inspektorlari mintaqaviy guruhlari:

— Olmaliq kon-texnika inspeksiyasi;

— Angren kon-texnika inspeksiyasi;

— G‘arbiy O‘zbekiston mintaqaviy kon-texnika inspeksiyasi;

— Qizilqum mintaqaviy kon-texnika inspeksiyasi*;

— Toshkent kon-texnika inspeksiyasi*.

2. Neft va gaz sanoatini nazorat qilish inspeksiyasi, shu jumladan uning doimiy joylashgan davlat inspektorlari mintaqaviy guruhlari:

— Janubiy O‘zbekiston mintaqaviy kon-texnika inspeksiyasi;

— Sharqiy O‘zbekiston kon-texnika inspeksiyasi.

3. Kimyo, metallurgiya, neft-gazni qayta ishlash sanoatini nazorat qilish inspeksiyasi, shu jumladan uning doimiy joylashgan davlat inspektorlari mintaqaviy guruhlari:

— Farg‘ona kon-texnika inspeksiyasi;

— Navoiy kon-texnika inspeksiyasi.

4. Gazni nazorat qilish inspeksiyasi, shu jumladan uning doimiy joylashgan davlat inspektorlari mintaqaviy guruhlari:

— Qoraqalpog‘iston kon-texnika inspeksiyasi;

— Surxondaryo kon-texnika inspeksiyasi;

— Jizzax kon-texnika inspeksiyasi;

— Sirdaryo kon-texnika inspeksiyasi.

5. Bug‘qozonlarni va ko‘tarish inshootlarini nazorat qilish inspeksiyasi, shu jumladan uning doimiy joylashgan davlat inspektorlari mintaqaviy guruhlari:

— Xorazm kon-texnika inspeksiyasi;

— Buxoro kon-texnika inspeksiyasi;

— Namangan kon-texnika inspeksiyasi;

— Temir yo‘l kon-texnika inspeksiyasi**

6. Geologiya-qidiruv ishlarini nazorat qilish inspeksiyasi

7. Atomni nazorat qilish inspeksiyasi

8. Neft mahsulotlarini tashish va saqlashni nazorat qilish inspeksiyasi

9. Xavfli yuklarni tashish sharoitlarini nazorat qilish inspeksiyasi

10. Yer osti boyliklarini muhofaza qilishni, mineral xomashyoni qayta ishlashni nazorat qilish va geologiya-marksheyderlik nazorati inspeksiyasi

11. Donni saqlash va qayta ishlash texnologik jarayoniga rioya etilishini nazorat qilish inspeksiyasi

12. Kimyoviy, bakteriologik va toksik qurollarni taqiqlash to‘g‘risidagi konvensiyaning ijrosini nazorat qilish inspeksiyasi

1. “Laboratoriya” kichik korxonasi ***

2. “Kontexnazorato'guv” ilmiy-texnika markazi***

3. Sertifikatsiya markazi***

4. Harbiylashtirilgan kon-qutqarish qismi****

1. Sanoatda va konchilikda ishlarning bexatar olib borilishini nazorat qilish agentligi — “Sanoatkontexnazorat” agentligi O‘zbekiston Respublikasi hududidagi barcha yuridik va jismoniy shaxslarning sanoatda ishlarni bexatar olib borish, yer osti boyliklaridan foydalanish va ularni muhofaza qilishga doir qonun hujjatlari va me’yoriy-texnik hujjatlar talablariga rioya qilishlari ustidan nazoratni amalga oshiruvchi davlat boshqaruvi organi hisoblanadi.

Sanoatda va konchilikda ishlarning bexatar olib borilishini nazorat qilish agentligi (keyingi o‘rinlarda Agentlik deb ataladi) O‘zbekiston Respublikasi Konstitutsiyasiga va qonunlariga, Oliy Majlis qarorlariga, O‘zbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek boshqa qonun hujjatlariga hamda mazkur Nizomga amal qiladi.

Agentlikning xavfsizlik texnikasi, nazorat ostidagi obyektlarning texnik xavfsizligi, shuningdek yer osti boyliklaridan foydalanish va ularni muhofaza qilish masalalari bo‘yicha o‘z vakolati doirasida qabul qilgan qarorlari davlat va xo‘jalik boshqaruvi organlari, joylardagi davlat hokimiyati organlari, mulkchilik shakllaridan qat’i nazar, korxonalar, muassasalar va tashkilotlar tomonidan bajarilishi majburiy hisoblanadi.

2. Agentlik o‘z faoliyatini O‘zbekiston Respublikasi Favqulodda vaziyatlar vazirligi, O‘zbekiston Respublikasi Mehnat va aholini ijtimoiy muhofaza qilish vazirligi va O‘zbekiston Respublikasi Davlat tabiatni muhofaza qilish qo‘mitasi va davlat boshqaruvining boshqa organlari bilan muvofiqlashtiradi, xalqaro bitimlar asosida boshqa davlatlarning davlat nazorat organlari bilan hamkorlik qiladi.

Agentlik respublika davlat boshqaruvi organlari bilan birgalikda, O‘zbekiston Respublikasi Favqulodda vaziyatlar vazirligi, O‘zbekiston Respublikasi Mehnat vazirligi va O‘zbekiston Respublikasi Davlat tabiatni muhofaza qilish qo‘mitasi bilan kelishgan holda, ishlarni bajaruvchilarning xavfsizlik texnikasi va, nazorat ostidagi ehtimol tutilgan xavfli ishlab chiqarishlarning, yuqori darajada xatarli obyektlarning xavfsizlik texnikasi, sanoat yo‘li bilan va tajriba-sanoat jihatdan ishlashga, mineral xomashyoni qayta ishlashga va metallurgiya jihatidan saralash berilgan konlarda yer osti boyliklaridan foydalanish va ularni muhofaza qilish, shuningdek ularning bajarilishini davlat yo‘li bilan nazorat qilish bo‘yicha me’yoriy hujjatlar ishlab chiqilishi va tasdiqlanishini tashkil etadi.

3. Agentlik tegishli davlat va xo‘jalik boshqaruvi organlari bilan kelishilgan holda o‘z nazorati ostidagi ishlab chiqarishlar (texnologiyalar), obyektlar, uskunalar va ehtimol tutilgan xavfli ishlab chiqarishlar va texnologiya obyektlariga ega bo‘lgan xo‘jalik yurituvchi subyektlarning ro‘yxatini belgilaydi va tasdiqlaydi.

4. Quyidagilar Agentlikning asosiy vazifalari hisoblanadi:

O‘zbekiston Respublikasi hududidagi barcha yuridik va jismoniy shaxslarning sanoatda ishlarni bexatar olib borishga, yer osti boyliklaridan foydalanish va ularni muhofaza qilishga va mineral xomashyoni metallurgiya jihatdan saralashga oid qonun hujjatlari va me’yoriy-texnik hujjatlar talablariga rioya qilishlari ustidan davlat nazoratini tashkil etish va amalga oshirish, kon ishlarini geologiya-marksheyderlik xizmati bilan ta’minlash;

ehtimol tutilgan xavfli ishlab chiqarishlarning (mulkchilikning tashkiliy-huquqiy shaklidan qat’i nazar) xavfsizlik texnikasiga doir me’yoriy hujjatlarni belgilangan tartibda ishlab chiqish va tasdiqlash;

O‘zbekiston Respublikasi harbiylashtirilgan kon-qutqarish qismlariga tezkor va uslubiy rahbarlik qilish.

5. Agentlik:

a) ko‘mir, kon-ruda va noruda, kimyo, metallurgiya, neft va gaz qazib olish, neft va gazni qayta ishlash sanoatida, geologiya-qidiruv tashkilotlarida, magistral neft-gaz va ularning mahsulotlarini uzatish quvurlaridagi ishlarda, ishlab chiqarish jarayonida gazdan foydalanishda, portlash va yong‘in xavfi bo‘lgan don saqlovchi hamda uni qayta ishlovchi (tayyor mahsulot chiqaruvchi) obyektlarda, yer osti transporti va gidrotexnika qurilishlarini olib borishda, portlash va yong‘in xavfi bo‘lgan obyektlari bo‘lgan qurilishlar va boshqa tarmoqlarning o‘ta xavfli obyektlarida xavfsizlikni ta’minlash;

b) tayyorlovchi korxonalarda portlovchi moddalar va portlatuvchi vositalar ishlab chiqarish, tarkibida ionlovchi nurlanish manbalari bo‘lgan sanoatda ishlatiladigan portlovchi metariallarni saqlash, foydalanish va hisobga olish, shuningdek, iste’molchi korxonalarda eng oddiy va suvli portlovchi moddalar tayyorlash;

v) xavfliligi ehtimol tutilgan sanoat ishlab chiqarishlari uchun asbob-uskunalar ishlab chiqarish, tayyorlash va qo‘llash;

g) gaz, neft va ularning mahsulotlari uzatiladigan magistral quvurlarni, shaharlar va aholi yashash joylarini gaz bilan ta’minlash tizimlarini, shuningdek neft mahsulotlarini, tabiiy va suyultirilgan (propan-butan) gazlarni tashish, saqlash va foydalanish bilan bog‘liq obyektlarni loyihalash, qurish, foydalanish va uzatish;

d) portlash va yong‘in xavfi bo‘lgan o‘z nazorati ostidagi ishlab chiqarishlar va obyektlarni qurish, rekonstruksiya qilish, foydalanish va tuzatish ishlarining xavfsizligi;

e) radioaktiv materiallar va rudalarni tashish, saqlash, foydalanish va ko‘mish, qazib olish va qayta ishlashda (vakolatiga ko‘ra), yadro obyektlaridan va ionlovchi nurlanish manbalaridan foydalanuvchi yoki ularni oluvchi boshqa obyektlarning radiatsiya xavfsizligi;

j) bosim ostida ishlaydigan ko‘tarish inshootlari, bug‘ va suv isitish qozonlari, idishlar, bug‘ va issiq suv uchun suv quvurlari ishlab chiqarish, o‘rnatish, tayyorlash, montaj qilish, tuzatish, shuningdek, Agentlik nazorati ostidagi boshqa obyektlardan xavfsiz foydalanish;

i) o‘z vakolatlari doirasida xavfli yuklar va portlovchi moddalarni tranzit tashish shartlarini bajarish;

k) yer osti boyliklari to‘g‘risidagi qonun hujjatlari talablariga, yer osti boyliklaridan foydalanish shartlari, talablari va qoidalariga rioya qilinishi (kon sanoati korxonalarini loyihalash, foydali qazilmalarning zaxiralari harakatini hisobga olish va hisobdan chiqarish, yer osti boyliklarini qazib olish va mineral xomashyoni qayta ishlash me’yorlari, mineral va termal suvlarni kamayib ketishdan va ifloslanishdan muhofaza qilish, kon ishlariga geologiya-marksheyder xizmati ko‘rsatish qismi bo‘yicha);

l) o‘z nazorati ostidagi obyektlarning qurilishi, rekonstruksiya qilinishi va qayta jihozlanishi;

m) ishlab chiqarishlarni portlash, portlash-yong‘in xavfi chiqishiga ko‘ra tegishli toifalarga kiritishning to‘g‘riligi va ishlab chiqarishlarni bir toifadan ikkinchi toifaga o‘tkazishning to‘g‘riligi, shuningdek qo‘llaniladigan uskunalarning portlash xavfi bo‘lgan qorishmalar toifalari va guruhlariga hamda portlash xavfi bo‘lgan zonalar klassiga muvofiq kelishi;

n) o‘z nazorati ostidagi obyektlarda avariyalar va ishlab chiqarish jarohatlarining oldini olish yuzasidan tadbirlar ishlab chiqilishi va o‘tkazilishi va korxonalarning, harbiylashtirilgan kon-qutqarish qismlari, fontanga qarshi bo‘linmalar, gazdan qutqarish va avariya-dispetcherlik xizmatlarining ehtimol tutilgan avariyalar va ularning oqibatlarini tugatishga tayyorligi ustidan davlat nazorati va tekshiruvini amalga oshiradi, shuningdek, ko‘rsatilgan bo‘linmalarning joylashish sxemasini kelishib oladi;

o) xavfsizlik texnikasi masalalari bo‘yicha ilmiy-texnik dasturlar bajarilishi ustidan davlat nazorati va tekshiruvini amalga oshiradi.

6. Agentlik o‘ziga yuklangan vazifalarga muvofiq quyidagi funksiyalarni bajaradi:

a) sanoatda ishlarni bexatar olib borish, uskunalar tuzilishi va ishlatilishi, shuningdek yer osti boyliklaridan foydalanish va saqlash, mineral xomashyoni qayta ishlash hamda metallurgiya jihatidan qayta ishlash talablaridan iborat bo‘lgan respublika standartlari va boshqa me’yoriy hujjatlar loyihalarini belgilangan tartibda ko‘rib chiqadi va kelishib oladi;

b) Agentlik vakolatiga kiruvchi alohida ish tartibda ruxsatnoma beradi va uni bekor qiladi;

v) foydali qazilmalarni qazib oluvchi korxonalar va obyektlarni tugatish va konservatsiyalashda yer osti boyliklaridan foydalanuvchilar tomonidan bajarilishi kerak bo‘lgan texnik talablarni belgilaydi (ishlarning xavfsizligi, foydali qazilma konlarini ishga tushirishda yer osti boyliklarini muhofaza qilish va xalq xo‘jaligida foydalanishga yaroqli bo‘lgan kon mahsulotlarini saqlash qismi bo‘yicha);

g) foydali qazilmalarni qazib olish uchun, shuningdek foydali qazilmalar qazib olish bilan bog‘liq bo‘lmagan yer osti inshootlari qurilishi va ulardan foydalanish uchun kon ajratish hujjatlarini beradi;

d) qazib olish jarayonida qazib olingan va yo‘qotilgan foydali qazilmalar zaxiralarini qazib olish korxonalari ro‘yxatidan chiqaradi va sanoat uchun ahamiyatini yo‘qotgan yoki keyingi geologiya-qidiruv ishlarida va konlarni qazishda tasdiqlanmagan zaxiralarni hisobdan chiqarish uchun xulosalar beradi;

e) kon sanoati va qayta ishlovchi korxonalarning texnik loyihalarini, ishlarni bexatar olib borish yuzasidan texnik yechimlarga doir kon ishlari rejalarini, mineral xomashyoni qazib olish va qayta ishlashda foydali qazilmalarning kamayishi va maydalashtirilishi me’yorlarini kelishib oladi;

j) shaxtalar (konlar)ning bir toifadan boshqa toifaga o‘tkazilishini tasdiqlaydi;

z) gaz nazorati obyektlarini, bosim ostida ishlovchi bug‘ va suv isitish qozonlarini, idishlarni, bug‘ va issiq suv quvurlarini va ko‘tarish inshootlarini ro‘yxatga oladi;

i) turar joylardagi maishiy gaz asboblarini ishlatuvchi korxonalar hamda kommunal-maishiy korxonalar gaz uskunalarini ishlatuvchi va ushbu asboblarning texnik ahvolini va ulardan xavfsiz foydalanishni nazorat qiluvchi xizmatlarning ishiga uslubiy rahbarlikni amalga oshiradi;

k) o‘z nazorati ostidagi korxonalar va obyektlarni foydalanishga qabul qilish davlat komissiyalari tarkibida qatnashish uchun vakillarni tayinlaydi, ushbu obyektlarni foydalanishga qabul qilish qoidalariga qanday rioya etilayotganligini nazorat qiladi;

l) sanoatda, kon nazoratida, yer osti boyliklarini ishlarida ishlarni bexatar olib borish talablariga va ilmiy tadqiqotlarning o‘ta xavfli ishlab chiqarishlar va obyektlar loyihalarining tasdiqlangan texnologiyalarga muvofiqligini ekspertizadan o‘tkazadi;

m) tegishli o‘quv muassasalarida mehnat xavfsizligi va yer osti boyliklarini muhofaza qilish masalalari bo‘yicha ilmiy tadqiqotlar va mutaxassislar tayyorlash dasturlarini tuzishda va kelishib olishda qatnashadi;

n) o‘z nazorati ostidagi obyektlar xodimlarini tayyorlash va ushbu obyektlarda ishlarni bexatar olib borish va yer osti boyliklarini muhofaza qilishni ta’minlash masalalari bo‘yicha ularning bilimlarini tekshirish tartibini belgilaydi;

o) Zaxiralar bo‘yicha markaziy komissiya tomonidan zaxiralarni tasdiqlashda qabul qilingan qarorlar va xulosalarning yer osti boyliklaridan foydalanuvchilar tomonidan bajarilishini nazorat qiladi;

p) O‘zbekiston Respublikasi Zaxiralar bo‘yicha markaziy komissiyasi tarkibiga kiritish uchun o‘z vakillarini ajratadi;

r) Agentlik organlari nazorati ostidagi obyektlarda ishlab chiqarish xavfsizligi jihatidan xorijiy texnologiyalarni qo‘llash mumkinligi to‘g‘risida ekspert xulosasini beradi;

s) sanoatda ishlarni bexatar olib borishni nazorat qilish, kon nazorati atom energetikasi va ilmiy tadqiqotlar sohasida xalqaro hamkorlikni amalga oshiradi, Agentlik vakolatiga kiruvchi masalalar bo‘yicha xalqaro tashkilotlar, boshqa mamlakatlarning tegishli nazorat organlari bilan belgilangan tartibda aloqa o‘rnatadi.

t) qonunchilikka muvofiq xavfli yuklar va portlovchi moddalar tranziti chog‘ida xulosalar beradi va nazoratni amalga oshiradi.

7. Agentlikka quyidagi huquqlar beriladi:

a) Agentlik vakolatiga taalluqli masalalar yuzasidan korxonalar va obyektlarni qonun hujjatlarida belgilangan tartibda tekshirish, shuningdek tegishli vazirliklar, idoralar, korxonalar bilan kelishgan holda ko‘rsatilgan tekshirishlarni o‘tkazish uchun mutaxassislarni, ish joyida ish haqini saqlagan va xizmat safari xarajatlarini Agentlik mablag‘lari hisobidan to‘lagan holda, jalb etish;

b) o‘z nazorati ostidagi korxonalar va tashkilotlarning rahbarlariga, shuningdek Agentlik nazorati ostidagi obyektlari bo‘lgan davlat va xo‘jalik boshqaruvi organlariga ishlarni bexatar olib borish va yer osti boyliklarini muhofaza qilishga oid qoidalar va normalar buzilganda ularni bartaraf etish to‘g‘risida bajarilishi majburiy bo‘lgan yozma ko‘rsatmalar berish;

v) o‘z vakolati doirasida O‘zbekiston Respublikasi yuridik va jismoniy shaxslar tomonidan bajarilishi majbur buyruqlar, qarorlar chiqarish, zarur hollarda Agentlik boshqa manfaatdor vazirliklar, idoralar va tashkilotlar bilan birgalikda yoki ular kelishgan holda qarorlar chiqaradi;

g) xavfsizlik va yer osti boyliklarini muhofaza qilish qoidalari normalari buzilgan xolda olib borilayotgan ishlarni to‘xtatish, shuningdek odamlar hayoti xavf ostida qolganda yoki avariya holati vujudga kelganda ularni ish joylaridan chiqarish, ish joylarini yoki uskunalarni muhrlab qo‘yish;

d) ishlarni bexatar olib borish va yer osti boyliklarini muhofaza qilishga oid qoidalar, normalar va yo‘riqnomalarni buzganlik uchun mansabdor shaxslar va fuqarolarni qonun hujjatlarida belgilangan tartibda ma’muriy javobgarlikka tortish;

e) o‘z nazorati ostidagi ishlab chiqarishlar uchun xodimlar tayyorlovchi kurslarni, shuningdek kon va portlatish ishlari olib borilishiga javob berish huquqi beriladigan mutaxassislar tayyorlovchi kurslarni tashkil etish, o‘ta xavfli ishlarni bajarish uchun tayyorlanadigan shaxslardan imtihon olish va ularga tegishli guvohnomalar berish;

j) o‘z nazorati ostidagi obyektlarda mutaxassislarning xavfsizlik qoidalari va normalarini, texnologik reglamentlarni va ishchilarining mehnatini muhofaza qilish yo‘riqnomalarini bilishlarini tekshirish o‘z nazorati ostidagi korxonalarning rahbarlari va muhandis-texnik xodimlarining xavfsizlik qoidalari va normalarini bilishlarini tekshirishda qatnashish;

z) o‘z nazorati ostidagi korxonalar va davlat boshqaruvi organlari rahbarlariga ishlarni bexatar olib borish va yer osti boyliklarini muhofaza qilish qoidalari, yo‘riqnomalari va boshqa me’yoriy-texnik hujjatlar talablarini buzuvchi shaxslarni belgilangan tartibda egallab turgan lavozimidan bo‘shatish yoki ishlarga texnik rahbarlik qilish huquqidan bir yilgacha muddatga mahrum etish to‘g‘risida taqdimnoma berish;

i) aybdor shaxslarni jinoiy javobgarlikka tortish to‘g‘risidagi masalani ko‘rib chiqish uchun materiallarni huquqni muhofaza qilish organlariga berish;

k) avariyalarning holatlari va sabablarini, ishlab chiqarish jarohati, portlovchi materiallarning yo‘qolishi holatlarini belgilangan tartibda texnik jihatdan tekshirish natijalari yuzasidan Agentlik vakolatiga kiritilgan masalalarga oid bajarilishi majburiy bo‘lgan qarorlar qabul qilish;

l) zarur hollarda vazirliklar, idoralar, korxonalar va tashkilotlar tomonidan asbob-uskunalar va materiallarning nazorat sinovlari, ish bajariladigan muhit va atrof tabiiy muhit tahlillari, loyiha va loyiha-konstruktorlik yechimlarining mustaqil ekspertizasi o‘tkazilishini tayinlash;

m) tayyorlovchi zavodlarda va tuzatish korxonalarida o‘z nazorati ostidagi sanoat tarmoqlari uchun asbob-uskunalarning xavfsizlik qoidalari va normalari talablariga muvofiqligini tekshirish, standartlar, xavfsizlik qoidalari va normalari hamda tasdiqlangan loyiha yechimlari talablariga muvofiq kelmagan hollarda ularni chiqarishni to‘xtatib qo‘yish va qo‘llashni man etish;

n) vazirliklar, idoralar, davlat boshqaruvining boshqa organlaridan, mulkchilikning barcha shakllaridagi korxonalardan va fuqarolardan Agentlik vakolatiga tegishli masalalar bo‘yicha zarur axborotlarni belgilangan tartibda olish;

o) mansabdor shaxslarda va fuqarolarda ishlarni bajarish va ularning bajarilishiga texnik rahbarlik qilish huquqini beruvchi tegishli hujjatlar borligini, shuningdek o‘ta xavflilik bilan bog‘liq ishlar uchun maxsus belgilangan talablarga rioya qilinishini tekshirish;

p) ishlarning xavfsizligini ta’minlash va yer osti boyliklarini muhofaza qilish masalalari bo‘yicha texnik, ekspert va boshqa xizmat turlarini ko‘rsatuvchi korxonalar, tashkilotlarni belgilangan tartibda tashkil etish, qayta tashkil etish va tugatishda qatnashish.

8. Agentlik organlari xodimlari respublika budjeti mablag‘lari hisobidan majburiy shaxsni sug‘urta qilinishi kerak.

Korxonalar, muassasalar va tashkilotlar Agentlik inspektorlarini xizmat xonalari, aloqa vositalari, maxsus kiyim-bosh va himoya vositalari, belgilangan vazifalarni bajarish uchun transport bilan ta’minlashga majburdir. Korxonalar, muassasalar va tashkilotlar, shuningdek doimiy joylashgan inspektorlarga kommunal xizmatlar ko‘rsatiladigan, telefon aloqasi bo‘lgan turar joy ajratishda ko‘maklashishga, maktabgacha tarbiya bolalar va sanatoriy-kurort muassasalarida joy berishga, tibbiy xizmat ko‘rsatish va ijtimoiy-maishiy ta’minot masalalarini hal qilishga majburdirlar.

9. Agentlikning mansabdor shaxslari yuklangan vazifalarning bajarilishi va mazkur Nizomda belgilangan funksiyalar amalga oshirilishi uchun qonun hujjatlariga muvofiq javob beradilar.

10. Agentlikka O‘zbekiston Respublikasi Vazirlar Mahkamasining qarori bilan lavozimga tayinlanadigan bosh direktor boshchilik qiladi.

Bosh direktorning O‘zbekiston Respublikasi Vazirlar Mahkamasi tomonidan lavozimga tayinlanadigan o‘rinbosari bo‘ladi.

Bosh direktor lavozimiga ko‘ra O‘zbekiston Respublikasi vaziriga, o‘rinbosar esa — tegishlicha vazir o‘rinbosariga tenglashtiriladi.

Agentlik bosh direktori:

Agentlikka va unga qarashli organlar faoliyatiga rahbarlik qiladi;

harbiylashtirilgan kon-qutqarish qismlarining avariyaga uchragan odamlarni qutqarishga, yuz berayotgan avariyalarni bartaraf etishga va korxonalarda avariya-texnika ishlarini bajarishga tayyorligini ta’minlash bo‘yicha harbiylashtirilgan kon-qutqarish qismlari shtabi ustidan nazoratni tashkil etadi;

Agentlikka yuklangan vazifalarning bajarilishi va funksiyalarning amalga oshirilishi uchun shaxsan javob beradi;

O‘zbekiston Respublikasi Vazirlar Mahkamasi tomonidan belgilangan xodimlar soni va ish haqi fondi doirasida Agentlik boshqaruvi apparati shtat jadvalini tasdiqlaydi;

Mehnat xavfsizligi va yer osti boyliklarini muhofaza qilish jamg‘armasi Kengashiga boshchilik qiladi;

Agentlikning tarkibiy bo‘linmalari to‘g‘risidagi Nizomni tasdiqlaydi, Agentlikning harbiylashtirilgan kon-qutqarish qismlari to‘g‘risidagi Nizom bundan mustasnodir.

11. Agentlikda tarkibida Agentlik bosh direktori (hay’at raisi), lavozimi bo‘yicha uning o‘rinbosari, shuningdek Agentlikning boshqa rahbar xodimlari bo‘lgan 5 kishidan iborat hay’at tashkil etiladi. Hay’atning shaxsiy tarkibi O‘zbekiston Respublikasi Vazirlar Mahkamasi tomonidan tasdiqlanadi.

Hay’at muntazam o‘tkaziladigan o‘z majlislarida ishlarning bexatar olib borilishi ustidan davlat nazoratini takomillashtirish, o‘ziga qarashli tashkilotlarga amaliy rahbarlik qilish, qarorlarining bajarilishini tekshirish, kadrlarni tanlash va ulardan foydalanish masalalarini ko‘rib chiqadi, o‘z vakolatiga kiruvchi masalalar bo‘yicha o‘ziga qarashli tashkilotlarning rahbarlari hisobotlarini eshitadi.

Hay’at qarorlari, qoidaga ko‘ra, Agentlik buyruqlari bilan hayotga joriy etiladi. Bosh direktor bilan hay’at o‘rtasida kelishmovchiliklar kelib chiqqan taqdirda, bosh direktor vujudga kelgan har xil fikrlar to‘g‘risida Vazirlar Mahkamasiga axborot berib, o‘z qarorini hayotga joriy etadi. Hay’at a’zolari, o‘z navbatida, o‘z fikrlarini Vazirlar Mahkamasiga ma’lum qilishlari mumkin.

12. Iqtisodiyot tarmoqlarida portlovchi moddalardan foydalanish bilan bog‘liq ishlarni muvofiqlashtirish uchun Agentlik huzurida bosh direktor boshchilik qiladigan portlatish ishlari bo‘yicha idoralararo kengash tuziladi.

Portlatish ishlari bo‘yicha idoralararo kengashning shaxsiy tarkibi va uning to‘g‘risidagi Nizom tegishli vazirliklar va idoralar bilan kelishgan holda Agentlik bosh direktori tomonidan tasdiqlanadi.

13. Agentlikka yuklangan nazorat funksiyalari Agentlikning tarkibiy bo‘linmalari — tarmoq inspeksiyalari orqali amalga oshiriladi.

Ayrim hollarda bosh direktorning buyrug‘i bilan davlat bosh inspektorlari boshchilik qiladigan doimiy joylashgan mintaqaviy davlat inspektorlari guruhlari tuzilishi mumkin.

Inspektorlar tarkibiga va Agentlik organlari xodimlariga belgilangan tartibda farqlash belgilari bo‘lgan kiyim-bosh va yagona namunadagi guvohnoma beriladi.

14. Tarmoq inspeksiyalari va davlat inspektorlari mintaqaviy guruhlari rahbarlari, shu jumladan harbiylashtirilgan kon-qutqarish qismi boshlig‘i Agentlik hay’ati qarori bilan tasdiqlanadilar, keyinchalik Agentlik bosh direktorining buyrug‘i bilan lavozimga tayinlanadilar.

15. Agentlik Agentlik tomonidan tasdiqlangan nizomga binoan ishlaydigan va sarf-xarajatlari o‘z nazorati ostidagi korxonalar va tashkilotlar mablag‘lari hisobiga qoplanadigan shtatdan tashqari inspektorlar tarmog‘ini tashkil etadi. Shtatdan tashqari inspektorlar lavozimga Agentlik bosh direktorining taqdimnomasi bo‘yicha tegishli korxonalar va tashkilotlar rahbarlari tomonidan tayinlanadilar.

16. Agentlikni va uning tasarrufidagi organlar va tashkilotlarni mablag‘ bilan ta’minlash Davlat budjeti va xizmat ko‘rsatiladigan korxonalar mablag‘lari, shuningdek Agentlik xo‘jalik hisobidagi tashkilotlarining o‘z faoliyatidan oladigan daromadlar hisobiga amalga oshiriladi.

17. Agentlik O‘zbekiston Respublikasi Davlat gerb tasviri tushirilgan va o‘z nomi yozilgan muhrga ega bo‘ladi.

1. Sanoatda va konchilikda ishlarning bexatar olib borilishini nazorat qilish agentligining Mehnat xavfsizligi va yer osti boyliklarini muhofaza qilish jamg‘armasi (keyingi o‘rinlarda Jamg‘arma deb ataladi) mehnat xavfsizligi va yer osti boyliklarini muhofaza qilish bo‘yicha tadbirlarni mablag‘ bilan ta’minlash, ishlarning bexatar olib borilishi va yer osti boyliklarini muhofaza qilishning ahvoli ustidan davlat nazorati samaradorligini oshirish, xavfsizlik texnikasi mutaxassislari va inspektorlar tarkibi malakasini oshirish, hisoblash texnikasi negizida mehnatni avtomatlashtirish va Agentlik tizimida aloqa vositalarini rivojlantirish, xodimlar va shtatsiz inspektorlarni moddiy rag‘batlantirish maqsadida shakllantiriladi.

2. Quyidagilar Jamg‘arma mablag‘larini shakllantirish manbalari hisoblanadi:

O‘zbekiston Respublikasining Ma’muriy javobgarlik to‘g‘risidagi kodeksiga muvofiq Agentlik tomonidan solinadigan jarimalar summasi;

Korxonalar, muassasalar, xayriya tashkilotlari va jamg‘armalarining ulush qo‘shish sifatidagi mablag‘lari va ixtiyoriy badallari;

O‘zbekiston Respublikasi qonun hujjatlari bilan taqiqlamagan boshqa manbalar.

3. Jamg‘arma mablag‘laridan:

mehnat xavfsizligi va yer osti boyliklarini muhofaza qilish normalari va qoidalarining buzilishi tufayli kelib chiqqan salbiy oqibatlarni kompensatsiya qilish yoki ularning oldini olish bilan bevosita bog‘liq bo‘lgan tadbirlar;

xavfsizlik texnikasi va yer osti boyliklarini muhofaza qilish bo‘yicha texnika va yer osti boyliklarini muhofaza qilish bo‘yicha texnika va texnologiyalarni, tizimlarni, priborlar va asbob-uskunalarni yaratish va takomillashtirishga doir ilmiy-tadqiqot, loyihalash-qidiruv, tajriba-konstruktorlik ishlari;

mehnat xavfsizligi texnikasi va yer osti boyliklarini muhofaza qilish bo‘yicha ilmiy-texnikaviy dasturlar, me’yoriy-uslubiy hujjatlar, respublika standartlari, norma va qoidalarni ishlab chiqish;

xavfsizlik texnikasi, mehnatni va yer osti boyliklarini muhofaza qilish bo‘yicha ilg‘or tajribani targ‘ib qilish, Agentlik tizimi va korxonalar xodimlari bilimlarini oshirish, ko‘riklar, tanlovlar, konferensiyalar o‘tkazish, reklamalar tashkil etish, noshirlik faoliyatni amalga oshirish, yakka tartibdagi himoya vositalari, xavfsizlik priborlari va qurilmalari ko‘rgazmalarini tashkil etish;

xavfsizlik texnikasi va yer osti boyliklarini muhofaza qilish sohasida xalqaro hamkorlikni tashkil etish;

jamoat tashkilotlari tomonidan mehnat xavfsizligi texnikasi va yer osti boyliklarini muhofaza qilish bo‘yicha o‘tkaziladigan tadbirlar;

Agentlik tizimining moddiy-texnika bazasini rivojlantirish uchun foydalaniladi.

4. Jamg‘arma rahbarlik qilish, uning ishlarini tashkil etish va mablag‘lardan maqsadli foydalanilishini nazorat qilish Agentlik bosh direktori boshqaradigan Jamg‘arma kengashi tomonidan amalga oshiriladi.

Jamg‘arma kengashi tarkibiga Agentlik tizimi xodimlari, mehnat xavfsizligi texnikasi va yer osti boyliklarini muhofaza qilish sohasidagi taniqli olimlar, yirik mutaxassislar, jamoat tashkilotlari vakillari kiradi.

Mehnat xavfsizligi va yer osti boyliklarini muhofaza qilish jamg‘armasi kengashining shaxsiy tarkibi Agentlik hay’ati tomonidan tasdiqlanadi.

Jamg‘arma kengashi jamoatchilik asosida ishlaydi va Jamg‘arma ishlarining muhim masalalari, Jamg‘arma mablag‘laridan foydalanishning ustuvor yo‘nalishlarini aniqlash, xavfsizlik texnikasi mablag‘ bilan ta’minlashning eng maqsadga muvofiq shakllari va shartlarini belgilash yuzasidan qarorlar qabul qiluvchi kollegial organ hisoblanadi.

5. Jamg‘arma mablag‘lari maxsus bank hisob raqamida jamlanadi.

6. Jamg‘arma mablag‘laridan Jamg‘arma kengashi tomonidan ishlab chiqiladigan va Agentlik hay’ati tomonidan tasdiqlanadigan yillik dasturga muvofiq foydalaniladi.

Jamg‘arma mablag‘larining 15 foizgacha miqdori ishlab chiqarish jamoalarini, fuqarolarni, shuningdek, jarohatlanish va avariya hollarini kamaytirishda yuqori natijalarga erishgan Agentlik tizimi xodimlarini mukofotlash va taqdirlash uchun foydalanilishi mumkin.

7. Jamg‘armaning hisobot yilida foydalanilmagan mablag‘lari olib qo‘yilmaydi, kelgusi yilga o‘tkaziladi va mazkur Nizomda nazarda tutilgan maqsadlar uchun sarflanadi.

8. Sanoatda va konchilikda ishlarning bexatar olib borilishini nazorat qilish agentligi Jamg‘arma mablag‘larining foydalanilishi to‘g‘risida har yili bir marta O‘zbekiston Respublikasi Moliya vazirligiga hisobot taqdim etadi.