O‘zbekiston Respublikasi Prezidentining “Respublika davlat boshqaruvi organlari faoliyatini takomillashtirish to‘g‘risida” 2003-yil 9-dekabrdagi PF-3358-son Farmonini bajarish yuzasidan hamda O‘zbekiston Respublikasi Temir yo‘llarda yuk va yo‘lovchilar tashish xavfsizligini nazorat qilish davlat inspeksiyasini boshqarish tizimini yanada takomillashtirish maqsadida Vazirlar Mahkamasi qaror qiladi:

1. Quyidagilar O‘zbekiston Respublikasi Temir yo‘llarda yuk va yo‘lovchilar tashish xavfsizligini nazorat qilish davlat inspeksiyasi (“O‘zdavtemiryo‘lnazorat” inspeksiyasi)ning asosiy vazifalari etib belgilansin:

O‘zbekiston Respublikasi temir yo‘l transportida yuk va yo‘lovchilar tashish xavfsizligi ta’minlanishi ustidan davlat nazoratini amalga oshirish;

temir yo‘llarda yuk va yo‘lovchilar tashish xavfsizligini ta’minlashga yo‘naltirilgan kompleks oldini olish chora-tadbirlarini ishlab chiqish, tasdiqlash va ularning bajarilishini nazorat qilish;

temir yo‘l transporti sohasidagi faoliyatni litsenziyalash;

O‘zbekiston Respublikasi temir yo‘llaridan foydalanish bo‘yicha normativ hujjatlarni ishlab chiqish, tasdiqlash va ularning bajarilishini nazorat qilish;

loyihalarni ekspertizadan o‘tkazishda va temir yo‘l transporti obyektlarini, mahsulotlarini va texnologiyalarini ularning belgilangan talablarga muvofiqligi jihatidan doimiy yoki vaqtinchalik foydalanishga qabul qilish ishlarida qatnashish.

2. Quyidagilar:

O‘zbekiston Respublikasi Temir yo‘llarda yuk va yo‘lovchilar tashish xavfsizligini nazorat qilish davlat inspeksiyasi va uning xodimlarining cheklangan umumiy soni 48 nafar, shu jumladan boshqaruv xodimlari 35 nafar bo‘lgan markaziy apparati tuzilmasi 1 va 2-ilovaga muvofiq;

O‘zbekiston Respublikasi Temir yo‘llarda yuk va yo‘lovchilar tashish xavfsizligini nazorat qilish davlat inspeksiyasining mintaqaviy filiali tuzilmasi 3-ilovaga muvofiq;

O‘zbekiston Respublikasi Temir yo‘llarda yuk va yo‘lovchilar tashish xavfsizligini nazorat qilish davlat inspeksiyasi to‘g‘risidagi nizom 4-ilovaga muvofiq tasdiqlansin.

O‘zbekiston Respublikasi Temir yo‘llarda yuk va yo‘lovchilar tashish xavfsizligini nazorat qilish davlat inspeksiyasi boshlig‘iga “O‘zdavtemiryo‘lnazorat” inspeksiyasi tuzilmasiga xodimlarning belgilangan cheklangan soni va ta’minot xarajatlari smetasi doirasida o‘zgartirishlar kiritishga ruxsat berilsin.

3. Belgilab qo‘yilsinki, “O‘zdavtemiryo‘lnazorat” inspeksiyasining ta’minoti:

yuridik shaxslar tomonidan temir yo‘llarda yuk va yo‘lovchilar tashishdan olinadigan 0,15 foiz miqdoridagi majburiy to‘lovlar;

temir yo‘l transportida yuk va yo‘lovchilar tashish faoliyatini amalga oshirish huquqiga litsenziya berish to‘g‘risidagi arizani ko‘rib chiqqanlik uchun yig‘im mablag‘lari hisobiga amalga oshiriladi.

4. O‘zbekiston Respublikasi Temir yo‘llarda yuk va yo‘lovchilar tashish xavfsizligini nazorat qilish davlat inspeksiyasi joylashgan Toshkent shahri, Turkiston ko‘chasi, 7-uydagi bino uning tasarrufida saqlab qolinsin.

5. Quyidagilar:

Vazirlar Mahkamasining “Temir yo‘llarda yuk va yo‘lovchilar tashish xavfsizligini nazorat qilish davlat inspeksiyasi faoliyatini tashkil etish to‘g‘risida” 2001-yil 3-martdagi 109-son qarori;

Vazirlar Mahkamasining “Transport sohasidagi faoliyatning ayrim turlarini litsenziyalash to‘g‘risidagi nizomlarni tasdiqlash haqida” 2003-yil 21-avgustdagi 360-son qaroriga 9-ilova II bo‘limining 4-bandi;

Vazirlar Mahkamasining “O‘zbekiston Respublikasi Hukumatining ayrim qarorlariga qo‘shimcha va o‘zgartirishlar kiritish to‘g‘risida” 2002-yil 1-maydagi 150-son qaroriga ilovaning 12-bandi o‘z kuchini yo‘qotgan deb hisoblansin.

6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.F. Fayzullayev zimmasiga yuklansin.

1. O‘zbekiston Respublikasi Temir yo‘llarda yuk va yo‘lovchilar tashish xavfsizligini nazorat qilish davlat inspeksiyasi (keyingi o‘rinlarda matnda “O‘zdavtemiryo‘lnazorat” inspeksiyasi deb yuritiladi) davlat nazoratini amalga oshirish sohasidagi maxsus vakolatli davlat organi hisoblanadi, u poyezdlar harakati xavfsizligini ta’minlash sohasida chora-tadbirlar ishlab chiqish, ularni amalga oshirish va muvofiqlashtirish hamda yuk va yo‘lovchilar tashish xavfsizligini ta’minlashga oid belgilangan qoidalar va normalarga tegishli vazirliklar, idoralar, korxonalar va tashkilotlar tomonidan rioya etilishini, shuningdek, “O‘zbekiston temir yo‘llari” davlat-aksiyadorlik kompaniyasi va transport qurilishi korxonalarida qozonxonalar va ko‘tarish inshootlaridan xavf-xatarsiz foydalanilishini nazorat qiluvchi O‘zbekiston Respublikasining temir yo‘l ma’muriyati funksiyalarini amalga oshiradi.

2. “O‘zdavtemiryo‘lnazorat” inspeksiyasi o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisining qarorlariga va boshqa hujjatlariga, O‘zbekiston Respublikasi Prezidentining farmonlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga hamda mazkur Nizomga amal qiladi.

3. O‘zbekiston Respublikasi Temir yo‘llarda yuk va yo‘lovchilar tashish xavfsizligini nazorat qilish davlat inspeksiyasi tizimiga hududiy filiallar — Toshkent, Farg‘ona, Buxoro, Orolbo‘yi va Qashqadaryo filiallari hamda Atrof muhit muhofazasi bo‘yicha temir yo‘l ilmiy-ishlab chiqarish markazi kiradi.

4. O‘zbekiston Respublikasi Temir yo‘llarda yuk va yo‘lovchilar tashish xavfsizligini nazorat qilish davlat inspeksiyasi o‘z faoliyatini davlat boshqaruvi boshqa organlari, huquqni muhofaza qiluvchi organlar, mahalliy davlat hokimiyati organlari, jamoat birlashmalari va tashkilotlari bilan o‘zaro hamkorlikda olib boradi.

5. “O‘zdavtemiryo‘lnazorat” inspeksiyasining o‘z vakolatlariga tegishli masalalar bo‘yicha qabul qilgan qarorlari vazirliklar, idoralar, korxonalar, muassasalar va tashkilotlar, temir yo‘l transporti xizmatlari ko‘rsatuvchi yoki ulardan foydalanuvchi yuridik va jismoniy shaxslar tomonidan bajarilishi majburiy hisoblanadi.

6. “O‘zdavtemiryo‘lnazorat” inspeksiyasi yuridik shaxs hisoblanadi, O‘zbekiston Respublikasi Davlat gerbi tasviri tushirilgan, o‘z nomi yozilgan muhrga ega bo‘ladi.

7. Quyidagilar “O‘zdavtemiryo‘lnazorat” inspeksiyasining asosiy vazifalari hisoblanadi:

O‘zbekiston Respublikasi temir yo‘l transportida yuk va yo‘lovchilar tashish xavfsizligi ta’minlanishi ustidan davlat nazoratini amalga oshirish;

temir yo‘l transporti sohasidagi faoliyat litsenziyalanishini tashkil etish;

temir yo‘llarda yuk va yo‘lovchilar tashish xavfsizligini ta’minlashga yo‘naltirilgan oldini olish chora-tadbirlarini ishlab chiqish va ularning bajarilishini nazorat qilish;

O‘zbekiston Respublikasi temir yo‘llaridan texnik foydalanish bo‘yicha normativ hujjatlarni ishlab chiqish, tasdiqlash va ularning bajarilishini nazorat qilish;

loyihalarni ekspertizadan o‘tkazishda va temir yo‘l transporti obyektlarini, mahsulotlarini va texnologiyalarini, ularning belgilangan talablarga muvofiqligi jihatidan, doimiy yoki vaqtinchalik foydalanishga qabul qilish ishlarida qatnashish;

vazirliklar, idoralar, muassasalar, korxonalar va tashkilotlarning o‘z faoliyatini temir yo‘l transporti sohasida amalga oshiruvchi xodimlarining texnik foydalanish qoidalarini va yo‘riqnomalarni bilishini komissiya tuzib tekshirish;

temir yo‘llarda yuk va yo‘lovchilar tashish xavfsizligini ta’minlash masalalarida xorijiy davlatlar va xalqaro tashkilotlar bilan xalqaro hamkorlik qilish.

8. “O‘zdavtemiryo‘lnazorat” inspeksiyasi o‘ziga yuklangan vazifalarga muvofiq quyidagi funksiyalarni bajaradi:

tegishli vazirliklar, idoralar, korxonalar, muassasalar va tashkilotlar tomonidan O‘zbekiston Respublikasida amalda bo‘lgan O‘zbekiston Respublikasi temir yo‘llarida texnik foydalanish qoidalariga, poyezdlar harakati va manevr ishlari yo‘riqnomasiga, signalizatsiya va aloqa yo‘riqnomasiga, shuningdek, temir yo‘l transporti texnika vositalarining avariyasiz ishlashini tartibga soluvchi boshqa yo‘riqnomalar va normativ hujjatlarga rioya qilinishi ustidan davlat nazoratini olib borish;

temir yo‘l transportida yuk va yo‘lovchilar tashish bo‘yicha faoliyatni litsenziyalashni tashkil etish;

tegishli vazirliklar, idoralar, korxonalar, muassasalar va tashkilotlar tomonidan poyezdlar harakati xavfsizligini ta’minlashga va temir yo‘l transportida yuk va yo‘lovchilar tashish xavfsizligini ta’minlovchi texnik vositalarning ishonchliligini oshirishga qaratilgan oldini olish tadbirlari ishlab chiqilishi va belgilangan muddatlarda amalga oshirilishi ustidan davlat nazoratini olib borish;

temir yo‘l transporti sohasida yuk va yo‘lovchilar tashish xavfsizligini ta’minlash bo‘yicha normativ-huquqiy hujjatlarni ishlab chiqish, tasdiqlash va ularning vazirliklar, idoralar, korxonalar, muassasalar va tashkilotlar tomonidan bajarilishini belgilangan tartibda nazorat qilish;

loyihalarni ekspertizadan o‘tkazish va obyektlarni, mahsulotlarni va texnologiyalarni, ularning temir yo‘l transporti sohasidagi belgilangan talablarga muvofiqligi jihatidan, foydalanishga qabul qilish ishlarini amalga oshirish;

“O‘zbekiston temir yo‘llari” davlat-aksiyadorlik kompaniyasining lavozimga yangidan tayinlanayotgan xodimlarining, shuningdek, vazirliklar, idoralar, muassasalar, korxonalar va tashkilotlarning o‘z faoliyatini temir yo‘l transporti sohasida amalga oshiruvchi xodimlarining texnik foydalanish qoidalarini va yo‘riqnomalarni bilishini belgilangan tartibda komissiya tuzib, vaqti-vaqti bilan tekshirish;

O‘zbekiston Respublikasi hududida yuz bergan favqulodda hodisalar (avariya, halokat)ga oid xizmat tekshiruvlari o‘tkazilishida ishtirok etish hamda MDHning boshqa mamlakatlari va xorijiy mamlakatlar hududida yo‘lovchi tashish poyezdlari bilan bo‘lgan temir yo‘l hodisalariga oid xizmat tekshiruvini o‘tkazishda belgilangan tartibda ishtirok etish;

vazirliklar, idoralar, muassasalar va tashkilotlar tomonidan o‘tkazilayotgan poyezdlar harakati xavfsizligi talablari buzilishining xizmat tekshiruvlari to‘g‘riligini nazorat qilish;

vazirliklar, idoralar, korxonalar, muassasalar va tashkilotlar tomonidan poyezdlar harakati xavfsizligi talablari buzilishi hisobini yuritish hamda tahlil qilish;

O‘zbekiston Respublikasi hududida harakat xavfsizligi talablarini buzish hollarini hamda ularning sabablarini tasniflash va ular yuzasidan xizmat tekshiruvi o‘tkazish tartibi bo‘yicha normativ hujjatlarni ishlab chiqish va tasdiqlash;

temir yo‘l transporti obyektlarini tayyorlovchi, quruvchi va ulardan foydalanuvchi korxonalar va tashkilotlarning poyezdlar xavf-xatarsiz harakatlanishini ta’minlash yuzasidan ishlarini texnik tekshirishni tashkil etish va belgilangan tartibda o‘tkazish;

temir yo‘l transportida xavfli yuklar, qurol-yarog‘lar, harbiy texnika, harbiy mol-mulk, portlovchi moddalar va buyumlar, shuningdek, harbiy kontingentlarni tranzit tashishda xulosalar berish;

“O‘zbekiston temir yo‘llari” davlat-aksiyadorlik kompaniyasi hamda transport qurilishi korxonalarida qozonxona obyektlari va ko‘tarish inshootlarini saqlash va ulardan xavf-xatarsiz foydalanish bo‘yicha qoidalar va yo‘riqnomalar, normativ hujjatlarga rioya etilishini nazorat qilish.

temir yo‘l transporti sohasida tashuvchilarning yo‘lovchilar hayoti, sog‘lig‘i va (yoki) mol-mulkiga zarar yetkazganlik uchun qonunda belgilangan o‘z fuqarolik javobgarligini majburiy sug‘urta qilish bo‘yicha majburiyati bajarilishini nazorat qilish;

“O‘zdavtemiryo‘lnazorat” inspeksiyasi o‘ziga yuklangan vazifalar va funksiyalarni bevosita, shuningdek, o‘ziga qarashli hududiy filiallar orqali hal qiladi.

9. “O‘zdavtemiryo‘lnazorat” inspeksiyasi o‘ziga yuklangan vazifalar va funksiyalarni bajarish uchun quyidagi huquqlarga ega:

temir yo‘l transporti sohasida harakat xavfsizligini ta’minlash bo‘yicha normativ-huquqiy hujjatlarning bajarilishini belgilangan tartibda nazorat qilish;

davlat nazoratini amalga oshirish bilan bog‘liq qoidalar, yo‘riqnomalar, nizomlar va boshqa normativ-huquqiy hujjatlarni belgilangan tartibda tasdiqlash;

o‘z faoliyatini temir yo‘l transporti sohasida amalga oshiruvchi vazirliklar va idoralar, muassasalar va tashkilotlarning korxonalari obyektlarini belgilangan tartibda tekshirish;

harakatlanadigan tarkibni va temir yo‘l transporti sohasidagi boshqa texnik vositalarni yaratish (qurish), sinab ko‘rish, seriyali ishlab chiqarish, foydalanishga qabul qilishda qatnashish;

tegishli vazirliklar, idoralar, korxonalar, tashkilotlardan hujjatlarni, tadbirlar rejalarini talab qilib olish, shuningdek, temir yo‘llarda yuk va yo‘lovchilar tashish xavfsizligini ta’minlash bilan bog‘liq masalalar bo‘yicha, shu jumladan, yuk va yo‘lovchilar tashish xavfsizligi qoidalari buzilishi hollarini tekshirish masalalari bo‘yicha hisobotlarni eshitish;

temir yo‘llarda yuk va yo‘lovchilar tashish xavfsizligini ta’minlash masalalari bo‘yicha qoidalar, yo‘riqnomalar, buyruqlar va ko‘rsatmalarni buzayotgan shaxslarga nisbatan O‘zbekiston Respublikasining amaldagi qonun hujjatlariga muvofiq choralar ko‘rish;

temir yo‘l transporti texnika vositalaridan foydalanishni va ishlarni amalga oshirishni to‘xtatib turish, odamlarning hayoti va salomatligiga, yuk va yo‘lovchilar tashish xavfsizligiga xavf soluvchi nosozliklar tufayli peregonlarda, stansiyalarda va kirish yo‘llarida poyezdlar harakatini to‘xtatish yoki harakat tezligini cheklash to‘g‘risida ko‘rsatmalar berish;

lokomotivlar, motor vagonli harakatdagi sostav, vagonlar, yo‘llar va o‘tkazish stryelkalari, signalizatsiya va aloqa qurilmalari, bog‘lanish tarmoqlari sifatsiz ta’mirlangan hollarda ularni tuzatishdan chiqarishni taqiqlash;

lokomotivlar, vagonlar, yo‘llar, signalizatsiya va aloqa hamda elektr ta’minoti tizimlari va temir yo‘l transportining boshqa texnika vositalarining belgilangan tartib buzilgan holda o‘tkazilgan komissiya tekshiruvlari natijalarini bekor qilish;

poyezdlar harakati xavfsizligi talablari va standartlar buzilishi hollari bo‘yicha materiallarni belgilangan tartibda tegishli organlarga berish;

temir yo‘l transporti sohasida tashuvchilarning yo‘lovchilar hayoti, sog‘lig‘i va (yoki) mol-mulkiga zarar yetkazganlik uchun qonunda belgilangan o‘z fuqarolik javobgarligini majburiy sug‘urta qilish bo‘yicha majburiyati bajarilmaganligi uchun aybdor shaxslarni qonun hujjatlarida nazarda tutilgan javobgarlikka tortish haqida sud organlariga taqdimnomalar kiritish;

tegishli vazirliklar, idoralar, shuningdek tashkilotlar va korxonalarga (ayni paytda ushbu tashkilotlar va korxonalar tizimiga kiruvchi vazirliklar va idoralarni xabardor qilgan holda) o‘z vakolatiga kiruvchi masalalar bo‘yicha poyezdlar harakati xavfsizligini ta’minlash yuzasidan ishlardagi aniqlangan buzilishlar va kamchiliklarni bartaraf etish haqida ko‘riladigan chora-tadbirlar to‘g‘risida axborot taqdim etish muddatini belgilagan holda bajarilishi majburiy bo‘lgan yozma ko‘rsatmalar berish;

tegishli vazirliklar, idoralar, muassasalar va tashkilotlar bilan kelishgan holda ularning vakillarini, shuningdek ularga bo‘ysunuvchi korxonalar, muassasalar va tashkilotlarning malakali mutaxassislarini favqulodda hodisalarga oid xizmat tekshiruvini o‘tkazishda ishtirok etish, favqulodda hodisalarga oid xizmat tekshiruvini o‘tkazish bilan bog‘liq masalalar bo‘yicha ekspertizalar o‘tkazish va texnikaviy maslahatlashish uchun jalb qilish;

poyezdlar harakati, yuk va yo‘lovchilar tashish xavfsizligini ta’minlash sohasidagi faoliyatni amalga oshirish va belgilangan tartibda tekshiruvlar o‘tkazish bilan bog‘liq transport, aloqa vositalari, xizmat xonalaridan, xizmat vagonining to‘siqsiz yurishidan, shuningdek boshqa huquqlardan foydalanish;

O‘zbekiston Respublikasi bo‘ylab safar qilishda lokomotivlar va poyezdlar brigadalari tarkibiga “O‘zdavtemiryo‘lnazorat” inspeksiyasi xodimlarini belgilangan tartibda tekshiruvchilar sifatida kiritish.

“O‘zdavtemiryo‘lnazorat” inspeksiyasi O‘zbekiston Respublikasining qonun hujjatlariga muvofiq boshqa huquqlarga ham ega bo‘lishi mumkin.

10. “O‘zdavtemiryo‘lnazorat” inspeksiyasi o‘ziga yuklangan vazifalarning va O‘zbekiston Respublikasining qonun hujjatlariga muvofiq o‘z vakolati doirasida qabul qilingan qarorlarning bajarilishi uchun javob beradi.

“O‘zdavtemiryo‘lnazorat” inspeksiyasi va uning hududiy filiallari mansabdor shaxslari xatti-harakatlari ustidan shikoyat qilish qonun hujjatlariga muvofiq amalga oshiriladi.

11. “O‘zdavtemiryo‘lnazorat” inspeksiyasiga O‘zbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan boshliq rahbarlik qiladi.

Boshliqning belgilangan tartibda O‘zbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod qilinadigan ikki nafar o‘rinbosari, shu jumladan bir nafar birinchi o‘rinbosari bo‘ladi.

“O‘zdavtemiryo‘lnazorat” inspeksiyasi boshlig‘i maqomiga ko‘ra vazirning birinchi o‘rinbosariga, “O‘zdavtemiryo‘lnazorat” inspeksiyasi boshlig‘ining birinchi o‘rinbosari va o‘rinbosari tegishli ravishda vazir o‘rinbosarlariga tenglashtiriladi.

12. O‘zbekiston Respublikasi “O‘zdavtemiryo‘lnazorat” inspeksiyasi boshlig‘i:

“O‘zdavtemiryo‘lnazorat” inspeksiyasi faoliyatiga yakka boshchilik asosida umumiy rahbarlikni amalga oshiradi hamda unga yuklangan vazifalar va funksiyalar bajarilishi uchun shaxsan javob beradi;

markaziy apparatning tarkibiy bo‘linmalari va inspeksiyaning hududiy filiallari to‘g‘risidagi nizomni belgilangan tartibda tasdiqlaydi;

xodimlarning belgilangan soni doirasida “O‘zdavtemiryo‘lnazorat” inspeksiyasi tuzilmasiga o‘zgartirishlar kiritadi, shtatlar jadvalini, shuningdek, O‘zbekiston Respublikasi Moliya vazirligi bilan kelishgan holda inspeksiyaning xarajatlari smetasini tasdiqlaydi;

markaziy apparat tarkibiy bo‘linmalari va Inspeksiyaning hududiy filiallari to‘g‘risidagi nizomlarni belgilangan tartibda tasdiqlaydi;

“O‘zdavtemiryo‘lnazorat” inspeksiyasi xodimlarini belgilangan tartibda lavozimga tayinlaydi va lavozimdan ozod qiladi.

Boshliq qonun hujjatlariga muvofiq boshqa vakolatlarni ham amalga oshiradi.

13. “O‘zdavtemiryo‘lnazorat” inspeksiyasining hududiy filiallari bevosita “O‘zdavtemiryo‘lnazorat” inspeksiyasi boshlig‘iga bo‘ysunadi.

14. “O‘zdavtemiryo‘lnazorat” inspeksiyasi xodimlariga belgilangan namunadagi kiyim-bosh kiyib yurishga ruxsat berilgan.

15. “O‘zdavtemiryo‘lnazorat” inspeksiyasi xodimlariga qonun hujjatlariga muvofiq O‘zbekiston Respublikasi temir yo‘l transportida belgilangan mehnatga haq to‘lash va imtiyozlar tizimi joriy etiladi.

16. “O‘zdavtemiryo‘lnazorat” inspeksiyasini tugatish yoki qayta tashkil etish O‘zbekiston Respublikasi qonun hujjatlariga muvofiq amalga oshiriladi.