O‘zbekiston Respublikasi Prezidentining “Kompyuterlashtirishni yanada rivojlantirish va axborot-kommunikatsiya texnologiyalarini joriy etish to‘g‘risida” 2002-yil 30-maydagi PF-3080-sonli Farmonini ijro etish yuzasidan hamda O‘zbekiston Respublikasining “Axborotlashtirish to‘g‘risida”gi va “Elektron raqamli imzo to‘g‘risida”gi qonunlarini izchil amalga oshirish maqsadida:

1. 2010-yilgacha telekommunikatsiya tarmoqlarini rivojlantirish, ma’lumotlarni uzatish va axborot-kommunikatsiya texnologiyalarini qo‘llashning maqsadli yo‘nalishlari 1-ilovaga* muvofiq;

2010-yilgacha mahalliy davlat boshqaruvi va davlat hokimiyati organlari faoliyatida axborot-kommunikatsiya texnologiyalarini qo‘llash dasturi 2-ilovaga* muvofiq;

Milliy axborot-qidiruv tizimini shakllantirish va rivojlantirish dasturi 3-ilovaga* muvofiq tasdiqlansin.

Kompyuterlashtirish va axborot-kommunikatsiya texnologiyalarini rivojlantirish bo‘yicha Muvofiqlashtiruvchi Kengash (A.N. Aripov) o‘z majlislarida ushbu qaror bilan tasdiqlangan maqsadli yo‘nalishlar va Dasturlar bajarilishini muntazam ravishda muhokama etib borsin.

2. Vazirliklar, idoralar, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bir oy muddatda, tasdiqlangan maqsadli yo‘nalishlar va dasturiy tadbirlardan kelib chiqqan holda, axborot texnologiyalari va elektron hujjat aylanmasini qo‘llash, Internet tarmog‘ida axborot resurslarini shakllantirish va ularni muttasil yangilab borish bo‘yicha aniq tadbirlarni ishlab chiqsin hamda ularni tasdiqlash uchun kompyuterlashtirish va axborot-kommunikatsiya texnologiyalarini rivojlantirish bo‘yicha Muvofiqlashtiruvchi Kengashga kiritsin.

3. Aloqa, axborotlashtirish va telekommunikatsiya texnologiyalari davlat qo‘mitasi elektron raqamli imzodan foydalanish sohasida maxsus vakolatli organ etib tayinlansin.

4. O‘zbekiston Aloqa va axborotlashtirish agentligi:

bir oy muddatda maxsus o‘quv kurslarini ishlab chiqishni hamda tasdiqlangan maqsadli yo‘nalishlar va dasturlar amalga oshirilishi uchun mas’ul bo‘lgan mahalliy davlat boshqaruvi va davlat hokimiyati organlarining mutaxassis kadrlarini axborot texnologiyalarini qo‘llash hamda elektron hujjat aylanmasini tadbiq etish, Internet tarmog‘ida axborot resurslarini shakllantirish bo‘yicha amaliy ko‘nikmalarga har yili o‘qitib borishni ta’minlasin;

2006-yilning I choragi oxirigacha vazirliklar va idoralar bilan birgalikda Internet tarmog‘ida milliy axborot-qidiruv tizimini yaratsin va unda umum foydalana oladigan axborot resurslarini joylashtirsin, ushbu tizimni yanada kengaytirish va uning jahon axborot maydoni bilan integratsiyalashuv choralarini ko‘rsin;

ikki oy muddatda elektron raqamli imzolar kalitlarini ro‘yxatdan o‘tkazish markazlarini davlat tomonidan ro‘yxatga olish tartibi hamda ularning faoliyati to‘g‘risidagi nizomni ishlab chiqsin va belgilangan tartibda O‘zbekiston Respublikasi Vazirlar Mahkamasiga kiritsin.

5. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosari A.N. Aripov zimmasiga yuklansin.